TBP Balochi

نبشتانک: برمش آجوئی لوٹ ایت

نبشتہ کار: سیپ بلوچ

دی بلوچستان پوسٹ

برمش ءِ توار ءَ گلیں راج ٹوھینتگ ءُ همے هبر دیم ءَ کیت کہ بلوچ راج یک زندگیں کومے آئی ءِ نام ماں جهان ءَ راجدپتر ءَ زندمان انت بلے یک هبرے ورگی کنگ ءَ اِنت کہ همے لهتیں مردم کہ تِپلیں برمش ءِ زندگی ءِ ویران کنوک اَنت آ هم همے رد ءَ اوشتاتگ انت ءُ زَھر شانی کنگ ءَ انت ،

بلے اشانی الم انت کہ سوب نہ بیت اے انچیں آسے روک کتگ همے بے زمیریں زرپرستاں کہ وتی جند ءِ وتی مات ءُ گهارانی لوگاں دور بہ کن بزگیں گونڈواں بجن ترس ءُ بیهار بدے کہ آ زلم ءُ زواک ساری ءِ کم انت کہ هشتاد سال بیتگ مرچی مئے کوم لاچاری ءِ گلام انت ،بلے مردم وتی راج ءِ اے پدمنتگی ءَ گند آں چمانی ارس در کاینت بلے اے بے زمیریں مردگاں الم جست بیت روچے نہ روچے کہ وتی جند ءِ لوگاں آس بدے ءُ بزگیں مات ءَ بجن چکاں چورهی چادر ءِ سر ءَ بدے مردم بژنیگ بیت.

اگاں مرچی مئے راج ءَ اے بهر وتی کوپگ ءَ زرتگ کسان کسانیں جاهاں چہ پاد اتکگ انت پہ برمش ءَ انساپ لوٹگ ءَ انت همے گمان بیت کہ مئے بلوچ راج ءِ تہ ءَ انگت زمیر نامیں چیزے ساڑی انت.

برمش من پهلی لوٹاں کہ من پتو هچ کت کنگ ءَ نہ آں پرچا کہ من بے زمیریں بنی آدمے آں، منی اندر ءِ انسان دیری مرتگ من یک انچیں لاشے جوڑ بوتگاں کہ منی میت ءِ چاریں پادگاں هرکجام نیمگ ءَ بر ئے من بے تاهیر آں هچ کت نہ کناں پرچا کہ من یک ترسے ءِ آماچ آں کہ مرچی من وتی توار ءَ پہ تو چست بہ کناں منی توار بند کنگ بیت
! بلے اناں منی گهار، اگاں من وتی گپ ءَ بہ کناں من گار ءُ بیگواه کنگ الم باں اگاں من گوں پورئیں راج ءَ دربیایاں پہ تو یک توارے چست بہ کناں ترا آجوئی ءِ دیمروی ءَ بیار آں گڑا مئے اے کوم ءِ دیم ءَ ترس لبز ءِ نام یک کسانیں چیزگ ءِ نام انت ، آ منی جند ءَ ایوک ءَ گار ءُ بیگواه کشت ءُ دور دات کنت بے من ءَ گوں کوم ءَ هچبر کشت دور دات نہ کنت پرچا کہ آشوب ءِ دیم ءَ الم روگی انت آ دگہ کوم اَنت وسر ءَ آجوئی اِش نہ رس اِتگ.
بیا ما شما یک جاه بہ ایں پہ برمش ءَ آجوئی لوٹ ایں برمش ءِ تاهیریں دل ءِ کڈوک ءَ ما پورئیں جهان ءَ یکجاه کن ایں، آئی ءِ مادر ءَ زندگ کت نہ کن ایں بلے پہ برمش ءُ برمش ءِ مادر ءَ وتی توار ءَ الم چست کت کن ایں.

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

سربیتگیں ھالانی رد ءَ روکپتی بلوچستان ءِ دمگ جالگ ءَ ناشناسیں مردماں یک بلوچے کُشتگ ءُ تتکگ اَنت-

گیشیں ھالانی رد ءَ گْوستگیں روچ ءَ سراوان ءِ جالگ ءَ ناشناسیں مردمانی تیرگواری ءَ یک بلوچ ورنایے بیران بیتگ –

بیران بیتگیں مردم ءِ پجار مسلم رئیسی ءِ نام ءَ زانگ بیتگ –

دمگی مردمانی رد ءَ کوشکار یک پژویے ءَ کہ آئی پلاک پر نہ بوتگ سوار بوتگ اَنت، مسلم ءِ سر ءَ تیر اِش جتگ ءُ چہ آ جاہ ءَ تتکگ اَنت ۔

ویل ءَ پد دمگی مردماں مسلم زدگیں جاوراں جست کرتگ ءُ سراوان ءِ نادراھجاہ ءَ رسینتگ
بچک نہ منتگ ءُ بیران بوتگ ۔
گوش اَنت کہ مسلم ءَ گوں کسے ءَ دژمنی یے نہ بوتگ بلے چُنت وھد پیش ماں مرزی دمگ ماشکید ءَ گوں سپاہ ءِ سپاھیگاں دبجاک بوتگ کہ نرھوکّیں سپاہ ءَ اے مرزی دمگ ءَ بمب کَلّ کرتگ ھمے بمبانی سوَب یک بلوچ پُسّگے بیران بوتگ ، آ بلوچ جالگ ءِ نندوک بوتگ ۔
گڑا چہ مسلم ءِ زھر شانی ءَ رند، مسلم سپاہ ءَ گپتگ ءُ داں یک ھپتگے ءَ بند کرتگ ۔
انّوں چُنت سال اِنت کہ سپاہ لھتیں بلوچیں ٹَکّاں سِلاہ دیگ ءَ اِنت ءُ ڈاکواں وتی ھمراہ کنگ ءَ اِنت ءُ جھدکاریں بلوچاں کُشگ ءَ اِنت-

نیشنل پارٹی ڈنک ویل ءِ درگت ءَ بیوکیں کراچی ءَ برجم داشتگیں زھرشانی جوانیں وڑءَ بھر زیر یت۔ گل ءِ باسک وتءَ ساڑی بہ کن اَنت ۔

نیشنل پارٹی ءِ جارکش ءَ جار پرینتگ کہ ڈنک ویل ءِ ھلاپ ءَ 5 جون ءَ روچءِ سئے بج ءَ کراچی پریس کلب ءِ دیما بیوکیں زھرشانی مزنیں کساس ءَ بھر بہ زیر اَنت۔

درشان ءَ گوشگ بیتگ کہ سرجمیں بلوچستان ءَ ءُ ھاس مکران ءَ جاور سک نگیگ بیان اَنت سلاہ بندیں ٹولیاں استانی کمک گون اِنت آ سر زائر ءَ چادر ءُ چار دیوالاں لگت مال کنگ ءَ اَنت ڈنک ءَ ویل ھم سلکاریانی یکشلی ءَ ھوار اِنت سلاہ بندیں ٹولی سرکاری پارٹیانی وزیرانی گاٹ اَنت ءُ ھمیشانی مستری ایشان گون اِنت تُربت ءِ واکدا ڈنگانی مسترانی ھلاپ ءَ گام ءِ زیرگ ءَ ساڑی نہ اِنت۔

درشان ءَ گوشگ بیت کہ نشانگ بیتگیں ھانواد ءَ تنگ کنگ بیگ ءَ اِنت ءُ زور پِر دیگ بیگ ءَ اِنت کہ اے گپ ءَ گار بہ کن اَنت۔

