TBP Balochi

تراک ءَ چار کارندہ مرتگ ءُ دو زدگ کرتگ – بیبگر بلوچ

دی بلوچستان پوسٹ

بلوچ ریپبلکن آرمی ءِ جارکش بیبگر بلوچ ءَ رسانکدراں شنگ کرتگیں وتی یک بیانے ءِ تہ ءَ ھاران ءِ دمگ لجے ءَ پاکستانی لشکر ءِ سر ءَ بمب تراکے زمہ واری منّ اِتگ ءُ گوشتگ کہ لجے ءَ پاکستانی لشکر ءِ بیس بنجل ءِ نزیک ءَ سرمچارانی کل کرتگیں شوروانی تراک ءَ لشکر ءِ یک گاڑی یے سرجم ءَ پُرشتگ، گاڑی ءَ سواریں چار کارندہ مرتگ ءُ دو زدگ بیتگ اَنت –

بیبگر بلوچ ءَ گْوشت کہ مئے اے وڑیں اُرش یک آجوئیں چاگرد ءُ آجوئیں ڈیھے ءِ بستار ءَ برجم مان اَنت –

دی بلوچستان پوسٹ ھال پتر ءَ سر بیتگیں ھالانی ردءَ بلوچستان ءِ دمگ ھاران ءَ پاکستانی لشکریانی کارمند بمب تراکی ءَ نشانگ کنگ بیتگ اَنت۔

لشکریانی گاڑی ھاران ءِ دمگ لجے ءَ لشکری بنجل ءِ نزیک ءَ نشانگ کنگ بیتگ۔

ھالانی رد ءَ تراک ءِ تھءَ لشکر ءَ جانی تاوان ءِ دیمپانی کنگ کپتگ ۔

لشکری ءُ دگہ چیریں گلاں تراک ءَ پد دمگ ءَ پَٹ ءُ پول بندات کُتگ بلے ھچ وڑیں دزگیری کنگ بیتگ۔

زانگ بہ بیت ھاران ءُ کش ءُ کِری دمگانی تھءَ پاکستانی لشکریانی سرا چہ ایشی ءَ پیسر بلوچ سلاہ بندیں گلانی نیمگ ءَ چہ بازیں اُرش کنگ بیتگ اَنت بلے مروچیگیں اُرش ءِ زمہ واری داں گُڈی اھوالاں انگت کجام ھم گل ءَ نہ من اِتگ۔

آواران ءِ ھنکین جھاؤ ءَ لیویز فورسزاں ڈُنگی ءَ ھواریں دو جرمکار دزگیر کُتگ اَنت ءُ آیاں گونیں سلاہ ھم دزگپتگ اَنت۔

لیویز واکدارانی رد ءَ مروچی یک جولائی 2020 ءَ یک بج ءِ وھد ءَ ڈپٹی کمشنر آواران مری باز خان مری ءِ پرمان ءِ پد ءَ اسسٹنٹ کمشنر سجاد اسلم ءِ چیردستی ءَ جھاؤ ءِ ھنکیندار عبدالقادر بلوچ ءُ (رسالدار) عبدالباری بیزنجو ءَ جھاؤ ھنکین ءَ بیڑ بُرتگ ءُ ڈنگی ءِ دو جرمکار ڈیتھ اسکواڈانی کارمند شیر جان ء مھمد شریف جھمنند ڈولیجی جھاؤ ءُ نیک مھمد ء مھمد جھمنند کوٹو جھاؤ دزگیر کُتگ اَنت۔

لیویز واکدارانی رد ءَ جرمکارانی کرءَ چہ یک کلاشنکوف، سئے میگزین، 107 تیر، دُز اتگیں زر، شئے گوشی دزگپتگ اَنت ءُ دگانی سرا دُزی آنی ھاترءَ کارمرز بیوکیں اولاک ھم دزگپتگ۔ زانگ بہ بیت کہ جرمکاراں گوستگیں روچاں جھاؤ ھنکین ءِ میتگ ٹوبوکڈ ءَ سلاہ ءِ زور سرا دگ بستگ ءُ ھمل ھان ءُ جمیل اھمد لوٹ اِتگ اَنت۔ ھال رسگ ءِ بیست چار ساھت ءِ تھءَ لیویز کارمنداں جرمکار دزگیر کُتگ اَنت۔

ھنکینی مردمانی ردءَ ڈیتھ اسکواڈانی کارمندانی سوب ءَ جھاؤ ءِ لس مردم سک بے وار اَنت ۔

