TBP Balochi

ندر پہ ابد نمیرانیں پدائیانی نام ءَ

آرپ وپا بلوچ

جی پدائی آں نرمزارانی
جنز تئی بریگیڈ بیل ءُ یارانی
دیدگیں همّل سد هزارانی
کنگر ءُ شهزاد سرمچارانی

شهسوار اهد ءِ زندگیں بچ انت
سدگلیں ڈیہ ءِ گیرت ءُ لج انت
مسلم ءِ پیمیں جان نسارانی
جی پدائی آں نرمزارانی

کوپگاں لونجان جابوئی واکاں
چو ملک میران کنوئی واکاں
ملّگ ءَ کاینت چوکہ هارانی
جی پدائی آں نرمزارانی

چو کبندانی چوٹلیں گٹ اَنت
ملهبیں هاک ءِ سر وتی مٹ انت
سینگ ءَ براه انت تیر کتارانی
جی پدائی آں نر مزارانی

چو مجید جان ءِ دروشم ءُ رنگاں
تنگهیں سالونک پہ مراد جنگاں
موکگ ءَ زاناں آ میارانی
جی پدائی آں نرمزارانی

ماتیں بولان ءِ ڈاهوئی گرند انت
کلبر ءِ زیدءِ گرستگیں پند انت
ڈڈر ءَ دِر اَنت آ تلارانی
جی پدائی آں نرمزارانی

سردئیں آرپ بیل بکتار اَنت
منزلاں اوست ءِ پل ءُ آتار اَنت
تلملیں بام ءَ پہ ودارانی
جی پدائی آں نرمزارانی

نبشتانک: مھروانیں پیرک جان

نبشتہ کار: میر زگرین بلوچ

دی بلوچستان پوسٹ

پیرک ءِ مھروانی ءُ بامردی ءِ نام من باز بر ءَ سنگتانی دپ ءَ اِشکُتگ دل ءَ ھمے ارمان اَت کہ بگندان ئے
من مُدام بے تاھیر بیتگ آں پیرک جان ءِ گندگ ءَ کہ کدی بِگنداں اَشرپی ءِ دانگ ءَ کہ مُدام ھرکسی دپ ءَ ھمے مھروانیں بامرد ءِ وشتامیں نامیں دل بس ھمے جیڈگاں گوں مُدام گُلائیش اَت کہ باریں اِے رنگیں بامرد ءُ مھروان ءِ دیدار من ءَ نسیب بیت یا کہ ناں۔۔۔۔۔۔۔۔۔۔ ھمے جیڑگاں گوں یک روچ ءِ من ءَ سنگتے ءَ گُشت کہ پیرک جاہ ءِ آھگی اِنت تو چارگ ءَ ئِے کا ئے؟
من گُشت پیرک۔۔۔۔۔۔؟ گُشت ئِے ھو!
من گو برواں ما کہ درکپتاں دیم پہ وتی سپر ءَ سر بوتاں داں پیرک ھم ساھتے ءَ پَد چار سنگت ءِ ھمراھی ءَ اَتک ءُ سر بُوت ما دست ءُ دروت بوتیں دل سک گل ءَ بال اَت۔۔۔۔۔۔۔ بلے اے زانگ ءَ نہ اِتاں کے پیرک کُجام اِنت دست ءُ دروت ءَ پد گپ ءُ مسکرائی بوت داں سنگتے ءَ گُشت پیرک من چارگ ءَ لگیتاں کے پسو دنت پسو ءَ ھوار من چم سک داتنت ءُ چاراِت من آئی ءِ مھروانی ءِ راز ءَ سرپد بوتاں اولی گِند ءُ نند ءَ گوں ھوار منی ءُ پیرک ءِ سنگتی ءِ مھر انچوش بُوت کہ گُش ئے ما کرناں چَہ یکجاہ بوتگ ایں، پمیشکا گُشاں مھر ءُ دوستی ءَ را دراجیں وھد ءِ آشنا بوگ پکار نہ اِنت بلکیں آئی ءَ را کسانیں مُدت ءُ پاسانی تہ ءَ پگمگ ءِ نام اِنت من آئی ءِ مھروانی دربُرت ھمے گند ءُ نند ءَ پَد مُدام من ءَ ھال ئِے کُت منی ھال ئِے گِپت۔۔۔۔۔۔۔۔۔۔۔۔
آئی ءِ وڑیں قابلیں ءُ زمہ داریں مردمے کہ مُدام وت ھال ئِے کُت من زانت کہ زانت ءَ چَہ سرکیل اِنت بامردے کہ وت ءَ را مزن نہ لیکیت وتی کستریناں اِنچو مھر دنت کہ اِے مھراں کدی ھم کس شموشت نہ کنت.

پیرک ءِ بامردی ءُ جنگانی توسیپ ءَ منی وڑیں نابزانتے کُت نہ کنت آئی جنگانی ءُ بامردی ءُ مھروانی ءِ کسہ وت ماں جھان ءُ راجدپتر ءَ چو چاردھی ماہ ءَ ھریکے ءِ دیدگاں جلشکان اِنت ھما دیدگاں کہ پیرو دیستگ آ دیدگ داں آئی ءِ اکس ءَ مہ چار اَنت وتی میم ءُ چارگ ءَ شموشاں وتی ھست بوگ ءِ گُمان ءَ چَہ درکاینت، پیرو راجی مھروانیں بامردے اَت کہ ھرکسی دل ءُ دیدگاں داں اَبد گوں مھراں بادشاھی کنت.

پیرو یار ھما اِنت کہ تو رپتگ ئے ھما اِنت من ءَ کندگ نئیت من رواں وٹسپ ءَ تئی لاسٹ سین ءَ چاراں واتر گوں ارسی ئیں چماں کاھاں نیکہ تئی وائسے نیکہ تئی بچکندی ئیں اکسے بس ھورک ءُ ھالی ئیں نمبرے کہ تئی مھر ءِ ھچ پیمیں ٹیکی یے پمن سوگات نہ کنت، پیرو مھرستان ءِ زیبائی تئی نام اِنت ،پیرو مکران ءِ وشبوھِیں کُوش اِنت کہ مُدام وتی لوٹوکاں تاھیر دنت ءُ وتی دامن ءَ سھڑین ایت، پیرو ملگرزیں ھیالانی چیدگ ءُ آیانی پگراں پہ مھکمیں سنگرے پہ بلوچ ءُ بلوچستان ءَ نمیرانیں کارستے کہ مُدام زندگ اِنت.

