پُرس – ولیم فاکز – ھسا بجار

الم بوانیت

آھوگ تو اے وڑ مہ کُتیں۔۔۔ – بالاچ قادر

آھوگ تو اے وڑ مہ کُتیں۔۔۔ بالاچ قادر دی بلوچستان پوسٹ گُل ترا یات بیت ھما وھدی کہ توءُ دگہ سنگتے مئے...

کمےّ وھد کشّ – منھاج مختار

کمےّ وھد کشّ منھاج مختار دی بلوچستان پوسٹ تو ھم زانئے کہ من ترا گشگایاں بلے اگاں ترا موھ رست منی اے...

بلوچستان ءِ آجوئی ءِ ترس ءُ پاکستانءِ نوکیں پالیسی: نبشتہ حکیم واڈیلہ

گوشنت زوراک وھدءِ وتا نزور بیگءَ گندیت اگں ماریت گڑا آوتی سرجمیں زورا جنت ءُ وتی زوراکیءَ برجم دارگءِ...

آزمانک: پُرس

آزمانکار: ولیم فاکنر

رجانکار: هسابجار

دی بلوچستان پوسٹ

بانک ایمیلی گریرسن ءِ میت ءَ کم ءُ گیش هلک ءِ دُراھیں مردم اتکگ ات انت – مردین آئی ءِ گُڈی دیدار ءِ کنگ ءَ ءُ جنین آئی ءِ لوگانی چارگ ءَ کہ باریں آئی ءِ لوگ تہ ءَ چہ چتور انت – ده سال ات کہ کہ آئی ءِ لوگ ءِ چار ءُ گزار کنوک بس یک نوکرے ات – کہ لوگ ءِ پُلانی چار ءُ گزار کنوک ات ءُ کنوری ات هم –
آئی ءِ لوگ سک مزن ات – آ بس یک برے چُونّ جنگ بوتگ ات – هپتمی دهک ءِ زمانگ ءِ لوگانی وڑ ءُ پیم ءَ بندگ بوتگ ات -آئی ءِ سرا یک ڈولداریں بلاھیں کُبو یے ات – ءُ نکش ءُ نگار کتگیں برانڈهے ات – اے لوگ هپتمی دهک ءَ شہر ءِ مزنیں شهدگ ءِ لمب ءَ بندگ بوتگ ات – انی آئی ءِ کش ءُ گوراں شرپمندیں همساهگانی جاگہ ءَ گاڑیانی گیریج ءُ بندیک گوپگ ءِ کارجاه ات انت – اے هند ءَ تهنا بانک ایمیلی ءِ یکیں لوگ ات –
چہ هودءَ دُرست درکپتگ ات انت بس ایوک ءَ ایمیلی ءِ یک ءُ تھنائیں لوگ پشت کپتگ ات ءُ بانک ایمیلی ءَ اے پُکّی کششیں گاڑی ءُ تیلانی پمپ هچ کِمار نہ کُت انت – آئی ءِ لوگ هم دُرستانی چمانی کُنٹگ ات – ءُ نو بانک ایمیلی هم هما شرپمندیں مردمانی میان ءَ سر ات کہ آهانی کبر ماں جیفرسن ءِ جنگ ءَ شهید بوتگیں سپاهیگانی بندیگ ءُ بے نامیں کبرانی میان ءَ ات – آ کبر دیودار ءِ درچکانی تہ ءَ گار ات انت –
بانک ایمیلی ءِ زند چہ کرناں پیداک بوتگیں دودانی درورے ات – آئی ءِ زند ءِ بستار ۱۸۹۴ ءِ هما روچ ءَ گیش بوتگ ات – کہ هلک ءِ سرکماش کرنل سارتورس ءَ آئی ءِ کلیں مالیات بکش اتگ ات – اے کرنل کارتورس هما ات کہ آئی ءَ اے هگم داتگ ات کہ سیاه پوستیں جنین بے دیمدار ءَ دگانی سرا مہ ترانت – مالیات ءِ بکشگ ءِ هگم چہ آئی ءِ پت ءِ مرگ ءَ پد دیگ بوت – اگاں بانک ایمیلی ءَ بہ زانتیں کہ منی سرا بزگ کنگ بوگ ءَ انت تہ آئی ءَ مالیات ءِ بکشگ هچبر نہ مَنّ اتگ ات – کرنل سارتورس ءَ دروگیں کسہے ٹہینتگ ات – آئی ءَ گشت کہ ایمیلی ءِ پت ءَ هلک ءِ سرکماش ( میئر ) ءَ را وام داتگ ات آ وتی واماں دیگ لوٹ ایت –
اے وڑیں کسہ ءِ ٹھینگ کرنل سارتورس ءِ وڑیں پھمیدهیں ءُ همائی ءِ اُمبر ءِ مردمانی کارے ات – کجام هم جنینے چشیں گپاں باور کُت کنت –
وهدے نوکیں پدریچ ءِ مردم گوں نوکیں پگر ءُ هیالاں هلک ءِ سرکماش ءُ جج بوت انت – چہ آهانی سرکماشی ءِ سرا مردمانی تہ ءَ ناباوری یے ودی بوت – ءُ نوکیں سال ءِ اولی روچ ءَ آهاں آئی ءَ پہ کُلویے دیم دات کہ ترا سرکار ءَ مالیات دیگی انت – سال ءِ دومی ماه بوت – بلے چہ آئی ءِ نیمگ ءَ هچ وڑیں پسو نہ رست – آهاں آئی ءَ پہ مردمے دیم دات کہ تو باڑو ءُ نول بہ کن وت ءَ سپاهیگ ءِ کارگس ءَ سر بہ کن -هپتگے ءَ پد سرکماش ءَ وت پرچی یے نبشتہ کُت ءُ دیم دات کہ آ وت بئیت یا پہ آئی ءَ من وتی اولاک ءَ دیم بہ دیاں – پسو ءَ آئی ءَ یک جنڈیں کاگدے ءِ سرا لگشتگیں سیاھیاں گوں بلے وش نبیسی ءَ نبشتہ کتگیں یک پرچی یے دست کپت – کہ آئی ءِ سرا نبشتہ ات کہ نی آ گیش ڈن ءَ دراتک نہ کنت – بید ء گپت ءَ – هما هگم ءِ کاگد هم همے پرچی ءَ هوار ات –
