TBP Balochi

نبشتانک: من استاد اسلم ءُ سلمان ھمّل ءِ اھد ءَ زندگاں

نبشتہ کار: عبدالواجد بلوچ

دی بلوچستان پوسٹ

راجی بامرد شھید سلمان ھمّل گشیت

“پہ ودار ءَ جند ءِ مرچی دْراھیں ارمان کل اِت اَنت
کشک پاداں در لگشت اَنت راہ کوہ ءُ تل اِت اَنت

باز ءِ سر ما یورپ ءَ کپت باز تُرس ءَ چیر بوت
آجوئی ءِ جنگ ءَ وھدے شھر ءُ میتگ مل اِت اَنت”

برے برے من جیڑاں کہ زند ءِ واھگانی کُشگ سکّ گران انت پہ ھماھاں کہ زند ءِ وشیانی دست ءَ گُٹ گیر انت تُریں منی جند بہ بیت، من باز وھداں یک انچیں جیڑگے ءِ آماچ باں کہ پگر کناں کہ زند ءِ گُڈّی واھگ پہ وتن دیوانگی انت یا پہ زند ءِ وشیانی دیوانگی؟؟ اے جُست ءِ پسّو ءِ شوھاز ھر وھد ءَ سرگردان بیتگ آں ۔
بازیں وھداں مردم بس نندیت نیمون شوھاز کنت ءُ ھما مردم کہ زند ءِ بلاھیں بھرے پہ نیمون شوھازگ ءَ گوازین ایت تاں الم زندگی ءِ وشیانی دُمب ءَ تچگ آئی ءِ منزل جوڑ بیت، دنیا ءِ راجدپتر اے گواہ انت کہ زمین زادگاں وھدے اَمل ءِ چادر بڈّ ءَ کتگ گڑا پہ مکسد نیمون شوھاز نکتگ منی پیمیں یک آرام پسندیں مردمے بگند ئے پہ نیمون زندگ انت بلے زمین زادگاں وتی زند ءِ واھگ، ارمان وشّی پہ وتن کربان کتگ انت، زمین زادگ پہ وتن زندگ بیتگ انت، زمین زادگانی مات زمین انت ءُ آھانی بانور آھانی مکسد، منزل ۔
باز مردم گشیت کہ ما مُردگ پرستیں بگند ئے اے گپ ءِ تہ ءَ راستی مان بلے لھتے جاگھاں انسان ءِ کردار آئی ءَ زندگ کنت مردماں ھر وھد ءَ رومانوی داستان، جوڑ کتگیں کسّہ ونتگ ءُ ھستیانی (شخصیات) جوڑ کتگ کسّھانی توک ءَ بازیں بامردانی بُت جوڑ بیتگ ءُ کسّہ نمیران بیتگ انت ،بلے من ھما اھد ءَ زندگاں کہ اے اھد ءِ تہ ءَ رومانوی داستان یا کہ جنگی بامرد پہ کسّہ زندگ نہ انت بلکیں آھاں وتی استیں دروشم ءَ وتی اَمل ءَ گوں وت ءَ را راجدپتر ءَ ھوار راستیں کسّھانی تہ ءَ نمیران کتگ ۔
ھو من اے گپ ءَ دلجماں کہ من وت ءَ را مُردگ پرستے سرپد نباں پرچا کہ مرچی من ھما کردارانی بابت ءَ نبشتہ کنگ ءَ آں آ کردار الپ لیلی داستانانی جوڑ کتگیں فکشن یا شکساتگیں بُت نہ انت بلکیں آ اے اھد ءِ ھما نمیرانیں نام انت کہ آھاں وتی کول ءُ فعل ءِ گُکّ داتگیں گرنچ ھر وھد ءَ یکجا بستگ.

پہ من ءَ اے پھری گپے کہ من استاد اسلم ءِ اھد ءَ زندگاں کہ آئی کردار ءُ آئی داتگیں راہ پہ بلوچ آجوئی جُنز ءَ یک آئیڈیل روڈ میپے ءِ بستار ءَ انت بلوچ ءِ راجدپتر سنٹ نہ انت ھپتاد ءُ دو سال ءِ اے آجوئی جُنز ءِ تہ ءَ بازیں نمیرانیں کرد ھست بلے استاد اسلم ءِ گچتگیں راہ ءُ وھد ءِ ھمراھی ءَ آئی کُتہ کاری(تجربہ )ءُ جنگی اَمل پہ ھستیں بلوچ جُنز ءَ یک مھکمیں سَندے بستار ءَ داریت، راستی ءَ استاد اسلم ءِ ھما راہ انت کہ اے راہ ءَ بازیں سر پہ نیمون نمیران نہ بیتگ انت بلکیں آھانی زِرد ءِ تہ ءَ بلوچیت، بلوچ ءُ بلوچستان ءِ چیھانٹ آھاں یک انچیں راھے ءِ مساپر کنت کہ آ توپگ ءِ ٹریگر ءِ گُڈی تیر ءَ پہ وت ندر کن انت پمیشکا من گُشت کہ بازیں وھدانی جیڑگ ءَ پد من اے سرپد بیتگاں کہ زند ءِ واھگانی کُشگ پہ زمین زادگاں گرانیں کارے نہ انت بلے مئے پیمیں آرام پسندیں مردم ھر وھد پہ واھگ زندگ انت آ واھگانی پژدر وشیں زند انت.

