TBP Balochi

دو سال گوزگ ءَ پد ھم ناسر ھسین بلوچ انگت ءَ بیگواہ، کھول

دی بلوچستان پوسٹ

ناسر ھسین بلوچ ءِ بیگواھی ءَ دو سال سرجم بیتگ ھروڑیں جھد ءُ جپا کرتگ بلے کَسے ءَ مئے توار تنی وھدی گوش نداشتگ – ناسر ھسین بلوچ ءِ کھول

ناسر ھسین بلوچ ءِ کھول ءِ گوشگ اِنت بیست ءُ شش جون دوھزار ءُ ھژدہ ءَ پاکستانی پوج ءُ چیریں ادارھانی کارندھاں بلوچستان ءِ باپاری شھر ھب چوکی ءَ آمدگس دگ ءَ ناسر ھسین بلوچ آوار جتگ ءُ برتگ –

آیاں گْوشت کہ ناسر ھسین بلوچ ءِ بیگواھی ءَ پد ما ھمک در ٹک اِتگ بلے تنی وھدی ناسر ھسین ءِ بارو ءَ مارا ھچ سرپدی دیگ نہ بیتگ کہ کجام زندان ءَ بند اِنت-

کھول ءَ گْوشت کہ ناسر ھسین بلوچ ءِ بیگواھی ءَ چَہ مئے سرجمیں کھول گم ءُ لاچاری ءِ زندگی ءَ گوازینگ ءَ اِنت چریشی ءِ ترندیں گماں ناسر ھسین ءِ مات ھم بے کساس ءَ نادراہ اِنت –

آیاں گْوشت کہ ناسر ھسین بلوچ ءَ ھچ وڑیں سیاسی ءُ دگہ گلاں گوں سیادی نیست آ لس مردمے بیتگ ءُ آئی ءَ پوریاگری کرتگ ءُ وتی چُکانی لاپ والینتگ اَنت –

آیاں گْوشت کہ ناسر ھسین بلوچ پیسر ءَ گُٹگانی نادراھی ءِ آماچ اِنت ءُ آئی ءِ پُشت ءِ مردمانی واستا اے گرانیں گمے کہ آ باریں اے وھد ءَ کجام جاورانی تہ ءَ اِنت –

کھول ءَ گْوشت کہ ما جھان ءُ ملکی انسانی ھکانی گل، انسان دوستیں مھلوک ءُ ھمک تکاں گوں بندوکیں ادارھاں گوں دزبندی کن ایں کہ ناسر ھسین بلوچ ءَ یلہ بہ کن اَنت اگاں ناسر ھسین بلوچ ءَ جرمے کرتگ گڑا آ آمدگس ءَ پیش کنگ بہ بیت –

کھول ءَ گْوشت کہ مارا ترس اِنت کہ بلوچستان ءَ ھزاراں بیگواھیں مردمانی لَٹ شاپ کرتگیں جون دزکپتگ اَنت چُش مہ بیت کہ مئے مردم ءِ جون چوش ھما وڑ ءَ دز بہ کپ اِیت –

زانگ بہ بیت بلوچستان ءِ جتائیں جاھاں ھزارانی ھساب ءَ بیگواھیں مردمانی جون دزکپتگ اَنت ءُ ھمے وڑ ءَ گوستگین ماہ ءَ مند ءَ پوجی زنداناں ترندیں لٹ شاپیانی سوب ءَ جاود نامیں ورنایے لٹانی ترندی ءَ بیران بیتگ اَت –

امریکہ ءِ نیمگ ءَ ناشری رپورٹ پاکستان ءَ وتی ناشری رد کرتگ اَنت

دی بلوچستان پوسٹ

امریکہ ءِ دری کارانی وزیر ءِ نیمگ ءَ شنگ بیتگیں ناشرکاری ءِ سالی رپورٹ ءِ پژدر ءَ پاکستان ءَ نا اُمیتی ءِ سر ءَ ھیال لیکتگ پاکستانی دری کارانی وزیر ءَ گْوشت کہ رپورٹ ءَ پاکستان ءِ ناشرکاری ءُ ناشرکاری ءِ مالی کمک ءِ ھلاپ ءَ چِست بیتگیں گامانی سر ءَ جیڑ بیتگ – پاکستان ءِ ناشرکارانی مھکمیں بنجل ءِ بھتام رد کرتگ –