پہ بانک ایمیلی ءَ جج ءَ یک دیوانے لوٹائینت – ءُ چیزے گِچینی مردم شُت ءُ آئی ءِ در اِش ٹُک ات – هشت ءُ ده سال پیش آئی ءَ چینائی اکسکاری ءِ مکتب ویل کتگ ات – روچ ء هما روچ ءَ آئی ءِ لوگ ءَ هچ وڑیں مهمان نہ یتکگ ات – سیاه پوستیں نوکر ءَ آ لوگ ءِ تھاریں مزنیں کوٹی ءَ بُرت انت – برزی تبک ءَ روگ ءِ پدانک همودا ات – پادانکانی سرا هم تھاری ءَ مانشانتگ ات – اود ءَ دنز ءُ گُبار ات ءُ بدیں بو یے تالان ات – نوکر ءَ آ اوتاک ءَ بُرت انت – اودا ٹوھیں کُرشی ءُ ٹیبل ات انت – کہ پوستاں گوں پوشتگ ات انت – نوکر ءَ کہ دریگ ءِ پرده پچ کت انت – آهاں دیست کہ کُرشیانی پوستیں پوش درتگ ات انت – آ نشت انت – چہ دریگ ءِ شمانی بارگیں رُژناں دنز بال ات انت – کُرشیانی سرا بداتگیں دنز هم گوں همایاں هوار بوان ات انت – آس دان ءِ گور ءَ یک درنجوکے ( اسٹینڈ ) ے ایر ات – آ سُہر ءِ گوناپ داتگ ات بلے نو آئی ءِ درپش تامور ات – آ درنجوک ءِ سرا بانک ایمیلی ءِ مات ءِ پوٹو ایر ات – بانک ءِ آیگ ءَ گوں آ اُوشتات انت – آ پٹکیں زالے ات ساہیں پوشاک ءَ ات – آئی ءِ گور ءَ سُهر ءِ بارگ ءُ دراجیں چینے ات داں سرین ئے لوجان ات – کمربند ءَ گوں مُهر بستگ ات – آئی ءِ پیشانی نستگیں سُهر ءِ وڑا ات –
آئی ءِ دست وتی دَز لٹ ءَ ات ءُ کُمپ اوشتاگ ات – آ پٹک ات بلے بڈول نہ ات – اگاں دگہ کسے چو آئی ءَ پٹک بہ بوتیں تہ پپُلتگ ات ءُ آ انچش گوات گپتگ ات – کہ کسے اوشتوکیں آپے ءَ بہ کپ ایت ءُ داں دیراں آپ بہ بیت –
آ شیر سبزءُ وش بالادے ات –
آؤکیں مردماں وتی آهگ ءِ مول ءُ مراد گُشت انت – اے دمان ءَ آ آهاں چارگ ءَ ات – آهانی چرپیں دیمانی سرا آئی ءِ دویں چم چو دو زگالی ٹُکرانی وڑا ات انت – انچو گُش ئے دو زگالی ٹُکر تر کتگیں آرتے ءِ تہ ءَ ایر بُکتگ ات انت – آئی ءَ آهاناں نندگ ءِ سلاه نہ جت – آ دروازگ ءِ دپ ءَ کُمپ اُوشتاتگ ات ءُ آهاں گوشدارگ ءَ ات – هما مرد کہ گپ ءَ ات یبرا مانگیش ات ءُ بے توار بوت – آئی ءَِ گوشاں گهڑی ءِ ٹَک ٹَک ءِ توار کپت کہ سُھر ءِ زمزیلانی تہ ءَ جنوک ات گندگ نہ بوت –
بانک ایمیلی ءَ پہ تهمبل ءُ مدان مدان ءَ گُشت کہ” من ءَ کرنل کارتورس ءَ گُشتگ کہ جیفرسن ءَ منی سرا هچ وڑیں مالیات پِر نیست – اگاں شمے تہ ءَ کسے زانگ لوٹ ایت تہ شهر ءِ جج ءُ سرکماش ءَ بہ پُرس ایت- شما وت سرپد بئیت – “
” ما شر سرپد انت ، ءُ جُست ءُ پُرس کُتگ ، نی تئی گورا اتکگیں ، ما همے شهر ءِ افیسریں – ترا سپاهیگ ءِ دزرند کتگیں پرچی دست کپتگ ؟ “
” هو من ءَ کاگدے سر بوتگ ات -” بانک ایمیلی ءَ گُشت – ” بیت کنت کہ آ وت ءَ جیفرسن ءِ سپاهیگ سرپد بہ بیت – بلے من ءَ هچ وڑیں مالیات پر نیست -“
” بچار بانک ! اے گپ ءِ هچ وڑیں کاگدی منانک نیست مارا وتی کار ءِ … “
” شما گوں کرنل کارتورس ءَ گپ بہ کن ات – من ءَ هچ وڑیں مالیات پر نیست – “
” بلے بانک ایمیلی …”
” کرنل سارتورس ءَ دُوچار بہ کپ ات – ( کرنل سارتورس ءَ اندازه ده سال بیت کہ مُرتگ ات) من ءَ حیفرسن ءَ را هچ وڑیں مالیات دیگی نہ انت ٹاب !-“
نوکر رست گوں –
” اے واجہاں ڈن ءَ سر کن گوں -“
آئی ءَ اشاناں انچش پروشت – بلکل همے رنگ ءَ انچو کہ چہ بو ءِ ویل ءَ پیش آ داں سی سال ءَ وتی پت ءُ ماتاناں پروش دیاں پیداک ات – اے آئی ءِ پت ءِ مرگ ءَ دو سال ءَ پد آئی ءِ آشک ءِ یلہ دیگ ءُ روگ ءِ وهد ءِ گپ انت – مارا آئی ءِ آشک ءِ سرا بیسہ ات کہ آ اشی ءَ گوں الم سیر کنت –
وتی پت ءِ مرگ ءَ پد آ ڈن ءُ دراں باز کم دراتکگ ات – آشک ءِ پد کنزگ ءَ پد وَ آ هچ کس ءَ ڈن ءِ درایگ ءَ نہ دیستگ ات –
چیزے زالبولاں لوٹ ات کہ ما آئی ءِ گورا بہ روئیں بلے آ گوں اشاں دُوچار نہ کپت – اے لوگ ءِ تہ ءَ زند ءِ نشانیاں چہ پشت کپتگیں یکیں نوکر ات – آ ، آ وهداں ورناہ ات – گوں سپت ءَ نہادی ءَ روگ ءُ آیگ ءَ گندگ بوتگ ات –
” نیٹ داں چُنت ءَ یک مردینے … چنائیں هم مردینے کنوری بوت کنت ؟”
جنینانی گُشگ ات کہ ما هچ اجکہ نہ بوتیں وهدے اے بو تُرند تر بوتگ ات –