درشان ءَ لوٹ کنگ بیتگ کہ استان وتی زمہ واریاں پیلو بہ کنت ءُ چاگرد دشمن مردماں چہ وتی نزیکی ءَ ھلاس بہ کنت ءُ آیانی ھلاپ ءَ گام بہ زوریت ءُ سرجمیں مکران ءَ ابید چہ سرکاری سلاہ بندیں ٹولیاں ھلاس کنگ بہ بیت ءُ لس مھلوک ءُ کاروباری مردماں پھازگ دیگ بہ بیت سرکاری پارٹی ھم اے چاگرد دشمنیں مردمانی مستری ءَ ھلاس بہ کنت ءُ سیکورٹی گلانی دیم ءَ مہ اوشت اِت ۔

نبشتانک: ھدا ءِ زمین پہ انسان ءَ تنگ اتکگ یا پہ بلوچ ءَ نزّ اتکگ؟

نبشتہ کار: شئے عبدالخالق بلوچ

دی بلوچستان پوسٹ

برے برے مجگ ءَ اے سسا کیت کہ دراھیں دگنیا ءَ انسان ھنچو بے وس ءُ لاچار انت یاکہ انسانی پدریچین بلوچ نام ایوک ءُ تنھا اے زالمین پرئونی دھر ءَ پہ نَپس کشگ ءَ بے تاھیر انت کہ بلوچ ءَ وتی چاگرد ءَ وتی زمین ءَ وتی لوگ ءَ نپس کشّگ ءِ ھک نیست ءُ چاھی چہ درستیں انسانی ھک پُلگ بوتگ انت اگاں یک زندگیں بلوچ ءِ دل بلوٹیت پہ الکاپ ءُ تچکیں گپے جنّگ ءَ کہ وتی زند ءِ بزّگی ءُ لاچاری ءَ درشان بکنت ھم ھمے ترس دل ءَ کیت کہ باریں اے گپ ءِ جنّگ ءَ پد منی زندگی چہ من پُلگ بیت یا کہ گار ءُ بیگواہ کنگ باں منی جون راھے ءِ سر ءَ تلام کنگ بیت، چی ءَ کہ دروگیں دھر ءَ پہ دروگ ءُ مناپکی زند ءِ گوزینگ ءِ ھک ھست دروگ بند ءُ دُز ءُ ڈُنگ ءُ سِلّ کاریں مردمانی واست ءَ مزیں ایمن جاھے جوڑ بوتگ اد ءَ تچکیں گپ ءُ ھبر مرگ ءِ داوت دیگ انت پمیشا یک بلوچے کہ راستی ءَ بیان کنگ ءُ تچک ءَ تچک وتی گپ ءَ کنت پیسر ءَ الم اے گپ ءَ درشان ءَ کنت کہ مرگ ءُ زند ءُ ھدا ءِ دست ءَ انت ءُ موت یک برے کیت، زند پہ باجوئی گوازگ نوں بس بہ بیت کہ گیشتریں دروگ بندی ءُ مناپک ءَ بلکیں زند ءِ روچاں گیش بکنت بلے اندر ءِ بلوچی گیرت ءَ تاھیر دات نہ کنت ، بلوچ ءِ واست ءَ اے کانود ریاست ءَ ٹھینتگ ءُ ھرچ کار ءُ کردے پیسر وتی اسلام ءِ مستریں ٹھیکہ دار ءِ پنام ءَ دروگیں ریاست گشیت کہ بلوچ ءِ زند ءُ موت منی دست ءَ انت من ھستیں وھد ءِ پرئون ءَ من کُشان ءُ زندگ کن آں من جنت ءُ دوزہ ءِ پیسلہ کن آں کے ءَ ھور ءُ تاھوری شھید کن آں کے ءَ کاپر ءُ مشرکانی ایجنٹ لیکاں اے منی دست ءِ لیب انت کہ من پہ اے کارانی ھاتر ءَ مزیں گَل ءُ انجمن ءِ ٹھینتگ مزیں سرمایہ جتگ ءُ لھتین وتگڑیں پتواٰ دیوک ھو ساڑی کتگ۔
چوناھی ءَ چَہ کہ اے ریاست جوڑ بوتگ بلوچ لگتمال انت کہ لگتمال انت بلوچ واندہ ءُ ورنا جَنّگ ءُ کُشگ گار ءُ بیگواہ کنگ بوَگ ءَ انت ءُ وھد وھد ءِ سر ءَ بلوچ زالبولانی سر ءَ وتی زوراکی ءَ ھو پدر کنان ءُ پشدارگ ءَ انت کہ من ءَ ھچ کید ءُ بندے نیست .