پاکستانی دری کارانی وزیر عائشہ پاروقی ءَ پشمے ءِ روچ ءَ ھپتگی گپانی ءَ گْوشت کک یک نیمگے ءَ امریکی رپورٹ ءَ پاکستان ءَ ناشرکاری ءِ ترندی کمی کرتگ ءُ راست کرتگ کہ پاکستان ءَ القائدہ دمگ ءَ بے سوب بیتگ، بلے دومی نیمگ ءَ القائدہ ءِ بے سوبے ءِ واستا پاکستان ءِ گپاں دلگوش کنگ ءَ نہ اِنت –

عائشہ پاروقی ءَ گْوشت کہ پاکستان ءَ ناشرکاری ءِ منّانک ءَ اے گپ پدر کنت کہ پاکستان ءَ ناشریں ٹولیانی ھلاپ ءَ بے کَچیں کاروائی کرتگ –

سر وزیر امران ھان ءُ امریکی سروک ڈونلڈ ٹرمپ ءِ وشنگٹن ءَ گند ءُ نند ءَ یک روچے ءَ پیسر وائٹ ھاؤس ءِ یک باسکے ءَ اے تر ءُ تابے بارو ءَ لھتے اھوالکارانی ھالرسانی گپ ءُ تران کرتگ، چریشی ءَ گْوشتگیں باسک ءَ وتی نام پدر نہ کرتگ ءُ گْوشتگ کہ پاکستانی سروزیر تر ءُ تاب ےَ آئی ءَ اوگان ءِ ایمنی ءِ واستا ترندیں کردمان ءُ آئی ءِ سرزمین ءِ سر ءَ ناشرکارانی بگیری ءَ کاروائی کنگ ءَ زور دیگ بیت اِنت –

چریے جست ءُ پرساں چار ھندوستانی اھوالکاراں ھوار ھشت اھوالکارانی گپ ھوار بیتگ اَنت –

اے اجگھی ءِ کہ سروزیر امران ءِ اے تر ءُ تاب ءُ گپ ءُ تران ءَ بیتگیں گپاں یک ھم پاکستانی ءُ امریکی اھوالکار جاڑیگ نہ بیتگ اَنت –

گپ ءُ رپ ءَ ھندوستانی اھوالکار ءَ ھمک روچی ئیں رنگ ءَ ناشر ءُ سلاہ بندیں گل جیش طیبہ ءِ سروک ھاپز سئید ءِ بارو ءَ جُست گپتگ –

ھاپز سئید ءِ دزگیری ءِ بارو ءَ وائٹ ھاؤس ءِ باسک ءَ گْوشت کہ اے دزگیری اولی رند نہ اِنت بلکیں دوھزار ءُ یک ءَ بہ گر داں انیگ ءَ پاکستان ءَ ھپت رند ءَ ھاپز سئید دزگیر کرتگ بلے چریشی ءَ پد یلہ کرتگ –

آئی ءَ گْوشت کہ پاکستان ءِ تہ ءَ ترندیں کاروائی کنگ لوٹ ایں ھمے واستا امریکہ درسیں کاراں جوانیں نگاھاں چارگ ءُ ٹپاسگ ءَ اِنت –

راجی پتر ءَ تران کنان ءَ سروزیر امران ھان ءَ وتی دورے سرکار ءِ سوبمندی ءَ ھساب کنان اَت –

ھمے میان ءَ دری پالیسیانی سر ءَ ھم گپ ءُ ترانی ءِ سر ءَ آئی ءَ گْوشت کہ پاکستان ءَ القائدہ ءِ سروک اسامہ بن لادن ءِ ساڑی بوگ ءُ دوھزار ءُ یازدہ ءَ امریکی آپریشن ءِ بارو ءَ ھم گپ بیتگ –

پشمے ءَ بیتگیں گپانی تہ ءَ جستے ءِ پسو ءَ راجی پتر ءَ گوشگ بیتگ کہ امریکہ ءَ القائدہ ءِ سروک اسامہ بن لادن امریکہ ایبٹ آباد ءَ اتکگ ءُ کُشتگ ھمے میان ءَ گپ ءِ پسو ءَ امران ھان ءَ زوت پسھی ءَ گوشت آ شھید کنگ بیتگ –

زانگ بہ بیت دوھزار ءُ یازدہ ءَ امریکہ پوج ءَ پاکستان ءِ شھر ایبٹ آباد ءَ شپ ءِ نسپ ءَ اُرش کرتگ ءُ اسامہ بن لادن کُشتگ –

