TBP Balochi

شال: پہ بیگواھیں بلوچانی درگیجگ ءَ زھرشانی گدان ءَ4021روچ سرجم

دی بلوچستان پوسٹ

شال پریس کلب ءِ دیم ءَ وائس فار بلوچ مسنگ پرسنز ءِ زھرشانی گدان ءَ4021روچ سرجم بیتگ، سیاسی ءُ چاگردی جھدکار درمھمد،نور مھمد ءُ جنینانی بازیں کچے ءَ گدان ءَ گندُک کُرتگ ءُ گوں بیگواھیں مردمانی کھولاں ھمدردی درشان کُرتگ۔

اےدرگت ءَ وی بی ایم پی ءِ کمک سرکماش ماما قدیر ءَ تران کنان ءَ گْوشتگ کہ وی بی ایم پی ءِ سروکی کنان ءَ مرچی ما انچیں جاھے ءَ سربیتگیں کہ چہ ایشی ءَ دلجمی ءَ تران کُرت کنیں ءُ من سرپد باں کہ مرچی ما سرجمیں جھان ءَ وتی توار ءِ سر کنگ ءَ سوبین بیتگ اِنت۔ زی اے چیزاں بن نیست اَت۔سرجمیں بلوچستان ءَ پاکستان ءَ وتی ھستی شمشتگ، مئےورنا، جنین وتی زانت ءَ گوں راجی لوٹاں ھمگرنچ بہ کن اَنت ءُ گل ءِ راھبند ءِ رد ءَ وتی کرد ءَ پیلو بہ کن اَنت۔

راج ءِ گیشتریں بھر ایمنیں جُھد ءَ گل ءِ راھبندی رد ءَ بندوک اَنت، چہ زی ءَ مرچی گل ءَ بلوچ جنینانی ھوار بیگ جوانیں کردے۔ میان اُستمانی پِڑ ءَ بیگواھیں بلوچانی توار ھمک مراگشاں جوانیں ارزشتے داریت۔ بلے ما ایمنی ءِ جُھد ءِ پِڑ ءَ نوکیں دور ءِ لوٹاں شمشکار نہ ایں۔ دژمن بلوچ چکچینی ءَ ھمے وڑ ءَ تیزی آرگ ءَ اِنت۔جنگی پِڑ ءِ وتی بیراں ءَ چہ بےگناھیں بلوچاں گِرگ ءَ اِنت۔ جنگی راھبند ءُ مردمی ارزشتاں لپاشان اِنت۔

ایشی گِر ءُ دار کنگ ءِ ھاترءَ مارا ءَ یکجاہ بیگی اِنت،بلکیں مردمانی زور ھم ھوار کنگے ءَ اَنت۔ گل اے درگت ءَ وتی کار ءَ کنگ ءَ اِنت۔ بیگواھیں مردم ءُ شھیدانی کھول درسیں چیز کار آمید کنگی اَنت,اے دردناکیں وھد ءَ راجی سوھو ءُ زانتکاریں مردماں دیم ءَ آیگی اِنت۔ چوشیں مردم کہ چیردستی ءُ نوک آبادی ءِ پگر ءِ دراھگ ءَ پُشت ءَ کپتگ اَنت ایشاں بایدیں کہ گْوستانک ءِ توار ءَ گوشاں مہ دار اَنت، پرچہ کہ گْوستانک کوکار کنگ ءُ توار پر جنگ ءَ اِنت کہ اے وپسگ ءِ وھد نہ اِنت بلکیں گیشاں چہ گیش زانت کاربندگ ءُ وتی بود ھرچ کنگی اِنت۔

بلوچ اھوالکار ساجد ھسین ءِ بیگواھی ءَ پد بیرانی ءِ کیس منانک نہ بیگ ءِ سوب ءَ ھلاس۔

دی بلوچستان پوسٹ

سویڈن واکدارانی رد ءَ کوش ءُ زوریں بیگواھی ءِ دلجمیں منانک نہ بیگ ءِ سوب ءَ بلوچ اھوالکار ساجد ھسین ءِ زوریں بیگواھی ءُ کُشگ بیگ ءِ گپ چہ کیس ءَ ھلاس کنگ بیتگ –

2 مارچ 2020 ءَ چہ سویڈن ءِ شھر اپسالہ ءَ چہ بیگواہ بیتگیں ساجد ھسین بلوچ کہ آئی ءِ کُنٹ 23 اپریل 2020 ءَ اپسالہ ءِ یک کور فائرس ءَ چہ دزکپتگ اَت۔ ساجد ھسین ءِ کُنٹ 01 مئی 2020 ءَ پجارگ بیتگ اَت ءُ گمان ھمیش اَت کہ ساجد ھسین بیگواہ کنگ بیتگ ءُ پد ءَ کُشگ بیتگ ۔

جھانی انسانی ھکانی گل ءُ اھوالکارانی پھازوکیں گلاں ھم ساجد ھسین ءِ بیگواھی ءُ کوش ءِ تہ ءَ پاکستانی چیریں ادارھانی ھوار بیگ ءِ نیمگ ءَ لنکوک شان داتگ اَت۔

مروچی ساجد ھسین ءِ کیس ءِ درگت ءَ نوکیں اھوال دیما اتکگ اَنت ءُ آیانی رد ءَ ساجد ھسین ءِ کیس ءِ پٹ ءُ پول کنوکیں واکداراں چہ کیس ءَ زوریں بیگواھی اگاں کُشگ ءِ گپ چہ کیس ءَ کش اِتگ ءُ گوشتگ کہ ساجد ھسین ءِ بیگواھی ءُ بیرانی ءِ درگت ءَ چُشیں مھکمیں منانک دز نہ کپتگ کہ مردم بہ گْوش اِیت کہ ساجد ھسین ءِ کوش ءَ کسے ءِ دست ھوار اِنت اگاں ساجد ھسین کُشگ بیتگ۔

اے درگت ءَ دگہ یک نامی ئیں بلوچ اھوالکار کئیا بلوچ ءَ ٹوئیٹر ءَ وتی یک ٹوئیٹے ءِ تہ ءَ نبشتگ کہ “ساجد ھسین ءِ کوش ءِ درگت ءَ جنزوکیں پَٹ ءُ پول نی ھلاس کنگ بیتگ۔”

