نبشتانک: دیوانے گوں ناکو مراد بکش ءَ
سرھال:ھیات ءِ جیڑہ ءُ پیشُک ءِ آس
نبشتہ کار: سفر ھان بلوچ
دی بلوچستان پوسٹ
مروچی من ناکو ھال نہ کُت انچوش شُت آں ، وھدے من ناکو ءِ لوگ ءِ دپ ءَ سر بوتاں ،من گیٹ ٹُک اِت داں گونڈوے درآتک۔ من جُست کُت ناکو ھمد ءَ اِنت۔۔۔؟
داں من ءَ پسّو ءِ دات ھو ھمد ءَ اِنت ، بیا لوگ ءَ ۔ من گوں گونڈل ءِ ھمراھی ءَ شُت آں ، گونڈل ءَ کش ءِ لوگ ءِ دپ پچ کُت ءُ نادینتت ءُ گْوشت تو بہ نند من ناکو ءَ توار کناں، من نِشتاں گونڈل ءَ آپ آؤرت من ءَ گْوشت ئے من ناکو ھال داتگ گْوشتگے بہ نند من کایاں۔ من آپ وارت گلاس جھل ءَ ایر کت ناکو آتک سلام ءِ دات ۔ ما بگلگیر بوت اِیں ءُ دُوا ءُ سلام کُت ، بلے مروچی ناکو ءِ موڈ ھراب اَت ، گْوش ئے کمو کمو ڈسٹرب ات۔
من جُست کت ناکو ھیر اِنت! تئی تب چو دگہ دگہ وڑ اِنت؟
ناکو ءَ پسو دات ھو ھیر اِنت! بس وت انچوشاں ، من شراں تو ھال کن گوں تو چے ھال اِنت۔۔۔؟ چی ھست دنیا ءَ ، چی بُوَگ ءَ اِنت ، چی بوتگ۔۔۔۔؟
من پسو دات ، ناکو ھما پیش ءِ ھال اِنت دگہ ھچ گھتری نیاتکگ۔
ناکو ءَ گْوشت، ھَو!
من پد ءَ گْوشت ناکو ورناھے کیچ ءَ جَنَگ بوتگ ، پوج ءَ مات ءُ گْوھارانی دیم ءَ تیرانی آماچ کتگ ءُ شھید کتگ۔
ناکو ءَ گْوشت ھو سرپد بوتگاں ۔
من گْوشت بس ھمیش اِنت نوں مھلونک روانک کشّگ اِنت ، زھرشانی کنگ اِنت ، سوشل میڈیا ءُ دگہ جاگہ ءَ بس یکیں جیڑہ ءِ سر ءَ گپ ءُ تران بُوَگ اِنت۔
داں ناکو ءَ من ءَ گْوشت ، منی ھیال ءَ چائے ورے، منی پسّو ءَ پیسر ناکو ءَ آوازے دات۔۔۔ھما گونڈل پد ءَ آتک۔ ناکو ءَ گْوشت برو کُرباناں بِہ گْوش چاھے بہ کن اِت ، بلے سیائیں چاھے بہ بیت اے گرم ءَ شیر چاہ ورگ نہ بیت۔ اے ساھت ءَ وھد کساس یک ءُ نیم دو بُوَگ ءَ اَت ، ناکو ءَ منی گپّانی نیمگ ءَ ھچ کِمار نہ کُت ناکہ پسّویے دات۔۔۔۔ناکہ دگہ گپے کُت۔ ھمے مْیان ءَ من دلمانگ اِت آں کہ دگہ گپّے بہ کناں بلے ناکو ءَ من ءَ جُست کُت ترا سگریٹ گون؟
من گْوشت،ھَو!
