نمدی: نمدی یے پہ ڈاکٹر دین جان ءَ
نبشتہ کار: ھاتر اسلم
دی بلوچستان پوسٹ
دروت ڈاکٹر ساھب اُمیت اِنت تو وش ءُ سلامت ئے، تئی کَش ءُ کِرّ ءِ ھمساھِگ سلامت اَنت، تئی دوست ءُ ازیز وش ءُ شادان اَنت تئی کاروان ءِ باسک ھم مرادانی منگیراں اَنت-
بے وپائیں ھستی، چوناھا من تئی گوما سک گِلگدار آں پرچاکہ تو منی گْوستگیں نمدی ءِ پسو راہ نہ دات بلے پد ءَ منی دل ءَ انچو برداشت نہ بوت تئی وڑیں مھروان، وپادار، راج دوست ، انسان دوست ءُ وتن دوستے ءِ گوما گِلگدار بہ آں-
پد ءَ من دل ءَ جیڑیت بہ گِند ئے منی نمدی ترا سر نہ بوتگ یا دژمنے ءِ دست ءَ کَپتگ ءُ آئی ءَ گوں ھاکاں ھوار کرتگ دگہ اوں ھیالے چہ باتن ءَ چِست بوت منی وتن ءِ گوات کدی چو بے وپائی نہ کنت کہ راہ ءِ نیم ءَ نمدیاں دژمنے ءَ بہ دَنت اگاں دژمنے ءِ دست ءَ کپتگ ءُ آئی ءَ گوں ھاکاں ھوار کرتگ گڑا اے ڈیھ ءِ وشبوئیں ھاک آ نمدی ءَ دست ء وت گوات ءَ دَنت ءُ گْوش اِیت، اے نمدی ءَ وتن دوستیں دین جان ءَ سر بہ کن-
ڈاکٹر ساھب، من زان آں منی نمدی ترا اَلم سر بوتگ ، بلے تئی مھروانیں نَد ءِ نبشتہ کرتگ نمدی من ءَ سر نہ بوتگ یا تو نبشتہ نہ کرتگ یا تئی نمدی اَنگت راہ ءَ اِنت بابا جان، مئے گپ ءُ گِلگ سک باز اَنت ، مئے نَد ھم جواب دے اَنت اگاں ما دوازدہ سال ءِ کسھاں نبشتہ بہ کن ایں-
دین جان من ترا جُستے بہ کن آں؟ تو سرپد ئے تئی بیگواھی ءَ مرچی 12 سال سَرجم اِنت مرچی 12 سال ءِ سرجم بوگ ءَ، سمّی ءُ مھلب پد ءَ لاچار کرت اَنت پہ زھرشانی ءَ سمی ءُ مھلب ءَ گوں ھوار گُل بلوچستان گَمیگ اِنت کہ بابا دین جان کدی کیت؟ پرچاکہ تو یک انچیں ھستی یے بوتگ ئے ءُ تو ھرکسی دَرد ءُ رَنج مار اِتگ اَنت، ترا ھرکسی گم بوتگ. تو تھنا یک ڈاکٹر نہ بوتگ ئے تو سرجمیں راج ءِ واستا بوتگ ئے تو وتی گِران بھایں وھد پہ نِزوریں راج ءِ واستا ببا داتگ اگاں کسے ءَ را درد ءُ گم بوتگ، گڑا تو واب نہ کپتگ ئے کہ منی راج پرچا انچو بزگ اِنت؟-
ھستی،اے تئی مھروانی ءُ رھمدلی ءِ سبب اِنت کہ مرچی گونڈواں بِگر داں ورناہ ءُ کَماشاں دُرست تئی راھچار اَنت کہ تو کدی کا ئے؟. پرچاکہ تو یک رُژنائیں چِراگے بوتگ ئے تئی رُژن تھنا مَشکے ءَ اِنّاں بلکیں سرجمیں بلوچستان ءَ تَلان بوتگ ءُ تھاری دُور اوْشتاتگ تئی رژنائی ءِ سر ھیران بوتگ کہ یک بامرد ءِ جھد چوں سرجمیں بلوچستان ءَ ودّان اِنت؟ بابا، تئی اَناگھیں رَوگ ءَ پد، تھاری ءَ اے بزگیں راج ماں وتی ھمبازاں زُرتگ.اے تھاری روچ پہ روچ ودّان اِنت داں باریں کدینا؟-
دین جان ترا یاد بیت تو گوں شیرین مزاری ءَ گْوشتگ اَت، تو 15 مارچ ءَ چو سالونک ءَ بہ ئے ءُ کا ئے؟ مرچی تئی اے کول ءَ دو ماہ ءُ پانزدہ روچ سرجم بوتگ تو انگت نہ آتکگ ئے ترا باور کنت 15 مارچ ءَ سرجمیں ڈیھ ءِ ورناہ ءُ کماش، زھگ ءُ زالبول دُرست بس تئی راھچار اِت اَنت کہ دین جان پِیداک اِنت بلے آ روچ گوست تو نہ آھتک ئے-
ڈاکٹر نون ھدا ءَ بچار بیا تئی 12 سال ءِ بیگواھی ءَ سمّل ءُ مھلب سک گَمیگ ءُ پریشان کُرتگ اَنت دین جان تو وت یک ڈاکٹرے ئے تو شرتر زان ئے، اگاں یک مردمے ءَ را یک کسانے جیڑھے بہ بیت آ چنچو بے وس بیت؟ آئی ءَ را نہ واب کیت نہ آئی ورگ ءَ دل کیت نہ آ شری ءِ سر ءَ وتی وانگ ءَ دیم ءَ بُرت کُرت کنت پرچاکہ آ مجگی ‘دباؤ’ ءِ آماچ بیت گڑا 12 سال ءِ ودار مردم ءَ را کُجا رسینت؟ سمّی ءُ مھلب 12 سال اِنت کہ شری ءِ سر ءَ وانت کرت نہ کن اَنت ھرجاگہ زھرشانی یے بیت سمّی ءُ مھلب ھمود ءَ ھوار بنت ءُ گوش اَنت،”بابا تو کدی کا ئے ءُ مارا چو پتے ءَ مھر دے ئے”-
ڈاکٹر جان ترا نون الم آھگی اِنت.وتی سنگت: ذاکر جان، زاھد جان ءُ راشد جان ءَ الم بیار گوں اگاں تئی کَش ءُ گْوراں دگہ دوست ءُ سنگت ھست آیاں اوں وتی ھمراھی ءَ بیار گوں آیانی مات اوں سالانی سال وتی تاسُپیں بچانی ودار ءَ نشتگ اَنت باریں کدی کائنت؟ کل بلوچستان شمئے راھچار اِنت زوت آجو بات اِت، زوت وتی نوکیں زند ءِ مراداں بات اِت.
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