نبشتانک: نوتو جان گنوکے اَت

نبشتہ کار: ارمان گُل

دی بلوچستان پوسٹ

ترا یات بیت نوتو جان من تو اولی رَندءَ ماں بلیدهءِ کوهاں دُچار کپتیں…. تیوگیں شپے ما دیم په سَپرےءَ رھادگ اِتیں واب چمّاں هرام اَت که سهبءَ ما بلیده ءِ کوهاں جاهے داشتک په کمے آرام کنگءَ گڑا سهتےءَ پد ءَ همے سنگت که پهروءَ اَت آواز دیگءَ اَت که سنگتاں گیگ بہ ات دیر یک پرپٹے پیداک اِنت گڑا ما سنگت وابءَ پاداتکیں وتی توپک ماں دستءَ کُرت که باریں چونیں مردم بنت، من ءُ دگه سنگتے دیما شُتیں که پرپٹ وت مئے نیمگءَ پیداک اَت… نزیکءَ اَت دومی سنگتءَ جُست کُرت شما کے اِت؟
نوتو جان ءُ شهید اسگر پنام ڈاکٹر تاں (بلے من ءَ وهدءَ دوئیں جاه نیاورتاں گڑا ما جُست کُرت شما چونیں مردم اِت؟ گُشت اِش ما پارٹیءِ سنگتیں… گڑا آ سنگت نزیکءَ شت ما کمے دیر اُشتاتگت ات ایں، سنگتاں یک ءُ دومی امباز کُرت پد ءَ منی همراهیں سنگتءَ آواز دات ارمان او ارمان بیا اے وتی اَنت، من نزیک ءَ شت آں دوئیں مهروانیں سنگناں گوں دست مِلّاهینت ءُ بگل کُرتاں… (بلے شهید نوتک جانءَ من دیم دیست ماں بچکندے لنٹانی سر ءَ اِت ئِے من انچو پهِم ات شهید من ءَ جاه کارگءَ اِنت) گورا ما دوئیں سنگت زُرت اَنت وتی همراهیں سنگتانی کر ءَ بُرت اَنت ءُ سنگت سلام علیک کُرت ءُ نِشت دیوان بیت اَنت، من شُتاں په سنگتاں چاهے پیم کُرت… رَند ءَ اَتکاں شهید نوتو جان ءُ اسگر جانءِ کر ءَ نِشتاں هال ءُ اهول کُرت من هیال اے هبر وَ مئی دمگانی لهجهءَ کنگءَ اَنت گڑا من الّم بیتاں اے سنگت مئے دمگانی نیمگ ئیگ اَنت ما نشتیں داں دیراں دیوان کُرت کندگ ءُ مزاک ءُ جاورانی سر ءَ وتی هیال گوں یک ءُ دومیءِ دیم ءَ درشان کُرت ایں، من ھیال کُرت نوتو جانءِ توکءَ پهم باز هست اَت… ءُ من باز دربُرت… انچو روچ گُوست ساھت ۴ بیت گڑا سنگتءَ هال دات یک اسپیتیں گاڑی یے پیداک اِنت، آئی ءِ پُشتءَ ۲ یا ۳ مردم نِشتگ چو دیرگِندءَ سلاهبند اَنت گڑا نوتو جانءَ گُشت اے سنگت اَنت مئے دیم ءَ پیداک اَنت ما هال کُرتگ بیتگ کن ما اے جاهءَ کا ایں شما بیا اِت ، گڑا آ سنگت اتک اَنت سلام علیکءَ رند سنگت اِشتاپی روگ ءَ لِگ اِت اَنت، ما گُشت شما به نند اِنت تنیگه مهلہ اِنت”.
شهید نوتو جانءَ گُشت مارا دیمءَ رواگی اِنت پد ءَ راہ دیر اِنت ءُ تهاریءَ پیسر الّمیں جاهءَ نندگی اِنت که مردم کش ءُ کرے جاوراں سرپد بیت بکنت ءُ آرام کُرت بک اَنت۔۔۔ شهید گوں سنگتاں در کپت مارا هم دیمءَ روگی اَت، ما همراهاں شور کُرت دیمءَ هال کُرت ءُ درکپتیں…….
انچو وهد گُوازان بیت یک رندے پد ءَ من گوں نوتو جانءَ دُچار کپ آں وهدے من کوهءَ دراَتکاں شهرءَ په کارےءَ اتکاں منی دیم ءَ سنگتے اَتک ءُ من ءَ بُرت ئِے وتی لوگءَ داں شهید نوتو جان هما سنگت ءِ لوگءَ اَت… من که لوگءَ تهءَ پُترتاں من دیست شهید نوتو جان نِشتگ سلام علیکءَ رند ما نِشتیں ، باز هبر کُرت (شهیدءِ هبر گِیشتر جهدءِ بابت ءَ اِت اَنت) ماھے که شهرءَ اتاں ما ءُ شهید نوتو جان چیزے روچءَ یکجاه اِتیں، یک ءُ دومی شر پهم اِت ءُ سرپد بوتیں… چیزے روچءَ رند من پد ءَ دگه سنگتانی کر ءَ شُتاں…