1987 ءَ جیونی پہ آپ ءِ لوٹگ ءَ درتکگیں زھرشانی ءَ دُتوکیں یاسمین ءُ ازگل ءَ شھید کنت ، برے کراچی ءِ مزن شھر ءَ بی بی زامر ءُ تپلیں جانان ءَ سھر چکّیں تیرانی آماچ کنت، برے بیسمہ ءُ مشکے ءَ بلوچ زالبولاں پہ ٹوپ ءُ بم آپ کنت ،برے آواران ءَ بلوچ زالبولاں بیگواہ ءُ سلاہ بند کنت کہ وتگڑیں دھشتگردی ءِ ٹپہ ءِ بجنت، اے درست ھمے یکیں رِد ءُ بند ءُ زلم ءُ زوراکیانی یک شلّین بُنچیک انت کہ مرچی ڈنُک ءَ آئی ءِ داشتگیں کاسگ چٹّ بلوچ ننگ ءُ گیرت ءَ پادمال کنان ءُ لوگاں پہ بے ترسی دور کن انت نہ ماسومیں ءُ تِپلیں زھگ چار انت نہ کہ ھیا ءُ شرپمندیں زالبول، وتی دوزھیں لاپ ءِ توسگ ءَ شرپ مندیں زالبولان ءُ تِپلیں چُکان تیران کو رَگبار کن انت، بلوچی ءِ گشینے کہ” تئی سر گوں مٹ ءَ نہ کپتگ” بلے مرچی ڈنُک ءَ ھمے مردگ زمیرانی سر گوں مٹاں کپت کہ رزواہ ءُ چار جھان بوتگ اَنت ھدا ءَ ھمت دات ھمے مردُماں کہ یکے پہ وھد دست گیر کنگ ءَ سوبیں بوتگ اَنت تاکہ آ دیگ ءَ دُزانی دست گیری ھمشی ءِ سبب ءَ بہ بیت اگاں نا بلے ایشی گِرگ درستانی رزواھی ءُ پاشک بوگ ءِ ارزانی سوبے بوت کہ دُزانی بُنچیک چہ کجام کَلمیر ءَ آپ ورگ ءَ اِنت، مدتے بیت کہ سرکار ءَ آسان ءُ شارکٹ ءِ روزگارے پہ وتی کاسگ چَٹاں ٹھینتگ وتی کوپگاناں آسان کتگ ، لھتیں کہ بدکردار ءُ سِلّین مردمانی ٹولی یے جوڑ کن سیاہ کانچیں گاڑیاں سوار اش بہ کن ءُ کلاشنکوپے بڈ ءَ اِش بہ دے کہ شمارا ھچ تُت ءُ کِچ ءِ بِررے نیست مرچاں ھمنچک سلاہ بند ءُ کارمند سرکار ءَ جوڑ کتگ کہ ھرکس چہ لوگ ءَ زھر کنت سرکار ئِے وتی مھماں کنت بیا کہ سکیں کارآمدی سامانے بکول ء واجہ ھسین واڈیلہ ئیگ ءَ “ایشان گوادری گاز ءِ بھا نیست سرکار ءَ چوٹ بروت کتگ انت” دراہ دُز ءُ ڈنگ ءُ منشیات ءِ بیپاری کہ سرکار ءِ ھو سوب انت ءُ ایشاں ھو کہ دونمبری کاراں پہ پروٹول کنگ ءَ انت۔
اے وھد ءَ لس مھلوک وتی بزّگی ءُ لاچاری ءَ چار راھانی سر ءَ درشان کنگ ءَ اَنت، وتی جاہ ءَ جندے لوگ ءِ تہ ءَ پہ الکاپی مردم پاداں ھم دراج کت نہ کنت کہ پرئونی رستر سرپد بہ بنت بلکیں گوں وتی ھرگ ءُ تپر مان ریچنت پادانی گُڈگ ءَ ھچ مھتل نہ بنت کہ بید پرئون ءِ اجازت ءَ تو چی ءَ وتی لوگ ءَ پاد تچک ءُ آرام ءَ تنسار گپتگ ئے ، گپ درستیں انسانانی یک پیم ءُ یک وڑ بوتیں انگت دردے پہ دو ات، بلے انسان نامیں بلوچ ھم اے سرزمین آباد انت وتی سرزمین ءَ نشتگ دگر ءِ ھک ءِ نہ پُلیتگ دگر ءِ سر ءَ زوراکی کنگ ءَ نہ اِنت، دگر ءِ لوگ ءَ دور ئِے نہ کتگ بلے انگت زالمیں رستراں انگران کتگ چَپ ءُ راست ، شگرب ءُ مگرب ءَ درستین نیمگ ءَ رسترانی انگران انت ھچ سُرگ ءِ ھک ئِے نیست ، انسان ءِ بنکی ھک وتی جاہ ءَ پہ ایمن زندگ بوگ ءِ ھک چہ آئی ءَ پُلگ بوتگ، لوگ ءَ چہ ڈن درایگ ءِ ھک ئِے نیست، گردگ ءُ چکرگ ءِ ھک ئِے نیست، شھر ءُ بازار ءَ گرد ءُ ترگ ءِ ھک ئِے نیست وتی کوہ ءُ کُچگاں ترگ ءُ سیل ءِ ھک ئِے نیست ، لوگ ءَ چہ ڈن کدم ایر مکنت شھر ءِ دکان ءَ روگ ءِ ھک ئِے نیست اے درستانی پابندیانی کھرمان ایش انت کہ لوگ ءَ درکا ئے پرئونی کاردار ھمے جست کنت” کجا چہ پیداگ ئے ءُ کجا روگ ءَ ئے” اے درستیں زُلمانی ءُ زوراکیانی دیمپانی ءَ گوں بلوچ ءَ نوں زندگی گوازینگ ھیل ءُ آدت کتگ۔ پرئونی رستراں چار ات کہ بے وسیں بلوچ مئے زوراکاں تا لوگ ءِ چار دیوالی ءَ بند ءُ کید کتگ نوں لوگ ءِ تہ ءَ روگ ءُ اُرش کنگ لوٹ ایت کہ اے مئے ھمک روچی روزگار انت شپانی نیم لوگ دور کنت پہ پٹ ءُ پول ءَ کہ چونائی مھلوک ءِ دل ءَ ھمے ترس ءَ ایر انت کہ شپ ءِ نیم ءَ دُزیں تولگ بلوچانی لوگ ءَ پادمال کن اَنت ءُ ورنایاں چست کنگ ءُ گار بیگواہ کنگ بلوچ ءِ زندگی ءِ یک دودے ایشان جوڑ کتگ نوں ھمے نام ءِ سر ءَ دُزی ءَ ھو پہ وت شریں روزگارے جوڑ کن ایں، چو نزانت بدواھاں لگوریں کہ ”دُز ءِ مات ھر شپ پیگ نہ بچیت” برمش ءِ برمش مئے رزوائی ءِ چیدگ جوڑ بیت ما وت پہ ھچ درے ھم نہ گند ایں کہ سرے چیر بیدیں ءُ مئے سرکماش مئے کماشی ءِ زمہ ءَ ھم زورگ ءَ ساڑی نہ بیت ، نوں آ روچ آتکگ کہ بلوچ باید انت وتی بلوچی گیرگ ءَ پاد بکنت ءُ سرکار ءَ گوں تچکین زبان ءَ بگشیت وتی سانڈان لگام بدے اگاں نا بلوچ وتی بلوچیت بئیت بکول ء واجہ ھسین واڈیلہ ئیگ ءَ کہ گوادر ءَ زھرشانی ءَ تران کنان ءَ درھینت ئِے” سرکار وت سِلاہ بند بہ بیت یا ھمے دُزاں سِلاہ بند بکنت، گڑا ما بلوچ شرتر زان ایں کہ ایشانے پوزساد کنگ ءَ ھوں زان ایں ایشانی سرمساد کنگ ءَ ھوں زان ایں ءُ ایشانی اِشکیل کنگ ءَ ھوں زان ایں”۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

بلوچستان ءِ دمگ مستونگ ءَ کورونا وائرس ءِ دگہ یازدہ مردمانی نادراھی ءِ گورجنی پدر بیتگ –

پی ار او نواب گوس بکش رئیسانی نادراہ جاہ ءِ گوشگ اِنت کہ بیست ءُ یک مردمانی ٹیسٹ کنگ بیتگ کہ چریشانی تہ ءَ دَہ کس موٹروے آپسرانی ٹیسٹ ھم ھوار اَنت – چریشاں چَہ زرتگیں ٹیسٹاں یازدہ مردماں نادراھی ءِ گورجنی بیتگ ءُ دگہ نُہ کسانی ٹیسٹ ساپ بیتگ اَنت ءُ یکے ءِ ٹیسٹ آیگ پش کپتگ اَنت دو شمبے ءِ روچ ءَ بیست ءُ نُہ ٹیسٹ گرگ بیتگ اَنت کہ اشانی آیگ ھم پش کپتگ –

آئی ءَ گْوشت کہ ڈسٹرکٹ ھیڈ کوارٹر ءِ نادراہ جاہ ءَ کورونا ءَ گپتگیں نادراھانی گپتگیں ٹیسٹ ھم ھست اَنت چریشاں ابید ڈی ایچ کیو نادراہ جاہ ءَ گپتگیں نادراھانی ٹپاس ءَ موباھل ءِ سر ءَ سرپدی دیگ ءَ اِنت –

