TBP Balochi

تُرس آماچ

آزمانک

زیمر بلوچ

آئی ءِ کُلّگانی توار ڈنّ ءَ پیداک اَت نماسگ ءَ بلگمانی ڈبی ءِ ھاک ریتک اَنت ءُ پدا ڈبی ھاک کت ءُ آئی ءِ دیم ءَ دات آ سی روچ ءَ ھدا جِک ءِ سر نیشتگ اَت بُنڈانی باھوٹ اَت۔ آئی ءِ آئیڑرلین دوا ءِ شیشگ لین اَت اَنت ءُ ھیسک ءِ پمپ ھلاس بوتگ اَت۔

آئی ءِ مستریں بچک ءَ گوں چُکاں چار سال پُر اَت کہ ڈنّ ءَ اَت نہ پت علی ءِ مرگ ءَ اتکگ اَت نہ گہار ءِ سانگ ءُ سور ءَ۔

وت سر ءَ مَک اَت جنین ءَ وتی پاداں بُرتگ اَت سور ءَ رند لوگی نہ اَت علی ءِ سر ءِ کپگ ءَ گوں لوگ ڈوران بوت نشار علی ءِ پاداں شُت گوں جن ءِ مرگ ءَ رند اصغر کینگ ءُ اسدی بوت پراہی ءَ درست مُرت اَنت چک, مات, برات ءُ گہار کسی گی نہ اَت۔

وتی ہمک چیز چہ لوگ ءَ جتا کت وتی رکّگ ءِ جہد کت۔ وتی لوگ ءِ بہر گپت ءُ وتی بان ءَ را لوگ ءِ تہا دیوال کت۔

وتی دست ءِ ماسٹری اِشت ءُ پیپُک بہا کت, ھر ءِ کار بار کت ھرگاڑی تاتک۔

روچ ءِ برانز ترند تر بوان اَت اَنت ساھگ تپس اِت اَنت ءُ مجانی گرک جلّاد بوت اَنت۔ کپودرانی ڈب ھورے ءَ دور دات بازیں کپودرے چیر ترینت ءُ پشت کپتگیں شکیلی پل ءِ گوج ءَ یک یک ءَ وران کت اَنت درستاں وت ءَ ڈکّینت درستاں وت ءَ سیست۔

براتانی میان ءَ داوا زاہ واروکائی ہمک روچیگی کارے بوت ہما علی ءِ لوگ میتگ ءِ دپ ءَ اَت کہ زی آئی ءِ مُریدانی کتار ءِ سر کس ءَ نہ دیستگ اَت درستیں براتاں وتی دیم تاب دات ابید چہ نزر ءَ۔

آئی ءِ نادرائی روچ ماں روچ ودّان اَت کُلّگ ءَ چہ آئی ءِ شیکم ءَ ھون پیداک اَت براتانی گیشیں جنگ ءُ داوا ءَ شاری ءِ مات ءَ ہم زار کتگ ءُ شتگ اَت نماسگانی روگ ءَ گوں لوگ ورگ ءَ پیداک اَت دریک ءُ دور ھچ نیست اَت لوگ تہنائی ءَ وتی کتگ اَت درست پِلکّیتگ ءُ ایربُرتگ اَت اَنت بس ہمائی ءِ جند ورگ ءَ پشت کپتگ اَت۔

یکیں نماسگ شاری بوتگ اَت کہ آئی ءِ بلگمانی ڈبی ئےِ ھاک کتگ ءُ آئی ءِ سر ئےِ ھنّی جتگ ءُ گوپتگ ئےِ غسلخانہ ءَ برتگ ءُ آؤرتگ۔ آئی ءِ ماواری ءِ پیڈ ئےِ بدل کتگ ڈبی چہ بلگم ءَ پرُ اَت آئی ءَ نو تگرد ءِ چیر ءَ بلگم ءِ جنئگ بندات کتگ اَت۔

زمستان میتگ ءَ سرکشّان اَت مور ءُ سلورانی چینئگ ءُ لیپی کنئگ سرجم بوتگ اَت ھرکس وتی اونڈانی دپ ءَ ڈکّگ ءُ آرامی اَت۔ گوریچ ہم میتگ ءَ یک ءُ دو رند ءَ گندگ بوتگ اَت۔ آئی ءَ شاری ءِ ودار ءَ چم لوگ ءِ دروازگ ءَ درتکگ اَت اَنت کہ بلکیں کیت ٹیپُک ءِ کاش ءُ شنکاں چست کنت ٹیپک ءَ بز تر کنت ءُ من ءَ چار ریلی پر دنت۔

بلگمانی ڈبی ءَ ھاک کنت۔ بلے چم روچ ءَ گرستگ کت اَنت شاری ءَ درائی نہ کت۔

ودار ودار ءَ آ اناگہ نزر ءِ ترانگ ءَ کپت نزر تو انگت کسان ئے تو وت ءَ گیشینت نہ کن ئے تو تہنا ئے اے روچ سک گرم اِنت ترا توسینت

ترا تُنّیگ کنت انو آپ ہم نیست پرے زوت ءَ ھور ہم نہ بوتگ چمگ ھشک اَنت کُمب بے آپ اَنت ساھگ روچ ءَ تپسینتگ اَنت تو کجا نندئے دم کنئے؟ کئی گور ءَ روئے؟ منی گور ءَ کدی کائے؟ ترا برات باریں کِلّنت نیلنت؟ چوں کائے؟ چوں کنئے؟ روچ ترا جنت, جل ترا نیلیت, لیوار, لوڑ, دنز, گوات ءُ گُبارروچ ترند تر بوتگ روچ ماں روچ جل تر بوان اِنت۔ وت ءَ سمبال وت ءَ گیشین شپ ءَ ملہ بوپس ءُ سہب ءَ ملہ پاد ءَ۔

کُلّگ ءِ بندات بوہگ ءَ گوں آئی ءِ ھیال پرشت ترانگ ءَ بانزل جت ءُ بال کت کُلّگ ءَ بُست بُست ئےِ پر اَت دم ئےِ گٹّان اَت ھیسک ءُ ہمپان بوت چمانی ارساں شل دات چٹ بے توار بوت آئی ءَ پہ ھیسک ءِ پمپ ءَ دز موش کت بلے ۔ شاری بیا منی پشت ءَ ٹپ کہ من نزر ءَ نہ گنداں ءَ مراں آئی ءَ گٹّان گٹّان گشت۔

شاری۔؟

دمانے ءَ ٹیپُک ھاموشی ءَ رُپت آ کُلّگ ءَ توسینتگ اَت نیپادنی سر ءَ دیم پہ چیر اَت ءُ دست چہ نیپاداں جل بلگمانی سر ءَ کپتگ اَت۔

کس ءَ درائی نہ کت۔عمر, اصغر ءِ کستریں برات وتی بان ءَ اَت ءُ پدا چلّہ ءِ تیاری کنگ ءَ ات ءُ تبلیغ ءَ روگ ءَ اَت وتی سلیپنگ بیگ ءُ گُد ئےِ گیشینتگ اَت اَنت بس روگ ءَ جاڑی اَت اصغر وتی دیوال کتگیں بان ءِ تہا نیشتگ ءُ مات ءِ کُلّگانی توار ءَ گوشدارگ اَت۔

عمر ءِ روگ ءَ آئی ءِ جنین ءَ وتی بان ءَ را پزّوریں کُبلے جت ءُ وتی ماتئیگ ءَ شت۔

آئی ءَ کہ دیگر ءَ بست کت داں کس نیست عمر ءِ بان کبل اِنت۔

آ دمانے اوشتات ءُ جیڑیت من وَ عمر ہچ نہ کتگ آئی ءَ پرچہ زار کتگ ءُ شتگ آئی ءِ جنین۔؟

ایشانی لوگ ءَ ہینچو جاگہ نیست عمر کجا بیت؟

عمر بے وار بیت آیاں ھورکیں بانے ہم نیست۔

آ پگری اَت پہ عمر ءُ آئی جنین ءَ بلے آ سرپد نہ اَت کہ۔

تہاری مانشانگ ءَ اَت روچ زرد تریتگ اَت دور ءَ چہ بانگ ءِ توار ہم پیداک اَت۔ مُرگ کپتگیں کاپر ءِ سرا درنگ کنئگ ءَ اَت اَنت آ ایوک ءُ تہنا لوگ ءِ دل ءَ اوشتاتگ اَت وانگ وانگ اَت۔ ہمے دمان ءَ آئی ءَ ایوک ءُ تہنائی ءَ چہ ہٹ جت ءُ مارگ ءُ مارشتاں ہماں دیم نزر ہمبازیت ءُ گریوگ بنا کت نزر نز نزرر من ورگ باں تہنائی من ءَ ایربارت لوگ من ءَ زندگ ءَ پلیکیت۔ روچ من ءَ پلاشیت۔ من بے گناہ آں من کس ہچ نہ کتگ من ءَ شما کل دوست ئے۔ اے چیا چو کن اَنت۔؟ منی سر پر نہ بیت۔

من مراں من ءَ کُلّگ کشیت کس منی نیمگ ءَ نئیت کس من ءَ ءُ منی ھال ءَ نہ پُرسیت۔ منی ھرچ ءُ درچ ئےِ بند کتگ۔ گشنت نزر ءَ یلہ دئے۔ کُلّگ زور اِنت منی درمان ہتم بوتگ اَنت ھیسک ءِ پمپ ہم ھشک بوتگ اَنت شپ مزن بوہگ ءَ اَنت کُلّگ واب نیلیت کہریں شپاں چوں روچ بکن آں؟ چکانی داوا ءُ زاہ واروکائی ءَ من ءَ تکانسر کتگ۔! منی مات تو تہنا نہ ئے۔ آ گٹ ءِ سر ءِ سنگت ءَ گندئے؟

اے جُگ ءِ سنگتاں گندئے؟ ہماسنگرانی کُنگراں گندئے؟

اے کُل تئی پُسگ اَنت تئی رکینوک اَنت ترا کس ہچ نہ کنت۔ روچ ءُ ساہگانی کسّہ ءَ مکن۔ روچ ھارناس بیت کپیت ساہگ کل واتر بنت۔ ساہگ روچ ءِ بیم ءَ جستگ اَنت ءُ تچاں ہم چوش بیت بلے۔بلے ہچ مہ تُرس باج تی اِنت دل ءَ مہ کپ۔

آ گوربگیں پشّی ئے ءَ گوڑینت ءُ ہما جاہ ءَ آؤرت ءُ سر کت۔

شپ دیم ءَ گام جنان اَت استال وتی جاہ ءَ میلانک بوان اَت اَنت جہازانی روہگ ءُ آیگ ہم بندات بوتگ اَت۔ سارتی ءَ وتی بانزل ایر دات اَنت آ اتک ءُ نپادانی سر ءَ جُکیت۔

گور بام ءَ مزنیں ڈاہ ءُ کوکارے ءَ آ پچلرزینت آئی ءَ کہ چم پچ کت اَنت داں سرجمیں لوگ انگیر اِنت۔ پولگ اِنت, کشّگ ءُ مانبُرگ اِنت آئی ءَ کہ بُنڑ یل ءَ کت اَنت ءُ ڈنّ سر کشیت تاں آیاں عمر ءِ بان ءِ کُبل پروشتگ چیز داؤن داؤن کتگ اَنت ءُ اصغر گپتگ ءُ چم بستگ اَنت۔منی چک ءَ چے کتگ؟ شما چیا برگ ءَ اِت اِش؟ آ چہ ٹیپُک ءَ دراتک ءُ درائینت ئےِ۔

اپنے دہشتگرد بیٹے کو لاؤ اسے چھوڑ دینگئے لشکر ءِ کماندار ءَ آئی ءَ را دودستی ے دات ءُ گشت۔آ ٹانکی ءِ لچّانی تہا دیم پہ چیر کپت ءُ لشکر ءَ اصغر مہلوک ءِ دیم ءَ گر کت ءُ برت۔ یکے ءَ ترکّگ نہ کت یکے ہم لوگ ءَ پہ ہال پرسی ءَ نہ یتک۔ درست رپٹّان ءَ وتی لوگانی نیمگ ءَ رہادگ بوت اَنت۔ بدار وتی گُنڈا ءَ کس تی لوگ ءَ نیت کس تی چک ءَ نبارت۔ ما گوں شما کپت ءُ پاد اتک نکنیں۔ کئے وت ءَ کوشارینی۔

اے گپانی ایش کنگ ءَ گوں آئی ءِ چمانی ارس گُل گُل بوت اَنت ءُ لوگ پُتّرت۔لوگ ءِ دگہ چُنڈے کپت۔ پہ دلرنجیں اصغر ءَ آئی ءِ دل تپسگ ءَ اَت کہ آئی ءَ را ءَ دپی جست ہم نہ کتگ اَت ئےِ۔

ابیتکی ءَ لوگ سرجم ءَ انگیر کت, اصغر ءِ شاکارگ روچ ءَ گٹگیر کت اَنت کہ پہ آئی ءَ چیریں تسّلہے اَت اَنت۔