همے وڑ ءَ چیزے وهد گُوست ، پد ءَ من کوهءَ اتاں، سنگتاں هال کُرت که لهتے مهمان سنگت پیداک اِنت ما اُتاگءِ سنگت درست گَل اِتیں ءُ سنگتانی وداریگ اِتیں که نزیکء مگربءَ من گنداں شهید نوتو جان گوں ۵ دگه سنگت ءَ پیداک اِنت ،من شهید دیست شهیدءِ تبیهت وش نه اَت بلے شهیدءِ بچکند اَنگتءَ لنٹانی سر ءَ هستءُ… اے دگه روچءَ من شهیدءِ همراهیں سنگتاں گوں جُست کُرت شهیدءَ چی بیتگ ؟ سنگتے ءَ گُشت اے جنگ اِنت اد ءَ هزارانی کچءَ سنگت شهید بیتگ اَنت، سنگتانی لوگ مردم شهید کنگ بیتگ اَنت، لوگ سوچگ بیتگ اَنت… ءُ پد ءَ مئے (سنگتانی) سر ءَ هزار پریشانی ءُ جنجال کیت… پرچا که کومءِ ڈُبه وتی کوپگاں کُرتگ الم گم ءُ پریشانی سر ءَ کاینت….
شهید نوتو داں لھتیں وھد ءَ مئے کر ءَ بیت داں چیزے وهدءَ رند بهتر بیت… ءُ پیسری مردُم بیت… چوناها شهیدءَ باز ونتگ‌ اَت ءُ من همد ءَ زانت که شهید شائرے هم ءُ پیسر ءَ منی دیمءَ شهیدءِ شیر گُوستگ اَنت بلے من نزانتگ ، من ءَ شائریءِ هُب ءُ واهگ باز هست اَت ءُ من شهید ءِ کر ءَ شائریءِ بارو ءَ باز دربُرت….
ھمے وڑ ءَ وهد گُوازان شهید گوں لهتے دگه سنگتاں دگه نیمگے په کارے ءَ دراَتک ءُ من دگه نیمگے…. انچو یک روچے هالے اتک شهید گاڑی یے ءَ گوں بیتگ ءُ دام بیتگ دستے ءُ پادے پُرشتگ باز اپسوز بیت اے هبرے اِشکنگءَ گڑا منی وش نسبیی اَت که چیزے روچءَ رند منی سر سنگتے دوارءَ کپتگ که من اُود ءَ شهید نوتو جان دیست که دست ءُ پاد ماں پلستران اِت اَنت ،من گوں شهیدءَ مزاک کُرت کهرکپتگ تو وت ءَ واه چَٹ بربار کُرتگ.
گڑا شهید گپ کنگءَ لگّ اِت ءُ گوشت ئِے هو یار چون کن ئے نی نسیبءَ بیتگ… ھیر ما داں شپءَ هور اِتیں سُهبءَ من ءَ دگه نیمگے روگی اَت من سُهبءَ در کپتاں…. پد ءَ اچانکءَ گوانکوءَ گوں هال بوتگ بلے شهیدءِ گوں من گڈی دیدار هما اَت… پد ءَ ۲۹ جون ۲۰۲۰ ءَ سُهبءَ وابءَ پاد اَتکاں داں موبائلءَ کلوھاں چاراں که کراچیءَ پاکستان اسٹاک ایکسچینجءِ سر ءَ سلاهبندیں مردماناں اُرش کُرتگ… باز وش بیتاں که پاکستانءَ مزنیں نُکسے رس ایت… داں من نشتگ اتاں موبائلءِ کلوھاں وانگ ءَ اتاں داں دگه کلوھے اَتک که (بلوچ لبریشن آرمی) مجید بریگیڈ سنگتاں اُرش کُرتگ… من نی همے هیالءَ کپتاں بارے اے وتن گنوک کے بنت تاں من دگه سنگتے ءِ کر ءَ شت آں گڑا انچوش من آ سنگت ءِ کر ءِ سر بیتاں گُشت ئے نوتو جان گوں دگه ۳ سنگتاں مروچی کراچیءَ جکسینگءَ اِنت… من هیران بیتاں بلے من راه پهمِ ات که راه همیش اِنت… من ءَ سنگتءَ ع
اکس پیش داشت اَنت…. ۲ سهتءَ رندءَ هال اَتک که سنگت شهید بیتگ اَنت…. اپسوز هم بیت که نوتو گوں شهید یاگی، شهید مسلم ءُ شهید شهزادءَ جسمانی لهازءَ گوں ما هوار نیاینت.. بلے داں ابد زندگ بیت اَنت…. شهید نوتوءَ گوں شهیداں هوار همے درس دات که ما سر دات بلے وتن ندات….. کربان جگر بهشتءَ بات اِت۔۔۔ آجو بات بلوچستان.

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

نبشتانک: پِدائی سلمان ھمل ( نوتک)