نبشتانک: برمش مارا انساپ بہ دے

سیاستدانانی نمدی یے پہ برمش ءَ

دی بلوچستان پوسٹ

نبشتہ کار: سکی ساوڑ

وھد: سُھب ءِ نُھ

روچ: چار شمبے

رمس: 2 جُلکان( جون) 2020

دراہ بات ئے برمش

ما کُل وش ءُ جوڑ ایں، مارا انچکیں کارے نہ بوتگ کہ ما لاگر ءُ بزگ بہ بہ ایں بلے کرونا ءِ سَواب ءَ ھچ جاہ ءَ روگ بوگ ءَ نہ اِنت، پمیشکا ماشاءاللہ ما کمو گیش زَنڈ ھم بوتگ ایں، تو انچوش بہ پھم بلکل ما بروبر ایں ، بلے تو مارا کمو پریشان کرتگ ءُ چَہ ترا انساپ ءِ تلبگاری ءَ اے نمدی ءَ ما کُل بلوچ مُلکار ( سیاستدان) نبشتہ کنگ ءَ ایں ءُ اُمیت اِنت تو مئے سر ءَ بزگ کن ئے ءُ مارا انساپ دے ئے، تو مارا سک لاچار کرتگ کہ ما وتی داشتگیں مردمانی ھلاپ ءَ توار چِست بہ کن ایں، ترا باور کنت ما ناں آپ ورگی ایں ناں نان، پمیشکا ما توار چِست کنگ ءَ ایں دانکہ مھلوک ءِ شک مئے سر ءَ مہ روت بلے مھلوک انگت مئے سر ءَ شَکّو شَکّو اِنت پمیشکا ما گیش گنوکی ءِ آماچ بوان ایں، ما سُھب ءَ داں شپ ءَ سھڑگی دو دو گولی مہ وریں باور کن مارا نا واب کیت ءُ نا ما سَھڑ اِت کن ایں، اگاں ترا باور کنت ما سک بزگ اِیں بلے اے مئے کوھیں دل اِنت ما ڈن ءَ در آھتگیں یا وتی مردم ڈن ءَ در کرتگ اَنت، اگاں ما در مہ کن ایں گڑا ما گنتر بزگ بہ ایں، اے گپ ھست کہ ما یک پارٹی یے دومی پارٹی ءِ ھلاپ ایں بلے مروچی اے جیڑہ ءِ واستا ما درست یک ایں پرچاکہ اے یک پارٹی یے ءِ جیڑہ نہ اِنت کہ آئی ءِ پارٹی یا مُلکار بزگ ءُ رسوا بنت بلکیں اے مئے درستیں مَلکارانی جیڑہ اِنت کہ ما درست ھمے کار ءَ گون ایں.

راستیں گپ ھم ھمیش اِنت ما وت ءَ کمو پیشدارگ لوٹ ایں پرچاکہ تو اے گپ ءَ کمو سرپد ئے اد ءَ ھمے دُود جوڑ بوتگ، بلے تو مارا یک کسانیں موھے ھم داتگ ما وت ءَ مھلوک ءِ دیم ءَ پیشبدار ایں دانکہ مردم ھمے بہ پھم اَنت ما آوانی دردوار ایں.

برمش جان تچکیں گپ وَ ایش اِنت اد ءَ ما موہ پَٹّ ایں داں کہ مارا موھے بہ رس اِیت ءُ ما وتی راجکاری( سیاست) ءِ بان ءَ مھکم بہ کن ایں ءُ ھمے پیشبدار ایں اگاں اد ءَ دردوارے ھست اگاں اد ءَ لَج پھازوکے ھست گڑا آ ما ایں، اد ءَ ما اے ھم گْوش ایں”بلوچ راج ءِ سر ءَ کہ زُلم بوگ ءَ اِنت،ھمیشی ءِ بَگیر ءَ ما توار چست کرتگ ءُ کنگ ءَ ایں دانکہ گُڈی گچینکاری ءَ ما سوبمند بہ بہ ایں، پرچاکہ اے راجکاری ءِ یک مزنیں بھرے، راجکاری ءِ واستا مردمانی کُشگ ءُ پد ءَ ھما کوش ءِ ھلاپ ءَ توار چِست کنگ ھم یک بلاھیں پندل ءُ سوبمندی یے، اد ءِ راجکاری ھمے وڑ اِنت، اد ءَ تئی وڑیں زھگانی کُشگ یا زَدگ کنگ انچکیں مزنیں جیڑھے نہ اِنت تو زندگ بہ ئے یا مِر ئے اے ھم انچکیں مزنیں جیڑھے نہ اِنت بلے مزنیں گپ ایش اِنت ما ھمے ویل ءَ چَہ وتی راجکاری دکان ءَ چینکس سِینگار اِت کرت کن ایں اے چیز مئے واستا گیش ارزشت دار اِیت، اد ءَ ما موہ پَٹّ ایں، اد ءَ مروچی یکیں تو ءُ تئی ماس نہ بوتگ اِت کہ کیچ ءِ تہ ءَ تِیر وارتگ ءُ زدگ یا شھید بوتگ اِت بلکیں سرجمیں بلوچستان ءِ دلبند ءَ ما ھمے بادشاھی ءَ کنگ ءَ اِیں، روچے یکے ءِ گِس ءَ دَور کن اَیں ءُ شھید ءُ بیگواہ کن ایں، گِس ءِ تہ ءَ یک کاری ئیں چیزے پَشت نہ گیج ایں، بلے اے کسہ ءَ یلہ کن ………
برمش تئی لک منت کہ تو مارا اے وڑیں موھے بَکشاتگ کہ ما گیش وتی راجکاری پندل مھکم بہ ایں بلے اے بَری کمو ما بیوار ایں بلے جھد برجاہ اِنت ما باج بہ بر ایں، تئی ءُ تئی ماس ءِ اے کُربانیاں داں جھان ھست ما پراموش کرت نہ کن ایں،مروچی تئی ءُ تئی ماس ءِ سَواب ءَ ما ھمے نیمون ءَ وتی پارٹی ءِ بیرک زُرتگ ءُ شمے واستا توار چست کنگ ءَ ایں کہ ” برمش کو انصاف دو” تو بہ گْوش چَہ اے وڑیں موہ ءَ دیم دگہ موہ کجا بوت کنت؟ بلے بھتاور تو مارا سک بیوار گپِتگ، انگت اللہ ءِ شگر اِنت اے ناسرپدیں راج اے گپ ءَ سرپد نہ اِنت اے دُز ءُ ڈنگ کے ءَ جوڑ کرتگ اَنت ءُ ایشانی مستر ءُ کستر کے اِنت؟ چو مہ بیت یکے شُومی یے بہ کنت ءُ مئے نام ءَ بہ گِیپت کہ دُزانی پُشت مُلکار( سیاستدان) اَنت، پمیشکا مروچی ما وتی رکینگ ءِ ھاتر ءَ اد ءَ گرم ءِ جَل ءَ توار چِست کنگ ءَ ایں پرچاکہ مئے پارٹیانی راھبند کہ ھست اَنت ھمے راھبندانی شِک لمبر چارمی ءِ تہ ءَ ھم ھمے مان اِنت

” بلوچ راج ءِ سر ءَ ھرچ زوراکی یے بوت گڑا پارٹی درستاں چَہ پیش توار چِست کنت ءُ دانکہ انساپ نہ رس اِتگ پارٹی ھاموش نہ بیت توری پارٹی ءِ ھر یک باسکے ءِ سرانی دیگ بہ لوٹ اِیت انگت پارٹی چَک ءُ پد نہ بیت”
تو انگت بہ گْوش کہ توار چِست نہ کرتگ ، بس اللہ مارا وشنام بہ کنت راج دگہ مزنیں کوکار ءُ جاکے مہ کنت، ما جھد ھم کنگ ءَ ایں ءُ چیرُکائی مئے درستیں پارٹیانی یک مزنیں دیوانے ھم بوگ ءَ اِنت ءُ ما ترا انساپ دے ایں دگہ بازیں لوٹے مہ کن بس تئی ماس ءِ کُشوک ءُ تئی زدگ کنوکاں بندیگجاہ ءَ دیم دے ایں، گوں تو دزبندی اِنت دگہ باز کوکار مہ کنائین چو مہ بیت راج ءِ دست مئے گُٹ ءَ بہ رس اِیت ءُ اللہ مہ کنت مارا دُزانی مستر بہ لیک اَنت.