آئی ءَ دیمتر ءَ نبشتگ کہ ساجد ھسین ءِ کیس ءِ درگتءَ پَٹ ءُ پول کنوکیں واکداراں گوشتگ کہ “فارنسک آٹوپسیز” ءُ ھما مردماں کہ ساجد بیگواھی ءَ چہ پیسر دستگ آیانی درشان ءَ چہ پد اے گمان گیشتر نزور بیت کہ ساجد ھسین کجام ھم ناشرکاری ءِ آماچ بیتگ! اے گپ باوری نہ اِنت! دعا اِنت اللہ (ساجد) ءَ آسودگ بہ کنت۔”

کولواہ گیشگور ءُ سنڈم ءِ دمگاں پوج ءَ بیڑ بُرتگ

دی بلوچستان پوسٹ

دی بلوچستان پوسٹ اھوال پتر ءَ سربیتگیں ھالانی رد ءَ بلوچستان ءِ دمگ کولواہ ءِ ھنکین گیشگور ءُ سنڈم ءَ پاکستانی پوج ءَ بیڑ بُرتگ ءُ بازیں مردم لٹ ءُ کٹ کُتگ۔

ھندی ھالانی رد ءَ مروچی پاکستانی پوج ءَ گیشگور ءُ سنڈم ءِ ھنکیناں بیڑ بُرتگ ءُ لوگ پہ لوگ پٹگ ءَ پد بازیں مردم لَٹ ءُ کُٹ کُتگ اَنت۔

ھندی اھوالکارانی رد ءَ پوجی کارمنداں بازیں بلوچ جنین آدمانی گوشی (موبائل) گوں وت بُرتگ اَنت۔

یات بہ بیت بلوچستان ءِ جتائیں ھند ءُ دمگاں پاکستانی پوج ءُ چیریں گلانی بیڑ، مردمانی دزگیری ءَ پد بیگواہ کنگ ءُ لوگانی تہ ءَ جنین آدمانی کم شرپ کنگ ھم یکشل ءَ برجاہ اَنت۔

بلوچ سیاسی گل ءُ بلوچ انسانی اگبالانی ھاتر ءَ کارکنوکیں گل اے زوراکیاں ھواریں سزا ءِ نام دئینت ءُ گوش اَنت کہ لس مھلوک ءُ سیاسی جھدکارانی کھول ءُ بے میاریں مردمانہ سزا دیگ انسانی اگبالانی لگت مالی اِنت۔

نبشتانک: من ءُ زندان

نبشتہ کار : اَمر بلوچ

دی بلوچستان پوسٹ

گاڑیانی ھینژ ءُ ھانژ اَت ھنچیں شورے بنا بیتگ اَت ، وھدیکہ من ڈنّ ءَ سر کَش اِت داں منی لوگ ھرچاریں نیمگاں انگیر ءَ اِنت من ھمے دیست کہ گاڑیانی مُچی اِنت ، تاں دیست گاڑی سِلاھبندیں (مسلح) مردُم (سول ڈریس)لس پوشاک ءِ تہ ءَ اَنت ءُ سیاہ کانچیں گاڑی ءَ اَنت۔ ھمے مردُم چہ گاڑیاں ایر اَتک اَنت ءُ کمپان ءِ گیٹ اِش گوں لگتاں مان بست ءُ لوگ ءِ تہ ءَ پُتِرت اَنت۔ اِیشاں منی دْراھیں لوگ پٹّ ءُ پول کت ءُ دْرستیں مردُم یکجاہ کت اَنت۔ اجب ترسناکیں مردم اِت اَنت من ھنچُش ترسگ ءَ اِتاں ۔ آیاں منی نیمگ ءَ دست شھار (اشارہ) اِت کہ ھمے ورنا اِنت ، آیاں من ءَ گِپت چمّ ءُ دست بست اَنت ءُ گاڑی ءِ تہ ءَ دور اِش دات۔داں چیزّے کلاک ءَ پد من یک کیمپے ءَ بَرگ بوت آں تھاریں کوٹے ءَ دور اِش دات ۔ کسانیں ساھتے ءَ چِہ پد اَتک اَنت منی کر ءَ ،جُست ءُ پُرس ءَ لگّت اِت اَنت،تو کُجام سِلاھبندیں گَل (مسلح تنظیم) ءَ سیادی (تعلق)دار ئے؟ تو کے کے ءَ زان ئے؟ تئی ھند ءِ تہ ءَ گَلّ (تنظیم) ءِ مردم کَے کَے اَنت؟ من گْوشت ۔ من کس ءَ نہ زان آں ، من ءَ گوں ھِچّ وڑیں تنظیماں گوں سْیادی نیست اِنت، گُڑا بِندات بوت اَنت منی لٹّ دیگ ءَ، من ءَ جت ءُ جُست اِش کُت دانکہ شپ بوت، شپ ءَ من ءَ ورگ اِش وارینیت ۔

