نبشتانک: منی گار بوگ ءَ ساری
نبشتہ کار: براھیم گُؔل
چارُمی بَھر
دی بلوچستان پوسٹ
مِھروان ! چم پہ گِندگ ءُ گوش پہ تھنا اِش کنگ ءِ واستا ھُدا ءَ بنیادم ءَ را نہ داتگ اَنت،بلکیں دگہ اوں ھزار کار کنگ ءِ توپیک کنگی اِنت۔
مِھروان! من ءَ چہ پد زُبان ءِ لَگام ءَ یلو بوگ ءِ ھِچ موہ مہ دئے،پرچا کہ اگاں یک شِپانکے وتی رمگ ءِ ھیال ءَ مہ دار ایت آئی ءِ رمگ ءَ گُرک وارت ، اگاں گُرک نہ وارت اش الّم دگرے یے ڈگاراں چَر ایت ئِے من پد ءَ برے برے زُبان ءِ لھتیں جُھد کاراں گِنداں من سک بژنیگ باں ،من باز گَلانی باسک دیستگ اَنت کہ آ پہ نام برجم دارگ بوتگ اَنت ءُ اود ءَ پہ زُبان ءَ ھِچ کار کنگ ءَ نہ اَنت ،اَنچش کہ اوتھل لسبیلہ ءَ یک روچے منی سر یک بلوچی لبزانکی گَلّے ءِ تہ ءَ کپت کہ من دیست اود ءَ ھِچ کار اوں نہ بوگ ءَ اَت ، اود ءَ دُراھیں سنگت پہ وتی اُکدہ ءَ ھودوک اِت اَنت، یکے وتی کمک کاری ءُ یکے وتی پاگواجائی ءَ ۔
مھروان ! منی گُشگ ءِ مول ءُ مُراد کہ وتی زُبان ءَ پہ نام ھِچ مہ چار ھرچی کن ئے پہ سِتک بِکن، ھرچی کن ءِ پہ مُھکمی بِہ کن،چو مہ بیت کہ باندا روچ من ءُ تو گوں وتی زُبان ءَ ملامت کنگ بِہ بہ ایں ، چو مہ بیت کہ من ءَ چہ پد منی زُبان اوں اوشت ءِ آماچ بِہ بیت چو مہ بیت کہ ھما سنگتانی گَلّ ءِ وڑ ءَ پہ نام زُبان برجم دارگ بِہ بیت، اِنّاں مِھروان من ترا پیسر ءَ گُشتگ کہ ترا بےکساس مُھکم بوگی اِنت،ترا سک باز کار کنگی اِنت،ترا وتی زُبان ھپتیں آزمان ءَ سر کنگی اِنت،ترا داں تئی آتراپ ءِ ھمُک درچک ءُ دار بِہ زان اَنت کہ ترا یک مُھکمیں زُبانے ھست ءُ آ زُبان ءِ پاسبان چو کوھساریں سرمچار ءَ اوشتاتگ اَنت، من ءَ چہ پد زُبان ءَ تند بندگ ءِ ھِچ موہ مہ دئے۔
مِھروان! اے کِشک کہ من زُرتگ ءُ رَوگ ءَ آں ، اے کِشک ءَ جھل ءُ بُرز سک باز مان، اے کِشک ءَ ھزار کُنٹگ ھست، ھر ھمُک گام ءَ پاد تراول بنت، ھون بنت، اے کِشکانی مُساپِر کُجام اوں وھد ءَ پُلگ بنت، بلے ترا جُنزگی اِنت جند ئے زُبان اِنت ءُ آئی ءِ ھاتر ءَ ترا ھمُک کِشک ءِ کُنٹگ دُور کنگ ءُ جُنزگی اِنت،پرچا کہ اے مئے جِند ءِ مات اِنت،اگاں پہ مات ءَ من ءُ تو درد ءُ رنج اوپار کُت نہ کناں گُڑا مئے زندگی ءِ ھِچ مول نیست، یک بَچّے پہ مات ءَ ندر بوت نہ کنت گُڑا آ بَچ اے مات ءِ چُک گُشگ نہ بیت اَنچو کہ ” جاھے ءَ بلوچی زُبان ءِ شھزانت سید زھور شاہ ھاشمی ساھب گُش ایت کہ ، اگاں یک راجے وتی جِند ءِ ماتی زُبان ءَ وانگ ءُ نبیسگ مہ زانت گُڑا آ وانندگے گُشگ نہ بیت” اگاں ما بِہ چاریں واجہ راست گُشتگ،پرچا کہ بےزُبان ءَ ھِچ راج زندگ نہ مان ایت ءُ پہ زندگ مانگ ءَ وتی زُبان زندگ کنگی اِنت،اگاں راجے کہ جِند ءِ زُبان ءَ نبشتہ کُت نہ کنت ءُ ونت نہ کنت گُڑا آ راج چی پیم زندگ مان ایت !-
مِھروان! من بِہ گِندئے آ جاگہ ءَ نہ رس اِت آں ءُ ساری گار بوتاں گُڑا منی ھمے کار ترا کنگی اِنت،ترا تئی سرجمیں راج پہ وتی زُبان ءِ وانگ ءُ زانگ ءُ پوہ بوگ ءَ لاچار کنگی اِنت،تو وتی راج ءَ ھما جاگہ ءَ بیار کہ تئی راج ءِ ھر چُک تئی زُبان ءِ وانگ ءُ نبشتہ کنگ بِہ زانت،تئی زُبان کہ زندگ بیت گُڑا تئی راج زندگ بیت،اگاں تئی راج زندگ بیت گُڑا تو بِزاں کہ منزل ءَ سرئے ءُ تئی زُبان زِندگ اِنت مِھروان پد ءَ گِندئے تئی زُبان ءَ ھرکس زانت ءُ ھرکس ترا یک جِتائیں پجّارے دنت گُڑا من زاناں کہ تو منی کول پیلو کُتگ اَنت۔
مِھروان! تو بلکیں پد ءَ ھمے بِہ جیڑئے کہ من یک گُنگیں راجے ءِ زُبان ءِ ھاتر ءَ جُھد کُت نہ کناں،اے راج وتی زُبان ءَ چہ گیش دگہ زُباناں گوں شوک داریت اِنّاں مِھروان اگاں تئی راج چہ واب ءَ بُست نہ کنت ءُ وتی زُبان ءِ گمان ءَ نہ اِنت گُڑا تو اے گُنگیں راج ءِ زُبان بُہ بو، تو اے راج ءَ چہ واب ءَ پاد بِہ کن،اے راج الّم پاد کیت بَلے ترا جُھد کنگی اِنت، داں ھما وھد ءَ جُھد کنگی اِنت کہ تئی گُنگیں راج آشنا بِہ بیت ءُ بِہ زانت کہ مئے زُبان ءِ زندگ کنگ ءِ اولی گامگیج ترند کنگی انت اے ھبر ءَ کدی مہ جیڑ کہ مئے جِند ءِ زُبان ءِ واھند دَری زُبان ءَ نبشتہ کنگ ءَ اَنت ءُ ما پرچا بلوچی ءِ سر ءَ بہ جُنز ایں؟ اے ھبر ءَ ھچبر مہ جیڑ ، مُدام ھمے بِہ جیڑ کہ تئی ھمُک اِسرار گوں زُبان ءَ بندوک اِنت بس،تئی زُبان تئی دُنیا اِنت،تو اگاں زُبان زندگ کُت گُڑا منی ھیال ءَ تئی مات سک گَل بیت،تئی مات چہ گَل ءَ جاگہ نہ کنت ءُ پد ءَ تئی مات ھمے جیڑ ایت کہ منی جُھد ءِ مستریں سرمچار توئے۔
روان اِنت-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