کیچ ءَ پوج ءِ سر ءَ بیتگیں اُرش ءِ زمہ واری یو بی اے ءَ منّ اِتگ
دی بلوچستان پوسٹ
یونائیٹڈ بلوچ آرمی ءِ جارکش مزار بلوچ ءَ گْوشت کہ ھشت جون ءِ بیگاہ ءِ ساھت چار ءَ مئے سرمچاراں کیچ ءِ دمگ تگران، ھرکور ءِ ھند ءَ پاکستانی آرمی ءِ چیک پوسٹ ءِ بنجاھی سنگر ءِ سر ءَ ایل ایم جی ءَ سنائپر ءِ گون ءَ اُرش کرتگ، اُرش ءَ یک کارمندے مرتگ ءُ یکے زدگ بیتگ –
جارکش ءَ گْوشت مئے اُرش بلوچستان ءِ سرجمی ءِ آجوئی ءَ برجاہ مان اَنت –
نبشتانک: کولواہ ءِ گیشکور
نبشتہ کار: شاہ بلوچ شاہ
دی بلوچستان پوسٹ
کولواہ گیشکور منتِک آواران ءَ گوں سْیادی دار ایت بَلے چوناھا کولواہ ءِ جِند ءَ گیشکور گُش اَنت ءُ کولواہ ءَ کسانیں بازارے ھست ھمے بازار ءِ نام گیشکور انت ئِے۔ البت وھد ءُ زمانگاں گاڑی ءُ سواریانی دَگ ءُ کِشک ھمے گیشکور ءِ بوتگ کہ چَہ کراچی ءَ آتکگ اَنت ءُ دیم پہ کیچ، مند، گوادر تاں پسنی ءَ شُتگ اَنت۔
گیشکور ءِ توک ءَ 3 سے نامداریں مساپرجاھی مردم بوتگ نام اِش چو اِے وڑ ءَ اَنت ۔ پیر بکش اوٹل والا، امام بکش اوٹل والا، ھمزاہ اوٹل والا۔ اے سَےئیں مردم آ دَور ءُ زَمانگاں نامدار بوتگ اَنت چی ءَ کہ آ وھدی گاڈیانی دَگ ءَ ھمشانی وابجاہ بوتگ اَنت۔
وھدیکہ پرویز مشرپ آتک ءُ گوں وتی بلوکی شالاں چار اِت ئِے کہ کولواہ ءِ نامی ئیں روڈ ءُ جاھاں من چوں ولگوج بہ کن آں گُڑا آئی اورماڑ ءُ پسنی ءُ گوادر ءِ شھدگ ءِ ٹھینگ بِندات کُت ءُ تیار ئِے کُت۔ گاڑی ھما کپ ءَ روان بوت اَنت کہ دَگ پَک ءُ وش ات اِنت پمیشکا نی اِے کولواہ نوں پکوئیں دگ نیست ما رَو ایں ھنچو کم کم ءَ آبادی ءُ بے روزگاری بوت مردم واب اَت اَنت وزیر ءُ گَزیر وش اَت انت کہ کولواہ ءِ مردم ھمے وڑ ءَ شرّ اَنت اِد ءَ پکوئیں دَگ، لین، گیس، وانگ ءُ زانگ، جان سلامتی ءِ نادْرواھجاہ ھچ مہ بیت کہ باندا مئے واجاھانی کار ءُ بار بہ بیت منشیات ءُ کاچاکانی بازیں وھدے ءَ شراب ءُ تریاک ءُ ایروین دگہ بازیں موادانی یک اڈایے جوڑ بوت مھلوک ھمیشانی پاسداری ءَ کنگ ءَ ات انت۔
کولواہ گیشکور سک باز مزن ءُ پِراہ ءُ شھگان اِنت ءُ آئی پَٹ ءُ میدان، آئی مُلک ءُ کیلگ سک نام دار اَنت وھدیکہ مردم پہ جوپاگ ءُ مال ءُ دلوتانی چرگ ءَ آتکگ اَنت گُڑا بلوچستان ءِ ھر کُنڈّ ءَ کولواہ نام دار بوتگ
کولواہ ءِ ھر ھَند ءُ دَمگ ءَ آپانی چکول، کانی، جُو ، بُنزاہ، پیش ءُ دار مَچکدگ دَرچکی بَر، کُنر، کونَر، کَسوڈ، انجیر، کلیر، جُگور دگہ بازیں ابرمی میوا ءُ نیبگ ھم باز بوتگ بلے ڈُکالانی کپگ ءَ رند چندیں بدیں وھد ءُ زمانگے کَیت گُڑا درچک ءُ دار مال ءُ دلوت کِشت ءُ کِشار مُرت ءُ ھُشک ئِے کُرت اَنت۔ پد ءَ مردماں وتی وس ءُ واک ءَ مشین ءُ جرنیٹر زمینانی سر ءَ کڈاتگ ءُ جتگ اَنت کہ ما گلہ ءُ پیماز لَگوش کٹگ دگہ کاھک (سبزی) کِشت ءُ کِشار کن ایں پہ وتی لاپ ءِ ھاتر ءَ ھمے کار ءَ کن ایں دانکہ مئے وھد پہ ساکِمی بہ گوز ایت دیمتر ءَ ھُدا مالکےِ۔
نوں باز جاہ گریب ءُ نِیزگاریں مردمانی وس ءُ واک ءَ نہ انت کہ ڈیزل پہ زّر ، ٹکٹر پہ زّر منڈی نیست ھر وڑ ءَ مئے بلوچ راج بزگ ءُ وار انت گِراک کاینت گریبانی مال، دان ءُ دگہ ازباباں پہ کم نیادی بَر اَنت۔ مرچی ھمے نامی ئیں کولواہ کہ گژن ءِ آماچ اِنت اود ءَ ھچ نیست ناں کہ سیاسی رزاکار نیکہ سیول سوسائسٹی نیکہ دگہ سرپرستے ءُ رھشونے ھست انت ئِے ۔
وانگجاہ ءُ نادرواھجاہ، شھدربرجاہ وَ دوریں گپے مئے نوجوان زمباد ءُ گاڈیانی ڈرائیور کلینٹر اَنت وانگی آسراتی نیست اپسوز کہ گیشگور بے واجہ ءُ بے پردگ اِنت میر ءُ واجہ کاینت اووٹاں گر اَنت ءُ رو اَنت وتی جاہ وش کن اَنت بلے راج پہ بزگی ءَ زند گوازئینگ ءَ اِنت
دوھزار سیزداہ ءَ یک زمین جُمبے اَتک چاریں آتراپاں یک پوجی لشکرے اِیررِتکگ ءُ مھلوک ئِے تُرس ءِ اَماچ کت۔ زمین جاگہ یلہ دات ءُ پہ دیم شُت اَنت کہ مارا کوش اَنت ایشاں چوشیں نہ دیستگ اَت پد ءَ یک جنگی جارے گوں سرمچاراں چلگ ءَ اَت ۔ پُروشت ءُ پُروش اَت لشکر ءِ “گِیشکور کوکواہ ءِ دَمگ ءَ بازیں کَچے ءَ مھلوک شھید بوت ءُ شُت”
گُڑا ھمے سبب ءَ بازیں مَردُم دیم پہ کراچی ءُ تربت ءُ دگہ شھراں شُت اَنت بلے گریب ءُ نیزگاریں مردماں دگہ جاھاں شُت نہ کرت بلکیں نیشتگ اَنت کہ دگہ روگ ءِ راہ اِش نیستگ اَت۔
