TBP Balochi

بلوچ آجوئی لوٹوکیں رھشون ءُ بلوچستان لبریشن فرنٹ ءِ سروک ڈاکٹر اللہ نزر بلوچ ءَ وتی شنگ کُتگیں درشان ءِ تھءَ گوشتگ کہ کہ یک نیمگے ءَ بلوچ راج ڈنک ویل ءُ اے وڑیں ویلانی بنکی ریشگ ریاست ءِ پاکستان ءِ ساچستگیں ءُ کاردار ڈیتھ اسکواڈ ءِ ھلاپ ءَ زھرشانی ءَ اَنت ءُ دومی نیمگ ءَ ڈیتھ اسکواڈ ءِ کاروائی ترندی ءَ برجاہ اَنت – رسانکدرانی نہ بوھگے سبب ءَ بلوچستان ءِ گیشتریں ھال ھمود ءَ تس اَنت اے وڑیں ویلانی ھمراھی ءَ پاکستان بلوچ راج ءَ کلوہ دیگ لوٹگ اِنت کہ اے زھرشانی ءُ جمھوری جد ءُ جھداں ریاست ءِ زوراکی ءُ بلوچ راج ءِ کُشت ءُ کوش ھلاس بیت نہ کن آں –

آئی ءَ گوشت کہ گوستگیں روچ ءَ پیدارک ءَ لشکر ء ھراسان ءِ دمگی سروک سردار ازیز ءِ کارمنداں یک لوگے ءِ سر ءَ بیڑ برتگ، مردمانی سر ءَ بے کساسیں لَٹ ءُ کُٹ اِش کرتگ اَنت ءُ سُھر ءُ مالاں ھوار لوگ ءِ سرجمیں گران نھادیں سامان دُزیتگ ءُ برتگ اَنت – سردار ازیز ءُ آئی ءِ چُک شاہ میر میان اُستمانی ناشرکاریں گل دائش ءِ بھریں لشکر ھراسان ءِ کنوک ءُ کار ساز اَنت – آیاں پاکستانی ریاست، پوج ءُ چیریں ادارھانی سرجم ءَ چیردستی کمک گون اِنت -اے ٹولی ءَ گورکوپ، پیدارک، پسنی ءَ ھوار تیابدپی ھند ءُ دمگاں بازیں بے میار ءُ بزگیں مردم کُشتگ ءُ بے کساس ءَ لوگانی مڈی دزیتگ ءُ برتگ اَنت -دمگ ءَ سردار ازیز ءِ ڈیتھ اسکواڈ ءِ پوج ترامگام اِنت ءُ مردمانی ننگ ءُ ناموس ءُ جان ءُ مالانی گون ءَ لیب کنگ ءَ اَنت -اے سیول میلٹری ءَ دمگ ءَ بازیں بنجل ھم جوڑ کرتگ کہ اود ءَ نیکراھی گنوکی ءُ ناشرکاری ءِ ھیل دیگ بیگ ءَ اَنت کہ بلوچستان ءِ سرزمین ءِ سر ءَ کارمرد بیگ ءَ اَنت –

ڈاکٹر اللہ نزر بلوچ ءَ گْوشت کہ سرجمیں بلوچستان ءَ ڈیتھ اسکواڈ ترامگام اِنت – اے دمگانی تہ ءَ مشکہ، راگے ءَ ھوار کش ءُ کری دمگ ھوار اَنت – اے دمگاں ڈیتھ اسکواڈ ءِ زُلم ءُ زوراکیانی آس روک اِنت- بیست ءُ یک مئی ءَ ھمے رستراں پوجی بنجل ءَ چَہ کمو دور مشکہ النگی ءَ ازھر الی ء اسگر الی نامے یک نودربرے ءِ گون ءَ بدھادتی کرتگ -مھلوک ءَ توار چِست کرتگ گڑا پولیس ءَ مردمانی سارتی ءِ واستا ارزی نبشتہ کرتگ ءُ پَٹ ءُ پول ءِ زبان کرتگ اَنت –

بلے لھتے روچ ءَ پد زوگریں لشکر اے رسترانی پشت گیری ءَ پاد اتکگ ءُ دیم ءَ اتکگ ءُ کھول ءَ را بیھار داتگ ءُ ارزی نامی واتر کنگ ءَ لاچار کرتگ اَنت –