نبشتہ کار: فضل شیر بلوچ

دی بلوچستان پوسٹ

اے ھما ٹیبریں ورنا اَت کہ نوک بروت اَت، سائیجی ءِ ھشیمیں مات بنداں اسنائپر تپنگے بڈ ءَ اَت جند ءِ سک پٹک اَت، سنگتاں کند اِت کلاگ زرت کہ تئی کد وت یک بچیلے نہ بیت ترا دراجیں اسنائپرے بڈ انت کنداک ئِے ڈوک ءُ ڈلاں ماں اَڑان انت، تو کستریں تپنگے بڈ ءَ بکن اے اسنائپر ءِ کنداک ءَ پروش ئے بھتاور.. ھاھاھا بچکند ات ءُ گشت ئِے من ءَ انوں ھنچو بڈ ءَ انت.
من ءَ یات بیت کساس دوھزار یازدہ اَت، ما سائیجی ءِ تیھریں مات بند ءَ وتی اوتاک ءَ نندوک اَتیں کماشیں سنگتے ءَ گشت رویں مروچی سیدے ءِ شکار ءَ ما چہ اوتاک ءَ درکپتیں دیم ءَ بی آر اے ءِ سنگتانی اوتاک اَت، اود ءَ کہ ما سر بوتیں سنگتاں مارا چاہ ءُ آپ کت، ما پہ شکار ءِ نیت ءَ درکپتگ اَتیں، گڑا چہ بی آر اے ءِ اوتاک ءَ ھمے پٹکیں ورنا گوں اسنائپر ءَ مئے ھمراہ بوت کہ من اوں کایاں گوں سید ءِ شکار ءَ کہ من سید چد ءُ پیسر شکار نہ کتگ شمے بڈوکی باں، ھاھاھا من ھمے نوک بروتیں ورنا ءَ پیسر ءَ چَہ شر شر آژناگ نہ اَتاں، بلے برے برے کہ ما پہ مڈی ءُ راشن ءِ رند ءَ شتگیں بی آر اے ءِ سنگتانی اوتاک مئے راہ ءِ سر ءَ بوتگ ما شتگیں سنگتانی کر ءَ چاہ ءُ آپے وارتگ وتی دمے ساسار اِتگ ءُ رھادگ بوتگیں، بلے اے پٹکیں مرد ءَ گیشیں آژناگی من ءَ نیست اَت، ھیر کماشیں سنگت ءَ آ ورنا زرت گوں ما ھمراھی ءَ رھادگ بوتیں بلے اسنائپر دراج ات، ورنا ءِ کد پٹک ھما وڑ کہ سنگتاں گشتگ ات اسنائپر ءِ کنداک جاھے جاھے گوں سنگاں ڈیک وران ات، کماش پیسر اَت ما دوئیں بڈوکی رند ءَ گوں اَتیں چد ءُ پیسر من اوں سید ءِ شکار ءَ نہ شتگ اتاں، شکار ءِ راہ ءُ رھبنداں اوں آژناگ نہ اَتاں وتی وڑ ءَ گوں پٹکیں ورنا ءُ کماش ءِ رند ءَ میزان میزان گام جنان اتاں، کماش برے اے برزگ ءَ سرکپ دورگند بکن ءُ بچار برے آ ڈک ءَ ما دوئیں نوں تک ءُ نکیں کہ سید مئے توار ءُ پادبرمشے مہ اشکن انت ءُ مہ تچنت مارا کماش دگہ رند ءَ گوں وت ھمراہ نہ کنت شکار ءَ نہ بارت گوں، بلے بازیں تچ ءُ تاگے ءَ پد کماش ءَ دور پاچنے دیست ڈالبارے ءِ ساھگ ءَ وپتگ اَت، مارا اشارہ ئِے کت کہ نرم نرم ءَ آیاں بہ بہ اِت، من چہ دیم ءَ ماں تراں پاچن ءَ جناں، ما اوں تک ءُ نکیں کہ پاچن مہ تَچ ایت مہ روت، کماش رھادگ بوت ما وت ءَ زنکرینتگ ات سنگے ءِ پشت ءَ گوش رپتگاں پہ کماش ءِ تیر ءِ ٹھکگ ءِ توار ءَ، کماش ءِ تیر ءَ دیر کت مارا اوپار نہ شت من وتی تک ءُ نکی پروشت ما گپ بندات کت کہ باریں پاچن چوں بوت، کماش ءَ دیر کت بزان نہ کن ئے کہ مئے گپاں پاچن ءَ ڈاہ کت، کماش ءَ انچو گشت کہ پاچن شما تراز داتگ پمیشکا شتگ یا کماش ءِ جند ئِے دیستگ بلے میاریگ ءُ ملامت من ءُ پٹکیں ورنا بوتیں، ھیر پاچن وَ شت کماش ءَ مارا گوانک جت بیا اِت اشتر چار ایں پاچن وَ گار بوت ما شتیں دیم پہ کماش ءَ نوں کماش ءَ شرو کت مئے ڈانٹگ ما کند ات، ھاھاھا کہ تو جت نہ کتگ مئے نام ءَ ئِے مہ کن، نوں ما سے ئیں وش گپی ءَ اَتیں سیائیجی ءِ دوزھیں گرمی چو تین ءَ داگ دیگ ءَ ات ما اوں برزیں مات بند ءِ ٹل ءَ جماز اتیں کماش ءَ گشت ساھگے چاریں دمے ساساریں بیگاہ ءَ ھمے بند ءَ گراں بیں داں ٹکریں رویں گڑا اوتاک ءَ رویں،مارا دگہ گپے نیست ات ما شکار ءِ گل ءَ ات ایں، تلنبی ساھگے ءَ کماش وپت واب شت ما نوں دوئیں وت ماں وت آژناگ بوان بوتیں وش گپی کندگ ءُ مزاک کوچرائی راستیں ھبر ایش ات کہ ما گیشتر کماش ءِ پچکاں بوتیں کہ پاچن ئِے جت نہ کتگ مئے نام ءَ ئِے کتگ کہ شما ڈاہ داتگ، ما وَ وتی گام بسم اللہ ءِ سر ءَ ایر کتگ ات اَنت داں سید مئے پادبرمشے ءَ ڈاہ مہ کن انت.

ھیر ما یک دومیگ ءِ تب ءَ سرپد بوان بوتیں، بلے یک راستی یے ایش ات کہ من ھمے پٹکیں ورنا انچو دیستگ ات من ءَ سک دوست بوت، پد ءَ کہ گشت ئِے من کایاں گوں شکار ءَ من گل بوتاں، بیگاہ بوت کماش پاد اتک ما رھادگ بوتیں پد ءَ تک ءُ نک کماش پیسر دورگند جنان ءُ ما بڈوکی رند ءَ نرم نرم ءَ آیان، روچ ایرلگشان ات، ما ھچ ندیست یک پاچنے دیستگ ات ھما اوں گار بوت کماش ءَ گشت شما دوئیں ھشک پاد اِت ما کند اِت ءُ گشت شکاری وَ توئے ما بڈوکی ایں ءُ شکار ءِ مارا شوک ھست، بگند ایں باریں سید چوں جنگ بیت، گوات چوں گرگ بیت، شکاری گش اَنت شکار ءِ لھتے رھبند ھست اَنت بلے کماش ءَ چہ شکار ءَ پیسر لھتے سوج مارا دات کہ گپ مہ کن ات، پاداں نرم نرم ءَ ایر کنان بہ کن ات، ڈکانی سر ءَ وت ءَ ٹل مہ کن ات، سگ اوپار ءُ تھمبل لوٹیت، شکار چو نہ بیت.