گیشگور کولواہ ءِ جاگھانی نام:- اَشال، ڈنڈار، مادگ ءِ کلات، ھُور، سِھر، رودکان، بدولک، جَت، پارگ، سِکگ، چوٹین، شندی، کُنری، کرکی، کِنیچی، پِٹوک، مادگ، دودَر، گزی سُنڈم، زیک، مالار، بُزداد، وھلی، سیھڈی، کوچکی، کانڈاری، اوٹان، سوکال، مرہ شم ، کلیڑزی، مالارکُنری، سامان ڈّن، بانی، ریکچائی، گندَچائی ءُ آچوگی بُٹ
اے گیشگور ءِ بُرزی ءُ جھلی دمگانی نام اَنت کولواہ ءِ میتگانی نام بلکیں سکباز اَنت من نبشتہ کُت نہ کن اَن اش بلے ایشانی سر گوں گیشکور اِنت مرچی اے بلاھیں جاگہ ءَ یک وانگجاھے ھم نیست نادْرھجاھے نیست دْراھیں مھلوک پہ بزگی ءَ کولواہ ءِ تہ ءَ نشتگ انت۔ بِر ھال ھُدا وت اِنت کہ راھے پہ بلوچ لس مھلوک ءَ دربگیج ایت۔
بلوچ ءُ بلوچِستان سبزءُ میزران بات- شالا انچوش بات۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
کورونا ءِ سوب ءَ بلوچستان ءَ یک روچے ءَ ھپت مردم بیران بیتگ ءُ 243 نوکیں کیس دیم ءَ اَتکگ اَنت ۔
دی بلوچستان پوسٹ
بلوچستان ءِ یازدہ دمگانی تھ ءَ کورونا وائرس ءِ 243 کیس دیم ءَ آیگ ءَ پد بلوچستان ءَ کووڈ 19 ءِ کیسانی کساس 7 ھزار 31 ءَ سر بیتگ ءُ 7 مردم چہ اے نادراھی ءِ سوب ءَ بیران بیگ ءَ پد سرجمیں بیران بیتگیں مردمانی کساس 62 ءَ سر بیتگ۔
بلوچستان ءِ جانسلامتی ترامگیج ءِ جارکش وسیم بیگ ءِ رد ءَ بلوچستان ءَ 243 نوکیں نادراہ دیم ءَ اتکگ کہ ایشی ءَ پد اُستان ءِ سان گپتگیں مردمانی سرجمیں کساس 7ھزار 31 ءَ سربیتگ، گوستگیں روچ ءَ 7 مردم چہ اے نادراھی ءِ سوب ءَ بیران بیتگ چہ ایشی ءِ سوب ءَ اُستان ءَ سرجمیں بیران بیتگیں مردمانی کساس 62 ءَ سر بیتگ وھدیکہ 57 انچیں مردم ھم بیران بیتگ کہ آیانی سر ءَ کورونا ءِ گمان بیتگ۔
جانسلامتی ترامگیج ءِ رد ءَ اُستانی سرکار مزن شھر ش ءَ 83درسد قلعہ عبداللہ ءَ 2 درسد پشتین ءَ 2 درسد مستونگ ءَ 1.7 درسد لسبیلہ ءَ 1 ءُ قلعہ سیف اللہ ءَ یک درسد مردم کرونا وائرس ءِ آماچ بیتگ اَنت جانسلامتی ترامگیج ءِ ردءَ بلوچستان ءَ 54 درسد مردمانی تھ ءَ کرونا ایکٹیو 34 درسد مردم وش بیتگ اَنت وھدءِ 2 درسد مردم بیران بیتگ اَنت۔
اے وھد ءَ بلوچستان ءَ 19 سد مردم جتاھیں قرنطینہ سینٹرانی تھءَ کورنٹائن( تھنائی) ءَ اَنت کہ ایشانی تھءَ تفتان ءَ 266, جعفر آباد ءَ 518, پشین ءَ 290، قلعہ سیف اللہ ءَ 135, لسبیلہ ءَ 204 ءُ صحبت پور ءَ 55 مردم است اِنت۔
سر بیتگیں ھالانی رد ءَ کیچ ءِ ھنکین بالگتر ءَ چیری گڈگی ءَ چہ پاکستانی پوج ءِ دست ءَ بیگواہ بیتگیں مردمانی کھول پوجی کیمپ ءِ دیم ءَ زھر شانی کنگ ءَ اَنت۔
دی بلوچستان پوسٹ
ھمے درگت ءَ بلوچ نیشنل موومنٹ ءِ بنجاھی انفارمیشن سیکریٹری دلمراد بلوچ ءَ چاگردی رسانکدرانی تند جاہ ءَ وتی یک درشانے ءِ تھ ءَ گوشتگ کہ مروچی بالگتر گُڈگی ءَ چہ دو ھکی ئین براتاں ھوار چار مردم پوج ءَ دزگیر کُتگ ءُ نزیکیں کیمپ ءَ بُرتگ اَنت۔
آئی ءَ گوشتگ کہ اے ورنایانی تھ ءَ پارٹی نمیرانیں رھشون میر سپاھان ءِ دو ورنائیں بچ زمان جان ءُ ماجد جان ءَ ھوار ھمے کھول ءِ دگہ دو ورناہ ابوالحسن ء رھمت ءُ اھساب ء ھلیل جھمنند سری گڈگی بالگتر ھوار اَنت۔
دلمراد بلوچ ءِ ردءَ میر سپاھان گڈگی ءِ جھمنند بیتگ ءُ زور لڈارینگ ءِ آماچ بیتگ ءُ کولواہ ءِ ھنکین ناگ ءَ شُتگ ءُ کولواہ ءَ بزگی جاوارانی تھءَ پوج ءَ یک بیڑ ے ءِ تھ ءَ اے بے میاریں مردم نمیران کُتگ۔
آئی ءَ دیمترا گُوشتگ اے ورنایانی دزگیری ءُ بیگواھی ءِ ھلاپ ءَ بالگتر ءِ مردمانی مزنیں کساسے ءَ پوجی کیمپ ءِ دیم ءَ نشتگ ءُ زھرشانی کنگ ءَ اَنت ایشانی تھ ءَ مزنیں کساسے ءَ جنین آدمانی اِنت، چہ پوج ءِ نیمگ ءَ بیھار ءُ ترسارینگ ءَ پد ھم مردماں چہ پاد آیگ ءَ مکن کُتگ ۔
ھمے درگت چاگردی رسانکدر ءِ تندجاہ ٹوئیٹر ءَ ماما کدیر ءَ وتی ٹوئیٹے ءِتھ ءَ گوشتگ کہ یک نیمگیں پاکستانی پوج ءُ آئی ءِ مردم کوشیں ٹولی ڈیتھ اسکواڈ ءِ ناشرکاریانی ھلاپ ءَ بلوچ دمگاں ھوار سرجمیں پاکستان زھرشانی کنگ ءَ اِنت ءُ دومی نیمگ ءَ پوج وتی زوراکیانی تھ ءَ گیشی آرگ ءَ اِنت۔