کسّھانی تہ ءَ ما ھر وھد ءَ ھمے ونتگ کہ پلاں مردم ءَ وتی زند ءِ ھمُک واھگ پہ مکسد کربان کتگ انت بلے اے گپ ءَ من پہ پھرے گشاں کہ گوں کسانیں بالاد ءَ شھید سلمان ھمّل ءَ گوں وتی کرد ءِ ھمراھی ءَ اے کت ءُ پیش داشت کہ زند ءِ رعنائیاں ءُ وشیاں چہ چَکاریں واھگانی گُٹ گیر کنگ پہ وتن زادگاں چشیں گرانیں کارے نہ انت.

شھید سلمان ھمّل گُڈّی لھتے گپ ءُ تراناں پد من ءَ اے سما بوت کہ شھید ءَ پگری زَگری ءِ سیمسر نزیک کتگ انت آئی ءَ گوں کسانیں بالاد ءَ وتی جبین ءِ تہ ءَ یک پولادی سینگے داشتگ ات اے پیم ءَ زگر بوگ ءِ مستریں سوب بلوچ، بلوچستان ءِ بزگی بیتگ، وھدے انسان اے جاورانی توک ءَ رُد ایت گڑا گِردیت زگر بیت شھید سلمان ھمّل ءَ وتی ھر واھگ پہ وتن کربان کتگ اَنت، آئی ءِ بانور ماتیں وتن اَت، یک وانندھیں انسانے ءِ ھمراھی ءَ یک جوانیں نبشتہ کار ءُ شائرے اَت.
راستی ( یقیناََ )پہ کور دیدی نہ کارمرز بیت ءُ نا کہ پہ نازانتی کربان گاہ ءَ روت بلکیں پگری تمردی ءُ دیمونی دیگ ءَ گران بھائیں واھگ انسان ءَ پگری بالادستی نیمگ ءَ بر انت ءُ اے اَمل شھید سلمان ھمّل ءَ پہ زند پیلو کت انت استاد اسلم ءَ رند من پہ پھر گُشاں کہ من شھید سلمان ھمّل ءِ اھد ءَ زندگاں،پمیشکا شھید سلمان ھمّل ءَ اے شوبینگ بیتگ کہ آ پہ وتن ودی بیتگ بی بی جمیلہ ءَ آئی ءَ را پہ شانے رودینتگ ات ءُ ھُدامرزی ئیں واجہ سوپی اَبدالرب ءَ سلمان پہ پھرے مزن کتگ ۔آ مردم کہ واھگانی گلام بنت زندگانی رنگ ءَ مرتگینانی توک ءَ ھساب بنت ھمے واست ءَ سلمان ھمّل گشیت کہ

“من دو رنگ ءَ دیست اَنت مردم زندگی ءِ میتگ ءَ
شیرکنیں لبزانی پُشت ءَ دْراھیں کارپد بل اِت اَنت

اے چہ پیمیں سرمچاراں جاہ ء بان ءُ ماڑیاں
کوہ گولیں یاگیانی جاہ شیپ ءُ تل اِت اَنت

مارا راھے شون داتگ جند ءِ پیر ءُ مرشداں
سُھر سریں تیرانی دیم ءَ مرد ھما کہ جل اِت اَنت

کنت نمیران مرگ ھمل دور چاریں رھبراں
زندگی ءَ پھر ءُ شان ءِ آ اد ءَ کہ مل اِت اَنت”

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

نبشتانک: آروسءِ مانا چی اِنت؟

نبشتہ کار:نبیلہ مھراب

دی بلوچستان پوسٹ

سُور ءُ آروس ءَ چوناھا ھر کس وتی وڑ ءَ مانایے دنت، بلے مئے چاگرد ءَ آروس چی یے؟ بیا اِت کمے دلگوش دے ایں۔۔!

چوناھا وَ سک باز انت سبب، بلے من کمو سببانی سر ءَ چمشانکے دیاں۔۔!

1) مئے کِر ءَ سُور نماز ءِ پیم ءَ یک پرزے گُش ئے۔۔!

جنک اگاں بالگ اِنت یا نا سانگ ئِے کہ کیت آئیءِ مستر جنک ءِ اُمرءَ نہ چاریت، بس دیم ءِ مردماں چار ایت کہ ھستگار انت، دومی اے کہ زات ئِے شر انت۔۔۔!

انچو جنکے بوُنڈُکاں بنداں کہ بزگیں جنک وت نزانت کہ چے بُوگ ءَ اِنت۔۔!

2) دومی اِش کہ ما جنکاں مھمان لیک ایں ءُ باز بوج ھم گُشیت اِش کہ ھر چُند زوت تِر مردے بہ گِیپت ءُ بہ بارت ئِے۔۔!

منی چمانی دیم ءِ گپ انت کہ من مات ءِ ھمراھیءَ آئیءِ دزگھارءِ لوگءَ شُتیں کہ جنک منی ھمسروک ات ءُ من ھشتُمیءَ وانگ ءَ اتاں، بلے جنکءَ چُکے کُٹءَ ات، گُڑا من جُست کُت تو چنتءَ وانگ ءَ ئے؟
گُشت ئِے کہ سورءَ پد من وانگ یل داتگ کہ چُک لاپءَ کپتگ من وانگی نہ بوتگاں، گوں نیپگانیءَ ھپت سرجم نہ کُت ءُ دراَتکاں۔۔!

