ھرچ مُرگ کد ئے بال ئے وَت
شاھبیگ بلوچ
دی بلوچستان پوسٹ
انچو گُشنت مئے انوگیں راجی جُنزءَ بزان بلوچ ئے پنچمی آجوئی ئے جنگ ءَ کساس بیست سال سرجم اِنت۔ مئے وڑیں مردم کہ جُنز ءَ نیم راہ ءَ ھوار کپتگ اَنت نی مئے ھمرائی ءَ ھم کساس یازدہ اگں دوازدہ سال سرجم بوتگ۔ اے سالانی تہا بلوچ راجی جُنز چون مٹیتگ اِشی ئے تہا کجام بدلی سدلی اتکگ۔ چونیں سیاسی، مزاحمتی، چاگردی ءُ ادبی دیم روی بوتگ یا باز جاہ ءَ پشت ءَ شُتگ اگں اوشت ئے آماچ بوتگ ۔ اے دُراہیں جیڑہانی چارگ ٹپاسگ ایشانی سرا گوں ایمانداری ءَ چارگ ءُ پدا وتی ھیال ءُ لیکہ آں پہ جوانیں راہ ئے درگیجگ ءِ ھاترہ کارمرز کنگ المی اَت ءُ انگت المی اِنت۔
بلے مئے بدبختی گُشے نزانتکاری گُشے یا اگں کجام ھم نام دئے کہ دات کنے ۔ ما ھر وھد ءَ کہ چیزانی چارگ کہ بندات کُتگ گُڑا ما کدی ھم وتی نیمگ ءَ نہ چار اتگ۔ مئے کرا ابید چہ مئے جِند ءَ دگہ درست رد اَنت والا پالیسی چلیتگ داں انگت ھم چلگ ءَ اِنت۔ ما اگں تنقید کنے ھم چم بند کنیں ءُ تنقید کنیں، اگں کار کنیں ھم چم بند کنیں ءُ کار کنیں، سنگتی کنیں ھم انچو ءُ اگں دشمنی کنیں ھم انچش۔
دگنیائے انقلابانی درور دات نہ کناں کہ ھما کچ ءَ دگنیا ئے انقلاب ءُ تاریخ ئے سرا ھاسیں علم ئے نیست کہ آودہ چُش بوتگ مئے کرا ھم چُش بہ بیت ۔ کرنٹ افیرزاں ھم باز سرپد نہ یاں کہ نیوز چارگ وانگ ءُ گوش دارگ ئے شوق نیست ۔ تہنا ھما گپ کہ گوش داشتگ اَنت چہ دگرانی دپ ءَ ھمایاں سرپد آں ءُ مدام رپیٹ اِش کناں دانکہ مردم بزان اَنت کہ من ھم باز زاناں۔
ھیر ادا واجہ غلام محمد ئے یک گپ ئے الم جناں کہ اے گپ منا مدام یات کئیت کہ یک بلوچ ئے ءَ آشوبی جوڑ بیگ ءُ پہ وتی ڈیھہ ھاترہ جہد کنگ ئے ھاترہ المی نہ اِنت کہ دگنیا ئے تاریخ سرپد بہ بیت۔ تہنا ھمینچو المی اِنت کہ وتی سرا بیوکیں ظلم و زوراکی ءَ بیماریت پرچہ کہ بلوچ وت یک تاریخ ئے جوڑ کنگ ءَ اِنت مئے چمانی دیم ءَ تاریخ نبشتہ بوگ ءَ اِنت۔ ھیر واجہ غلام محمد گوں وتی ھمبلاں شہید بوت۔ آئی ءَ وتی جہد وتی مھکمی وتی دلیری وتی بہادری وتی ایمانداری پیش داشت ءُ سرڈگار ئے راستیں پُسگ ئے وڑا وتی گپانی سرا اوشتات داں گُڈی ساہ ءَ۔
الم اے درستیں گپاں ما درست زانیں سرپدیں گُڑا ایشانی نبشتہ کنگ ئے زلورت چی بیت کنت ۔ ھئو راست اِنت ما دراھیں چیزاں سرپد اِنت۔ ما سرپد اِنت کہ بلوچ سیاست ٹولی بازی، لابی پالیٹیکس، بلیک میلنگ، مس انڈرسٹینڈگ، دروگ ءُ پندل، یک دومیگ ءَ ایر جنگ، پریکٹیکل ءُ کار کنوکیں سنگتاں بیوقوف ءُ جذباتی لیکگ، کتابی ءُ آزمانی گپ جنوک ءُ وھد زوالاں سرپد ءُ شیوار لیکگ، سنگتی بنیاد ءَ سیاسی کارانی تہا ھمراہ دار بوگ یا نہ بوگ ءُ دگہ بازیں چیزاں ما سرپد اِنت۔ ما اے سرپد اِنت کہ سوشل میڈیا بلوچستان ءَ آزاد نہ کنت بلے بیا کہ سال ئے سئے نبشتانک ءُ نبشتانک ھم پدا دلپروشیں نبشتہ کنگ ھم بلوچستان ءَ آزاد کُت نہ کنت۔
مئے کرا لہتیں ٹرمز سک باز کار مرز بنت چُش کہ سرمچاری گنوگی، لچی جنگ، فیمنزم، کمیونسٹاں بلوچ رد دات اَنت، ٹرمپ مئے کمک نہ کنت، ہندوستان مارا بئے نہ کنت، یورپ ءَ ھم مئے گپ گوش نہ داشت۔ اے گیشتریں ٹرمزانی کارمرز کنوک اگں آماچ بیوک ھما مردم ءُ سنگت ءُ گروپ ءُ لابی ءُ ٹولی اَنت کہ آیانی کار ڈن ءَ سیاست کنگ اِنت بلے عجیب اِنت کہ وتی کار وئیل کُتگ اَنت وتی زمہ واری بیھال کُتگ اَنت ءُ نشتگ اَنت کہ مارا کس کمک نہ کنت ۔
منی ھیال ءَ شرزاتیں ٹرمپ ءُ براہمن ئے مودی ءِ کرا مئے توار نہ رسگ ئے مستریں ءُ یکیں سوب ھمیش اِنت کہ جہل ءَ نبشتگ اَنت۔
وھدیں زبان زانت، انسانی ھقانی ھاترہ کار بہ کنت،
وھدیں اھوالکار وتارہ زوریں فیمینسٹ ایں بہ کنت،
وھدیں سیاسی رہشون زور ازمکاری بہ کنت،
وھدیں بے سر ءُ پاد ایں نبشتانک راجدپتر ئے بہر لیکگ بنت،
گُڑا ھاک ٹرمپ شرزاتیں بلوچ ءَ کمک کنت۔
گُڈی ءَ یک گپے الم گیشینگ لوٹاں کہ اے نبشتانک ئے تہا ھما دانشور، نبشتہ کار انسانی ھقانی ھاترہ کار کنوکیں سنگت بلوچ سیاسی ءُ ادبی پڑ ءَ گوں سیادی داروکیں رہشون ءُ اُستاد گُشگ نہ بوتگ اَنت کہ گوں راستی ءَ راجی جیڑہ ءُ گپانی سرا وتی لیکہ ءَ دیما کارنت ءُ راجی جُنز ءُ سنگتاں شریں سکین دئینت ءُ راہ پیش دار اَنت۔
بلکیں ادا ھما سوچ ءُ نظریہ گُشگ بوتگ کہ بلوچ راجی جنگ کہ گوستگیں بیست سالاں چہ یکشل ءَ برجاہ اِنت ءُ گوں ترندی ءَ دشمن ءَ پروش دیگ ئے نیمگ ءَ روگ ءَ اِنت ھما جُنز ءُ ھما سنگتانی کارانی تہا ھرابی درگیجوکیں ھما وتسریں دانشور، کہ چار کتاب وانگ ءُ چار روچ سردیں ملکانی تہا نندگ ءَ پد ھمودی ماحول ءَ چہ متاثر بوتگ اَنت ءُ اے سرپد بنت کہ بلکیں مغربی زندگی ءُ آئی ئے وڑ ءُ پئیم بلوچستان ءَ ھم آرگ بیت کنت۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