ناکو ءَ گْوشت ٹالے بِہ دے گوں دوت ءِ دے آں
من ٹالے دات ناکو ءَ رُوک کُت ءُ کشّگے بندات کُت ، اے ساھت ءَ من ھِچ نہ گْوشت ناکہ ناکو ءَ گپّے جت۔ ناکو ءَ سگریٹ کش اِت ءُ بالشت ءَ تِکّہ دات ءُ پادے تچک کُت اَنت۔ گیاسگے ءَ رند ناکو ءَ درّائینت ورنا پیری ءَ مارا دور داتگ ءُ ھلاس کتگ ، کندگے ھم جت یے
مروچی من ھمے مارگ ءَ ات آں کہ ناکو ھچ گپ ءِ وڑ ءَ نہ اِنت ، ما دوئیں پد ءَ ھاموش اِت اِیں کہ ناکو کوٹی ءِ آ کش ءَ من اے کش ءَ ، منی سبر ءَ جواب دات ءُ من گْوشت ، ناکو تو گڑا اے بابت ءَ چے گْوش ئے؟
ناکو ءَ جُست کُت چی یے بابت ءَ؟
من گْوشت ھمے کہ کیچ ءِ وئیل ءِ سر ءَ ، ھیات ءِ شھادت ءُ پد ءَ اے مھلونک ءَ کہ سوشل میڈیا سر ءَ زُرتگ ءُ روانک کشّگ اِنت کوکار کنگ اِنت۔۔۔۔۔
ناکو ءَ گْوشت من ھچ نہ گْوش آں ، پرچا کہ اے اولی رند نہ اِنت۔ زُلم زُوراکی ھمُک روچ بُوَگ ءَ اِنت ، بلے مئے مھلونک چو پیشُک ءِ آس ءِ پیم ءَ ھمد ءَ روک بیت ءُ پد ءَ ھما دمان ءَ ایر مِر اِیت۔ اِنچو زُلم ءُ زُوراکی ءَ پد ھم مئے مھلونک تنی وھدی وتی اسل مکسد ءَ سوھو نہ اِنت ءُ نزانت ، اگاں زانت ھم پاد ءَ پر دنت ۔ ھرکس ءَ بِہ چار گْوش اِیت بلوچ ءِ جیڑہ گیش ءُ گیوار کنگی اِنت ،بلوچ ءِ جیڑھے جند چی اِنت ، اِیشر ءَ تو ھم زان ئے ءُ من ھم زاناں ، بلے ھرکس زانت بلوچ ءِ جیڑہ National identity ءِ جیڑہ اِنت ، بلوچ ءِ جیڑہ ءِ گیش ءُ گیوار گُلامی ءِ سانکلانی پروشگ اِنت دگہ ھچ ، دانکہ بلوچ گُلام اِنت ھمُک روچ ھمے پیم ءَ مِر اِیت تُری تو کوکار ءُ جاک ءَ وتی نُکّ ءَ ھُشک کن۔ اے کرّ ءُ کُورانی دیار اِنت ، اِد ءَ ھچ نہ بیت ءُ مئے مردماں آدت کُتگ بس سال ءُ شش ماہ ءِ سر ءَ چو پیشُک ءِ آس ءَ رُوک بیت جمبور بیت بلے پد ءَ ھما یکّیں دمان ءَ مِر اِیت۔ تئی جند ءَ من ءَ یونیورسٹی ءِ جیڑہ سر ءَ جُست کُتگ اَت ، من ترا ھما وھد ءَ ھمے گپ کُت اے مئے مھلونک ءِ مانا پیشُک ءِ آس ءِ مانا یکّ، تو منی سر ءَ آ روچ ءَ چو بے نپ ءُ جنگ بروتیں زھری ءَ جزباتی بوت ئے ، تو گْوشت نا نوں چیزّے بیت۔ چی بوت ؟ کُجا شُت یونیورسٹی ءِ جیڑہ؟ پد ءَ بْرمش ءُ آئی مات ملِکناز ءِ جیڑہ ءَ اُوں انچوش پیشُک ءِ آس روک بوت بلے تو چے دیست ؟ یار تنی وھدی مئے مھلونک انچش اھساس ءِ کمتری ءُ کم مارِشتی ءِ شکار اِنت چہ پنڈی ءُ لاھور ءَ اگاں یک جنکے کیت آ وترا ھُدا بزانت فیمنسٹ ءِ کنت یا دگہ چی بلاہ ءِ کنت ۔ بس چار شرکنیں گپ کنت ما و گل ءَ بال بَہ اِیں ءُ پاد زمین ءَ ایر نہ بَہ اَنت اے ھم مئے دوزواہ اَنت ،مئے درد وار اَنت۔ ما اے ھم نہ چاراں مئے مسئلہ ءُ جیڑہ راجی گُلامی اِنت ، آ وت آھِری ھد ءَ پاکستان پرست اَنت۔ بس کمو گوں پاکستانی سسٹم ءَ دلگران اَنت، آ اے گپ ءَ ھچ کبول نہ کن اَنت کہ پاکستان بہ پْروشیت۔ ھمے یک جنکے ھست وکیلے ءُ کوئٹہ ءَ نشتگ ،ھر وھد ءَ ماما ءِ کیمپ ءَ کیت اِشی ءِ نام کَے انت ؟ ناکو ءَ جست ءِ داب ءَ منا جست کت۔۔۔
جلیلہ ھیدر من گْوشت.
