TBP Balochi

دی بلوچستان پوسٹ

ٹی بی پی پتر ھال ءَ سر بیتگیں ھالانی رد ءَ پنجگور ءُ کش ءُ گوری دمگاں بازیں کچے ءَ پاکستانی پوج ءِ لشکر کشی برجاہ اَنت –

گیشیں ھالانی رِد ءَ لشکر کشی ءِ بندات گوستگیں روچاں کنگ بیتگ، نِی گچک ءُ کش ءُ گوری دمگاں داں سر بیتگ – گوستگیں روچ ءَ پاکستانی پوج ءَ دو لاش وت کَل ءُ کسارات کرتگ اَنت – دمگی مردمانی رد ءَ اے لاش سُتکگیں بیتگ اَنت –

ٹی بی پی ءَ سر بیتگیں ھالانی رد ءَ ھپت جنین گوں یازدہ چُکانی ھمراھی ءَ دزگیر کنگ ءُ ناشناسیں جاھاں برگ بیتگ اَنت، وھدیکہ ھشت مردمانی لوگ ءُ گَلھاں ھوار دگہ کشت ءُ کشار پوج ءَ مانداشتگ اَنت –

بیگواہ کرتگیں جنین ءُ چکانی تہ ءَ مریم، مھرم، ماھل، ماہ گُل، رضیہ، جماعتی، بیگو، چاردہ سالی ئیں شکیلہ، شش سالی ئیں جمیلہ، دوازدہ سالی ئیں ھیرینہ، شش سالی ئیں سبرینہ، یک سالی ئیں عدیلہ، ھشت سالی ئیں زبیر، ھپت سالی ئیں سمیر، شش سالی ئیں شھداد، چار سالی ئیں شھرام، دو سالی ئیں شانتل ءُ دگہ یک ءُ دو سالی ئیں چک ھوار اَنت –

دمگی مردماں ٹی بی پی ءَ گوں گپ کنان ءَ گوشتگ کہ بھرام، بیام، پنڈوک، سردو، میاں، شمبو ءُ مراد بکش ءِ لوگ پوج ءَ سوتکگ اَنت –

زانگ بہ بیت جنگ زدگیں دمگ پوج ءِ انگیر ءَ اِنت دامگی ھالانی نہ بوگ ءِ سوب ءَ راست ءُ تچکیں ھال پرے ھاتر ءَ دیر کنگ ءَ اَنت –

بلوچ نیشنل موومنٹ ءِ جارکش ءَ یک بیانے ءِ تہ ءَ گوشتگ کہ گچک ءِ جتائیں دمگ بازیں روچاں چہ یک بیمناکیں پوجی آپریشنے ءِ دیمپان اَنت- سرجمیں دمگاں بے راھیں پوجی زوراکیانی دیمپان اِنت –

بیان ءَ گوشگ بیتگ اَت کہ اے دمگاں بازیں روچانی آپریشن ءَ چہ پنجاہ ءَ چہ گیش زالبول ءُ چُک دزگیر کنگ ءُ ناشنانیں جاھاں پوجی بنجلاں برگ بیتگ اَنت – ھمے وڑ گوستگیں روچ ءَ پاکستانی پوج ءَ وت دو لاش کَل ءُ کسارات کرتگ اَنت – دمگی مردمانی گوشگ اِنت اے لاش سوچگ بیتگ اَنت ءُ پد ءَ پوج ءَ آؤرتگ اَنت –

بی این ایم ءِ جارکش ءَ گوشتگ کہ لوھڑی، ھوڑ، کلانچ، لوھڑی ڈاٹ،، جوانتاک، گونی، اوٹل ءَ مردمانی لوگانی مڈی برگ ءُ پد ءَ لوگ ماندارگ بیتگ اَنت – ءُ ھمود ءَ انسانی آبادی بیتگ اود ءَ آس ءِ دوت چِست بیگ ءَ اَنت –

ھمے وڑ ءَ مروچی تمپ گومازی ءِ کوھی دمگ دروک شور ءَ پاکستانی پوج ءَ آپریشن کرتگ –

دمگی مردمانی رد ءَ مروچی سھب ءَ کوھی دمگ ءَ پوج مانریتکگ ءُ لشکر کشی اِش کرتگ بلے دگہ جانی ءُ مالی تاوانی ھال نہ بیتگ اَنت نانکہ دگہ مردمانی دزگیریانی ھال اتکگ اَنت –

نیشنل پاٹی ءِ سروک حاصل خان بزنجو بیران۔

دی بلوچستان پوسٹ

نیشنل پاٹی ءِ بنجاھی رھشون پاکستانی سینیٹ ءِ باسک میر حاصل خان بزنجو مروچی ماں کراچی ءَ آغا خان ھسپتال ءَ بیران بوتگ۔ ـ

حاصل خان بزنجو راجدوستیں رھشون میر غوث بخش بزنجو ءِ زھگ بوتگ ءُ آ بلوچستان ءِ دمگ خضدار، نال ءَ 1958ءَ ودی بوتگ، مروچ 20 اگست 2020 ءَ ما سند ءِ مزن شھر کراچی ءَ بیران بوتگ۔ـ

حاصل خان بزنجو ءَ مزنیں وھدے بیت کہ شومکءِ نادراھی ءَ گورجتگ بیتگ۔

آئی ماں آغا خان ھسپتال ءَ علاج بوھگ ءَ بوتگ ـمروچی سھب ءَ آئی تبئیت ھراب بوتگ ءُ دوبر ھسپتال ءَ برگ بوتگ کہ ھمودا آئی ءَ وتی ساہ داتگ ءُ اے کوڈھیں دگنیا یل داتگ ـ۔