برمش جان بچار دگہ باز کوکار مہ کنائین کہ شر نہ اِنت پرچاکہ مئے راجکاری ءَ ھوار ما ھم تاوان ور ایں، مئے گُٹ سک ھشک اِنت باور کن سک بیوار ایں، مروچی دوازدہ سال ءَ پد ماں کیچ تربت ءَ شھید پِدا چارراہ (چوک) ءِ سر ءَ مزنیں مُچی یے گندگ بوتگ، وھدے مارا اے اکس سر بوت اَنت کہ ھزاراں مردم شھید پِدا چار راہ (چَوک) ءَ مُچ اِنت باور کن مئے گُٹ ءَ آپ نہ شت، گوں تو دزبندی اِنت ھمے توار ءَ بے برمش بہ کن، تئی نام برمش اِنت واکی تو برمشے چِست کرتگ بلے بھتاور تو وتی نام ءِ بزانت ءِ وڑ ءَ مہ کرتیں، ما چَہ ترا دزبندی کن ایں مارا انساپ بہ دے ، ما تئی دست ءُ پاداں کپ ایں تو ھمے توار ءَ ھلاس بہ کنائیں، باور کن تو سرجمیں بلوچ راج چست کرتگ مروچی پنجگور ءَ ھم زھرشانی اِنت، بلیدہ ، ھاران، دالبندین، نوشکی، واشک ءُ بیسمہ ءَ ھم زھرشانی بوتگ، پسنی ءُ کراچی ءَ ھم بوگ ءَ اِنت، ترا چونیں دردے دل ءَ اِنت کہ تو مارا سزا دیگ لوٹ ئے، اگاں ما بزانتیں شمے گِس ءَ پہ دُزی ءَ دیم دیگ ءَ اے وڑیں جاک ءُ سَلوات بوتگ اَت مارا نسوا ء توبہ اَت ما دُزی ءَ دیم بہ داتیں، اللہ زانت ما نہ زاتگ اے وڑیں توارے چِست بیت، ما ھمے پھم اِتگ پیش ءِ وڑ ءَ کس ھچ توار نہ کنت ءُ توار چِست نہ بیت.

برمش جان پھل کن ما گوں اے مزنیان پریشانی ءَ بے ھیال بوت ایں، گپ ایش اِنت ما تئی ماس ءَ را سرکاری نیمگ ءَ شھیدی ءِ درجہ داتگ، باید اِنت تو اے گپ ءَ وش بہ بَے، اللہ مہ کنت ءُ اے گپ ءِ کنگ ھم شر نہ اِنت اگاں تو ھم بیران بوتیں ما ترا ھم سرکاری شھیدی ءِ نام داتگ اَت پرچاکہ اے مئے راجکاری ءِ یک بھرے اے بھر ھمک مردم ءَ را نہ رس اِیت اے پہ ھما مردمانی واستا اِنت کہ آوانی تاوان دیگ ءَ پد ما سک بیوار بہ بہ ایں گڑا ما وتی ھمے پندل ءَ کارمرز کن ایں، شمے واستا مئے دگہ دادے ھم ھست آ ھم ھمے وڑ ءَ اِنت، اگاں ما بہ لوٹ ایں کسے ءَ را ناشرکار، کسے ءَ دز ءُ گناھگار، کسے ءَ را کُشندہ ءُ ھونی ءُ کسے ءَ را کاپر ءِ داد ءَ ھم بکشات کن ایں پرچاکہ اے مئے جھدانی برورد اِنت ءُ راجکاری ءِ بھرے ھم.

مئے نُکانی ھُشک کنوکیں برمش یکبرے پد ءَ ما گوں تو دزبندی کن ایں تو اے توار ءَ ایرموش بہ کنائین ءُ ما جھد کن ایں دگہ وھد ءَ وتی اے پندل ءَ کمو بدل کن ایں، پرچاکہ اے نوں بے سوب بوت،اُمیت اِنت تو ھپتگے کپے ءَ داں اے توار ءَ ھلاس کنائین ئے.

ہم کو انصاف دو
تئی انساپانی تلبگار تئی دیار ءِ لنگڑ ءُ ایمانداریں کُلیں مُلکار

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

نبشتانک: کاگدے پہ سرمچاراں

نبشتہ کار: شاہ جان بلوچ

دی بلوچستان پوسٹ

منی واجھیں براتان ءُ زمین زادگاں ھرکجا اِت سلامت ءُ دلوش بات اِت ءُ دائم وتی سرزمین ءَ پہ وار ءُ بزگیں ءُ مھر دوست ءُ راجدوستیں بلوچاں ھوار گوں ھر ھما بلوچ ءَ پاسپان بات اِت کہ بلوچستان ءِ کوچگاں زِندگی کنت ءُ دوا اِنت گوں شما دِل سِتک ھمراھی کنت ءُ وتی بلوچی پرز ءَ ادا کنت،
شُما مئے راجی بیرک ءُ جُھد ءِ پوج ءُ بامرد اِت من پہ شُما دِگ کارے کُت نہ کناں بلے گپے جت کناں،
شُما بازیں سنگت موبائل الم کارمرز کن اِت اگاں چہ اے ٹیکنالوجی ءَ وت ءَ پھریز اِتگ گُڑا وَ سکیں شریں گپے بلے بیت کنت لھتیں سنگت ایشی ءَ را کارمرز کنت،
منی اے کاگد پہ ھما سنگتان اِنت کہ شُمے ھمراہ انت ءُ اے ٹیکنالوجی ءَ کارمرز کنگ ءَ انت، ما بلوچ کہ اے ٹیکنالوجی ءِ پائدگاں وشدل اِیں گُڑا بائد اشی ءِ نُکس ءَ ھوں بزان ایں کہ چی انت اگاں نا پہ جُھد ءَ ءُ جُھد ءِ ھمراھاں سکیں تاوانے بیت،
موبائل پہ نزیکی ءَ سکیں شریں چیزے بلے پہ گوریلا جنگی رِپکاں یک مزنیں تاوانے ھوں بیت کنت،
چوکہ ما ءُ شُما دُرست زان ایں موبائل گوں نیٹورک ءَ کار کنت ءُ نیٹورک گوں لین ءُ کمبھانی سر ءَ مھلوک ءِ موبائل ءَ سر کنگ بیت،
وھد ءَ جی ایس ایم نیٹورک بیتگ ءُ کوھنیں موبائل چوکہ نوکیا”Nokia” ھرکجا ھرکسی وس واک ءَ بیتگ پہ وت دانگے زُرتگ ئِے بلے آئی ءِ وھد ءَ اینچو ترسناکی نہ بیتگ کہ نو اسمارٹ موبائل “فونز” ءَ آورتگ،
انوں توامیں سنگت پہ وڑ وڑیں کارانی یا نزیکی ءِ واستا ھمے اسمارٹ پون ءَ کارمرز کن انت بلے اشی وتی نّپ ءُ نُکس ھست انت،
کِسہ ءَ گونڈ کنان ءَ وتی گپ ءَ بیان کناں ٹیکنالوجی پُشدر ءِ کِسہ ءَ نہ گِراں کہ سک دراج بیت،
ریاست ءَ پہ سرمچارانی ءُ آیانی کُمک کارانی دزگیر کنگ ءِ کارے بندات کُتگ آ “Geofencing” اِنت، جیو فینسِنگ ٹیکنالوجی ءِ تہ ءَ ریاستی کارِندہ کسانکیں مشین کہ آیاں وتی کیمپ ءَ یاکہ گشتی گاڑیانی تہ ءَ گون انت اے مشین کمپیوٹر ءِ کّد ءَ بیت یاکہ لیپٹاپ ءِ شِکل ءِ کسانکیں ڈبُک ءِ وڑ ءَ بیت کنت اے یک میتگے ءِ ٹاور ءَ چہ موبائل ءِ نیٹورک ءَ دست گیپت ءُ موبائل ءِ توامیں گشتی ریکارڈانی یک نکشے جوڑ کنت،
ہمے نکشے تہ ءَ اے پیشدارگ بیت کہ موبائل ءِ واھند ءَ چہ کجا سپر بِندات کُتگ ءُ کجا اُشتاتگ ءُ چینچو وھد ءَ پد چہ ھما جاہ ءَ دیم پہ سپر ءَ سر گِپتگ،
اے توامیں ریکارڈ ریاست ءِ جیو فینسِنگ ءِ زانتکار دیم ءِ ایریں لیپٹاپ ءَ نکش ءِ شِکل ءَ دیم ءَ ایر بنت، ھمے وھد ءَ آ موبائل ءِ توامیں ڈیٹایانی یک ڈبُکے جوڑ کنت کہ آئی ءِ تہ ءَ تئی کُتگیں “Call” ءُ “SMS” ءُ تئی موبائل پون ءِ “Search Engine”ءِ تہ ءِ توامیں شوھاز کُتگیں ویب تاکانی ءُ ھالتاکانی یاکہ مردمے ءِ بابت ءَ شوھاز کُتگیں ڈیٹا ءُ سوشل میڈیا ءِ تہ ءَ ھرچ ھما اپلیکیشن کارمرز کُتگ “Facebook” بیت شر”Twitter “بیت شر”Instagram “WhatsApp ءُ Gmail Account “
یاکہ”Google Map”ءِ ھوں ڈیٹایانی یک ریکارڈے پیش دار ایت،
شُما انسانی چاریگانی گِر ءُ داراں وتی انسانی نیٹورک ءَ کار بست کن اِت انچو کہ ریاست کار بندگ ءَ اِنت بلے دومی نیمگ ءَ بلوچ سرمچاراں سے اوں ھیال کنگی اِنت کہ ٹیکنالوجی ءَ نوکیں چاریگ ودی کُتگ کہ مئے وتی جِند ءِ دست ءِ گوشی”Mobile-phone ” اِنت اگاں ماں اشی ءَ یک نپ دیوکیں ٹیکنالوجی یے سرپد بہ بہ اِیں ءُ وتی کُتگیں کاراں دنیا ءَ سر کنگ ءِ یک وسیلھے سرپد بہ بی ایں گڑا اے اوں سرپد بہ بہ ایں ءِ کہ مئے دُژمن ءَ چہ مارا گیش ٹیکنالوجی ءَ دزرّس ھست ءُ مارا کُجام ھم وھد ءَ دزگیر کُت کنت،
شُما وتی کوھی جنگی رِپکاں شر سرپد ءُ داناھیں کمانڈر اِت سرمچار اِت شُما بھتر زان اِت کہ چے پیم اے جنگ کنگی اِنت ءُ اے جنگ چے پیم دیم ءَ برگی اِنت، من بس ھمینچک ءَ سرپد آں کہ مئے برات ءُ دوست ءُ دوزواہ اِت شُما ھست ءُ سلامت اِت اے جنگ ھست مان اِیت،
بیت کنت شما چہ من گیش اے جیڑھاں گیش سرپد اِت من وتی پرز سرپد بیتگ ءُ شمارا وتی پیگام شُمارا سر کُت،
بلوچ بلوچی بلوچستان ابدمان بات اَنت۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