آ گوں اولُمبیں ارساں اتک ءُ علی ءِ روتیئیں تہت ءِ سر ءَ نشت دست سر ءَ کت اَنت ءُ جیڑیت۔ کس نیست ہچ پشت نہ کپتگ درست شتاں بان ءُ برانڑہ, مال ءُ دلوت چک ءُ چلانگ ہمساہگ ءُ ساہگ۔ علی اے کوہنیں گپے کہ مُردگ وتی درستاں بارت کس ءُ ازیزاں لوگ ءُ جاگہاں۔ چو نہ اِنت جیڑہ۔ تو کس نہ بُرتگ, تو ہچ نہ بُرتگ۔

جیڑہ دیگرے جیڑہ تو نہ ئے تی مردگی نہ اِنت۔ اسل ءَ روچ کہ سر ءَ کیت جند ءِ ساہگ ہم دروئیت۔ نزر من ءَ بکش کہ آ وھد من ترا شیر پہل نہ کت۔ کترہے ءِ پگر ءَ رند آئی ءَ اُرداناں چت ءُ نکان ءَ را بست۔ ٹیپُک ءِ گزدپی دپ ءَ دات ہسا چست کت دیم پہ نزر ءَ درکپت ءُ کوہ ءَ شت۔ شاری ءَ وتی وانگجاہ ءِ دستی پہ مزنیں مات ءَ آئیڑرلین دواہ ءُ ھیسک پمپ کت اَنت چیر اندری چہ لوگ ءَ تتک۔ پہ مزنیں مات ءَ تگ بست ءُ اتک بلے۔

کِساس دوھزار ءُ سیزدہ ءِ وھد اَت من چہ وت میتگ ءَ در اتکاں دیم پہ کیچ ءَ پہ وانگ ءِ ھاترا اتکاں زندگی یے اولی رَند اَت کہ گِس، مات، پت برات ءُ گہار یل کتگ اِت اَنت گِس ءَ چَہ گِستہ بوھگ سک گران اِنت ھمایاں جُست بِہ گر کہ چہ گِس ءُ میتگ ءَ چَہ دُور اَنت، نو من ھم ھمے لڑا ھوار کپت آں گوں من کہ وتی سنگتانی ھمبرائی ءَ اَتا شاد کالج ءِ نیو ھاسٹل ءَ سر بوتاں گیٹ ءِ دپ ءَ یک بوڑ ءِ سرا نبشتہ اَت ڈاکٹر اللہ نزر کتاب جاہ ھردیکہ من ھاسٹل ءَ وتی اولی گام ھیر کُت اِدا وڑ وڑیں سنگت گندگ ءَ اَتک سیاسی سنگتانی دیوان، کالج ءَ مُچی گپ ءُ تران سنگت گون ھم روچیگین کاراں گلاھیش اَت اَنت۔
من بَس ھمے گِندا دیوان بنت سنگتانی سنگت ڈاکٹر اللہ نزر کتابجاہ ءَ ننداں کتاب واننت ءُ پَدا ھمک یک شَمبے ءِ شپ ءَ لبزانکی دیوان بزانکہ شئر ءُ شائری دیوان برجم دارگ بیت ھر کس کیت وتی وتی ھیالاں درشان کنت، پَدا ھمک بنی آدم ءِ یک وتی انداز ئے اَنچوں کہ نُودان، بزانکہ ھسام چہ ھمک مردماں چَہ جتا اَت ھوار نہ بوتگ دروستاں چَہ گِستہ وانگ، نندگ، گَردگ آ اے گپ است اگاں دیوان بوتگ اَنت یا وانگ ءُ زانگ ءِ سرا گپ ءُ تران ءِ کنگی بوتگ گُڑا ھسام اے پڑا ھوار بوتگ من ءَ یات اِنت کالج ءَ اتا شاد ءِ زند ءُ ازم ءِ سرا یک دیوان ءِ برجم دارگ بوتگ اَت گُڑا ھسام ءَ اتا ءِ یک شئر ے ونت من ءَ سک دوست بوت پَدا یک گپے اِش اِنت اگاں کسّے ءَ گون ھسام ءِ گوما نِشتگ ءُ پاد اتک ءَ یا دیوانانی تہا گپ کنگ یا شئر ءِ وانگ ءَ دیستگ گُڑا آ ھم زانت کہ ھسام کُجام دابے بنی آدم اِنت ءُ پدا ھسام مُدام اتاشاد ءِ شائری سک دوست بوتگ ءُ اتا ءِ شئر سک ونتگ اَنت ئِے

“من اگاں درچکے آں دئے آس منی بالادءَ
بلئے پہ نپتےءَ کوھے بہ سچیت چوش نہ بیت”

ھردیکہ اے شئر ھسام ءَ ونتگ گُڑا دل ءَ گُشتگ ھمے دمان ءَ بُرو دَپ ءِ چُک گُڑا چوش وش وانگ اَنچوں گُمان بیت گُشے تی وانگے اَنداز بنی آدم ءِ تہائیں ھما مرد ءَ چہ واب ءَ گُڈینیت ھو من ءَ یات انت اے ھمے وھد اِنت کہ من ءُ دگہ چار سنگت نوک بی ایس او آزاد ءَ ھوار بوت اَنت گُڑا تو ھم مارا چے باز گیش ساری ھوار بوتگے پَدا پہ مئے واست ءَ اے ھبر سک باز وشی اَت کہ یکے ھاسٹل ءِ تہائیں وانگ ءُ زانگ ءِ بابت ءَ مئے بازیں کُمک ءِ کت کن ئے ھو سک باز کُمک کُت من آ وھدا کُجا زانت کہ کارل مارکس ، سارتر ،کامیو، جبران، شیکسپیر، ءُ دگہ بازیں انکلابی ءُ لبزانکی مردمانی بابت ءَ سرپد کرتگ ایش ءُ گُشیت کہ ایشاں پہ لبزانک ءُ سیاست ءَ چے کِرد ھیر کُتگ دنیا ءُ جہان ءِ تہا پَدا روچ ءُ ماہ جُنزان بوتاں کالج ءَ بی ایس او آزاد ءِ وتی سرکَل برجم دارگ بوتاں ھمک ھپتگ ، ھو بی ایس او آزاد ءَ مرچی من ءَ ءُ ترا یکجاہ کُت تو کُجاہ نشتگے من کُجاہ نشتگاں تو کہ ئے من کئے آں؟ اے دروستیں جُستانی پسہاں شہیدانی ھون دینت ءُ تہاریں کوٹیانی بندیگیں ورناہ دینت، اَنچوں کہ مرچی تو ھم زندان ئِے تہا بندیگ ءِ ھو تو مرچی من ءَ ھمے جُستانی پسہ دیگ ءَ ئے ماراں بی ایس او ءَ یک پکری ریشتہ ءِ داتگ من ءَ ءُ ترا یکجاہ کُتگے۔
ریاست ھچبر نہ لوٹی کہ گُلامیں راج دیمروی بہ کنت ریاست ھچبر نہ لوٹی کہ گلامین راجانی زُبان دود ءُ ربیدگ دیمروی بہ کناں و ریاست اے ھم نہ لوٹی نودربر گَل دیمروی بہ کنت اے پاکستان ءِ ریاست ءَ بلوچ نودربر گَل بی ایس او آزاد ءِ راھشوان ھمے وانگجانی تہا چست کُتگ ءُ بیگواہ کُتگ اَنت، لاش جنگلاں دُور داتگ آنت اے ریاست ءِ ھمک روچیگین کار اِنت ۔
کیچ یک بَرے پدا نہ وش بوت اے ھما وھد اِنت کہ رسول جان چست کنگ بیت ھالات شَر شَر نہ بنت ریاست وتی پالسی ءَ چینج کنت ھاسٹل بند کنگ بنت سنگت بازیں وھدے ءَ چے پَد پَدا کاینت وتی کارا بندات کناں ھسام تو ھما کامریڈ ئِے کہ ھچبر اے ریاست ءِ دیم ءَ نہ تُرسیتگ سال جُنزان بوتاں بی ایس او آزاد ءِ دوھز ءُ پانزدہ ءَ بی ایس او آزاد ءِ سیشن بوت سیشن ءَ تو دیم ءَ اتکہ جُنزان بوتئے، گَل ءِ کاراں گون روچ پہ روچ دست گَٹ بوھان بوتئے پدا کیچ ھم تو یل کُت دیم پہ کراچی ءَ تو اتکے کراچی ءَ ھم من تی گوما بازین دیوان ءِ کُتگ نشتگ ءُ پاد اتکگاں بس اچانگ پدا بلوچ راج ءِ واست ءَ یک ھاکیبت ءِ اتک ،ھسام گون تو ھوار، عزت، نسیر، رفیق بیگواہ کنگ بوتاں بی ایس او آزاد ءَ یک مزنین تاوان ءِ بوت شمے وڑیں کامریڈانی روگاں،، نو مشکُل انت ھسام تئ دروشم دابیں کامریڈ ءِ بیت پہ بی ایس او آزاد ءَ۔

گوشنت زوراک وھدءِ وتا نزور بیگءَ گندیت اگں ماریت گڑا آوتی سرجمیں زورا جنت ءُ وتی زوراکیءَ برجم دارگءِ جہدءَ کنت۔ آ گڑا شر، ھراب، ھشک، تر، ساھ دار، بے ساھ، انسان ءُ جناور ھچ چیزئے تہا تپاوت نہ کنت ءُ درستاں وتی زوراکیءِ آماچ کنت۔ اگں زوراک یک ملک ءِ بہ بیت ءُ نزوریں مردم چہ آئیءِ زوراکیءَ بیزار بہ بنت ءُ جہد بہ کن انت ءُ ھنچیں وھدءِ پیداک بہ کنت کہ زوراک وتی پروش ورگءَ بیماریت گڑا آ داں وتی گڈسرا کوشست کنت کہ نزوریں مردمانی جہدءَ ھلاس بہ کنت آئی ءِ واسطہ اگں مردماں دزگیر کنگ ، بیگواہ کنگ، لٹ دیگ، لوگانی سوچگ ، جنین آدماں بے شرف کنگ، کسانیں گونڈو ءُ پیریں کماشانی کوشگ بہ کپ انت ھم چک ءُ پد نہ بیت۔

گوستگیں روچاں بلوچستانءِ تہا پاکستان ہم ہمے وڑیں جاورانی دیم پان بیتگ آئیءَ ھم پروش ورگءِ ترس چہ باز نزیکءَ دِستگ آئیءَ گلزمین ءَ نشتگیں کنگرانی ہمکاری ءُ کامیابیں ارشانی تہا وتی پروش دستگ۔ آئیءَ دستگ کہ بلوچ راجی سرمچار کہ کوہانی تہا نشتگ انت آ داں بلوچستان آجوئی نہ بیت پہ ایمنی نہ نند انت۔ آئیءَ مار اتگ کہ در ملکاں نشتگیں بلوچ رہشونانی مہکمیں جہد پہ من ءُ منی کاسگ چٹاں مرگءِ پیگام انت۔ دگنیاءِ تہا بلوچانی آجوئی ءِ توار ءِ روچ پہ روچ ودگ منی ھلاسی ءِ ثبوت انت۔ آئی ءَ چہ مزنیں مدتءَ پد بلوچ سیاستءِ تہا ہمکاری یک دومی ءَ گوں نندگ ءُ تران کنگ ءُ گپانی گوشدارگ ءُ وتی ردیانی ھلاسی ءُ شریانی نیمگءَ روگءِ پالیسی پہ وتءَ یک مزنیں جنجال ءِ مار اتگ۔

پمیشکہ پاکستان ءَ ھم وتی زوراک گیشءّ چہ گیش کُتگ انت۔ آئیءَ بلوچ رہشونانی لوگ ءِ جنین آدمانی بیگواہی پہ وتا یک مزنیں کامیابی ءِ زانتگ پمیشکہ جنین آدمانی بیگواہ کنگءَ ھم چک ءُ پد نہ بیتگ ۔ بیگواہ کتگ ایں بلوچ زالبولانی میڈیاءِ دیما آرگ ھم پاکستان ءِ سازش ءِ بہر بیتگ کہ بلکہ چش کنگءَ گوں ما دگنیاءِ دیما وتی یک شریں امیج ایں جوڑ کُت کن ایں بلئے پاکستان ءُ آئیءِ کاسگ چٹانی اے عمل ہم بے سوب بیتگ ءُ پشیمانی چوں مدامی ایں وڑا آئیءِ بہرءَ اتکگ۔ (چوناہا اولی رند نہ انت کہ جنین آدم بیگواہ کنگ بیتگ انت بلئے پیسرا بیگواہ بیتگیں جنینانی بابتءَ سرکار ءُ پوج ءَ کدی ھم گپ نہ کُتگ ءُ سدانی کساسءَ بلوچ ماتءُ گہار انگت زندانی تہا بندیگ انت)۔ پاکستانی زوراکیانی تہا گیشی ءِ یک دگہ مثال ایں بلوچ گونڈوانی بیگوائی انت کہ داں انگت آہانی بابت ءَ ھچ وڑیں ھال نیست۔ پیسرا پاکستانی پوج ءِ زوراکیانی آماچ بلوچ ورنا، زانتکار ، سیاسی مردم ، انسانی حقانی ھاترا کارکنوکیں مردم بیتگ انت۔ بلئے نوں گونڈو ءُ جنین آدم ھم چہ اے زوراکی ءَ نہ رکتگ انت۔