نبشتانک: کسھے پہ پیرک ءَ

نبشتہ کار: سلمان ھمل

دی بلوچستان پوسٹ

من ءَ سکّ دیر اِنت کہ من کسہ گوش نہ داشتگ من ءَ یات کَنت من کسانی ءَ ھم کسہ باز کم اِشکُتگ، بلے نزاناں منی دل چو چے ءَ گُشگ ءَ اِنت کہ پیرک ءِ واست ءَ کسھے بہ گُش۔
پیرک اے دمان ءَ کہ من اے کسہ ءَ نبشتہ کنگ ءَ آں تو منی راستی دیم ءَ نشتگ ئے، بیٹک ءِ دیم ءَ شپ ھما رمزان اِنت کہ پہ وھد پاسی ءَ شما چَک ٹُلو کنگ ءَ ئے، بلے پیرک اے دیوان ءَ لھتے جاگہ من ھالی کنگ لوٹاں یکّے لگوریں سئود ءِ جاگہ ءَ ءُ یکّے وتی، نُوں تو زاھریں ھیران ئے کہ سئود ءِ جاگہ تو ھالی کُت من سرپد بوتاں کہ پرچا ھالیگ کُتگ، بلے تو وتی جاگہ پرچا ھالیگ کُت، ؟؟
ھو پیرک جان من وتی جاگہ اے واست ءَ ھالیگ کُت کہ من گوستگیں رمزان ءِ ھلاسی ءُ ائید ءِ سَیمی روچ ءَ چہ اود ءَ پاد اَتکاں پد ءَ منی سَر انگت اود ءَ نہ کَپتگ۔
بلے پیرک من نزاناں چی ءِ کسہ ءَ بہ کناں، ھمے کسّہ چون اِنت کہ من ءُ تو سنگتانی پجیگ ءَ دَراتک اِیں کہ چاردہ اگست اِنت پروم ءَ کار کنگی اِنت ترا یاد اِنت ناں؟ اگاں یاد نہ اِنت اے ھما سپر اَت کہ کلنڈیں کلوزرے مارا شمارا گون اَت بلے من ءُ تو سیکل ءَ سوار اِت اِیں نُوں ترا یاد کَنت؟ انگت یاد نہ کَنت؟ اڑے پیرو اے ھما سپر اِنت کہ کلنڈیں کلوزر ءَ وتی اسٹیڈ سست اَنت ءُ مارا دْروہ اِت نوں یاد اِنت؟ انگت یاد نہ اِنت؟ پیرک یا ھما کلنڈیں کلوزر اَت کہ چَپّی بوتگ اَت نثار جان شھید بوتگ اَت انگت یاد نیایگ اِنت؟ یار پیرک ترا اے وَ یاد بیت کہ ماسٹر ءُ زامر ءَ دومی گاڑی مئے واست ءَ داں نیم راہ ءَ آؤرتگ اَت انگت ترا یاد نہ بوگ اِنت یار پیرک اے ھما سپر اِنت کہ مارا ٹوھیں توپ گون اَت دھشیکا گون اَت ما شما کھوری ءَ داشتگ اَت ھمے جاہ ءِ نام کھوری اِنت ناں؟ ھو کھوری ءَ پد ءَ ما شما دو جاہ ءَ بھر بوت اِیں تو من ءَ گُشت کہ تو گوں توپ والا ٹولی ءَ بُرو گوں من نواز ءُ چیسل ءُ جیھند لھتے سنگت آ دیم ءَ کِلکور ءِ نیمگ ءَ رو اِیں نُوں یاد اِنت؟ انگت کہ ترا یاد نہ بوگ اِنت یار من نیمروچ ءَ مچ ءِ چیر ءَوپتگ اِتاں ، تو گُشت تئی تبیت شرّ نہ اِنت تو چارج کنگ ءِ سر ءَ ئے تو گوں توپ والا ٹولی ءَ بُرو، اے ھمے زمانگ اِنت کہ وھد وھد ءِ سر ءَ منی مازگ ٹگل اَنت ءُ من اِد ءَ نہ باں اے وھد ءِ من ءَ باز کمّ کسہ چوناھا یات بیت بلے نزاناں اے کسہ من ءَ چون یات اِنت، ۔۔۔ھیر من گوں توپ والا ٹولی شُتاں گڑا وھد یکّ اَت کہ یکّیں وھد ءَ دو جاہ ءَ اُرش بیت ترا یاد اِنت بلے تو گُشتگ اَت بندات شمارا کنگی اِنت ما پہ وھد ءُ پاس بندات کُت توپ منی دست ءَ اَت کہ من برابر کُت ءُ نشان گِپت انچو کہ من آس دات تاں سنگتاں دھشیکا ءِ سر ءَ بندات کُت داں دومی نیمگ ءَ شما ھم بندات کُت پروم ءِ کوش گُش ئے اے روچ ءَ پہ پھر نازینک جنگ ءَ اَت کہ من بے وارس نیاں، واتری ءَ کہ ما شما دُچار کَپت اِیں گڑا سلاہ ھمے بوت کہ ما شما رو اِیں ، یکے من اِتاں تو ءُ نواز آ دگہ سنگت منی گیر ءَ پیداک نہ اَنت۔ترا بلکیں یات بہ بَنت چد ءَ چی ما دَرکپت اِیں گٹا نیم راہ ءَ ما شما داشت چیدگے ھست اَت ما ءُ شما نشانگ جَت دھشیکا ءِ سر ءَ جَت پد ءَ گُڈّی گِند ئے من ءَ اسنائپر ءِ سر ءَ یک دانگے جَت ءُ چیدگ ڈیر اِت پد ءَ شما دُرستاں چاپ جَت من ءَ سکّ وشی بوت کہ دُرستیں سنگت منی ٹک تیری ءَ پہ چاپ جَنگ ءَ اَنت ءُ نواز ءَ گِندئے ھر کجا راہ ءَ ما داشت گش اِیت کسّے جُست بہ کَنت چیدگ کَے ڈیرینتگ من گشاں نوتک ءَ۔
چوناھا من ءَ ھر وھد ءَ گمان بوتگ من شھید بہ باں گڑا نواز اے کسّہ ءَ کَنت بلے یار زانگ نہ بیت کے پَد ءُ کے پیسر۔
ترا یات اِنت ما ءُ تو دَر کپت اِیں سنگت زُرت اَنت دیم پہ کولواہ ءَ کہ سَرکنگی اَنت بلے من ءُ تو تاں بالگتر ءَ سر کن اِین اِش ءُ واتر بہ ایں کہ من شمبے گشتگ مئے کاراں کَنت، من ءُ تو رو اِیں آ دیم ءَ من وتی اِلاج ءَ کناں تو وتی الاج ءَ بہ کن، استاد ءَ گِندئے کماش زئیاں ھال کن اِت، بلے چوش نہ بوت ما کہ بالگتر کیلکور سر بوت ایں سنگتاں گُشت کہ ما شمارا بر اِین گوں داں کولواہ دو سے روچ بہ دار اِت، پد ءَ واتر بہ کن اِت، ھیر ما شما کہ کولواہ شُت اِیں گڑا واجہ ءِ واجہ ڈاکٹر ءَ گوں ھم تران بوت اِیں ، پد ءَ آپریشن بوت لھتے روچ ما ءُ تو ھمود ءَ پنسّ ات اِیں، ترا یات اِنت؟ پد ءَ کہ ما واتر بوت ایں داں زامران ءَ ما ھمراہ اِت اِیں تو پد ءَ من ءَ گُشت کہ تو اے سنگتاں بزور بُرو من پد ءَ کایاں، بلے پد ءَ تو نیاتک ئے تو شُت ئے اوگان ءَ سنگت دیست اَنت ھال بوت ءُ دِراجیں مدتے ءَ پَد کہ تو اَتک ئے، پد ءَ دیوان مزاک ءُ ھندگ اَت، بلے یار پیرک اے دُرستیں کسھاں تو گون ئے گوں۔
ترا یات بیت کہ گلاب ءِ لوگ کش ءَ ما شما نشت ءُ ٹی ٹی پسٹل ءِ سر ءَ نشانگ جَت ھمد ءَ بوتلے پہ چیدگ ایر کُت ءُ جَت؟
یار پیرک من انچیں کسھے کنگ لوٹاں کہ پہ تو نوک بہ بیت پیرک چوناھا ترا چہ پَد وھدے من گوں تاھیر ءَ نزیک بوتاں گڑا ما جاگھے پہ کارے ءَ شُت اِیں، تاھیر ءَ من ءَ گُشت بندات ترا کنگی اِنت، من گوں ایل ایم جی والا سنگت ءَ اولی سنگر ءَ نشتگ اِتاں، ھیر بندات من کُت بلے پیرک جان نزاناں تو من ءَ پرچا گُشت کہ بندات تو بہ کن ءُ تاھیر من ءَ پر؟؟