ماما کدیر ءَ دیم ءَ گوشتگ کہ بالگتر ءِ میتگ سری گڈگی ءَ چہ زمان جان ء سپاخان، ماجد ء سپاخان، ابو الحسن ء رحمت ءُ احساب ء خلیل مرچی سھب ءَ بیگواہ کنگ بیتگ اَنت۔
زانگ بہ بیت بلوچستان ءَ جتاھیں ھند ءُ دمگاں چہ ھمک روچی ھساب ءَ مردمانی بیگواھی ءِ ھال دیما کائینت بلے بلوچستان ءَ رسانکدرانی سرا بندش ءُ پاکستانی رسانک ءِ بلوچ جیڑہ ءَ اندیم کنگ ءِ سوب ءَ بیگواھیں مردمانی جیڑہ ھم بیگواھیں مردمانی گار بنت۔
تربت ءَ ناوشیں ویل ءِ ھلاپ ءَ سرجمیں بلوچستان ءَ زھرشانیانی درچ برجاہ اَنت – برمش یکجھتی کمیٹی ءِ نیمگ ءَ مروچی کلات، نوشکی ءُ نال ءَ زھرشانی کنگ بیتگ –
سَے شمبے ءِ روچ ءَ نال بوائز ھائی اسکول ءَ یک زھرشانی روانکے دراتکگ کہ بازار ءِ جتائیں جاھاں گوزان بیتگ ءُ بنجاھی چار راھے سر ءَ مُچ بیتگ ءُ زھرشانی کنوکاں ویل ایر جتگ ءُ سرکار ءِ سر ءَ ترندی ءَ ایراد گپتگ –
زھرشانی کنوکاں ڈنک ویل ءِ مجرمانی سزا دیگ ءِ ھمراھی ءَ سرجمیں بلوچستان ءَ ڈیتھ اسکواڈ ءِ ھلاسی ءِ لوٹ کرتگ –
برمش یکجھتی کمیٹی ءِ نیمگ ءَ کلات ءَ ویل ءِ ھلاپ ءَ زھرشانی بیتگ – زھرشانی ءَ نودربر ءُ چاگردی مھلوک ءَ بھر زرتگ –
سرجمیں بلوچستان ءَ گوستگیں دو ھپتگانی تہ ءَ مھلوک ءِ نیمگ ءَ زھرشانی درچ یکشل ءَ برجاہ اَنت – برمش یکجھتی کمیٹی ءِ نیمگ ءَ یورپی ڈیھاں ویل ءِ ھلاپ ءَ ھم زھرشانیانی جار پرینگ بیتگ اَنت –
ویل ءِ ھلاپ ءَ نوشکی ءَ برمش یکجھتی کمیٹی ءِ نیمگ ءَ یک زھرشانی روانکے کشگ بیتگ کہ پریس کلب ءِ دیم ءَ مُچ بیتگ –
نوشکی ءَ زھرشانی کنوکاں بلوچستان ءُ سرکار ءُ بنجاھی سرکار ءَ چَہ دزبندی کرت ءُ گْوشتگ کہ برمش بلوچ ءَ موزگیری دیگ بہ بیت –
آیاں گْوشت کہ پیسر ءَ بلوچ ورناہ بیگواہ کنگ ءُ پد ءَ لاشانی دزکپگ چریشاں پد شھرانی تہ ءَ تیرانی آماچی ءَ مھلوک نشانگ ءُ نی لوگانی تہ ءَ مانریچگ ءُ زالبول ءُ چُکاں نشانگ کنگ ءَ اَنت –
چریشاں ہد بلوچستان نیشنل پاٹی ءِ نیمگ ءَ ویل ءِ ھلاپ ءَ بنجاھی جار ءِ پد ءَ میر گل ھان نسیر ءِ چار راہ ءَ نندانک جنگ بیتگ –
بلوچستان ءِ دگہ ھند ءُ دمگاں ھم زھرشانی جار پِرینگ بیتگ اَنت –
نبشتانک: برمش اَرسیگیں گُلزمین اِنت
نبشتہ کار: سیپ بلوچ
دی بلوچستان پوسٹ
برمش تو مرچی وتی نام ءَ گوں نمیرانیں راجے پاد کتگ دیم پہ آشوبی مستاگے ءِ درشم ءَ کہ انچوش! برمش تو ارسیگ ئے چنت وهد اِنت کہ بلوچستان هم اَرسیگ اِنت، هَمے ریاستی زرپرستانی وجہ ءَ چہ وتی برات ءِ هونانی تُنگیں ءُ تو بجن من جناں بس تماشا انت جونانی بلے،
انچش کہ ھمے دُز ءُ دلاراں بانُکیں برمش اِش وتی بِے زمیری ءَگوں بے تاهیر اِش کت، وهدے کہ راجی باوست کاینت گڑا ما هاموش بہ ایں کہ مرچی پلاں جاه ءَ لوگے ماندارگ بوتگ ،پلاں جاه ءَ ماتے ارسگیں کنگ بوتگ بلے مئے راج ءِ گنگی ءَ یک کسهے گلامی ءِ دیم ءَ آؤرتگ اگاں ما اے وڑ ءَ بے توار بہ بہ ایں گڑا بازیں برمشے چورہ کنگ بیت.
برمش ءُ برمش ءِ مکهیں مادر ءَ یک کسهے دیم ءَ پدر کتگ کہ مرچی دنیا ءِ دیم ءَ اوشتاتگ بلے چیزے مردم دَمگی هست انت کہ بے تاهیر انت بلے برمش ءِ توار آیانی هم گْوش ءَ الم کپ ایت آ هم الم در کاینت پرچا کہ برمش بے برمش نہ بیت.
برمش تئی توار ءَ ماں جهان ءَ سر بیت داں اَرش ءُ کُرش ءَ اے هبر ءَ ما مَنّوک بنت کہ ترا تئی مکهیں مادر ءِ مهرانی مواد نہ رس ایت بلے همایاں کہ برمش بے برمش کتگ آیاں الم انت کہ رب العالمین بے تاهیر کنت الم مئے بلوچانی مرچیں مُچّی ءُ زھرشانیاں انچش پدر بیت کہ زندگیں کوم ءِ نام بوتگ بلوچ ،مرچی برمش جان تئی توار ءَ رُمبیتگ اَنت اے گرانیں جاوراں ءُ گرمی ءِ ساهتاں گوں تو هم کُوپگ انت تئی توار ءَ پہ دگنیا ءِ دیم ءَ پدر کنگ ءَ انت کہ تئی مهرمیں مادر ءَ پہ تو وتی جان ندر کتگ.
اگہ انسان ءُ انسانیت درست یک جاه بہ بنت ءُ انچش وتی توار ءَ راجی ءِ باوستانی دیم ءَ پدر بہ کن انت الم انت کہ مئے دگہ برمشے بے برمش کنگ نہ بیت نوں درست سرپد ءُ زانگ ءَ انت کہ تیر چہ کُج ءَ لگگ ءَ اَنت؟ هون چہ کُج ءَ در پیداک انت؟
اگاں ما بلوچ درست وتی هِمّت ءَ گوں یکدست ءُ هم مشت بہ بہ ایں الم مئے اَرسگیں گلزمین ءَ هم برمشے تاهیر زوریت ءُ نوکیں یک روشنائیں بانداتے کیت ءُ رودم بیت.