پاکستان ءِ سرکاری نیمگ ءَ تنی وھدی اے گپ ءَ منّگ ءَ ساڑی نہ اِنت کہ پاکستان ءَ اسامہ بن لادن ءِ جاڑیگ بیگ ءِ ھال بیتگ –

ایبٹ آباد ءِ آپریشن ءَ پد پاکستان ءِ جھان ءِ چمانی دیم ءَ جھل کپتگ ءُ آئی ءَ بازیں جیڑھانی دیمپانی کنگ کپتگ ءُ پاکستان ءُ امریکہ ءِ سیادی نیزور تَریتگ –

دومی نیمگ ءَ دوھزار ءُ یازدہ ءَ پاکستان ءِ سروزیر یوسپ رزا گیلانی ءَ ایوان ءَ تران کنان ءَ اسامہ بن لادن ءِ بیرانی سوبمندی گوشتگ اَت –

نبشتانک: مھرنگ منی وڑیں لگور ترا سلام کنت

نبشتہ کار: نبیلہ مھراب

دی بلوچستان پوسٹ

من مھرنگ ءِ شیرزالی ءَ را سلام کن آں، آ چوں یک جناورے گوما گِر ءُ پانچ بیت ءُ چوں دور دیگ بیت. مے وڑیں جنک لوگ ءَ چہ درایگ ءُ زھرشان کنگ ءِ بابت ءَ ھم تُرس اِیت بلے آئی ءِ جاگہ گوں منی اندگ ءَ برات ءَ گھاراں مے تاریک ءِ توک ءَ بلاھیں ارزشتے دار اَیلنت.ما اگاں اے وڑیں جاورے ءَ دوچار بہ ایں اول گپ زھن ءَ ھمیں کیت کہ من اجالت باں یا دگہ مردمے من ءَ شر نگوش اِیت ءُ نامھرمے ءِ دیم ءَ پدر مباں چی ءَ کہ مارا چہ کسانی ءَ ھمیں وڑ سوج دیگ بوتگ، مے زھن ءَ اے گپ زور مان کنگ بوتگ. مرچی منی دل پہ ستک درد ءَ اِنت کہ مے کوم ءِ شیرزال چوں گرّان ءُ شامات جنگ بوگ ءَ اَنت، مے وڑیں لگور انگت لوگ ءِ باھوٹ.اَنت ءُ تامر ءِ چار اَنت وتی social mediaءَ شنگ کن اَنت .من واکی آئی ءِ وڑیں جنک ندیستگ. من ھردیں کہ آئی ءَ گنداں گڑا آسمہ جانگیر من ءَ یاد کیت کہ پاکستان ءِ iron lady گوشگ بیت.آ ھم وکیلے ءِ جاگہ ءَ سک زلیل ءُ وار بوتگ ءُ مے iron of lady of balochistan مھرنگ بلوچ انت کہ وتی واست ءَ انا بلکیں سرجمیں مھلوک ءُ بلوچ نودربرانی توار اِنت.
منی دل وَ ھمد ءَ چہ در اتک وھدے آئی ءِ شنگ کتگیں گپ اِشکت اَنت گوں لرزوکیں دستاں،ارس پرتکگیں چماں ءُ گٹوکیں زبانءَ. اے درد ءِ بار ءَ گوں مردم چہ وت ءَ ما گیشت نہ کنت،بلے مھرنگ منی وڑیں لگور ترا سلام پیش کنت،تئی مزن جگری ءُ مزن دلی ءَ را سد ھزار سلام اِنت.

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

شال، کراچی ءُ گوادر ءَ بلوچ نودربرانی زھرشانی

دی بلوچستان پوسٹ

سر بیتگیں ھالانی رد ءَ بلوچ نودربر ایکشن کمیٹی ءِ نیمگ ءَ کراچی ءَ شال ءِ نودربرانی سر ءَ بیتگیں زوراکیانی ھلاپ ءَ زھرشانی کنگ بیتگ –

زھرشانی کراچی ءِ پریس کلب ءِ دیم ءَ کنگ بیتگ، زھرشانی ءَ بلوچ نودربراں ھوار لس مردماں بھر زرتگ –

زھرشانی ءَ بھر زورکیں مردماں شال ءَ بلوچ جنک ءُ بچکیں نودربرانی سر ءَ زوراکی ءُ آیانی گشان ءِ چِکگ ءِ ھلاپ ءَ اوگام جتگ ءُ گوشتگ کہ بلوچ نودربراں وانگ دات نہ کن ئے گڑا آیاں وتی ھکانی گپ جنگ ءَ اجازت بہ دے اِت کہ تاکہ وتی گپاں دیم ءَ بُرت بہ کن اَنت –