چے ءَ گُشت کہ بندات تو بہ کن؟؟
بلے اے رندی کہ من ابید ءِ چہ شمے گُشگ ءَ بندات کنگ ءَ اِتاں تو پیش کَپت ئے ،من نزاناں پیرک چی بُہ گشاں چونیں کسھے پہ تو بیاراں کہ تئی دلگوش گوں من بہ بیت۔؟
پیرک رسول ھمزہ توپ گش ایت زمین پہ وت بچ وت گِچین کَنت زاناں ترا زمین ءَ گچین کتگ اَت کہ تو پیش کَپت ئے بلے پیرک اے ھبر ھم راستے کہ راجی سِنچ ودی کَنگ نہ بیت آ وت چہ بُندر ءَ چہ ماس ءِ لاپ ءَ مردم ءَ گون اِنت ءُ کَیت من نزاناں تو داں کجام ھدّ ءَ تِپاک کن ئے، بلے منی ھیال ءَ رسول ءَ اد ءَ ھم راست گُشتگ۔
پیرک اگاں اے دمان ءَ توپک تئی دست ءَ بہ بیت ءُ دشمن تئی دیم ءَ تو چی کن ئے؟ تو پہ بچکندے گُش ئے من چاراں کہ کجام منی توپک ءِ نشان ءِ تہ ءَ برابر کَپ اِیت پہ مِرگ ءِ واست ءَ اول من ھمائی سر ءَ نشان ءَ بَنداں ءُ تیراں بوجاں ءُ پد ءَ تو گُش ئے کہ توپک وتی شکار ءَ وت دَرگیج اِیت ، ھمے دمان ءَ نزاناں چی ءَ من ءَ گمان بیت کہ تو باز جھلانکی ءَ جیڑگ ءَ ئے، جنگ، سنگت، لیڈر، کمانڈر، بیگواہ، شھید گُش ئے دُرست تئی دیم ءَ چو پلمے ءَ روگ ءَ اَنت ءُ تئی دست ٹیگر ءَ زور دَنت یلہ کَنت چار اِیت کہ کجام دیم ءَ یکے سُرگ ءَ اِنت پد ءَ ٹیگر ءَ زور دَنت۔ ھمد ءَ تو من ءَ باور کنائینگ ءَ ئے کہ رسول ءَ راست گُشتگ زمین پہ وت بچ ءَ وت گچین کَنت۔
یار پیرک گورکی جاھے گُش اِیت کہ اے تُرس نہ اِنت تُرس کہ مئے تہ ءَ اِنت ھمے زوراکاں گیشتر زوراکی ءَ پہ سِکین دَنت بلے تو ناں پیرک۔۔! ھچ نہ تُرسگ ءَ ئے بس ٹیگر دیدوپان ءُ مگزین تئی ھیال ءَ کمّے ٹگلین اَنت بلے پد ءَ تو پہ دژمن ءَ نشانگ ءَ بند ئے ٹیگر ءَ زور دے ئے ءُ یلہ کن ئے، بلے یار پیرک ھمے (سینٹنس) ترا یات اِنت ناں؟ کہ مات ناول ءِ تہ ءَگُش اِیت کہ مارا گوں زانت ءُ راستی ءِ روژناھی داں ھمایاں سَر کنگی اِنت کہ آیانی مازگ تھاری ءَ وتی ارجان جَتگ اَنت، بلے اگاں ترا اے کسہ یات مہ بوتیں گڑا تو چوں گُڈی ءَ مارا پہ کلوہ کُت اے جنگ شمئے کوپگان اِنت، اے جنگ ءَ وتی جنگ سرپد بہ بہ اِت ءُ ھمراہ بہ بہ اِت؟۔ من جزم گشاں اے وھد ءَ کہ تو وتی کلوہ ءَ دیگ ءَ بوتگ ئے تئی دیم ءَ مات ناول ءِ مات ءِ کردار دیم ءَ اتکگ ءُ تو پمیشکا وتی مات ءُ گھاراں کلوہ کنگ ءَ ئے کہ مارا پد اے جنگ ءَ یل مہ دے اِت جنگ ءِ ھمراہ بہ بہ اِت،ے
وتی زھگانی ھمراہ بہ بہ اِت ، اے کہ جنگ ءَ اَنت اے شمئے زھگ اَنت گڑا یار پیرک من چوں گشاں کہ ترا اے سینٹنس یات نہ بَنت؟ ترا دُرست یات اَنت تو کسھاں دُرستیں سرپد ئے ءُ من ءَ چی کسے جُست ءَ مہ کن، آ دگہ من نہ دیستگ اَنت۔
من اے دمان ءَ ایوک ءَ نشتگاں دور بسّ جیڑگ ءَ آں کہ زوت بیایاں کہ من شمارا چہ پیسر دَر کپتان ءُ شما من ءَ چہ پیسر بوت ئے۔
بلے یار پیرک من گشاں منی اے کسہ ءَ کہ کسے وانگ ءَ بہ بیت گڑا من ھمود ءَ گوں شما ھم تِران بہ باں من تو گلاب شیھو ملا چیسل سمیر ءُ اے دِگہ دُرستیں سنگت یک پہ یک من ءَ چی منی گُڈی سپر ءِ ھالاں گِراں بہ بہ اِت، اے کسہ وانوکانی دست ءَ بہ بیت ءُ بلے من یکّ چیزے ءَ گِلہ آں کہ مئے کسہ پد ءُ پُشت بوتگاں، بندات کہ من ءَ کنگی بوتگ ءُ تو پیش کپتگ ئے، دست گِر من ءَ پیرک وشیں گڑا سنگتاں ۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوست

سر بیتگیں ھالانی رد ءَ روکپتی بلوچستان ءِ تیابدپی شھر چھبار ءَ ایرانی عطلات ءَ یک مردمے آوار جتگ ءُ برتگ –

دمگی مردمانی گوستگیں روچ ءَ چھبار ءِ بازار ءَ نجارے ءِ دُکان ءَ ایرانی عطلات ءَ بیڑ برتگ ءُ اود ءَ مزار بلوچ جھمنند سراوان آوار جتگ ءُ برتگ –

دمگی مردمانی رد ءَ مزار ءِ دزگیری ءَ عطلات ءَ دگہ ارزی نامہ ءُ ابید ءِ منانک ءَ دزگیر کرتگ ءُ برتگ –

زانگ بہ بیت روکپتی بلوچستان ءِ بازیں جاھاں مردمانی آوار جنیانی ھال پیداک اَنت –

ھمے وڑ گوستگیں لھتے روچاں پیسر ھم نیکشھر ءَ چیریں ادار دو مردم آوار جتگ ءُ برتگ اَت ءُ پد پٹ ءُ پول ءَ پد یلہ کرتگ اِت اَنت –

نبشتانک: بلوچ راجی آجوئی ءِ جُنز سوبمند انت

شھید ھیات بلوچ ءِ نام ءَ

نبشتہ کار: منزور بلوچ

دی بلوچستان پوسٹ

وھدیکہ جھان ءِ دومی مستریں جنگ ءَ رند زیردستیں ھندوستان چہ زورانسریں جھانگیر برتانیہ ءِ رستریں چنگُلاں آزات بیت گُڑا چَہ ھندوستان ءَ تچگ ءُ روگ ءَ پیسر ھمے جھانگیریں برتانیہ ڈوائیڈ اینڈ رول ءِ ساز کتگیں بدیں پندلانی پیلو کنگ ءَ پہ وتی کاسگ چٹّاں ھندوستان ءَ ماں رَدیں نیکراھی جیڑہ ءُ وتگڑیں دو راجی سَسّا بُنیاد ءَ بھَر ءُ بانگ کنت چریشی ءَ یک رستریں استانے مئے رودرآتکی کش ءَ ٹھینگ بیت۔ اگاں ما آ وھدی ھندوستان ءِ نامداریں کانگریسی رھُشون ھُدامُرزی ابولکام ءَ بوان ایں گُڑا ما زان ایں کہ مولانا کلام چوں ھندوستان ءِ بَھر ءُ بانگ کنگ ءُ پاکستان وڑیں بے ابرمی ملکے ءِ اڈکنگ ءَ ھلاپ اَت، مولانا ءِ مُلکاری سَسّا ءِ رِد ءَ پاکستان پہ تیوگیں مسلماناں یک دائمے ءِ بیرانی یے اَت چی ءَ کہ چریشی ءَ ھندوستان ءِ مسلمان ونڈ ءُ چُنڈ ءِ سوب ءَ نزور تر اتگ اَنت۔
1947ءَ مولانا ابوکلام ءَ یک لاھوری روتاک چٹّان ءِ ھالکار شورش کاشمیری ءَ گوں یک نند ءُ نیادیں گُلگدارے کُت ءُ ھمے گُلگدار ءِ تہ ءَ مولانا ابولکام ءَ گْوشت کہ باید انت ھندوستان بَھر ءُ بانگ مہ بیت ءُ مہ ٹھ ایت۔ پد ءَ پاکستان ءِ بابت ءَ دَہ پیشگْوشی ئِے ھم کت کہ پاکستان چوں کم کم ءَ وت گار بیت ءُ پْروش ایت۔ اگاں ما مُلانا ابولکام ءِ پیشگْوشیاں چَہ گوگل ءَ درگیج ءُ بہ وان ایں گُڑا ما زان ایں کہ آئی ءِ تیوگیں پیشگْوشی پیلو بیتگ اَنت بس دو پشکپتگ بلت مرچی ئیں میان اُستمانی جاورھال، اوگانستان، سھودی ءُ ایران جیڑہ ءُ پد ءَ پاکستان ءِ مرچیگیں سند ءُ بلوچستان ءِ جاورانی رِد ءَ ھما دوئیں ھم زیت پیلو بنت۔ بدبھتیں پاکستان ءِ اڈکنگ ءَ کساس سالے ءَ رند، ھمے بدواھیں دژمن ءَ 27 مولمان 1948 ءَ وتواجھیں بلوچ راج ءِ آجوئیں ڈیھ بلوچستان ءِ سر ءَ زورانسری ءَ اُرُش کتگ ءُ بلوچ راج زورانسری ءَ زیردست کت۔ انچوشکہ بلوچ راج ءِ گوں ھندوستان ءِ بَھر ءُ بانگ ءَ ھچ وڑیں سیادی یے نیست اَت ءُ نَیکہ بلوچ راج ءُ بلوچستان کدی ھُشکِنات ھند ءِ بَھرے بوتگ اَت۔ مارا انگریزاں 11 ساچان 1947 ءَ آجو کتگ اَت پمیشکا بلوچستان چَہ ھندوستان ءَ ساری ءَ آزاتیں استانے اَت بلے مھمد اَلی جناہ ءَ چَہ ھان کلات ءَ زورانسری دزنامے گپت ءُ مولمان 1948 ءَ بلوچستان ءِ سر ءَ لشکرکشی یے کت ءُ بلوچ راج چَہ آجوئیں زندمان ءُ وتواجھی ءَ زبھر بوتگ اَنت۔