نبشتانک: شائر ءِ مَرگ

نبشتہ کار:خلیل جبران

رجانکار: نبیل نود

دی بلوچستان پوسٹ

شپ ءَ وتی تھاریں چادر ھر نیمگ ءَ تالان کُرتگ اَت۔ گیدی ءَ بے تواری ءَ مان شانتگ اَت۔ برپ رچگ ءَ اَت۔ مردم وتی گِس ءُ ماڑی، گدانانی تہ ءَ پناھگیر اَت اَنت۔ دَمک ءُ در ویرندان ءُ دَگ بے بْرمشے ءَ پوش اتگ اَنت۔

شھر ءَ چہ دَر، نزّیک ءِ کسانیں میتگے ءَ دومی لوگاں چہ گِستا یک جَنڈیں گدانے ءَ یک ورناھے وتی زند ءِ گُڈّی دَم ءَ کشّگ ءَ اَت۔ آئی ءِ بزّیک ءَ تاک ءِ دپ ءَ یک زھریں تیلانی یک کندیلے چَم چَم جنگ ءَ اَت، چو کہ آ وتی واھُند ءِ زند آدینک اِنت.

اے ورناھیں شائرے اَت کہ آ اے نیم توامیں زند ءَ بازیں تجربگاں گوں گوستگ اَت، اے نوک سالیں انسان نوں آشنا بوتگ اَت کہ آ نوں زوتّ چہ اے زند ءِ وھشت ءُ جنجالاں آجو بوگ اِنت۔ آ ھمے وڑ ءَ مرگ ءِ وداریگ اَت کہ گُش ئے مرگ ءِ منّت ءَ زَرگ ءَ اِنت۔ آئی ءِ زردیں اینچک ءِ سر ءَ اُمّیت ءِ چراگے اَت، لُنٹانی سر ءَ واھگانی بِچکند۔۔۔۔۔۔ ءُ چماں سَگ ءُ تاھیر ءِ بْرمشے سھرا اَت۔ چو کہ آئی ءَ گوں جھان ءَ ھچ وڑیں گلگ نیست۔

آ یک شائرے اَت کہ زَردارانی اے جُلگھیں شھر ءَ پہ شُد مرگ ءَ گْور اَمباز کنگ ءَ اَت۔ آ اے کوڑھیں جھان ءَ پمیشا دیم دیگ بیتگ اَت کہ بنی آدم ءِ دل ءَ گوں وتی دلساچیں سوت ءَ چہ اُمیت ءِ چراگے بہ بالین اِیت ءُ زندگ بُوَگ ءَ ھاٹیگ ءَ بہ دَنت۔۔۔۔۔ آ لَسّھیں ارواھے ءِ ھُدا بُند اَت۔ سَسّا ءِ ھدا وند ءَ اے جھان ءَ پمیشا دیم داتگ اَت کہ بنی آدم ءِ ارواہ ءُ آئی ءِ باتن ءَ رُژنے بہ بکشائیت۔ بنی آدم ءِ دل ءَ چہ بدن ءِ سِلّیاں پھک ءُ پلگار بہ کنت۔ بلے بَژن۔۔۔۔۔ آ چہ اے وتواھانی جھان ءَ زیات نِشت کنگ ءَ نہ اَت۔ چہ اے دنیا ءَ سپر کنگ ءَ اَت۔ بلے آئی ءَ موکل کنوک کسّ گندگ ءَ نیایگ ءَ اَت۔ چہ اے جھان ءِ وتواھیں مردماں آئی ءَ یک شیرکنیں بچکندے ءَ اُمّیت ھوں داشت نہ کُرتگ اَت۔

آ مِرگ ءَ اَت۔ زھریں تیلاں گوں روکیں کسانیں کندیل ءَ ابید آئی ءِ گْور ءَ کس نیست اَت۔ آ ایّوک ءُ تھنا اَت۔ آ گریوگ ءَ اَت۔ آئی ءِ سروناں کس نہ نِشتگ اَت۔ چپّ ءُ چاگرد ءَ ھوں کس نیست اَت۔ بید ء کاگدانی لھتے ٹُکّراں کہ آھانی سر ءَ آئی ءِ پیگام نبشتہ اَت۔ وھدے کہ آئی ءَ بدن ءَ توان پشت نہ کپت تہ آئی ءَ وتی دست راست کُرت ءُ بُرز ءَ چِست کُرت ءُ گدان ءِ چَت ءَ گوں دلپروشیں نگاھاں چارگ ءَ لگّ اِت چو کہ آئی ءِ چمّ چت ءَ چہ آ دیم جمبراں گوں گْوازی کنگ لوٹگ ءَ اَنت.