دو ءَ دست برز ءَ بست اَنت ،پاد ماں پاد ءَ بست اَنت ۔ یک پادے ءِ سر ءَ اُوشتارینت اِش ،دْراھیں شپ ءَ داں کہ سُھب بوت ،ھمے وڑ ءَ پانزدہ روچ گْوست لٹّ ءُ کُٹّاں ۔ لٹ ءُ کُٹّاں من ءَ سک ژند ءُ پند اِش کتگ اَت ، منی کش ءِ کُوٹی ءَ لھتے مردم ھست اَت،گپّ ءُ ھبرانی توار مُدام اتگگ اِت اَنت، یک شپے ءَ پد ءَ من ءَ بُرت اِش جست ءُ پُرس کنگ ءَ ،لٹّ ءُ کٹّ کُت اِش۔ پد ءَ سُھب ءَ من ءَ واتر کوٹی ءِ تہ ءَ آؤرت ءُ چگل اِش دات ،بیستُمی روچ ءَ پد ءَ من ءَ بُرت اِش سک باز ٹارچر کُت اِش، تو بِہ گْوش گوں کُجام تنظیم ءَ سْیادی دارے؟ منی گپّ یکّے اَت کہ من ءَ ھِچّ تنظیم ءَ گوں سْیادی نیست اِنت،من ءَ جَت اِش ءُ توسینت اِش ۔پد ءَ ھوش ءَ اتکاں من ءَ لٹّ ءُ کُٹّ اِش بنا کت،رند ءَ لٹّ ءُ کُٹّ بند کُت اِش ءُ من ءَ آؤرت اِش کوٹی ءِ تہ ءَ ، دِگہ یک مردُمے بُرت اِش کہ لٹّ ءُ کُٹّانی توار ، کوکار ءُ جاکانی توار مئے کرّ ءَ آیگ ءَ اِت اَنت من کس ءَ نہ زاناں پد ءَ توار اَتک من کس ءَ نہ زاناں ۔پد ءَ من ءَ سیُمی روچ ءَ بُرت اِش کوٹی ءِ ءَ چپّی ءَ ٹنگ اِت اِش۔ لَٹّاں گوں مان بست اِش۔ مرچی ترا ما یل نہ دے اِیں۔ اے روچ ءَ مَنّ پنچ رند ءَ جت ءُ توسینت اِش دانکہ شپ ءِ ساھت 12 ءَ لٹّ ءُ کُٹّ برجاہ اِت اَنت ۔من سک نگیگ اِت آں ، نی ھِچّ وڑ ءَ من ءَ لٹّانی برداشت ءِ ھاٹی (قوّت) نیست اَت۔ من گْوشت من بی ایس او ءِ مردُمے بوتگ آں۔ بلے انّوں منی اھوال (رابطہ) گوں کسّ ءَ نیست،من ءَ دیر اِنت من بی ایس او یل داتگ،گڑا گْوشت اِش تو دِگہ کے ءَ زان ئے۔ بی ایس او ءِ مردُماں چِے ؟من گْوشت من کسّ ءَ نہ زان آں پد ءَ لٹّ ءُ کُٹّ بنا کت اِش،تو دْرستاں زان ئے ۔ سِلاھبندیں گَل (مسلح تنظیم) ءِ مردُماں ھم زان ئے مئے کِرّ ءَ تو منّگ ءَ نہ ئے، تو بِہ گْوش۔ ما تئی سِزا ءَ پھل(معاف) کن اِیں ءُ ترا یل دے اِیں،تو وتی ھند ءِ توک ءَ ھرکس ءَ زان ئے مارا بِہ گْوش اِش گوں ، اگاں نا ترا اَنچوش جن اِیں ءُ کُش اِیں گیابانے ءَ دور دے اِیں تو مارا مہ گُْوش ئے گوں۔ من گْوشت من کس ءَ نہ زان آں،من شُمارا گْوشت کہ من پیسر ءَ بی ایس او ءِ مردُمے بوتگاں ،منی انّوں گوں کس ءَ اھوال نیست

، من ءَ بِہ کُش اِت من کس ءَ نہ زان آں ،گْوشی تو ھمجوابی کن ئے ،من ءَ سکّ باز لٹّ ءُ کُٹّ اِش کت ،پادانی دل ءَ چِتر جت اِش،ناکُن ءِ ھمبُرّ (پلاس) اِش سکّ دات اَنت۔ گُڑا منی کِرّ ءَ گلینڈر چالو کُت اِت اِش پہ ترسینگ ءِ واستا ،تو بِہ منّ ۔ پد ءَ منی چم اِش پچ کُت اَنت ءُ 15 دانگ اَکس (فوٹو) کشّ اِت ءُ کُوٹی ءِ تہ ءَ بستگیں سانکل پیش اِش داشت اَنت، پد ءَ منی چم اِش بست اَنت ءُ پد ءَ دیم پہ چیر واپینت اِش لٹّ ءُ کُٹّ اِش بنا کُت ۔ چہ گیشیں جَنَگ ءَ منی ران تْرک اِت اَنت ءُ ھون زمین ءِ سر ءَ رِچان بوت اَنت ۔ ھمیشانی تہ ءَ یکّے ءِ توار در اَتک مہ جن اِت ئِے راست گْوشگ ءَ اِنت ،دِگہ کسّ ءَ نہ زانت کہ ھمیش اِنت،من ءَ بُرت اِش دِگہ کوٹی یے ءِ تہ ءَ ۔دگہ یک سنگتے ھمود ءَ اَت۔ لٹّ ءُ کُٹّاں من ءَ سکّ ژند ءُ ژُول کُتگ اَت ،من گوں سنگت ءَ ھچ وڑیں ھال اھوال نہ کت ءُ ھمے مْیان ءَ واب کپت آں ۔ من سُھب ءَ چمّ پچ کُت اَنت ۔سنگت اِد ءَ نہ اِنت گُڑا اَتک اَنت ءُ من ءَ درمان اِش دات ھمے وڑ ءَ دو ماہ ءَ ھمے کُوٹی ءِ تہ ءَ روچ گْوست اَنت ۔ پد ءَ من ءَ بُرت اِش دومی جیل ءَ ، چمّ ، دست ءُ پاد اِش بست اَنت۔ تھاریں کُوٹی ءِ تہ ءَ من ءَ اِیوک ءَ بند اِش کُت ،ورگاں چہ بدّیں بوہ اتک ءُ آپانی تہ ءَ پٹرول ءُ ڈیزل مان اَت،ھمے وڑ ءَ ھپت ماہ گْوست ،یکروچے مردکارے اَتک ،من ءَ جُستے کُت ۔ تو اَنگہ زندگ ئے نہ مُرتگ ئے ۔ تو گنوک ھم نہ بوتگ ئے،تو داں زندگ ءِ ھمے جیل تہ ءَ سڑ ئے مر ئے رو ئے۔ ترا یل نہ دے اِیں،ھمے وڑ ءَ سالے سرجم بوت۔ ھمے کوٹی ءِ تہ ءَ من سالے ایوک ءَ گْوازینت، پد ءَ دومی روچ ءَ من ءَ کشّ اِت ءُ دومی کوٹی ءَ برت اِش، کُوٹی ءِ تہ ءَ دِگہ یک مردُمے ساری ءَ ھست اَت۔ من ءَ ھمد ءَ یل اِش دات ۔چمّ، دست ءُ پاد اِش پچ کت اَنت ءُ من کوٹی ءِ تہ ءَ شُتاں ءُ سنگت ءَ را سلام دات۔ ھال اھوال کُت من جست کرت تئی نام کَے اِنت؟ من ءَ گْوش منی نام ودار اِنت، من ءَ ھپت سال بیت من ٹارچر سیل ءِ تہ ءَ آں ۔ من ءَ جُستے کرت تئی نام کَے اِنت؟من گْوشت منی نام اَمر بلوچ اِنت، من ءَ چاردہ ماہ بیت من بند آں ،گُڑّا من ءَ گْوشت ئِے ڈنّ ءِ ھالاں بِہ دئے،سنگت چون اَنت؟باریں کُجام سنگت شھید کنگ بوتگ ؟ من گْوشت بازیں سنگت شھید کنگ بوتگ ۔بازیں لگور بوتگ ،بازیں سنگت دُژمن ءَ گوں جَنَگ ءَ اَنت ۔ جُھد جنزان جنزان ءَ منزل ءَ رھادگ اِنت، آئی ءَ بچکند اِت ءُ گْوشت جُھد الّم منزل ءَ سر بیت،۔ ھمے وڑ ءَ مئے دوھینانی روچ گْوزگ ءَ اِت اَنت ۔آئی مُدام گپ ءِ تہ ءَ کند اِت ، من ءَ نہ کُش اِیت ءُ منی لاش ءَ دور نہ دنت، مپت ءَ من ءَ داشتگ ئِے۔ منی اے ھون بلکیں سرزمین ءِ واستا کار بہ دے اَنت،