برمش بلوچستان اِنت
برمش مات اِنت
برمش گلزمین اِنت
برمش وتن اِنت
برمش ارسگیں گلدان اِنت
برمش روشنائی چراگ اِنت
برمش اے یک گرانیں ساهتے پہ تئی رِتکگیں ارساں کہ گلزمین ءِ دلبند ءَ چو رز ءِ چولانی درشم ءَگلزمین ءَ وتی چادر ءَ پہ ارسیگیں چمے چیرگیج کُتگ کہ تئی ارس یک روشنائی یے کار ایت ءُ راجے سهڑین ایت بلے زندمان ءَ یک نوکیں هیالے ءِ ارزشت زور ایت الم تئی مادر ءِ هون پل رودین اَنت ءُ ارسیگیں بلوچستان ءَ پہ یک مستاگے کار ایت برمش جان..
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت
پوج ءِ دست ءَ چار ورناہ دزگیری ءَ پد بیگواہ-
دی بلوچستان پوسٹ
دی بلوچستان پوسٹ پترھال ءَ سر بیتگیں ھالانی رد ءَ بلوچستان ءِ دمگ کیچ ءَ پاکستانی پوج ءَ یک لوگے ءَ بیڑ برتگ ءُ چار ورنا دزگیر کرتگ ءُ ناشناسیں زنداناں برتگ اَنت –
مروچی سھب ءَ پاکستانی پوج ءَ بالگتر ءِ دمگ سری گڈگی ءَ زمان ء سپا ھان، ماجد ء سپا ھان، ابولھسن ء رھمت ءُ اھساب ء ھلیل دزگیر کرتگ ءُ گوں وت برتگ اَنت –
ھالانی تہ ءَ گْوشگ بیتگ کہ دمگی مھتر کماش پوج ءِ بنجل ءَ شتگ اَنت ءُ ورنایانی یلہ کنگے دزبندی کرتگ ءُ بلے پوج ءَ اے ورنایانی دزگیری نہ منّ اِتگ –
زانگ بہ بیت پیش ءَ ھم بلوچستان ءِ جتائیں ھند ءُ دمگاں بازیں مردمے گار ءُ بیگواہ اِنت، دومی نیمگ ءَ شال ءَ وائس فار بلوچ مسنگ پرسنز ءِ زھرشانی برجاہ اِنت ءُ آیانی لوٹ اِنت کہ بیگواھیں مردم آمدگس ءَ پیش کنگ بہ بنت –
نبشتانک: مُچی ءِ ندارگ
نبشتہ کار: سکی ساوڑ
دی بلوچستان پوسٹ
من سھب ءَ چَہ واب ءَ پاد آھت آں، جانے شُشت، چاہ ءِ نشہ چو سگریٹ ءِ وڑ ءَ بیوار کنگ ءَ اَت، پد ءَ بازار ءِ گردگ ءُ شرنگیں کاڑانی چارگ ءُ دیوان کنگ ءِ ھم تلب بوگ ءَ اَت ، چاھے اَڈّ کرتگ ءُ وارت، وتی بان کُبل کرت ءُ دیم پہ بازار ءِ نیمگ ءَ رھادگ بوت آں، داں یک دگے ءِ سر ءَ مُچی یے گندگ بوت کہ یک کاڑے ءَ وتی گُشان سر ءَ اَت ، ھمے مُچی ءِ تہ ءَ اوشتاگ اَت ءُ گوں رسانکداراں گپ ءَ اَت، بلے آئی ءِ گپ منی اے کرّیں گوشاں کپگ ءَ نہ اِت اَنت بلے کوریں چم کمو گندگ ءَ اِت اَنت کہ یکے ءَ را دو اکس دست ءَ اَت ،برے اکس ءِ چارگ ءَ اَت ءُ برے گوں رسانکداراں دلگوش اَت، من گوں وتی تُنّیگیں بالاد ءَ ھمے مچی ءِ نیمگ ءَ روان اِت آں برے یک ھیالے پیداک اَت بلے نوں تُنّ ءِ جاہ ءَ وتسر ءَ وت ترسے ودی بوان اَت باریں چونیں مچی یے کہ اد ءَ گندگ بوگ ءَ اِنت، بلے پد ءَ دل ءَ گْوشت” ترا چِہ کار اِنت کہ وت ءَ ازابانی دیمپان کن ئے، تو پرچا گنوکی کنگ ءَ ئے؟ اے جیڑہ تئی نہ اِنت بلکیں اے جیڑہ ھماوانی جند ئیگ اِنت ءُ تو پرچا مپت ء ھدا ءَ وت ءَ پالومپے گُٹ ءَ دے ئے؟ یکبرے وتی تُنّ ءِ ھیال ءَ بدار پد ءَ بیا مُچی ءِ ھال ءَ بگر، دگہ ھم ترا گپے گْوش آں چوش کن تو یکبرے وتی گِس ءِ مردمانی ھیال ءَ بو بھتاور اگاں تو ایشانی کرّ ءَ شُت ئے کہ پرچا مُچ اَنت؟ بوت کنت جنگے بوگ ءَ اِنت ، تو وت ءَ پرچا لگت ءُ مُشتے وارین ئے اللہ مہ کنت تیرگْواری یے بہ بیت ءُ تیرے تئی دلبند ءَ بہ لگ اِیت تو بہ مِر ئے گڑا تئی گِس والا گنوک نہ بنت؟ منی ھبر ءَ زور ئے گاماں دو گام مہ کن”.
مُچی ءِ چاریں آتراپاں سِلاہ بندیں مردم ھم گندگ بوگ ءَ اِت اَنت، دَگ ءِ سر ءَ گاڑی ءُ مردم رو ءُ آ کنگ ءَ اِت اَنت، بلے کسے ءِ ھیال گوں اے مچی ءَ نہ اَت انچوش سما بوگ ءَ اَت کہ مردم چو منیگ ءَ کَر ءُ کور اَنت کہ ھچ میم کنگ ءَ نہ اَنت ،انچوش سما بوگ ءَ اَت درست کَرّ ءُ کورانی وڑ ءَ روگ ءَ اَنت، لھتیں مردمے دکانانی دپ ءَ اوشتاتگ اَت ءُ لھتیں مردم ءَ سَودائی گپتگ اَت ءُ روگ ءَ اِت اَنت، دگہ مردے گوں دو زھگ ءُ جنینے ءَ چَہ گاڑی یے ءَ ایر کپت ءُ کندان ءَ ھمے مزنیں دکان ءِ تہ ءَ پُترت ، من ھمے ندارگانی چارگ ءَ اِت آں، پد ءَ من ءَ ھمے ھیال آھت اے دل مدام مکن کنگ ءَ جاڑی اِنت، من چار اِت اے دل مکن کنگ ءَ اِنت، من یکبرے وتی گام اوشت ءِ آماچ کرت اَنت ءُ یک کِرّے ءَ اوشتات آں داں چَہ کسے ءَ ھمے جُست ءَ بگر آں ءُ پکا بہ کن آں کہ جیڑہ ءِ جند چے اِنت ؟مھلوک پرچا دگانی سر ءَ اوشتاتگ اَنت؟ ھمے وھد ءَ منی کَش ءَ یکے ءَ وتی دومی ھمراہ ءَ را گْوشت ” یار مروچی دگہ لھتیں شرّنگ آھتگ،بلے لھتین ءَ وتی دیم بَستگ نوں زانگ نہ بنت کہ سک شرنگ اَنت یا ناں، پد ءَ ھم اللہ ءِ شگر اِنت لھتیں شرّنگ ءَ وتی دیم ءَ پَچ کرتگ، روچ پہ روچ وڑ پہ وڑیں شرنگ اد ءَ گندگ بوگ ءَ اِنت، پیسر ءَ ما اے شرنگ اد ءَ نہ دیستگ اَنت اے مئے وشبھتی اِنت کہ مروچی ما ایشانی دیدارے کرت کن ایں چے گْوش ئے تو انچوش نہ اِنت”؟
آئی ءِ سنگت ءَ ھندگے جَت ءُ گْوشت” تئی گپ کدی دروگ بوت کن اَنت کہ مروچی بنت؟ تئی گپ منی گپ اَنت بزاں منی ءُ تئی سوچ یک اِنت ، بازار ءَ اے وڑیں شرنگ باز اِنت بلے مئے دل چَہ آواں شُتگ”.