ھو ھمیش! اے و ھمُک بلوچ سرمچارانی کار ءَ ایر جنت ، ھر وھد ءَ پاکستانی بُوَگ ءِ سر ءَ پھر کنت ،بلے چار وشیں گپ مئے ھاتر ءَ کہ کنت ما گل ءَ بال اِیں کہ اے و مئے دوزواہ اِنت ، مئے درد وار اِنت، اجب اِنت ولّا ۔۔ من گْوش آں مارا تنی وھدی لانگ ٹرم پالیسی ءِ جند نیست ، بس ما وھد ءَ گْوازینگ ءَ اِیں بس مئے کر ءَ چار زالبول ھست کہ اے بزگ وانگ ءَ اَنت ، ھر وھد ءَ اے پیمیں مسئلہ ءُ جیڑھے کہ بیت ما ایشاں گوش آں بیا اِت ڈنّ ءَ کوکار بہ کن اِت ، ریلی بہ کن اِت دانکہ اے وانگ ءَ اَنت اے کار کن اَنت۔ پد ءَ اے وانگ ءَ پارگ (فارغ ) بَی اَنت ءُ رواں یاکہ سور کن اَنت ءُ لوگ ءَ سمبال اَنت ، یاکہ نوکری یے کن اَنت پد ءَ اے چو ،،کے ٹو سگریٹ،، ءَ شاٹ بَہ اَنت دوبر ایشاں تو نہ گندے ، بس پالیسی نہ بُوَگ اِنت۔ ناکو ھاموش بوت
من پد ءَ جُست کُت ناکو گُڑا بلوچ چے بہ کنت ، بلوچ ءِ جیڑہ ءِ گیش ءُ گیوار چی اِنت؟
ناکو ءَ گْوشت دِگہ ھِچ بس سِمپل اِنت ، بلوچ جنگ بہ کنت ءُ کوہ ءَ بروت تپنگی گلانی ھمراہ بہ بیت دگہ ھچ بلوچ ءِ کر ءَ راہ ءُ در پشت نہ کپتگ۔ بس راہ یکّیں اِنت ، آ جنکے بیت یا بچکے بیت ، بس کوہ ءَ برو دگہ ھچ اے پیم ءَ ھکّ ءُ مُزّ دست نہ کپ اِیت ، اے چے کہ چِست ءُ ایر بُوَگ ءَ اِنت بس وتی جند ءِ رد دیگ اِنت ، مئے لھتیں نودربر گل ھست اَنت من اِش کتگ ایشاں وتی سرکل ءُ دیوانی تہ ءَ مزاھمتی گپ ءُ ڈسکس ءِ سر ءَ پابندی جتگ ، نوں ایشاں کے سرپد بہ کنت ابّا تو پاکستان ءِ گُلامی ءِ ھلاپ ءَ جنگ کنگ ءَ ئے اگاں ترا کالج ءَ وانگ، یونیورسٹی ءُ ہاسٹل کمرہ، گٹر لائن ءُ روڈ لوٹگی اَت تو اِنچو ورنا پرچہ کوشارینت ۔۔۔۔۔۔؟؟؟اگاں اے داب ءَ ما دہ سال جاک ءُ کوکار بہ کناں ھچ نہ بیت ، بس وھد زوال بیت ءُ ما وترا آسان رد دیگ ءِ کوششے کن اِیں کہ ما کارے کنگ ءَ اِیں۔ راستی ءَ ما کار کنگ ءَ نہ اِیں ، وترا رد دیگ ءَ اِیں، بس گپ یکّین اِنت کہ بلوچ ءِ کِرّ ءَ ابید ء جنگ ءَ ھچ نیست، ءُ بلوچ جیڑہ ءِ گیش ءُ گیوار گلامی ءِ سانکلانی پْروشگ اِنت ، ءُ اے سانکل جاک ءُ کوکار ءُ فیس بک پوسٹ ءُ پہ ٹوئیٹ نہ پروش اَنت جنگ لوٹ اِیٹ مزاھمت لوٹ اِیت۔۔۔۔۔۔۔۔۔۔۔۔۔۔بلوچ ءِ مستریں جیڑہ راجی گلامی اِنت ، دانکہ بلوچ گُلام اِنت ھمُک روچ یک ھیاتے شھید بیت۔ اے گلامی ءِ سانکل پروشگ لوٹ اَنت ، چی ءَ کہ سانکل ابید جنگ ءَ نہ پروش اَنت۔۔۔۔۔۔ جنگے باری ءَ ما گْوش آں مارا دگہ کار ھست ، مارا وتی زھگ ءُ جنین لاپ دَیگی اَنت ، گُڑا وتی باریگ ءِ ودار ءَ بہ کن دانکہ تئی باریگ نیاتکگ ھیات ءِ پیمیں ھزاراں ورناھانی کُنٹ ءَ بڈّ ءَ بہ کن ءُ بِہ گرد ، راستی ھمیش اِنت! کبولے کن ئے یا اِنّا ،تئی وتی واھشت ءُ واھگ ، بلے جاک ءُ کوکار ، فیس بک ءَ پوسٹ ءُ ٹویٹر ءَ ٹوئیٹ کنگ ءَ تو ملک ءَ آجو نہ کن ئے۔ پمیشکا من گْوش آں راستی ءَ کبول کن۔۔۔۔۔۔۔۔! ھمے ساھت ءَ گونڈل ءَ چاہ آؤرت اَنت ءُ ناکو ءَ گپ بس کُت ءُ گْوشت آپے بِہ دے گوں تو مئے نُکّ ھُشک کُت۔۔۔۔۔۔۔۔۔۔۔۔۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