من وَ ھیران بوتاں، وتی دلءَ گُشت من ءَ بُکشاں کہ من انو سور نہ کن آں۔

3) سیمی اِیش کہ مئے لوگانی جنین، سیاد، وارس ءُ ھمساھگانی گْور ءَ اے جُستانی باریگءَ ٹارچءَ بہ جن کہ چُنتءَ وانگ ءَ ئے؟
پیپر؟
ریزلٹ؟
کُجا وان ئے؟
چے کار کن ئے۔؟
البت اے جُستانی واستا تیار انت کہ پلانیءِ جنک باریں زامات کُت؟ پُکو۔۔! پلانیءِ جنک وَ کلمانٹے انگتءَ نشتگ۔۔۔!

4) وانگ نزانت بے سوب بوتگ سور ئِے بدے اِت۔۔!
مے کر ءَ سور اِلاج ءِ مسترین بُن انت۔۔
شما کمو سوج بکن اِت کہ اگاں وانگ ءِ شوک ئِے نیست دگہ چیزے بیت سور ءِ وَ شوک بوت نہ کنت۔۔

5) لپڑایے، سورئِے بدئے۔۔
مے چاگرد ءَ بچک اگاں کمو دست نہ اوشتی بکن اَنت گڑا سور ایشانی الاج اِنت۔۔ کمو وتی زھنءَ کارمرز بکن اِت کہ دگر ءِ چکءِ زندگی ءِ شگالی کنگ ءِ ھک کسے ءَ را نیست اِنت، اگاں لپڑایے، گُڑا جنک وَ شگالی بیت۔۔!

6) کلمانٹے سور ئِے بدے۔۔
مَے چاگردءَ جنک ءَ اگاں وانگ ھلاس کت، بزان کہ سجھینانی چم ءِ پُٹ بوت۔
سور نہ کن ئے؟
زامات نہ بہ ئے؟
شما کدی ھم یک جنکے ءِ واب دیستگ اَنت کہ آ زندگی ءَ چی چی کنگ لوٹ ایت۔۔؟

مے کر ءَ سور جنجالانی ھلاسی ءِ مسترین بُن انت، مے کر ءَ سور یک رسمے، ورگ ءُ دیگ ءِ۔۔

جنک بزگ گل اِنت کہ من ءَ شوکیں پُُچ گْور ءَ بیت، نوکیں چیز رس ایت، مردم من ءَ ازت دے انت، دَاوت دے اَنت، من بھر نہ باں۔۔ مھروانے رس ایت،

بچک بزکار نزانت کہ چی بُوگ ءَ اِنت مے چاگردءَ بچک ھم بزگ انت، آ نہ زانت آئی ءِ آروس گوں کے بیت؟

پیسلہ ءَ مات، گھار یا دگہ مسترینے کنت، آ بیچارگ چِِل ءُ مالیں باریں کجام پل ءِ بُنا یک لائکنیں، گُُدبدوچیں، شررنگیں، گْرانیں جنکے، بزگ ءِ رشتہ ءَ بزور ایت۔

سالے دو سال ءَ پد کہ سور ءِ جوش ھلاس بنت، گڑا بیزاری، داوا، شگان ءُ ۔۔ پد ءَ دل گوں دگہ جنینے ءَ مان بُوگ ءَ بندات بیت۔

مئے کر ءَ سور یک لیبے، جنک ءُ بچک بے روزگار اَنت، مات ءُ پت ءِ سر ءَ بوج اَنت، زمہ واری ءِ وڑین لبز ودی نہ کن انت، مردین گلءَ بال انت کہ جن منی چک ءَ ءُ من ءَ گُد دوچی کنت، لاپ دنت۔۔

اگاں جنک ءِ وانگ ءِ توک ءَ سور بیت، آئی ءِ دل وانگ ءَ نہ لگ ایت کہ مرد ء،ِ تْرُو ءُ ناکو ءِ آپ ءُ چا باریں چون بنت;

پد ءَ دوئیں مار انت کہ ھرچ وڑ بہ بیت مرگ ءُ زند آروس مہ پرش ایت۔۔
اگاں یک سورے بد ءَ چہ بد تِریں، بلے انگت برجم بیت، چی ءَ کہ سُھن ءُ سُھن کاری ءِ نام ءِ گرگ ءَ چہ مستریں گناہ مئے چاگردءَ نیست۔۔

آروس ءَ را ھرچ مردم وتی وڑ ءَ مانا کنت، بلے منی نِزّ ءَ اے زند ءِ مستریں گام بیلہ بیت کہ بازیں تک ءُ پھناتانی چارگ ءَ پد زورگ بہ بیت۔ ایشی ءِ توک ءَ اشتاپ بے زانگی یے، ھچ وڑیں راہ ھالیگ مہ بیت آئی ءِ توک ءَ بیزاریءِ سوال پشت مہ کپ ایت،گُڑا شُمے نِزّ ءَ آروس چی یے؟

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

کولواہ ءَ پوجی آپریشن، بیرانیانی گمان

دی بلوچستان پوسٹ

کولواہ ءِ جتاجتائیں جاھاں پاکستانی پوج ءَ آپریشن بنداگ کرتگ –

سر بیتگیں ھالانی رد ءَ کولواہ ءِ دمگ مادگ کور، کاشی کور ءَ پاکستانی پوج ءَ بیڑ برتگ ءُ آپریشن بندات کرتگ –

