نبشتانک: ماہ شان، من ءُ دردانی موسم
نبشتہ کار: مھروان کمبر
دی بلوچستان پوسٹ
ماھو! کسانی اَت، زمستان ءِ سارتیں شپ اِت اَنت، یا کہ گرماگ ءِ لُنج ءُ تاموریں شپ، ھردیں کہ من واب نہ کپت آں گُڑا مات ءَ پہ منی واب گیجگ ءِ ھاتر ءَ کِسّہ جت مُدام کِسّھانی تہ ءَ ھَست اَت یک بادشاھے ءُ بادشاہ ءَ ھَست اَت زیبائیں جنکے کہ شپانک ءِ اِشک ءَ شیدا اَت، بلے جنک بندیگ اَت ممّانی، جِننانی، شیرانی باریں دگہ کُجام کُجام رسترانی شوانگ جنک ءِ شوھاز ءَ ھمے رسترانی گون ءَ جنگ ءَ پہ سرگپتگ اَت کہ من واب شُت آں ءُ کِسّہ بھ آسر نہ بوت۔
ماھو! اے کِسّہ انگت ھَست اَنت بلے اے کِسّھانی کارست مَٹ اَنت نوں کِسّھانی تہ ءَ اَپس، شیر، شِپانک، بادشاہ، بادشاہ ءِ جنک، ممّ، جن ءُ ماڑیانی جاگہ ءَ بکتر بند گاڑیاں، بوٹ پادیں سپائیاں، تھاریں شپانی بے وھدیں پاساں لوگانی دور کنگ ءُ گِسّانی ماندارگ اَنت ھزاراں ورنایانی بیگواہ کنگ ءُ لاشانی دور دَیگ اَنت نوں دیر اِنت کہ وتی مکھیں مات ءَ چہ دیراں ، بلے ھردیں کہ من سال ءُ ماھانی سر ءَ مات ءِ ھال ءَ گراں گُڑا مات الم یک کِسّھے کار اِیت بلے اے کِسّہ نی من ءَ واب نہ گیج اَنت بلکیں گیشتر چمّانی واباں پُل اَنت ءُ آگھی ءِ سوگاتاں بکش اَنت۔
ماھو! اِنشپی ھم لھتیں انچیں درد چکاریں کِسّہ اَنت، لَھتیں ارسیگیں چم اَنت، درامدیں دَگ ءُ کِشک اَنت کہ منی چمّانی واب اَچ من پُل اَتگ اَنت ءُ کھریں شپ ءِ دامُن ءَ آگھی ءِ کُٹّ ءَ من ءَ دور اِش داتگ اَنچو گُمان بیت زندگی بس کِسّھے کہ آئی ءِ دُرستیں کارست بیگواہ کنگ بیتگ اَنت کارستانی پجّیگ ءَ منی چمّانی واب ھم بیگواہ کنگ بیتگ اَنت ءُ دگہ درامدیں واب زُور چمّانی تہ ءَ مان چِنگ بیتگ اَنت کہ اے واباں منی چمّانی روک اَچ من پُل اِتگ اَنت بس تھاری اِنت ، نہ من سُھردپیں بام ءَ دیست کن آں، نہ رولھی شینکانی تہ ءَ زردی ءِ رنگاں اے شپ انچو بے توار ءُ ویران اِنت گْوش ئے دُرستاں لڈّ اِتگ ءُ دوریں دیارے رپتگ اَنت۔
ماھو! منی بے تاھیریں دل ءِ بے تواریں دمکاں دردانی کاروانے جل اِتگ داں ھر گْور ءَ کہ چم روت ابیتکی اِنت برے برے چو ھم من ءَ گُمان بیت کہ من دردانی موسم ءَ ودی بوتگیں انچیں انسانے آں کدی درداں چہ گِسر بوت نہ کن آں، من درداں ھما درچکانی کہ بے موسم ءَ تپر ءِ دپ ءَ دَیگ بیتگ بوتگ آں من درداں ھما کدو زبھریں مُرگانی کہ تیرانی توار ءَ شپ ءِ تھاری ءَ دگہ دیاراں رپتگ اَنت من درداں یل داتگیں ھما بازار ءِ کہ بے تواری ءِ چادرے مانپوشتگ ءُ واب کپتگ من درداں ھما ماتانی کہ وتی آوار جتگیں بچّانی شوھاز ءَ برے شال ءُ برے اسلام آباد ءِ سارتیں دگاں ارساں گْوار اَنت من درداں ھما شپ آگائیں گْوھارانی کہ وتن پھازیں براتانی ھاتر ءَ دواھاں لوٹ اَنت۔ من درداں سمّی ءُ مھلب گونگیں زھگانی کہ وتی پِتانی ودار ءَ پریس کلب ءَ نشتگ ءُ واب کپتگیں مردُمانی زمیراں ٹوھینگ ءِ جُھد ءَ اَنت من درداں ھما وتن ءِ کہ آئی ءِ موکگ ءَ بچّ وتی ھوناں ریچان اَنت من درداں ھما زمین ءِ کہ آئی ءِ تھاریں شپانی مٹ کنگ ءَ ورنا سلاہ بند اَنت ءُ کوہ ءُ اگاراں پند جنان اَنت۔
ماھو! اے درد چکاریں موسمانی ساھیل ھما وھد ءَ مئے سر ءَ برجاہ مان اَنت وھدے ما اے موسمانی مٹ کنگ ءَ وت ءَ ساجو نہ کن اِیں اے تبد ءُ چاھڑیں موسم ھما وھد ءَ مٹ بنت وھدے ما گُلامی ءِ سانکلانی سِندگ ءِ ھاتر ءَ میدان ءَ درکپ اِیں میدان ءَ ما ھما وھد ءَ وتارا مُھکم کُت کن اِیں وھدے ما سما ءُ زانت ءَ چہ وتارا سرچکار کن اِیں سما ءُ زانت ھما وھد ءَ کَیت وھدے کہ ما گلزمین ءَ وان اِیں گُلزمین ءِ وانگ ھر کسی کارے نہ اِنت ، ءُ گُلزمین ءَ بس گلزمین شیدا ونت کن اَنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