ھمے وڑ ءَ بلوچستان ءِ پارلمینٹ ءِ دیم ءَ ھم بلوچ نودربراں بلوچ نودربرانی سر ءَ لَٹ ءُ کُٹانی بگیری ءَ زھرشانی کرتگ –

زھرشانی کنوکاں گْوشت کہ سرکار ءِ جار ءَ آن لائن کلاسانی پچ بندات بیتگ آیاں گْوشت کہ بلوچستان ءِ کُنڈ کُنڈاں نندوکیں مردم شال ءَ وانگ ءَ اَنت بلے تنی وھدی بلوچستان ءَ انٹرنیٹ ءِ اسراتی نیست کجا نودربر کلاساں بھر زُرت کن اَنت –

آیاں گْوشت کہ بلوچستان ءَ ھنچیں نودربرانی جھمنندی بلوچستان ءِ ھنچیں ھند ءُ دمگان اَنت کہ آ یک ھال گرگے ءِ واستا دو دو مِل بُر اَنت ءُ نیٹورکے گر اَنت انٹرنیٹ وتی جاہ ءَ تنی وھدی آیاں ھالرسانی ءِ اسراتی نیست اِنت اگاں ھنچیں جاھاں آسراتی ھست گڑا آیانی گور ءَ انٹرنیٹ ءِ آسراتی نیست اِنت –

نودربراں گوشت کہ پاکستان ءِ دگہ اُستان “سوبھاں ” شریں اسراتی ءِ سوب ءَ نودربر آن لائن کلاساں بھر زرت کن اَنت بلے بلوچستان ءِ زرت نہ کن اَنت –

ھمے وڑ ءَ شال ءِ نودربرانی سر ءَ بیتگیں زوراکیانی ھلاپ ءَ گوادر ءِ نودربراں گوادر ءَ روانک کَش اِتگ –

روانک شھر ءِ جتائیں جاھاں گوزان بیتگ ءُ پریس کلب ء دیم ءَ سر بیتگ –

پریس کلب ءِ دیم ءَ سر بیگ ءَ گوں روانک مُچی ءِ دروشم ءَ مُچ بیتگ ءُ روانک ءَ بھر زورکیں نودربراں گوادر پریس کلب ءِ دیم ءَ زھرشانی کرتگ –

زھرشانی کنوکیں نودربراں گْوشت کہ دنیا ءِ ھمک کُنڈاں نودربر وتی ھک ءِ گپ ءَ ایمنی رنگ ءَ کُرت کن اَنت بلے بلوچستان ءِ نودربر ایمنی رنگ ءَ وتی ھکانی واستا گرمیں روچ ءِ سر ءَ نشتگ اَنت –

آیاں گْوشت کہ آن لائن کلاسانی بگیری ءَ زھرشانی کنوکیں نودربرانی لَٹ ءُ کُٹ کنگ ءُ برگ زنداناں بند کنگ بژنے گپے –

گوادر ءِ نودربراں گْوشت کہ ھاکم ءُ میراں وش نہ بیت بلوچستان ءِ زھگ وانگ ءُ زانگ ءَ دیمری بہ کن اَنت ءُ نودربر وتی ھکانی لوٹ ءَ بہ کن اَنت –

آیاں گْوشت کہ بلوچ دودمان ءَ بلوچ زالبولانی مزنیں شرپ ءُ نگاھے ھست بلے گوستگیں روچ ءَ شال ءَ جنکیں نودربر گران کنگ ءُ جیلانی تہ ءَ برگ بیتگ اَنت –

آیاں گْوشت کہ گرانی ءِ وھد ءَ جنکیں بلوچ نودربرانی گشان ھم سر ءَ سرجنگ ءُ لَٹ شاپ کنگ بیتگ اَنت ءُ اے زوراکی الکاپ ءَ ایرجنی اَنت –

آیاں گْوشت کہ بلوچستان ءَ اگاں کسے ھک ءِ گپ ءَ جنت آ یا گار کنگ بیت یا ھمے وڑ ءَ دگانی سر ءَ لَٹ ءُ کُٹ کنگ ءُ کمشرپ کنگ بیت اِنت –

ھمے وڑ ءَ اسلام آباد ءَ ھم بلوچ نودربراں شال ءَ نودربرانی سر ءَ بیتگیں زوراکیانی ھلاپ ءَ زھرشانی کرتگ –

دومی نیمگ ءَ نوشکی ءُ دالبندین ءَ ھم آن لائن کلاسانی بگیری ءَ زھرشانی کرتگ –

زانگ بہ بیت گوستگیں روچ ءَ شال ءَ بلوچستان اسمبلی ءِ دیم ءَ بلوچ نودربراں آن لائن کلاسانی ھلاپ ءَ زھرشانی کرتگ اَت –

زھرشانی ءَ پولیس ءَ ڈاکٹر مھرنگ، مھلب دین، نمرہ بلوچ ءَ ھوار بازیں جنکیں نودربر لَٹ کشان کرتگ ءُ جیلانی تہ ءَ بند کرتگ اَنت –

تمپ ءَ پوج ءَ بیڑ برتگ ءُ یک ورنایے آوار جتگ

دی بلوچستان پوسٹ

سربیتگیں ھالانی رد ءَ تمپ ءِ دمگ کُنشکلات ءَ پاکستانی پوج ءُ چیریں ادارھانی کارمنداں مروچی سھب ءَ بیڑ برتگ ءُ یک ورنایے آوار جتگ ءُ برتگ –

آوار جنگ بیتگیں ورنایے پجار ستار ء الاھی بکش جھمنند کُنشکلات تمپ ءِ نام ءَ زانگ بیتگ –

دمگی مردماں دی بلوچستان پوسٹ ءَ گوں گپ کنان ءَ گْوشت کہ گوستگیں بازیں روچاں کُنشکلات ءِ کَش ءُ گوری دمگاں پاکستانی پوج ءِ زوراکی ھمک روچ برجاہ اَنت –

آیاں گْوشت کہ پوج لوگانی تہ ءَ ماریچ اِت ءُ زالبول ءُ چُکاں کمشرپ کنت ءُ لوگانی ساز ءُ ساماناں دراگان درگان کنت –

زانگ بہ بیت بلوچستان ءِ جتائیں جاھاں پاکستانی پوج ءُ چیریں ادارھانی کاروائی برجاہ اَنت ءُ چرے سوب ءَ بلوچستان ءِ جتائیں ھنداں نندوکیں مردماں پوجی زوراکیاں لَڈ ءُ بار ھم کُرتگ –

دومی نیمگ ءَ وائس فار بلوچ مسنگ پرسنز ءِ رد ءَ تیوگیں بلوچستان ءَ اے وھد ءَ بلوچ نودربر، ڈاکٹر، وکیل ءُ جتائیں تکاں بندوکیں پنجاہ ءُ چار ھزار مردم گار اِنت کہ اشانی تہ ءَ زالبول ھم ھوار اَنت –

نبشتانک: آن لائن کلاس ءُ بلوچستان

ندکار: آجو کینگی بلوچ

دی بلوچستان پوسٹ

منی چَمّاں یک نبشتانکے کپت گُڑا من ونت ءُ آئی ءِ چیر ءَ مئے بازار ءِ یک کسانیں گونڈلیں نودربرے ءِ نام نبشتہ اَت۔ من باز گل ءَ بال بوت آں کہ کسانیں نودربرے ءَ ھمے نبشتانک ءِ تھ ءَ مئے دمگ ءِ دْراھیں جیڑہ ءُ اڑ ھمے نبشتانک ءِ تہ ءَ جْوانیں ڈولے ءَ جاہ داتگ اَنت۔ من گوں ھمے کسانیں نودربر ءَ ھال کنگ ءِ جُھد کُت من سوبین بوتاں گوں ھمے نودربر ءَ پرچاکہ آ وتی ھر کار ءِ جُھد ءَ سوبین بیتگ اَت۔ گوں ھمے کسانیں نودربر ءَ منی ھال جوانیں رنگے ءَ بوت گڑا من ھمے نبشتانک ءِ سر ءَ گوں ھمے سنگت ءَ ھبر کت۔ دل ءَ باز وش بوت من گْوشت بلے تو وش نبشتہ کن ئے۔ راج ءِ نوجوان ءُ نودربر شُما اِت پمیشکا مئے چم شُمارا سک اَنت ۔۔۔۔۔۔۔۔۔۔۔۔۔۔۔۔۔