ھالانی تہ ءَ گْوشگ بیگ ءَ اِنت کہ مروچی سھب ءَ پاکستانی پوج ءَ دمگ انگیر ءَ کرتگ ءُ ترندیں آپریشنے بندات کرتگ –

آپریشن ءَ زمینی پوج ءِ ھمراھی ءَ برزی ءَ بالگرد ھم بھر زورگ ءَ اَنت ءُ لس دمگانی سر ءَ بالگرد تیرگواری ھم کنگ ءَ اَنت –

ناسرجمیں ھالانی رد ءَ پوج ءَ لس مھلوک ءِ لوگانی سر ءَ برزی ءَ تیرگواری کرتگ ءُ چریشی ءَ چَہ دست ءُ گوشیں مردمانی بیرانی ءُ زدگ بیگے ھال ھست اِنت –

دمگ ءَ نیٹورکانی نہ بیگے سوب ءَ راست ءُ تچکیں ھال سر بیگ ءَ نہ اِنت –

زانگ بہ بیت گوستگیں بازیں روچاں کولواہ ءُ آئی ءِ نزیکیں دمگ آواران ءَ پوجی آپریشن برجاہ اَنت –

دومی نیمگ ءَ بلوچ سیاسی ءُ چاگردی مردمانی گوشگ اِنت کہ پاکستانی پوج بلوچستان ءِ جتائیں جاھاں آپریشن کنگ ءَ اِنت ءُ دنیا ءِ انسانی ھکانی گل اے درگت ءَ بے دلگوش اَنت –

مولمی ھورانی گوارگ ءَ سراوان ءُ ھاش ءِ دگ پرشتگ

دی بلوچستان پوسٹ

سر بیتگیں ھالانی رد ءَ گوستگیں مولمی شپ ءُ روچی ھورانی گوارگ ءَ روکپتی بلوچستان ءِ دمگ سراوان ءُ ھاش ءِ دگ ءِ پُھل پُرشتگ اَنت –

ٹریپُک پولیس ءِ رد ءَ ترندیں ھوارانی گوارگ ءَ پد دگ بند بیتگ ءُ چریشی ءَ پد دمگداراں دگ ءِ پچ کنگ ءَ مشین ءُ دگہ ازباب آؤرتگ اَنت ءُ دگ بازیں اداراں پد پَچ کرتگ اَنت –

آئی ءَ گوشت کہ راھانی شر کنگ ءَ مشن ءُ کاردار آرگ بیتگ اَنت راھاں شرکنگ ءَ اَنت –

ٹریپک پولیس ءِ بنشون ءَ گْوشت کہ ھور ءِ گورتگیں آپ بے کساس ءَ باز بیتگ ءُ چریشی ءَ چَہ دگاں سِی داں پنجاہ میل ءَ تاوان بیتگ –

آئی ءَ گْوشت کہ رؤکیں مردمانی واستا دگ پچ کنگ بیتگ اَنت ءُ راھانی سر ءَ نگاہ داشتی ءَ بوڑ مِک کنگ بیتگ اَنت ھمک مردم وتی پھریز ءَ دگانی سر ءَ نبشتگ کرتگیں بوڑاں بہ وان اِیت ءُ وتی ھیال ءِ سر ءَ روان بہ کنت –

کراچی اسٹاک ایکسچینج ءِ سرا اُرش ءَ ھواریں سلمان ھمل ءِ مات ھمراھے دو گوھاراں بیگواہ۔

دی بلوچستان پوسٹ

سر بیتگیں ھالانی رد ءَ کراچی ءَ وتی زھگ ءِ لاش ءِ دزگرگ ءَ رؤکیں مات پاکستانی پوج ءِ دست ءَ بیگواہ کنگ بیتگ –

ھالانی تہ ءَ گْوشگ بیتگ کہ سلمان ھمل ءِ مات جمیلہ ءُ آئی ءِ دو گوھار سارہ ءُ زھرہ پاکستانی پوج ءَ دزگیر کرتگ ءُ برتگ اَنت –

زانگ بہ بیت بیست ءُ نہ جون ءَ پاکستان ءِ بنجاھی شھر کراچی ءَ اسٹاک ایکچینج ءِ سر ءَ چار سلاہ بندیں مردماں اُرش کرتگ اَت ءُ اُرش ءَ پد بلوچستان ءِ آجوئی لوٹوکیں گل بی ایل اے ءَ اُرش ءِ زمہ واری منّ اِتگ اَت –

بی ایل اے جارکش جئیند بلوچ ءَ گْوشتگ اَت اے اُرش مجید برگیڈ ءِ پدائی ءِ سرمچاراں کرتگ –

آئی ءَ گوشتگ اَت اُرش ءِ پشدر بلوچستان ءِ چیر تریتگیں توار ءِ برز کنگ ءُ بلوچستان ءَ ریاستی پوج ءِ زوراکیانی پشدر ءَ کنگ بیتگ –

چریشی ءَ پد اُرش ءَ جنگ بیتگیں سلمان ھمل ءِ مات مند بلوچ آباد ءَ چَہ وتی زھگ ءِ لقش ءِ دزگرگ ءَ کراچی ءَ شتگ اود ءَ آئی ءَ لوٹ کرتگ کہ منی زھگ ءِ لاش ءَ من ءَ بہ دے اِیت –

