شھید شاہ داد ءُ شھید اھسان ءِ دیمھونی ءُ بلوچ نودربر
شاہ جان بلوچ
دی بلوچستان پوسٹ
کسان سالیں شھید شاہ داد ءُ شھید اھسان بلوچءِ ھالءَ توامیں بلوچ راج سرپد اِنت، چے پیمءَ آیاں انسانی ھکانی ھاتر ءَ جُھد کُتگ ءُ ھمے جُھد ءِ تہءَ چے پیم شھیداں ءَ وتی راج دوستیءُوانّگ برجاہ داشتگ انّت،
شاہ دادءُ اھسان ءِ ودی بیّگءَ بِگر تاں آئیءِ شھدربرجاہءَ سّندءِ گِرگے بابتءَ آئیءِ سنگتاں سرجمیں گپ جتگ انت ءُ اگاں گپے پشت کپتگ آ بھتر گُشت کنّ اَنت کہ آئیءِ ھمراہ بیتگ انت ءُ نزیکءَ دیستگ اِش،
منی جِند ءَ نہ کہ شاہ داد دیستگ ءُ نہ اھسان ءُ نہ کہ آیانی بابتءَ گیشیں سرپدی داریت، بس ھمے زاناں کہ آ یک ماتے لاپءَ ودی بوتگ اَنت ءُ ماتیں سرزمینءِ لاپءَ دائمی واب کپتگ اَنت ءُ وتی مات ءُ پِتءُ کُھول ءِ نام تا بلوچ راج ءُ سرزمین ھستاں تا زبان ھستیں زِندگ کُت،
یک گپے من گُشت کناں کہ شاہ دادءُ اھسان ءِ شھادت پہ بلوچ نودربراں یک پیگامےءَ چہ کّم نہ اِنت،
شاہ دادءُ اھسان ءِ شھادت توامیں بلوچ نودربراں،سیاسی جُھدکاراں،انسانی ھکانی ھاتر ءَ کار کنوکیں جُھدکار بِہ بنت یاکہ بلوچ جُھد ءِ سنگر داشتگیں سرمچار ھرکس اپسوز کُتگ ءُ وتی مارِشت چاگردی رسانکدار ءَ بیان کُتگ اَنت،پہ شاہ داد جانءُ اھسان جان ءَ لھتیں چم ارسیگ ءُ لھتیں زبان سالونکی نازینک جتّگ،
بلوچ راجءَ اے مھلوم بہ بیت کہ پنجابءِ قائد اعظم مزن شھدربرجاہءَ سنّد گِپتگیں کّسان سالیں شاہ داد ءُ اھسان ءَ سنّدءِ گِرگءَ پد پہ وت ءَ روزگارےءِ شوھازءَ گیش پہ وتی راجءَ آجوہ کنگ ءِ گّم پِر ات، یک انچیں گّمے کہ راج دوست ءُ زمین زادگاں دائم ھمے جیڑّگ پرمایت کہ ماں گُلام اِنت،
بلوچ نودربر اے گپءَ یات بِکن انت کہ ما بلِیں بلاھیں سنّد بِگر ایں مزنیں اپسر بِہ بہ ایں کُرسیءِ سر ءَ بِنندیں بلے ماں گُلام ایں پرچا کہ دنیا ءِ تہءَ ھچ وڑیں تالیمی سّندءُ کُرسی گُلامیءَ ھلاس نہ کنت،گُلامیءَ بس یکیں سّند ھلاس کنت آجوئی ءِ سّند،
شاہ دادءُ اھسان ءِ شھادتءَ توامیں نودربر انوں امینچوں پُرسیگ انت یاکہ جزباتی انت اے گپءَ بزان انت کہ نوں پہ شُماں زاتی وشیانی ھاتر ءَ بزاں پہ یک داکتری کُرسی یے گِرگ یاکہ انجینئرءِ سنّد گِرگ ءُ پہ وتاں وش ءُ آبادیں زِندگیءِ کنگءِ مکسّد شُمے دستاں نہ اِنت،