ٹوھیں هلک ءِ بُرز ءُ توانگریں گریرسنانی میان ءَ اے بو ءَ آ یکے گوں دومیگ ءَ نزیک کُت انت –
یک همساهگیں جنینے ءَ هشتاد سالی ئیں سرکماش ءُ جج واجہ اسٹیونس ءِ گورا آئی ءِ ارزی ئےِ دات –
” بلے اے درگت ءَ من تی هچ کُمک کُت نہ کناں -“
” پرچا ؟ تو آئی ءَ همینچک هم گُشت نہ بئے کہ چو مکن -“
آ جنین ءَ گُشت –
” اِراں! ادا هچ وڑیں کانود ءُراهبند نیست ؟”
” من زاناں کہ اے وڑیں هچ چیزے نہ نیست -“
سرکماش ءَ پسو دات –
” بیت کنت کہ آئی ءِ سیاه پوستیں نوکر ءَ پیژگاه ءَ مُشکے ، یا مارے جتگ – من اے درگت ءَ گوں آئی ءَ الم گپ کناں -” دومی روچ ءَ دگہ دو کس ءَ ارزی دات – یکے ءَ پہ تُرس ءُ لرز وتی گپ چش بندات کُت – ” اسل ءَ مارا اے درگت ءَ چیزے کنگی انت – “
” واجہ من بانک ایمیلی ءَ تکانسر کنگ نہ لوٹاں من الم اے درگت ءَ وڑے کناں -“
هما شپ ءَ ججانی دیوانے بوت – چار مردم ات انت سے پیرین ءُ یک ورناهے ، کہ نوکیں پدریچ ءِ جهگیری ءَ کنگ ءَ ات – “
تچکیں گپے -” آئی ءَ گُشت – ” بانک ایمیلی ءَ کلو کنگ بہ بیت کہ وتی جاه ئے سپائی ءَ بہ کنت – ءُ اے کار کدی کنگ بیت اے گپ هم گیشینگ بہ بیت – اگاں اے میان ءَ آئی ءَ اے کار نہ کُت … “
” چے گُشگ ءَ ئے تو واجہ ! ” جج اسٹیونس ءَ گُشت –
” اِراں تو آ جنین ءَ کمشرپ کنگ لوٹ ئے ءُ آئی ءَ گُش ئے تو بو کنگ ءَ ئے ؟”
پمشکا دومی شپ ءَ چار مردم ٹپوکائی بانک ایمیلی ءِ کمپان ءَ پُترت – دیوالانی بُن ءَ ءُ زمین ءِ تہ ءِ کوٹیانی دروازگاں بُو کشّان پتر ات انت – اے میان ءَ یک مردیے وتی کوپگ ءَ درتکگیں کوار ءَ چہ همے جاگہاں چیزے شانک دیان ات – انچو گُش ئے آ ماں ڈگارے ءَ توم چنڈان ات – آ هاں زمین ءِ تہ ءِ کوٹیانی ءِ در پچ کُت انت ءُ چُونّ شانک دات – لوگ ءِ آتراپ ءَ کلیں جاگہاں انچش اش کُت – واتری ءَ وهدے پیژگاه ءَ چہ گوزگ ءَ ات انت – مدامی ئیں تھاریں دریگ رُژناه بوت – بانک ایمیلی ھمودا نشتگ ات –
رُژنائی آئی پُشت ءَ سک ات ءُ آ بُت ءَ بُت ات ءُ نشتگ ات – آ مردم بیتواری ءَ چہ پیژگاه ءَ لاپ موشی در اتک ءُ شُت انت دگ ءِ سرا -هودا بالیں مدگانی ساهگ چہ آهانی سرا گوزان بوت انت – دو سے روچ ءَ پد بو گار بوت – چہ اے گپ ءَ پد مردماں کہ آئی ءِ هال سر بوت تہ سک مونجا بوت انت –
مئے هلک ءِ مردماں همے کہ هیال کُت – آئی ءِ لائکیں تُرو پیرزالیں ویاٹ وتی زند ءِ گُڈی روچاں چتور پہک گنوک بوتگ ات – آئی ءِ گُشگ ات کہ گریرسن ءَ وتی بستار ءَ چہ بُرزتیں گپ کتگ ات – کہ آئی ءِ بستار هینچک نہ ات – ورناهانی تہا یکے هم بانک ایمیلی ءِ لائک نہ ات – ءُ بوتگ ات چتور ؟
ما مدام یک هیالی ندارگے گیر کاریں انچو گُش ئے آ ئیبے لیون انت ءُ پُشت ءَ گوں اسپیتیں پوشاکاں نازرکیں بانک ایمیلی اُوشتاتگ ، ماں تہاری ءَ یکے چو بُت ءَ بُت انت ءُ پُشت ئےِ پِر انت بانک ایملی ءِ کش ءَ اوشتاتگ – ہزرانکے دست ءَ انت ئےِ – آ دویں پُشتی دروازگ ءَ گُش ئے کسے ءَ لچینتگ انت – ما پمشکہ سی سال ءِ اُمبر ءَ پد هم آئی ءِ ایوک بوگ ءَ گمیگ بوتگ اتیں – آ چیزے کنگ ءَ دلمانگ ات – وتی تُرو ءِ گنوکی ءَ چہ پائیده چست کنگ لوٹگ ءَ ات – بلے آئی ءَ چشیں موه رسگ ءَ نہ ات –
ہِش کُنگ ءَ آئی ءِ پت ءِ مرگ ءَ پد اے لوگ همے داب ءَ آئی ءَ رستگ ات – چہ اشی ءَ مردم گل ات انت – کہ نی مارا بانک ایمیلی ءِ هزمت کنگ ءِ موه الم رسیت – کہ آ نی اے دگنیا ءَ پہک ایوک ءُ تہنا ات – آئی ءِ پت ءِ مرگ ءَ یک روچے پد دُراہیں زالبول آئی ءِ پُرساں شُت انت – انچو کہ مئے دود انت ، بانک گوں آیاں در ءِ دپ ءَ دُچار کپت – آ وتی مدامی ئیں پوشاکان ات – آئی ءِ گندگ ءَ گوں مردماں سما کپت کہ آ هینچک ءَ هم گمیگ نہ انت – آئی ءِ گُشگ ات کہ منی پت نہ مُرتگ – داں سے روچ ءَ آئی ءَ همے گپ گپتگ ءُ داشتگ ات – اے میان ءَ وزیراں آئی ءِ سر پد کنگ ءِ باز جهد کُت – ءُ ڈاکٹر آئی ءَ زور دیگ ءَ ات انت کہ آ بِلّے جون ءَ کل کن انت – چہ کانودی راهبند ءُ سرکار ءِ زوردیگ ءَ پیش آئی ءَ وتی گپ واتر زرت ءُ – آهاں هچ دیر نداشت ءُ همے دمان ءَ آئی ءَ را کل ءُ کسارت کُت اِش –
