نبشتانک: نبشتگیں دِیوال
نبشتہ کار: ڈاکٹر شکیل بلوچ
دی بلوچستان پوسٹ
کماش ءَ ھمے گپّ گُشت کہ “شَکُو چُشیں گپّ ءَ مکن کہ منی دِل سَگ اِت نہ کنت وتی چادر ئِے چَنڈ اِت ءُ دست ءِ ھَسا ئِے زُرت پاد اَتک گْوشتے کہ مات آئی ءِ مَٹّ ءَ دوبر پیداک کرت نہ کنت ساھتے ءِ بے تواریءَ پد وتی چمّ ءِ ارس ئِے پَھک کُرت اَنت ءُ یک ھیسکارگے جَتے ءُ گْوشتے کہ
“وشّیاں گْون ءُ سکّیاں ھمراہ نہ بنت”
“اِے زَر چِنیں ھمبل ھِچ کَسی دوزواہ نہ بنت”
گْوں اِے گپّ ءِ گْوشگ ءَ آ بے تواری ءَ رَھادگ بوت۔ کَماش ءِ اِے گپّ ءَ من ءَ سکّ گَمیگ کُرت من یک جْیڈگے ءِ تہ ءَ کپت اوں۔ تاں چَم چِست کُرت کماش ءِ پاد بْرمشانی توار مدان مدان گار بُوان بُوت۔
من ھم چہ لْوگ ءِ پْیشگاہ ءَ پاد اتک ءُ دیم پہ کُوچگ ءَ رھادگ بُوت آں۔ وھدے منی چَم میتگ ءِ دیوالے ءِ سر ءَ کپت گُڑا لَھتیں کْوھنیں لبز اَنگت نبشتہ اَت۔ من انچُش مار اِت کہ اِے لبز من ءَ توار دیگ ءَ اَنت ءُ بازیں جُستانی پَسّواں لْوٹگ ءَ اَنت۔ اِے اھد سازیں لَبز اَنچش بے ھاٹیگ ءُ بے وسیں دابے ءَ توار ءَ اَنت چُشکہ یک مُرگی چُورُویے وتی کُدوہ ءِ توک ءَ وتی مات ءِ ودار ءَ چِری چِری بہ کنت۔ ھمے پیم ءَ من لَبزانی بَزّگی دیست من ءَ اھدیگیں ھمبلانی ترانگاں گْور جَت، منی زیمیں دل ءِ ٹپّانی درد گْیش بوت اَنت من انچش مار اِت کہ دیوالانی سر ءِ ناسرجمیں لَبز چو مُرگی چُورو ءِ پیم ءَ ھما اھد سازیں دستانی زھیراں روچ پہ روچ جُشان اَنت مَن وھدے دیمتر ءَ رھادگ اِتاں یک شپانکے ءَ ڈِیک وارت ءُ گُشتے سنگت کُج ءَ روگ ءَ ئے بلے من اِے گپّ ءِ پسّو نہ دات ءُ پْیسر ءَ گْوشت کہ دیوالانی سر ءِ لَبزانی کِسّھاں درشان بہ کن گوں من۔
شپانک ءَ من ءَ چْو کْوھنیں دردوارے ءَ زیمیں دلے پسّو ئِے دات ءُ گُشتے کہ منی ھنکین ءِ دیوالانی سر ءِ نبشتگ کہ آیاناں اھد سازیں دستانی پَنجگاں نبشتہ کرتگ اَنت اِے اھد ءِ زوراک ھر روچ منی میتگ ءِ دیوالانی سر ءَ ناسرجمیں کِسھانی لبزاں کروج اَنت بلے انگت دیوالانی سر ءِ باندات ءِ رژنائیں روچانی وداریگیں شکّلیں لبزانی نشان ءُ چیدگ انگت زاھر اَنت۔ انگت مردم انچُش مار اِیت کہ اِے لبزاناں ھانی ءِ وداریگیں شے مرید چہ کبر ءِ ادیرہ ءَ در اھتگ ءُ گْون وتی اھد سازیں دستاں دوبر نبشتہ کرتگ اَنت۔
ساھتے ءِ ھاموشی ءُ بے تواری ءَ چہ پد شِپانک ءَ وتی توار بُرز تر کنان ءَ انچیں جزبگیں دابے ءَ گپّ جنَگ بِندات کُرت کہ آ گپّاں منی جان ءِ گْیمرتگیں پُٹ پاد اَتک اَنت من ھمے پَھم اِت کہ شِپانک وتی دِل ءِ دیریگ ءُ تند بستگیں بَڈاساں گْوں من کَشّگ لوٹگ ءَ اِنت۔
“سنگت اِے لبز اِے لبز نہ اَنت بلکیں اِے ناسرجمیں کِسّہ اَنت۔ من اِے گپّ ءَ ھما دلوَتاناں گْوشگ لْوٹ آں کہ سَتَر شُما دراجیں پَند بہ بُرّ اِت ءُ بیا اِت اِے لبزانی کَروجگ ءَ بلے!
بلے! اِے لبز گْوں ھچ کسّ ءَ کروجگ نہ بنت، کروجگ نہ بنت گْوں ھچ کسّ ءَ۔
من آیاناں گْوشگ لوٹ آں کہ منی میتگ ءِ دیوالاناں ھم درد مان، منی میتگ ءِ دیوالاناں ھم یک مارشے گْوں، منی ھنکین ءِ دیوال ھم یک کْرنے ءِ وداریگ اَنت، منی میتگ ءِ دیوالانی تہ ءَ ھم یک ناسرجمیں کِسّھے نبشتہ اِنت کہ آ شئے مرید ءِ داب ءَ بانوریں ھانی یے ءِ ودار ءَ انت۔ آ انگت پُر امیتیں دابے ءَ چو کْوہ ءَ مِکّ اَنت۔ اگاں لبزاں کروج اِت بلے دیوالاں شُما دور دات کُرت نہ کن اِت۔ دیوال زیکیں روچ ءَ چْو کوہ ءَ مِکّ بُوتگ اَنت، مَروچی ھم مِکّ اَنت ءُ آیوکیں روچاں ھم مِکّ بنت اِے گپّ ءَ چِہ پد شِپانک رَھادگ بُوت ءُ من ھم دیم پہ کُچگ ءَ ۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