چیزے وھد گوست کہ منی ھال گوں سنگت ءَ نہ بوتگ اَت ءُ من ءَ پہ ھمے سنگت ءَ زھیر ئِے کُت گڑا من ھمے سنگت ءَ سلامے دات ءُ چار آں لائن ءَ نہ اِنت گڑا من ھمے جیڑ اِت بیماری یے کپتگ کہ نام کرونا اِنت ئِے بلاھیں نادْراھی یے۔
گڑا جیڑ آں بلکیں الم سنگت دمگ ءَ شُتگ پرچی ءَ کہ اد ءَ سرجمیں وانگ ءُ شھدربرجاہ کُبل اَنت۔ ھمے سنگت اد ءَ اسلام آباد ءَ پہ وانگ ءَ آتکگ ءُ پد ءَ الم دمگ ءَ شُتگ۔۔۔۔۔۔۔۔۔۔۔۔
من گوں ھمے جیڑگانی تہ ءَچہ چار روچ ءَ پد ھمے سنگت ءَ من ءَ پسو دات ءُ گْوشت ئِے کہ من دمگ ءَ بیتگ آں مرچی من ءُ منی گْوھار تئی سنگت مھران ءِ نیمگ ءَ آتکگ ایں.
من گُشت ھیری؟ درائینت ئِے “ھو! ھیری ھمے تئی سنگت ءِ لوگانی دیمی نیمگ ءَ بلاھیں کوہ ءِ سر ءَ دامگ (انٹرنٹ) کمو باز کار کنت۔۔۔۔۔۔۔۔۔
من ءُ گْوھار ھمے کوہ ءِ سر ءَ وتی کلاسانی گرگ ءَ آتکگ ایں پرچی ءَ کہ مئے کلاس مرچاں آن لائن گرگ بوگ ءَ انت ۔۔۔۔۔۔۔۔۔۔۔۔
من سنگت ءَ گْوشت گڑا وھدیکہ تو دزھورک بہ ئے ترا من کالے کن آن ءُ تئی پُلیں توار ءَ گوشدار آں سنگت ءَ من ءَ گْوشت کال وتی جاہ ءَ اد ءَ کسانیں توارے پچ بوت نہ کنت، من گْوشت گڑا تو چوں کلاس گر ئے؟ تو گْوھار بزگ کُتگ ، گْوشت ئِے گُڑا چے بہ کن آں بزگی اِنت من ءُ منی گْوھار ءِ وھد زیان بوگ ءَ انت ھما بے وسی ءَ بس وتی مات ءُ پتانی تسلہ دیگ ءُ آیانی ردّ دیگ ءِ ھاتر ءَ اد ءَ کا اِیں ۔۔۔۔۔۔۔۔۔۔۔۔

من گْوشت تو گڑا چوں وت ءَ را ٹھین ئے گوں اے دامگ ءَ؟
گْوشت ئِے مئے ھال ءُ کُچکانی ھال مرچاں یک اِنت من ءَ سے شپ ءُ دو روچ اِنت کہ ما آتکگ ءُ ھمے کوہ ءِ سر ءَ ٹِل ایں۔ وھد سک گرم اِنت، آپ ھم نیست، نان ءُ ورگ ھُشک اَنت ءُ کسانیں سولرے منی بڈ ءَ اِنت ھمد ءَ برے دامگ ھست ءُ برے نیست نہ زان آں چے بہ کن ایں۔ من ءُ گْوھار ءَ چہ مات ءُ پت ءَ موکل کُتگ انت کہ ما وتی کلاسانی گرگ ءَ رو ایں۔ مات ءُ پِت ھم گل ءَ بال اَنت کہ چُک کلاسانی گرگ ءَ شُتگ اَنت بزگیں مات ءُ پت چے زان اَنت کہ آیاں پہ وتی بزگی ءَ پمن ءُ پہ گُھار ءَ باز کُتگ کہ چُش مہ بیت ما بازار ءِ دگہ مردمانی دیم ءَ شگانی مہ بہ ایں۔ منی پت شریکی کنت ءُ مات گُد دوچی کنت بلے من ءُ گھار ءَ پہ بزگی مات ءُ پتاں نیشتگ۔ منی مات ءُ پتانی ھکانی جست پاکستان ءُ آئی ءِ داشتگیں وزیرانی گردن ءَ بات اَنت۔۔۔۔۔۔