آ وھد ءَ تیوگیں بلوچ راج ءِ لس مھلوک ٹَکری کاسگ چٹّیں نواب ءُ سردارانی زیردست اِت انت ءُ پمیشکا راج ءِ تہ ءَ راجی وتواجھی ءِ ھچ وڑیں سرپدی ءُ بستار نیست اَت پمیشکا مھمد اَلی جناہ ءِ لب ءُ لالچ ءِ دیم ءَ لھتیناں نواب ءُ ٹَکری رھشوناں وت ءَ بھا کت ءُ لھتیں تُرس ءِ سوب ءَ ھوار بیتگ اَنت ءُ لھتیں ناسرپدی ءَ پاکستان ءِ رَدیں مھرے آماچ بیتگ البت لھتیں راجی بامردیں نمیراناں دژمن ءِ زورانسری ءُ گلامی نہ منّ اِت بلکیں گلامی ءُ زیردستی ءَ پِٹّ اش داتگ ءُ پہ بلوچ راجی آجوئی ءِ ھاتر ءَ دژمن ءِ ھلاپ ءَ چیرجنگ بُنگیج کت ءُ وت ءَ ابدمان کت۔
پد ءَ ھمے جُھدانی برورد ءَ کم کم ءَ بلوچ راج ءِ چاگِردی تہ ءَ راجی آجوئی ءِ آگاھی یے ودی ودی بوت، مرچی بلوچ راج ءَ وتی راجی جُنز ءِ یک ٹوھیں سَسّا ءُ سرپدی یے ھست پہ راجی آجوئی ءَ راج یک زرمبشت انت پمیشکا مرچی تیوگیں بلوچ راج ءَ ھمے سِلّیں گلامی ءَ را پِٹّ دنت ءُ وتی راجی آجوئی ءِ چیرجنگیں جُنز ءَ ھوار بنت۔
داں ھما گلامی ءِ روچ تا مرچیگ ءَ ما گِند ءَ ایں کہ راجی جنُز مُدام سوبین بوان انت۔ اگاں ما رودرآتکی دژمن ءِ بگیری ءَ بلوچ راج ءِ اولی راجی آجوئی ءِ جُھد ءَ ھورت بہ گِند ایں گُڑا ما زان ایں کہ شھزادگ ابدلکریم ھان ءَ 1948 ءَ بلوچ راج ءِ اولی جنگولی جُنز بُنگیج کتگ ءُ اے جنگ داں سالے ءَ کلات ءُ جھلاوان ءِ کِرّ ءُ کشاں برجاہ بوتگ بلے بلوچ راج ءِ دگہ دمگی مھلوک ءَ اے جنگ ءَ بَھر نہ زورتگ اَت۔ البت شھزادگ ابدلکریم ءِ جنگ ءَ بلوچ چاگِردی ءَ یک مارشتے دات کہ ما بلوچ گلام بیتگ ایں، مئے ابرمی مال ءُ مڈی چَہ مارا پُلگ بنت، مئے بلوچی دود ءُ ربیدگ ءُ راجی زبان گار ءُ بیگواہ کنگ بنت، بلوچیت چَہ راج ءَ گار بیت ءُ بلوچ مجگی گلام بنت۔
پد ءَ 1958-59 ءَ بابو نوروز ھان ءَ پہ بلوچ راجی آجوئی ءِ ھاتر ءَ زورانسر ءِ ھلاپ ءَ بلوچ چیرجنگ ءِ دومی بَھر بُنگیج کت گُڑا یک ردیں پندلے ءَ وتی تَنگوئیں بَچّ ءُ ورنائیں سْیاد ءُ وارس کربان کتگ اَنت۔ پد ءَ وتی زند ءِ گُڈی بھر گوں درداں زندان ءَ گْوازینتگ اَنت ئِے۔ اے جنگ ءَ بلوچ راج ءَ یک رندے پد ءَ سرپدی یے دات کہ بلوچ گلامے ءُ گلامی ءَ مُدام پِٹّ بات۔ چَہ اے جنگ ءَ ما بلوچ باید انت اے ھم بہ زان ایں کہ زورانسر ءَ ھُدا ءِ پاکیں کتاب کُران مجید ءِ سوگند کت ءُ بابو نوروز ءِ چُک ءُ سْیاد پاھُو داتگ اَنت چہ ایشی اے زانگ بہ بیت کہ اے مُلک ءَ اسلام جِند نیست اَت۔ اے دوئیں جنگانی وھد ءَ بلوچ راج ءَ وانندگیں مردم سک ھم اِت انت پمیشکا راج ءِ تہ ءَ راجی آجوئی ءِ جُھدکار ھم کم اَت۔