من ھم زانت کہ اے منی وڑیں تُنیگ اَنت،ھمے وھد ءَ آوانی ھندگ برز بوت اَنت ، من چَہ کسے ءَ جُست نہ کرت ءُ ھمے مُچی ءِ نیمگ ءَ جنز اِت آں دانکہ وت برو آں ءُ جیڑہ ءَ سرپد بہ باں بلے دل ءَ پد ءَ مکن کنگ ءَ بنا کرت ، اے رندی من آئی ءَ را موہ نہ دات ءُ مچی ءِ تہ ءَ وت ءَ را سر کرت داں اے مُچی ءَ دگہ کُشت ءُ کوشے گندگ بوگ ءَ نہ اَت بس لھتیں زالبول ءُ لھتیں ورنا ءُ کماش ءَ را اکس دست ءَ اَت ءُ ھمے لوٹ ءَ کنگ ءَ اِت اَنت” مئے بیگواھیں مردماں دیم ءَ بیار اِت ھر گناھے اِش کرتگ آواں ماں ھامیدگِس ءَ بیار اِت ءُ سزا بہ دے اِت اِش بلے سالانی سال بیگواہ اِش مہ کن اِت”.
من چار اِت کُشت ءُ کوش یا جَنگ ءُ چوپ نیست من ھم آوانی ھمراھی ءَ توار چِست کرت، پد ءَ من ءَ ملکناز ءِ گپ یاد آھت کہ گْوشتگ اِت ئِے” اد ءَ تو ھک ءِ گپ جت ، ھراب ءَ ھراب گْوشت یا تو دزانی دیم ءَ اوشتات ئے گڑا الّم تیر تئی سِینگ ءَ سُمب اَنت”.
من ھمے وھد ءَ یکبرے پد ءَ ترس ءِ آماچ بوت آں ءُ جیڑگ ءَ لگ اِت آں ایش اِنت ناں وت ءَ پسّینت،اے بابُل تئی جیڑہ نہ اِنت پرچا نا سرپدی کنگ ءَ ئے؟ ھمے وھد ءَ دل ءَ گْوشت بزگ کمو دیم ءَ روان کن دگہ چے بوگ ءَ اِنت ءُ موھے پَٹ وتی جان ءَ کَش، من اوگام (نعرہ) جَنَگ ءَ بند کرت چو مہ بیت اے بیگواہ بوتگیں مردم اوگام ( نعرہ )والا بہ بنت مروچی ھمے اوگام جَنَگ ءِ پُشت ءَ بیگواہ بوتگ اَنت ءُ آوانی مردم دگانی باھوٹ اَنت، بیزار چَہ دگہ کَٹّ ءَ جند اِت بیگواہ مہ بیت، من پہ ترس ءُ لرز یک پہ یک ءَ ھمے مردمانی چارگ ءَ لگ اِت آں باریں چِہ کَس اَنت! من مچی ءِ تہ ءَ روان اِت آں نا اود ءَ ھدا ءَ گندگ بوگ ءَ اَت ءُ نا آئی ءِ ولی، نوں من زانت ھُدا ءُ آئی ءِ ولی بیگواھی ءِ ترس ءَ نیاتکگ اَنت، ھمے وھد ءَ من دیست داں یک ماسے ءَ را اکسے دست ءَ اَت ءُ گپ کنگ ءَ اَت کہ ھمے گپ ءِ وھد ءَ چُوڑ بوت، کپت ءُ بے سما بوت، مردماں آئی ءَ را آپ جت ءُ پد ءَ وتی سما ءَ آھت، من یک اکسے کَش اِت ،دل ءَ گْوشت (سِلفی یے) ھم بگر گڑا من (سلفی یے )ھم کَش اِت داں مردم بزان اَنت من شمے دردوار آں، مچی ءِ کَش ءَ ھما بانک گندگ بوگ ءَ اَت کہ گوں رسانکدار ءَ گپ ءَ اَت من ھمائی ءِ کرّ ءَ شُت آں بلے نوں منی گوشاں آئی ءِ گپ ءُ گریوگ آیگ ءَ اِت اَنت من چار اِت داں آئی ءِ ارس چَہ انارکانی سر ءَ تچان ءُ زمین ءِ دلبند ءَ کپان اِت اَنت، زمین بزگ گَل اَت کہ مروچی منی تُن پروشگ بوگ ءَ اِنت، آئی ءَ گریت ءُ گپ جت ،من آئی ءَ شری ءِ سر ءَ گوش داشت داں آ گْوشگ ءَ اَت کہ پیسر ءَ ھم منی براسے شھید کنگ بوتگ ءُ نوں منی دگہ دو براس برگ بوتگ، وھدے من اے گپ اِشکرت اَنت گُڑا من ءَ وتی گھار یاد آھت اَنت، ھمے وھد ءَ من ءَ وتی دل ءِ گپ یاد آھت واکی اڑے دل ءَ راست گْوشتگ منی چِہ کار کہ من وت ءَ دست ء وت بہ پسّین آں،اگاں مروچی تو اد ءَ آھتگ ئے بِلّے تو توار چِست کنگ ءَ نہ ئے ءُ ندارگ چارگ ءَ ئے پد ءَ اکس کَشگ ءَ ئے بَلے گپ اِیش اِنت اے زمانگ ھراب اِنت چو مہ بیت کہ تئی جند بیگواہ بہ بیت ،پد ءَ تئی گھار دگانی باھوٹ بہ بنت ءُ مچی ءِ یک مردمے گیش بہ بیت، من زوت زوت ءَ ھمے مچی ءِ اکس وتی گوانکو ءِ تہ ءَ چَہ کور کرت اَنت ءُ چَہ مچی ءَ دَر آھت آں دیم پہ تُنّ پروش جاہ ءِ نیمگ ءَ روان ءُ چک جنان اِت آں چو مہ بیت کہ من ءَ یکے بہ گند اِیت ءُ بیگواہ بہ کنت کہ تو پرچا مچی ءَ ھوار بوتگ ئے؟ پد ءَ دومی ترس ایش اَت کہ من ءَ وتی گھار دگانی سر ءَ پہ اے وڑی ءَ دل نہ بوگ ءَ اِت اَنت کہ باندا منی رَدی ءِ پُشت ءَ دگانی باھوٹ بہ بنت پرچاکہ اے منی جیڑہ نہ اِنت، من روان اِت آں بلے نہ زان آں ھمے پریاتانی توار پرچا انگت منی گوشانی تہ ءَ جکسگ ءَ اِت اَنت، من گُڈی رَند ءَ چَک جت داں مچی برجاہ اَت ءُ اکس گندگ بوگ ءَ اِت اَنت وھدے من وتی دیم ترینت داں گاڑی یے ءَ چار سِلاہ بندیں مردم ءَ دَور کرت ءُ منی دیم ءَ اوشتات اَنت.