آئی ءَ گْوشت کہ ڈیتھ اسکواڈ ءِ ناشری ھما کچ ءَ سر بیتگ اَنت تپلیں زھگ، زالبول ءُ مردمانء ننگ ءُ ناموس ھم ھم پُلگ بیگ ءَ اَنت -اگاں کجا ھم نام گپتیں پاکستانی کانودانی نیمگ ءَ روت گڑا اود ءَ ھم پاکستانی پوج ءِ توپک ٹال اِنت -اے وڑ ءَ کانود ءِ کمک زورگ مردمانی واستا مرگ ءُ بیرانیانی بروبری اِنت –

داکٹر اللہ نزر بلوچ ءَ من اے ایشی ءَ راستی ءَ پدر کن آں کہ پاکستان ءُ پاکستانی نزام ءَ کس ھیرواہ ءُ امن سلامتی اوست مہ دار اِت پرچاکہ ھیرواہ ءُ امن سلامتی زورگرانی تہ ءَ ھوار نہ اِنت – البت پاکستان کجام ھم زندگیں مردمے ءِ دست ءَ بہ بیت اِنت بیت کتگ اَت راج ءِ ریاست بیت اِنت گڑا مئے ازت ءُ ننگ ءُ ناموس اے وڑ ءَ پادمال نہ بیتگ اَت -بلے پاکستان اے وڑیں سپاکاری ءَ چَہ زبھر اِنت یک رستریں ڈیھے ءِ بستار اِنت – گڑا راج وتی کمکی جد ءُ جھد ءَ آجوئی ءَ بس بہ کن اَنت پرچاکہ ازتمندیں زند ءِ گوازینگ بس آجوئی ءُ پاکستانی گلامی زنجیرانی سندگ اِنت –

نبشتانک: ڈَنُک ءِ ویل ءُ سرکار ءِ پندل

نبشتہ کار: چیھال بلوچ

دی بلوچستان پوسٹ

پندل سازاتنت مئے ملکءَ
بدواہ بازات انت مئے ملکءَ

گوستگیں روچاں بلوچستان ءِ دمگ کیچ ءِ یک میتگے ڈنک ءَ سرکاری داشتگیں دزاں یک گسےءَ دور کرت ءُ یک بلوچ شیرزالیں ماتے ءَ یکبرے پد ءَ شہید دادشاہ ءُ میر کمبر ءِ مات ءِ یات نوک کرت ءُ دزانی دیم چادر لگوشت ءُ دموک ءَ دور کرت ءُ وت ءَ را ندر ءُ کربان کرت ءُ بے رھمیں ڈنگانی دست ءَ آئی ءِ کسان سالیں زھگ برمش ءَ را گوں گونڈلیں تیراں ٹپی کرت.

ایشی ءَ چہ پد بلوچستان ءِ سرجمیں مھلوک سرکاری زوراکیانی ھلاپءَ چست بوت ،گوادر،پسنی،اور ماڑہ،جیمڑی(جیونی)، پلیری، کیچ،بلیدہ، زامران، مند، ناسرآباد، پنجگور، ءُ داں کراچی ءُ لاھورءَ انسانی ءُ راجی گلاں پہ برمش ءُ نلوچستان ءِ سر ءَ بیوکیں زوراکیانی ھلاپ ءَ توار چست کرت.

چوناھا دیرانت کہ چہ کیچ ءِ کش ءُ گوراں نشہ بھاکنوک ءُ سرکاری داشتگیں سلاہ بندیں ٹولیانی نیمگ ءَ دزی ءُ ڈنگی ءُ لٹ ءُ پل بوگءَ انت ءُ اشانی تہ ءَ گیشتریں بھرے ھما انت کہ چہ بلوچ آجوئی گلاں لگور بوتگ ءُ تتکگین انت کہ اشاں سرکارءَ زرءُ نوکری لالچ داتگ ءُ اد ءَ کہ اے اتکگ انت نا اشاں زر رس اتگ ءُ ناکہ نوکری البت ءَ سرکارءِ پزورءُ مزن لاپیں نشہ بھاکنوکاں ءُ دزانی سروکانی پانکپان ءُ نگھپانیءَ ھوار اشاں دزی ءُ ڈنگی ءِ اجازت دیگ بوتگ ءُ اشاں سلاہ بستگ انت داں گوادرء تربت ءُ پنجگورءَ ھوار سرجمیں ھنداں اشاں گوں سلاھاں گردءُ چکر ءِ اجازت ھست ءُ اے روانت ءُ کاینت.