وھدیکہ 1970 ءَ پاکستان ءَ گچینکاری بنت گُڑا مُلکاری جیڑھانی سوب ءَ ھما بنگالیاں کہ پاکستان ٹھینتگ پد ءَ پہ وت ءَ یک جُتائیں ملک بنگلہ دیش ءِ لوٹ کن اَنت چریشی ءَ بنگلہ دیش ءَ جنگ، کُشت ءُ کوش ءِ آسے روک بوت ءُ اے سوب ءَ ھمے رَدین ءُ وتگڑیں دو راجی سَسّا پْروش ایت بزاں مھمد اَلی جناہ ءُ لیاکت اَلی ھان ءِ بے ابرمی ءُ بے بُنیادیں پاکستان دو بَھر بیت ءُ پاکستان ءِ یک لک پوج ھندوستان ءِ دیم ءَ سرجھلی کنت۔
1973-77 ءَ نمیرانیں راجی بامرد ءُ بابائے بلوچستان ءُ راجی ھستی نواب ھیربکش مری، نمیرانیں گوس بکش بزنجو ءُ راجی بامرد سردار اتا الہ منگل ءَ بلوچ راجی آجوئی ءِ چیرجنگیں جُھد ءِ سیمی جُنز بُنگیج کت۔ اے سیمی جنگ ءَ بلوچستان ءِ باز ءُ کساسیں ھند ءُ دمگ ءِ مردماں بَھر زورتگ انچوشکہ گْوستگیں چِیرجنگ دمگی ءُ میتگی بیتگ اَنت۔ ماں اے جنگ ءَ بلوچ راج بے کساس کربانی داتگ ءُ در پہ دریں زند گْوازینتگ انت۔ ناھکیں کُشت ءُ کوش ءِ تُرس ءَ بازیں کساسے ءَ بلوچ کُٹم چَہ وتی ماتیں ڈیھ ءَ لڈاتگ ءُ اوگانستان ءُ دگہ جاہ شُتگ اَنت اے جنگ ءَ بے کساس بزگیں لس مھلوک مُرتگ، ھاسکن مری بلوچ ءِ چُکچینی کنگ بوتگ۔ یک کساسے ءَ رِد ءَ کاسگ چٹّیں بھٹو ءِ پرمان ءَ پاکستانی پوج ءَ سَے ھزار مری بلوچ ءِ چُک، زالبول ءُ ورناہ یک روچ ءَ کُشتگ ءُ گار ءُ بیگواہ کتگ اَنت۔
اے جنگ چَہ گْوسگتیں جنگاں باز تْرُند ءُ دْراج اَت۔ اے جنگ ءَ بلوچ راج ءَ گیشتر سرپدی ءُ آگاھی دات کہ بلوچ اے استانے سُومی شمار ءِ مردم اَنت بزاں گلامی گُڈسر درجگ!!!
پد ءَ بلوچ راج ھر وڑیں لوٹ ءُ پُل کنگ بوت۔ راج ءِ ڈگار چیریں امبار ٹیل، گیس، تَنگو، تلاہ، ھر وڑیں گواچِن ءُ زِر دُراہ چَہ بلوچ ءِ دست ءَ پُلگ بوتگ اَنت۔ دژمن ءَ بلوچستان ءِ ھر دمگ ءُ میتگاں وتی کاسگ چٹّیں سردار، نواب ءُ دمگدار پہ راج ءِ لس مھلوک ءِ گلام کنگ ءَ داشتگ اَنت کہ لس مھلوکیں بلوچاں راجی آجوئی ءُ راجی جُنزانی بارو ءَ سرپدی مہ بیت۔ چہ بلوچ راج ءَ آئی ءِ راجی زبان زَبھر کنگ بیتگ بلوچ ءِ رواج، دود ءُ ربیدگ لگتمال کنگ بیتگ اَنت۔ البت اے میان ءَ بابا ھر بکش مری ءَ گوں وتی راجی جُھدکاراں بلوچ راجی آجوئی پیگام بلوچستان ءِ ھر دمگ ءُ میتگاں سر کنائینت۔ بلوچستان ءِ کُنڈ کُنڈ ءَ راج ءِ لس مھلوک ءَ راجی آجوئی سکین ءُ آگاھی یے داتگ، باز ژند ءُ پندیں تکانسری ءُ زھمت کشی ءِ برورد ءَ بلوچ ءِ ھر دمگ ءَ، بگر گْوادر، ھب، ڈیرہ گازی ھان، ڈیرہ بگٹی، کوھلو، سبی، شال، مستونگ، کلات، چاگی، نوشکی پنجگور ، ھُزدار، کیچ ءُ روایرشُت ءُ رودرآتک بزاں ھر جاہ بلوچ لس مھلوک ءَ گلامی ءِ پِٹّ ءُ راجی آجوئی ءِ بابت ءَ گپ ءُ ھبر کت انت چریشی ءَ بلوچ چاگِردی ءِ تہ ءَ (گوں راجی ندکار، کواس ءُ شائِرانی جُھداں ھوار) راجی آجوئی ءِ بلاھیں آشوبےودی بوتگ۔
پد ءَ 9/11 ءِ ویل ءِ رند گیدی تب ھر وھد یکپارگی بدل بیتگ اَنت ءُ 2003 یک رندے پد ءَ شھید بالاچ مری، شھید جنرل اسلم بلوچ وڑیں راج ءِ وانندگیں سرکماش ءُ راجی بامرد ءُ نمیران ڈاڈ بلوچستان شھید نواب اکبر ھان بُگٹی وڑیں راجی زانتکار ءُ بَلدیں راجی رھشُوناں بلوچ راجی آجوئی ءِ چارمی چیرجنگ بُنگیج کت ءُ داں مرچیگیں روچ ءِ جُھد گوں بے کساسیں سوباں دیم ءَ روان انت اگاں ما گیدی ءِ ھر وڑیں راجی جُھدانی بارو ءَ بہ وان ایں گُڑا ما زان کہ بے کربانی ءَ ءُ بے سرانی ندر کنگ ءَ ھچبر آجوئی نہ رس ایت پمیشکا بلوچستان اے ھستیں وھد ءِ راجی جُھد باز سیاسی رھشون، کواس ءُ باسک ھم شھید کنگ بیت اَنت ءُ ھمے شھیدانی ھون ءِ برکت ءَ آجوئی ءِ چراگ بلان انت ءُ راج ءِ گلامی تھارموریں دگ روژناہ انت ءُ چوشیں کربانی ءِ برکت ءَ مرچی مجید برگیڈ ءُ براس وڑیں راجی گل مئے دیم ءَ اَنت پمیشکا ما دلجم ایں کہ ما زیت وتی ڈیھ ءِ وتواجہ بَہ ایں چی ءَ کہ ما گِندگ ءَ ایں کہ مرچیگیں بلوچ راجی جنگ ءَ بلوچ وانندگیں چیرجنگول دیم ءَ برگ ءَ انت۔ مرچی بلوچستان ءِ ھر دمگ ءَ بلوچ راجی سرمچار راجی آجوئی ءِ ھاتر ءَ دژمن ءِ ھلاپ ءَ چیرجنگ ءَ گلائیش اَنت۔ پاکستان ءِ جبر ءُ زلم ءِ آسر ءَ بلوچ راجی جُھد ءَ ھر وھد ءَ ھاٹیگ رستگ چیاکہ اگاں زلم گیشتر بیت گُڑا زلم اَلم یک روچے ءَ ھلاس بیت، اگاں زلم کم بیت گُڑا آئی ءِ ھلاس کنگ ءَ چاگِرد آگاہ نہ بیت۔
اگاں ما ھورت بگِند ایں کہ پہ پاکستان ءَ بلوچستان ءِ زیردست کنگ وَ آسان اَت بلے نی زیردستی مھکم کنگ پہ پاکستان سَک گران انت۔ پیسر ءَ چَہ 1980 ءَ پاکستان ءَ مُدام اَرب مُلک ءُ امریکہ باز زَری ءُ لشکری کُمک کنگ ءَ اِت انت بلے مرچی میانجی ئیں رودرآتک جاور بدل بیتگ اَنت سھودی جِند ءِ زَر یمن جنگ ءَ زیان بیگ ءَ انت ءُ ماں اوگانستان ءِ جنگ ءَ امریکہ ھم پاکستان ءِ دُزّی گیپتگ کہ دولمبری کنگ ءَ اَت پمیشکا پاکستان ءِ ھر وڑیں کمک ئِے بند کتگ۔ پاکستانی بلاھیں شھرانی تہ ءَ پاکستانی تالبان ٹی ٹی پی ءِ بمبانی تراکاں پاکستان ءِ کارجاہ ھلاس کتگ اَنت، کشمیر ءِ سیمسر ءَ انڈیا گوں جنگی جاور ءُ پی ٹی ایم ءِ سیاسی جُنز ءُ بلوچستان ءِ چیرجنگ ءُ کاسگ چٹّانی ھرچگاں پاکستان بزگ کتگ، بلوچستان ءِ ھر کوہ ءِ سر ءَ پاکستانی لشکر ءِ بُنجل انت اے دُراہ بلوچ ءِ بیم انت چی ءَ کہ سرجمیں بلوچستان ءَ پاکستان ءِ لشکر بلوچ چیرجنگولانی تُرسے ءَ آماچ انت ءُ پاکستان ءَ زر زیانی ءَ بے وانک کنگ ءَ انت چمیشکا پاکستان مرچاں چار سنگر ءَ گٹ انت پمیشکا پاکستان ءِ تہ ءَ ھر ورگی سامان گِرانبھا بوگ ءَ انت زَر ئِے نھاد ڈالر ءِ دیم ءَ کپان انت چریشی ڈنی وام مرچاں یک سد ءِ بیست بلین ڈالر انت ئِے ءُ راج ئِے بے پوریاگِر انت۔
نی سندھی وتی آجوئی ءِ ھاتر ءَ ھم پاد آیگ اَنت پمیشکا بلوچستان ءِ وڑ ءَ اود ءَ ھم سندھی گار ءُ بیگواہ بوگ ءَ انت۔ بلے ھبکّھیں گپ ایش انت کہ سندھ ءِ تہ ءَ پاکستان ءِ مستریں کاسگ چٹّ بلاول بھٹو زرداری ءَ ھم 9 ساچان ءَ سندھودیش ءِ گپ کُت گُڑا اے گپ ءَ پاکستانی سیاست لرزینت۔ پارلیمنٹ ءَ بازیں زھریں ھبر، زاہ ءُ زِکت ھم بیتگ۔ چریشی ءَ اے زانگ بیت کہ پاکستان یک روچے پد ءَ پْروش ایت ءُ اَلم پّروش بلے لھتیں کاسگ چٹّ بے سُدّ ءُ بے ھال اَنت۔ اگاں ما چیرجنگی کتاباں بوان ایں گُڑا ما زان ایں کہ اگاں دژمن بے گناھیں لس مھلوک ءِ سر ءَ کُٹ ءُ سٹ کنت۔ شک ءِ سر ءَ ورنائیں نودربراں دگانی سر ءَ کُش ایت ءُ لاشاں دور دنت بزاں دژمن ءَ پْروش وارت چی ءَ کہ چریشی ءَ راج ءِ تہ ءَ دژمن ءِ بگیری ءَ یک زھر ءُ نپرتے چِِست بیت۔ گُڑا راج وت ءَ گیشترّ گلام زان ایت پد ءَ تئی راجی جُنز ءَ وت نوکیں ھاٹیگاں زُور ایت

