نبشتانک: اوستانی دیار ءَ زندگیں پیر زال
نبشتہ کار :عبدالواجد بلوچ
دی بلوچستان پوسٹ
انچو سما بیت کہ اے دیار ءَ آسے کپتگ، چیھانٹانی توار آزمان ءِ دلبند ءَ تْراکینگ ءَ اَنت، بلے ھُدا بے سما ات، آ پیرزال ءِ رتکگیں دیم ءُ چمّانی ارسانی گندگ ءَ پد یک ساھتے مردم ھبکّہ بوت کہ ھُدا ءِ بے سمائی پہ اے دیار ءَ جْوانیں نیمونے نہ انت، پرچا کہ ھمائیں من گندگ ءَ اتاں آ پیرزال وتی کاپر ءِ دیم ءَ دِرتکگیں تگرد ءَ چیرا پچیں مُسلّہ ءِ سرا نشتگ دست ے بُرزاد ات اَنت گوں ھُدا ءَ ھمتْران ات۔
پیرزال ءِ اُمبر کساس ھشتاد سال بوتگ ات، بلئے انچو گندگ بوت کہ سک دیر انت پیرزال ءِ ودار آسر نہ انت، ھو کساس یازدہ سال ات کہ زورآوریں حاکماں پیرزال ءِ پیری ءِ اسا چرائیاں پُلتگ ات، آ کسانُکیں زھگانی لُنٹانی ھُشکی ءُ دِرتگیں سواسانی تاپَتائی بزگیں داستانے ءِ رنگ ءَ وتارا پیش دارگ ءَ اتاں، گْونڈل ءَ وتی پت ندیستگ ات، پہ بے سمائی درّائینت ئِے ھو کہ منی پت ءَ برات نیست، چہ بے براتی ءَ مزنیں منّات ءِ چم یازدہ سال اِنت ارسیگ اَنت کہ اے ارسانی دریا ھشک بوھگ ءِ نام ءَ نہ زانت۔
من داں چمّ پچ کتگاں ھمائیں وتی مزنیں منّات ءَ گنداں نشتگ مُسلّہ ءِ سر ءَ بیست ءُ چار ساھت سر ء ماں سجدہ انت کَے ءَ سجدہ کنگ ءَ انت؟ اجبیں نگاھے ءَ گوں گْونڈل ءَ من ءَ پُرس ات! من اجکّہ بوتاں کہ یازدہ سالی کسانیں زھگ وتی اندر ءَ یک پُھتویں انسانے داریت، اے پُھتوی حاکمانی زورآوری ءِ برورد ات۔
وھدے من کمّے دیم ءَ رھادگ بوتاں تہ سما بوت اے کلّگ ءَ وتی دلبند ءَ کبرانی جھانے آباد کتگ ءُ ھر مانش ءِ سر ءَ سئے رنگی ئیں بیرک اے نشون ءَ دیگ ءَ ات اَنت کہ اے کلّگ ءَ ملّیں مڑوکانی بازیں کارستے وتی باتن ءَ جاگہ داتگ، زوریں حاکم پہ زور وتی بادشاھی ءَ داشت کنت، بلئے دیم ہونی دیوکیں شھزادگانی پہ زمین گنوکی ءَ ھچ پئیم ءَ سْرین پروش کت نہ کنت ھمے سبب ات کہ اے مانشانی سر ءَ سئے رنگی ئیں بیرک پہ شان گوں گوات ءَ چنڈگ ءَ ات اَنت، دو مانش ءِ مْیان ءَ پیرمردے نندوک ات، من ءَ سما بیت کہ تہ ءَ چہ پْرُشتگیں کماش سر زاھرا تیار ءُ تمرد انت، مانش ءِ سر ءَ نندگ ءُ دست ءِ شھارگ مانش ءِ سر ءَ رتکگیں ریک ءُ ڈوکاں پہ وڑ سینگارگ، اے نہ کٹّوکیں مھر ءِ کسّہ ءَ بیان کنگ ءَ ات انت من کمّو دیم ءَ کنز اتاں لوٹ ات کہ چیزے بگُشاں، بلئے پیرمرد ءَ پیسرا درّائینت “منی زند ءِ متاہ ءُ مڈّی منی زھگ ءُ آئی ءِ نوک سوریں بانور ات کہ سیر ءِ روچ ءَ زورآوراں مئے ھَلک ءَ اُرش کت ءُ چرے وئیل ءَ منی سالونکیں زھگ ءُ آئی ءِ بانور شھید بوت انت، ھمائیں کہ اشانی رؤگ ءَ پد من اے مانشانی سر ءَ زمین ءِ مھرءِ ھمراہی ءَ وتی زندءِ پشکپتگیں وھد ءَ تیلانک دیگ ءَ آں اے گپّانی اشکنگ ءَ پد من پھم ات کہ ھو ھُدا نیست، اگاں ھست، گڑا اے دیار ءَ زاھری نہ دنت۔
اے زمین ءِ سر ءَ چشیں ھزاراں داستان ات انت، اے داستانانی تہا مزن مزنیں کارست کہ وتی اندر ءَ ھلاس نہ بُوھوکیں کسّہ بیان کنگ ءَ ات اَنت-
کبرستان ءِ یک کُنڈے ءَ آ جنیں زھگ ءِ دِرتگیں پوشاک ءُ پادشپادی ءِ ندارگ بے ھیال بوت نہ کنت کہ آ جنیں زھگ چہ انسانی کٹّ ءَ دراَتکگ ات، کش ءَ نندوکیں پیرزال یکشل ءَ آئی ءِ بدن ءِ سر ءَ شالے پر دیگ ءَ ات ءُ آئی ءِ سِتر ءَ چیردیگ ءَ ات کہ حاکمانی زورآوری ءَ پیش دارگ ءَ ات، بلے ھُدا گندگ نہ بوت، پاداں زور دیم ءَ بران ات اَنت، وھدے نزیک بوت آں من چہ مات ءَ پُرس ات چی ءَ؟ چُش پرچا؟
مات ءَ گوں ارسیگیں چمّاں درّائینت کہ منی جنیں چُک چہ بوتن ءَ چُش نہ بوتگ، بلکیں گوستگیں پنچ سال ءِ ھون ھاریں زند ءِ کسھانی یک کارستے کہ ھما وھد ءَ سیر ءِ بشانگ ءَ ات کہ آئی ءِ زندگی ءِ ھمسپر ءِ تیر سُپتگیں جون سوگات کنگ بوت اے کَے ءَ کتگ ات انت ءُ چی ءَ کتگ ات انت؟ وتی جند ءِ شوھازگ ءُ وتی باتن ءِ آواز ءَ لبّیک کنگ گناہ نہ ات، بلئے اے دیار ءَ بے ھُدائی ءِ سبب ءَ بنی آدمانی ساہ زورگ ھم بلاھیں گناھے زانگ بوت، اے کسھانی آسر ھما جھان انت کہ بنی آدمانی جنت زانگ بیت۔ وتی وتن، وتی سرڈگار، وتی زبان، وتی پجّار، ھمیشانی رکینگ ءَ اے کبرستان آباد ات انت ءُ پیرزال، پیرمردیں کماش، گنوکیں جنیں زھگ پہ وتی جنت ءِ شوھازگ ءَ ہلاس نہ بوھوکیں دردانی آماچ اتنت، بلئے تکانسر نہ ات اَنت آھانی دیم ءِ بچکندگزال سوبے ءِ نشون ءَ دیگ ءَ اِت اَنت –
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