ما نہ گُشیں کہ اے وهد ءَ آ گنوک بوتگ ات – ما زانتگ ات کہ اے وڑیں ساهتاں کسے هم چوش بوت کنت – مارا هما کلیں ورنا گیر اتک انت کہ آئی ءِ پت ءَ چہ آیاں یکے هم نہ زرتگ ات – چشیں جاورهالے ءَ وهدے کہ پہ آئی ءَ دگہ هچی نہ مانتگ ات – تہ آئی ءَ گوں وتی پت ءَ وپاداری المی ات – آئی ءَ گوں اشی ءَ دگاه کتگ ات – مردمانی لوٹ هم همیش ات –
آ داں دیراں نادراه بوت – وهدے کہ ما پدا آئی ءَ را دسیت تہ مید ئےِ کسان ات انت – آ چو چارده سالی جنک ءَ ات – چم ءِ کپگ ءَ مردم ءَ همے گُمان بوت کہ آ چرچ ءِ رنگارنگی ئیں دریگاں جتگیں پریاں چہ یکے –
شہر ءَ پند رویں دگانی ( فٹ پاتهہ ) جوڑ کنگ ءِ ٹهیکہ دیگ بوتگ ات انت – آئی ءِ پت ءِ مرگ ءَ پد گرماگ ءَ کار بندات بوتگ ات – دگ ءِ جوڑ کنوکیں کمپنی ءَ سیاه پوست ، کچر ءُ مشینان گوں کار کُت – اشانی تہا امریکہ ءِ جاهمنند کارمستر ( فورمین) ہومربیرون هم هوار ات – آ سیاه پوستیں زرنگیں مردے ات – آئی ءِ گُٹ زنڈ ات ءُ چم ئےِ ہُرت ات انت – گونڈیں چُکانی رُمبے مدام همے لشکر ءِ آتراپ ترگ ءَ ات – آهاں هما زاه ہش کُتگ ات انت کہ کار مستر ءَ سیاه پوستاناں داتگ ات انت – تش ءُ کوڈلانی جَنّگ ءِ وهد ءَ سیاه پوستانی سوت ئِے هم گوشداشتگ ات انت – کارمستر ہومر بیرون زوت گوں مردماں ریتک ءُ ریچ بوت – کجام هم چار راهے ءِ سرا اگاں مردمانی ٹہکانی توار بوت تہ بزاں کہ کارمستر ہومر بیرون هم همود ءَ ات – اے انیگیں گپے ات – ما دیستگ ات کہ آ گوں بانک ایمیلی ءَ هوار زرد ٹئری ئیں اسپ گاڑی ءَ جماز ات یکشمبے ءِ نیمورچ ءَ پہ سیل ءُ گرد ءَ روگ ءَ ات انت – اسپ گاڑی ءِ هر دُک اسپ سُہرین ات انت – ہر دُک زرنگیں اسپ ات انت –
بندات ءَ ما گل اتیں ، شریں کہ بانک دل وشی یے کنت – پرچا کہ دُراہیں جنیانی گُشگ ات کہ ” گریرسن ءِ سنگتی گوں شامی هند ءِ پُریاتگرے ءَ نیکیں پالے ” بلے دگہ هم انچیں مردم هست ات انت – چُش کہ پیرین – آهانی گُشگ ات کہ پہ یک هانوادہیں جنینے ءَ آئی ءِ گم ءُ رنج چشیں بستاریے نہ دار انت کہ آ وتی دودمان ءَ هم سر بہ گوزیت – الانکہ آهاں لبز ء دودمان ءِ گُشگ ءَ ابید همے وڑیں گپے جتگ ات – آهاں بس همے گُشتگ ات – ” بیچارگیں ایمیلی ! نی اشی ءِ سیاداں همیشی گورا بوگ لوٹیت -“
البامیہ ءَ اشی ءِ یک سیادیے هست ات – بلےچیزے سال پیش پیرزالیں گنوک ویاٹ ءِ زمینانی سرا اشانی ہڑ ءُ کُڑے بوتگ ات – چہ هما روچ ءَ پد اے ہر دو کہول پدا یکے دومیگ ءَ گوں هوار نہ بوتگ ات انت – چہ آ کہول ءَ کَلّ ءُ کسارت ءِ وهد ءَ هم یکے گوں نہ ات – انچو کہ پیریناں گُشت ، بیچارگیں ایمیلی ، تہ سُک سُک بندات بوت –
” اراں تئی دل ءَ راستی همیش انت ؟”
آهاں یکے ءَ گوں دومیگ ءَ گُشتگ ات –
” الم همے وڑ انت دگہ چے بوت کنت ؟” یکشمبے ءِ نیمروچے ءَ گرم ءِ وجہ ءَ مردماں وتی دریگانی پرده بند کتگ ات انت – ءُ وتی لوگانی تہا ریشم ءُ ساٹینیں گُد اِش دست ءَ ءُ نشتگ ات انت – آهانی دست ءِ گدانی کپر کپر ءِ توار ات – دگ ءِ سرا اسپ گاڑیاں بستگیں اسپانی گام رویں نالانی توار ات –
” بیچارگیں ایمیلی !”
بانک ایمیلی ءَ سُنٹ نوداں کتگ ات ءُ تراتگ ات –
آ وهدی هم مئے پگر همیش ات – کہ اشی ءَ مہر انت – چُش کہ آ چہ وتی پت ءَ گیش ازت ءُ شرپ ءِ واهگدار ات – یا آ همے پیشدارگ ءَ ات کہ منی پهمگ سک گران انت – چُش کہ یک روچے آئی ءَ ” آرسینک ” مُشک کُشیں دوایے زُرتگ ات – اے ، مردمانی
” بیچارگیں ایمیلی ” گُشگ ءَ چہ سالے کپے ءَ پیش ءِ گپ انت – همے وهداں آئی ءِ دو سیاد اتکگ ات –
” من ءَ زہرے پَکّار انت -“