اگاں ما مرچیگ وھد ءِ کراچی شاھدربرجاہ ءِ نودربر ھیات بلوچ ءِ شھادت ءَ ھورت بہ گند ایں دژمن ءَ بے گناھی ءَ شھید کتگ گڑا اے شھادت ءَ ھم راجی آجوئی ءِ جُنز ءَ یک بے بھائیں ھاٹیگے داتگ کہ راج ءِ تہ ءَ بے کساس زھرشانی ءُ روانک کشگ بوگ ءَ انت، چاگِردی رسانکدر ءَ اے زلم ءَ پِٹّ دیگ بیگ ءَ انت۔ مستریں گپ وَ ایش انت کہ نوں تئی دژمن ءِ نامداریں کواس واجہ انور مکسود وڑیں کٹر پاکستانی پرستیں زانتکاریں مردم سرپد کتگ انت کہ پاکستان ءِ پوج ءَ بلوچستان ءَ پْروش وارتگ ءُ ما بلوچ گلامی ءِ سانکلاں سِندگ ءِ ایں ءُ بلوچ ھمُک روچ آجوئی ءِ نیمگ ءَ سوب مندی ءَ جُنزان انت۔
انور مکسود ءَ ماں یک ٹویٹے ءَ گْوشت “من ءَ سما نیست کہ اود ءَ آجوئی ءِ جنگے یا چونیں چیزے بلے بلوچستان ءَ زلم بوگ ءَ انت ءُ ھمے زلم زیت ھلاس بیت چی ءَ کہ وھدیکہ زلم گیشتر بیت پد ءَ گار بیت”
البت انور مکسود چوش وَ زان ایت کہ بلوچ وتی راجی آجوئی ءِ جنگ ءَ انت بلے تُرس ایت کہ گیشتر گپ بہ کن آں بلے پد ءَ ھم گْوشتگ ئِے کہ زلم وھدیکہ گیشتر بیت پد ءَ گار بیت۔
ھو واجہ مکسو تئی راستیں گپ انت۔ 1971 ءَ ھم بنگلہ دیش ءَ ھم پاکستانی پوج ءَ اپریشین سرچلائیٹ بنگلالی کواس، سیاسی رھشُون، شائِر، رھدربر ءُ نودربرانی کشگ ءَ بُنگیج کتگ اَت پد ءَ ھمے زلم ءُ زورانسری ءَ بنگلہ دیش ءِ مھلوک گیشترّ آگاہ کتگ کہ پہ راجی آجوئی ءَ ابید ما دگہ ھچ نہ لوٹ ایں چریشی ءَ بنگلہ دیش زلم ھلاسی ءِ شاھدی انت ءُ نی بلوچیستان ءِ تہ ءَ ھم دیر انت کہ اپریشن سرچ لائیٹ چالو انت۔ اد ءَ ھم لالا مُنیر گوں سنگتاں، ڈاکٹر ھالد، ھبیب جالب، نواب اکبر ھان بُگٹی لوگ ءِ زالبول، کمبر چاکر ءُ سباہ دشتیاری وڑیں ھزارانی کچ ءَ بلوچ ڈاکٹرز ءُ وانندگیں ھستی شھید کنگ بوتگ انت بلے بلوچ ءَ ھچبر پْروش نہ وارتگ اگاں پْروش ورگ انت گُڑا پاکستان پْروش ورگ انت ءُ بلوچ آجوئی ءِ نیمگ ءَ دلجمی ءَ جُنزان انت۔ پد ءَ کاسگچٹّانی چے آکبت بنت آئی ءَ ھُدا زانت۔
بلوچ چیرجنگ سوبین بات ءُ بلوچ وتی ڈیھ ءِ وتواجہ ءُ آجو بات انت

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

شھید رحمت جان (فارس)

شائر: جیئند سادک

دی بلوچستان پوسٹ

تئی ھون ءِ وشبواں ھتم
گَل ءَ چہ بال بالو اَنت
ندارگ پِرّکانی ناچ ءُ سُھبتاں
مدگ اوں پشت نہ کپتگ اَنت
کِشار بیتگ اَنت کَڑّب ،
سریچکاں مردمانی دروشم ءَ
گُڈینت ، دَرھینتاں دُز ءُ لُچ
بلے !
ازالی ئیں تی دژمن ءَ نُوں واب نیست
زمین ءِ دِل تو سمبھینت رجینت گوں ھون ءِ ھِنّیاں !!!
چو ماھکان ءَ چاردھی تِرپوک
مات ءُ گُھار تئی
چہ کاڑاں بازیں میتگ ءِ
نہ بنت بند سُک سُکی
نہ ایر بنت آبروان گوْھری !
تئی مھروانی ءَ بِگر
داں کندگ ءُ تئی مسکرا
چے پیم ھار بئیں بُگش؟
او گُلزمین ءِ ھمبلو!!!
وتی زمین ءِ سانداری ، در اَتکگ ئے
سپر کُتگ
نہ چار اِتگ تو ژند ءُ ژُلّیں کِشک گوں کنڈگاں
چو سیدے ءَ رواج تئی
ھزار نام ھُدا ترا۔۔۔
ھزار نام ھُدا ترا!!!