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
نبشتانک: نمیرانیں بابا ھیر بکش مری
نبشتہ کار: راھشون بلوچ
دی بلوچستان پوسٹ
بلوچستان ءِ سر زمین ءَ بازیں پر آشوبیں راج دوست ءُ مڑاھداریں بامرد پیداک کرتگ چہ آیاں یکے نمیرانیں نواب ھیر بکش مریاِنت،نواب ھیر بکش مری 29 (فروری) 1928 ءَ ماں کوھلو کاھان ءَ واجہ مھر اللہ مری ءِ لوگ ءَ وتی چم پچ کرت انت ۔آئی ءِ پتءَ ھیر بکش ءِ نام پہ اے تمردیں چک ءَ ایر کت چوناھا ھیر بکش مھر اللہ ءِ پت ءِ نام بوتگ ءُ چہ ھیر بکش اول ءَ زانگ بیت ءُ اےزانگ المی اِنت، ھیر بکش اول ءَ نوزدھمی کرن ءَ گوں پرنگیاں جنگ کرتگ ءُ آیانی گلامی داں مرگ نہ منتگ ءُ کدی آیانی ملام ءُ کینگاںچو ایندگہ سردارانی ڈول ءَ نہ کپتگ ءُ ھمے ڈولیں کرد آئی ءِ نماسگ ءُ مھراللہ ءِ چک ھیر بکش مری ءَ اوں مان بنت، بلوچ راجی سروکواجہ ھیر بکش مری ءَ وتی بنداتی وانگ چہ کوھلو کاھان ءَ بنا کُرت ءُ پد ءَ کوئٹہ ءَ گرائمر اسکول ءَ داکل بوت ءُ چد ءُ رند پہ گیشیں وانگءُ زانگ ءِ ھاتر ءَ ایچی سن (چیف) کالج لاھور ءَ وتی وانگ ئِے برجاہ داشت اے 1941وھد ات کہ ماں ایچی سن کالج ءَ نواب اکبربگٹی،سردار شیر باز ھان مری،مرھوم نواز اھمد بگٹی اوں وانگ ءَ اِت اَنت۔باباھیر بکش ءِ کسان سالی ءَ آئی کماش ءَ اے کوڑھیںدگنیا یلہ دات ءُ وتی بنکی جاہ ءَ شُت گڑا چہ آئی مرگ ءَ رند مری ٹک ءِ مردماں بابا ھیر بکش مری ءَ وتی ھشتمی نواب لیکِ اِت بلے ھیربکش اے وھداں کسان اَت ءُ گوں وانگ ءَ ھمگرنچ اَت ھمے ھاتر ءَ آئی ناکو دودا ھان نواب دارگ بوت داں کہ ھیر بکش جوان بہبیت ءُ وتی نوابی ءِ بار ءَ وت بہ زور اِیت۔ سردار شیر باز ھان مری ءِ گشگ ءِ رد ءَ ھیربکش مری کالج ءِ زمانگ ءَ مدام نوکیں پچ ءُپوشاک پوش اِیت ءُ سوٹ ءُ بوٹ بیت وتی واھشتاں سرجم کنت۔ دومی نیمگءَ پنچ وھد ءِ نمازی ئیں مردمے بیت ءُ کالج ءَ باز ناموربیت ءُ ھرکس ھیر بکش ءِ زکر ءَ کنت ءُ بازیں جاھاں آئی ءِ سک توسیپ بیت پہ اے ھاتر ءَ کہ کالج ءِ زمانگ ءَ بابا مری یکپجارے ءِ واھند بیت ءُ چہ کالج ءِ زمانگ ءَ آئی ءَ را تامُر چارگ ءِ جزبگ بیت ءُ آ مدام سینمایاں روت ءُ انگلش تامراں گیش چاراِیت پرچا کہ انگلش تامر گیشتر جنگی بنت ءُ اے چیز بابا ءَ سک دوست بیت۔
وانگ سرجم بوگ ءَ رند آ دیم پہ وتی مادریں وتن بلوچستان ءَ کیت ءُ اد ءَ نوابی ءِ بار ءَ وتی کوپگاں زور اِیت ءُ گیشتر ماں سبی ءُ شالءَ وھد گوازین اِیت، اے ھمے وھد انت کہ بابا مری ءَ گاڑی یے گون بیت کہ بلوچستان ءِ دلبند شال ءِ دمک ءُ دھگاں تر ءُ تابکنت ءُ کدی کدی ھمے گاڑی ءِ سر ءَ سبی ءَ روت وتی ماتو ءِ گندگ ءَ انچو گش اَنت کہ ھیر بکش ءِ ماتو ھیر بکش ءَ سک دوست داراِیت ءُ وتی ماتی مھراں مدام پہ آئی ءَ سر ریچ اِیت۔ مری ٹک ءِ ھرچ ڈولیں جیڑھے بیت گڑا مردم کاینت بابا ءِ گور ءَ ءُ بابا مری مچیمیڑی کنت ءُ جیڑہ ءَ گیش ءُ گیوارکنت ءُ آئی گیش ءُ گیوار مدام تچکیں بنت کہ چریشی ءَ مردم باز وش بنت آئی ءَ را وتی بزرگ ءُکماش لیک اَنت گش اَنت کہ ھیر بکش وھدے کہ نوابی ءِ بار ءَ زور ایت گڑا آ چہ وتی کالج ءِ زمانگ ءِ زند ءَ پکا دور ءُ گستا بیت چہکالج ءَ رند آ گیشتر ماؤ،لینن ءُ مارکس ءَ وان اِیت اے پیم آ دگہ رنگے ءَ دیم ءَ کیت چوناھا اے منتگیں گپے کہ سردار ءُ نواباں وتی ٹکءِ سر ءَ ٹیکس جتگ ءُ زوراکی کرتگ ءُ آواناں پہ وتی کاراں کار بستگ بلے وھدے بابا مری نواب بیت گڑا آ اے رنگیں ٹیکس ءُگیشیں زوراکیاں چات ءَ دُور دنت ءُ وتی ٹک ءَ چہ اے زلم ءُ زوراں رکین اِیت، گش اَنت ھیر بکش ھما وھداں اے رنگیںجیڑھانی ھلاپ بیت کہ آ وتی کماش ءَ گوں آئی ءِ کٹم ءَ زوراکی ءَ گند اِیت ھیر بکش اے رنگ ءُ گوناپ ءَ چہ آئی ءِ کھول ءِ مردم وشبنت،۔