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

نبشتانک: اِے درداں کے بہ ماریت؟

نبشتہ کار: ایم بلوچ

دی بلوچستان پوسٹ

وھدیکہ پنجابی لشکر ءَ بلوچ ءِ وتواجھیں اِستان ءِ سرا ءَ کبزہ کُرتءُ ھما روچ ءَ بگر داں روچ ء مرچی بلوچ ءِسر ءَ وڑ وڑیں زُلم ءُ جبر کنان ءُ پیداک اِنت ھمے استان ءِ زوراکی یکشل ءَ تنے وهدی برجاه انت هلاسی ءِ نام ءَ نہ زانت، ھر وھد ءَ بلوچ لس مھلوک ءَ ریپینگ ءِ جُھد کنگ بوتگ ءُ بلوچ راجی جُنز ءَ چہ دور کنگ ءِ جُھد کنگ بوتگ بلے بلوچ یک ھنچیں راجے کہ آئی ءَ بازیں زلم ءُ زوراکی دیستگ ءُ راجدپتر ءِ تاکانی تہ ءَ اے چیز نکش انت کہ بلوچ راج هر وهد ءَ زورآوارنی دیم ءَ چو بولان ءِ کوه ءِ پیم مِک بوتگ ءُ آ زورآور توری اَرب بہ بنت یا پرنگی ءُ پُرتگیزی بہ بنت گوں تمردی ءَ اشانی دیم ءَ اوشاتگ ءُ وتی مادریں گلزمین ءَ را چہ بداں رَکّینتگ وھدیکہ پنجابی گوں وتی مکر ءُ پندلاں بلوچستان ءِ سر ءَ کبزہ کنت گڑا آئی ءِ کارپیم دگہ رنگ بنت ، آ وتی سرشون ءُ پالیسیاں مٹ کنت ، پیسر ءَ بلوچ ءِ کواس ءُ زانتکاریں مردماں یک پہ یک ءَ آورجنگ ءَ بندات کنت ءُگار ءُ بیگواہ کنت اِش لھتیں وھد ءَ رند آھانی کُنٹاں جنگل ءُ گیابان ءَ دور دیگ بندات کنت ،اے ھما مردم بنت کہ ایشان چیکس جنت بلے اے وتی اسل راہ ءَ یل دَیگ ءَ تیار نہ بنت وتی لوٹ ءِ سر ءَ اوشت انت ءُ مرگ ءَ همباز کن انت بلے راجی گلامی ءَ هچ رنگ ءَ نہ منّت ۔ وهدیکہ پنجاپی لشکر بلوچانی ھمے جزبگاں گنداِیت آئی سر ءَ وڑ وڑیں چیز دیم ءَ کاریت ، سیاسی کارکُنان آوار جنت ءُ پد ءَ اشانی کُنٹاں ویران ءُ گیابان ءَ چگل دیگ بندات کنت ، همے پیشدارگ لوٹیت کہ بلوچ وتی راجی جنز ءَ چہ پد کنز بہ بیت ءُ پد ءَ همے پالیسی ءَ زوریت کہ آجوئی لوٹوکیں مردمانی سیاد ءُ وارسانی گار ءُ بیگواه کنگ ءَ بندات کنت ءُ بلوچ راج ءَ وت ماں وت ءَ جنگ دارینیت ،برات ءَ گون برات ءَ میڈینت تاکہ بلوچ وتی اسل جیڑه بہ شموش اِیت ءُ بلوچ ءِ مڈیاں وتی هاسیں مردماں دنت ءُ بلوچ مھلوک گژن ءُ دگہ نادراھی ءِ بِہ مریت پاکستان لوٹیت کجام رنگ بہ بیت بلوچ ءِ نام ءُ نشان ھلاس بہ بیت ۔وڑ وڑیں پندل سازگ بوتگ ءُ بوگ ءَ انت بلے بلوچ آئی ءِ اے پندالاں گوں شریں رنگے ءَ پوه بوتگ ءُ زلم ءُ جبر ءِ سوب ءَ چہ وتی اسل راه ءَ پد نہ کنزاِتگ ۔مرچی پنجاپی لشکر زلم ءُ جبراں چوشیں گسے نیست کہ آ آماچ نہ بوتگ۔ کسّے ءِ پت بیگواه انت، یکّے ءِ براس ، یکے ءِ سیادے ،بازیں پیرمرداں وتی نوک بروتیں بچانی لاش وتی نِزوریں دستاں وت چست کرتگ انت، بازیں کسانیں جنکاں جنوزامی پوشاک گورا دیگ بوتگ، بازیں گُھاراں وتی براتانی جون دست ء وت چست کتگ انت بلے پنچاپی ءِ اے زلم ءُ جبرانی دیم ءَ انگت بلوچ ءَ وتی سرجَھل نہ کتگ ءُ پنجاپی لشکر ءَ وتی گُلزمین ءِ سر ءَ تاچینگ ءِ جھد برجم داشتگ۔ بلوچ ماتاں ھمے رنگیں دلیر ءُ نرمزار ،شیر زال ودی کُتگ کہ من وتی گوں نِزوریں ند ءَ آهانی بھادری ءُ شیرزالیءِسر ءَ آهانی چِنکس توسیپ ءُ ستاه بکن آں بلے منی ند ءَ چہ همے گال کیت کہ تو اِے مردماں گوں انساپ کنگ ءَ نہ ئے ءُ اے چیزّ ءَ من ھم سرپد باں انساپ نہ بیت آیانی گوما ——-بلے ھما کہ نَوشت کنگ زان انت ،بازین چیزّاں سرپد انت بلے گُنگ اَنت ھچ نہ گوش انت، وتی ھیالءُ لیکھاں دیم ءَ آرگ ءَ تُرس ءِ آماچ بنت ءُ یاکہ سنگ دل جوڑ بوتگ انت کہ ھرچ سرپدی ءِ دارانت بلے وتی زات ءُ زِد سَوَب ءَ ھچ نبشتہ کُت نہ کنت ۔ ءُ بژن بیت کہ من ھمے رنگیں راج ءَ گوں نزیکی دارن آں ، آهاناں وتی زھگانی چمانی ھرس گندگ ءَ نیاینت۔پاکستان ءِ پوج ایوک ءَ بلوچ ءِ گناھگار نہ انت ۔ما ھم وتی راج ءِ گناھگار ایں چی ءَ کہ زلم ءِ ھلاپ ءَ ماں وتی توار ءَ چست نہ کنگ ءَ ایں۔
بازیں ملایانی دپ ءَ اِش کرتگ کہ کجام چیزّے گندئے هراب بوگ ءَ انت بزانت کہ زلم بوگ ءَانت گڑا آئی ءِ ھلاپ ءَ جھاد کن ات ،جنگ بکن ات ۔اگاں تو جنگ دات نہ کن ئے ،گڑا آئی ءِ ھلاپ ءَ توار چِست بہ کن اِت ۔اگاں توار چست کرت نہ کنگ ئے ، ترس ئے، گڑا وتی دل ءَ آئی ءِ ھلاپ ءَ بکن ایمان ءِ نزور ترین درجہ همیش انت۔ بلے ما کُت کنگ ءَ نہ ایں ، ما ھم زالم جوڑ بوتگ ایں کہ ما مرچی اِستان ءِ زوراکیاں گوں وتی دیدگاں گندگ ءَ ایں بلے انگت بے توار انت، مئے زانتکار، کواس ، پوھیں مردم ءُ عالم دین پرچا بے توار انت، اشی ءِ متلب ایش انت ما هم اِستان ءَ گوں هوار اے زُلم ءَ کنگءَ ایں ،مئے وتی دست هوار انت ۔ما کلیں چیزان گندایں بلے ماں وت ءَ را کور کُتگ ،ما آھانی زار ءُ پریاتاں اِشک کرت نہ کنیں بلے وت ءَ را کرّ کرتگ، مارا سیما ءِ درد گندگ ءَ نیاینت ،مارا سمی ءِ، پرزانہ ءُ سمینہ ءِ کربانی گندگ ءَ نیا انت ،ما ھسیبہ ءُ مھلب ءِ درداں ماراِت نہ کنیں ،ما پرچی ءَ وت را بلوچ ءِ آکلیں ، سرپدیں ، پوھیں تبکہ گوْش ایں ءُ مئے وانگ ءُ زانگ ءِ چی پایدگ کہ مارا بیگانگی ءُ بے سمائی ءِ تہ ءَ دور دنت، آ زانت درداں زبان نہ دنت، آ وانگ کہ زُلم ءِ ھلاپ ءَ نبشتہ کنگ مہ پرما ایت،آ وانگ چے کار ءَ کیت وتی توسیپ ءِ یاکہ زرءُ مال ءِ مُچ کنگ ءِ ،ما پرچی ءَ کتاباں وتی کمرہ ءِ زینت جوڑ کنیں؟ ، کسے ءِ نشان دیگ ءِ ھاتر ءَ ، اے وڑ نہ انت بائد انت کہ کتاباں مئے تہ ءَ انسانیت ءِ ارزشت ودی کُرتیں۔آدگہ راج وان انت وتی راج ءَ دیمروی دے انت ،آھانی دردان دیم ءَ کارانت، زلم ءِ ھلاپ ءَ وتی توار ءَ چست کنت بلوچ وانیت وت ءَ را ءُ وتی راج ءَ دل ءَ بارت۔