بیگواھیں بلوچانی ھاتر ءَ زھرشانی برجاہ

دی بلوچستان پوسٹ

بلوچستان ءِ مزن شھر شال ءَ بیگواھیں بلوچانی یلا کنائینگے ھاتر ءَ وائس فار بلوچ مسنگ پرسنز ءں زھرشانی برجاہ ـ

زھرشانی ءَ مروچی 4042 روچ سرجم بوتگ ـ نوشکی ءَ چہ سیاسی ءُ چاگردی باسک نزیر احمد بلوچ، نوراللہ بلوچ، ءُ دگہ مردماں بنجل ءِ تر ءُ تاب کُتگ بیگواھیں مردمانی کھولاں گوں دلپدردی درشان اِتگ ـ

ھمے درگت ءَ وائس فار بلوچ مسنگ پرسنز ءِ رھشون ماما قدیر بلوچ ءَ وتی ھیال درشان اِتگ ءُ گوشتگ کہ بلوچستان ءِ تھا زورگریں ریاستی پوج ءِ زلم ءُ زوراکیانی بیمناکی تاں روچ پہ روچ گیشی آیان انت آ بلوچ سرڈگارے سر ءَ یک انسانی ھلاسی ءِ منانک ءِ پیشدارگ ءَ اَنت –

آئی ءَ گوشتگ کی ریاستی فوج ءِ اے گیشیں کاروائی اے گمان ءَ پدر کنت کہ نوں زورگریں ریاست بلوچستان ءَ ھچ وڑیں دگنیاوی کانودانی نیارگے پیسلہ کُتگ ـ ءُ بلوچانی پُرایمنیں جھد ءَ ھلاس کنگ ءِ ھاتر ءَ گوستگیں زوراکانی وڑ ءَ سرانی کلم کنگ ءَ ھم چک پد نباں ـ

ماما قدیر بلوچ ءَ گوشتگ کہ پنجگور ءِ دمگ گچک ءُ چپ ءُ چاگراداں گوستگیں بازیں روچاں پاکستانی پوج گوں ڈیتھ اسکواڈانی ھمراھی ءَ لشکر کشی کنگ ءَ اِنت ـ اے میان ءَ پنچ زالبول گوں ھمراھے شش کسانیں چُکاں ھم آوار جنگ ءُ بیگواہ کنگ بیتگ اَنت ـ

آئی ءَ گوشتگ میتگانی میتگ سوچگ ءُ ھلاس کنگ بوھگ ءَ انت ـ جنگی بالگرداں زور ءَ لس مھلوک نشانگ کنگ بوھگ ءَ انت ـ اے ھالانی تھا مھلوک ورد ءُ وراکی ءُ آپ دراھیں آسراتیاں بند کنگ بوتگ انت ـ

گڈ سر ءَ ماما قدیر بلوچ ءَ گوشتگ کہ انسانی ھکانی پانکجن ءُ بلوچ راج گچک وئیل درگت ءَ توار چست بکن انت پرچاکے اے زالمانی بگیری ءَ مئے ھاموشی زالم ءَ گیشتر تاگت دنت ـ

شھید رھمت جمال دشت کپکپار ءِ جھمنند بیتگ، آ گوستگیں چار سالاں بی آر اے ءِ پتر ءَ راجی آجوئی ءِ جنگ ءِ بھر بیتگ۔ بیبگر بلوچ

دی بلوچستان پوسٹ

بلوچ ریپبلکن آرمی ءِ جارکش بیبگر بلوچ ءَ رسانکدراں شنگ کرتگیں وتی یک درشانے ءِ تہ ءَ گْوشتگ کہ دوازدہ اگست ءَ روکپتی بلوچستان ءِ دمگ درگس ءَ آئی ایس آئی ءِ چریکاں تیرگواری کرتگ ءُ مئے ھمراہ رھمت جمال پنام ءِ فارس ء جمال شھید کرتگ –

آئی ءَ گوشت کہ شھید رھمت جمال دشت کپکپار ءِ جھمنند بیتگ، آ گوستگیں چار سالاں بی آر اے ءِ پتر ءَ راجی آجوئی ءِ جنگ ءِ بھر بیتگ ءُ بازیں جنگانی تہ ءَ ھوار بیتگ – شھید رھمت جمال دیرپگر ءُ جھد کنوکیں ھمراھے ءِ بیگ ءِ ھواری ءَ یک نہ ترس ءُ جنگولے بیتگ آئی ءِ داتگیں گرانبھائیں دیمونی ءِ ھون ءِ ھمک ترمپ یک آجوئیں ڈیھے ءِ بستار ءَ سرجم بنت –

بیبگر بلوچ ءَ گوشت کہ ڈیھ ءِ آجوئی ءَ پرکاریں ورنایے شھید کنگ ءَ ھواریں کارندہ دردناکیں رنگے ءَ نشانگ کنگ بنت –

نبشتانک: شھید زھیرجان تو نمیران ئے

نبشتہ.کار : شیردل بلوچ

دی بلوچستان پوسٹ

وھدے کومے ءِ گلامی ءِ مارشت کسے ءِ تہ ءَ بہ بیت گڑا وتی کوم ءِ چَمداری ءَ گند اِیت الم ءَ زورگر ءِ ھلاپ ءَ پاد کیت، گوں راجی جنزاں ھوار بیت ءُ وتی بلوچی زھرگ ءَ کار گِپت، گلامی ءِ ھُنڈالانی ولگوج کنگ ءَ جُھدکارانی رِد ءَ گون بیت، چہ ھیش ءُ نوش ءُ وشیاں دَرکیت وتی راج ءِ آکبت ءِ ھاتر ءَ وتی ھوناں ریچ ایت، اے گپّ ءَ ھم ھر کس زانت کہ آشوب چہ وتی چُکاں ھون لوٹ ایت آجوئی ھون ءِ ریچگ ءَ ابید گرگ نہ بیت، آشوبی پہ راج ءِ باندات ءِ ھاتر ءَ وتی سرانی ندر کنگ ءَ چَک ءُ پد نہ بنت، گلامی ءِ سانکلاں سند اَنت، گڑا ھما راجانی گِداناں الم ءَ یک ناں یکروچے آجوئی ءِ رژنائی بَل اِیت۔ ـ

چہ ھمے ھون ریچوکیں پرزنداں یکے زھیرجان بلوچ اِنت، ماں جاؤ ءَ لال بازار دمب الی میتگ ءَ ھاجی مھمد ءِ لوگ ءَ ودی بوتگ آ وتی بنداتی وانگ ءُ زانگ تاں پنچ تَبک ءَ چہ وتی ھلک ءِ وانگ جاہ ءَ دَر بُرتگ ئِے گیشیں وانگ ءِ ھاتر ءَ ماں لنجار مزن وانگجاہ (ھائی سکول) ءَ روت داھلہ زور اِیت وتی ھلک ءَ چہ ھشت کیلو میٹر دور ھر روچ پند ءَ وانگ جاہ ءَ روت ءُ کیت، ھمے وڑ ءَ دہ تبک ءَ وانتگ اَت ئِے ءُنھمی ءُ دھمی تبک ءِ چکاس شندی جاہ آھو ءَ داتگ ءُ چکاس ئِے باج برتگ اَت، ءُ پداگیش نہ وانتگ ئِے ـ

آئی ءِ پِت ءَ دو سور کرتگ، زھیرجان گُڈّی جنین ءِ مستریں چُک اَت، وھدیکہ وانگ ئِے یل دات گڑا پِت ءَ زوت آرا سور دات ، ءُ پد ءَ وت دبئی ءَ شُتگ اَت ، سور ءِ وھد ءَ زھیرجان ءَ گوں راجکاریں سنگتاں نزدیکی ھستگ اَت روچ پہ روچ آئی ءِ نزدیکی گیش بوگ ءَ اَت پرچا کہ آئی ءَ پیسلہ کرتگ اَت من راجی گل بلوچ نیشنل موومنٹ ءَ ھوار بہ آں۔۔ـ