من ھیران بوت آں اے کجام زُلم ءُ زوراکی گوں مارا بوگ اِنت زاناں ما ھُدا ءِ مھلوک نہ ایں یا ما بنی آدم نہ ایں۔ دگنیا ءِ تہ ءَ ھر زُلم ءُ زوراکی یے بوگ اِنت ما بلوچ راج پرچی ءَ ھمے زُلم ءُ زوراکیانی دیمپان ایں اے دْراہ گلامی ءِ داتگیں داد اَنت پرچی کہ اے بازار ءِ دیم ءِ کوہ من دیستگ اے کوہ ءِ سر ءَ من ءُ مھران شُتگ ایں پہ گنوکی اے کوہ ءِ سر ءِ روگ ءَ من ءُ مھران ءَ چار ادار لگ اتگ گڑا سنگت ءِ گُھار چوں اے کوہ ءِ سر ءَ لِکّپت کُت ءُ کنت ناں کہ اے کوہ ءِ کر ءُ کشاں ناں کہ آپ ھست ءُ نیکہ درچک ءُ دار!!
اے توپان ءُ لِواریں گرم ءَ چوں اے کوہ ءِ سر ءَ نشتگ اَنت۔۔۔۔۔۔۔۔۔۔۔۔۔۔
من ھمے جیڑگانی تھ ءَ ات آں کہ سنگت ءَ وتی گْوھار ءِ اکسے دیم دات ءُ یک دست ئِے موبائل بُرز ءَ داشتگ ءُ دومی دست ءَ کلم ءُ کاپی یے دست ءَ اَنت۔ منی چمانی ارس بندات بوت اَنت۔ بس منی دپ ءَ ھمے ھبر درتک ھپتیں آزمانانی واجہ اے کُجام سزا اِنت کہ تو مئے مات ءُ گھاراں دیگ ءَ ئے مئے میار چی اِنت؟ اگاں پاکستان ءُ آئی ءِ داشتگیں جناور مئے سر ءَ بزگ نہ کن اَنت ھُدا تو بزگ بہ کن تو دراھیناں گِندگ ءَ ئے پرچی ءَ کہ تو دْراھیں دگنیا ءُ گُلزمین ءِ بادشاہ ئے ۔۔۔۔۔۔۔۔
ھمے سنگتے لمبر ءِ سر ءَ آئی توارے آتک ءُ گْوشت ئِے مارا پاکستان ءِ جھازے مکش ایت ھر روچ ھمے کوہ ءِ بُرزی نیمگ ءَ ھیلی کاپٹرانی روگ ءُ آیگ اِنت۔۔۔۔۔۔۔۔۔۔۔
من ھمے جیڑ اِت راست گْوش ایت کوہ ءُ اگار سرمچارانی واب جاہ اَنت بلوچستان ءِ کوھاں ھر روچ لشکر کَشی اِنت دگنیا ءِ تھ ءَ اولی جاگہ بلوچستان اِنت کہ نودربرانی وپت ءُ واب جاہ کوھانی سر اِنت بلوچستان ءَ نودربرانی شھدربرجاہ ءُ مزن شھدربرجاہ (کالج ءُ یونیورسٹی) کوھانی ٹُلّ ءَ اَنت.

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ جتائیں جاھاں انٹرنیٹ ءِ نہ بیگ ءَ نودربر آنلائین کلاساں بھر زرت نہ کنگ ءَ اَنت –

دی بلوچستان پوسٹ

سربیتگیں ھالانی رد ءَ بلوچستان ءِ مزن شھر شال ءَ بلوچ نودربراں یک زھرشانی روانک ءِ کش اِتگ کہ بلوچستان ءَ آنلائن کلاسانی ھلاپ ءَ بیتگ۔ اے زھرشانی ءِ تہ ءَ بلوچ ءُ پشتون نودربراں بھر زرتگ ءُ آنلائن کلاسانی ھلاپ ءَ اوگام جتگ۔

اھوالانی رد ءَ بلوچ نودربرانی زھرشانی یک پُر ایمنیں زھرشانی ءِ بیتگ کہ لیاکت باگ ءِ کِرّ ءَ پولیس ءَ زور داشتگ ءُ بازیں نودربریں دزگیر کُتگ ایشانی تہ ءَ ماھرنگ بلوچ، مھلب بلوچ، صبیحہ بلوچ، جئیند بلوچ ءُ دگہ مزنیں کساسے ءَ بچک ءُ جنک وانندگ دزگیر کُتگ اَنت۔