پاکستان ءَ وتی زوراکی داں ھمینچوکہ نہ داشتگ انت بلکیں درملکاں بلوچ رہشونانی سرا دروگیں کیس جوڑ کُنگ ءُ پہ آیاں یک ملکیءّ چہ دومی ملکءَ سفر کنگ ءَ سکی پیداک کنگءَ اِنت کہ آئیءِ نوکتریں دروشم نواب مھران مریءِ زیورخ ایرپورٹ ءَ دزگیری ءُ سویٹزر لینڈ ءِ تہا آئی سرا دہ سالءِ پابندی انت۔ سویس اداراہانی ردا نواب مھران مری ءِ سرا پاکستان ءِ نیمگءَ ناشرکاری ءِ کیس جنگ بیتگ انت ءُ آ مئے ملکءِ تہا یک سیکیورٹی ءِ مسئلہ انت۔ اے دراھیں کار پاکستان ءَ درملکاں نیشتگ ایں بلوچ رہشونانی بیوکیں نیادیءِ دارگءِ ھاترا کُتگ دانکہ بلوچ راجی یکجاہی ءِ کار اوشت ءِ آماچ بہ بیت۔

اے دُراھیں ظلم ءُ زوراکیاں پد ھم پاکستانی پوج ءُ داشتگیں سیاسی سروک وتی دلءَ چہ اے بیم ءَ کشت نہ کنگ ءَ انت کہ بلوچ آجوئیءِ جہد روچ پہ روچ دیم روی کنگءَ انت پمیشکہ گوستگیں روچاں نیشنل پارٹی ءِ لیڈر ڈاکٹر مالکءَ بلوچستانءِ تہا سوات وڑیں آپریشن ءِ لوٹ کُتگ ءُ اے لوٹ منگ ھم بیتگ۔ چوناہا بلوچستانءِ تہا گوستگیں ۷۰ سالاں چہ پوج آپریشن کنگءَ اِنت کدی گوں ترندیءُ گوں نرمی ءَ بلئے پیشہ اے آپریشن چیروکائی کنگ بیتگ انت۔ گوشنت شاھ ءَ چہ شاھ وفادار ترس ءِ آماچ بنت ءُ اے گپ پنجابءِ وفادار سرفراز بگٹی ءَ راست کوتگ ءُ پیش داشتگ گوں وتی گوستگیں بیانءَ سرفراز بگٹی ءِ گوشگءِ ردا پاکستانءِ تہا ایمنی ءِ ھاترا بلوچانی نسل کُشی الم انت۔ اے دراھیں جاور کہ زوراک ءَ پیداک کُتگ انت ءُ زوراکیاں اگں ھمے وڑ گوں ترندیءَ دیما بران کنت گڑا پہ بلوچاں ھم الم بیت کہ وتی پالیساں تیزیءَ گوں مٹ بہ کن انت۔ دانکہ زوراکءِ ھمک نوکیں پندلءَ جوانی ءَ سرپد بہ بنت ءُ گیشتر ترندیں وڑا پسو بہ دی انت۔

اے دراھیں جاورانی تہا بلوچاں وتی تہا نزیکی آرگءَ ھوار ھوار میان استمانی جاورھالانی سرپد بیگ ھم الم انت۔ پرچہ کہ میان استمانی سیاست ءِ تہا یک مزنیں بدلیءِ گوں ترندیءَ گندگ بیگءَ انت ۔ بلوچاں جیڑگ لوٹیت کہ ما گوں کجام گامءَ پہ وتءَ گیشتر دوست پیداک کُت کن ایں ءُ کئی سرا اوست کت کن ایں دانکہ بلوچستان ءِ آجوئیءِ واب یک راستیءِ بہ بیت ءُ بلوچ راج چہ بزگی ءُ گلامیءِ سانکلاں آزات بہ بیت۔

من چہ لوگ ءَ درکپتگ ءُ دیم پہ کورءِ نیمگ ءَ رهادگ ات آں،،
من ءَ هر وهدءَ کہ ایوکی ءِ اومان بوت،، من کورءِ نیمگ ءَ شتاں ءُ وتی ایوکی ءِ واهگانی سر پروشت،،
من کورءِ نزیک ءَ رس اتگ ات آں کہ لھتیں ناشناسیں مردماں من ءَ انگر کت،،
گوں درآمدیں زبانے ءَ من ءَ زاه ءُ بد کنگ ءَ لگ ات انت،،
منی چماں سیاهیں پٹی اش بست ءُ من ءَ نیم کلاک ءِ راه ءَ برت ءُ چہ گاڑی ءَ دور دات،،
ساد ئِے منی گُٹ ءَ لوپ کت ءُ من ءَ گران ئِے کت ءُ  پدءَ من ءَ گوں درچکے ءَ بست ئے،،

من ءَ سک جنگ ءَ ات انت لگت مشت شھمات تپنگی کنداک ،،
من سک لاچار ءُ بے وس ات آں منی پریات ءُ گریوگ هم درنیاهگ ءَ ات آں ،،
یکے ءَ لگتے منی سُنٹ ءَ جت من ءَ سک درد بیت منی دپءَ درتک اُپ اللہ،،،
پدءَ دگہ کنداکے یکے ءَمنی سرءَ جت ءُ گشت، کج انت تئی اللہ؟،  ادا اللہ نیست ادا ھدا مہ وت ایں،،
پدءَ گوں آسن رنگیں ترندیں چیزے ءَ منی پشتی نیمگ ءَ من ءَ سک جت ءُ ژند اش کت،، منی ساه پر بیگ ءَ نہ ات،،
پدءَ دگہ یکے ءَ گشت شما زاناں ھدا دیستگ؟
هر وهدءَ هداءَ توار کن ئے،،
منی دپ ءُ نک هشک ات آں من ھچ گشت نہ کت،،
من دست بستاں ءُ گوشت من ءَ یل دے ات ،منی میار ءُ گناہ چی اِنت؟،،
پدا لگت ءُ مشت ءُ لٹ ءُ کٹ بنا بیت انت ،،
بس بس بس زیادہ سوال جواب مکن، من ترا پیسرءَ گشت ادا ھدا مہ وت ایں ھرچی کہ مئے دل لوٹیت ما کن ایں،،
من وتی دل ءَ باز دواکرت کہ یا ھدا منا چہ اے زالمانی دست ءَ رکین ،،
منی دلءَ ھمے ھیال اتک کہ پیش ءَ ملاھاں ایمانداری ءُ دیانت داری ئے کسہ باز آورتگ، کہ پلاں بزرگ چوش بیت ھدا ءَ چوش مدت کت پلاں پیگمبر ماھیگ ءِ لاپءَ شت ھمودءَ ھدا ءَ ھپازت کت ،پلاں بزرگ ءُ تبلیگ والایاں پہ ھدا ءَ رسترانی وسیلہ جوڑ کت ءُ منزل ءَ سر کت اَنت ،،
ھمے ھیالاں گوں من ھم دل ءَ جیڑان جیڑان ءَ گشان ات آں یا اللہ منا رکین یا ھدا منی کتگیں نیکیانی برکت ءَ منی سرءَ رھم کن من ءَ ادا کس نیست ترا چے بگیر نیست دگہ مددگار ،،
بلے منی واستا چہ گیب ءَ ھچ وڑیں مدت ءُ کمک نیتک،،.

  بازیں لٹ ءُ کٹاں چہ منی بدن واب کپتگ ات،
من ھمیچو دیست کہ دست روانت کایاں ءُ لٹ منی بڈءَ لگ انت ،، بلے درد ءُ تورشتانی من ءَ سما بیگ ءَ نہ ات،
من کوکار کت ءُ گشت یا ھدا تو اشاں مُنڈ کت نہ کن ئے؟
من کہ اے ھبر کت اشاں پورءَ آس ماں پشک ءَ کپت،،
من ءَ چہ درچکءَ جھل ایر اش گیتک گرمیں ءِ  زمین ءِ تپتگیں ریکانی سرءَ واپینت ءُ بلاھیں بلاھیں تپتگیں سنگ آورت ءُ منی سینگ ءِ سرءَایر کُت اَنت،،

نو منی بالاد انچوش ات کہ پورءَ منا یکے پرنچان انت ھنچو کہ ملاھاں گشتگ کہ کبر ءِ ازاب ءَ پهلوگ گوں پهلوگ هور کنگ ءُ پرنچگ بنت ،
من ھم دل ءَ گشت بگندئے من مرتگاں اے پرشتہ انت من ءَ ازاب دیگ ءَ انت،
اناں اناں چوش بیت نہ کنت من انگت زندگاں من ءَ ساه مان انت ،، من پدءَ جیڑ ات،،

اے چونیں مردم انت کے انت من ءَ پرچا لٹ ءُ کٹ کنگ ءَ انت؟،، منی سر هچ پر بیگ ءَ نہ ات،،
نہ زانگ ءَ ات آں کہ کجام گناهانی سزا انت،،
چہ دردانی تورشت ءَ من نارگ ءَ ات آں ءُ منی نک چو تلارءَ هشک ات،،
من هبر کت نہ کت بس چہ دپ ءَ بے انانی،، آپ،،، آپ،،، تن،، تن درآهگ ءَ ات،،

یکے ءَ وتی آنجگ بوتک من ءُ منی دپ ءُ دیمانی سرءَ مِس کت،، من دیم تاب دات  کہ مِس منی دپ ءَ مہ رو انت،،

من ءَ انچو سما بوت کہ چیزے منی سرءَ لگ ات پدءَ من نہ زانت کہ چے بوت ءُ چے نہ بوت،،

من وھدے چم پچ کت انت من جنگلے ءَ کپتگ ات آں،
دو کچک ھم اوشتاتگ ات کہ کجام وھدءَ ساہ در بئیت ءُ کچک پہ ڈونڈءَ وداریگ ات انت
من وتی دلءَ گشت آیاںں وتی کار کت نو شما بیا ات ڈونڈءَ بہ ور ات ءُ سیر لاپ بہ ات،،

من کہ دستءُ پاد جنگ بندات کت بلے پاداتک نہ کت انچو سما بیت کہ سرین ءُ پاد سلامت نیاں،،
کچک منی نزیکء اتک انت ءُ من ءَ چٹگءَ لگت انت ،
اشاں من ءَ سک دیراں تانکہ چٹ ات،
گشئے منی بالادءَ سارتی یے ایر کپان ات ءُ من بود کنان ات آں،،
انچو داں منی ساہ گورءَ کپت من ھیران بوتاں کہ من انساناں من ءَ کشت ءُگنگدامیں کچکاں من ءَ بود آورت ءُ زندگ کت،،
من انگت جیڑگ ءَ ات آں کہ کچک رستر انت یا بنی آدم،،؟

اناگت ءَ یک کچکے پہ درک ءُ تچگ شت ءُ کلونزان ءَ یک پیر مردے ءِ دامن ءَ گران ءُ منی نیمگ ءَ آرگ ءَ ات،،

پیر مردءَ من ءَ چست کت ءُ برت لوگ ءَ دارو ءُ درمان کت ءُ وش ءُ دراه بیتاں،،

بلے همے جست منی جیڑگ ءُ مارشتانی دامن ءَ یلہ نہ دنت،،
کچک هونواریں رستر انت یا بنی آدم؟

من شدری آں

جھمنند گوادر
دشت ءِ توپان ءَ پد ما پکیر کالونی گوادر ءَ
اتک ءُ جھمنند بوت ایں
ھدا سکیداد ءَ بھت ءُ اُمر بہ دے آت
کہ مارا ٹُکّرے زمین پہ لوگ جاھے ءَ دات ئے
منی اُمر کساس ھپتاد سال انت
شھسوار بیران بیت ءُ وتی گُڈّی جاہ ءَ شُت
منی چُک ھیبک ات
ھیبک گوادر ءَ اتک بیکار بیت
ھمک روچ ھوٹل ءَ نشت ءُ پتّائی کُت ئے
سگریٹ کشگ ءَ پد سر شیشگ ءِ کشگ ءَ
کپتگ ئے مرد کار ءُ کٹّ ءَ کپتگ
ھیبک ءَ بچّے ھست پیرل انت
مات ءَ سریک کُریشی کُت رودینت
ءُ وانینت
پیرل یک روچے من دیست
گمیگ انت من گوشت پیرل دوست
ترا چون انت تو پریشان گندگ پیداگ ئے
پیرل بلُک گپ چہ تو چیر نہ انت
ھمک نیجوان واب گند ایت
من ھم وابے دیستگ
باریں منی واب ءَ ھُدا پورو کنت
المّ ءَ واجہ ھدا منی واب ءَ پورو کنت
یکین ھدا انت کہ پہ کس ءَ زھری نئیت
من چہ ھُدا ھمے امیت دار آں
کہ من وان آں وانگ ءَ در بر آں
کابل بہ آں
گوادر دیمروئی کنگ انت
لوکل من ءَ ھست ھنکین منیگ انت
وانگ ءَ من وتی وانگ جاہ ءََ ھمک
چکاس ءَ پوزیشن کار آں
باریں کدی بیت آ روچ کدی کیت
من ءَ جوانین نوکری یے رس ایت
اولی پگار کہ من ءَ رس ایت
من وتی کبلھیں پت ءَ کراچی ءَ بر آں
الاج کن آں
پت ءَ شریں سواری یے زور آں ءُ دے آں
منی مات ءَ کہ سریگ کُریشی کُتگ
چمّانی رُژنائی شتگ انت ئے
شریں ڈاکٹرے ءَ پیش داریناں ئے
بلُّک تئی سرین کہ پروشتگ
کمیٹانی ءُ آپ ءِ کشّگ ءِ سوب ءَ
دوا ءُ درمانی گر آں ءُ ترا الاج کن آں
پہ شما کاردار دار آں
شما دست ءَ آپ ءَ مہ جن ات
بانک ءُ بی بی بہ بئیت