لس مھلوک ءَ دیرانت کہ چہ اشانیءُ سرکارء کتگیں زوراکیاں دل سیاہ انت ءُ ایرجیگ انت بلے دراجیں وھدے بیت کہ ھبر کنوکانی زبان نبشتہ کنوکانی ند ءُ زھرشانی کنوکانی توار ماں ھرکجا زنجیر جنگ بوتگ بلے برمش ءِ ویل ءَ مردماں توار دات زبان دات ند دات کہ آ وتی سر ءَ بوتگیں زوراکیانی ھلاپءَ چست بہ بنت ءُ توار چست پکن انت.

وھدیکہ سرجمیں بلوچستان داں بارکھانءَ بگر داں دالبندین ءُ بھنپورءَ بلوچ یکبرے پد ءَ تپاکیءُ ھم ستکی درشان کنگءَ انت ءُ اے ویلءَ پد یکبرے پد ءَ بلوچاں پاکستانی زوراکی ماں جھان ءَ چست کرتگ انت نوں سرکارءُ آئیءِ داشتگیں چمچہ ءُ وزیر پریشان انت کہ آوانی اکس گندگ بوگءَ انت ھنچوکہ کیچءِ ویلءَ تربتء یک وزیرے زھور بلیدی ءُ نشہ بھاکنوک ھوتمان ءِ اکس ماں ھمے کشندہ ٹولیءِ سروک سمیر سبزلءَ گوں گندگ ءُ تالان بوت نا ایوکءَ سمیر سبزل دیمءَ آھت بلکیں اشانی رودینوکیں وزیر ءُ نشہ بھاکنوک ھم دیم ءَ اتک انت.

زھور بلیدی چوناھا دیریگیں مردے کہ سرکاری اگدھانی سر ءَ انت ءُ ڈنک ویلءَ پد وھدیکہ زھور بلیدیءِ دیمءِ چادر دوراتک آئیءَ بلوچستانء دگہ یک دلاریں وزیرے گوں وت زرتءُ چہ کیچءَ وتی بوٹانی ساپ کنوک لالہ رشید زرتءُ شت ڈنکءَ ھمے شھیدیں ماتءِ لوگءَ کہ ماگوں تو ھوارایں.

بلے بلوچ وتی دوستءُ دژمنءَ زانت پمیشکا زھور بہ بیت یاکہ دگہ سرکاری مشتگیں وزیرءُ گزیرے اے درست پہ بلوچاں سیاہ مار انت.
تربتءَ لالہ رشید ءُ پد ءَ زھور بلیدیءَ گوں اھوالکاراں تران تہ ءَ گوشتگ کہ بلوچستانءَ دگہ زالبول کشگ بوتگ مھلوک چی ءَ آیانی واستا بے توارانت بلے زھورءُ ایدگہ داشتگیں چمچھانی ھبر گوش دارگ نبوت گڈسر ءَ سرکارءَ شت ءُ لھتیں جنین آدم دیمءَ آؤرتءُ آھانی پرمات کہ شما نوں برمش ءِ برمشءَ ایر موش کنگ ءِ ھاتر ءَ وتی توارءَ چست بہ کن ات دو سے روچ انت چہ بلوچستان ءِ دمگ بالگترءَ لھتیں مردم شوھازکنگ بوتگ ءُ آ گشگءَ انت منی سر ءَ زوراکی کنگ بوتگ منی واستا توار چست کن ات؟

اد ءَ جست پاد کیت آیا تو ایوکیں جنین آدمے ئے کہ تئی سر ءَ زوراکی بوتگ بلوچستانءَ سرکار چہ گساں جنین آدماں چست کنگءَ انت کشکءَ انت بندیگ کنگ ءَ انت.
زالبولانی کشگ ءُ جنگ جنگی رھبندانی لگتمالی انت بلے سرکارءَ رھبند ندار ایت پمجشکا آئیءَ برمش توارءِ ایرجیگ کنگءَ زھور بلیدیءَ گوں ٹولیء پرماتگ کہ شما دگہ جنینے بیار ات کہ برمش ءَ چہ لس مھلوک بے ھیال بہ بیت بلے نَے برمش توار سرجمیں جھان ءَ تالان انت چہ مھلوکءَ دزبندی انت کہ اے پیمیں پرماتگ ءُ زر داتگیں مردماں ویل کن ات.

اشکنگ ھمیش انت کہ بالگترءَ اے جنین آدم ملا برکتءِ کُشندھیں سلاھبندیں ٹولیءَ جتگءُ ملابرکت وت زھور بلیدیءُ آئیءِ مردمانی مردم انت نیشنل پارٹی مردم ڈاکٹر مالک ءُ زھور بلیدی بائد انت آئی ءَ الاج بکن انت بلے برمشءِ ویلءَ پندلانی دیمپان کنگ جھدءَ اے کاسگ چٹ ھچبر سوبین نہ بنت ، اے اشانی وابے کہ ما نوں بلوچانی توار ایرموش کتگ بلوچ گنگ انت کر انت بے زبان انت انا واجہ تو اے واب ءَ دل ءَ در کن ….