دی بلوچستان پوسٹ

پشاور ءَ ناشرکاری ءِ بگیری ءَ آمید گِس ءَ پنچ شمبے ءِ روچ ءَ پشتون تھپز موومنٹ ءِ دوزاہ ءُ چاگردی جھدکار گلالئی اسماعیل ءِ ھلاپ ءَ نبشتہ بیتگیں کیس دلجمیں شاھدی نہ بیگ ءِ سوب رد کُتگ ءُ آئی ءِ ھلاپ ءَ بیتگیں کیس ءِ ھلاسی ءِ پرمان نامگ دیگ بیتگ ۔

اے کیس سال 2018 ءَ پشاور ءَ ناشرکاری ءِ بگیری ءَ تھانہ ءَ ناشرکاری ءِ تھ ءَ زری کمک کنگ ءِ بھتام ءَ جنگ بیتگ۔

ھمے درگت ءَ گلالئی اسماعیل ءَ چاگردی رسانکدر ءِ تندجاہ ٹوئٹر ءَ ٹوئیٹ کنان ءَ نبشتگ کہ “ مروچی پشاور ءَ ناشرکارانی بگیری ءِ آمید گِس ءَ منی مات ءُ پِت گوں اِزت ءُ شرپ ءَ یل کُتگ اَنت ءُ دروگیں کیس ھلاس کُتگ۔

آئی ءَ دیمترا نبشتگ کہ آئی ایس آئی ءِ گوشگ ءِ پد ءَ منی ءُ منی مات ءُ پِت ءِ ھلاپ ءَ ناشرکارانی زری کمک کنگ ءِ دروگیں کیس گوستگیں سال ءَ جولائی ءَ نبشتہ کناینتگ، مروچی ھک ءَ کٹ اِتگ۔”

نبشتانک: بیست ءُ یکمی کرن ءُ بلوچ نودربر ءُ آنلائین کلاسز

نبشتہ کار: ھِیمنہ بلوچ

دی بلوچستان پوسٹ

اگاں ما اڑ ءُ جنجالانی جھان ءَ سر بکشّ اِیں چُشیں یک ھم جیڑے نیست کہ مارا بلوچستان ءَ دست مکپیت من یک انچیں راجے ءِ اوبادگاں کہ منی راج ھرچ وڑیں جیڑہ ءُ جنجالانی دیمپان انت اِد ءَ آپ ءُ وردن ءُ گیس ءِ وڑیں انسانی آسراتی یے بُنکّی جیڑہ ھم ھست اَنت، اِد ءَ انسانی ھکّانی لگتمالی ءُ مردُمانی گار ءُ بیگواھی ءِ وڑیں جیڑہ ھم دست کپیت ءُ بیگ اَنت ھر روچ گار ءُ بیگواہ کدی وانگ ءُ زانگ ءِ جیڑہ۔۔۔۔۔۔۔۔۔۔۔۔
وانگ تو گُش ئے پہ بلوچ ءَ مرچیگیں دور ءَ یک مزنِیں گناھے جوڑ بوتگ چُشیں روچ ءُ شپ نیست کہ ما مگندیں کہ نودربرانی مزنیں مُچّی یے پریس کلب ءُ مزن راھانی سر ءَ زھرشانی کنگ ءَ نہ انت یا پہ وت ءَ ءُ وتی آؤوکیں پدریچانی واست ءَ وانگ ءِ لوٹ کنگ اَنت، اے دگنیا ءِ اولی جاہ بلوچستان اِنت کہ مردم پہ وانگ ءَ کوکار ءُ جاک کنگ ءَ اَنت مارا وانینگ بہ بیت۔۔۔۔۔۔۔۔۔۔۔
وھد ءِ ھمراھی ءَ جھان ءِ تب بدل بوان اِنت ھر دور ءَ انسان ءِ جُھد ھمیش اِنت کہ پہ وتی آسودگ کنگ ءَ آ گیش ءَ چہ گیش دیمروی بکنت انچُش کہ انسان ءَ پہ وتی آسراتی ءِ واست ءَ ٹیلفون ءُ انٹرنٹ جوڑ کُتگ ءُ مرچی کہ سرجمیں دگنیا ءَ کرونا ءِ وباھے ءِ آماچ اِنت درستیں کسان ءُ مزنیں نودربرجاہ شھدربرجاہ بند کنگ بوتگ انت۔۔۔۔۔۔۔۔ ءُ وانینگ ءِ تب بدل کنگ ءُ آنلائن کلاس گرگ بیگ ءَ اَنت کہ ھرچ کس وتی لوگاں بہ نندیت ءُ اے نادراھی ءَ چَہ وت ءَ بہ رکّینیت ءُ وتی وانگ ءُ زانگ ءَ اوں بکنت
بلے ما گندگ اِیں کہ بلوچستان ءِ ھرچ ھند ءُ دمگ ءِ نودربر سڑکانی سر ءَ اتکگ ءُ زھر شانی کنگ ءَ اَنت کہ بلوچستان آنلائین کلاسانی گرگ ءُ بلوچ نودربرانی دھوکہ دیگ اِنت پرچا کہ بلوچستان ءَ نیٹ ءُ دامگانی ھچ وڑیں آسراتی نیست۔۔۔۔۔۔۔۔بلوچ نودربراناں زھرشانی کنگ ءِ شوک نیست بلوچ وانگ لوٹ انت ،اے دگنیا ءِ تھ ءِ اولی راج اِنت کہ پہ وانگ ءِ ھاتر ءَ زھرشانی کنگ اِنت کہ من ءَ وانگ ءَ بلّے من وانگ لوٹاں بلوچ لوٹیت کہ من آ دگہ راجانی وڑ ءَ بواناں گوں دگنیا ءِ راجانی کتار ءَ ھوار بہ باں۔۔۔۔۔۔۔۔۔۔۔بلے
بلوچ نودربرانی بدبھتی انت کہ کساس سرجمیں بلوچستان ءَ انٹرنٹ ءِ وڑیں بنُکّی آسراتی ءَ چہ زبھر کنگ بوتگ اَنت۔۔۔۔۔۔۔۔۔۔۔