آئی ءَ گوں کیمسٹ ءَ گشت – آ وهد ءَ آ نز ء سی سالیگیں نزوریں جنینے ات – چہ پیشی ءَ زیات لاگر ات ، آئی ءِ چم سیاه تر اتگ ات انت ءُ سرد ات انت – آئی ءِ دیم هُشتگ ات – بانک ایمیلی ءِ دیم چو ” لائٹ هاؤس ” ءِ پانپان ءِ دیم ءَ هُشتگیں دیم ئےِ ات-
” من ءَ زہرے پَکّار انت –
” آئی ءَ گوں کیمسٹ ءَ دوار گُشت –
” الم بانک ایمیلی، چے لوٹ ئے ؟ مُشک کُشیں زہرے یا دگرے ؟ من لوٹاں …؟”
” تئی دل ءَ هما کہ تُرندتر انت همائی ءَ بہ دئے – کجام هم وڑینے کہ بیت پروا نیست – “
کیمسٹ ءَ بازیں نامے گُشت – ” آ کجام هم چیزے ءَ کُشت کُت کن انت – تُری پیلے هم بہ بیت – بلے ترا هما کہ لوٹیت – آئی ءِ … ؟
” آرسینک، ” بانک ایمیلی ءَ گُشت – “اراں اے زاناں سکیں تُرندینے ؟”
” چے ، آرسینک ؟ جی هو بانک ! بلے ترا هما کہ لوٹیت …”
” من ءَ آرسینک ئےِ بہ دئے -“
کیمسٹ ءَ آ سر ءَ داں پاداں چار ات – آئی ءَ هم دیم ترینت ءُ آ چار ات – آ دلجمی اوشتاتگ – آئی ءِ دیم چو مکیں بیرک ءَ ات – ” پرچا ، نیٹ پرچا ؟ کیمسٹ ءَ گُشت – ” من زاناں تو همیشی ءَ لوٹگ ءَ ئے بلے کانود ءِ راهبندانی پدا ترا گُشگی انت کہ اشی ءَ تو پہ چے کارے ءَ زیرگ ءَ ئے ؟ “
بانک ایمیلی ءَ چم سک کتگ ات انت ءُ آئی ءَ چارگ ءَ ات – آئی ءَ وتی گردن پُشتی نیمگ ءَ بُرت ءُ سر ئےِ گیشتر چست کُت – کہ آئی ءِ چماں وتی چماں سک دات بہ کنت ءُ گوں آئی ءَ گپ کُت بہ کنت – بلے آئی ءَ وتی دیم ترینت ءُ دومی نیمگ ءَ چار ات – آئی ءَ آرسینک ئےِ زُرت ءُ تیلی یے ءِ تہا مُہر کُت – دکل ءَ سامان ایر کنوکیں سیاه پوستیں نوکر ءَ تیلی آؤرت ءُ دات –
کیمسٹ دو وار واتر نہ بوت –
بانک ایمیلی ءَ چہ تیلی ءَ ڈبّی کش ات – آئی ءِ سرا مردمی کامپول ءُ دو هڈانی اکس ات انت ءُ چیرا نبشتہ ات –
” مُشکانی واستا انت”
پمشکہ دومی روچ ءَ ما کُلاں گُشت – ” کہ آ وتا کُشیت – ” پدا ما پگر کُت کہ پہ آئی ءَ انچو کنگ گهتر انت – وهدے کہ ما ہومر بیرون اولی براں گوں آئی ءَ دیستگ ات – ما همے گُشتگ ات کہ ” آ گوں اشی ءَ سیر کنت – “
پدا ما گُشتگ ات –
” آ نی اشی ءَ گیش تکانسر کنت -” پرچا کہ ہومر ءَ وت گُشتگ ات کہ آئی ءَ مردم دوست بنت – دُرست سر پد ات انت کہ آئی ءَ ایلکو ءِ کلب ءَ شراب وارتگ ات – بلکیں نشہ ات ءُ همے گپ ئےِ جتگ ات کہ آ چہ سیر کنوکیں مردیناں نہ انت –
یکشمبے ءِ گرمے ءَ آ درپشوکیں اسپ گاڑی ءَ جماز ات انت ءُ چہ پردهانی پُشت ءَ وهدے کہ ما یکبرے پدا دیست تہ گُشت – ” بیچارگیں ایمیلی -” بانک ایمیلی ، سُنٹ ءَ سُنٹ ات ءُ ہومر ءَ وتی اسپ تاچی ءِ کُلا سرا ات ءُ سیگار یے دپ ءَ ات ئے زردیں دستیگ ئےِ دست ءَ ات انت ءُ اسپ ءِ لگام ئےِ گپتگ ات ءُ دستے ءَ ہزرانک – نی چیزے جنیناں کُپ ات ءُ نرونڈ ات کہ اے شہر ءِ مردمانی ازت ءِ سوال انت – مئے ورناه الم پِٹّ انت – مردیں اے درگت ءَ هچ گُشگ ءَ نہ ات انت –
بلے جنیناں بیسپٹ وزیر ( ایمیلی ءِ مردم ایپس کوپال ات انت ) ءَ را گوں بانک ایمیلی ءَ گپ کنگ ءَ لاچار کُت – آهانی میان ءَ چے ہبر ءُ هال بوتگ ات – اے گپ وزیر ءَ بهہ پدّر نہ کُت – بلے دوار هود ءِ روگ ءَ آ رازی نہ بوت – دومی هپتگ ءَ پدا کہ ایمیلی ءُ ہومر بیرون دگ ءِ سرا گندگ بوت انت – دومی روچ ءَ وزیر ءِ جن ءَ پہ ایمیلی ءِ سیاداں نمدی یے نبشتہ کُت ءُ البامیہ ءَ دیم دات –
پمشکہ آئی ءِ سیاد یک رندے پدا اتک انت – ءُ ما نشت ءُ نداره چار ات کہ نو چے بیت – اول سرا کہ هچ نہ بوت – تہ ما همے سرپد بوتیں کہ نی الم آ سیر کن انت – مارا هال ءَ گپتگ ات کہ بانک ایمیلی شُتگ پہ سونار ءَ – آئی ءَ پہ وتی سینگارگ ءَ نُگره زرتگ – آئی ءَ وتی کلیں سہتانی سرا ایچ بی نبشتہ کنائینتگ –
دو روچ ءَ رند ما سرپد بوتیں کہ آئی ءَ مردینی گُد هم گپتگ – آهانی تہا شپی پشک هم هوار بوتگ – ءُ ما گُشت – ” نی وَ اشاں پکا سیر کتگ -” ما گل اتیں کہ چہ ایمیلی ءَ آئی ءِ سیاد شرتریں گریرسن انت-