بلوچ راج پیسر ءَ ھلاس انت چی ءَ کہ آئی سر ءَ وڑ وڑیں زلم ءُزیادتی بوتگ ءُبلوچ راج ءَ ھلاس کنگ ءِ جُھد بوتگ ۔بلوچستان ءِ راجی گواجن برتگ انت ءُ بھا کتگ انت، مئے بلوچ مھلوک گریبی ءَ مِرگءَ انت۔بلوچ آدگہ راجاں چہ گیش سیر انت بلے بلوچ گریب کنگ بوتگ ، منی برات ءُ مردم گژن ءَ مرگ ءَ انت ماں واب ایں ، ما کدین وابءَ پاد کائیں ؟
استاد مرید راست گوشیت ۔بش مَتورے مِش مریرے ماپ کن استا مرید ما چشین چیز ءَ پاد نیا ایں مارا وھدے ایٹم بمب ءَ پاد نہ کرت، وھدیکہ بلوچستان ءِ دلبند ءَ آس دیگ بیگ ءَات ۔مارا ورناهانی تچوکیں هوناں پاد نہ کرت ءُ اسپیت ریشانی جوناں پاد نہ کرت ، اِے دویں لوز کجا پاد کن انت ۔ جسم بہ مرتین بلے مئے زمیر زندگ بوتیں ،بلکیں ما کمو کوشست کُت ات ۔ بلے مئے زمیر مرتگ ، ما کجا پاد کائیں ،ما ملامت نہ بئیں، مارا تہ ءَ چہ توار نئیت انت کہ پادبیا ات ،ڈن ءَ چنکسیں کوکارءُ جگّ ءَ ئے بوگ انت ۔
مارا الی ھیدر ءِ جھد گندگ ءَ نئیت ،
آئی ءِ پت ءَ چنچو وھد انت کہ بیگواه انت ، وتی بابا ءِ آجوئی ءِ هاتر ءَ آئی ءَ کجام در نہ ٹُکّیتگ بلے انگت آئی بابا ءِ کس سوج ءَ نہ دنت
ھمے رنگ ءَ زاکر جان ءَ یازدھُمی سال سرجم بُوت انگت بیگواه انت ، آئی مات ءِ ارس اے گُلرمین ءَ چنڑین انت پنجابی زالم ءَ گوں هوار مارا هم سما نیست ، زاکر ءِ مات کجام دردانی تہ ءَ سپر کنگ ءَ انت آئی ءِ گُھار بانک پرزانہ بلاھیں پندے بُراِت بلے آئی ءِ اے دراجیں پند ءِ بُرّگ ءَ رنجینت سنگه ءِزهگان ءَ هچ پرک نہ کپت ۔زاکر جان ءِ مات ودار ءَ انت وتی چُک ءِ ھاتر ءَ آئی ءِ پریات آزمان ءَ کپ کنت بلے مئے دانشورانی کرا آئی ءِ پریات سر نہ بنت۔
ڈاکٹر دین مھمد کہ آئی ءِ بیگواھی ءَ 11 سال سرجم بوتگ کسے آئی ءِ ھال ءَ نہ دنت ،آئی ءِ شیرزالیں زھگاں وتی جد ءُ جھد ءَ برجم داشتگ کدی کراچی ءَ کدی اسلام آباد ءَ کدی کوئٹہ ھر جاہ ءَ وتی جھد کتگ اش، وڑ وڑیں زھرشانی ءُ پند بُرّاِتگ سمی کراچی ءَ تاں اسلام آباد گون ماما کدیر پرزانہ ءُالی ھیدر یک جاہ پند بُراِتگ آئی ءِ لوٹ ھمے بیتگ منی پت ءَ گون هوار کلیں بلوچ بندیگ یل کنگ بہ بنت بلے اِش کنگ ءِ ھاترا گوش لوٹیت آئی ءَ وتی کچ ءُ کساس ءَ چہ گیش جھد کتگ.
ائیدانی روچ ءَ مھلوک ءَ وشی کُتگ وتی سیاد ءُ مردم دیستگ انت آوان گوں وشیان یک جاہ بوتگ اَنت ۔بلےسمی ءُ مھلب اے وھد ءَ پریس کلابانی دیم ءَ بوتگ انت ۔آدگہ ائیداں وتی پت ءِ گوم ءَ گوزینتگ بلے ھمے وشیان چہ زبھر بوتگ انت
یازدہ سال ءَ دپ جلدی کاریت ائی ءِ تہ ءَ چنچو روچ بنت چنچو ماہ بنت اے سمی ءُ مھلب چہ گیش دگہ کس زانت نہ کنت انت، ودار سک گران انت ھما زانت کہ ائی ءَ وتی زندگی ءِ تہ ءَ وادر کُتگ پہ وتی گارءُ بیگواھیں مردمانی ھاتر ءَ ،
بلوچ زالبول کہ لوگ ءِ باھوٹ بوتگ انت ءُ لوگ ءَ چہ در نہ کپتگ انت بلے مرچی سمی ،مھلب ،ھسیبہ،سیماء پرزانہ ،ھوران بی بی گل ءِ رنگین سدانی کساس ءَ زالبول وتی لوگ ءُجاہ یل کتگ انت وتی روچ شپ راھانی سرا گوازینتگ انت پہ وتی دوستین مردماں کہ یل بنت یک روچے لوگ ءَ واتر کنت ۔
آرامان کہ تنگی سمیءُمھلب ءِ ڈولا دگہ ھزارانی چم وتی پت ءُ برات ءُ سیادانی راھاں چارگ ءَ انت کہ کدی واترکنت ءُ زندگی پدا شادان بیت ۔
ودار ءِ آس ءِ تہ ءَ کلیں پیلوش انت ودار دنیا ءِ تہ ءَ کلیں چیزّاں چہ گیش گران انت مرگ ءِ جند بوت کنت گران بہ بیت بلے منی ھیال ءَ آ آسان بیت کہ مردم زوت هلاس بیت ۔ ودارمرگ ءَ چہ گیشتر گران انت ھمے آس ءَ مرچی مئے بلوچ زہھگ زالبُول مرد کلیں سُوچگ ءَ انت بلے مئے زانتگار، فلاسفر ،آلم ،ءُ شائر کلیں واب انت کہ وتی توار ءَ چِست نہ کن انت باز کم مردماں وتی توار ءَ چست کرتگ ، ما اے درد ءَ نہ ماریں ءُاے درد مئے نہ انت ۔
اے سمی ءُ مھلب ءِ درد انت منا ءَ چے کار
اے سیما ءُ پرزانہ ءِ درد انت من ءَ چے کار
اے ھسیبہ ءُ سمینہ ءِ درد انت من ءَ چے کار
بلوچستان ءِ شیرزالانی درد انت من ءَ چے کار
من انگت زندگ آں ءُ منی برات بیگواہ نہ بوتگ، اے زاکر ءِ مات ءِ درد انت ھما بزانت من ءَ چے کار
اےزاھد ءُسَمی اللہ ءِ لوگے جیڑه انت من ءَ چے کار
اے ھماھانی درد انت کہ راج ءَ پہ درد وارگ ءَ انت ،ما نِشتگ ایں ءُپاد ماں پاد ءِ سر ءَ انت گوش ایں منا چے کار