پد ءَ آ گوں پْرشتگیں توارے ءَ لبجگ ءَ لگّ اِت”بیا۔۔۔۔ اَے زیبائیں مرگ۔۔۔۔۔ اَے مھروانیں مرگ بیا۔۔۔۔۔ منی ارواہ تئی وداریگ اِنت۔ منی نزّیک ءَ بیا۔۔۔۔ اد ءَ بیا۔۔۔۔۔ ءُ منی چہ اے زندمان ءِ لوپ ءَ من ءَ آجو کن۔ چہ اِشی ءِ بندیگی ءُ اِشی اوپار ءَ من ءَ دَمبُرتگ۔ بیا منی مھروانیں مرگ۔ بیا من ءَ چہ منی ھمساھگ ءَ جتا بہ کن۔ ھما کہ من ءَ گنوک ءُ شیپتال گْوش اَنت،پمیشا من اِشاں ابرم ءِ پیگام ءَ سر کنگ لوٹاں۔ زوتّ کن۔۔۔۔۔ آھاں بس من ءَ پہ ھمے ھاتر ءَ تھاروکیانی تھ ءَ چگل داتگ کہ من نیزگار ءُ گریبانی ھمدرداں، وھدیکہ اے زرّپرست لوٹ اَنت کہ ما اے نیزگاراں گیش ءَ چہ گیش ایردست بہ کن ایں،بیا۔۔۔ اَے دوزواھیں مرگ!! من ءَ وتی مھروانیں دستاں بزور۔ پرچا کہ منی ھمراہ چہ من شِزار اَنت ۔ بیا۔۔۔ اے مرگ من ءَ گور ءُ امبازاں بزور۔ آ۔۔۔ اے مھروانیں مرگ، منی لُنٹاں گوں وتی لُنٹاں بہ ڈُکّین۔ ھما کہ چہ وتی مات ءِ لُنٹانی بوسگ نہ رستگ اَنت ۔ وتی مھروان ءِ لَنککانی گرمی ءَ چہ نا آشنا اِنت۔۔۔۔۔ اے مھروانیں مرگ، بیا من ءَ گوں وت بہ بر”۔

اے وھد ءَ شائر ءِ سروناں یک ملائکتے گندگ ءَ اَتک کہ نایاپتیں ھُسنے ءِ واھُند اَت۔ آئی ءِ دست ءَ گُلاب ءِ ڈولداریں پُلّانی زیبناکیں ھارے اَت۔

ملائکت ءَ شائر وتی گْور ءُ اَمبازاں زُرت ءَ آئی ءِ چمّ ئِے بند کُرت اَنت دانکہ آ ارواہ ءِ چمّاں ابید اے جھان ءِ دْروشماں دیست مہ کنت۔ ملائکت ءَ آئی ءِ لُنٹان ءَ بوسگے گِپت، چہ اِشی ءَ آئی ءِ لُنٹانی سر ءَ ابدمانیں بچکندے تالان بوت۔

پد ءَ آ گدان پہ مدامی ءِ ھالیگ بوت ءُ اود ءَ کاگد ءِ لھتے ٹکّراں چہ ابید کہ اِشانی سر ءَ شائر ءَ وتی گُڈّی پیگام نبشتہ کُرتگ اِت اَنت، دگہ ھچ پشت نہ کپتگ اَت۔

سال ءُ ماہ پدی بو آن ات اَنت

سداں سال ءَ رند، وھدے کہ اے شھر ءِ مردم چہ نا کدر شناسی، جاھلی ءُ نادانی ءِ شولّ کشّیں واب ءَ پدّرہ اِت اَنت۔ آھاں اے شھر ءِ ڈولدار ترین باگ ءَ اے شائر ءِ بُت مِکّ کُرت۔۔۔ آئی ءِ نام ءَ مزنیں مزنیں ماڑی جوڑ کُرت۔ مراگش جاہ ٹھینگ بوت اَنت ءُ مردم ھر سال گوں دل ءِ جُھلانکیاں شائر ءِ سالروچ ءِ دارگ ءَ گلائیش بوت اَنت۔ آئی ءِ پیگام ءَ آ آجوئی ءِ اِلم ءُ زانشت ءَ چہ چکارینت اَنت۔

آہ بنی آدم ءِ نازانتی چِنکہ زالم اِنت۔۔۔!!۔۔۔۔۔۔۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

شال ءَ بیگواھیں مردمانی درگیجگ ءِ زھرشانی برجاہ

دی بلوچستان پوسٹ

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی بنجل ءَ 3ھزار 9 سد ءُ ھپتاد ءُ ھپت روچ سرجم بیتگ -منگچر ءَ چَہ مھراب بلوچ ءُ آئی ءِ ھمراھاں بنجل ءِ تر ءُ تاب کرتگ ءُ ھمے وھد ءَ ہیومین رائٹس کونسل آف بلوچستان ءِ بی بی گل بلوچ ءُ باسک جاڑیگ بیتگ اَنت –

وی بی ایم پی ءِ رھشون ماما کدیر بلوچ ءَ گْوشت کی انسانانی تہ ءَ سماھی ءِ جزبگ بنت ءُ ھما جزبگ انساناں گوں ھمگرنچ بنت – مروچی بلوچ پُسگانی دروشم ءَ یک نودربرے ءَ بہ گر داں یک پوریاگری، ادیب، شائر، ڈاکٹر، انجینئر ءُ چاگرد ءَ گوں بندوکیں ھمک بلوچ پُسگ اے سماھی ءِ گلامی ءِ جزبگ ءَ چَہ سرشاریں دشمن ءِ سیاہ شپی ءَ اوپار کنگ ءُ آھوکیں روچ ٹِک ءِ ودار ءَ سیھگ ءَ اَنت –

آئی ءَ گوشت کہ ھمک وھد ءِ سر ءَ بیگواھیں بلوچانی کھولاں تپلی تسلی داتگ اَنت، دروگ ءِ پشت ءَ دروگ، گوستگیں سروزیر ءَ مارا ھمے مستاگء داتگ اَت کہ بیگواھیں مردم آئید ءَ چَہ پیسر یل کنگ بنت ءُ وتی لوگاں سر بنت، بلے چی بیت اے زبان ءِ کولاں بلوچ پسگانی یل کنگ ءَ ابید آیانی لاش دز کپان بیت اَنت –

آئی ءَ گْوشت کہ چپتگیں لاشانی دزکپگ ءِ درچ انگت ءَ برجاہ اِنت – اے وھد ءَ ھزارانی کچ ءَ بلوچ نودربر، پروپیسر، ڈاکٹر، وکیل، سیاسی رھشون بیگواہ کنگ ءُ بازینے ءِ لاش دزکپتگ اَنت –

بیست پنچ ءُ بیست شش مئی ءِ نیامی شپ ءَ بلوچستان ءِ دمگ تُربت ءِ ھنکین ڈنک ءَ بیتگیں ویل ءِ بگیری ءَ بلوچستان ءِ ھمک کسان ءُ مزنیں شھراں ھوار کراچی ءَ ھم زھرشانی روانک ءِ جار جنگ بیتگ ءُ بازیں دمگاں زھرشانیانی روانک کُشگ ھم بیتگ اَنت ۔

گوستگیں روچاں گوادر ءَ بلوچ نودربر ءُ گوادر ءِ سیاسی ءُ چاگردی جھدکاراں یک روانکے کشتگ اَت کہ ایشی ءِ تھ ءَ برمش ءِ ھاتر ءَ انساپ ءَ ھوار سمیر سبزل ءُ آئی ءِ ھمراھیں سلکارانی گرگ ءُ تُربت ءَ چارراہ ءِ سر ءَ پاھو دیگ ءِ لوٹ کنگ بیتگ اَت۔