بلُّک جان گپ اش انت
من ءَ گیشتریں وانگ ءِ واست ءَ مزن
شھر ءَ روگی انت
دو ترس ھست
یکے منی پت مردمی کٹّ ءَ شتگ
شما ایوک ءَ بہ اِت
دومی پہ وانگ ءَ مزن شھر ءِ روگ ءَ
ھرچ درچ باز لوٹ ایت
مات ءِ سریک کُریشی ءِ زرّاں من مزن شھر ءَ
شُت کُت نہ کن آں ناں ونت کن آں
پت وا کاری نہ انت شما ھم لاپ لوٹ ات

بلُک شدری

پیرل جان بلّک پہ
تو سدکہ بات
تو پگر مہ کن تیاری کن
من سومار ڈک ءِ ڈگار ءَ بھا
کن آں ویدی دیر انت
ڈگار ءِ زورگ ءِ رند ءَ انت
بھائی کن آں
ءُ تئی وانگ ءَ ھرچ در کا انت

ءُ منی میر ءُ واجھاں
شر گوش دار ات

من ڈگار بھا کُت
پیرل ءَ دیم پہ مزن شھر ءَ
دات ءُ شُت اسلام آباد ءَ وانگ ءَ
ایڈمیشن زُرت ئے وانگ بندات کُت ئے
سال پورو نہ بیت کہ بلوچ ءِ نامی پر ات
وانگ جاہ ءِ مستراں چہ وانگ ءَ
کش ات آ زھر شانی کنگ انت
اش کنگ ھمیش اسلام آباد سک سرد انت
منی پیرل ءِ کمبل شھسوار ءِ دبی ءِ آورتگیں
کمبل انت
منی نماسگ ءَ سردی ھجبر نہ کُش ایت
بلے وابے کہ دیستگ ئے
وھدے کہ واب ءِ ترانگ ءَ کپ ایت
المّ ءَ ناتاھیر بیت
وانگ ءُ زھر شانی ءِ گمانی ھواری ءَ
اد ءَ مات ءِ سیرین پروشی ءِ ھال بہ
رس ایت ئے
پیرل اُوپار کُت نہ کنت
گمیگ بیت بے تاب بیت
ءُ گوادر تُن ءُ بے آپی ءِ
آماچ انت پیرل ءِ مات ءَ زی
بیست لیٹری
گیلن ءُ زیلوے زرتگ پہ آپ آرگ ء شُتگ
سرین گوں نہ انت ئے
چار ٹُنگ ٹُنگی پلستر من جتگ بلے نارگانی
توار اَرش ءَ روت ئے
بزگ نار ایت
ھیبک مانی بند ایت ئے
پہ لٹ ءُ کُٹّ ءَ
پیرل جان ءِ
مات زندگ نہ انت
بس ساہ یے ماِں
پیرل ءِ مات مرتگ ھشکین جون مکّ انت ئے
ھمے امیت ءَ
ساہ داشتگے کہ
پیرل ءِ مُراداں من بہ گند آں

ھیبک وا سر ءَ بروبر نہ انت
لٹ ءُ کُٹ کنت ئے
منی واجھاں شما
وا نامداریں
بلوچ اِت
وت ءَ سروک لیک ات
شما بلوچ ءِ درد مارگ ءِ گپ جتگ
انگت ءَ جنگ ءَ اِت ءُ دستان
سینگ ءَ جن ات
ءُ بلوچ ءِ ھکانی گپ ءَ جن ات
شما گیچین کاری وھد ءَ
ھیبک ھم بگل ءَ کُت کہ مارا
بے ھیال مہ کن میر ھیبتان
شما گوشت ما ھرچے بہ بہ ایں
بلوچے ایں شمئے وتیگ ایں
وتی مردم ءَ ڈن ءَ دور نہ دنت
پیرل گوں سنگتاں گوریچ ءَ
آزمان ءِ چیر ءَ اسٹرائِک ءَ نشتگ انت
آ جار جنگ ءَ انت
ما زر چہ شما نہ لوٹ ایں
ما چمّانی پچ کنگ ءَ اتکگ ایں
یک رُژنے بہ زیر ایں
مزن شھر ءِ کندیلاں رُژن بہ زور ایں
وتی راجی ڈبہ ءَ پورو بہ کن ایں
وتی ھلک ءَ رُژنای تالان بہ کن ایں
شما کُل سھیگ ات
وانگ ءِ دروازگ پہ ما بندگ
کنگ بیتگ انت
پہ ما راھے شوھاز ات
توجیلے کن ات
مئے ھبراں گوش دار ات
دیم ءَ بہ بر اِت ئے
ما گناھے نہ کتگ
مئے میار بس ھمیش انت
کہ مئے ھون بلوچی ھون ئے

بلوچ مر ایت ءُ کُشارینگ بیت
بلوچ ءِ ھون ءَ ھون بھا نیست
من ءَ اچ شما بازیں امیت نیست
ڈگار ءُ مال مئے شُت انت
من شدری بس وتی واجھان
یکیں امیت ءَ دار آں
کہ شما بلوچی زھگ ات
دگہ ھچ زھم نہ جن ات
بلُّک کبر ءِ دپ ءَ رس اتگ
چار کبر پہ ما بہ جنائیں ات ءُ
کپن پہ ما آڈر کن ات
دگہ پمّن ءُ منی پیرل ءَ
ھچ پشت نہ کپتگ
آ گریبی واب ات انت
ما رد وارتگ ءُ رد سرپد بیتگ ایں
کہ چوشیں واب دیستگ
گریب ءِ واست ءَ اے
ملک ءَ واب گندگ ھم جرم ئے
مارا دمبانی میار کن ات
اے شمئے بلوچیت ءِ ڈبّہ انت

شمئے بلُّک شدری
پکیر کالونی گوادر

ناکومُراد

تحریر: شوھاز بلوچ

دگنیا ءِ قومی آزادی ءِ جُنزانی تہا قبضہ گیر ءَ وڈ وڈیں پندل سازیتگ وتی قبضہ ءِ مہکم کنگ ءِ هاترا همے وڈا وهدے پاکستان بلوچستان ءِ سرا 27 مارچ 1948 ءَ قبضہ کنت هما روچ ءَ بگر داں مروچی پاکستانی آرمی ءُ ایجنسیاں قومی موؤمنٹ ءِ نزور کنگ ءِ هاترا روچے یک ہتکهنڈا ءِ کارمرز کُتگ برے قران ءِ سوگند داتگ ءُ برے گوں وتی مکر ءُ فریب ءَ بلوچ راهشون رد داتگ اَنت ءُ تحریک نزور کُتگ، پاکستان ءِ قبضہ ءَ را بلوچ ءَ کدی بهی نہ من اتگ ءُ وتی وس ءُ واک ءَ دائم گوں پاکستان ‎ءَ جنگ کُتگ ءُ دژمن پہ ایمنی وتئی سرڈگار ءِ سرا نندگ ءَ نیشتگ۔

همے وڈا وهدے 2002 ءَ بی ایس او آزاد ءِ دروشم ءَ ڈاکٹر اللہ نظر تحریک ءَ را یک دیگہ رنگّے دنت ءُ بلوچستان ءِ آجوئی ءِ واستا بلوچ نودربراں یکجاه ءُ یکمشت کنت ءُ جنگِ آزادی ءَ را نوکیں شکلے دنت بی ایس او آزاد بلوچستان ءِ تہا پاکستانی پارلیمنٹری گلّانی راستیں شکل ءَ راج ءِ دیما کاریت ءُ بلوچ ورناه ءَ آزادی ءِ بارا سنج ءُ زانت دیگ بندات کنت هما جنگ کہ زیِ غیرشعوری شکلے ءَ بیتگ سردار ءُ نواب آں ءَ گوں بیتگ هر یکے ءِ مفادات سرجم بیتگ اَنت گُڈا پاکستان ءِ نعره ءِ جتگ نوں بی ایس او آزاد ءِ شکل ءَ یک شعوری جنگ ءِ دروشم ءَ دیما کئیت پدا آجوئی ءِ لوٹ یک قبیلہ ءُ یک علاقہ ءَ چہ در کئیت بلوچستان ءِ همک هند ءُ دمگ ءَ شنگ ءُ تالان بیت هما جنگ کہ پیسرا یک سردارے ءَ کُتگ نوں همک بلوچ ورناه ءِ کوپگ ءَ بیت وهدے یک راجے چہ علم ءُ زانت ءَ دور بہ بیت گُڈا وتی تاریخ ءَ چہ سرپد نہ بیت ءُ بی ایس او پہ ورنا آں هما تعلیمی اداره بیت کہ چہ آودا ورنا وتی تاریخ ءُ پاکستان ءِ قبضہ ءَ سرپد بنت وهدے کہ جنگ علّمی دروشم ءَ ورنایانی کوپگ ءَ بیت گُڈا دژمن وتی پندالانی سازگ ءَ بندات کنت۔

2008 ءِ دھک ءَ ورنایانی برگ ءُ جیل کنگ بندات بیت وهدے ریاستی ایجنسیز چہ نودربرانی جیل کنگ ءَ وتی ناپاکیں لوٹ ءَ چہ سوبمند نہ بنت ءُ تحریک گیشتر منّظم ءُ مہکم تر بیاں بیت گُڈا سالے ءَ پد گار ءُ بیگواهیں مردمانی لاشانی چگّل دیگ ءَ بندات کنت روچے سدانی هساب ءَ بے میاریں مردم چہ بلوچستان ءِ همک هند ءُ دمگ ءَ بیگواه کنت(گیشتر نودربر بنت) ءُ پدا زوت آوانی ژانگولیں لاش ءَ ویرانگ ءَ دور دنت دانکہ دومی نودربر چہ تحریک ءَ بہر زورگ ءَ بہ ترساں ءُ وتا چہ سیاست ءَ گستا بکنان بلّے زاکر مجید ءِ بیگواهی الیاس ءُ کمبر چاکر ءِ لاش نودربر آں چہ تحریک ءَ گستا کنگ ءِ بدلا گیشتر ورنایانی تہا قبضہ گیر ءِ هلاپ ءَ نفرت ودی بیت ءُ آجوئی ءِ جُنز ءِ تہا نودربر ءُ ورنایانی آئیگ گیشتر بیت ءُ دژمن ءِ اراده یک برے پدا ناکام بنت وهدے دژمن اِے پندلاں چہ شکست وارت گُڈا نوکیں پندل سازیت ورنایانی برگ ءِ تہا ترندی کاریت ءُ پدا همیشانی لاشاں اجتماعی قبرانی تہا کُنڈ کنگ بنا کنت تاکہ سیاسی ورکر ءُ علم دوستیں مردم چہ وتا آجوئی ءِ جُنز ءَ دور بدار اَنت بلّے بلوچ راجی بامرد ءُ راجی جہدکاراں پاکستان ءِ هچ پندل سوبمندی ءَ نیشتگ ءُ دژمن وتی همک نوکیں پندلانی سازگ ءَ رند وت پشوماں بیتگ 2014 ءِ وهد کئیت کہ ورنایانی یک مزنیں کچّے مسلح جنگ (Guerrilla War) ءِ تہا بہر زوریت ءُ دژمن ءَ را دژمن ءِ جند ءِ زبان ءَ سرپد کن انت۔

نوجوانانی آجوئی ءِ واستا گوریلا جنگ پاکستان ءِ واستا مزنیں تاوان ءِ بیت پدا همک هند ءُ دمگ ءَ سرمچارانی لشکر جوڈ بوان بنت وهدے دژمنءِ اِے دراهیں پندل بےسوب بنت گُڈا نوکیں سازش ٹاهینیت ءُ وتی لہتیں مردم آزادی لوٹوکیں گلانی میان ‎ءَ راه دنت ءُ سنگتانی میان ءَ زوریں اختلاف ودی کنت دانکہ لُس مهلوک چہ سنگتاں دلپروش بہ بنت ءُ سرمچارانی ءُ آجوئی لوٹوکیں گلّانی کُمک ءُ مدد ءَ یل بکنان ءُ نودربرانی تہا یک مایوسی ءِ ودی بہ بیت اگاں ما گوں هورتی ءَ بچاراں گُڈا دژمن وتی همے پندل ءَ ھدے ءَ تک سوبمند بیت ءُ سنگتانی میان ءَ اختلاف ودی کنگ ءَ کامیاب بیت چہ همے بےمقصدیں اختلافتانی سبب ءَ بازین معلوک چہ آجوئی ءِ جُنز ءَ مایوس بیت همّدا دژمن فائده چست کنت ءُ هدّے ءَ تک وتئی ناپاکیں مقصد آں سوبمند کنت بلّے ڈاکٹر اللہ نزر گُشیت کہ اِے جنگ نظریاتی جنگ ءِ نزور بیت کنت هتم بیت نہ کنت۔