ما کور ءُکرّانی میتگ ءَ ودی بوتگ ایں ،ما چے زانیں
اسیراب انسانیت ءِ پرک ءَ زانتگ اے نہ گوشتگ من ءَ چے کار
درد چے ءِ دردانی درمان من ءَ ھچ ءَ پہ نوتگ کار
آھان بلوچ ءِ درد مارتگ اے نہ گوشتگ من ءَ چے کار
منی لوگ بُن نہ گِپتگ منی چم در نہ کپتگ منا چے کار
بے لوگانی بے لوگی دیستگ آھاں اے بہ گشتیں من ءَ چے کار
ما مرچی پاد کا ایں ھمے گوشیں شما بزان ات ءُ شمئے گارءُ بیگواهیں مردم ، من ءَ چے کار
بلے آهانی امیت بوتگ مئے راج بیت یک روچے الم سار

بائد ھمیش ات کہ ما گوں اشاں ھم پاد بہ بئیں تین ان راھانی سر ءَ ماں گون ایشان یک مشت بیتن ئے اے ھاتر ءَ نابیتن پرواہ نیستگ ات کہ آیانی دردان گوں آوار ایں بلے اے ھاتر ء بے بن کہ باندا منی روچ انت یاکہ منی پت برات گھار سیاد ءِ روچ انت
مرچی یازہ سال ءَ پیسر ایوک ءَ زاکر مجید ءُ ڈاکٹر دین مھمد بیتگ انت بلے مرچی ھزرانی کساس ءَ انت باندا لکھانی کچ ءَ بنت چی ءَ کہ ماں اے وش پیمی ءَ کدی مابئین کہ ماں پاد نائیں بلکں بچیئں نا اے اسپیتین دُروگے ڈاکٹر دین مھمد ءَ وتی پشت ءَ شیرزال پیدا کُتگ ائی ءِ درداں روچ شپ کنگ آ انت بلے وتی پت ءِ پٹ ءُ پھوک ءَ دم نابارت ءُ ھر مشکلانی گوں دیم پہ دیم بیت
من تو کئی پُشت ءَ جوڑ کتگ؟ کے منی تئی پشت ءَ ھست انت؟ کے مئے توار ءَ دیم ءَ کاریت؟ کے وت ءَ را گرمانی سر ءَ پیلوش کنت ؟کے وت ءَ را بے واب کنت؟کے منی ءُتئی ھک ءَ وتی توار ءَ برز کنت ؟ بلے پرچا بہ کنت من ءُ تو آئی ءِ درد ءَ باز ماراِت آئی گوما ھوار ات ایں ۔من تو آ وھد ءَ ساڑی ات ایں پاد تُرنگل بوتن منی تئی پاد بازتُرنگل بوت اَنت ۔ائید ءَ راہ ءِ سر ءَ نشتگ ات ایں، من ءُ تو گون اشاں ھوار توار چِست کت؟
پادا پادنہ اتک اِت ، ھاک بئے پادا وتی جندے ھاتر ءَ پادا، وتی برات ءِ ھاتر ءَ پادا ،وتی سیاد ءِ ھاتر ءَ پادا، بلوچستان ءِ ھاتر ءَ بلے پادا ھمروچ ءِ مرگ ءَ شرتر انت کہ یک رندے بہ مر ،پادا کہ مات ءِ سریگ برگ بیتگ انت گھارءِ ازت برگ بیگ ءَ انت پادا توار چست کن ھزاراں بلوچ پسگانی زمزیلان پچ کن.

منی آلماں آهانی آلمی مراد بات ،
زانتکارءُ کواساں آهانی زانتکاری مراد بات ،
باریں اِشان پہ کجام شپ روچ بنت
ترس ءِ زانتی شمارا مراد بات.

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

کیمرہ ءِ چماں چہ دور

ٹی بی پی شونگال

بلوچ نودربر گوستگیں دوھپتگاں چہ گیش بلوچستان ءَ آنلائن کلاسانی ھاتر ءَ انٹرنیٹ نہ بیگ ءِ بگیری ءَ زھرشانی کنگ ءَ اَنت۔ اولی زھرشانی بنجل سندھ ءِ مزن شھر کراچی ءَ جنگ بیتگ اَت ءُ پد ءَ کم کم ءَ اے یکشلی ءَ سرجمیں بلوچستان ءَ سربیتگ ءُ نودربراں انٹرنیٹ ءُ دگہ آسراتیانی لوٹ کنگ ءِ جھد گیشتر بیان بیت اَنت ۔

بیست ءُ چار جون ءَ جتائیں نودربرانی گلاں وتی زھرشانی بنجلاں چہ دیم پہ بلوچستان ءِ مزن آمید گِس ءِ نیمگ ءَ روگ ءَ بیتگ اَنت دانکہ اود ءَ یک زھرشانی ءِ کنگ بہ بیت بلے آیانی واھگانی ھلاپ ءَ پولیس ءِ نیمگ ءَ ترندیں رویش ءُ کم شرپی ءِ دیمپانی کنگ اِش کپتگ اَت۔ درزنانی کساس ءَ بچک ءُ جنکیں نودربراں دگانی سر ءَ لٹ دیگ ءُ چِکان پولیس ءِ اولاک ءَ پُر کنگ ءُ زندان ءَ برگ بیتگ اَنت۔ ءُ اے درست کیمرہ ءِ چمانی دیم ءَ بیگ ءَ بیتگ اَنت۔