شکار مئے وَ نہ بوت ما اتکیں بی آر اے ءِ اوتاک ءَ چاھے وارت کندگ مزاک، پد ءَ ھما پٹکیں ورنا ءِ بڈ ءَ کپت ایں سنگت کہ دراجیں اسنائپر ءُ بچیلے کد ورنا ءَ کند ات بس ھاھاھا. شکار نہ بوت بلے یک مھروانیں انسانے ءُ نرم گپیں ءُ سرپدیں سنگتے ءِ دیدار ءُ آژناگی نسیب ءَ بوت.
چوناھا اوتاک ءَ نشتگیں سنگتاناں گل ءِ رھبند ءِ رد ءَ موکل نیست ات کہ یک دومی سنگت وتی اسل پجار ءُ دمگ ءِ نام ءَ دومی سنگت ءَ بہ گشیت، ما کل گل ءِ رھبندانی سر ءَ اتیں من پٹکیں ورنا اوں اسل نام جست نہ کت آئی ءَ منی بلے اوتاک ءَ کہ سنگتاں کوڈ نام گپت “نوتک” ءِ نام ءَ توار اش کت. من اوں ھمے نام یات کت پد ءَ کہ برے برے ما پہ مڈی ءِ رند ءَ یا دگہ گل ءِ کار ءُ پروگرامے ءَ چہ وتی اوتاک ءَ دراتکیں مئے راہ گیشتر چہ ھمد ءَ ات کہ بی آر اے ءِ سنگتانی اوتاک ءِ نزیک ءَ ات ما برے برے اوتاک ءَ شتیں سنگتانی دیدار کت، ھمے پٹکیں ورنا ءَ گوں منی آژناگی گیشتر ات نوں ما پھکا سنگت بوتیں یک دومی داں ھدے ءَ ونت ءُ دربرت، نوتک منی زندگی ءِ دوستریں ھمبل ءُ ھمرازیں سنگتاں چَہ یکے بوت.
پد ءَ بازیں وھدے گوست مئے سر بلوچستان ءِ دگہ جاہ ءُ دمگاں کپت ما چہ نوتک گونگیں باکردیں ھمبلاں دور بوتیں ھرکس وتی گل ءِ کار، تچ ءُ تاگاں دزگٹ ات، نوتک بازیں وھدے مئے دمگ ءَ اتکگ ات بلے ما دوچار نہ کپتیں اناگاہ ءَ یک شپے منی سر کپت سنگتے ءِ لوگ ءَ داں لھتے ورنا نندوک ات شپ ات، چراگے روک ات بلے مرمرانک ات من ءَ دگہ لھتے سنگت گوں ات ما پہ کارے ءَ روگ ءَ اتیں اشتاپ اتیں، ھمے لوگ ءَ سنگت دروت ءُ درھبات کت اَنت، دیر گوستگ ات آ نوتک کہ من پیسر ءخ دیستگ ات چڑا بدل ات، من مردنی شر پجا نیاؤرت ما چوناھا اشتاپی اتیں ما درکپتیں پد ءَ ھما لوگ والا سنگت ءَ من ءَ ھال دات کہ آ شپی لوگ ءِ مھمان نوتک زی بوتگ اَنت، من ءَ باور نہ بوت، من گشت چوں یار نوتک وَ منی جگری دوستے من چوں پجا نیاؤرتگ؟ گڑا من سنگت جست کت کجا اِنت نوں گندان ئِے؟ گشت ئِے اوتاک ءَ شتگ اَنت،پد ءَ من نوتک داں دیر ءَ نہ دیست، انچو اشکتگ ات کہ نوتک بی آر اے ءِ یک زمہ واریں سنگتے ءُ بازیں ڈبہ ئِے کوپگان انت، آئی ءَ وتی تچ ءُ تاگ، مئے وتی تچ ءُ تاگ آ رنگیں دیوان کہ دل ءَ لوٹ ات یک دومیگ ءَ نہ بوت.
پد ءَ دیر وھد ءِ گوزگ ءَ رند من سرپد بوتاں کہ نوتک نادراہ انت، ناجوڑ انت، تبیت ئِے وش وش نہ انت، ھرکس ءَ گشت گنوک انت، ریٹا انت، زاہ دنت، بد ءُ رد کنت، وتسری کنت، کسی ھبر ءَ گوش نداریت، چہ بی آر اے ءَ وتی دزکشی ءِ جار ئِے جتگ، من دل ءَ کھتیگ بوتاں یار چو چوں بوت کنت، آ نوتک کہ من دیستگ آ سکیں نرمیں ءُ مھروانیں مردمے بوتگ، سرپد ءُ وانندھے بوتگ چو چوں بیت!؟