همے میان ءَ سرنڈر ءِ نام ءَ دگہ پندلے سازیت ءُ همک علاقہ ءَ چہ شوانگ ءُ وتی کاسگ چٹیں مردم ءَ دیما کاریت کہ سرمچار سرنڈر کنگ ءَ اَنت بلّے دژمن ءِ اِے پندل هم بےسوب بنت چیزے وهد بیت کہ دژمن وتی شکست ءَ چیر دیگ ءِ هاترا زالبول ءُ کسان سالیں زهگانی برگ بندات کُتگ کسان سالیں زهگ ءُ نودربرانی برگ ءِ مُراد اِش اِنت کہ نودربر چہ کسانی ءَ ذہنی مریض بہ بنت ءُ باندات ءَ آجوئی ءِ جُنز ءِ تہا آئیگ ءَ بہ ترستاں ءُ دومی نیمگ ءَ ریاست ءِ مزنیں پندل کہ راجی جہدکار یکّے دومی ءِ جیگ ماں جیگ بہ بنت نوں بےسوب بیتگ پرچا کہ بلوچستان ءِ مزنیں سیاسی گلّ بی این ایم ءُ بی آر پی مرچاں یکجاگہ بئیگ ءَ اَنت ءُ دوممی نیمگ ءَ بلوچستان ءِ تہا مزنیں ‎ءُ دراجتریں مسلّح گل بی ایل ایف ءُ بی ایل اے یکجاه بیتگ اَنت نوں دژمن ءِ دراهیں سازیتگیں پندل بےسوب بیتگ اَنت پمیشکہ راجی سروکانی لوگانی مردمانی برگ ءُ بیگواه کنگ بندات کُتگ دانکہ راجی سروک نزور بہ بنت بلّے دژمن اِے سرپد نه اِنت کہ آجوئی ءِ جُنز ءِ تہا آئیگ ءَ پیسر بلوچ راجی سروک سرپد بیتگ اَنت کہ آزادی هون لوٹیت ءُ پہ هون ءِ دیگ ءَ بلوچ راجی سروک دائم تیار بیتگ اَنت همے زوتاں واجہ ڈکٹر اللہ نزر جاهے گُشیت کہ ما راجی آجوئی لوٹیں ءُ آئی واستہ ما هرچ وڈیں کربانی دیگ ءَ تیار آں همے زوتاں پاکستانی ناپاکیں لشکر ءَ کراچی ءِ تہا 9 نودربر بیگواه کُتگ کہ آوانی تہا 7 ءُ 8 سالی زهگ گون اَنت ءُ 2 روچ پیسرا راجی سروک واجہ ڈاکٹر اللہ نظر ءِ لوگ بانک گوں دگہ 3 زالبول ءُ 3 زهگ ءَ آوار جتگ کہ آوانی تہا ڈاکٹر اللہ نزر ءِ 4 سالی ایں جنّک پوپل جان گوں اِنت ءُ پوپل جان ءِ همبراهی ءَ دگہ 18 ماهی گُنڈلے هم گوں اِنت ءُ زِی واجہ اسلم بلوچ ءِ گُهار گوں زهگ ءُ گُونڈل ءَ بیگواه کُتگ دانکہ واجہ اسلّم ءِ سرا پریشر بدیاں بلّے پاکستانی سپاہیگ بےحال اَنت کہ بلوچ راجی رهشون پاکستانی رهشونانی وڈین نہ اَنت پہ راجی آجوئی ءِ هاترا هرچ وڈیں کربانی دایگ ءَ تیار اَنت ءُ پاکستان ءِ اِے پندل هم زوت بےسوب بنت،

تپاکی آجوئی نام اِنت
بلوچستان آجو بات

‎بلوچستان ءِ تہا روچے سدانی کچ ءَ مردم گار ءُ بیگواه کنگ بنت ءُ ناشاسیں جاگہ ءَ برگ بنت ءُ چیر دیگ بنت پدا اِشانی تہا بازیں جلدی گوں ٹپی ایں جان ءَ گس ءَ واتر بیت ءُ بازیں سالانی سال گار ءُ بیگواه بیت ءُ چیزے ءِ زوتاں ژانگولیں لاش ماں یک دگّے، پٹّےِ یاکہ اجتماعی قبرے ءِ تہا در کئیت ءُ همیشانی تہا لہتیں تاں عمر زندانی بیت ءُ نہ روچے گندیت ناکہ انسان ءِ پدا تاں زندگ ءِ سیاهیں کوٹی ءِ تہا گوں تہاری ءَ گپ کنت۔

‎بلوچستان ءِ تہا کساس 25 ہزار مردم گار ءُ بیگواه کنگ بیتگ(گیشتر هم بیت کن اَنت) ءُ هزارانی هساب ءَ برتگیں مردمانی لاش دست کپتگ اَنت گار ءُ بیگواهیں مردمانی تہا نودربر، کماش، زالبول ءُ ورناه هوار اَنت گار ءُ بیگواهیں مردمانی واستہ ءُ بیگواه بیتگیں مردماں پاکستانی راهبند ءِ هساب ءَ سزا دیگ ءِ هاترا بلوچ هیومین رائٹس آرگنائزیشن نامے گل ئے چیزے مدّت بیت کہ کار کنگ ءَ اِنت کہ آئی سرکماش بی بی گل ءِ نام ءَ چہ زانگ بیت بی ایچ آر او ءِ مقصد بلوچستان ءِ تہا بےمیاریں لس مهلوک ءِ سرا ریاستی زوراکیانی باروا دگنیا ءَ سرپدی دیگ اِنت همک ماه گلّ ءِ راهشون بلوچستان ءِ تہا بے میاریں لس مهلوک ءِ هوار جنئگ گار ءُ بیگواه کنگ لوگّانی سوچگ وڈیں وئیل ءَ رسانکدر(میڈیا) ءَ کاریت ءُ همے ارزشت ءَ کنت کہ اِشانی گوما انصاف بہ بیت هما مردم کہ گار ءُ بیگواه بنت اِشانی نام پت ءِ نام ءُ علاقہ ءَ پدر کنت دانکہ انسانی حقانی هاترا کار کنوکیں گلّ آواز چست بہ کن اَنت ءُ معصوم ایں ءُ بےمیاریں مردمان ءَ چہ زندانی ءَ آجو بہ کن اَنت بلّے بی ایچ آر او ءِ زهرشانی، سیمینارز، پریس کانفرنس بےسوب بیتگ اَنت پرچا کہ تنے وھدے لوگانی سوچگ نودربرانی گار ءُ بیگواه کنگ لابرئری ءُ وانگجاهانی بلڈوز کنگ هلاس نہ اِنت بلکیں گیشی اَتکگ آئی ءِ درور همے زوتاں تربت ءَ ڈیلٹا ءِ بلڈوز کنگ اِنت بلّے بی ایچ آر او ءِ باسک نہ اُمید نہ بیتگ اَنت کوریں رسانکدر ءَ چہ بائیکاٹ نہ کُتگ اش پاکستان ءِ هلاپ ءَ ءُ بلوچستان ءِ آزادی ءِ نعره ءِ نہ جتگ تنّے وهدے همے اُمید ءِ پُشدر ءَ جدوجہد کنگ ءَ بیتگ اَنت کہ یک روچے مئے توار گوشدارگ بیت گار ءُ بیگواهیں مردم وتئی گساں واتر کایاں مئے کُڈکانی سوچگ بند بیت بلّے دراه بےسوبیں واب بیتگ اَنت پرچا کہ زی سوشل میڈیا ءَ حالے شنگ اَت کہ بی ایچ آر او ءِ شنگکار (Information Secretary) ءُ کراچی یونیورسٹی ءِ نودربر نواز عطاء کراچی ءِ دمگ گلِستان ءِ جوهر ءَ چہ بیگواه کنگ بیتگ ءُ ناشاسیں جاهے ءَ برگ بیتگ نواز عطاء ءِ همبراهی ءَ دگہ 8 نودربر لشکر ءُ ایجنسیاں گاڈی ءِ تہا کُتگ اَنت ءُ گوں وت بُرتگ اَنت رندا اِشانی هم هچ حال نیست همے وهد ءَ فرح(شہید شاه نواز ءِ لوگ بانک) دیم ءَ اَتکّگ ءَ جُست ءِ کُتگ کہ مئے مردمانی میار چے اِنت؟ گُڈا زالمیں فوج ءِ سپاہیگاں فرح چہ سے منزل برزیں بلڈنگ ءَ چہ بُنا دور داتگ کہ چرآئی ءِ سبب ءَ فرح کراچی ءَ ناسازیں جاورانی تہا ہسپیتال ءَ اِنت۔

‎نواز عطاء گار ءُ بیگواه بیتگیں مردمانی واستہ بی ایچ آر او ءِ پلیٹ فارم ءِ سرا کار کنگ ءَ بیتگ ءُ بیگواهیں مردمانی توار بیتگ بلّے نواز عطاء ءَ نزانتگ کہ پاکستان ءِ تہا انسانی حقانی هاترا کار کنگ گناهے جُرمے ءُ همے جُرم ءِ سبب ءَ مروچی نواز بلوچ زندانی اِنت۔

‎بلوچستان ءِ تہا بیگواهی زهگانی اغواه کنگ نودربرانی لاشانی چگّل دیگ سیاسی گلّ ءِ باسکانی جَنَگ ءُ کُشگ نوکیں هبرے نہ اِنت بی ایس او آزاد کہ اسٹوڈنٹس گلّ یے بستار ءَ بلوچستان ءِ آجوئی ءِ هاترا جدوجہد کنگ ءَ اِنت آئی ءِ مرکزی لیڈرشپ ءَ بگر داں باسک ءَ سدانی هساب ءَ شہید کنگ بیتگ اَنت ءُ سدانی هساب ءَ انگت زندانی اَنت بلّے پہ بی ایچ آر او ءَ اِے نوکیں هبرے اِے اولی بر اِنت کہ بلوچ هیومین رائٹس آرگنایزیشن ءِ سنگتے برگ ءُ زندان کنگ بیتگ ءُ نواز عطاء ءِ همبراهی ءَ دگہ 8 کسانیں نودربر هم برّگ بیتگ اَنت گوں کہ آوانی تہا 8 سالی ایں نودربر آفتاب هوار اِنت، زهگانی برگ ءِ هلاپ ءَ بلوچ سیاسی گلانی نیمگ ءَ سوشل میڈیا ءِ تہا سک زهرشانی زاهر کنگ بیتگ ءُ ایمنسٹی انٹرنیشنل ءُ دگہ هیومین رائٹس آرگنائزیشنز ءَ گوں اپیل کنگ بیتگ کہ نودربرانی آجو کنگ ءَ وتئی کرد ءَ ادا بکنان۔

آزمانکار: شہید نثار صباء

من پنچمی جماعت ءَ وانگ ءَ اتاں یک روچےِ من چہ وتی لوگ ءَ دیم پہ دربرجاہ ءَ روگ ءَ اتاں کہ دربرجاہ ءِ راہ ءِ سرءَ من دیست کہ یک کماشے ءَ وتی چُک دستہ گپتگ ءُ دیم پہ دربرجاہ ءَ روگ ءَ انت.

کماش ءَ منا دیست ءُ توار ئےِ کرت ءُ جست ئےِ کرت کہ بچ تو کئی زھگ ئے ؟
من پسّو دات ءُ وتی پت ءِ نام گپت.

کماش باز وش بوت من ءَ باز مہر ئےِ دات گشت ئےِ بچ بوان وانگ جوانین چیزے مارا بچار آ وھد ءَ ما نہ ونتگ مرچی وتی نام ءِ لکّگ ءَ نہ زاناں……………..

من کماش ءُ آئی ءِ دست ءَ گپتگیں چُک دیم پہ دربرجاہ ءَ روان ات ایں.

من جست کرت واجہ تئی چُک ءِ نام کئے انت؟

کماش ءَ پسّو دات بچ منی چُک ءِ نام “شاہ دوست” انت بلے من چہ دوستی ءَ نام بُلبل ایر کرتگ.

من جست کرت گڑا ما اشی ءَ بُلبل بگشاں یا شاہ دوست…؟

کماش ءَ بچکندت ءُ پسّو دات کہ انّی بُلبل بگُشِ ئےِ اللہ کمّو مستر ئےِ بہ کنت گڑا شاہ دوست بگُش ئےِ ءُ وتی گپ دیم ءَ بران ئے کرت ءُ گشت ءِ بچ توکمو مستر ئے دربرجاہ ءَمنی بُلبل ءِ ھیال ءَ بدار.

من بُلبل ءِ سرا وتی دست ایر کرت کہ اے منی برات انت چون اشی ءِ ھیال ءَ نہ داریں.؟

بُلبل ءَ منی نیمگ ءَ چارت ءُ بچکندت.

وھدے ما دربرجاہ ءَ سر بوتیں من وتی کلاس ءِ نیمگ ءَ شتاں.

بُلبل کچی ءَ وانگ ءَ ات. آ وتی کلاس ءَ.

وھد وتی پیم ءَ دیم ءَ جنزان ات. داں پنچ سال ءَ ما دربرجاہ ءَ برے دربرجاہ ءِ راہ ءَ برے کرکٹ ءُ فٹبال ءِ گراؤنڈ ءَ گوں بُلبل ءَ ملّت ایں . بُلبل مستر بوان ات.