چاران چاران ءَ پہ ترندیں لٹ شاپیانی تامر انٹرنیٹ ءَ ھمے کچ ءَ شنگ بیتگ اَنت کہ ٹوئٹر ءِ سر ءَ درستاں برُز ٹرینڈ کنان ءَ نودربرانی یل کنگ ءِ لوٹ کنگ بیتگ ءُ اے ٹرینڈ ءَ نہ تھنا دمگی سیاست دانانی دلگوش رس اِتگ بلکیں میان اُستمانی انسانی ھکانی گلاں ھم پولیس ءِ زوراکی ایر جتگ ءُ نودربرانی یل کنگ ءِ لوٹ کُتگ۔
لوٹانی ترندی ودان ھمینچکا کہ سربیتگ کہ مزن وزیر جام کمال ءَ اے گپ ھم من اِتگ کہ دزگیری ءِ پرمان نامگ پرگینگی سرکار ءَ نہ داتگ ( چہ دگہ جاھاں اَتکگ)۔

ھیر، اے سرجمیں جاورھال ءَ بازیں جُست ودی کُتگ اَنت۔ بلوچستان ءِ پولیس ءں واکدار پرگینگی سرکار ءِ دست ءَ اَنت یا آیاں ھم چہ دگہ تاگتانی نیمگ ءَ پرمان نامگ دیگ بنت؟ اگاں پولیس ءِ واکدار، کہ فرنٹئیر کور ءِ وڑ ءَ” بنّام “ نام ءُ دپ ھم نہ اِنت، وتی بے رھمیں لٹ شاپیاں کارمرز کن اَنت، سرزائری ءَ کیمرہ ءِ دیما چُش بے رھمی ءَ گوں نودربرانی سر ءَ تاگت کنگ ءَ ھچ تُشیں ھم چَک ءُ پد نہ بیت گُڑا بلوچستان ءِ ھما ھند ءُ دمگاں چی بیگ ءَ اِنت؟ ، کہ دیر دیر اَنت ءُ اود ءَ کیمرہ ءِ چم ھم کدی رَس اِت نہ کنت؟

بوت کنت اے جُستانی پسہ دو ھزار ءُ دہ ءَ پاکستان ءِ نامی ئیں روتاک ڈان نیوز ءِ یک ندارگ کشوکیں لبزے ءِ تھ ءَ چیر اَنت، کہ بلوچستان ءِ شھر ھزدار ءَ ”دھشت“ تُرس پیداک کنوکیں یک وھیلے ءِ اکس کشی کنگ بیتگ اَت۔ سال دو ھزار ءُ دہ ءَ بلوچ نودربراں ڈگری کالج ھزدار چہ ءَ ھمے وڑ یک پُر ایمنیں روانکے ءِ کشگ ءِ جھد کنگ ءَ اِت اَنت کہ فرنٹیر کور (ایف سی) ءِ کارمنداں نودربرانی سر ءَ تیر گواری کنان ءَ، دو ورنا صدام ءُ علی دوست نمیران کُت اَنت ءُ دگہ چار نودربر ٹپی کُت اَنت کہ ایشانی تھ ءَ لیاقت علی نامیں مردے کہ بلوچستان انجینئیرنگ مزن شھدربرجاہ ءِ نودربر ھم ھوار اَت، کہ داں روچ مروچی چہ یک پادی ءَ زبھر اِنت۔

اے بلوچستان ءَ کیمرہ ءِ باپشت ءَ بیتگیں ھزاراں وھیلاں چہ بس یکے کہ ایشی ءَ یک پاکستانی روتاکے ءَ جاہ رس اِتگ، گیشتریں وھیل بے سمائی ءَ زوراکی ءِ نا ھچ نہ کُتگیں کسہ جوڑ بیتگ ءُ گوست ءِ بھر جوڑ بیتگ اَنت۔ اے وھیل نہ تھنا مزن وزیر جام کمال ءِ اجکہ بیگ ءِ پسہ اِنت کہ دزگیری ءِ پرمان اگاں آئی ءِ نیمگ ءَ نیتکگ گُڑا چہ کج ءَ اتکگ؟ ءُ اے وھیل اے گپ ءِ ھم پدراھی ءَ ھم کنت کہ بیست ءُ یکمی کرن ءَ ھم بلوچستان ءَ چہ انٹرنیٹ پرچہ زبھر کنگ بیتگ ؟

بلوچستان ءَ پوجی اسٹبلشمنٹ اے لیکہ ءَ اوشتاتگ کہ بلوچستان ءَ ھرچ کارے کہ بیگ ءَ اِنت اِشی ءِ تِرْک ءُ تواراں ڈن ءَ کس سرپد مہ بیت ۔

سراوان ءِ نادراہ جاہ ءَ کورونا ویروس ءَ پہ ڈبگی ءَ جاڑیگ

دی بلوچستان پوسٹ

سراوان ءِ نادراہ جاہ رازی ءَ پہ کورونا نادراھی ءَ پنجاہ جتائین تھت جاڑیگ کنگ بہ بیت –

سر بیتگیں ھالانی رد ءَ نادراہ جاھے ڈاکٹر امیر گورگیج ءَ گوشتگ کہ رازی نادراہ جاہ سراوان ءَ بیست ءُ دو ڈبگی کوٹیانی تہ ءَ جتائیں تھت شر کنگ بیتگ اَنت کہ اشانی تہ ءَ چار پہ کورونا ءَ کارمرز بیگ ءَ اُنت –

آئی ءَ گوشت کہ پہ کورونا نادراھی ءَ ڈبگ ءِ ھاتر ءَ سِی تھت انگت درکار اِنت کہ وھد ءُ جاورانی سر ءَ کارمرز بہ بنت –

ڈاکٹر امیری ءَ گْوشت کہ انی نادراہ جاہ ءَ ھپت نادراہ پہ کورونا ءَ ڈبگ بیتگ اَنت کہ اشانی دار ءُ درمان بیگ ءَ اِنت –

زانگ بہ بیت جھانی نادراھی ءَ سرجمیں جھان اے وھد ءَ پُچیتگ ءُ تنی وھدی بازیں جاھاں لاک ڈاؤن ھست اَنت –

کراچی ءَ اسٹاک ایکسچینج ءِ سر ءَ اَرش ، بی ایل اے ءَ زمہ واری منّ اِتگ

دی بلوچستان پوسٹ

مروچی کراچی ءَ پاکستان ءِ مستریں بازار زرکاری جاہ کراچی اسٹاک ایکسچینج ءَ بیتگیں اُرش ءَ بازیں مردمے مُرتگ -پاکستانی سیکیورٹی ادارھانی رد ءَ دیمپانی ءَ چار اُرشکار کُشگ بیتگ اَنت ءُ اے ٹاہ دیگ بیگ ءَ اِنت کہ اسٹاک ایکسچینج ءِ ٹریڈ مارکیٹ ءِ تہ ءَ پُترگ ءَ دارگب بیتگ اَنت –

گیشیں ھالانی رد ءَ اے اُرش اسٹاک ایکسچینج ءِ پچ بیگ ءَ پنچ ساھت پیسر دمگی وھد ءُ پاس ءِ رد ءَ ساھت دَہ ءُ نیم ءَ بیتگ – چاگردی رسانکجاھاں شنگ بیتگیں تامراں چارگ بیت کہ چار اُرشکار ءُ یک سرمنی گاڑی ءَ چَہ ایر کپ اَنت ءُ پیش تیری ءَ سیکیورٹی کارندھاں کُش اَنت – کہ چریشی ءَ یک اُرشکارے ءِ جون ھمود ءَ گِندگ بیت ءُ سَے اُرش کار سیکیورٹی ءَ سر گوز اَنت ءُ تہ ءَ پُتر اَنت –