آئی ءِ سر وشّ (دماگی صورت) نہ ات ، مُدام وت سر ءَ کند اِت ئِے ،گُڑّا ما شپ ءَ وپت اِیں ، یکروچے منی تبیت ھراب بوت ودار ءَ کُبل (تالا) ٹُکّ اِت بیا اِت سنگت ءِ تبیت ھراب اِنت ،گولی ءُ درمانے بِہ دے اِت،یکّے ءَ توار دات۔ بِلّےمِراِیت ۔گولی ءُ درمان مئے کرّ ءَ نیست، ودار ءَ ایشاناں زاہ ءُ بد کُت،گُڑّا اَتک اَنت ودار کَشّ اِت ءُ سکّ باز جت اِش ۔ پد ءَ کوٹی ءِ تہ ءَ دور اِش دات ،من گْوشت تو چے کنگ ءَ ئے ؟ دُژمن کرّ ءَ گولی درمان لوٹ ئے،اِے مئے دُژمن اَنت ۔ھمے وڑ ءَ روچ گْوست ءُ شپ بوت اَتک اَنت من ءَ گولی ءُ درمان اِش دات ۔من ءَ سوچِن اِش جت ۔ منی تبیت کمّو وشّتر بوت۔ منی تبیت ھمے واستا ھراب بوتگ اَت، کہ آپانی تہ ءَ پٹرول ءُ ڈیزل مان اَت۔ ورگانی تہ ءَ بد بویے آیگ اَت۔ ھمے وڑ ءَ من ءَ دو سال سرجم بیگ ءَ دو روچ پش کپتگ اَت کہ یک مردکارے اَتک من ءَ گُشت ئِے ترا یل بِہ دے اِیں تو چی کن ئے؟ من گْوشت من یل بوت آں گربی یے کن آں ۔من ءَ پد ءَ گْوشت ئے ترا ھِچّ وڑیں سیاسی ءُ سِلاھبندیں تنظیماں دو وار(دوبارہ) ءَ دست مہ بیت، اگاں تئی شکایتے اَتک ما ترا کُش اِیں۔ شپ بوت منی کرّ ءَ اَتک اَنت بیا ما ترا کُشگ ءَ بَراِیں،من ودار ءَ را گلائش کُت، منی چمّ اِش بَست اَنت ءُ گاڑی ءَ سوار اِش کُت دگ ءِ (سڑک) ءِ لمب ءَ آؤرت ءُ یل اِش دات، بلے برے برے انگت من ءُ زِندان ءِ ھیالانی اندر ءَ ھم تْران باں ءُ بازیں اکسے وت ءَ بْرھنگ کنت ۔ ھمے بْرھنگیں اکسانی پُژدر ءَ نوکیں کِسّھے سرکشّ اِیت ءُ من ءَ ھمے توکل ءَ دنت تو وَ چہ زُوراک ءِ کھرشانیں زِندان ءَ آجو بوت کُت ، بلے ودار ءِ ھمراھی ءَ دِگہ ھزاراں ودار ، ودار ءِ شپ ءُ روچاں ڈکّ دنت ۔ پمیشکا من گْوش آں چہ آجوئی ءَ ابید اے ودار پہ بلوچ راج ءَ کدی آسر نہ بیت ، گھ ھمیش اِنت ما کُل بلوچ راج ءِ پُسّگ راجی آکبت ءَ جُھد ءِ بھر بِہ بَہ اِیں دانکہ اے ودار پہ ابد ھتم ءُ گُٹگِیر بِہ بیت ، اگاں نا گُلامی مارا پہ مُدامی بیگواہ کنت ۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

نبشتانک: بلوچی گوں بے دوازدھیں آباں

ندکار: ابدلستار بُگٹی

دی بلوچستان پوسٹ

بازیں رد ءُ ناسرپدیں مردم ھست انت کہ وت ءَ بلاھیں استاد لیک اَنت۔ ھمے نابود چَہ من ءَ مُدام لھتے اجبیں جُستاں کن اَنت، انچوشکہ
1- بلوچی نبشتہ کاری ءَ اَربی یا تازی آب چی ءَ کارمرز نہ بنت؟
2- اگاں ما اَربی آباں ماں بلوچی نبشتہ کاری ءَ کارمرز مہ کن ایں گُڑا بلوچانی اسلامی نام ماں زگریں بلوچی ءَ بدل بنت چریشی ءَ ما گُناھگار بہ ایں؟
3- سید زھور شاہ ھاشمی ءَ وتی نام چی ءَ گوں اَربی آباں نبشتگ۔
بزاں اے سَےئیں جُستانی پسّواں من مُدام یک یکی ءَ ھمے ناسرپدییں استاداں درشان کن آن ءُ آیاں وتی زانتکاری ءِ کچ ءَ سرپدی دیگ ءِ تچ تاگ کن آں بلے نی من لوٹ آں کہ مرچی یک نبشتانکی ءِ دورشم ءَ اے وڑیں جُستانی پسّواں راج ءِ دیم ءَ بیار آن ءُ پد ءَ گوں من ھم درپ بہ بنت کہ اگاں کسے چَہ من ءَ اے وڑیں چیزاں جُست بہ کنت گُڑا من کاپی اینڈ پسٹ ئِے کن آن ءُ دیم ءَ ایر ئِے کن آں آ وت بہ وان ایت ئِے۔ البت اگاں اَگل ئِے ھست گُڑا سرپد بیت اگاں بے اَگلیں باسکے گُڑا ھجبر پوہ نہ بیت۔
چوناھیگا ما وَ زان ایں کہ لھتیں مردماں ماں بلوچ چاگِرد ءَ بے کساس پورتای کتگ ءُ راج اش بے کساس تُرسینتگ ءُ رد داتگ پمیشکا مارا سرپد اش کنگ ءَ بے کساس جُھد لوٹ ایت داں وھدیکہ ما آیاں پروش مہ دے ایں چی ءَ کہ اے وڑیں مردم مارا راجی زبان ءِ بابت ءَ رَد دیگ ءَ انت۔نی من ھمے جُستانی پسّواں دے آں۔