وھدے من چہ دربرجاہ ءَ پارگ بوت آں ءُ شاہ دربرجاہ ءَ شت آں گڑاں بُلبل ءَ گوں ملّگ کم بوت. ھردینکہ ما دوچار کپتیں گُڑا بُلبل ءَ منا وتی برات لیکت ءُ سک مہر دات .

من ھم سک مہر ءَ دات. منی جند ءَ کستریں برات نیست ات ھمے ھاتر ءَ من بُلبل وتی کستریں برات ءِ وڑا چارت.

لستیں وھد ءَ پد بزّگی ءُ گریبی ءِ سبب ءَ من شاہ دربرجاہ یل دات ءُ کار ءُ روزگار ءَ لگ اتاں برے ایرانءَ برے کراچی ءُ تربت ءَ. اے وھد ءَ ما گریبی ءُ بزّگی ءِ انچو آماچ ات انت داں ہپت ءُ ہشت سال ءَ منی بُلبل ءَ گوں ملّگ نہ بوت.

یک روچے من پیر جان نامیں سنگتے ءِ لوگ ءَ نندوک اتاں کہ سنگت ءِ گوانکو ءَاناگہ ءَ توار کُت………..

پیر جان ءَ رنگ چست کرت کمو مسکرا کُرت ئےِ ءُ گشت ئےِ بیا لوگ ءَ ءُ گوانکوئےِ بند کُرت.

کئے انت………؟ من ھیرانگی ءَ جُست کُرت.

پیر جان ءَ گشت کہ سنگتے……………

شاہ دوست انت.

یار من تو شریں دیوانے کنگ آں انّی تئی سنگت کئیت مارا بور کنت من پیرجان گُشت.

پیر جان ءَ گشت نہ اے باز وشدلیں سنگتے تو بہ گندئےِ تو وت گش ئے کہ جوان کرت لوٹائینت.

من گشت شرّ انت بیت اللہ ئےِبیاریت ءُ پد ءَ ما گوں وتی دنیا ءِ جیڑہانی سر ءَ گُپ ءُ تران ءَ مشکول بوت ایں.

اناگہ ءَ دروازگ ءِ ٹکّگ ءِ توار بوت.

پیر جان ءَ گشت منی ھیال ءَ شاہ دوست انت ءُ پاد اتک. چاردیوالی ءِ دروازگ ئےِ پچ کرت ءُ ہاست ہاست ءَ ھبر کنان ءُ بچکندان ءَ منی نیمگ ءَ اتک انت.

من ھم چارگ ءَ اتاں کہ بُرزیں ورناہے ریش ءُ بروت تنک تنک است انت ءُ ایشی ءِ گردگ ءُ بچکندگ منا سک دوست بوھگ ءَ ات انت انچو گمان بوگ ءَ ات کہ اے مرد من پیسر ءَ دیستگ .

وھدے کہ نزدیک ءَ اتک منا دیست ءُ درست ئےِ کرت ءُ سک گل ءَ بال بوت منا بگل ئےِکرت ءُ گردن ئےِ چُک ات.

جست کنگ ءَ لگ ات کہ منی پُھل منی جگر دل ءِ بند منی برات تو کجا بوتگ ئےِ من پر تو سک زہیریگ بوتگاں.

من ھم پجا آرت کہ اے منی ھما پیشیگیں بُلبل انت انّی ورنا ءُ مزن بوتگ من ھم سک باز وش بوت آں ءُ نشتاں جوان محفل ءُ دیوان کرت.

پیر جان ءَ منا گشت کہ چون من ترا گشت کہ منی سنگت شاہ دوست بیت ترا ھم دوست بیت.

من کندت ءُ پیر جان ءَ گشت تئی باز منتوار تو منی بُلبل گوں منا ملارینت…………….

بُلبل ءَ باز کندت ءُ گشت ترا پت ءَ نہ گشتگ انّی بُلبل ئےِ بہ گش ءُ مزن بوت شاہ دوست ئےِ بہ گش.

من گشت کہ منی دل ءَ تو ھما بُلبل ئےِ تو کدی مزن بوتگ ئے. بُلبل ءَ باز کندت ءُ گشت شرّ انت تو انگت منا بُلبل بہ گش.

من جست کرت کہ پت چون انت. گشت ئےِکہ پت انّی بزّگ انت کماش انت بس بازار ءَ روت ءُ کیت.

بُلبل منی گوانکو لمبر زرت ءُ وتی کرّا رکینت.

من ھم لمبر زرت ءُ لمبر ءِ سرا بُلبل لک ات ءُ وتی گوانکو ءِ تہا رکینت.

پنچ ءُ شش گھنٹہ ءِ دیوان ءَ پد ھدا حافظ کرت ءُ پاد اتکاں.

وھد وھد ءَ بُلبل ءَ منا کال کرت ءُ ھبر کرت وھدے ملگ بوت بُلبل ءَ منا سک مہر دات.

بُلبل وتی وانگ ءَ ات ءُ من وتی کار ءُ روزگار ءَ گٹ اتاں.

یک شپے من وتی لوگ ءَ واب اتاں کہ مات ءَ منا پاد کرت کہ بازیں گاڈی ءُ پرپٹانی توار انت وار وار ءَ انگو آنگو رونت ءُ کاینت.

من پسّو دات کہ بلکیں جاگہے ءَ سانگ ءُ سُورےاست مھلوک رونت ءُ کاینت.

مات ءَ گشت نہ اے سُور ءُ سانگ ءِ وڑ ءَ نہ انت. مئے ڈیھہ ءَ لستیں وھد انت دُزّی ے کپت ءَ. ڈنّ ءَ چہ آتگیں لاتیں ناشرکار مئے چُک آں بیگواہ کنگ ءَ انت ءُ تیر سپتگیں لاش آں دور دیگ ءَ انت. اے گاڈی ءُ پرپٹانی توار ھما دژمن ءِ ڈول ءَ لگگ انت. تو پادا اللہ مکنت ترا مہ برنت گڑاں من تئی پیریں مات کجا در در ءَ بہ تچاں…………..؟

من پسّو دات کہ من چے کرتگ کہ منا برنت منی لوگ ءَ اوں زر ءُ سُہرے نیست کہ دُزّی ءَ بیا انت.

مات ءَ یک دم ءَ پنچ ءُ شش نام گپت کہ پلانی پلانیءَ چے کرتگ ات آواناں ھم ہچ نہ کرتگ ات آوانی تیر سپتگیں لاش آتک ءُ سر بوت انت. من کمو سوچ ءِ تہا شتاں کہ واکی آوان ہچ نہ کرتگ ات گڑا پرچہ آواناں کُشت ءُ دور دات اِش.

من پاد اتکاں ءُ یک کُنڈے گپت کہ واکی مات راست گشگ ءَ انت.

شپ ھلاس بوھان ات سہب ءِ پانگ بوت کُل مھلوک نماز ءِ واستہ پاد اتک انت. نماز ونت ءُ چاہ وارت.

من وتی گوانکو ءِ فیس بُک پچ کرت ءُ چارت کہ ھالے چلگ ءَ انت کہ دوشی لتیں دُز مھلوک ءِ لوگ ءَ پُترتگ ءُ مزنین زر سُہر مال ءُ مڈّی ءِ دُزّگ ءَ پد شاہ دوست ء شاہ بیک اش ھم گوں وت برتگ.

من اے نیوز وانت ءُ ھیران بوت آں.

مات ءَ منی پریشانی مارت ءُ جست کرت کہ چے بوتگ تو اینچو مُلور ئےِ ………….!!!!!

من پسّو دات “لُمّہ” دوشی شاہ بیک ءِ زھگ اش برتگ.

مات ھم ھیران بوت ءُ گُشت ئےِ کہ اے دُزّانی سرا بیسہ مکن کہ کُجا کئی لوگ ءَ بہ لُٹ انت ءُ کئی ورناھیں چُک ءَ بہ بر انت………….

انچو روچ در اتک من چہ لوگ ءَ در اتکاں کہ ھال ءُ ھوالے بگراں وھدے شاہ بیک ءِ لوگ ءِ کرّا سر بوت آں آوانی مزنیں مھلوک ءُ سیاد ہمودا اتکگ انت. لتیں منی پجّاروک ات.

ایمبولینسے ھم اوشتوک ات ءُ مھلوک بُلبل ءِ مات ءُ پتاں بے ہوشی ءِ ھالت ءَ ایمبولینس ءَ سوار کنگ ءَ ات انت. من ھیران ءُ پریشان یک کنڈے ءَ اوشتوک ات آں .

سمج کار نہ کنگ ءَ ات. من بُلبل جوان زانت کہ آئی ءَ کس بد نہ کُرتگ. وشدلیں ءُ شرّیں نوجوانِے بوتگ. دربرجاہ ءَ نودربرے بوتگ ءُ اود ءَ ہر کسی دپ ءَ ھمے ھبر ات کہ دُزّان گوں بُلبل ءَ چے دژمنی بوتگ ھر کس ترسگ ءَ ات کہ گپ بکنیں دُزّانی راج انت………….

ھلک(میتگ) ءِ تہا پدا مارا بر انت ءُ بیگواہ کن انت. ھر کس بے وسی ءِ ھالت ءَ وتی لوگ ءَ شت.

بُلبل ءِ مات پت ءُ گُہاراں ھمُک روچ گریت ءُ الہان کُت کہ بُلبل کئے ءَ بُرتگ ءُ پرچہ ءَ بُرتگ…………..؟؟؟

بلے ہچ وڈیں پسّو نہ رسگ ءَ ات.

موسم سک سارت ات بُلبل ءِ پت ھمے جیڑگ ءَ ات کہ بُلبل ءَ کمبل نیست ءُ سارت ئےِ کنت. بُلبل شُدیگ انت ھمے پریشانی ءَ یک روچے دل ءَ (Heart Attack) گپت ءُ دگنیا ئے یل ءَ دات ءُ چہ بُلبل ءِ گماں آزات بُوت………….

بلے بُلبل ءِ مات ءُ گُہار انگت ھمے جست ءِ پسّو ءَ لوٹگ ءَ ات انت کہ
مئے بُلبل کئے ءَ بُرت…….؟؟؟

دلگوش: اے آزمانک چہ شہید نثار صباء ءِ رودپتر ءَ چہ کشیتگ ءُ دیم ءَ آؤرتگ.

اے وھدی چہ بلوچستان ءَ بیست ءُ پنچ ھزار ءَ گیش بلوچ بیگواہ اِنت۔ دنیا ءَ گار ءُ بیگواھی نوکیں ھبرے نہ اِنت بلئے بلوچستان ءَ ایشی ءِ مانا چٹ دگرے۔ اِد ءَ گار ءُ بیگواھی بزانکہ زند ءُ مرگ ءَ گِستا دگہ دگے ءِ سر ءَ سپر کنگ، یا ھستی ءُ نیستی ءِ سیمسرانی نیام ءَ اندیم بوھگ۔ بلئے مرچاں بلوچستان ءِ مردم سرپد اَنت کہ بیگواھی ءِ مانا چی اِنت۔ نی آ اے گپ ءَ ھم زان اَنت کہ زانگولیں جون شودگ نہ لوٹ اَنت۔آ چو ھم زان اَنت کہ بیگواھیں مردمانی ودار ءَ نگاھاں ماں دریگاں درنجگ چوں بے مانا اِنت۔

برے برے بلوچستان کسّہ یےءِ چھرگ ءَ جنت۔ بیگواھیں کارستانی کِسہ۔سُتکگیں گِسانی کِسہ۔ ماں ویرانگاں کپتگیں زانگولیں جونانی کِسہ۔۔۔۔۔ شبیر ھمے کِسہ ءِ کارستے کہ بلوچستان ءِ شپ آگاھیں مُرگانی رمءَ گون اِنت۔

من مدام دیستگ بچکندگ ءَ بیتگ۔ گڈی رند ءَ ھم بچکندگ ءَ اَت ۔ چوناھا من بہہ آئی ءِ بچکند ءِ سَوَب نہ پول اِتگ بلئے من ءَ مدر ٹیریسا ءِ ھما ھبر الّم گیر اتکگ کہ ”بچکند ایمنی ءِ بُنزہ اِنت۔” ءُ ھمے ایمنی من آئی ءِ چمانی تہ ءَ دیستگ۔برے برے دل ءَ جیڑآں بگندئے زندان آئی ءَ چہ آئی ءِ زند ءَ بہ پُل ایت ، بلئے آئی ءِ بچکند، واب۔۔۔۔۔ارواہ ءِ مڈیاں پُل اِت نہ کنت۔
بلوچستان ءِ گاریں مردمانی لڑ یکشل ءَ ودّان اِنت۔ اے لڑ ءَ ھواریں اولی ءُ گڈی نام ءَ کس نزانت۔ بلئے ھمے اولی ءُ گڈی نام ءِ نیام ءَ ھزاراں انچیں ناماں جاگہ کتگ کہ مھلوک اِش پجّا کاریت ۔ اقبال، دین محمد، رمضان ، ذاکر، زاھد ۔۔۔۔۔ دگہ بازینے۔ شبیر ھمیشانی تہ ءَ یکے۔