گڑا2012/13 ءَ بی این ایم ءِ دوزواہ ءُ باسکے دارگ بیت 2014 ءَ بنجاھی کونسلر ءِ واستا گچین کنگ بیت ءُ کونسل سیشن ءَ بھر زورتگ اَت ئِے سک ءَ شوکیں سنگتے اَت مدام گل ءِ کاراں گون اَت بُنزہ ءِ زمہ واریں سنگتاں چہ یکے اَت ھاموش تب ءُ مھروانیں سنگتے اَت وھدیکہ گل ءِ کارے بوت گڑا ھما جاھاں بُگوشتیں ھما جاہ ءَ ساڑی اَت ـ
شھید رپیک ھاجی مھمد ءِ اولی جَنیں ءِ مستریں چُک بیت، آ ھم بلوچ نیشنل موومنٹ ءِ باسکے اَت، جاؤ ءَ شھید لال منیر بنزہ ءِ سروک بوتگ، رپیک جان چہ بی این ایم ءَ ساری ھم گوں“ سپرھان ساھب ءَ سک نزدیک بوتگ، کوم ءِ دوستی ءِ ھیلکاری چہ واجہ ءِ کر ءَ دربرتگ اَت ئِے، چوناھا واجہ وت یک اُستادے اَت بزانکہ رپیک جان ءِ سیاسی اُستاد ئِے بُگوش رَد نہ بیت، نزدیکی چہ بُن ازل ءَ گوں ماسٹر ءَ بوتگ اَت ئِے اگاں جاھے ءَ گردگ ءَ شُتگ وتی ھمراہ ئِے کرتگ اَت، منی اشکنگ ءَ ماسٹر چُٹّیاں وتی میتگ مشکے میئی ءَ شُتگ“ رپیک ءَ گوں وت ءَ بُرتگ ئِے ۔۔۔
بَلے!! میانجی ءَ انچیں دَورے اتک ساھب گندگ نہ بوتگ اَت،گڑا رپیک بی این ایم ءَ ھوار بوتگ ءُ گل ءِ باسکے اَت ـ

وھدیکہ “سپرھان ساھب ءِ زاماس ءُ سلیمان جان ءِ پِت وپات کنت ھمے بدیں ھال ءَ سھی بیت گڑا وتی کستریں برات ءَ زھیرجان ھمراہ کنت دیم پہ مشکے رھادگ بیت ھمے راھاں پیسر ءَ شُتگ ءُ اتکگ اَت رَد نہ بیت، یکیں روچے ءَ سپر کنت ءُ مشکے گس ءَ ئِے رس اَنت،
گوں ساھب ءَ ڈیک ور اَنت، سلیمان اُرپ شیھک جان ءَ وش اتک کنت منی نزّ ءَ اے شپ ءَ یکجاہ گوازین اَنت ءُ گڈی روچ ءَ ساھب ءَ موکل داتگ اَنت،
رپیک جان“ ءَ ھمے گوشتگ اَت کہ ما پہ تو سک ءَ زھیر کرتگ ، یک شپے دگہ یکجاہ گوازین ایں ءُ گڈی شپ ھمے بوت کہ بے سوبیں دلار ءَ وتی کار کرتگ،
سی جَلکان دوھزار پانزدہ ءَ لشکر شپ ءَ پہ چیروکانی کیت ءُ دراھیں راھاں بند اِیت ءُ گساں انگرّ ءَ کنت ءُ سھب ءَ مھلہ جنگ بندات بیت، ھمے جنگ ءَ تیوگیں مشکے ٹوپ ءُ بمبانی توار ءَ جَکس اِیت شھید ماسٹر سپرھان ساھب اُرپ ھان بلوچ ، شھید سلیمان جان اُرپ شیھک بلوچ، شھید زاکرجان ، شھیدرمزان بلوچ، شھید بالاچ جان، شھید گاجیان جان ،شھید رپیک جان ءُ زھیرجان اُرپ شیرا بلوچ، ھوار شھید کنگ بنت چہ لشکریاں بازین اش مُردار کن اَنت ـ
شھید زھیرجان شھید رپیک جان ھوار دراھیں شھیداں سھرچکیں دروت

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: راجی جُنز ءِ ھپتاد سالی ئیں جنگول

نبشتہ کار: اُمیر بلوچ

دی بلوچستان پوسٹ

بلوچ راج دپتر اے گْواھی ءَ دنت کہ 1948ءَ پد بلوچستان ءِ ھر پُسّگ ءَ زورگیر ءِ ھِلاپ ءَ توار بُرز کُتگ ءُ مرچی بلوچستان ءِ راجدپتر پہ جنگولیں سرانی کربانیاں ندر کن اِنت زورگیر ءِ ھِلاپ ءَ مزن شانیں سرمچار مئے گالانی وازمندگ وَ نہ اَنت،
آیانی کِرد پہ گُلزمین ءِ انوگین ءُ آیوکیں پدریچ ءَ پَھر ءُ شانے زانگ بیت۔ انچوشکہ ھان مھراب ھان، ھمل ء جیھند، بلوچ ھان نوشروانی، شھید درویش ءُ مجید برگیڈ ءِ کاروان ءَ ھوار ھما بے بھائیں ءُ اَرزشت مندیں بلوچ گلزمین ءِ پُسّگانی جُھد اِنت کہ پمّا ءُ پہ آیوکیں زمین وارساں پَھرے ودی کُتگ۔
وھدے کہ دنیا ءِ توک ءَ گُلامیں راجاں وتی گُلامی ءِ ھلاپ ءَ توار بُرز کُتگ گڑا زورگیر ءَ آیانی جُھد ءِ ھلاس کنگ ءَ وڑ وڑیں ٹارچر، کُشگ، گار کنگ بندات کُتگ۔ زوراکیں جھانگیرانی (سامراجانی) اے رنگیں ٹپّ ءُ ٹوریں درد دِیوکیں کِردانی برورد ءَ آشوب گیشتر مھکم بوتگ اَنت ءُ وتواجھی ءِ کاروان دیم ءَ جُنزان بوتگ اَنت۔ ھمے داب ءَ راج ءِ بلوچ ءِ سر ءَ زورکی ءِ ھِلاپ ءَ سپر ھان زھری، نواب نوروزھان، جنرل شیروپ مری، لونگ ھان، ءُ بابا بلوچستان ھیربکش مری، شھید پدا اھمد، براھمدگ بگٹی ءُ دگہ بازیں سرکیلیں راھشون ءُ راھبراں ھوار نواب اکبر ھان بگٹی ءَ ماتکوہ وتی سنگر کُت اَنت۔ بلوچ جنگی ءُ مُلکاری (سیاسی) رھشُونانی ھمراھی ءَ پہ گلزمین ءِ پھازگ ءَ بازیں بلوچ ءِ ماتکواں سنگر گیر بوت۔
وھدیکہ 70 سالی ئیں نواب اکبر ھان بُگٹی گوں آ دگہ مزن جگر ءُ سرمچاریں ھمراھاں بُرز ءُ بُلندیں کوھاں پہ پھرے وتی وابجاہ کنت ءُ زوراک ءَ پہ شانے گُش ایت کہ ما تئی ھِلاپ وتی ھوناں ریتک کن ایں گڑا اے ھپتاد سالی ئیں پیرمرد زورگیر ءِ چمّاں چو کُنٹگ ءَ جِک جنت ءُ بلوچ ءِ ھر گِس ءَ پُرمڑائیں نواب اکبر ھان ءِ نام بیت۔ ھر بلوچ ورنا وت ءَ اکبر ھان گُش ایت ءُ دیوال نواب ءِ اکساں گوں سمبھینگ بنت۔ دُژمن اے راستیں گْواھی ءَ اُپار کُت نہ کنت ءُ وھدے کہ 26 اگست ءَ پہ بلوچ ءَ آس ریچیں ھال کیت گڑا بلوچستان ءِ ھر دمگ پُرسیگ بیت بل ھپتاد سالی ئیں پیر مرد ءِ جُھد ءَ دگہ مزنیں راجی آشوبے ودی کُت ءُ بلوچ چاگِرد ءِ تہ ءَ گلامی ءِ یک ٹوھیں مارشتے ھم چست کنائینتگ کہ ما بلوچ یک زیردستیں راجے۔
مرچی چوشیں راجی ھستیانی کربانیانی برورد انت کہ بلوچ راج مرچاں بے کساس وتی راجی جُنز ءِ بارو ءَ سرپدی دار ایت۔ مرچیگیں آگاھیں بلوچ راج ءِ تہ ءَ یک راجی جُنز ءِ آشوبے ودی بوتگ پمیشکا ما دلجمیں کہ اے راجی جُھد ءِ دیم ءَ گوں سوبمندی ءَ جُنزان کنت داں وھد بلوچ وتی ڈیھ ءِ، وتی گُلزمین ءِ وتواجہ مہ بنت۔
بلوچی زندگ بات انت ءُ راجی جُنز شالا دیمروی کنات۔ شالا انچوش بات۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