کراچی ءِ پولیس ءِ جارکش ءِ رد ءَ تھی دروازگ ءَ دزبمب اُرش ءُ تیرگواری ءَ چَہ یک سب انسپکٹر ءُ دو پھازوک مِر اُنت، ءُ لس مرتگینانی کچ دَہ اِنت بنشون ءِ رد ءَ سَے پولیس کارندہ، دو پھازوک ءُ دو شھری زد بیتگ اَنت –

ھمے وڑ ءَ جنگ ءِ وھد ءَ بلوچ آجوئی دوستیں سلاہ بندیں گل بلوچ لبریشن آرمی ءَ چاگردی رسانکدر ٹوئٹر ءَ وتی رسانکی ادارہ “ھکل ” ءَ اے اُرش ءِ زمہ واری منّ اِتگ ءُ گْوشتگ “بلوچ لبریشن آرمی ءِ مجید بریگیڈ ءَ مروچی کراچی ءَ اسٹاک ایکسچینج ءِ سر ءَ پدائی اُرش کرتگ – مئے جنگول انگت ءَ ماڑی ءِ تہ ءَ جاڑیگ اَنت ءُ آیاں ماڑی ءِ بھرے وتی دستاں کرتگ – “
گیشیں ھالانی رد ءَ اُرش ءُ دو ادار ءَ پد بلوچ لبریشن آرمی ءَ مجید بریگیڈ ءِ بیتگیں اُرشکارانی نام ءُ اکس شنگ کرتگ اَنت، چریشی ءَ مجید بریگیڈ ءِ پونیپارمانی تہ ءَ گندگ بنت شنگ بیتگیں اکسانی تہ ءَ اُرشکارانی نام تسلیم بلوچ پنام ءِ مسلم، شھزاد بلوچ پنام ءِ کوبرا، سلمان ھمل پنام نوتاک، سراج کنگر پنام ءِ یاگی اِنت –

رسانکدراں برجاھیں بیرانی گپ ءُ اُرش ءِ دارگ ءِ ٹاہ انگت ءَ پاکستانی سیکورٹی ادارھانی نیمگ ءَ شنگ بیتگ – بی ایل ءَ داں انگت ءَ اے اُرش ءِ ھال ءُ مول شنگ نہ کرتگ اَنت، رسانکدراں دو اُرشکارانی لاشانی اکس دیم ءَ اتکگ اَنت –

پولیس ءُ رینجرز ءِ بازیں سپاھی ءِ اے اُرش ءَ پد سرجمی ءَ دمگ اِش انگیر ءَ کرتگ – پولیس ءِ بنشون ءَ ٹاہ داتگ کہ چاریں اُرشکار جنگ بیتگ اَنت ءُ آیانی گون ءَ نوکیں سلاہ، شورو ءُ ساز ءُ سامان دزگپتگ اَنت –

کراچی اسٹاک ایکسچینج ءِ کارگس آئی آئی چندریگر دگ ءَ اِنت ءُ آئی ءِ گور ءَ اسٹیٹ بینک آف پاکستان، پولیس ھیڈ کوارٹر ءُ بازیں دگہ بینک ءُ رسانکدرانی کارگس اَنت – دمگ زرکاری ءَ نامانی ءِ سوب ءَ پاکستان ءِ “وال اسٹریٹ ” زانگ بیت اِنت – کراچی اسٹاک ایکسچینج پاکستان ءِ مستریں اسٹاک ایکسچینج اِنت کہ اے ھژدہ ستمبر نوزدہ سد ءُ چِل ءُ ھپت ایشی ءِ بنھِشت ایر کنگ بیتگ –

زانگ بہ بیت مجید بریگیڈ بلوچ لبریشن آرمی ءِ ایلیٹ یونٹ اِنر، وتکُش اُرش ءُ پدائی اُرشانی نام ءَ زانگ بیت اِنت – بی ایل اے مجید بریگیڈ ءِ بنھِشت گل ءِ گوستگیں سروک اسلم بلوچ ءَ ھبدہ مارچ دوھزار ءُ دَہ ایر کرتگ – چریشی ءَ پد مجید بریگیڈ ءَ اولی اُرش سِی دسمبر دوھزار ءُ یازدہ ءَ شال ءَ کرتگ ءُ گوستگیں وپاکی وزیر نسیر مینگل ءِ چُک ءُ بلوچستان ءَ ڈیتھ اسکواڈانی سروک شپیک مینگل ءِ سر ءَ کرتگ – چریشی ءَ پد دومی اُرش یازدہ اگست دوھزار ءُ ھژدہ ءَ اسلم بلوچ ءَ وتی ورنائیں بچ ریھان بلوچ ءَ دالبندین ءَ چینی انجنیئرانی سر ءَ یک گاڑی ءِ سر ءَ کرتگ – سیمی اُرش بیست ءُ سَے نومبر دوھزار ءُ ھژدہ ءَ بیتگ، وھدیکہ مجید بریگیڈ ءِ سے باسکاں کراچی ءَ چینی کونسل ھانہ ءِ سر ءَ اُرش کرتگ اَت – یازدہ مئی دوھزار ءُ نوزدہ ءَ مجید بریگیڈ ءَ چارومی مستریں اُرش چار پدائیاں گوادر ءَ چار استار ھوٹل پی سی ءِ سر ءَ کرتگ ءُ بیست ءُ چار اداراں داں وتی دست ءَ کرتگ – وھدیکہ مروچی بیست ءُ نُہ جون دوھزار ءُ بیست ءَ بیتگیں اُرش ءَ کراچی ءَ اسٹاک ایکسچینج ءِ سر ءَ بیتگیں اُرش ءَ مجید بریگیڈ ءِ پنچمی مستریں اُرش اِنت – اے اُرش ءَ چار پدائی اُرشکاراں بھر زرتگ

روکپتی بلوچستان ءَ دو گاڑیانی ٹکر ءَ یک مردمے بیران

دی بلوچستان پوسٹ

سر بیتگیں ھالانی رد ءَ روکپتی بلوچستان ءَ یک ٹویٹا گاڑی ءُ بینزے ءَ ٹکر وارتگ چریشی ءَ چَہ پیک اپ گاڑی ءَ سواریں یک مردمے بیران بیتگ –

بیران بیتگیں مردم ءِ پجار سِی ءُ ھشت سالی ئیں ابدلھکیم جھمنند لاشار کاھی ءِ نام ءَ زانگ بیتگ –

دمگی مردمانی رد ءَ گوستگیں روچ ءِ نیمروچ ءَ چابھار ءِ چَہ سد مِل دور جکیگور ءِ ھند ءَ گبولانی ءَ یک بینزے ءَ گوں پیک گاڑی ءَ ٹکر وارتگ چریشی ءَ چَہ پیک اپ ءَ سواریں رھگوزی ءِ زدگ بیتگ ءُ دمانے ءَ پد مساپر ءَ وتی ساہ داتگ اَنت –