ماں بلوچستان ءَ سیاست کنوکیں ورناھانی یک جیڑھے وانگ جاھاں رَوَگ ءُ وانگ اِنت ۔ دژمن ءِ چمّاں اے مزن گناھے۔ دنیگہ بلوچستان ءِ سدانی ورناہ وانگ جاھاں رَوَگ ءَ پد واتر نہ بوتگ۔ دژمن ءِ نِزّ ءَ اے داب ءِ مردانی وانگ پہ آئی ءِ زوراکی ءَ جنجالے رودین ایت۔ آئی ءِ ھیال وتی جاگہ ءَ رد ھم نہ اِنت۔ بلئے بلوچستان ءِ ھزاراں ورناھانی ھساب ءَ شبیرءِ ھم دلءَ اَت کہ آ بوان ایت۔ دنیا ءِ سیاسی چست ءُ ایراں بہ زانت۔ سیا ست ءُ تاریخ ءِ چپ ءُ راستاں سرپد بہ بیت۔ بلئے سالے بیت کہ آ زندانی اِنت۔ اے سال ءِ تہ ءَ بلوچستان ءَ ھوار دنیا ءَ بازیں چیزے بدل بوتگ۔ میاں اُستمانی سیاست ءِ تہ ءَ نوکیں اڑ ءُ جنجالاں سر چست کتگ۔شمالی کوریا ءُ امریکہ ءِ جیڑہ۔ روس ءُ امریکہ ءِ سفارتی دوری، مڈل ایسٹ ءِ ملکانی وت مہ وتی جیڑہ، چین ءِ زِر باری دریا ءُ آئی ءِ اڑ ءُ کُڑ ۔۔۔ ۔۔ باز ءِ ھیالءَ دنیا ھمک سال ءِ وڑ ءَ اے سال ءَ ھم سیمی جھانی جنگ ءِ نیمگ ءَ گامے دیم ءَ کِنز اِتگ۔ بازءِ ھساب ءَ اے بے سریں باوستے ۔

اقوام متحدہ ءَ پہ وت ءَ نوکیں کارگشادے گچین کتگ۔ انتونیو گوتریس وتی اولی گشتانک ءِ تہ ءَ گْوشگ ءَ اَت ” پیسر ءِ نسبت ءَ مرچی جیڑہ گیشتر مانگیش اِتگ اَنت۔انسانی ھک ءُ میاں استمانی کانود یکشل ءَ لگتمال بیگ ءَ انت۔ مھلوک وتی لوگ ءُ جاگھانی یلہ دیگ ءُ لڈّ ءُ بار ءَ مجبور اِنت۔ ۔۔۔ ۔” وھدیکہ آ میاں استمانی کانودانی نام ءَ گرگ ءَ اَت من عراق ءِ سر ءَ امریکہ ءِ اُرش ءِ ترانگ ءَ کپت آں ءُ آ وھد ءَ اقوام متحدہ ءِ کارگشاد کوفی انان ءِ ھورکیں دانک ھم گیر اتک اَنت ، ” مئے چماں ءُ اقوام متحدہ ءِ چارٹر ءِ ھساب ءَ عراق ءِ سر ءَ اُرش کانودانی لگتمالی بیتگ۔”

ستمبر ءِ ماہ ءَ اقوام متحدہ ءِ جنرل اسمبلی ءِ سالانہ سیشن ھم برجم دارگ بوت۔ جنرل اسمبلی ءِ دیم ءَ داتگیں وتی گشتانک ءِ تہ ءَ سیکٹری جنرل ءَ نیوکلیئر سلاہ، ناشر کاری ءُ موسمیاتی تبدیلی ءِ وڑیں جیڑھانی ھمراھی ءَ روھنگیا مھوک ءِ کشت ءُ کوش ءِ سر ءَ ھم گپ کُت۔ ءُ اے سرجمیں جیڑھانی تہ ءَ بلوچستان ءُ آئی ءِ جیڑہ اے رندی ھم چیر ترّ اِت اَنت۔ زاھر اِنت کہ شبیر اے کِسھاں سرپدنہ اِنت۔ سالے بیت کہ زندانی اِنت۔ بزانکہ سالے بیت آ چہ کتاباں گِستا اِنت، ھالتاک ءِے دست نہ جتگ۔ بگندئے آ اے گپ ءَ ھم مہ زانت کہ ھاسل ءُ سالار ءُ جنئگ بوتگ اَنت یا لباچ ءِ پشت کپتگیں گِس ھم لشکر ءَ مانداشتگ اَنت۔ ءُ ھچ رسانکدر ءَ اے ھال شنگ نہ کتگ کہ بے لوگیں مردماں شپ کجا روچ کُتگ۔

اے سال ءِ جتگیں مردمانی تہ ءَ یکے تلار اِنت۔ تلار ءِ نام وَسلیمان اِنت بلئے من ءَ اے نام پر آئیءَ دوست تِر بیت۔ آروچی شبیر ءُ تلار اولی ءُ گڈی رند ءَ دُچار کپتگ ات اَنت۔ مئے شَور اَت کہ واترّی ءَ لازُم دیوانے کن ایں۔ بلئے نہ بوت۔ ۔۔۔۔

ھزاراں بدیں ھالانی تہ ءَ یک وشیں ھالے عراقی کُردستان ءَ بیوکیں ریفرنڈم اِنت۔ ریفرنڈم ءِ آسر کُردستان ءِ آزاتی ءِ ھکّ ءَ اتکگ۔نود ءُ دو درسد مردماں وتی آزاتی ءِ ھک ءَ ووٹ داتگ۔ سد سال ءِ دراجیں پندے ءِ بُرّگ ءَ پد گپتگیں آزاتی ءِ مانا ءَ بگندئے دنیا مہ زانت بلئے کُرداں الم سما اِنت کہ اے شپ چوں روچ بوتگ۔ ترکی ءَ بیھار داتگ کہ یا وَ گلامی ءَ بہ منّ اِت یا گژن ءَ۔ بلئے ترکی اے گپ ءَ نہ زانت کہ گژن پہ کوہ گرداں بیھارے نہ اِنت۔
کردستان ءَ ابید کیٹالونیہ ءَ ھم ریفرنڈم برجم دارگ بوتگ۔ ٹرن آؤٹ باز نہ بوتگ بلئے بھر زرتگیں مردمانی تہ ءَ 90درسد ءَ وتی آزاتی ءِ جار جتگ ۔ عراق ءِ وڑ ءَ اسپین ھم اے ریفرنڈم ءَ وتی ملکی کانودانی لگتمالی سرپد بیت۔

شبیر ءِ بیگواھی ءِ اے سرجمیں سال ءَ دنیا ءَ کُشت ءُ کوش پیشی ھساب ءَ برجاہ بوتگ۔ اتکگیں ھالاانی رِد ءَ اے سال ءَ تھنا شش ماہ ءِ توک ءَ سوریاءَ 5381 مردم جنئگ بوتگ۔چو وَ سوریاءِ جنگ ءَ سرجمیں کشتگیں مردمانی کچ چہ چار لکھ ءَ گیش اِنت ۔بلئے اے وھدی دنیا ءِ آباد ی چہ ھپت ارب ءُ پنجاہ کروڑ ءَ گْوستگ۔ زاناں ھمے سَوَب اِنت کہ مرچاں پہ انسانی زند ءَ ھاسیں ارزشتے پشت نہ کپتگ۔ چوناھا انسانی ھکانی وستہ کارکنوکیں گل وھد وھد ءِ سر ءَ اے کوشاں ایر جن اَنت ۔ بلئے اے چیز ھم چارگی اِنت کہ انسانی ھکانی واھُند کجام ’انسان ‘ اَنت۔چیا کہ انسان ءُ انسان ءِ میان ءِ تپاوَت مرچگیں ھبرے نہ اِنت۔چہ ازل ءَ پہ بنیادم ءَ یک جیڑھے
survival of the fittest
زوراوری ءُ نزوری ءِ جیڑھ بیتگ ۔ گْوش اَنت کہ میاں اُستمانی سیاست ءِ بُن ھشت ھمے فارمولہ ءِ سر ءَ ایر اِنت۔ ءُ اگاں بچارئے تہ کالونیل اھد ءَ بگر داں روچ ء مروچی تاریخ ھمے یکیں کسہءَ یکشل ءَ آران اِنت۔

دنیا ءِ دگہ بازیں مُلکانی وڑ ءَ بلوچستان ھم جنگ آماچیں ڈگارے۔ ھما توامیں بد رنگی کہ یک جنگے ءَ گوں وت ءَ گون بنت، آ دْرست بلوچستان ءِ جنگ ءَ ھم گون اَنت۔باز ینے ءِ ھیال ءَ بلوچستان بندی جاھے کہ اِد ءَ زندماں تھاری ءِ سانکلاں پتاتگ۔ گژن ، بے وسی، جنگ ءُ چوپ ءُ گلامی ءَ بلوچستان ءِ زیبائی پچ گپتگ۔ھون ءِ رنگ ءَ ھمک رنگ اندیم کتگ۔ بلئے ھما مردماں کہ چاردہ ءِ شپءَ کولواہ ءِ ڈاک ءَ اوشتاتگ ءُ ماہ چار اِتگ، آ لازُم زان اَنت کہ بلوچستان چوں زیبا اِنت۔ ءُ شبیر ھمے زیبائی ءِ چھرگ اِنت۔

مرچی اکتوبر ءِ چار تاریخ اِنت، ھمک سال ءِ دو سد ءُ ھپتاد ءُ ھپتمی روچ۔ اے روچ شبیر ءِ بیگواھی ءِ روچ اِنت۔ مرچی شبیر ءِ بیگواھی ءَ سالے سرجم بوتگ۔ بلئے سال گشئے زاناں مروچاں تچان اَنت۔ زنداں گِندیں سنگتے ءَ یکروچے من ءَ گْوشتگ اَت ، ” زندان ءَ روچ دراجتِر بنت ۔ گمان بیت کہ مردم سالے ءِ پند ءَ یکیں روچ ءَ بُرّ ایت۔”
چوناھا من بلوچستان ءِ ھما ورناھانی تہ ءَ ھساب باں کہ دنیگہ زندانی نہ بوتگ اَنت۔ ھمے سَوَب اِنت کہ اے سال دْروشمیں روچانی کِسہ بس مردمانی دپ ءَ اِش کتگ۔ءُ مردم زندان ءِ بابت ءَ دگہ بازیں گپے ھم کن اَنت۔ مردمانی ھساب ءَ زندانءِ بد رنگی امروز ءَ چہ وتی رنگ ءُ زیبائیاں زبھر کنت۔۔۔ ! اگاں گوں شبیر ءَ دچار کپت آں تہ الم جُست ئِے کناں کہ زِندان چون اِنت۔