ماھرنگ بلوچ ءِ شنگ کُتگیں یک تامر بندیے ءِ تہ ءَ گندگ بیت کہ چون پولیس ءِ سپاھیگ ماھرنگ بلوچ ءَ زور برگ ءَ اَنت ءُ پولیس ءِ گاڑی ءَ سوار کن اَنت۔ اے وھیل ءِ ھال ءِ شنگ بیگ ءَ پد بلوچستان ءَ سرجمیں پاکستان ءُ جھان ءَ ھمک جاہ ءَ نشتگیں بلوچ ءُ دگہ انسانی ھکانی پھازوک ءُ سیاسی جھدکار ءُ رھشونان اے وھیل ترندی ءَ گوں ایر جتگ۔

وائس فار بلوچ مسنگ پرسنز ءِ رھشون ماما کدیر ءَ ٹوئیٹ کنان ءِ گوشتگ کہ “بلوچ زالبولانی لَٹ شاپی ءَ پد دزگیری ءِ ھلاپ ءَ ما اے وھد ءَ سٹی تھانہ ءِ دیما پُر ایمنیں زھرشانی ننداک ءَ نشتگ ایں۔

بلوچ نودربر آنلائن کلاسانی ھلاپ ءُ وانگی ھکانی ھاتر ءَ پرایمنیں ءُ کانود ءِ ھدانی تہ ءَ بیتگ اَنت ءُ زھرشانی کنگ ءَ بیتگ اَنت کہ پولیس ءَ اشانی سر ءَ اُرش کُتگ لٹ شاپی کُتگ اَنت ۔ ءُ مردمی کچ ءَ ڈن لٹ ءُ کُٹ کُتگ اَنت۔”

ھمے وڑ ءَ بی این ایم ءِ رھشون ءُ ڈائسپورہ کمیٹی ءِ مستر ڈاکٹر نسیم بلوچ ءَ ٹوئیٹ کنان ءَ گوشتگ کہ “یک سکیں ایرجنوکیں بلے اجکئی کرد ءِ نہ اِنت۔ وتی ھکیگیں لوٹانی ھاتر ءَ پُرایمنیں زھرشانی کنوکانی دزگیری پولیس ءُ ریاست ءُ زوراکانی کار کسب اِنت۔ زالبولیں نودربرانی پسیلانی تہ ءَ کیمرہ جنگ ءَ پد، اے دگہ یک جھدے بیگ اِنت کہ آھاں چہ وانگ ءَ دیر کنگ بہ بنت ”

پاکستان پیپلز پارٹی ءِ چیرمین بلاول بھٹو زرداری ءَ ٹوئیٹ کنان ءَ گوشت کہ “ پر ایمنیں زھرشانی کنگ یک رھبندی ءِ ھک اِنت۔ نودربرانی دزگیری ءَ ترندی ءَ گوں ایرجناں! توارانی بند کنگ ءُ ترندی ءَ گوں جیڑھاں چارگ نوکیں ھمک روچی شئے ءِ جوڑ بیتگ اے سرکار ءِ وھد ءَ۔

بلاول بھٹو ءَ گُڈ سرءَ ھیشٹیگ کارمرز کناں گوشت کہ “ پی پی پی درستیں نودربرانی یل کنگ ءِ لوٹ ءَ کنت۔”

پی ٹی ایم ءِ رھشون گلالئی اسماعیل ءَ وتی ٹوئٹ ءِ بلوچستان سرکار ءِ جارکش لیاقت شاھوانی ءَ پسہ دیان ءَ گوشت کہ “ وھدے لس مردماں چہ بُنکی ھک پچگرگ بہ بنت گُڑا “مزاحمت ” اژدری بیت۔”

آئی ءَ دیمترا گوشت کہ “نودربرانی دزگیر کنگ ءِ وتی فاشسٹی کرد ءَ کرد ءَ کورونا ءِ نام ءَ چیر مہ دئے۔ بلوچستان ءِ نودربرانی دزگیری ءَ یک برے پد ءَ فاشسٹ ایں واکدارانی کرد پدر کُتگ۔”

شال ءِ وھیل ءِ پد ءَ بلوچستان ءِ سر وزیر جام کمال ءَ ٹوئیٹر ءَ ٹوئیٹ ءِ کنان ءَ گُوشتگ کہ شھر ءِ پولیس ایس پی چہ وتی اگدہ ءَ کشگ بیتگ ءُ راستیں گامگیج زیرگ بیت ھما جنین آدمیں پولیس کارمندانی ھلاپ ءَ ھم کہ آھاں اے جیڑہ ھراب کُتگ اَنت۔