پمشکہ ما ابکہ نہ بوتیں ، وهدے کہ ہومر بیرون دگانی جوڑ کنگ ءَ پد دراتک ءُ شُتگ ات – ما کمیں پژمردو اتیں بلے هچ چشیں بلاہیں آپتے نہ کپت – ما همے پگر ءَ اتیں کہ بیت کنت کہ آ پہ بانک ایمیلی ءِ برگ ءَ پیش شُتگ هودا تیاری ئےِ کنت – یا چو هم بیت کنت کہ بلکیں بانک ایمیلی ءِ سیاداں آئی ءِ جان جَڈّائینتگ – ( چہ اشی ءَ پد مردمانی چیریں دیوانے بوت – آئی ءِ تہا بانک ایمیلی ءِ سیادانی گرگ ءِ شوربندی کنگ بوت – آ بزان انت کہ مارا بانک ایمیلی ءِ چینچک گم پِر انت ) آ دویں هپتگے ءَ پد واتر بوت ءُ شت انت کہ آ همینچک روچ ءِ واستا اتکگ ات انت – ءُ انچو کہ ما اٹکل جنگ ءَ اتیں ہومر بیرون دوار اتک – یک همساهگے ءَ مگرب ءِ تہاری ءَ آئی ءَ سیاه پوست ءَ را چُل ءِ دروازگ ءِ پچ کنگ ءَ دیستگ ات –
ءُ همے وڑا گُڈی براں ما بانک ایمیلی ءُ ہومر بیرون ءَ را دیست – سیاه پوست گوں وتی سپت ءَ نہادی ءَ شُت ءُ اتکگ ات – بلے مزنیں دروازگ مدام بند ات – برے برے بانک ایمیلی کتراہے چہ دریگ ءَ گندگ بوت – انچو کہ هما وهدی چونانی چنڈگ ءَ شتگیں مردماں دیستگ ات – اندازه شش ماه بوتگ ات کہ آ دگانی سرا درا نہ بوت – پدا ما ماراتگ ات کہ اے وَ بوگی ات – پرچا کہ آئی ءِ پت ءِ سَوّب ءَ آ باز هزیت بوتگ ات – برے برے وَ انچو بوتگ ات کہ آئی ءِ گور ءَ مرگ ءَ هم آیگ تُرس اتگ ات –
پدا کہ ایمیلی گندگ بوت تہ سک زنڈ ات – ءُ آئی ءِ مید تاک کپتگ ات انت – پدا چیزے سال ءَ رند مید ئےِ چٹا اسپیت چو پُر ءَ بوت انت – ءُ تاب گپتگ ات انت – وهدے تاب گرگ اش کہ بند بوت تہ آ چٹا پُر ءِ رنگ ءَ بوتگ ات – هپتاد ءُ چار سال ءِ اُمبر ءَ آ کہ وپات بوت – آ وهدی هم آئی ءِ مید چو زندگیں مردمے ءِ سلامتیں میدانی وڑا ات انت ءُ پُر ءِ رنگ ات انت –
روچ ء هما روچ ءَ آئی ءِ لوگ ءِ در بند بوت – آ شش ءُ هپتیں سالاں ابید ، وهدے آئی ءِ اُمبر ءَ چل سال ات – ءُ چینائی اکسکاری ءِ ہنر ءَ سکارینگ ءَ ات – جہل ءِ کوٹیاں چہ یکے آئی ءَ وتی اکسکاری ءِ کارگاه ( اسٹوڈیو ) کُتگ ات – کرنل کارتورس ءِ اُمبر ءِ مردمانی جنک ءُ نماسگ انچو آئی ءِ گورا دیم دیگ بوتگ ات انت پہ اکسکاری ءِ هیل گرگ ءَ چو کہ کسے همک یک شمبے ءَ چرچ ءِ روگ ءَ کزا مہ کنت – همے میان ءَ آئی ءِ کلیں مالیات پہل کنگ بوتگ ات – وهدے نوکیں پدریچ ءَ کہ شہر ءِ راهبند وتی دست ءَ زُرت – تہ آ وهد ءَ اے شہر ءِ نوکیں پدریچ چہ اکسکاری ءِ ہنر ءَ باز دُور ات –
پمشکہ آهاں وتی چُک ءُ چیپل چہ رنگانی ڈبّی ءُ بیزار کنوکیں بُروشاں چہ گِستا داشتگ ات انت – ءُ آئی ءِ گورا راه اش نہ دات انت – چہ هما روچاں دیم ءِ دروازگ بند بوتگ ات – وهدے شہر ءَ مُپتی ٹپّال ءِ کار بندات کنگ بوتگ ات تہ بس یکیں بانک ایمیلی ءَ وتی لوگ ءِ دیما ٹپّال ءِ ٹین ءِ ڈُبُک ءِ جَنّگ مکن کُتگ ات – آئی ءَ هچ کسی گپ گوش نہ داشت –
روچ ،ماه بوان ات انت ءُ ماه ، سالاں مٹ بوان بوت انت – ءُ سیاه پوست پیر بواں بوت – چنگیں سرین ءَ گوں سپت ئےِ گون ات نہادی ءَ شُت ءُ اتکگ ات – همُک دسمبر ءِ ماه ءَ ما پہ مالیات ءِ گرگ ءَ بانک ایمیلی ءِ سرا کاگد روان دیان کُتگ ات – کہ پسو ئےِ ٹپّال ءَ چہ مارا دست کپتگ ات انت –
برے برے ما ، آ چہ دیم ءِ دریگاں دیستگ ات – چو بُت ءَ بُت ات – زانگ نہ بوت کہ مارا چارگ ءَ ات یا ناں ! چُش گُشگ مشکل ات – آئی ءَ وتی ماڑی ءِ بُرزی تبک کڑی کتگ ات –
همے داب ءَ بازیں پدریچاں گوں روان ات –
وش رنگ …
مہر کنوک …
تُرندیں …
بے ہبر …
ءُ هسدیگ –
ءُ همے گر ءُ چِکّانی تہا آ بیران بوت –
ساهگاں زبہریں لوگ ءِ تہا آ نادراه بوت – آئی ءِ چار ءُ گُزار کنوک همے یکیں پیر ءُ ڈلّیں سیاه پوست ات – ما اے هم سرپد نہ اتیں کہ آ نادراه ات – نی ما چہ سیاه پوست ءَ آئی ءِ هال پُرسی هم یلہ کتگ ات – آئی ءَ ہوں گوں کس ءَ گپ نہ جتگ ات – بلکیں بانک ایمیلی ءِ جند ءَ گوں هم – پرچا کہ آئی ءِ گُٹ شُتگ ات – انچو کہ چیزے رد کار مرز کنگ بہ بیت ءُ زنگ بہ کپیت –