دنیا ءِ ھزارسالانی راج داپتر اے شاھدی ءَ دنت کہ اچ ادا لہتیں انچیں نمیرانیں سر گوستگ کہہ زند اش پہ بزگی گوازینتگ ،ھر رنگیں تماہ ءُ متاھاں دست ءِ وت دز کش بوتگ انت ءُ پہ لس مہلوک ءُ سر ڈگار ءَ نگرھیں جان اش ندر کتگ۔اے وڈیں نمیرانیں سر تھنا گوں یک زمین یا یک راجے ءَ بندوک نہ بنت ۔ ھاس من گلامیں راجانی دپتراں ھر نیمگ ءَ لہتیں گراں کیمتیں گوھر دست کپیت۔ھمے پئیم بلوچ جنز ءِ تاک سر ءُ چیر کنگ بہ بنت تاں ادا ھم اے پئیمیں گوھر کیمتیں سر گندگ کئیت ۔ اچ من نزیک تریں سنگت کہ آھاں پہ اے گل زمین وتی نگرھیں جان ندر کتگ چوناھا و بے ھساب انت بلے لہتیں انچیں ھست انت کہ بہہ بے ھال کنگ نہ بنت آھانی یات دلاں نکش انت چہ آھاں چیئرمین سھراب ، کامریڈ محمد خان مری، کامریڈ ساگر نبی بخش ، کامریڈ خلیل یعقوب ، کامریڈ کمبر چاکرءَ ابید دگہ باز انت ۔ھمے سنگتانی نزیکی، گوں اشاں نند ءُ نیاد ، گپ ءُ تراں ھردماں یات کاھنت۔اے ھبر ءَ گشیناں کہ منی جند جنز ءِ بھر نبوتگ بلے گوں سنگتاں نزیکی باز بوتگ اے چہ ھما سنگتاں لہتیں انچین انت کہ اشان پہ ماتیں سرڈگار ءُ لگتمالیں راج ءَ وتی سر باھینتگ انت ،اشاں زانتگ ھم کہ اے راہ گرانیں نوبتے داریت ،زند ءِ سودا انت ،جنگ، کشگ، گار ءُ بیگواہ کنگ ، زانگولیں لاشانی دز کپگ اے راہ ءَِ مزل اَنت بلے بے ترس اچ وتی ھما راہ ءَ یک گامے ھم پشت نہ کنزاتگاں کہ آھاں اے راہ پہ وت گچین گپتگ ات ۔
بلوچ جنز ءِ نمیرانیں سراں چہ یکے ھمبل رضاء جہانگیر اَت کہ شے مریدی پنام ءَ وتا پہ لگتمالیں مھلوک ءُ سرڈگار ءِ اشک ءَ دائم نمیران اش کت۔ رضاءِ سنگتی ءُ نزیکی اچ من باز نہ ات بلے ھردیں کہ رضاء من دیستگ یک پُہتئیں کامریڈی دروشمے ءَ دیستگ آئی ءَ پہ وتی زات ءَ بہہ نہ جیڑاتگ دائم گوں گل زمین ءِ مھکمیں مھر ءَ بندوک بوتگ ۔ رضاء جہانگیر ءَ منی نند ءُ نیاد ھما وھداں کہ من شال ءَ وانگ ءَ اتاں بوتگ ات ۔ شال ءِ دمک ءُ رضاءِ پادانی پد ، برے ڈگری کالج ءِ ہاسٹل، برے پولی، برے مزن شاہ در بر جاہ ، بی ایم سی ءُ برے اے دمک برے آدمک، بی ایس او آزاد ءِ مراگش ءُ زھر شانی بہ گر اندگہ چست ءُ ایراں درا من رضاء جہانگیر باز رندا باز جاگہ بازیں وڈ ءُ درشماں دیستگ۔ آئی ءِ راستی ءُ تچکی، گوں سنگتاں مھر ءُ دوستی بہہ بیھال نہ بنت تو کہ ھر وھد ءَ دیستگ بچا رضا ء بچکندگ ءَ اِنت ۔
ھما روچ کہ کامریڈے شفیع بلوچ گوں سنگتاں آوار جنگ بوتگ ات من ءَ سنگتے ءِ ایس ایم ایس اتکگ ات ءُ ھا ل ءَ پکا کنگ لوٹگ ءَ ات من یک ءُ دو سنگت جست گپت آھاں پسہہ نہ دات رضاءَ گوں من ھال کت آئی ءَ ساھتے پد گشت ھو ھال پکا انت ۔ ھمے وھداں من دگہ گپے چہ آئی ءَ جست گپت کہ راستے اناں رضاءَ جواب دیئگ ءِ جاہ ءَ اچ من جست کت کہ ترا اے گپ کئے گشتگ من و کسی نام نہ گپت کہ گپ تنظیمی ھوالہ ءَ شریں گپے نہ ات بلے رضاءَ وت ھما سنگتءِ نام گپت ءُ منا گشت کہ اے سنگت مرچاں بازیں وت سریں گپ اڈ دیئگ ءُ آ دگہ سنگتاں دل پروش کنگ ءَ اِنت تئی و سنگت انت بلے اچ اشی ءَ وتا پھریز من ھیران بوتاں کہ اے چونیں ھبرے بلے انچو کہ وھد کنزاں بوت رضاءِ گپ وتی جاہ راست بوت انت ۔
وتی نمیرانی ءَ ھپتگے پیسر منا چہ نمبرے ءَ ایس ایم ایس اتک کہ من اچ تو گنند ءُ نند کنگ لوٹاں۔ من زانت کہ وتی سنگتے بیت بلے اے نزانت کہ رضاء انت آئی وت منا گشت کہ من شے مریداں ۔ منا دیر ات کہ گوں رضاءَ ھال اھوال نیست ات البتہ اے ھبر ءَ من سرپد اتاں کہ اے زمانگ ءَ رضاء بی ایس او آزاد ءِ سیکرٹری جنرل اِنت اے زمانگ ءَ ھالات ھم نہ وش اتاں سیاسی سنگتانی گرگ ءُ برگ، آوار جنگ پدا ٹپ ءُ ٹوریں لاشا نی دز کپگ گیش بوان ات ۔ ھاس پہ بی ایس او آزاد ءُ بی این ایم ءِ سنگتاں ھالات سک نہ گیگ اتاں دومی نیمگ ءَ وتی سنگتانی بے نپیں چست ءُ ایر غیر سیاسی ایراد گیری، بی ایس او آزاد ءِ ھلاپ ءَ پندل سازگ ھم باز بوتگ ات ءُ زمانگ ھمیش ات کہ شے مریدیں رضا ء پہ وتن دیوانگ ات اے دیوانگی ءَ آ تربت ءَ آؤرتگ ءُ سر کتگ ات دیم ءَ چے بیت شے ئیں رضا چہ اے گپ ءَ باز گستا دگہ جنجالاں جیڑگ ءَ ات پہ آئی زند بلاھیں چیزے ات نہ موت ترسے ات پمشکہ آ چہ ھردُکاں یک کرّے گوں زمین ءِ جیڑھاں گوں بی ایس او آزاد ءِ کاراں دزگلاش ات ۔ من کہ شے مرید ءِ کلہ پہ وت دیست ھو کت اچ آئی ءَ وھد گپت ءُ دومی روچ ءَ آئی ءِ گشگ ءِ پدا سنگتے پہ من اتک ما ھردو دیم پہ شے مرید دیوانگ رھا دگ بوتیں۔ من دل ءَ جیڑاں اتاں کہ شے انو پرچا تربت ءَ اتکگ، اے ھالات ادا چے کنت ، من آئی چے شور ءُ سلاھ بکئیں ، چوں سرپدے بکئیں کہ ادا چہ زوت در بئیت کہ اے جاگہ رسترانی دستاں کپتگ۔ ما کہ سر بوتاں اے یک کسانیں کوٹے یے ات رضاء گوں دگہ دو سنگت ءَ ھمودا نندوک ات ۔منا کہ دیستے کنداں بوت ءُ اتک منا گلاشے کت، دست ءُ دورھ ءَ رند من رضا شری ءَ چار ات، شوکیں رضا نو پکائی ءَ شے مرید بوتگ ات، پہ وتن دیوانگیں شے مرید ،آئی لنٹ ھشک اتاں بلے دپ پُر کندگ ات، بی ایس او آزاد ءِ سیکرٹری جنرل رضاء جہانگیر ءِ پشک ءَ بٹن ھم پر نیست ات ، سیاھیں ملاشی ئیں گد آئی ءَ گور ات زانگ بوت کہ شے مرید ءَ اے گد کساس ھپتگے بیت گورا انت ۔ سیاست کہ نام کشی ءُ لاپ چاری ءَ جوان تریں وسیلہے جوڑ بوتگ من رضا ءِ اے ھالت ءَ اجکہ ءُ ھیران دگہ ھچ گپ ءُ ھبری نہ اتاں آئی ءَ منا آپ ءِ سلاہ جت کہ بوتلے چہ آپ ءَ پُر ات ھمودا ایر ات ۔رمزان ءِ ماہ ات ءُ من روچگ اتاں پمشکہ من کند ات گشت کہ آپ نہ وراں آئی ءَ زانت کہ من روچگاں گشت اش بہ بکش کہ ما روچگ بوت نہ کناں ترّ ءُ گردئے مردماں ۔ ھمدا یک شریں ساھتے نشت ءُ ما بازیں گپ جت، سیاسی گپ، وانگ ءِ زمانگ ،بی ایس او ءِ چست ءُ ایر ءُ اے زمانگ ءَ کہ وت گڑیں بحرانے پیداک کنگ بوتگ ات آ بابت ءَ ھم بازیں ھبر ءُ ھالے کت۔ رضا ء ءَ شے مرید بوتگیں ورنا وتی جاگہ ءَ محکم ات بی ایس او ءِ تھا سنگتانی آؤرتگیں بحران ءَ ھچ مان نیارگ ءَ ات آئی جواب ھمے یکین ات کہ بی ایس او ءَ ھچ نہ بیت اے درھا پر ماھگ بوتگ انت وت ھلّنت مارا گوں آھاں ھچ کار نیست وھد راستیاں وت پدّر کنت۔ اچ وتی موبائل ءَ منا دو سے میٹنگانی پوٹو ھم پیش داشت انت کہ جتا جتائیں یونٹانی دیواناں بی ایس او ءِ جنک ءُ بچکیں سنگت سک باز گندگ بوتاں ۔ گوں پوٹوانی گندگ ءَ من زانت کہ بی ایس او ءِ بابت ءَ آ پروپیگنڈہ یا دروگ کہ اخبارا ں یا سوشل میڈیا ءَ دیم ءَ آرگ بوگان انت درھ وت ساچیں کسہاں ابید ھچ نہ انت ۔ رضا ء منا پوٹواں پیش داران ات ءُ کندان ات ، اے پلاں یونٹ انت، اے پلاں یونٹ اِنت نو تو وت بگش بی ایس او کجا سر بوتگ ، آ سنگت کہ دروگ بندگ ءَ انت ھما راست انت یا بی ایس او راست ایں۔ بازیں گپ ءُ ھالاں پد من گشت کہ رمزان انت کوہ مراد ءَ زیارتی ھم پیداک انت بلے تو بائدیں کہ وت اودا مہ رو سرکار الّم ترا در گیجیت ءُ نکسان دنت ۔ھالاتانی ھترناکی، گرگ ءُ جنگ ءِ بابت ءَ من وتی منّاں آ ترسینگ ءَ کوشست کت کہ زیادھیں سر ءُ پُر مکنت منا دیم ءَ گشت اش کہ ھو من وتارا زاھر نہ کناں تاں سرکار ءِ چماں زاھر مہ باں بلے من زانت کہ شے مرید دیوانگ اِنت ءُ آ بس منی تسلہ دیئگ ءَ ھو ھو کنگ ءَ انت ۔ساھتے رند من اجازت کت ءُ چہ اودا پاد اتکاں ۔ سے ءُ چار روچ نہ گوست منا چہ موبائل ءَ کلوہے راہ دات کہ باندا سھب آپسر اسکول ءَ ادیوان انت تو اتک کنے بیا۔من ھیران بوتاں ،ترسے چیر کپت کہ باندا چے بیت اے مرد دلیر انت یا دیوانگ ،اے وھد ءُ ھالاتاں آپسر ءِ اسکول ءَ نندیت دیوان کنت ۔
وھد روان ات ءُ 14اگست ءِ شوم ءُ شانزدھیں روچ ھم اتک سر بوت بی ایس او ءَ مدام ءِ پئیم ءَ پدا زھر شانی ءُ روانک ءِ جا ر پرینتگ ات ۔ ما ابکہ ءُ ھیران اتاں کہ اے وت کشی پرچا، سرکار چوں ھونواریں رستر ءَ مست ءُ دو دست انت زھر شانی کجاکنگ بیت بلے ھیر سنگت جزباتی انت ھبر ءَ گوشدارگ ءَ کس تیار نہ ات 14اگست وتی درستیں تھار ءُ تاموریاں اتک سر بوت بی ایس او ءَ ھم روانک کش ات، پریس کلب تربت ءِ دیم ءَ زھر شانی سنگت اتک مچ بوت انت اے روچ ھرکس ترس آماچ ات تربت ءِ سے ءُ چار اکبار والہاں ابید آ دگہ درہ بیگواہ اتاں۔ جنک ءُ بچکانی ھواریں روانک اتک ءُ سر بوت بلے زوت ھلاس کنگ ءُ روگ ءِ بجاہ ءَ اشاں سے گھنٹہ ءَ گیش ھمدا نشتودار کت کہ مے سنگت چہ تمپ ءُ مند ءَ انگہ نیاتکگ راہ ءَ انت ۔ ھمے سھتاں من گوں یک ءُ دو مستریں سنگتاں ھال اھوال کت کہ چے مسلہے زھرشانی ءَ زوت ھتم کن ات سنگت بلّے رواں کہ ھالت شر نہ انت بلے ھو ھو ءَ ابید ھچ۔ اناگہ پریس کلب پوج ءَ انگیراں کت بچکیں سنگت ما لہتیں تاچینت ءُ راہ دات ءُ لہتیں پوج ءَ دزگیر کت ، جنکاں کوکار ءُ جاک کت پوج ءَ آھانی سرا لٹ شانی ءُ برزا تیر گواری کت ۔ ھمے پئیم چہ تمپ ءُ مند ءِ سنگتانی آھگ ءَ ساری پوج ءَ زھرشانی زور ھتم کنائینت درھیں سنگت یک یک بوتاں۔
ھمے روچ ءَ من گوں رضا ء ءَ پدا ھال کت ءُ گشت کہ اے چہ کسہے کہ شما مرچی کتگ اے وتی سنگتانی وت نکسان دیئگ انت ۔ اندگہ سھب ءَ سنگتے ءَ موبائل ءَ کلوہ کت بیا کہ امداد بجیر ءِ لوگ انگیران انت ۔ گوں من دگہ لہتیں سنگتانی ھال اھوال بوگا ات منا ھر ھالے کہ سر بو ات من سنگتاں سرپد کناں اتاں۔چہ امداد ءِ بجیر ءِ لوگ ءَ منا گشگ بوت کہ دوشی رضا امداد ءِ مھمان بوتگ پوج ءَ ھردو شہید کتگ انت ۔ من اچ وت ھلاس ھچگی نوبتاں ۔ شے مرید کہ پہ مکہیں گل زمین ءَ دیوانگ ات پہ گل زمین کربان بوتگ ات ۔ آئی ءَ اے ھبر راست کت داتگ ات کہ بی ایس او دائمی ھست انت ءُ ھست بیت اے دراجیں جنز ے گوں اشی ءَ محکمیں سدک لوٹیت ءُ اے سدک سرانی نوبتاں تاوان بار نہ انت ۔ مکہیں گل زمین ءِ دل پھکیں اشک ءَ شے مرید دائم ماں راج دپترءَ نمیران کت ۔ رضا ء جھانگیر گوں شے مریدی نوبتاں پہ مدامی نمیران انت ابد مان انت۔