بلوچ نوں ھمک زوراکی ءِ ھلاپ ءَ توار چست کننت ءُ اے توار ایر موش نہ بنت.

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک:منی ارواه پیرک ءِ زهیر

نبشتہ کار: بھرام بلوچ

دی بلوچستان پوسٹ

منی ارواه من ءَ پھل کن کہ منی کِرد ءُ زانت انچو نہ انت پہ تی نمیرانیں سر ءَ چیزے نبشتہ بکناں چی ءَ کہ تئی کِسھانی کجام تاک ءَ کہ لیٹین آں کِسھانی پُشت ءَ کِسھے ودی بیت بلے چے بکناں دل ءَ نہ منّ ات تئی یات ،تئی وشیں داب ،تئی کندگانی زهیر ھر روچ من ءَ ٹکُر ٹکُر کن اَنت ٹُکرانی نزّارگ ءَ شپ روچ بیت ءُ روچ شپ پیرو کلشن ءَ آبد ءُ مھراب ابیتک کتگ اَت بلے تئی ءُ گلاب ءُ مالک جان ءِ نمیرانی ءَ پد کلشن ءَ موسم بدل کتگ مُرگانی شیزارگ چیسل جان ءَ پد گار ءُ بیگواه اِت انت بلے نوں پروم ءِ سرجمیں هلک ،کھن ءُ کُوچگ ابیتک اَنت بالی مُرگ گندگ نہ بنت، کلگ کَور ءِ مچّانی لُٹ هُشک بوتگ اَنت کوهاں وتی رنگ مٹّ کتگ اَنت ،گوران ءُ بالگتر ءِ هما ساهِگ کہ تو دَم بالا کتگ چو چورھیں زهگ ءَ پریات کن انت ءُ چیول انت آواران ءُ کولواه گیمُرتگ اَنت پہ تئی دیدارے ءَ تلوس انت باگیں بلیده جلال ءُ مراد چوره کتگ اَت بلے ترا چہ پد بلیده ءِ راه ءُ دگاں دنز نگواه اِیت،زامران ءَ وتی تب ءُ ندارگ مٹّ کتگ انت کہ پیرو مئے چارگ ءَ نئیت …..
پیرجان تئی مِھروانیں همبلو سکّ گِلگ کنگ ءَ انت کہ مئے جنگی شون ءُ مئے راستیں کُوپگ چو جلدی شُتگ…
پیرو واتر کن کہ پُر کندگیں سمُّل کہ مُدام گوں تو کندیتگ ءُ گل بوتگ مرچاں هاموش انت هچ کہ هچ نہ گُش ات لُنٹ ئِے هُشک هُشگ انت من زاناں تئی زهیراں زُرتگ زهیریگ انت بلے پژنیگ نہ انت زانت منی ابّا راجی بہ مرد ءُ زمین پھاز ءُ نہ تُرسیں جنگول ءِ بوتگ، پیرو سمُّل،گوهر ءُ دیدوک کہ وهدے یکجاه نند اَنت تو زان ئے چی کِسہ کن انت؟؟
کِسہ جنگی انت
تئی ءُ گلاب ءِ سنگتانی جنگ ءِ کِسہ ءَ پہ بچکندگ کن انت ءُ شُمے گُڈّی دانکاں گوشدار اَنت گیشتر مُهکم بنت ،
گلاب جان تئی باجہ ءِ ساهِگ ءَ ھرکس ءَ کہ تئی وش تبیں آواز اِشکُتگ سک بے تاهیر انت گوهر ءُ دیدوک ءِ لیب جاه مرچاں تئی باجہ انت دیگہ هچ لیب نہ کن اَنت مدام بچار گوں باجہ ءَ لیب کنگ ءَ انت ءُ ساپ ئِے کن اَنت…
پیرو جنگ کنگی انت،پیرو دیوان برجم دارگی انت،پیرو انگت باز کنگی اَت..
پیرو واتر کن
پیرو کُل نداره پد ءَ هما پیم کنگی انت
پیرو درست زهیریگ انت
پیرو سمُّو کندینگی اِنت
پیرو واتر کن
پیرو واتر کن

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: برمش ءَ پد ءَ آشوبے ودی کت