بابا ھیر بکش مری مدام مود ءِ ٹاپ ءَ جگنو ئیگ ءَ روت ءُ جگنو ءِ دکان کرم ھان روڑ شال ءَ انت ءُ بیگاھانی وھداں وابابکی جہ مدامگوں وتی ھمگنگلیں سنگتاں پرنس روڑ جم ھانہ کلب چھاونی ءَ گوں گوازین ایت۔ گش اَنت کہ واجہ ءَ ککُڑ سک دوست بیت ءُ مدامککڈانی ھیال داری ءَ کنت ءُ آیاں چینک دنت ءُ وتی پشت کپتگیں وھد ءَ گوں ککڈاں گوازین اِیت۔بلکیں واجہ وتی گلگدار ءِ تہ ءَ گْشاِیت کُکڑ پہ اے ھاتر ءَ من ءَ سک دوست بنت کہ آ جنگ کنت ءُ جنگ ءِ وھداں مرگ پہ وت پسند کنت، بلے تچگ پہ وت ءَائیب کن انت اے شوک ءَ ابید اوں گیشیں شوکے اے بیت کہ وتی کتاباں گیش ءَ چہ گیش وھد دنت ءُ آیاں وتی راھشون ءُسنگت لیک اِیت دومی نیمگ ءَ واجہ ءَ ڈنڈا گْولی اوں باز دوست بیت ھر وھد کہ آ سبی ءَ روت گڑا وتی ھمدلیں دوستاں زور اِیتماں میدان ءَ روت ءُ ڈنڈا گْولی کنت ءُ وتی شوک ءَ سرجم کنت ۔اگاں گوں دل ستک چارگ بہ بیت داں اے گندگ ءَ کیت کہاولی نواب بیت بلوچانی تہ ءِ کہ آ اے رنگیں تک ءُ پھناتاں پہ وت زور اِیت ۔
بابا ھیر بکش ءِ سیاسی زند:
1955ءَ ون یونٹ ءِ جوڑ بوگ ءَ رند واجہ ءَ گچین کاریاں بھر زُرت ءُ سوبائی اسمبلی ءَ آزات اُمیدوار ءِ (حیثیت) ءَ وزیر بوت اےھمے دور اَت کہ پاکستان ءِ یک ٹیمے دیم پہ روس ءَ روت گڑا آیانی ھمراھی ءَ ھیربکش اوں ھوار بیت کہ آئی ءِ گند ءُ نند اُود ءَ گوںروس ءِ پیسریگیں سدر بالگان ءُ مزن وزیر کروچیپ ءَ بیت۔۔۔
گش اَنت کہ برٹش بلوچستان ءِ سیٹ ءِ باچاھان ءِ برات ڈاکٹر ھان ءَ دیگ بیت بلے چوناھا اے سیٹ نواب بگٹی ءِ حک ءَ بیتگڑا بگٹی ساھب اے جھت ءَ زھرشانی کن انت، چوشیں یک توانگریں سیاسی راھشونے ءِ آئی ءِ ھمراداری ءَ نہ کنت بید چہ بابا ھیربکش مری ءَ ھیر بکش پارلیمنٹ ءِ وھداں بلوچ ءِ بزگی،لگت مالی ءُ مالءُ مڈیانی بارو ءَ توار چست کنت بلے آئی ءِ جند چہ پارلیمانیسیاست ءَ باز دلپروش بیت پد ءَ ایوبی مارشل اللہ ءَ رند گچیں کاریاں سردار مینگل ءُ نواب بگٹی چہ کلات ڈویژن ءِ نیمگ ءَ بھر زوراَنت ءُ آ ھیر بکش مری ءَ اوں زور دے اَنت کہ آ اوں گچیں کاریاں کاگد جم بہ کنت بلے آ پہ اے گپ آں رازی نہ بیت بلے یکرند ءَ پد ءَ اتااللہ مینگل،نواب بگٹی گوں دگہ چیزے ھمراھاں ماں شال ءَ ھیر بکش ءَ زور دے اَنت گڑا چہ گیشیں زور ءَ آ اشانی گپءَ پد ءَ نہ کنت ءُ الیکشناں بھر زو اِیت ءُ ماں کومی اسمبلی ءِ باسک جوڑ بوگ ءَ سوبمند بیت بلے وتی پیشیگیں وڑ ءَ اسمبلی ءَ بلوچ ءِحک،مال ءُ مڈی،زلم ءُ جبر ءُ گیشیں بے کانودیں کردانی ھلاپ ءَ اسمبلی ءَ سر ءَ زور اِیت بلے مدام کہ آ گپ بندات کنت آئی ءَ راوھد کم دیگ بیت ھیر بکش ءِ اے زار ءُ پریاتانی مستریں کڑی ایش بیت کہ 1920 بگر داں 1947 ءَ وتی گوست ءِ سیاسیراھشوناں وان اِیت چوشکہ یوسس ازیز مگسی،ابدلازیز کرد،ملک مھمد اُمر ءُ اشاں گوں ھوار دِگہ چیزے ھمراہ مکسد ینگ بلوچ ءَ بگر داںانجمن بلوچ ءِ بلوچاں ءُ کلات اسٹیٹ نیشنل پارٹی ءِ سیاست ءُ آیانی مول ءُ مراداں سرپد بوگ لوٹ اِیت۔
اے چیزانی سرپد بوگ ءَ رند آ گیشتر چہ پاکستان ءِ سیاست ءُ آئی سیاسی پارٹیاں دلپروش بیت بلے یک رندے پد ءَ گوں کوم پرستءُ سیکولر سیاسی گل NAP ءَ ھوار بیت ءُ دیمتر ءَ 1970 ءَ بلوچستانءَ نیپ ءِ سوبائی سدر جوڑ بیت ھیر بکش ءِ گوں اے سیاسی گلءَ ھوار بوگ ءِ مستریں مولءُ مراد ایش بیت کہ آ پٹان ءُ بلوچ ءِ تہ ءَ یک نزیکی یے بیار اِیت ءُ آیاں راجی جیڑھانی بارو ءَ سرپدی بہدنت ھمے جھت ءَ آ 1970 ءِ گچین کاریاں بھر زور اِیت ءُ سوب مند بیت ۔نیپ ءِ سیاست ءُ آئی سیاسی چست ءُ ایراں پاکستاںباز دل تنگ بیت ءُ آئی باسکاں دلاری ءِ بھتام جنت ءُ اے سوب ءَ بابا ھیر بکش مری ،گوث بکش بزنجو،ولی ھان ،اتااللہ مینگل،گلھان نسیر ءَ ھوار دستگیر کنگ بنت ءُ ھیدر آباد جیل ءَ بندیگ کنگ بنت بلے زیاء الھک ءِ ھکومتی ءَ گوں لس ماپی ءِ جار بیت اےرنگ ءَ اے سیاسی راھشون آزات بنت۔
وھدے کہ گل ھان ءُ بابا مری شال ءَ سر بنت گُڑا شال ءِ سیاسی سنگت،بی ایس او ءِ سنگت ءُ ایندگہ لس مھلوک آوانی رسگ ءَباز ھدوناک بنت آئی ءَ را زور اَنت ماں پریس کلب ءَ رو اَنت کہ اُود ءَ بابا مری تران کنت ءُ وتی سیاسی رنگ ءَ دِگہ گوناپے ءَ گوںپیش دار اِیت چد ءُ رند واجہ ھشتاد ءِ دَھک ءَ دیم پہ اپگانستان ءَ شُت ءُ اُود ءَ داں دوازدہ سال بیت وتی سیاسی پگر ءِ سنگتاں یکجاہکنگ ءِ جھد کنت کہ چہ اُود ءَ بلوچ نیشنلزم ءَ یک نوکیں بندات ءِ دنت کہ اپگانستان ءَ بلوچ گیشتر آئی ءِ سیاسی پگر ءَ سان (متاثر) بنت ۔۔۔۔