پسّو لمبر #1: اگاں اے اَربی آب انت گُڑا اے آبانی ماں راجی زبان بلوچی ءِ نبشتہ کاری ءَ چے کار ءُ درکاری یے ھست۔ مئے راجی زبان ءِ نبشتہ رھبند چَہ اے بے دوازدھیں آباں پیلو ءُ سرجم انت ءُ گوں بے اے دوازدھیں آباں بلوچی نبشتہ کاری ءَ یک انچیں رنگ ءُ دروشمے ودی بیگ ءَ انت کہ چریشی ءَ مئے راجی زبان بلوچی چَہ پارسی، ھندی، پشتو، سرائیکی ءُ ارابی وڑیں بازیں زباناں گیشترّ براھدار ءُ نویکلائیں دروشمے دار ایت۔ بزاں بلوچی ءِ وتی یک جُتائیں پجّارے ءُ ما ھم ایشی ءَ زگر دارگ ءِ جُھد ءَ ایں پمیشکا باید انت ما بلوچ وتی راجی زبان ءَ گوں بے اے دوازدھیں آباں نبشتہ بہ کن ایں ءُ سْیاد ءُ وارساں ھم اے بابت ءَ سرپدی بہ دے ایں کہ راجی زبان ءِ وانگ ءُ نبیسّگ ءَ بے اَربی آباں ھیل گِر انت۔ تچک بِہ بَہ ایں کہ اگاں اَربی اَنت گُڑا گوں بلوچی ءَ ھچ سْیادی نہ دار اَنت انچوش کہ منی ھمُک نبشتانک گوں بے اَربی آبان اِنت ءُ منی نبشتانکاں وانوک جْوان پوہ بیگ ءَ اَنت۔

پسّو لمبر #2: چوناھیگا ما دْراہ راجی زبان ءِ نودربر ایں پمیشکا اگاں ما گپ ءِ سرپد بوگ ءِ جُھد بہ کن ایں کہ اے بنگالی، کشمیر، کُرد، تُرک، ملیشیا، انڈونیشیا، ھیدرآباد دکن ءِ ملائیلم یا توری چَچنیا، تیوگیں یورُپ، کینڈا، گوریچی ءُ زِرباری امریکہ ءُ انگریز ءِ مسلمان چی ءَ وتی مسلمانی ناماں گوں وتی زبان ءِ آباں نبیسّ اَنت۔ آ چی ءَ گُناھکار نہ بنت ءُ ما بلوچ چی ءَ گُناھکار بہ ایں!!؟ گیدی ءِ ھمے راج ماں وتی راجی زباناں اے “اسلم الیکم، زپراَلہ، ابدلکادر، مھمد کاسم، ایسا، موسا، مُستپا، مُرتزا، اَلی اھمد۔۔۔۔۔ ءُ کُران” نبیس اَنت چی ءَ گوں اَربی آباں نبشتہ اش نہ کن اَنت۔ اگاں آ وتی زباناں دوست دار انت ءُ وتی زبان ءِ آباں گوں نبیس انت گُڑا آ بے گناہ اَنت زاناں بلوچ گُناھگار بیت۔۔۔؟
چوناھیگا لھتیں پیگمبرانی اولی ءُ راستیں نام مھتر جیکب، موزس، جیزس۔۔۔۔ ءُ ابراھام انت گُڑا ھمے ارباں چی ءَ مھتر یاکوب، مھتر موسا، مھتر ایسا ءُ مھتر ابراھیم کتگ اَنت۔ اگاں “ھُدا” ءِ جِند نام ءَ ھر راجے وتی زبان ءَ گْوش ایت ءُ نبیس ایت انچوشکہ سندھی ھُدا ءَ را ” مولا سائین” انگریز “لارڈ” امریکی مسلمان “گاڈ” پارسی “ھاوند” ھندی ” خُدا” ءُ نہ زان آں کہ اے بنگالی، کشمیر، کُرد، تُرک، ملیشیا، انڈونیشیا، ھیدرآباد دکن ءِ ملائیلم ءُ چَچنیا ءِ مسلمان ماں وتی زبان ءَ”ھُدا” ءَ چے گْوش اَنت گُڑا ھمے چی ءَ گُناھکار نہ بنت؟؟؟
راستی وَ ایش انت کہ ناں ھمے نام گْوشتگیں راج گُناھکار بنت ءُ نیکہ ما بلوچ بے اَربی آباں گُناھکار بہ ایں بلکیں گُناھکار مردم چَہ وتی رد کُتگیں کاراں بنت۔

پسّو لمبر #3: منی دوزواھیں سنگتاں، منی راج ءِ گْوھار ءُ براتاں سید ءَ وت ھچ جاہ ءَ وتی نام “ظھور” نبشتہ نہ کُت بلکیں گوں اَربی آباں دگراں نبشتگ۔ شُما سید ءِ بلوچی سْیاھگ راست نبیسّگ ءِ چارمی در ءَ بہ وان گُڑا شما زان اِت کہ اے دوازدھیں آبانی بارو ءَ چے گْوشتگ ئِے؟ کہ مارا اے لھم لھم ءَ یلہ کنگی اَنت۔ اگاں ما یکپارگی ایشاں بہ کش ایں گُڑا نیکراھیں مردم گُڑ اَنت۔ اگاں وت ھم نبیس اِت ئِے پد ءَ ھم مارا کشگ بنت۔
پہ ایشی ءَ گیشتر سرپد بیگ ءَ باید انت ما بلوچی سْیاھگ ءِ راست نبیسّگ در لمبر 4 ءُ تاکدیم لمبر 39 ءَ بہ چار ایں کہ اود ءَ نمیرانیں بلوچ راج ءِ ھستی سید ھاشمی ھمے دوازدھیں آبانی بابت ءَ چے گْوشتگ زاناں ما بے ھیال ایں؟
سید ءَ گْوش ایت “۔۔۔ مئے دل سک لوٹ ایت کہ ما اے نام ھم چوکہ آدگہ گالاں، بلوچی گالوار ءُ رھبند ءَ نبشتگ اِت انت۔۔۔۔۔اگاں محمد محمود، جعفر عبدالعزیز۔۔۔۔علی محمد ءُ محمد سعید ءِ رنگیں ناماں بلوچی گالوار ءَ مھمد مھمود، جاپر عبدل ازیز۔۔۔۔اَلی مھمد ءُ مھمد سئیت بہ نبیسّ ایں کمیں بے تام ءُ براہ بنت پمیشکا ایشاں انوں وتی بُندریں رنگ ءَ نبیسّگ ءَ ایں۔۔۔” پد ءَ گْوش ایت
“اے گپ ءَ من شَر زان آں کہ ھر یک چیزے ءَ تو نوکیں رنگے بدے ئے یکبرے ترا اجکّہ کنت بلے کمّ کمّ ءَ کہ مردم ھیل گپت ھمے نوکیں چیز ءِ نوکی کْوھن ترّ ایت ءُ مردم گوں ایشی ءَ شری سیل ایت۔ اے نام ھم کمّ کمّ ءَ تریناں کنگ بنت تاکہ نیکراھی مردماں یکپارگی مہ گڑین اَنت پمیشکا پہ نامانی ترینگ ءَ باوست نہ لوٹ ایت”