نبشتہ کار: شاکر مراد

دی بلوچستان پوسٹ

انسان ھر دور ءَ یک چاگردے ءِ واھند انت پرچا کہ انسان ءِ بُنکی تب ءُ لوٹ گوں زندگیں چاگرد ءَ بندوک اَنت، انسان ابید ء چاگرد ءَ نا سرجم اِنت ءُ بید ء انسان ءَ چاگرد ھم ودی نہ بیت،بلے ھما چاگرد کہ انسان ءَ پہ وت زور ایت ،رودین ایت ءُ مزن کنت.
بیا کہ بلوچ ءِ سرڈگار ءُ چاگرد ءَ چار ایں کہ ھود ءَ انسان ءِ واستا زندگی کنگ چنکس دردناک انت ؟
ھر روچ بلوچ سرڈگار ءِ سر ءَ یک نا یک ویلے الم ودی بیت، ھر روچ زُلم ءُ زوراکی ءِ آس جمبر اِنت، ھر روچ ماتانی بچ برگ ءُ شھید کنگ بوگ ءَ اَنت، ھر روچ دژمن ءِ زوراکی ءِ یک نوکیں ھالے شنگ بیت کہ پلاں جاہ ءَ یک ویلے بوتگ، چوناھا ھما وھدی پہ بلوچ راج زُلم زوراکیانی آماچ اِنت بلے دوھزار ءَ پد گیش زُلم ءُ زوراکیانی آماچ اِنت، ھزاراں بلوچ پرزند شھید ءُ بیگواہ کنگ بوتگ، ھزاراں بلوچ درانڈیھ کنگ بوتگ، ھزاراں لوگ ءُ جاگہ سوچگ ءُ بلڈوزر کنگ بوتگ، ھزاراں وانگجاہ پاکستانی لشکر ءِ بنجل جوڑ کنگ بوتگ، پمیشکا مروچی سرجمیں بلوچستان ءُ بلوچ چاگرد ءِ دلبند ءَ آسے جمبور اِنت،مروچی بلوچستان پدمنتگی ءِ ھساب ءَ دنیا ءِ تہ ءَ اولی لمبر ءَ اِنت.

بلوچ چاگرد ءُ سرڈگار ءِ سر ءَ ھر روچ یک نوکیں زُرمبشے بنا بیت پرچاکہ اے بلوچ ءِ چاگرد ءِ مستریں بھر انت کہ ھرکس ھمے وڑیں جیڑھانی ھم روچ آماچ ءُ دیمپان بوان اِنت.
دگہ یک دردناکیں گپے ایش انت ھمے زوتاں تربت ءِ دمگ ڈنّک ءَ ڈنگاں یک بلوچے ءِ گس ءَ بیڑ برتگ ءُ بلوچ دودمان ءِ دود پروشتگ ءُ ملکناز نامیں بلوچ زالبولے شھید کتگ ءُ آئی ءِ کسانکیں جنک برمش بلوچ ءَ ٹپیگ اِش کتگ ،مروچی ھمے ویل ءَ تیوگیں بلوچستان ءِ کُنڈ ماں کُنڈاں سر کش اتگ،ھر نیمگ ءَ روانک ءُ نوکیں آشوبے چست کنگ بیتگ ،سرجمیں راج دگ ءُ پریس کلبانی دیم ءَ زھرشانی کنگ ءَ اِنت ءُ یکبرے پد ءَ چَہ پاکستان ءَ انساپ لوٹگ ءَ اَنت کہ ھمے دُز ءُ ڈنگاں بگر ءُ سزا بہ دے بلے مارا اے زانگ لوٹ اِیت اے دز ءُ ڈنگ دگہ کس نہ اِنت بلکیں ھمے پاکستان ءِ داشتگیں مردم اَنت.

اِد ء ما ھمے زانیں کہ برمش ءِ زرمبش ءَ بلوچستان ءَ نوکیں آشوبے ودی کتگ ھمے وڑ ءَ زرمبش ودان کنت داں ھما وھد ءَ بلوچستان ءِ تہ ءَ داں دز ءُ ڈنگ ھلاس کنگ مہ بنت

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی رد ءَ گوادر ءَ جناح ایونیو دگ ءَ الائیڈ بینک ءِ نزیک ءَ ناشناسیں سلاہ بندیں مردمانی تیرگواری ءَ چَہ دو مردم بیران بیتگ –