گڑا من چہ سنگتے ءَ نوتک ءِ نمبرے تلب کت کہ ھال ءَ ئِے گراں، نمبر من ءَ دات ئِے من پہ پون ءَ دل زرت نہ کت یک برے انچو گشتگ اش کہ نوتک گنوک انت زاہ دنت، پہ دیم رپڑیت، وت سریں جست کنت، بوت کنت انچو بہ بیت، بلے پد ءَ توکل کت نمبر جت، یک ءُ دو رنگ ءَ پد پون ئِے زرت ھیلو کت ئِے من سلام دات، دروت ءُ درھبات ءَ پد من گشت نوتک جان پجا کار ئے من تئی کوھنیں سنگتے آں چو نہ بوت من ھبر ءَ سرجم بکن آں جت ئِے ٹھکے ءُ گشت ئِے ھو جان ترا کہ پجا نیاراں بزان وت ءَ پجا نیاراں ھال ءُ ھوال بوت، ھال پرسی من کت بلے آ رنگ ءَ من ءَ سنگتاں گشتگ اَت نوتک گنوک انت، زاہ دنت، پہ دیمیں جست کنت، من یک چشیں چیزے ندیست، نوتک ھما نوتک ات، ھما کندگ ھما گرانی، ھما نرم گپی، ھما الماسیں اکلاک، نوتک پہ من ھما نوتک ات من تشے ھم گنوکی نہ دیست، وتسری نہ دیست، زاہ ءُ بد نہ دیست، ما داں دیراں گپ کت کوھنیں کسو آرت اَنت ھما کماش ءِ سید ءِ شکار ءِ کسہ، دراجیں اسنائپر ءِ کسہ پد ءَ کہ من اجازت کت ھمے گشت ئِے زوت ان شاللہ شمارا گنداں من ءَ سک زھیر بوتگ.
پد ءَ کہ من گوں نوتک دوچار کپتاں ما وت ماں وت سک نزیک بوتیں، ساہ بھر کت، نوتک بیمار ات، سک باز دارو ءُ درمانے گوں ات، برے برے تبیت ئِے وش وش نہ ات، بلے مئے ھمراھی ءَ سک باز پند ئِے جت گوں، من چہ نوتک سک باز ھیل کت، بازیں جاھاں منی رھشونی ئِے کتگ، جنگی مھاز بہ بیت، یا سیاسی چست ءُ ایر، وت ماں وتی اڑ ءُ کڈ بہ بنت یا سنگتانی بگیری نوتک ھمک جاہ ءُ ھمک رنگ ءَ پہ من یک ھشیم ءُ مھکمیں کوھے ات، گنوکے اَت، بلے پہ مسکیں زمین ءُ گواڈگیں وتن، ھاک ءِ شیدا ات، گلزمین ءِ ھک ءِ ادا کنگ ءَ پہ سک بے چاڑ ات، شیواریں سرے ات، جنگولے ات، سیاسی ھساب ءَ یک پھتہ پگریں راہ شناسے ات، سرجمیں سرمچارے ات، منی تھنا نا پہ کلیں سنگتاں مھکمیں باسکے ات، تچکیں ھمراھے ات، دائم گشت ئِے مارا بس کار کنگی انت، پند برگی انت، دژمن زوراک انت، دژمن ءِ ھمک چیز مارا زانگی انت، وت ءَ مھکم دارگی انت، وتی نزوری ءُ ردی گرگی انت، نوک نوکیں راہ ءُ رھبند ٹھینگی انت، ادارہ تاگتور کنگی انت، پردانی سر ءَ کلمہ آرگی نہ انت، ھمک ھما جیڑ ات ئِے کہ جھد ءُ جنز ءِ لوٹ ات، راجی گلامی ءِ ھلاسی ءِ ڈس ات، پند جنوک ءُ کردساچیں ھمراھے ات، زمین ءِ ھاک ءِ وشیں بوہ ءَ کمار کتگ ات، جنگ بہ بیت، شائری ءُ نبشتہ کاری بہ بیت نوتک ھمک رنگ ءَ برجمیں ءُ سوھوئیں سرے ات، مرچی من پہ پھر گشاں کہ نوتک منی باھڑیں باسک بوتگ، منی راھشون بوتگ، جھد ءِ سنگت بوتگ، پہ وتن وتی ھیشی سر ءِ دیم ھونی ئِے داتگ، پہ ھمک ورنا ءَ راھے گیشینتگ ءُ وت ھمے ھونی ئیں کشک ءَ پندے بر اتگ، وتی راجی زمہ واریاں شر پوہ ءُ سرپد بوتگ، کردے ساچ اتگ، اے ھما گنوکیں، موالیں، دیوانگیں، بد ءُ رد کنوکیں نوتک ات کہ وت ءَ ھمک رنگ ءَ منارینت ءُ پیش ئِے داشت.
نوتی ھرکس پھری انت مرچی پہ تو دوست دژمن، تو وت ءَ ابدی زندگ کت، زمین ءِ ھک ءِ ادا کنگ ءِ راہ ءُ رھبند زانت اَنت، بلے یک گپے ترا گشاں تو وتی شیرکنیں ٹھک ءُ بچکند گوں وت مہ برتین انت.