دمگی مردماں گْوشت کہ وھیل ھما وھد ءَ پیش اتکگ کہ بینز دیم پہ چابھار ءَ روگ ءَ بیتگ ءُ راہ ءَ پیک اپ گاڑی ءَ را ٹکرے جتگ ءُ گاڑی ءَ سواریں آدگہ مردم سلامت اَنت –

لاپ والنیگ ءِ یکیں در بیتگ، اے سرکار ءَ بند کرتگ ما کجا چَہ وتی زھگاں لاپ بہ دئیں – باپاری مھلوک

سر بیتگیں ھالانی رد ءَ مرچی مند ءَ لس مھلوک ءِ نیمگ ءَ پاکستانی فوج ءِ نیمگ ءَ مند ءِ سیمسر ءِ بندش ءِ ھلاپ ءَ یک روانکے چہ بلو ءَ کَشگ بوت ءُ سورو ءَ آرمی ءِ بنجل ءِ دیم ءَ روانک ءِ مردماں نندانک جتگ –

دمگی مردمانی رد ءَ زھرشانی ءَ ھواریں مردماں سیمسر ءِ بندش ءِ ھلاپ ءَ اوگام جتگ ءُ سیمسر ءِ پچ کنگ ءِ لوٹ کرتگ ۔

مند ءِ لس باپاری جھگیراں مند ءِ آرمی بنجل ءب میجر ءَ گْوشت کہ ھپتگے ءَ پد سیمسر ءِ پچ کنگ ءِ سدکی ءَ گوں زھرشانی آسر کرتگ ۔

زھرشانی ءَ ھواریں مردماں گْوشت کہ اگاں ھپتگے ءَ پد سیمسر پچ کنگ نہ بوت گڑا زھرشانی درچ ھمے وڑ ءَ گیشتر برجاہ دارگ بیت اِنت ۔

زانگ بہ بیت مند ءِ مردمانی نود درسد گزران گوں سیمسر ءِ کار ءَ گوں بندوک انت، مند ءِ گیشتریں مردم چہ روکپتی بلوچستان ءَ آؤکیں تیل ءُ وردنی چیزانی باپاری کن انت ءُ وتی زندمان ءِ روچاں تئیلین اَنت۔ فوج ءِ نیمگ ءَ مند ءِ سیمسر ءِ بند کنگ مند ءِ مردماں چہ ھمے روزگار ءَ پہ زانت زبھر کنگ ءِ پندلےسازگ بیگ ءَ اِنت ۔

نبشتانک: اورناچ ءِ بیگواھیں ڈاکٹر دین جان بلوچ

نبشتہ کار: سمّو نور

دی بلوچستان پوسٹ

سال 2019 ءَ سوڈان ءَ لس مھلوکءِ یک آشوبے اتک ءُ اے آشوبءَ اُمر بشیر ءِ سی ءُ پنچ سالانی ڈیکٹیٹرشپ ھلاس کُت ءُ یک راجی بُنھشتے ایر کُت، اے آشوبءِ رھشونی کنوک سوڈانءِ ڈاکٹر بنت، ڈاکٹر زمینءِ بزگر ءُ لس مھلوکءِ اِلاج کنوک انت ءُ آھانی درداں جوانیءَ سرپد بنت۔ ھمے درد آھاناں راجی زرمبش ءَ گوں ھمگرنچ کن اَنت۔

ھمے سوب اِنت کہ زورگریں اِستان ھمک وھدءَ چہ اے پیمیں پگری ڈاکٹراں ترسءِ آماچ اِنت۔ آ ڈاکٹر سوڈانءِ الہ نگداللہ بہ بیت، کیوبا ءِ ڈاکٹر چے گویرا بہ بیت یا کہ بلوچستانءِ ڈاکٹر دین جان۔

زورگریں استانءِ زوراکی برجاہ اِنت ھما ڈاکٹرانی سر ءَ کہ آ یک رژناھیں پکرےءِ واھند اَنت، استانءِ زوراکی اِنت کہ بلوچ راجی آجوئیءِ جنزءَ گوں بندوکیں، بلوچ ڈیھءِ بازیں ڈاکٹر ماں بندی جاھاں بندیگ انت، بازینے شھید کنگ بوتگ ءُ باز راجی آجوئیءِ جنزءِ سرپءَ وتی لیکہءِ بنیاتءَ وتی جد ءُ جھدءَ دیمءَ برگءَ اَنت۔

ھمے ڈاکٹراں چہ یکے ڈاکٹر دین جان انت کہ آ 28 جون 2009 ءَ چہ اورناچ ھزدار ءَ آئیءِ نادراھجاہءَ چہ آوار جنگ بوت۔ چہ آئیءِ بیگواھیءَ پد ڈاکٹرانی آوار جنگءِ رِد یکشلہ برجاہ بوت ( مرچی ءَ ھم برجاہ انت ) ءُ بیگواھانی لڑ ءَ نام گیش بوان بوت انت۔

ڈاکٹر دین جان کہ آ بلوچ راجی آجوئیءِ جنزءِ رھشونی کنوکیں سیاسی پارٹیءِ بنھشت ءِ ایر کنگءَ ھوار انت۔ وھدے کہ چیئرمین گلام مھمد ، رھیم ایڈوکیٹ ، لالا منیر گوں وتی سنگتاں بلوچ راجی جنزءِ سیاسی عوامی مھازءِ بنھشتءَ ایر کن انت ، اودءَ ڈاکٹر دین جان چیئرمین گلام مھمد ءِ ھمکوپگ بیت، پد ءَ شھر ، میتگ ، کوہ ، گیابان، کلیں نیمگاں آجوئیءِ توار چست بوان بیت ، برے ھزدار، برے کیچ، برے کوھلو ءَ آجوئیءِ کاروان جنزان ات۔ مرچی ھم چیئرمین گلام مھمد ءُ ڈاکٹر دین جانءِ کاروان دیم پہ منزلءَ جنزان انت۔

ڈاکٹر چے گویرا گش ایت کہ کیوبن جنگءِ بنداتءَ من جنگءِ تہءَ یک ڈاکٹرےءِ بستارءَ ھوار بوتگ آں ، بلے ھمے جنگءِ میانءَ یک انچیں وھدے اتکگ کہ منی دیمءَ دو راہ پشت کپتگ کہ منءَ گچین کنگ لوٹ اتگ کہ من جنگءِ تہءَ یک ڈاکٹرےءِ ھیسیتءَ بھر بہ زور آں یا کہ یک جنگولے ءِ ؟ گڑا تیرگواریءِ میان ءَ من ایش پیسلہ کتگ کہ من جنگءِ تہءَ یک سپاھی یے باں۔

بگندئے بلوچ ڈاکٹرانی گورءَ ھم یک انچیں جاورے اتکگ کہ آھاں پیسلہ کنگی بوتگ کہ آھانی یک نیمگے وشیں زند ءُ وتی کھول ءُ واھشت ءُ دومی نیمگءَ بلوچ راجی جنز ءِ میان ءَ یکے گچین کنگی بوتگ۔ ایش جاہءَ ڈاکٹر دین جان ءُ سنگتاں وتی زمینءَ پہ جد ءُ جھد کنوکیں کِشک گچین کتگ۔