تیرگواری ءَ چَہ ناگمان وارڈ گوادر ءِ جھمنند دلمراد ء میا ھما دمان ءَ بیران بیتگ ءُ درمھمد ء مھمد ھسین پنام ءِ درو سک زدگ بیتگ ءُ چریشی ءَ پد آ جی ڈی ھسپتال ءَ برگ بیتگ ءُ اود ءَ آئی ءَ ساہ داتگ اَنت –

درمھمد ٹوباگ گوادر ءِ جھمنند اِنت ءُ تیرگواری ءِ سوب زانگ نہ بیتگ –

ھمے وڑ ءَ گوستگیں روچ ءَ چاگی امین آباد ءَ ناشناسیں سلاہ بندیں مردمانی تیرگواری ءَ ناسر مری بیران بیتگ-

لیویز ءِ رد ءَ ناسر وتی زمینانی سر ءَ کُشگ بیتگ ءُ کھول ءِ گوشگ اِنت مارا کسے ءِ گون ءَ دشمنی نیست اِنت –

نبشتانک: گوھارُک ءِ گیر

نبشتہ کار : سیپ بلوچ

دی بلوچستان پوسٹ

اما من وابْینگ آں من ءَ بوْاپین وتی زانسراں واپین داں واب بہ کَپ آں، مَرچی من ءَ سک دمبرتگ پاد هَنچوش درد کنگ ءَ اَنت کِہ پورھْیں جان ژنْد اِنت نوں دِل گوْشی تئی کُٹ ءَ چہ سَر ءَ دُور مہ کَن،
چُنت وهْد اِنت من ءَ کَسانی ءَ چہ رپتگاں وتی لوگ ءُ بانکیں گْوهاراں چہ دور وتی مَکهیں مات کبلھیں پِت دْرست یل کتگ اَنت پہ رُوز گار ءَ رپتگاں دُور ءُ درمُلک ءَ مَرچی مَن کار ءَ چہ موکل کتُگ اتکاں کَرپان ءَ نان وْارت ءُ سِگریٹے کش اِت ،پَد ءَ شُتاں کِہ وپساں کمبل پردات کنڈیشن چالو اَت، وْاب شُت آں واب ءِ تہ ءَ اَنچوش همے گِندگ ءَ اِتاں بِزاں کہ سر ءِ نزینک ءَ دِگہ سرجاهے همَ ایر اَت دست هما سر جاه ءِ سر ءَ ایر کُت ءُ واب شُتاں واب ءِ تہ ءَ همے گنداگ ءَ اِتاں کہ سُهب ءِ سر اَت من واب اِتاں من ءَ کستریں گْوهارک ءِ هست اَت ما هَر وهد ءَ سُهب ءِ سر ءَ وْاب کَپتگاں چاه ایر بوْتگ لوگ ءِ تہ ءَ آرام ئِے نہ اَتکگ گپ ئِے هم نَزانتگ کمو کمو گردگ ءِ نوک گردتکی سک اتگ اَت تراماس لوگ ءَ ایر بوتگ وهدے دیستگ ئِے دسترکوان گْوں ناناں گِِرّان کتُگ آورتگ، مَنی سرون ءَ ِایر کُتگ بَرے منی سر ءَ وَت ءَ دور داتگ ئِے بَرے کَمبل لیٹینتگ ئِے اتکگ بَگل ءَ وَپتگ برے سَر ءِ مِید چُِک اِتگ اَنت کہ پادا لالا لالا، نوک سِکگ ءَ اَت مَن کہ پادتکاں آ در شُت چہ لوگ ءَ وهدے کِہ مَن پاد اتکگاں جان ششتگ گڑا لوگ ءَ آدینک سر رند تِیل آوارتگ اَنت ئِے مَنی کر ءَ نشتگ انچو گْوں تَمیز ءَ هبر کُتگ برے گوں مَنی گوانکو ءَ دِلگوش بوتگ چاه من وْارتگ منی جامگ آوارتگ انچو مَن زانتگ منَی لاڑ زرّ ءِ واستا دِلمانگ اِنت من زر داتگ تْچاں بوتگ مات ءِ کر ءَ شُتگ کہ دکان بہ بر، مات ءَ چکے هَمراه کتگ راه دَاتگ دکان سَک وش اَت آ دور مَن وانگ ءَ اِتاں سهبانی سر ءَ شتگاں وانگ ءَ بیگاهاں شُتگاں کوچگاں شکار کتگ وتی راجی جهد هم برجم داشتگ اَت داں همے هیالاں اِتاں کہ سهب ءِ سر اَت واب ءِ تہ ءَ هِمے گندگ ءَ اِتاں کِہ کَستریں گوهارک اتکگ مَنی دست ءِ سر ءَ وپتگ دیمی گْوں مَن کتگ برے رشاں دَست جنت بَرے مِیداں گیپت دستے هچ نہ گیش اِیت من پچ لرزاِتاں جمیلہ ءُ جمیلہ هنچو توار جنگ اِتاں منی کِر ءِ وپتگیں سنگت چہ واب ءَ پاد اتکگ اَنت ءُ هیران اِتاں آھاں گوں پجیگ ءَ گوشت سَیپ تو مرچی گنوْک ئے یا زی تو زیاده کارکتگ دمبرتگ پد ءَ وابے دیستگ مَن چم پچ کت اَنت همے کرپان اِنت لیٹ روْک اِنت دْرست کارکنوک پاد اتکگ اَنت پَہ کار ءِ واستا مَن هنچو مرچی گمَین اِتاں گْوهارک مُدام چَمانی دیم ءَ زاهْر اَت دِل ءَ نَہ گْوشت کِہ کار بہ کَن آں بَس پَد ءَ هما دُور پَدمَنتگی بے وَسی لاچاری یَاد اَتک سک دمبرتگ اَت وانگ ءِ تہ ءَ چہ همے رٌوزگار لاچاری ءِ سَر ءَ کَپتگ اَت داں مَرچی مردم انچوش بس تچگ ءِ تہ ءَ اِنت مرچی مَن سَک دمْبرتگ اِتاں دل گْوش ایت یک دَراجَیں وابے بجن مات ءِ پاد ءِ سَر ءَ اما من اَنچو دَمبرتگ من ءَ لیلو بدے داں واب بہِ کَپاں مستریں گوهار نشتگ اَت گْوشت ئِے تو کسان ئے کِہ مات ءِ کٹ ءَ بوپس ئے مات ءَ کند اِت ءُبہ گوش ئے منی چک کے ءَ گشتگ مَزن اِنت مَنی چُک اَنگت منی هیال ءَ کسان اِنت
همد ءَ مات ءَ پنتے دات گْوشت چُکاں مَنی دل ءَ شُمے دْرستانی مانا یک اِنت
مات گپ ءَ اَت دْاں واب شُت آں مات ءِ پاد ءِ سر ءَ مات ءَ دست وتی منی سر ءِ سر ءَ دائم مُشت داں من سُد کت منی سر سرجاه ءِ سر ءَ ایر اِنت من بس واب گندگ ءَ بوتگ آں ۔۔۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچانی زِند ارزشت دارنت