بانُک ایمیلی ءَ جہل ءِ کوٹیاں چہ یکے ءَ اخروٹ ءِ داراں گوں تراشتگیں پلنگ ءِ سرا ساه دات – پلنگ ءِ پرده جتگ ات انت- آئی ءِ چو پُر ءَ اسپیتیں سر هما سرجاه ءِ سرا ایر ات – کہ مُدتے بیتگ ات ئے کہ روچ ئےِ نہ دیستگ ات – زرد تراتگ ات ءُ سک چِل ءُ لیگار ات –
هودا درستاں پیسر سر بوؤکیں جنیناں دیمی در ءِ دپ ءَ سیاه پوست دُچار کپت -آئی ءَ آهاناں تہا پُترینت – آئی ءِ توار کد ء نِژگے ءَ درا بوت – آ پہ اشتاپی اے دیم ءُ آ دیم ءَ انچو چارگ ءَ ات گُشئے آئی ءَ چیزے ءِ شوهاز ات – آهانی تہا سر کنگ ءَ پد سیاه پوست بیگواه بوت – آ تچک ءَ لوگ ءِ پُشتی دروازگ ءَ چہ دراتک ءُ شُت پدا بهہ ادا گندگ نہ بوت –
آئی ءِ ہر دُکیں سیاداں وتا زُوت سر کُت – آهاں دومی روچ ءَ آ کل ءُ کسارت کُت – پُلاں باریں ایمیلی ءِ گُڈی دیدار کنگ ءَ سرجمیں شہر اتکگ ءُ جُپتگ ات –
میّت ءِ پیتی ءِ گور ءَ درنجوکے ءِ سرا آئی ءِ پت ءِ رنگی ئیں دیم پہر کنوکیں درشمے ءَ زاهر ات –
جنین اجبیں وڑے ءَ موتک ءَ ات انت – لهتیں پیریں ڈوڈ کہ برانڈه ءَ اُوشتاتگ ات انت – کہ اشانی تہا بازینے گوں پُرسی پوشاکان ات – آ بانک ایمیلی ءِ درگت ءَ انچو گپ ءَ ات انت – گُشئے آ همیشانی همسرو بیتگ – آ چہ وتی گپاں همے پدّر کنگ ءِ جهد ءَ ات کہ اشاں گوں آئی ءَ ناچ هم کتگ – پدا آ پہ سیر کنگ ءَ گُشتگ ات اش هم – آ ماه ءُ سالانی هساب ءَ یک بلاہیں ردی یے کنگ ءَ ات انت – انچو کہ اے ردی ءَ همک پیرین مدام کنت –
پہ هماهاں کہ گوست یک هلاس بوؤکیں دَگّے نہ انت بلکیں یک بلاہیں کاهی پِڑ ے کہ آئی ءَ زمستان بهہ نہ گیپت – اے گوست چہ آهاں سستگ ات –
ما چہ پیش ءَ سرپد اتیں کہ پدانکانی بُرز ءَ یک کوٹی یے – کہ چِل سال بیت کہ آئی ءِ توک کس ءَ نہ دیستگ ات ، بلے نو آ ہر وڑا پچ کنگی ات – مردماں پہ آ کوٹی ءِ پچ کنگ ءَ داں بانک ایمیلی ءِ کل ءُ کسارت کنگ ءِ ودار کُت –
دروازگ ءِ پروشگ ءِ وهد ءَ شور ءُ شار بوت – دروازگ ءِ پروشگ ءَ گوں توک ءَ دنز ءُ گُبار بوت – دنزانی یک تلے انچو کہ یک کبرے ءِ سرا بہ جم ایت – اے کوٹی ءِ کلیں چیزانی سرا هاک بداتگ ات انت –
اے کوٹی انچو سمبہینتگ ات – گُشئے سالونک ءُ بانوری کوٹی ات –
ہر نیمگ ءَ دنزانی بادشاہی ات – گلاب رنگیں نسِتگیں جالر کتگیں پردهانی سرا ، همے رنگیں رُوژنائیانی سرا ، سینگار جاه ءِ سرا ، کرسٹل ءَ گوں جوڑ بوتگیں بُت ءِ سرا ، نُگرہیں سهتانی سرا ، کہ آهانی براه لگشتگ ات – همے هد ءَ دنزین ات انت کہ نگرهانی چانپ گندگ نہ بوگ ءَ ات –
همے چیزانی میان ءَ یک کالریے ءُ ٹاہی یے هم ایر بوتگ ات – انچو سما بوت کہ اے همے دمان ءَ چست کنگ بوتگ ات انت – وهدے چست کنگ بوتگ انت تہ آهانی جاگہ ءَ نوک ءِ اکس جوڑ بوتگ ات – کُرشی ءَ گُد ٹنگ اتگ ات انت – شر پیچگ بوتگ ات انت – کُرشی ءِ چیر ءَ جوڑی یے سُبکیں بوٹ ایر ات ءُ کمو گستائی ءَ چِلّی ئیں موزگ ایر ات انت –
مرد ءِ جند بسترانی سرا وپتگ ات –
ما داں دیراں سنگ ءُ سیاه چو بُت ءَ اُوشتاتگ اتیں – ءُ آئی ءِ لُنٹانی سر ءِ چہ زند ءِ وشیاں سریچیں بچنکد ءَ چارگ ءَ اتیں – اے گپ پکا ات کہ آ انچو وپتگ ات کہ گُشئے کسے ءِ امبازاں بوتگ ات – بلے نی آ مَرگ ءَ وتی امبازاں زُرتگ ات – کہ چہ مهر ءَ تونگر تر انت ، ءُ هچ وڑیں مکن کنگ مانیاریت –
چیزے کہ چہ آئی ءِ مُرتگیں جون ءُ وابی پوشاکاں سراتکگ ات – آ گوں هما نپادان سک لچتگ ات انت – کہ سر اش وپتگ ات –
آئی ءِ کش ءَ ایریں سرجاه ءِ سرا ودارانی یک بزیں دنزے ءَ مانپوشتگ ات – وهدے کہ مئے چم دومی سرجاه ءِ سرا کسے ءِ وپسگ ءَ جوڑ بوتگیں سر ءِ نشان ءَ کپت انت –
اچ ما یکے ءَ دومی سرجاه ءِ سرا ایریں چیزے چست کُت – پہ آئی ءِ چارگ ءَ ما دُرستاں وتی سر بُرت ءُ همودا جہل کُت – آ یک دراجیں اسپیتیں میدے ات – کہ مُرتگ ات – چہ آئی ءِ دنزاں چست بوتگیں بویے تالان ات –


دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نوکتریں

پھرہ ءَ یک دکانے ءِ سر ءَ ناشناساں تیرگواری کرتگ ءُ یک مردمے کُشتگ

دی بلوچستان پوسٹ سر بیتگیں ھالانی رد ءَ روکپتی بلوچستان ءِ دمگ پھرہ "ایرانشھر " ناشناسیں مردماں...

بی ایس او ءِ بندری سیاسی مول ءُ مراد گھگیری اِنت – بشیر زیب بلوچ

بلوچستان ءَ راجداری ءِ بنکی تالان کنگ ءِ کرد ءِ پیلو کنوکیں نودربر گل بلوچ اسٹوڈنٹس آرگنائزیشن ءِ بنھِشت ءَ مروچی...

کیچ زامران ءَ پاکستانی پوج ءِ سرا اُرش، اُرش ءِ زمّہ واری یو بی اے ءَ منّ اِتگ –

گونجتو ءَ پاکستانی پوج ءِ کارمند تراک ناکیں شوروانی نشانگ کُتگ - مزار بلوچ دی بلوچستان پوسٹ

سبی ءَ پاکستانی پوج ءَ یک مردمے آوار جنگ ءَ پد بیگواہ کرتگ

دی بلوچستان پوسٹ سر بیتگیں ھالانی رد ءَ بلوچستان ءِ دمگ سبی ءَ پاکستانی پوج ءَ چلّا...