آئی ءَ اپگانستان ءِ نندگ ءَ پاکستان پہ وت ءَ تُرسے مان ایت ءُ آئی ءِ لوٹائینگ ءِ بلاھیں کوشستے کنت بلے آ پہ واتر بوگ ءَ تیار نہبیت بلے گیشیں وتیگانی زوراں آ واتر بیت وتی مری کُٹم ءَ زور اِیت ماں شال ءَ جاگہ دنت کہ مرچاں اے جاگہ شال ءَ چہ مری آباد ءَزانگ بیت ۔گوں شال ءِ آیگ ءَ ھیر بکش مری یک سرکلے ٹھین اِیت کہ آ “ھک ءِ توار ءِ”نام ءَ زانگ بیت اے سرکل ءِ تہ ءَ واجہبلوچ نودربراں بلوچ ءِ آجوئی ءِ بارو ءَ سرپدی دنت ءُ آیاں ملکی ءُ درملکی سیاست ءَ پیش دار اِیت زانگ المی انت کہ چہ اےسرکلاں کادر مری،جنرل اسلم ءُ دِگہ ھمے ڈولیں بامرد رُدوم زور اَنت ءُ وت واجھی ءَ پہ تپنگ ءُ تیر بنت ،منی ھیال ءَ اے گُشگ رد نہبیت کہ چہ واجہ ءِ اے جھد ءَ بلوچ گوں (سائینٹفک )جنگی تب ءُ میلاں نزیک بیت ءُ بلوچ راجی جُنز مھکم بیت ءُ بابا مری وتی آسریلوٹ ءُ واھشتاں گند اِیت مکسد ایش کہ آئی ءِ ھمے لوٹ ءُ واھگ بیت کہ بلوچ جُھد ءِ آجوئی ءُ وت واجھی ءِ درچک ھمک میتگ ءُمردماں داں سر بہ بیت دومی نیمگ ءَ کہ ھرچ کوم ءِ سر ءَ زلم ءُ زوراکی بیت گڑا بابا مری زوراکانی ھلاپ ءَ توار چست کنت ءُ نیزگارانی حک ءََ گپ کنت ءُ اے رنگ ءَ آئی ءِ کوم دوستی گندگ بیت پاکستانی ریاست ھمے گُش ایت کہ اولی نواب انت کہ پہ زر ءُملام وتی پگر ءَ یلہ نہ دنت ءُ وتی پُر آشوبیں آدت ءُ ھییلاں من ءَ باز تاوان ءِ دیمپاں کنت۔
واجہ ءَ بازیں گلگداراں اوں جُست کنگ بیت کہ تو چہ سیاست ءَ دُور ئے تئی دُور بوگ ءِ مکسد ءُ مانا گڑا پّسو دنت کہ من وتی آزاتی ءِلوٹوکاں داں کہ وتی واجہ وت بہ باں ءُ منی ملک بلوچستان یک آزاد ریاستے بوتگ بلے پاکستان ءَ پہ زور مئے ملک ءِ سر ءَ اُرش کرتگءُ مئے ملک گوں وت ھوار کُرتگ اے بابت ءَ من گوں پاکستانی سیاست ءَ ھوار بوت نہ کن آں ۔۔۔۔
ھیر بکش تھنا بلوچ آزاتی لوٹوکیں گوریلا راھشونے نہ اَت بلکیں بلوچ راجی جُنز ءِ دیم ءَ برگ ءِ گوں سائنسی وڑ ءُ پیماں نزیک کنوکیںمردمے اَت دومی نیمگ ءَ بابا ءَ اگاں بچار ئے آئی ءَ گیشیں لوٹ ءُ تماہ نہ بوت ءَ ابید چہ وتی سرڈگار ءِ آزاتی ءَ بلے زند ءَ گوں بابا ءَوپا نہ کُت ءُ زوت چہ ما جُتا کُرت ئِے بلے بابا مری ءِ پگر ءُ آئی پر آشوبیں ھیل ءُ آدتاں ھر یک بلوچ پُسگے ءِ زرد ءَ جاگہ کُتگ گمانانچو بوگ ءَ انت کہ بابا نمیران انت ۔
بلوچ راج ءِ اے گھگیریں سر 11جون2014 کراچی ءَ اے کوڑھیں دگنیا ءَ یلہ ءَ کنت ءُ دیم پہ وتی بنکی ھنکین ءَ روت ۔۔۔۔۔۔۔ نمیران نمیران نمیرانیں بابا نمیران
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
شال ءَ آئل ٹنکرے ءَ چَپ بیگ ءَ ھشت مردم زدگ
دی بلوچستان پوسٹ
شال ءِ دمگ سریاب کسٹم چوک ءَ آئل ٹنکر ءِ چَپ بیگے سبب ءَ آس چِست بیتگ سِی ءُ پنچ دکان آس ءِ برانزاں گپتگ اَنت –
آئل ٹنکر ءِ چَپ بیگے کزا گوستگیں شپ ءَ پیش اتکگ –
ریسکیو کارمندانی رد ءَ چنگاریاں آبادی ءَ سر بیگ ءَ پیسر آس توسگ بیتگ ءُ اے وھد ءَ سَے ریسکیو کارمنداں ھوار ھشت مردم زدگ بیتگ اَنت –
زدگ بیتگیں بیتگیں مردم درمان کنگ ءَ نزیکیں نادراہ جاہ ءَ برگ بیتگ اَنت ویل ءِ پَٹ ءُ پول برجاہ اِنت –
بلوچستان نیشنل پاٹی ءِ دمگی گوستگیں سروک شال میر گلام رسول مینگل ءَ اے درگت ءَ گْوشتگ کہ آس ءِ توسگ ءَ سرکاری آس توس نیست اِنت بازیں وھداں پد آس توس اتکگ ءُ آس توسینتگ اِش اے وھد ءَ داں بازیں تاوان بیتگ اَنت –
آئی ءَ گْوشت اے گریبیں تاجر اے وھد ءَ کہ کوروبا ءُ بند آری ءِ دیمپان اَنت اشانی سر ءَ کیامتی زورے کپتگ اشانی تہ ءَ پرچون، ھولسیل ءُ دگہ دکانانی سامان آس ءَ پُر کرتگ اَنت –
آئی ءَ گْوشت کہ ما بلوچستان ءِ سرکار ءَ دزبندی کن ایں کہ زوت دمگداراں کڈن بہ کنت ءُ کسٹم چوک ءِ چار ءُ ٹپاس ءَ بہ کنت ءُ سوتکگیں دکانانی تاواناں پُر بہ کنت –