ٹی بی پی شونگال

بوسٹن، بلیدہ، نیویارک، خاران، سیئٹل، شال، مینیسوٹا، تربت، ڈینور، خضدار اے لڑ دراج بیان بیت۔ اے شھر ءُ ایشانی نامانی نیام ءَ جھانانی دیری اِنت، کہ ایشانی تھ ءَ یک دومیگ ءَ جتائیں رنگ، نسل ءُ راجانی مردم جھمنند اَنت بلے پد ءَ ھم ایشانی تھ ءَ یک ھم پنتی ءِ ھَست کہ اے درست یک ترندیں زوراکی ءِ ھلاپ ءَ زھرشانی کنگ ءَ اَنت۔

وھدے رمس امریکہ ءِ شھر مینی پولس ءَ 25 اَت، آ وھد ءَ بلوچستان ءِ دمگ تُربت ءِ کسانیں میتگ ڈنک ءَ وھد دیم ءَ شُتگ اَت ءُ دیمی روچ بندات بیتگ اَت۔ شپ ءِ 2 بج ءَ یک ماتے کہ ملک ناز دُزی ءِ نیام ءَ کُشگ بیتگ اَت ءُ دومی نیمگ ءَ یک پِتے جارج فلائڈ سھب ءِ ھپت بج ءَ امریکہ ءِ پولیس ءَ کشتگ اَت۔ برمش بلوچ ءُ جینا فلائیڈ دوئیں یکیں وھد ءَ چورو کنگ بیت اَنت۔

دوئیں ملکانی تھ ءَ یکشلیں زھرشانی بندات بیت اَنت، یک نیمگے سیاہ فام امریکن ءُ دومی نیمگ ءَ ٹپی ئیں چورو بلوچ جنکو ءِ ھاتر ءَ انساپ ءِ لوٹ کنگ بیت۔ بلے اگاں اُرت چاری کنگ بہ بیت گُڑا اے دوئیں زھرشانیانی روتگ چہ اے ویلاں گیشتر پیسری اَنت۔

