دیوانے گوں ناکو مراد بکش ءَ۔۔۔۔۔۔۔
سرھال: بلوچ ہیومن رائٹس ایکٹیویسٹ
نبشتہ سفرخان بلوچ
دی بلوچستان پوسٹ
من ءَ کِساس دہ ءُ پانزدہ روچ بیت من ناکو نہ دیستگ ءَ ، اناگت ءَ منی چم ناکو ءَ کپت کہ ناکو چہ مسیت ءِ پُشت ءَ دیم پہ مچکدگ ءَ رھادگ اَت۔ من ناکو ءِ رند پداں چہ مچکدگ ءِ پُتِرگ ءَ پیسر ناکو رسینت ۔ من گوں رسگ ءَ ھوار ناکو سلام دات ءُ پد ءَ گْوشت ناکو دیر اِنت تو گِندگ نہ بوتگ ئے ،ھیر بوتگ! ناکو ءَ گْوشت منی تب کمو وش وش نہ بوتگ پمیشکا من لوگ ءَ کپتگ اُوں ، بلے ترا آپرین اِنت تو منی ھال نہ گِپتگ۔
ھیر ناکو! من و سرپد نہ بوتگ آں دگہ من تئی ھال چوں نہ گپت ، من گْوشت۔ ھیر تو اے گپ ءَ یل کن ، ھمے ھال ءَ بکن تو چو تُوپان ءَ منی رند ءَ کپتگ ئے ترا ھیر اِنت۔۔۔؟ ناکو ءَ گْوشت۔
ناکو ھیری ءَ ھیر اِنت بس ترا دیریں نہ دیستگ ، پہ تئی دیوان ءَ زھیریگ بوتگ آں ۔ من دیم گوں ناکو ءَ کُت ءُ گْوشت۔
متلب ترا مروچی دِگہ جُستانی امبارے گون ءُ اتکگ ئے ، منی کِرّ ءَ ھیر اِنت تو وتی جُستاں بکن۔ ناکو ءَ پسّہ دات۔ ھو ناکو! اے راستے من ءَ جُستانی امبارے پہ ترا گون ، بلے ترا مرچی جُستانی پسّہ ھم دَیَگی اِنت۔
ناکو ءَ گْوشت ، بیچارگیں ناکو چے پسّو بِہ دنت ، شر بیا رواں دِھکان اُزمان ءِ پَلّ ءَ گُڑا کُنر ءِ چیر ءَ نِنداں ءُ دیوانے کن آں۔ ناکو ءَ پسّہ دات ۔
ما دیم پہ دِھکان اُزمان ءِ پَلّ ءَ رھادگ بوت اِیں ، کِساس پنچ مِلٹ ءَ پد ما دِھکان اُزمان ءِ پَلّ ءَ سر بوت آں اے وھد ءَ اُود ءَ دِگہ کس ھم نیست اَت ، ما شُت ءُ کُنر ءِ چیر ءَ نشت اِیں۔۔۔
من ناکو جُست کُت ، ناکو تو اے بابت ءَ چے گْوش ئے کہ اَنوں یو بی اے (بلوچ یونائیٹڈ آرمی UBA) ءَ لیویز کارمند گپتگ اَنت۔۔۔۔۔؟
ناکو ءَ کمّیں جیڑگ ءَ پد سر چِست کُت ءُ دیم گوں من کت ءُ گْوشت، بچار من اے بابت ءَ یک ھِسابے ءَ گوں اے کار ءَ تپاک نہ کن آں ، بلے! یک ھسابے ءَ تپاک کن آں۔۔۔۔۔۔
من ناکو ءِ دپ ءِ گپ گُڈّ اِت ءُ گْوشت ناکو اے کُجام گپ بوت۔۔۔۔۔۔۔؟
کمو سبر کن! بھتاور من وتی گپ ءَ سرجم کن آں ناکو ءَ گْوشت، شر اِنت ناکو تو وتی گپ ءَ سرجم کن ۔من ناکو پد ءَ گْوشت۔