اورناچءَ چہ ڈاکٹر دین جان بیت اِنت یا کہ جاھو ءَ چہ ڈاکٹر منان ءُ یا کہ اکبر مری چہ کوھستان مریءَ ، آھاں وتی پیلڈءِ تھ ءَ پدمنتگیں بلوچ مھلوکءِ ھاتر ءَ پہ کار کتگ ءُ دومی نیمگءَ بلوچءِ گلامیءِ نادراھیءِ الاج کنگءِ ڈُبّءَ وتی کوپگاں زرتگ۔ ھمے ھاترا بلوچ ڈاکٹرانی سر ءَ زور آوریں استانءِ زوراکی تْرندیءَ گوں برجاہ انت۔

یوراگوےءِ پریزڈنٹ (2010-2015) جوز مجیکہ 1970\80 ءِ دھک ءَ یوراگوےءِ ڈیکٹیٹرشپ دورءَ دوازدہ سال ماں زندانءَ بندیگ بیت ءُ مئے ھم بازیں جوز مجیکہ پاکستانءِ زندانءَ بندیگ انت ، الی ازگرءَ بیست سال انت کہ بیگواہ انت ، سمیع ءِ پتءَ پہ آئیءَ 11 سال ودار کت ءُ ایش دنیاءَ پہ مدامی یلہ دات ءُ سمیع ءِ ودار انگت برجاہ انت ءُ کودکیں الی ازگرءَ وتی کسانیءِ یازدہ سال ماں پریس کلبءَ پہ زھرشانیءَ ببا دات ءُ سمی ءُ مھلب مرچی ھم پہ ڈاکٹر دین جانءِ بچکندےءِ ودارءَ نشتگ انت۔

کھولانی مردماں پہ یکےءِ پت ، یکےءِ برات، یکےءِ چکءِ سدگ ءِ درد انت بلے پہ پارٹیءَ یا پہ راجی آجوئیءِ جنزےءَ چوشیں کیڈرےءِ روگ پہ پارٹی ءَ بے کساس تاوان انت، چیءَ کہ ھمے کیڈر ءَ وتی راجءِ رھشونی کنگی انت ءُ جنگءَ را یک منزلےءَ سر کنگی انت۔

داں گلامی برجاہ انت اے گار ءُ بیگواھیءِ دِرچ ھم برجاہ بیت ، داں بلوچءِ پگری جھد دیمءَ جنزان انت ایش گار ءُ بیگواھیءِ لڑ ودان بیت۔ کارست ھما اَنت، پکر ھما اِنت ، جھدءِ بیرک بڑّ ءَ اِنت، بس نام مٹ بوان بنت ءُ راجی آجوئیءِ جُنز برجاہ بیت۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

نبشتانک: ڈاکٹر دین جان انگت بیگواہ اِنت

نبشتہ کار: شیردل بلوچ

دی بلوچستان پوسٹ

راجی رھشون چیرمین گلام مھمد بلوچ ءِ لالا منیر ءُ شیر مھمد بلوچ ماں مرگاپ ءَ کُنٹانی دَور دیگ رند تیوگیں سرڈگار زھرشانی روانک ءُ مُچیانی انگیر ءَ کپتگ گڑا ھمے رِد ءَ آواران دَمگ جاہ آیو یک ٹوھیں راجی مُچی یے بی این ایم ءُ بی ایس او آزاد ءِ نیمگ ءَ برجاہ دارگ بوت، ڈاکٹر دین مھمد بلوچ ءَ من اولی رند ءَھمے مچی ءَ دیست ، راجی رھشون ءَ ھمے مچی بھر زرتگ اَت گُشتانک دات ئِے بلوچ نیشنل موومنٹ بنجاھی باسکے اَت ـ من ءَ رمس یات بوگ ءَ نہ اِنت بَلے سال دو ھزار نھ اَت ایدگہ رھشون چیرمین ھلیل ، زاکرمجید، اسا زپر ،شھید ڈاکٹرمنان جان ءُ وھاب بلوچ ءَ گُشتانک دات ـ

اولی رند ءَ دیست آن ئِے ھمے دیوان ءَ رند سنگتاں آئی سیاسی بردباری ءُ بھادری ءِ سر ءَ گپّ اِش کرت، وھدے من انگت ھیال ءَ کپاں منی نزّ تلو ءَ سر ءَ نشتگ ھمے وھد ءَ من دیست آن ئِے منی گندگ ءَ سک ءَ کم ھبر ءُ بھادری گیش گندگ بوت ـ
گیشتر واجہ ءِ کرد ءِ بابت ءَ سنگتانی دیم ءَ شھید ڈاکٹر منان ءَ گپّاں کرت اَنت ـ اے وھد ءَ شھید منان ءَ واجہ ءِ بابت ءَ گپّ کرت آ ساری ءَ چہ بیگواہ کنگ بوتگ اَت ـ

چہ شھید منان جان ءِ گپّ ءَ پد ڈاکٹر دین جان واستا دل ءَ بےتاھیری یے آماچ بوت ءُ دل ءَ زھیرانی ءُ دردانی سیاہ تھاریں جمبر سر ءَ کار اِیت ءُ پھک بیرگوار اِیت ھمے لوٹ بیت ڈاکٹر انگت راجی جُنز ءِ ھمرائی گوں بوتیں پند جَنگ ءَ بوتیں نیکہ سمَی جان ءُ مھلب چوشیں گرانیں گمانی دیمپان بوتین اَنت نیکہ ھر روچ روانک ءُ زھرزانی پہ وتی آریپیں پِت ءَ بوتین اَنت ـ

مرچی ما وتی راج ءِ اے ھال ءَ گند ایں چکاں وتی پت ءِ،جَن ءَ را وتی لوگواجہ ءِ، گوھار ءَ وتی برات ءِ ءُ چُک ءَ را وتی پت ءِ اکس گوں دائم ءَ دّگانی سر ءَ زھرشانی کنگ ءَ اَنت پہ بلوچ راج ءَ روزگیریں استان ءَ چونیں جاور ھال پیدا کرتگ اَنت ـ

اے جناور ءُ رسترانی ڈیھ ءَ زند گوازینگ ءِوڑ ءُ پمّ سک گران کرتگ اَنت آ روچ ماں رسانکدارانی دپّ ءَ گریوگ ءُ زار ءَ اَنت ،انگت کّر ءُ کوریں جھان ءَ بے تُک ءُ تواری اِنت ـ

اگاں اے استان وتی زندگ بوگ ءِ واستا بلوچانی سر ءَ زوراکی کنگ ءَ اِنت ءُ کُشگ ءَ اِنت دنیا ءِ ایدگہ اِنسانی ھکانی پھازوگ ءَ زوراک ءِ دیم ءَ در بیا اَنت، بے کانودانی جست ءَ ئِے بہ گر اَنت ءُ دراھیں زندانی آجو کنگ بہ بنت استان سزا دیگ بیت ءُ سمَی دین جان ءُ مھلب دین جان ءِ پِت دین جان ءَ ھوار دراھیں بیگواہ بوتگیں بلوچاں انساپ دیگ بہ بیت ءُ درستیں بندیگ آجو کنگ بہ بنت.

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