مزن شھدربرجاہءِ سّند ءِ گِرگ یا کہ اے جیڑّگ کہ ماں بس وانّگ لوٹیں مارا بلوچ ءُ بلوچی جنگءَ سیاستءَ کار نیست ما پہ وت ءَ یک شریں کارءُ روزگاریں درگیجیں ءُ وتی کھول ءَ لاپ دے ایں اے وڑ نہ بیت، پرچا کہ توامیں پنجابءِ تہءَ انوں ھمے گپ اِنت کہ بلوچ پنجابءِ تالیمی ادارہ ءَ بِہ بنت یا کہ بلوچستان ءِ اے واننّت ءُ پد ءَ مئے ھلاپ ءَ سیاسی واھز کن انت ءُ وتی راج ءِ نوردربراں آجوئی ءِ سوجءَ دی انت توپنگ چِست کن انت ءُ پنجابءِ پوجیاں کُش انت،
گُشگءِ مول مراد اِش اِنت کہ اے گپءَ چہ وتی دلءُ مجگ ءَ کش اِت کہ نوں شماں تھنا بلوچ نودربر اِت ءُ بس، چوش نہ اِنت، نوں پہ پنجابیاں اے اوست مکن اِت کہ آ اے گپءَ باور کن انت کہ اے بلوچ کہ پنجابءَ وانّگءَ اتکگ انت اے چہ آ سرمچاریں بلوچاں نہ انت اے پہ لاپءُ روزگارےءِ گِرگءَ وانّگءَ اتکگ انت،
چِدءُ دیم بلوچ نودربر اے گپءَ وتی دِل ءُ مجگ ءَ جاگہ بِدے انت کہ تو چہ بلوچ سرمچاراں جِتائیں مھلوکے نہ ئے پہ پنجابی سرکار ءُ پنجابی مھلونکءَ تو چہ ھمایاں یکے ئے تئی ءُ سرمچارے ءِ زبان پوشاک ءُ دود ربیدگءَ بِگر داں زندگی ءِ مکّسد یک انت ءُ آ مکّسد پنجابیانی چماں آیانی مُلکءِ مرگ اِنت،
وھدے یک بلوچے روزگارءَ یاکہ وانّگے ھاتر ءَ پنجابءَ رؤت آ اے گپءَ بے ھیال کنت کہ آ انچیں زمینے سر ءَ ءُ انچیں چاگِرد ءِ تہءَ کدم جنّگءَ اِنت کہ اود ءَ میارجّلی ءُ مھمانداری دود نیست، بلے کہ سکیں مسلمانیں مردم اَنت بلے ھونءِ تہءَ کہ چیزے مہ بیت آئیءَ دینءُ مذھبی اِلم پیداک کُت نہ کنت،
شھید شاہ داد ءُ اھسان جان ءَ پنجابی مجگ ءُ دِل دوئیں ونتّگ انت ءُ سرپد بیتگ کہ پنجابیانی دل ءِ تہءَ بلوچ راج ءِ واستا چینچُک زھر مان اِنت وھدے تو دُژمن ءِ نزیکءَ زِندگی کن ئے ترا آئیءِ گیش سرپدی بیت ترا آئیءِ گپانی تہءَ چمانی تہءَ ھر وھدءَ ھمے گِندگءَ کیت کہ آ تئی نُکسءَ چے جیڑگءَ اِنت ؟ اے ھمے زار ھمے مارِشت انت کہ یک کلم دوستیں مردمےءَ آ سرپدیءَ ءُ زانتکاریءَ سر کن انت کہ ما کُجا رّد اِنت ءُ مارا آؤوکیں پدریچ ءِ واستا چے کنگی اِنت کہ آ چہ اے زُلم ءُ زوراکیاں آسودگ بِہ بنت،
شاہ داد جان ءُ اھسان جان ءِ شھادتءَ یک کسانیں وھدے ءِ تہءَ بلوچ تاریک ءِ یک مزنیں جیڑھےءِ دیم ءَ آورتگ،