بچار من اِیشی ءَ دو جاگہ ءَ بھر کن آں، یکّے و اِیش اِنت کہ اے لیویز کارمند یو بی اے (UBA) ءَ گِپتگ اَنت شر کتگ۔ نوں آئی ءِ جند ءِ وتی گل ءِ پالیسی ھست اَنت کہ آھاں گوں چی کنت۔ بلے کارمندانی گِرگ ءُ پد ءَ لشکر ءِ دست ءَ بندیگیں زالبولانی کیس ءَ گوں ھمدپ کنگ چہ منی پھم ءَ در اِنت ، پرچا کہ اے لیویز کارمندانی دزگِیری چوشیں مُھکم ءُ بلاھیں کارے نہ اِنت کہ تو بِہ گْوش ئے من پہ زالبولانی دزگِیری ءِ ھاتر ءَ یک بیھارے داتگ ، چوش کہ اے چاریں لیویز ءِ کارندہ اَنت اگاں اے چاریں لیویز ءِ بدل ءَ چار آرمی ءِ جنرل ءُ کرنل بوتیناں پہ زالبولانی دزگِیری ءِ ردعمل ءَ انگت کم اِت اَنت، چی ءَ کہ آجوئی ءِ جُھد ءِ اندر ءَ اے رنگیں واکیہ بنت ۔ اِیشانی ردعملے بِہ بیت داں دُژمِن ھُنڈالاں ولگوج کنگ نہ بوتگ بِل کہ چِرکے بُن اِنت ءُ وت ءَ ھر جاہ چو مِنڈُک ءَ لتار اِیت ۔ دومی گپ کہ لیویز کارندھانی کَیت گُڑا آیانی گرپتاری یو بی اے (UBA)ءَ شر کتگ ،پرچا کہ لیویز پاکستانی لشکر ءِ یک بھرے ۔ آرا ھم تُپنگ پہ پاکستان ءِ رکّینگ ءَ بڈ ءَ اِنت ءُ پاکستان بلوچ ءِ دُژمِن اِنت۔ اگاں کسے پاکستان ءَ رکّینیت بزاں بلوچ ءَ پْروش دَیَگ لوٹ اِیت۔
ناکو بلے درمُلک ءَ نشتگیں بازیں بلوچے کہ ھست یو بی اے (UBA) ءِ اے کار ءَ ایر جنّگ
ءَ اَنت ءُ ھمے گْوشگ ءَ اَنت کہ یو بی اے (UBA) ءَ رد کُتگ ۔ من پد ءَ ناکو ءَ را گْوشت۔
کُجام ڈنّی سنگت۔۔۔۔؟ ناکو چو جُست ءِ داب ءَ من ءَ جُست۔
ناکو ءَ مئے ڈنّی نمائندگ ھمے کہ ڈنّ ءَ بلوچ ءِ ھاتر ءَ گپ کن اَنت۔ اِنسانی ھکّانی ھاتر ءَ آواز چست کن اَنت۔۔۔۔۔۔
مارا ڈنّی نماھندگ (نمائندہ) ھست۔۔۔؟ من و سرپد نہ بوتگ آں۔ مئے ھاتر ءَ آواز اُوں چست بُوَگ ءَ اِنت من وللہ ھچ سرپد نہ بوتگ آں ، ناکو ءَ پد ءَ من ءَ گْوشت۔
ھو ناکو! سک باز سنگت شُتگ ڈنّ ءَ ، یورپ ، امریکہ ءُ دگہ ڈنّی مُلک ءَ پہ بلوچاں توار چِست کنگ ءَ اَنت۔
ھو! تو اِیشانی بابت ءَ گپ کنگ ءَ ئے اے زان ءَ چے گْوشگ ءَ اَنت ناکو ءَ پد ءَ من ءَ جُست کُت ۔
ناکو اے گْوشگ ءَ اَنت بائِد اِنت بلوچ سِلاہ بندیں گل بلوچ ءِ سر ءَ تُپنگ چِست مہ کن اَنت من ناکو ءَ را گْوشت۔
ھو ھاں! گُڑا راشدپٹھان ، مکبول شمبے زئی ، اَلی ھیدر مھمد ھسنی ثناءاللہ زہری ، ڈاکٹر مالک ، سرفراز بگٹی ،ھاصل بزنجو ءَ ھوار دِگہ سک باز نام ھست کہ آ ھم بلوچ اَنت آھاں اُوں بلوچ ھچ مہ گْوش اَنت ؟ ایشاں اُوں بلوچ ماپ بہ کنت ھرچی کن اَنت بہ کن اَنت؟ چوش کہ پاکستانی لشکر (آرمی) ءِ سروک کمر باجوہ ءِ سْیادی اُوں چہ بلوچ ریجمنٹ ءَ اِنت ۔آ اُوں گْوش اِیت من بلوچے آں گُڑا بلوچ آرا اُوں ھچ مہ گوش اِیت ،ھمے درمُلکی نمائندہ کہ ھست اَنت بَہ کَول ء تئی ءَ من و سرپد نہ بوتگ آں کہ اے بلوچ ءِ نمائندہ اَنت تو گْوشگ ءَ ئے کہ اے بلوچ ءِ نمائندہ اَنت ،اے کہ ھرکس مروچی شُتگ ڈنّ ءَ نشتگ ڈائیلاک جنّگ ءَ اَنت ۔ایش و درس ھما اَنت کہ اِد ءَ جنگ تیز بوت گُڑا ایشاں وتی چادر چہ بلوچستان ءَ چنڈ اِت خلیجی مُلکاں شُت اَنت ءُ بلوچ ءَ چہ بلوشی بوت آں، پدا وھدے ایشاں دیم پہ یورپ ءَ دات کسے بلوچ ءَ چہ ھبر نہ اِنت بلوٹک ءُ چی چی جوڑ بوت اَنت ۔ پد ءَ اِیشاں اُود ءِ کانون دیست اَنت بیھال بوت اَنت کہ بلوچستان ءَ پاکستان ءِ پیمیں بے راہ ءُ رھبندیں ملکے ءَ کْوزہ کتگ۔ آیانی ھِساب ءَ پاکستان جرمنی ءُ کینڈا ءِ پیمیں مُلکے ، بلے آ اے گپّ ءَ بے ھیال اَنت کہ یورپ ءُ امریکہ ءَ کُچک ءُ جناورانی ھاتر ءَ ھم کانود ھست بلے پاکستانیاں تِپلیں زھگانی سر روڈ ءُ سڑکانی سر ءَ گُڈگ بنت ۔ اگاں ھمے کہ مروچی گپ کنگ ءَ اَنت آ چوشیں بلاھیں زانتکار ءُ کواس اِت اَنت آھاں چادر مہ چنڈ اِت اِیں ءُ دیم پہ یورپ ءَ مہ دات اِیں ھمے ناوانندگیں راج سر ءُ سوج بِہ کُت اِیں گھتر اَت ۔
ناکو تئی ھیال ءَ گُڑا اے سنگت ھچ نہ کنگ ءَ انت ، اُود ءَ بلوچستان ءِ انسانی ھکّانی ھِلاپ ورزی ءِ سر ءَ گپ کنگ اَنت ، آواز چِست کنگ ءَ اَنت ، ادا ناکو من تئی گپّ ءَ تپاک کُت نہ کن آں گوں تو۔۔۔؟ من ناکو ءَ را جُست کُت ءُ گْوشت۔
ناکو ءَ پہ تژن من ءَ گْوشت مروچی من چہ ترا باز چیز دربرگ ءَ اُوں ، پیسر ءَ تو من ءَ گْوشت کہ بلوچ ءَ ڈنّ ءَ نمائندہ ھست نوں تو گْوشگ ءَ ئے ڈنّ ءَ اے پہ انسانی ھکّانی ھاتر ءَ توار چست کنگ ءَ اَنت۔ اے دُگنیا ءِ تہ ءَ انسان ءُ آئی ھکّانی پھریزگ بیت ءُ انسان ءَ اُوں کدرءُ شرپ ئِے ھست۔ من پیسر ءَ سرپد نہ بوتگ آں ، تئی باز باز مھربانی تو من ءَ ھال دات ۔ ھیر اگاں راستی ءَ انسانی ھکّانی پھریزگ مروچی اے دُگنیا ءِ تہ ءَ بُوَگ ءَ اِنت گُڑا مروچی دنیا چہ ھون ءَ چی ءَ سُھر اِنت۔۔۔؟ شام ءُ اِراک اوگانستان ءَ مردم چو پس ءُ گوکے پیم ءَ چی ءَ کُشگ بُوَگ ءَ اَنت۔۔۔۔؟اے دْرس دروگ اَنت ، اد ءَ ھچ انسانیت ءَ کدر ءُ شرپ نیست، بَہ کَول ء بھگت سنگ ءِ اے کرّ ءُ کُوریں دُگنیا ابید ء بلاہ ءُ بیمّناکیں آواز ءَ سرپد نہ بیت۔ پہ اِیشانی گُوشانی پچ کنگ ءِ ھاتر ءَ بلاھیں توار لوٹ اِیت ، اگاں تو راستی ءَ لوٹ ئے راستی ھمیش اِنت۔ ھمیشانی بابت تو گپ کنگ ءَ ئے کہ اے مئے ھاتر ءَ توار چِست کنگ ءَ اَنت ، ایشاں کس اُود ءَ پوڑے ءِ ارزشت ءَ نہ دنت ۔اگاں اے ھزار سال فوٹو بزور اَنت ءُ دگانی سر ءَ اُوگام بِہ جن اَنت ھچ پہ ھچ ، دانکہ ھما روچ ءَ کہ بلوچستان ءَ بلاھیں توار ءُ زرمبشتے مہ جکس اِیت ایشاناں کسے سلامے ھم نہ دنت۔ انگت اے گل ءَ بال بنت ءُ بانزل اِش رُودینتگ ءُ گْوش اَنت کہ ما باز کار کُتگ ،بلے اے نہ زان اَنت کہ سلام مروچی پرچا مارا دَیَگ بُوَگ ءَ اِنت۔ اے گپّاں پد ما دوھیں ھاموش بوت آں ءُ ھچ نہ گْوشت ۔
ساھتے ءَ رند ناکو ءَ پد ءَ گپ بِندات کُت کہ مئے مھلونک سرجم ءَ گنوک بوتگ، اے گْوش اَنت ما اُوگام جن آں ءُ آجوئی گِراں، ما انسانی ھکّانی ھاتر ءَ گپ جن آں ءُ بلوچ ءِ ھجّ ءِ پد جن اِیں ، بلے اے تنیگا نہ زان اَنت کہ بلوچ ءِ بُنِکّی جیڑھے جِند چی اِنت ؟؟۔ بلوچ ءِ جیڑہ ناکہ انسانی ھکّانی پد جنّگ اَنت نیکہ بلوچ ءِ جیڑہ دگہ یکّے ؟ بلوچ ءِ جیڑہ تھنا پاکستان ءِ گُلامی اِنت ءُ اِشی ھل آجوئی اِنت۔ ابید ءِ آجوئی ءَ بلوچ ءِ زیمیں دردانی ملم دِگہ ھچ پوتاری بوت نہ کنت ۔ آجوئی پہ ٹوئیٹر ءِ یک ٹویٹے ءِ کنگ ءَ ، ءُ بے سریں انسانی ھکّانی گارگسانی دیم ئِے اُوشتگ ءُ اُوگام ءِ جنّگ ءَ نہ رس اِیت ۔ آجوئی ھون لوٹ اِیت ، ھون زمین ءِ نشتگیں بچ دَیَگ ءَ اَنت ، راج ھمے بچّاں بڈ ءَ بستگ ۔ناکو ءَ وت گپ دیم ءَ بُرت ءُ گْوشت اے مھلونک چتو وتارا بلوچ ءِ رھشُون گْوش اِیت۔ اِد ءَ جنگ بُوَگ ءَ اَت اِیشاں دِرکّ بست ءُ ڈنّ ءَ شُت اَنت۔ اِیشاناں کس ءَ دیم نہ داتگ، وت جِست ءُ شُت اَنت مروچی ھما نشتگ اَنت ما ھرچی گْوش اِیں ھما پیم بہ بیت ۔ مروچی ھمے مردم ڈنّ ءَ شُتگ اَنت ، ایشانی تہ ءَ یک ءُ دو کش کہ بلکیں آیانی پارٹی ءَ دیم داتگ اَنت آ دِگہ کُلّیں تتکگین اَنت۔ آ کَے بہ بیت یا چہ کُجام گل ءُ پارٹی ءِ مروچی اُود ءَ زمہ وار اِنت۔ اے بارو ءَ من و گْوش آں آجوئی اگاں بلوچ ءَ گِپت ایشانی سر ءَ بلوچ کیس بہ کن اَنت ۔ وھدے بلوچ ادا مِرگ ءَ بوتگ اے تتکگ انت ءُ وتی زمین یل داتگ۔۔۔۔۔۔۔۔
ناکو ءَ گپ بس کُت ءُ چکّے ترّینیت چمے گوں دِھکان اُزمان ءَ کپت اَنت کہ آ پیداک اَت دیم پہ وتی پَلّ ءَ ۔ ناکو ءَ گْوشت ازمان پیداک اِنت گُڑا من پہ وتی پسانی ھاتر ءَ پنجگے اسپُست پچگراں۔۔۔۔۔۔۔۔
گوں اے گپّ ءَ پد ناکو پاد اتک دیم پہ دِھکان اُزمان ءِ نیمگ ءَ من پہ میتگ ءِ پاند ءَ۔۔۔۔۔۔۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