امریکہ ءَ سیاہ فامیں مردمانی 60 ءِ دھک ءِ “سول رائٹس موومنٹ” ءَ چہ پد ھم سرجم ءَ برابری نہ رس اِتگ، ءُ آیاں چاگرد ءِ ءُ نزام ءِ تھ ءَ ھمک نیمگ ءَ بدنسلی ءُ گیشیانی دیمپانی اِنت ۔ جارج فلائیڈ ءِ کوش ءَ زھر ءِ ھما تُستگیں آس پد ءَ بُن دات کہ مزنیں وھد ءِ چہ اے تلبداریں نزام ءِ سوب ءَ لاوا ءِ وڑ ءَ مردمانی تھ ءَ جوش گرگ ءَ بیتگ ۔

ھمے وڑ ءَ بلوچ گوستگیں ھپت دھکاں چہ پاکستان ءِ مھکمیں ءُ پشت مہ پشتیں زوراکیانی دیمپان اَنت، اے زوراکی ءُ پُریں اسپیتانی نیمگ ءَ چہ کنگ نہ بیگ ءَ اِنت، بلکیں پاکستانیانی نیمگ ءَ چہ برجاہ اِنت۔ ھما پاکستانی کہ امریکہ ءِ سیاہ فامانی زرمبش “ بلیک لائیو میٹرز” ءَ گوں وتی یکجائی ءَ پیش دارنت ءُ وتی پروپائل اکساں سیاہ کن اَنت، بلے آیاں بلوچستان ءَ بیوکیں کُشت ءُ ھون ءَ چہ ھچ پرک نہ کپ اِیت، ایشاں اسر نہ کپ اِیت کہ اگاں ایشانی اُستان ءِ سلاہ بندیں ٹولی ڈیتھ اسکواڈ یک بے میاریں زالبولیں بہ کُش اَنت۔

ڈیتھ اسکواڈ سرجمیں بلوچستان شنگ اِتگیں ھما سلاہ بندیں ٹولیاں گوشگ بیت، ھمایاں کہ گمانی اِنت کہ پاکستانی پوج ءُ چیریں گلاں سلاہ بند کُتگ اَنت ءُ ڈُبہ داتگ کہ آ ھمک آجوئی لوٹوک ءَ نشانگ بہ کن اَنت۔ ایشی ءِ مُز ءَ آیاں اے آجوئی دیگ بیتگ کہ دُزی ءُ ڈنگی بہ کن اَنت، منشیات ءِ کاروبار بہ کن اَنت یا سلاہ ءِکاروبار بہ کن اَنت، چیریں کانودار کنوکیں ترامگیج ایشاں دست نہ جن اَنت۔

پاکستان ءِ بنجاھی اسٹریم رسانکدراں ملک ناز ءُ بلوچستان ءَ ھپتگے ءَ بیوکیں یکشلیں زھرشانیانی سر ءَ یک ھالے ھم نہ داتگ۔ بلوچستان ءِ درستیں دمگ کہ بلوچانی کساس گیشتر اَنت آود ءَ یازدہ سالاں پد چُشیں مزنیں کساسے ءَ زھرشانی روانک ءُ زھرشانی گندگ ءَ اتکگ۔ زھرشانی کنوک اوگان جنان ءُ گوشگ ءَ اِت اَنت کہ “ نوں باز بیتگ” ءُ اے لوٹ کنگ ءَ اِت اَنت کہ پاکستان وتی اڈ کُتگیں ڈیتھ اسکواڈاں ھلاس بہ کنت، ءُ آیاں لُٹ ءُ پُل ءُ کُشت ءُ ھون ءِ دیگ بیتگیں آجوئی ھلاس کنگ بہ بیت ءُ دزگیر کنگ بہ بنت ۔

اے ویل ءِ ھال ءَ وتی اھوالانی تھ ءَ جاہ دیگ ءَ ابید پاکستان ءِ یک نامی ئیں رسانک گِس ئے ءَ ملک ناز ءِ ٹپی ئیں جنک برمش بلوچ زرتگ ءُ آئی ءَ “زھرہ شاہ” پیش داشتگ، یک دگہ چُکے کہ پاکستان ءِ شھر راولپنڈی ءَ لٹ ءُ کٹ کنگ ءُ کُشگ بیتگ اَت۔

بلوچانی درگت ءَ اے کچ ءَ نزانتکاری ءُ چم ترینگ اے جُست ءَ ودی کنت کہ ایشانی ھاتر ءَ راستی ءَ بلوچانی زند ءَ ارشت ءِ ھست ؟