پنجابءَ بِل اِت بلوچستان کہ تئی وتی سرزمین ءُ وّتن اِنت اِد ءَ اوں ترا ایمنی ءَ وانگ ءِ آسراتی نیست انت سببءَ ما شُماں دُرست زان اِیں کہ یک درامدیں راجے وھدے تئی سرزمین ءِ سر ءَ کبزہ بیت چے پیم وش بیت کہ گلام بِہ وانیت ءُ وتی شر ءُ گندگءَ بِزانت؟ بلے پد ءَ ھوں دنیا ءِ دیم ءَ اے پیشدارگءِ جُھدءَ کنت کہ سرکار وتی وس واکءَ وانگجاہ جوڑ کُتگ ءُ وانگجاہءَ وانگ ھست بلے ھمے کارانی کنگءَ ابید کبِزہ وتی پندلاں اوں سازیت اشیءِ یک درورے مئے دیم ءَ لھتیں ماہ پیسر اتکگ ات وھدے سرکاری ملازماں بلوچ زلبولانی بے وڑیں اکس ءُ تامُر تالان کُت انت ءُ اے پیگام دات کہ شُمے وانگءِ دیم ءَ ما ھرچ وڑے ھڑاند پیداک کنیں،
وھدے ھمے ویل کہ بیت من وتی سنگتاں گُشت کہ باید اِنت توامیں بلوچ ءِ نودربر سرکاری تالیمءِ بائکاٹ بکن انت ءُ دنیاءَ اے پیگامءَ بِدے انت کہ پاکستان نہ لوٹیت کہ بلوچ بِہ وانیت،چہ ھمے بائیکاٹ ءَ بلوچستان ءِ تالیمی جیڑہ میان اُستمانی ھکانی ادارھاں سر بیتگ ات کہ ھزاراں لکّاں نودربراں پاکستانی تالیمءِ بائکاٹ کُتگ، بے شّک اے زھرشانیءِ وتی سان( اثر) بیتگ اِت اَنت بلے چہ ھمے کاراں میام اسُتمانی گلّاں بلوچ نودربرانی توار رس اتگ ات ءُ بلوچ ڈیھءِ جیڑہ گیشتِر پدّر بیتگ ات، بلے اے گپ کساں ھچ مان نیاورت ءُ درگُزر کنگ بیت،
پنجابءَ بلوچ نودربرانی سر ءَ دائم لٹ کُٹ کنگ بیت ءُ اے پیگام دیّگ بیت کہ اے پنجابیانی مُلک اِنت، بلے بلوچ نودربراں وتی بانداتءِ واب ءِ ھاتر ءَ دُرست برداشت کُتگ انت نودربرانی زندگیءِ مکسّد داکتری کُرسی ، کمشنری کُرسی، انجینئر ءِ کُرسی، یاکہ ھمے وابءَ گِندیت کہ من جھازے بال دیگ ءَ اَنت پائلٹے آں، بلے اے دُرستیں مکسّداں گرگ ءَ پد اوں تو اے ریاستءِ چماں یک گُلامے زانگ بہ ئے، اُگدھانی گِرگءُ پہ اگدھانی ھاتر ءَ سرجمیں زِندگی پنجابیانی تھلیں گپانی ءُ اے شِگانانی سر ءَ کنگ کہ بلوچ مئے چمدار بیتگ انت مئے مزن شھدربرجاہءَ ونتگ اِش ءُ مئے برکتءَ دو کلدار گِرگءَ انت ءُ لاپ وّرگءَ اِنت چہ اشیءَ گھتر اِنت کہ وتی راج ءِ دادانی شاہ بہ بہ اتءُ شاہ دادءِ راہءَ سر گِر اِت کہ توامیں راجاں شُمے زرورت اِنت،
ءُ چوناھا پاکستان ءِ وانگ وانّگے ِ وَ نہ اِنت، شھید کندیلءَ گُشتگ اّت
“پاکستان ءِ تالیم مانا ھرّ ءِ تِر”.
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