گڈسر ءَ گوں سلمان ھمل (نوتک) ءِ شئر ءَ…
رخصت اف اوارن

“پد ءَ واتر کائیں”

ھاک ءِ وشبو ءَ ھوار ایں پد ءَ واتر کا ایں
جنگ ءِ ما کسھاں کار ایں پد ءَ واتر کا ایں

شور ءِ دلبند گواہ اِنت ما وتی سر دات اَنت
آس پہ دشمن گوار ایں پد ءَ واتر کا ایں

ما مرید این ءُ زمین پہ ما گْوش ئے چو ھانی
اشک ءَ انچو کمار ایں پد ءَ واتر کا ایں

ھر کج ءَ سبز باں آشوب ءِ گلابیں گواڑگ
رتکگیں ھون ءِ بھار اِنت پد ءَ واتر کا ایں

جی پہ آشوب ءِ یلیں بچاں سراں بکشا ینت
دوست ءُ ھمراھاں مزاریں پد ءَ واتر کا ایں

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

بلوچ آجوئی دوستیں رھشون ڈاکٹر اللہ نزر بلوچ ءَ وتی شنگ کرتگیں بیان ءِ تہ ءَ گْوشت کہ کراچی ءَ شھید بیتگیں سرمچاراں سھر چکیں دروت اِت اِنت – کراچی ءَ اسٹاک ایکسچینج ءِ سر ءَ اُرش پاکستان ءُ چین ءِ واستا بیھارے کہ آ بلوچستان ءَ چَہ دربہ کپ اَنت -آیاں بلوچستان ءِ درکنگ ءَ بلوچ راج ءَ ترندیں گامے چِست کنگ ءِ سِتک کرتگ -بلوچستان ءِ جتائیں جاھاں سیادی کنوکیں پدائی شھید سلمان ھمل، شھید تسلیم بلوچ، شھید شھزاد بلوچ ءُ شھید سراج کنگر ءِ ڈولڈاریں دیمھونی ءَ ایوک ءَ بلوچ راج، بلوچ راجی راجدپتر ءَ جوانیں تاکانی سر ءَ یاد کنگ بنت بلکیں دنیا ءِ دراھیں آجوئی ءِ واستا جنگ کنوکیں زیردستیں راج اِش بے ھیال اِش نہ کن اَنت –

آئی ءَ گْوشت کہ چین نوکیں دورے زوراور ءُ برجاھیں زور اِنت – آ دنیا ءَ وتی دست ءَ کنگ ءَ بلوچستان ءَ وت سر ءَ نندگ ءُ گوادر ءَ لانچنگ پیڈ ءِ وڑ ءَ کارمرد کنگ ءِ واستا یک جھلانکیں شوربندی یے کرتگے -زورگریں پاکستان جھل ءُ برزیں نھاداں بلوچ سرڈگار ءَ چین ءِ گور ءَ گِردو کرتگ – چین ءِ اد ءَ جاڑیگ بیگ ایوک ءَ بلوچ راج ءِ ھلاسی ءَ بلکیں سرجمجں دنیا ءِ واستا جیڑہ اِنت – ما سرپد بہ ایں کہ دنیا انگت ءَ چین ءِ پندلانی سر ءَ واب اِنت ءُ بلوچ ایوک ءَ نوکیں دورے زوراک ءَ گوں دیمپانی کنگ ءَ اَنت -گوادر ءَ چینی بنجل ءِ نشانگ کنگ ءَ پد کراچی ءَ چینی سپارتکار ءِ سر ءَ اُرش اسٹریٹجک ءِ کارمندانی سر ءَ ھمک وھد ءَ اُرش – بلوچ ایشی ءَ ھروھد ءَ برجاہ دار اَنت، تُری ایشی ءِ واستا مارا کجام ھم نھاد دیگی بہ بہ بیت چک ءُ پدی نہ بیت –

ڈاکٹر اللہ نزر بلوچ ءَ گْوشت کہ بلوچستان ءِ کسے ءِ واستا پاکستان ءِ یک بھرے بیت کنت بلے مئے واستا اے سرڈگار ءِ ماتی یے بروبری ءَ اِنت – ایشی ءِ پادمال کنگ، راجی دودانی واستا ءُ آجوئی ءِ واستا ما سرانی دیمھونیاں پشت کنز نہ بہ ایں – پاکستان نہ ایوک ءَ مئے سرڈگار ءِ سر ءَ زوگر اِنت بلکیں مئے سرڈگار ءِ سر ءَ سی پیک ءِ وڑیں شورانی تہ ءَ چین ءَ وت سر ءَ آستینک لانتکگ اَنت -چین ءِ ھمستنی ءِ ھمدستی ھنچش بیمناک اِنت کہ بلوچ راج ءِ دیم ءَ وتی جاہ ءَ ناں بلکیں پاکستان ءَ وت وتی پارلمینٹ ءُ سینیٹ ءِ دیم ءَ بے تھمبل اِنت – بلوچستان ءِ بھاھی ءِ سوڑگ چینی زوراک ءِ ھمراھی ءَ پوجی جرنیلانی گوشگ ءِ سر ءَ جی ایچ کیو ءَ منّگ بیتگ -ایشی ءَ ابید اگاں کسے ءَ اگاں آیاں بلوچستان ءِ دیمروی ءُ زرکاری ءِ شوربندی گوش اِیت اے آیانی زور اَنت ما ایشی ءَ دشمن ءِ ھمراھی ءَ زُلم سرپد بہ ایں –

اللہ نزر بلوچ ءَ گْوشت کہ لَٹ ءُ کٹی ءِ بنیاد زوگری اِنت ءُ لٹ ءُ کٹی ءِ دراھیں روتگ زورگیری ءِ رگ ءُ بنداں گوں بندوک اَنت – پاکستان ءِ وڑیں ریاستانی دیمپانی ءُ آشوبی جنگ ءِ ھیل مارا چی گویرا ءُ ہوچی منہ ءِ وڑیں شھزانتانی رھشونی ءُ بلوچ راجی دود ءُ ربیدگانی تہ ءَ گندگ ءَ کاینت -مروچی آشوبی جنگ ءِ سر ءَ بتیں زانتکارانی ٹِک چینی اِنت کہ چریشی ءَ پاکستانی لَٹ ءُ کُٹاں گیشتر ھمت رس اِیت – آیاں ھسیبہ ءُ سیما ءِ ارس گندگ ءَ نیاینت کہ آیانی لاڈ ریاستی پوج ءَ کجام اُرش ءِ تہ ءَ گپتگ ءُ زنداناں کرتگ؟ آیاں اے راستی گندگ ءَ نئیت پاکستان ءُ چین ءِ وشکامی ءِ سوب ءَ دنیا ءِ مرگ ءُ زند ءِ درچ ءَ بلوچ سرڈگار ءِ سر ءَ بلوچ راج ءِ ھلاس کنگ ءِ گپ منّگ بیتگ -پاکستان ءِ زوراکی ءُ لَٹ ءُ کٹیاں مروچی چَہ ھپتاد سالاں چَہ برجاہ اِنت ءُ پاکستان ءِ زُلم ءُ زوراکی، دگانی سر ءَ بلوچ جنکانی ارس مئے جنگ ءِ ترندی جوڑ بیگ ءَ اَنت -اے ارساں پاکستان ءُ آئی ءِ لوٹوکاں بیر گرگی اِنت – من شری ءَ زاناں کہ اے وڑیں اُرشانج نام ءِ سر ءَ پاکستان بلوچ نسل کوشی ءِ تہ ءَ گیشی کاریت بلے ایشی ءَ چَہ مارا ھلاس کرت نہ کنت –

آئی ءَ گوشت کہ بلوچ آشوبی جنگ کنگ ءَ اَنت – بلوچ گھبرو ورنا، ماتانی دلاری ءِ نام ءُ ناشری ءَ ناں بلکیں وتی زیردستی ءِ کلوہ ءَ دنیا ءَ داں سر کنگ ءُ دشمن ءِ مزن مری ءَ پروشگ ءَ پدائی بیگ ءَ اَنت آ اے اُمیت ءَ الم داریت کہ بلوچ راج وتی دیمھونیاں زوال نہ کنت – کراچی ءَ سپارتکارانی بنجل ءِ سر ءَ ارش ھم یک بندے – ترندی ءَ گوں برجاہ کنگی اِنت – مارا یات کنگی اِنت کچ ءُ کساس ءَ لشکری ءُ ٹیکنالوجی ءِ دروشم ءَ ما دشمن ءِ دیم ءَ باز نیزور اِنت – نیزوریانی ھمدستی ءِ یک جوانتریں سلاہ چیرجنگی اِنت – اے سرجمیں دنیا ءِ آشوبی میراس اِنت ءُ بلوچ ورنا اے میراس ءَ وتیگ کن اَنت ءُ راجدپتر ءِ تاکاں جوانی ءَ سرتاک بیان بنت۔

شئر: نزاناں پرچہ نوتک جان !

شائر: هسابجار

دی بلوچستان پوسٹ

تئی روگ ءَ پد
نزاناں چی ءَ دل کُہتیگ انت
نزاناں چی ءَ دل گریوگ ءَ انت
نزاناں چی ءَ چہ وتا ملامت انت دل

بہ گندئے گپے مْیان ءَ پشت کپتگ
بہ گندئے ترا هبر باز گُشتگ
بہ گندئے تو دل ءَ آرتگ
بہ گندئے زهیرے ترانگے
یا وَ انچیں اڑے تو جیڑتگ
من نہ پہمتگ
یا وَ چُش هم بوت کنت کہ گپ ءِ جند نیست ءُ نہ بوتگ هم
بیت کنت مشکت ءُ کراچی ءِ سیادی نیست
بس وتی جند ءِ ریپنگ ءِ نیمون انت
گوں ارساں همے
نیمون ءَ گْوازی یے لوٹاں
کہ هون نہ گواہیت
ماں رگاں لگوریناں
بس ہید اتنت کہ رِتک انت
گوں تئی گاری ءِ هما روچ ءَ
بلے تو وَ سہرا بوت ئے
درکپت ئے دو بر کشک ءَ
ءُ من انگت ءَ گاراں
هما گلام چوٹاں
نزاناں چی ءَ نوتک جان !

شئر: ندر پہ راجی پدائیانی نام ءَ

شائر: چیدگ بلوچ

دی بلوچستان پوسٹ

ما ڈیہ ءِ ملیں بچ
ما گلزمین ءِ گیرت اِیں
مجید ءِ پکر ءُزرمبش اِیں
پدائی اِیں پدائی اِیں

ما ھاکیں مھلبیں وتن
ما ارسین دیدگانی ترمپ
ما ھون ءِ سھریں رنگ بئیں
ما جنگے بئیں ما جنگ بئیں
پدائی اِیں پدائی اِیں

ما زند بستگ چادر ءَ
ما سر کپن کتگ وتی
وتن وتن کتگ وتی
ما زلم ءِ پُروشیں سانکلاں
پدائی اَیں پدائی اِیں

مئے ھون روچے رنگ دنت
بلوچے گوں تو جنگ دنت
ند ءَ نو پچ گریت منی
نو دست ءَ مئے تپنگ دنت

پدائی اِیں پدائی اِیں