بزاں مارا اے نام وتی بلوچی سْیاھگ ءِ ھساب ءَ نبیسّگ بنت انچوشکہ گیدی ءِ دگریں راج وتی مسلمانی ناماں گوں وتی زبان ءِ سْیاھگ ءِ رِد ءَ نبیس اَنت۔ بزاں من وتی Abdul Sattar Bugti ئیں نام ءَ ھمے داب ءَ نبیسّ آں گُڑا من گُناھکارے نہ آں اگاں من “ابدلستار” نبیس آن ئِے گُڑا من گناھے کتگ، بلوچ ھراب ءُ انگریز شَر!! واہ اڑے بلوچ تئی اَگل ءَ!!
گڈسری من گْوش آں کہ کشمیری زبان ءَ “ص” ءِ آب نیست انت گُڑا ھمے کشمیری” ﷺ”، “سادک”، “پیسل”، “سھابی” ءُ “سابر” وڑیں اَربی نام ءُ گالاں چون نبیسّ اَنت۔۔۔؟ گُڑا کشمیری ھم گُناھکار اَنت۔
انچوشکہ کہ سید ھاشمی ءَ گْوشتگ کہ مارا کمّ کمّ ءَ اے نام ترینگی اَنت باید انت نی ما منّ ایں کہ وھد باز گْوستگ پمیشکا ما اے اَربی آباں ماں بلوچی نبشتہ کاری ءَ کارمرز مہ کن ایں۔

بلوچ زندگ بات ءُ بلوچی زبان بے کسّاسیں دیمرویاں سر بات۔ شالا انچوش بات۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

مئے چاگرد ءُ بدنیّتیں استادانی کِرد

نبشتہ کار: پوزیہ بلوچ

اگاں ما بچاریں داں مئےچاگرد ءِ تہ ءَ گیشاں چہ گیش مردماناں ڈگری ھست یا کم ءُ باز ونتگ اِش اگاں ما گوں ھورتی ءَ بچار ایں تاں اے ڈگریاں مئے ھمے مھلوک ءِ تہ ءَ زانت ءُ سما ودی نہ کرتگ ءُ اے ڈگری والا پہ وت زندگ اَنت، من چوش ھم نہ گْوش آں کہ سرجمیں چاگرد ءِ وانندگیں مردم بے زانت ءُ بے سما اَنت بلے بے زانت ءُ بدنیّتیں مردم سک باز اِنت ۔ پما باز بژن ءِ گپے، برےبرے مردم سک پدرد بیت۔وھدے ما وتی وانندہ ءُ استاداں دگہ جاگھاں گندیں تاں مھروان اَنت، وھدے کہ گپ کیت پہ وانگجاہ ءُ سنٹرانی توک ءَ گُڑا مردم بژنیگ بیت پہ وتی بےکس ءُ نیزگاریں زھگاں کہ وانگ ءُ زانگ لوٹ اَنت بلے مئے وانندہ ءُ زانتکار ایشانی وانگ ءُ زانگ ءِ دیم ءَ اڑاند اَنت۔وانگ ءِ وھد ءَ وھدے نودربر جُستے بہ کنت داں آئی ءَ ھمے پسو دیگ بیت کہ تئی پت ءُ براتاں یا پُشپد ءَ نہ وانتگ تو پرچا وانگ لوٹ ئے؟؟

چہ اے گپ ءَ ھمے پدر بیت کہ اے نہ زانتکارانی چے لوٹ اِنت ءُ نوں ترا چے کنگ لوٹ اِیت۔ باز ھنچیں زھگ ھست اَنت کہ چہ اے گپاں سک دل ءَ کار اَنت ءُ باز ایشاں بے ھیال کنت، بلے ھمے استاد کدی اے نہ جیڑ اَنت کہ مئے پَشت پداں ونتگ یا ناں؟.مئے پِت ءُ براتاں ونتگ یا ناں؟ وتی بارو ءَ نہ جیڑ اَنت ءُ وت ءَ نہ چار اَنت بس دومی ءِ زھگاں دیم ءَ روگ ءَ نیل اَنت ءُ وتی زھگ اِش ماں مزن شھراں شر شریں وانگجاھاں وانگ ءَ اَنت ۔

من ءَ یات اِنت ھمے گپ وھدے کہ من وانگجاہ ءَ وتی( سرٹیفیکٹ) ءِ رند ءَ شُت آں گُڑا منی اُستاد ءَ من ءَ چار ات ءُ سک کند اِت ءُ پد ءَ من ءَ گُشت ئِے تو ءُ وانگ ؟؟ گُڑا من ھیران بوت آں ءُ اُستاد چار اِت بلے دگہ ھچ نہ گُشت، منی چمانی اَرس کیل بوت اَنت، من ھمے دل ءَ جیڑ ات من چے ءَ ونت نہ کن آں ، زاناں منی تہ ءَ کُجام کمی ھست کہ من ھمے کمی ءِ سرجم کنگ ءِ جُھد ءَ بہ کن آں۔۔۔؟ ھمد ءَ من ءَ یک بلوچی بتلے یات اتک کہ بلوچ گُش اَنت کہ “وتی کُش اِیت روچ ءِ سر ءَ دور نہ دنت ” پرچا کہ اُستاد منی وتی سیاد ءُ وارسے اَت بلے ھمے بتل ءِ سر ءَ من ءَ ھچ یکین نہ بوت پرچا کہ اگاں آ تئی وتی بہ بیت ترا نہ کُش اِیت اگاں کُشت ئِے گُڑا روچ ءِ سر ءَ دور دنت یا ساھگ ءَ ھچ پرک نیست۔۔.