چہ اے روانک ءَ پد یک دگہ روانک ءِ گوادر ءَ کُشگ بیتگ اَت کہ ایشی ءِ تھ ءَ بازیں کساسے ءَ مردماں بھر زرتگ اَت ءُ یکرندے پد ءَ گوں ترندی ءَ پوج ءِ برگیڈیر ایم آئی ءُ آئی ایس آئی ءِ کرنل آں چہ لوٹ کَنگ بیتگ اَت کہ وتی ڈیتھ سکواڈ ءِ مردماں بہ دار اَنت ءُ بلوچ گونڈو برمش ءَ انساپ دیگ ءِ ھاتر ءَ سمیر سبزل ءُ آئی ءِ سرجمیں ٹولی ءَ گرگ ءُ پاھو دیگ بہ بیت۔

تران کنوکاں گوشتگ لس بلوچ ءِ یک ناکن چِنے کسگ ءَ بہ کنت آئی ءَ پوج ءُ چیریں گلانی مردم پَٹ ءُ پول کن اَنت ءُ بزگ کن اَنت بلے اے توپنگی کہ بلوچانی لوگ ءَ پتر اِتگ اَنت ایشانی توپگ چوں گندگ نہ بیتگ اَنت۔

چہ گوادر ءِ روانک ءَ پد بلوچستان ءِ ھمک دمگ ءَ چہ جتائیں جتائیں روچاں زھرشانی روانک کَشگ ءِ جار پرینگ بیتگ اَت۔ زیکیں روچ ءَ بلوچستان مستریں شھراں چَہ یکے تُربت ءَ ھزارانی کچ ءَ مردماں زھرشانی روانک ءَ بھر زرتگ ءُ لوٹ کُتگ کہ برمش ءُ آئی نمیرانیں مات ءَ انساپ دیگ بہ بیت تُربت ءِ روانک ءَ برمش ءِ کھول ءِ مردماں ھم بھر زرتگ ءُ تران کنان ءَ گوشتگ کہ اے مردم اے دُز اے ڈُنگ کہ ایشاں توپنگ گون اَنت چوں چکر اَنت کئے اَنت ءُ چون ارزانی ءَ چکر اِت کن آں؟

دیمترا آیاں گوشتگ مئے لوٹ ھمیش اِنت کہ سمیر سبزل گوں وتی ٹولی ءَ دزگیر کنگ بہ بیت ءُ تُربت ءَ چار راہ ءِ سر ءَ پاھو دیگ بہ بیت۔ چاگردی رسانکدرانی تندجاہ ءَ شنگ بیتگیں عکس ءُ تامرانی تھ ءَ گندگ بیت ھزارانی کچ ءَ مردم ھمے روانک ءَ گون اَنت ءُ بازیں مردمانی رد ءَ آیاں چہ چیریں گلانی واکدارانی نیمگ ءَ چہ بیھار دیگ ءُ گُشگ بیتگ کہ شما اے زھرشانی ءَ بھر مہ زیر اِت۔

بلے پد ءَ ھم ھزارانی کساس ءَ مردمانی دگانی سر ءَ در آیگ ھمے پیش داریت کہ مردم چہ بازیں اُستانی زوراکی ءُ ڈیتھ اسکواڈانی کُشت ءُ ھون ءُ دُزی ءُ ڈنگی آں چہ بیزار اَنت ۔

تُربت ءِ وڑ ءَ مروچی بلوچستان ءِ دمگ بلیدہ ءَ ھم مزنیں زھرشانی روانک ءِ کشگ بیتگ پہ برمش ءَ انساپ ءِ لوٹ کنگ ءِ ھاتر ءَ۔
سربیتگیں ھالانی ردءَ روانک ءِ مردماں چہ پوج ءِ مردمانی نیمگءَ چہ گوشگ بیتگ کہ شما تران مہ کن اِت۔

پد ءَھم مردمان تران کُتگ ءُ گوشتگ کہ مئے مردمانی ھونانی زمہ وار ریاست اِنت ڈیتھ اسکواڈانی مستری کنوک ایشاں مھکم کنوک سرکار اِنت ءُ ما لوٹ کنیں کہ برمش ءَ انساپ دیگ بہ بیت ۔

دومی نیمگ ءَ خاران، دالبندین ءُ واشک ءَ ھم پہ برمش ءَ انساپ ءِ لوٹ کنگ ءِ ھاتر ءَ زھرشانی درشان کنگ بیتگ۔

سربیتگیں ھالانی ردا واشک ءَ زھرشانی روانک ءِ کشگ بیتگ کہ پد ءَ زھرشانی ءِ دروشم ءَ مردماں تران کُتگ ءُ پہ برمش ءَ انساپ ءِ لوٹ کُتگ۔

ھمے وڑ ءَ دالبندین پریس کلب ءِ دیما بلوچستان نیشنل پارٹی ءِ نیمگءَ چہ یک زھر شانی ءِ برجم دارگ بیتگ کہ ایشی تھ ءَ ھندی مردماں بھر زرتگ ءُ پہ کودکیں برمش ءَ انساپ ءِ لوٹ کُتگ ۔

چہ خاران ءَ سربیتگیں ھالانی ردءَ بلوچستان نیشنل پارٹی ءِ نیمگ ءَ چہ یک زھرشانی ءِ کنگ بیتگ کہ ایشی تھ ءَ دمگی مردماں ھم بھر زرتگ ءُ ڈیتھ سکواڈانی دست ءَ بلوچ زالبول ءِ کوش ءُ برمش بلوچ ءِ ٹپی کنگ ءِ ویل ایر جتگ ءُ لوٹ کُتگ ناشرکار زیت دزگیر کنگ ءُ سزا دیگ بہ بنت ۔

ھمے وڑ چہ بیسیمہ ءَ سربیتگیں ھالانی ردءَ بلوچستان نیشنل پارٹی ءِ نیمگ ءَ چہ یک زھرشانی ءِ کنگ بیتگ کہ ایشی تھ ءَ ڈیتھ سکواڈانی دست ءَ بلوچ زالبول ءِ کوش ءُ برمش بلوچ ءِ ٹپی کنگ ءِ ویل ایر جتگ ءُ ناشرکارانی زوت دزگیری ءُ برمش ءَ انساپ دیگ ءِ لوٹ کُتگ ۔

دومی نیمگ ءَ پنجگور، پسنی ءُ دشت کھڈان ءَ چہ سربیتگیں ھالانی ردءَ باندا اے دمگانی تھ ءَ پہ برمش بلوچ ءَ انساپ ءِ لوٹ کنگ ءِ ھاتر ءَ زھرشانی کنگ بیت۔ ھمے وڑءَ کراچی ءَ رس اِیتگیں ھالانی رد ءَ چہ برمش یکجھتی کمیٹی ءِ نیمگ ءَ پنچ جون ءَ یک زھرشانی روانک ءِ کَشگ بیت۔

یات بہ بیت چہ اے زھرشانی ءُ زھرشانی روانکاں ابید ھم لس بلوچ، سیاسی ءُ چاگردی جھدکار ءُ رھشوناں ھوار ھمک تک ءَ چہ سیادی داروکیں مردماں سوشل میڈیا ءَ پہ برمش ءَ انساپ ءِ لوٹ ءِ ھاترءَ کار مرز کنگ ءُ #JusticeForBramsh ءُ #JusticeForBramshBaloch ھیشٹیگ ءَ کارمرز کنگ ءَ اَنت۔