بلوچستان ءِ نودربر ءُ مھلوک چہ انٹرنٹ ءَ زبھر کنگ ءَ ابید چہ بلوچ راج ءَ پُشت ءَ چگل دیگ ءِ پندل سازگ ءَ دگہ ھچ نیست آھانی کوشش ھمیش اِنت بلوچ گار ءُ گُم بہ بیت بلوچ ءَ وانگ ءَ میل اِت کہ بلوچ وانیت آئی ءِ تھ ءَ زانت ءُ سسّا کیت الم وتی ھکانی جُست ءَ کنت اگاں لھتیں جاھاں اے آسراتی ھست اِنت آ جاہ ءَ نیستی ءِ برابر اِنت پرچا کہ ترا الم روگ ءُ برزیں کوہ ءُ بانڈمانی سر ءَ سر کپگ ءُ درنجلوک بیگ لوٹیت پہ انٹرنٹ ءِ ھاتر ءَ۔۔۔۔۔۔۔۔۔
آنلائین کلاس ءِ گرگ بلکیں پہ بلوچ نودربراں ناں بلکیں پہ دگنیا ءِ کلیں راجاں اے یک نوکیں چیزے پرچاکہ پیسر ءَ اے نبوتگ دگنیا ءِ مزن مزنیں ملک اے آنلائین کلاسانی گرگ ءَ ھیل دار نہ اَنت پرچاکہ نوکیں چیزے آ پریشان اَنت۔۔۔۔۔۔۔۔۔ من وت یک نودربرے آں من وت انی آنلائین کلاس ءُ پیپر دیگ اَنت زوم نام اِیں ایپے (App) ءِ تھ ءَ مئے وانگ ءُ زانگ گند ءُ نند نودربر ءُ راھدربرانی میان ءَ ھمے ایپ ءَ کارمرز کناں باز براں تکنیکی ھرابیانی سوب ءَ اے وت اینگ بیت ءُ کار کنگ ءَ یل دنت اے درستیں تک ءُ پھناتانی ھُرت چاری ءَ اگاں کسّے بکنت تاں سرپد بیت کہ وھدے دگنیا ءِ بلاہ بلاھیں ملک کہ آیانی گور ءَ درستیں آسراتی ھست اَنت انگت ءَ سوب مند نبیتگ اَنت گڑا بلوچستان ءِ وڑیں جاہ ءِ بید ء انٹرنٹ ءَ چتو نودربر سوب مند بیت کن اَنت.

بائد اِنت کہ سرکار ءُ ایچ ای سی (H,E,C)وتی زرتگِیں پیسلہ ءِ سر ءَ دوبر چمشانک بدینت ءُ بہ جیڑ اَنت کہ نودربراں چرے جنجال ءَ آسودگ بکن اَنت بلے وھدے نودربر کہ ھمے جیڑھانی گیش ءُ گیوار کنگ ءِ ھاتر ءَ دراھیں دروازگ در ٹکیتگ اَنت بلے ھچ وڑیں آھاناں آسراتی دیگ نبوتگ ءُ آھانی ھبر گوشدارگ نبیتگ اَنت گّا نودربر مجبور بیتگ اَنت کہ سڑک ءُ دگانی سر ءَ دربکپ اَنت وھدے مئے برات ءُ منی گھار وھدے دگانی سر ءَ درکپاں پہ وتی ھکانی ھاتر ءَ گّا آ لٹ ءُ کٹ کنگ بنت ءُ جیل ءُ زندانی کنگ بنت پرچا کہ آھانی گناہ ءُ میار کہ بلوچ اَنت ءُ وانگ لوٹ اَنت بلوچ ءَ وانگ ءِ ھک نیست بلوچ انسان نہ اَنت، بلوچ نودربر دگہ دگنیایے نلوٹ اَنت چہ شُما بس ھمے گُش اَنت کہ آنلائن کلاسانی واست ءَ ھما چیز کہ المی اِنت بزاں نٹ ءُ دامگ بلوچستان ءَ بھال کنگ بہ بنت مارا ھچ وڑیں اّ ءُ جنجال نیست گوں آنلائن کلاساں۔۔۔۔۔۔۔۔۔من ءَ بژن ھمے بیت کہ مارا وانگ ءَ نیل اَنت، وانگ پہ بلوچ ءَ پرچا گناہ کنگ بیتگ بلوچ زاناں انسان نہ اَنت؟

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: سلمان ھمّل نمیرانیں کسّھانی کارست

نبشتہ کار: جوانسال بلوچ

دی بلوچستان پوسٹ

اے اھد جَنگانی اِنت ،وڑ وڑیں دروشم ءُ تھرے ءَ جنگاں جھان وتی پنجگاں کُرتگ ۔ شَپ کہ بَنت بَلّی کِسّہ کارنت ءُ ھمے جنگانی نمیرانیں کارستاں گِیر کَن اَنت ءُ آیوکیں پدریچاں بامردانی بے بھائیں جھدانی ارزشت ءَ گُشنت ۔ بلوچ اوں جنگانی اھد ءَ زِندگ اِنت ، بلوچ ءِ گلزمین ھم ھونین اِنت ،اے جاوراں بلوچ تھنا تُپنگ ءِ ھمبل اِنت ءُ پہ آجوئی ءِ جھد ءَ وتی سرمتابیں سَراں ندر کَنگ اِنت ۔ بلوچ ءِ راجدپتر ھونی ئیں دپترے ،اے ھونی ئیں دپتر ءِ تہ ءَ ھزاراں انچیں کارست اَنت کہ پہ وتن شَیدا ءُ دیوانگ بوتگ اَنت ، اے دابیں کارست کہ وتن دیوانگ بَنت اِیشاں راج ءُ راجدپتر کدی اوں شموشکار بِیت نہ کَنت ۔بلوچ اِیردستیں راجے ، ءُ زوراکیاں پادمال کُتگ ،بلوچ ءِ مال ءُ مڈّی درامدیں راجے ءَ کبزہ کُتگ ءُ بلوچ ءِ گار ءُ بیگواھی ءَ پہ کارمزر کَنگ اَنت ۔ بلوچ ءِ زالبولاں دگانی سر ءَ وتی تنگھیں براتانی اکس دست ءَ اَنت ءُ پہ آیانی ھاتر ءَ اوگام جَنگ اَنت کہ “مئے برات پرچا تھار ءُ تنکیں زندان ءِ باھوٹی اَنت “؟ اے جُست گلامی ءِ نِشانے ، ءُ بلوچ ءِ زالبولانی بے شرپی اِنت کہ بلوچ ورنا کدی اوں ایشی ءَ پہ وتی ننگ ءُ شرپ ءَ شات کُت نہ کَن انت پمے ھاتر ءَ اے جنگانی اھد ءَ بلوچ اوں آجوئی ءِ کِسّہ ءَ گوں وتی ھوناں نبشتہ کَنان اِنت ۔ زِندمان ءِ بھار گونگیں رنگانی سھر ءِ تہ ءَ ھمک مردم وت ءَ را در کُت نہ کَنت بلے گُلامیں راجانی پُرمڑاھیں پُسّگ ،زندمان ءِ بھاراں وتی ایرموش کَن انت ءُ تھنا پہ گلزمین ءِ مرزبومیں ھاکاں زَرنت ۔ ھو ! اے ھمے راج پھازیں پُسّگ اَنت کہ ھرگام ءَ پہ وتن سالونک بَنت ۔اے راجی سالونک اَنت ایش پہ گلزمین ءُ ننگ ءِ ھکپانی ءَ وتی زند ءَ ھم ببا دے انت ۔ سسّا ءُ پگرانی شاھگانیں گلزمین ” بلوچستان ” بے بچّ نہ اِنت ،اے جھد کہ “آجوئی ” ایشی ءِ گُڈّی منزل اِنت ، پدّرائیں گپّے کہ اے جھد بے ھون ءَ “آجوئی ” نیار اِیت ، اے گپّ “بلوچستان ءِ پُسّگاں پھم اِتگ ءُ راجدپتر ءَ گوں وتی ھوناں نکش کنان اَنت ۔ جھد ءِ آجوئی ءِ جھد ءَ ” مجید برگیڈ ” زوراکیں دژمن ءَ سِرین پروش کنگ ءَ مزنیں کِردے ءِ بسات ءَ بلوچ راج ءَ پہ وت ءَ زُرتگ ۔ جنگ ءِ اے فلسفہ ءَ دیم ءَ بروک “پُل گونگیں پدائی اَنت ” کہ وتی آواز ءَ کُلیں میاں اُستمان ءَ سر کَنگ لوٹ اَنت کہ نِزور ءِ توار چوں چست بیت ءُ بُرز ءَ سرجمیں استمان ءِ سر بوت کُت کَنت ءُ آجوئی چون گِرگ بیت ؟ اے جُست ءِ پسّہ تھنا “پدائی ” اَنت ۔ گرم ءِ جَل اِنت ، ما کُل نِشتگیں کسّے کَیت ءُ ھال کَنت کہ ” اسٹاک ایکسچینج سر ءَ سنگتاں پدائی اُرش کُتگ ” اے وھد ءَ بس یک جُستے مجگ ءَ پاد کیت ءُ زوت زوت ءَ جُست ئِے کن اِیں کہ سَنگت کے کے اَنت ؟ تسلیم بلوچ ،سراج کُنگر ،شھزاد بلوچ ءُ سلمان ھمّل اَنت ۔ جوانیں اُرشے سنگتاں کُتگ ۔ آئی ءَ گْشت ۔ سلمان ھمّل ءِ نام اِشکُنگ ءَ من اجّکہ بوتاں ءُ دگہ جھانے ءَ شُت آں ءُ سلمان ءَ گوں کُرتگیں ھال اھوال ، آئی ءِ کُرتگیں گپّ، سر ءُ سوج کُل چمّانی دیم ءَ چَول جنان اِت اَنت ۔ اے وھد ءَ یک وشّی یے ھم بوت بلے اندر ءَ یک گمے ھم در ءَ بوت ءُ نزانت کہ چون ءُ چِتور گوں اِشاں دیم پہ دیم بہ باں ۔ ھما نکس کہ پاکستان ءَ رس اِت ءُ ھما آواز کہ بُرز ءَ روگی اَت پمیشی ءَ مزنیں وشّی یے بوت ۔

سلمان ءِ ھما گپّ کہ ” جھد ھون لوٹ اِیت ءُ بے ھون ءَ کدی اوں آجوئی نہ رس اِیت ءُ دنیا ءِ راجدپتر ءَ چشیں راج نیست کہ بے کُربانی ءَ آیاناں آجوئی گِپتگ ” ۔ سلمان ھمّل ءَ گوں پجّاروکی ، یک نبشتہ کار ءُ شائری ءِ جُھت ءَ بوت بلے باز زوتّاں آ من یک جھدکارے ءِ بِستار ءَ زانت ءُ پد ءَ جھد ءُ تھنا جھد ءِ بابت ءَ گپّ ئِے کُت ۔ سلمان ھمّل ءِ جھد نمیرانیں جھدے ءُ جھد پہ تھنا وتی ڈیھ ءُ گلزمین ءَ کُرت ئِے ۔ سلمان ھمّل مرزبومیں گلزمین ءِ سِکانی مھر ءَ چہ آژناگ بوتگ ءُ پمیشکا سلمان ءَ وت ءَ پہ پدائی ندر کُتگ ۔

ھردے کہ سلمان ءَ نوکیں شَیرے نویس اِتگ ، الم پہ من وٹسپ ءَ ئِے دیم داتگ ءُ من ءَ سلمان ءِ شَیر بہ بنت یا نبشتانک کُلّاں وتی نیمگ ءَ بُرتگ ۔زانشت ءَ چہ چکاریں جھدکار الّم ءَ اے گپّ ءَ زان اَنت کہ دژمن زوراک اِنت ، وڑ وڑیں پندل سازگ اِنت پمیشکا سلمان ھمّل ءَ گوں وتی ھمرایاں پدائی کُرت ءُ پہ وتن ندر بوت ۔ اے میان ءَ ھمّلو ! بیت کَنت تئی جھد ءَ بازیں مردمے اِیر بِجنت ، تئی جھل جَنگ ءِ جھد ءَ بِکنت بلے راستی ایش اِنت کہ تو بس پہ وتن پہ گلزمین ءَ ندر بوتگ ئے ءُ تو ھما گھار کہ شال ءِ سُتکگیں دلبند ءِ سر ءَ وتی اوگام ءُ تواراں استان ءَ سر کَنگ لوٹ اَنت ،زندان ءِ بندیگیں براتانی دیدے ءَ پہ تلوسگ اَنت ۔ ھمایانی براتے پہ ھمایاں ھم تو آوازے ئے ءُ آجوئی ءِ جھد ءَ ھم روکیں کندیلے ءِ دروشم ءَ ئے ءُ داں کرناں تو نمیران ئے ۔ ۔۔۔۔۔۔۔۔۔۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

کراچی ءَ گوستگیں روچءَ اسٹاک ایکسچینج ءِ سرا بیتگیں بیتگیں اُرش ءَ چہ پاکستانی لشکریاں جتاھیں دمگانی تھءَ بیڑ بُرتگ ءُ لوگانی پَٹگ بندات کُتگ۔

دی بلوچستان پوسٹ

ٹی بی پی اھوالکارءِ ردءَ سندھ ءِ مزن شھر کراچی ءَ پولیس ءُ رینجرز ءَ بازیں میتگانی تھءَ بیڑ بُرتگ ءُ گمانی مردم پٹ اِتگ اَنت ءُ جُست ءُ پرُس کُتگ اَنت۔

پولیس ءِ نیمگ ءَ چہ شنگ بیتگیں درشان ءِ ردءَ سوراب گوٹھ، سچل، نیوٹاون ءُ جمشید کوارٹر ءِ ھنکینانی تھءَ پولیس ءُ رینجرز ءَ ھوار بیڑ بُرتگ لوگ پَٹ اِتگ اَنت۔

اھوالانی ردءَ رینجرز ءُ پولیس ءِ ھواریں پٹگی بیڑ اِستان ءِ بگیری ءَ کارکنوکیں ٹولیانی ھلاپ ءَ بیتگ۔

بیڑ ءَ لوگ پہ لوگ پٹگ ءِ نیام ءَ بازیں گمانی لوگ ءُ مردم پٹگ بیتگ اَنت ءُ پجار نامگ چارگ بیتگ اَنت۔

زانگ بہ بیت کہ گوستگیں روچ ءَ بلوچ لبریشن آرمی ءِ مجید برگیڈ ءِ نیمگ ءَ چہ پاکستان ءِ کاروبارءِ مستریں ھند سرپد بیوکیں شھر ءِ تھءَ اسٹاک ایکسچینج ءِ سرا اُرش کَنگ بیتگ اَت۔