من کمو وت ءَ توانمند کُت ءُ گُشت ھو من وانگ لوٹ آں چے ءَ زاناں من ءَ وانگ ءِ ھک نیست ؟؟ اُستاد ءَ کمو بچکند اِت ءُ گُشت ھو ھست ، من دگہ گپ نہ کرت ءُ وتی سرٹیفکیٹ زُرت ءُ چہ وانگجاہ ءَ در کپت آں ۔۔
وھد گْوزان بوت ءُ گْوستگیں سال ءَ مزن شھدربرجاہ ءِ موکل بوت اَنت من وتی موکلانی گوازینگ ءَ میتگ ءَ شُت آں ھمے وڑ ءَ دگہ یک ءُ دو ویل منی دیم ءَ اتک۔ یک روچے مگرب ءِ وھد ءَ من چار ات کہ منی ھمساھگے ءَ برانز گیپتگ ءُ بُرز گپ ءَ اِنت من شُت آن ءُ جُست کُت ھاں ھال کن ترا چے بوتگ ؟؟ من ءَ پسو دات ئِے مروچی من وتی کستریں گُھار ءُ تروزتک سنٹر ءَ وانگ ءَ راہ داتگ گڑا اُستاد ءَ وانگ ءَ نہ اِشتگ اَنت ءُ ھمے گُشتگ ئِے کہ شُما منی گور ءَ وانگ ءَ میا اِت ۔ ھما اِنت کہ گْونڈو اتکگ اَنت گریوگ ءَ اَنت ءُ ھمے گوشگ ءَ اَنت مئے درستیں دزگُھار وانگ ءَ اَنت ما چوں مہ وان اِیں ؟پیسر ءَ مئے میتگ ءَ وانگ نہ بوتگ نوں ھمے یکیں سنٹر اِنت بلے اِشی ءِ اُستاد یک زھگے وانین اِیت ءُ یکے نہ وانین اِیت ۔۔
من ھچ نہ گُشت بس ھمے گپانی گُشدارگ ءَ اَت آں،پد ءَ گُھار ءِ چم ارسیگ بوت اَنت ءُ گُشت ئِے من زان آں کہ اُستاد ءَ مئے درتہ پُچی دیستگ پمیشکا مئے گُونڈواں وانگ ءَ نیل ایت بلے اللہ ءِ شُکر اِنت مارا اِنیچو زر ھست کہ ما سنٹر ءِ زراں دات کرت بہ کنیں۔۔ من ھم ھمے مار ات ءُ من ءَ باز درد بوت پرچا کہ منی وتی گوما باز رند ءَ ھمے وڑ بوتگ گُھار ءَ وتی دیم منی نیمگ ءَ ترینت ءُ گُشت تو دانکہ ھمد ءَ ئے منی گُھار ءُ تروزتک ءَ بہ وانیں دانکہ اے ھم گوں وتی دزگُھاراں وانگ ءُ زانگ ءِ گپے کُت بہ کن اَنت ۔ من پسو دات جی شر کربان آں دانکہ من ھمد ءَ آں الم گونڈواں وانین آں ۔۔ پہ منی ھمے گپ ءَ گونڈو سک گل بوت اَنت من ءَ ھمے دمان ءَ جُست اِش کُت کہ ما کُجام وھد ءَ پہ وانگ ءَ بیا ایں؟؟ من گُشت شپ ءِ وھد ءَ بیا اِت۔۔

من وتی لوگ ءَ واتر بوتاں۔ بلے اے گپ ءَ من ءَ سک باز جیڑگ پرمات پرچا مئے وانندہ چوش کن اَنت؟ اے زھگانی توک ءَ چے پرک ھست کہ یکے وانین ِاِیت ءُ یکے نہ وانین اِیت ؟؟ بلے جُست ءِ پسو منی کِر ءَ نیستگ اَت ۔ شپ ءَ ھمے گُونڈوانی ھمراھی ءَ ھمے گُھار ھم اتک، من ءَ آرام نہ بوت ءُ من ءَ ھمے جیڑہ اَلّم زانگی اَت گُڑا من چَہ ھمے گھار ءَ جُست کُت تو من ءَ گْوشت کن ئے کہ اُستاد ءَ اے گُونڈو چے ءَ نہ وانینتگ اَنت ءُ تئی دومی تروزتک ھم ھمد ءَ وانگ ءَ اِنت آئی ءَ را استاد وانینگ ءَ اِنت بلے ایشاں پرچا نہ وانین اِیت؟
گُھار ءَ پسو دات ھاں من زان آں پرچا کہ آ تروزتک ءِ پِس درمُلک ءَ اِنت آ زَر والا اَنت پمیشکا آئی ءَ را وانینگ ءَ اِنت،منی پِس ھمد ءَ اِنت بلے من انچو زان آں منی پِس ءِ کِر ءَ اے سَد ءُ دو سد در کیت کہ سنٹر ءِ زراں دات کرت بہ کنت بلے ھیر ۔۔۔

من ءَ اے گپانی اِشکنگ ءَ سک درد بوت، پد ءَ من ھچ نہ گْوشت وتی ھیال ھمے گونڈوانی گور ءَ کُت، لھتیں وھد ءَ من گْونڈو وانینت اَنت بلے جلدی موکل ھلاس بوت اَنت ءُ من واتر شھر ءَ اتک آں.

مئے چاگِرد ءِ اُستاد ءُ زانتکار ھمیش اَنت پمیشکا ما چو بزگ ایں ءُ ھچ بر دیمروی کرت کنگ ءَ نہ ایں، یکے ما وت ما وت تپاک نہ ایں ءُ دومی اگاں ما دو گال زان ایں یا ڈگری یے گپت گُڑا کس ءَ پجاہ نیار ایں اے وڑ ءَ ما کُجا دیمروی کُت کن ایں ۔۔۔؟

باید اِنت کہ مئے وانندہ ءُ زانتکار نودربرانی کمک ءَ بہ کن اَنت، نودربراں پہ وانگ ءِ واستا کمک ءُ دلبڈی بہ دے اَنت پرچا کہ مئے راج ءِ باندات ھمے نودربر اَنت، مئے چاگرد ءِ دیمروی دیوک ھمیش اَنت، استاد ءُ میتگ ءِ وانندگ باید اِنت وتی پرز ءَ بہ زان اَنت.

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

نبشتانک: شھید ھمید شھزیب تو نمیران ئے

نبشتہ کار: ھمّل بلوچ

2 جولائی 2020 ءَ سھب ءِ سر ءَ من چہ واب ءَ پاد اَت آں جانے ششت ءُ چاھے وارت دیم پہ بیٹک ءَ کمو نشت آں سنگتے ءَ من ءَ پون کُرت ءُ گْوشت ئِے من مرچی تئی نیمگ ءَ پیداک آں.
من گْوشت شر اِنت بیا اللہ ترا بیاری اِیت کترے شریں گْوست سنگت ءَ پد ءَ من ءَ پون کُرت ءُ گْوشت من نوں تئی گِسانی نزیک ءَ آں، من گڑا گِس ءَ چہ ڈن در اَتک آں چار اِت داں سنگت اتکگ ، سلام ءُ دورت بوت من سنگت ءَ را گِس ءَ نندار اینت ءُ آپ دات ءُ سنگت ءَ آپ وارت ءُ من ءَ جُست ئِےکُرت بدے باریں نوکیں ھال ءُ اھوال بہ دے ، نوکیں اپڈیٹ چے ھست؟

من سنگت ءَ را گْوشت ھیر ءُ وشی بوتگ ءُ بَدّیں نہ بوتگ، سنگت ءَ من ءَ گْوشت بدیں ھالے چَرّگ ءَ انت باریں تو سَھی کہ ناں سوج ءَ لھتیں سنگت شھید بوتگ.

من گْوشت اے ویل چون ، کَدی ءُ کُجا بوتگ زاناں؟ سنگت ءَ گْوشت چو من سرپد نہ آں بلے لھتیں اکس آشوب ءَ آھتگ انچو سوج انت کہ گریشگ ءَ جَنگے بوتگ، گُڑا من سنگت ءِھمے گپانی ھشک کنگ ءَ ھوار منی ھیال ءَ یکے ءَ من ءَ ھشک چوپ کُرت ءُ یل دات من دل ءَ ھمے جیڑ اِت کہ گریشگ ءِ سنگت وَ شاہ زیب( ھمید بلوچ) انت من سنگت ءَ را گوشت بوت کنت دُروگے. سنگت ءَ گْوشت دروگے نہ انت بزو موبائل ءَ اکساں بچار گڑا من چہ سنگت ءِ دست ءِ موبائل زرت ءُ اکس چار ات اَنت واکی سَے سنگت ءِ شھیدی ئیں اکس انت بلے اکسانی چِیری دیم ءَ نبستگ اَت کہ بی ایل اے سنگت اَنت، من گوں ھورتی ءَ چار ات اَنت بلے من پجاہ نیاؤرت انت پرچا کہ زالمیں دُشمن ءَ شھید بوتگیں سنگتانی جون گِران کُرتگ اِت انت زانگ نہ بنت گڑا من دگہ یک سنگتے ءَ را پون کُرت باریں ھالاں بدے گریشگ ءِ نیمگ ءَ جَڑپّے بوتگ ءُ سوج ءَ لھتیں سنگتے شھادت ءِ سوج انت باریں اے گپ پکا اِنت؟
سنگت ءَ من ءَ گْوشت ھو اے بدیں ھال ھست شھید ھمید اُرپ ءِ شھزیب گوں دگہ دو سنگت ءَ شھید سابر اُرپ ءِ مھیم ءُ شھید انور اُرپ ءِ جاوید دُشمن ءَ گوں جَنگ داتگ ءُ شھید بوتگ انت، من دگہ ھچ جُست نہ کرت ءُ پون کَٹ ۔

من آ دوئیں شھید بوتیں سنگت نہ دیستگ انت بلے من شھید ھمید بلوچ ءَ را دیستگ ، منی ھیال ءَ دو ھزار پازدہ یا شازدہ ءَ من جاھو ءِ اوتاک ءَ اولی رند سنگت ءَ گوں ڈیک وارتگ ، من ھما روچ ءَ مار ات کہ اے سنگت ءِ تہ چیزے ناں چیزے ھست ،ھمید جان ءِ ھاموشی ، ایمانداری ،مُکلسی ءُ پند بُری تو بیدستیں تو وت مار اِتگ ات ، تو وت زانتگ اَت کہ سنگت ءَ را پہ وتی ماتیں سر زمیںن ءِ سر ءَ چینچو مھر ھست بوتگ، سنگت ھمید جان مدام ھمے گْوشت کہ سنگتاں آزادی ءِ جَنگ بید ء واری ءُ جپاکشی ءَ نہ بیت کَسے ءَ را اگاں گوں وتی سر زمین ءَ مھر ھست گڑا اے پند ءُ گژن اے دُرست مارا ءُ شمارا برداشت کنگی انت بلے اے گپ اون منگی انت کہ گلامیں کوم تنا وھدی کہ آزاد نہ بیت مسلہ ءُ جیڑ ھست انت گوں سبر ءُ اُپار دیم ءَ جنزگی انت ۔

شھید ھمید جان سکیں مھروانیں سنگتے اَت مسکرا ئِے کرت بلے گیش بے توار ءُ کم گپیں سنگتے اَت، مدام کندگ ءُ دیم روشینیں سنگتے اَت، شھید ھمید جان چوناھی ءَ نہ وانتگ بلے چہ وانیندگ ءَ دیم ءَ ترِ اَت ۔

شھید ھمید جان گوں وتی سنگتانی ھمراھی ءَ گَشتے ءَ بیت کہ دُشمن ءِ داشتگیں دلّار سنگتانی راھاں گریشگ ءِ ھَند لوپ ءَ مگرب ءِ وھد ءَ بند اَنت ءُ وھدے سنگتے ھمد ءَ کاینت گڑا جنگ بندات بیت سنگت تاں گُڈی تیر ءَ جنگ دے اَنت ءُ شھید بنت.

شھید ھمید جان تو گوان وتی سنگتاں ابدمان ئے شمے بھادری ءَ را سلام انت ۔ شمے ھمت ءَ را سلام انت، دُشمن ءَ ھمے مار اِتگ اَت کہ من ھمید جان ءَ گوں سنگتاں شھید کن آں، من ایمن بہ آں بلے شھید ھمیدجان ءِ پگری سنگت اَنت زندگ اَنت، اے کاروان شھیدانی کاروان اِنت، اے کاروان آجوئی ءِ کاروان اِنت تو اے پگر ءَ داشت کرت نہ کن ئے.
شھید ھمیدجان ءَ ھوار بلوچستان ءِ کُلیں شھیداں سُھریں سلام

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت