وت سری اگاں چہ سزا ءَ پھک ؟
ٹی بی پی شونگال
13 اگست ءِ روچ ءَ تُربت ءِ ھنکین آبسر ءَ ایف سی ءِ کارمندانی یک اولاکے پرپٹ ءِ سرءَ بستگیں یک “آئی ای ڈی” ءِ تراک ءَ گوں نشانگ کنگ بیت، کہ آئی ءِ سوب ءَ بازیں کارمند ٹپیگ بنت ۔ بلے اے ھال ھمد ءَ آسر نہ بیت۔
سلاہ بندیں جُنزانی ولگوج کنگ ءِ ھاتر ءَ ھاکمیں گل بے کساسیں پندل سازان ءُ پیداک اَنت، بلے دراھیں پندلانی تہ ءَ درستاں چہ ترسناکیں کار “ھواریں سزا “ بیت اِنت۔ ھواریں سزا ءِ رد ءَ ھاکمیں لشکر لس مھلوک ءَ بہ گر داں یاگیانی لوگ ءِ مردماں ابید سوب ءَ نشانگ جوڑ کن اَنت دانکہ چہ ایشی ءَ سلاہ بندانی سر ءَ گیشتر زور پر دیگ بہ بیت ءُ لس مردمانی تہ ءَ آیانی گلاں بیزاری ودی کنگ بہ بیت۔ چُش کنان ءَ ھاکمیں لشکر چہ کجام ھم کانود ءَ بُرز تر بنت ۔
13 اگست ءِ تراک ءَ ایف سی کارمنداں مدامی ھساب ءَ اُلس ءِ تہ ءَ تُرس ودی کنان ءَ جاگہ پہ جاگہ بیڑ بران کُت۔ چم دیستیں مردمانی رد ءَ ھمے بیڑانی نیام ءَ ایف سی ءِ کارمند یک مچکدگے ءِ تہ ءَ پُتر اَنت، کہ اود ءَ آیانی چم یک ورنایے ءِ سر ءَ کپ اَنت، کہ آ وتی مات ءُ پِت ءِ پجیگ ءَ کار کنگ ءَ بیت۔ آ ورنایے مات ءِ سر ءَ چہ گُشان چِکگ بیت ءُ ورناہ بندگ بیت، لٹ ءُ کُٹ کنان ءَ دگ ءِ سر ءَ آرگ بیت ءُ پد ءَ مات پتانی دیم ءَ ابید چہ آمید گسی پرمان ءَ آ ورنایے سینگ ءَ ھشت تیر ایر گیجگ بنت۔ کہ آئی سوب ءَ آ ورناہ ھما وھد ءَ اے کوڈھیں جھان ءَ کونج کنت۔
اے ورنایے پجار ھیات مرزا بلوچ ءِ نام ءَ چہ بیت، کہ آئی ءِ دیم شکینیں کپتگیں جون، ءُ کُکار ءُ پریات کنوکیں مات ءِ اکس سرجمیں راج ءِ دل ءِ سر ءَ درد ءِ سان ءُ چیدگ یل کنت۔
ھیات بلوچ کراچی مزن شھدربرجاہ ءَ فزیالوجی ڈیپارٹمنٹ ءِ گُڈی سال ءِ نودربر اَت ءُ کرونا ءِ وباء ءِ سوب ءَ اے روچاں وتی بُنکی میتگ ءَ اَتکگ بیتگ اَت، کہ اود ءَ مات ءُ پِت ءِ دز کمک کنگ ءِ ھاتر ءَ آ ھم مچکدگانی تہ ءَ دھکان کاری کنگ ءَ اَت دانکہ لوگ ءَ چار ءُ زر گیشتر اتک بہ کنت۔
ھیات ءِ مرگ بلوچستان ءَ دگہ یک انچیں بے نامیں دردناکیں کسہ ءِ بیتگ ءُ پشت کپتگ اَت ءُ کس ءَ اے درگت سما ھم نہ کپتگ اَت۔ اگاں اے ھال ھندی رسانکاں ءُ سوشل رسانکدر ءَ منانک ءُ شاھدانی پجیگ ءَ دیم ءَ آرگ مہ بیت ایں۔ ھاکمیں لشکر ءِ اے ترسناکیں کردگار ءِ پدر کنوک ھمے منانک ءُ لس مھلوک ءِ بگیری اَت، کہ چہ اِشی ءِ سوب ءَ آئی جی ایف سی ءَ زور ءِ تہ ءَ وتی یک سپاھیگ شاھدی اللہ ءَ دیمونی ءِ بُراک کُت ءُ پولیس ءِ دست ءَ دات، چوناھا اے گپ ءَ مردمے سنچ باور نہ کنت کہ اے سرجمیں وئیل تھنا یک مردمے چپ ءُ چاگرد ءَ بہ تر اِیت۔ تھنا یک کارمندے ءِ دزگیر کنائینگ ءَ چہ بوت کنت کہ یک گل ءِ سر دھکاں چہ لگیتگیں داگ دیر اتک مہ کن اَنت۔
15 جنوری 2010 ءَ خضدار ءِ ھنکین گزگی ءَ ایف سی کارمنداں یک ورنایے نودربریں صدام بلوچ راہ ءِ سر ءَ تیرگواری کُتگ ءُ کُشتگ اَت ءُ لس مردمانی زور ءِ پد ءَ یک کمیشن ءِ ھم اڈ داتگ اَت، کہ آئی ءِ باسکاں خضدار ءِ شھر گولیتگ اَت ءُ وتی ھساب ءَ کوش ءِ درگت پَٹ ءُ پول ھم کُتگ اَت، بلے آ روچ اِنت ءُ مرچیگیں روچ اِنت، نہ رپورٹ دیم ءَ اَتک نہ صدام بلوچ ءِ کوشکاراں سزا دیگ بیت۔ انچیں بے کساسیں وئیل دگہ ھم ھست کہ اود ءَ ایف سی کارمنداں چہ کانود ءَ بُرز تر لیکگ بیتگ۔
شال ءِ دمگ خروٹ آباد ءَ 2011 ءِ دلءَ تاپینوکیں وئیل دگہ یک درورے۔ خروٹ آباد وئیل ءَ درستانی گمانانی انگت زندگ اِنت کہ چون ابید منانک ءَ پنچ چیچن مردم کیمراھانی دیما تیر گواری کُت ءُ کُشت اَنت، کہ ایشانی تہ ءَ یک لاپ پُریں جنین ءِ ھم ھوار اَت، کہ آئی ءِ لاپ ءَ ھپت ماھی چُک ءِ رُدگ ءَاَت۔ ایشانی کشوک ھم ھمے ایف سی بیتگ۔
اے وئیل ءِ زمہ واریں کارمنداں داں روچ ءِ مروچی سزا نہ رس اِتگ، وئیل ءِ یکیں شاھد ڈاکٹر باقر شاہ اَت، کہ آئی ءَ جونانی پوسٹ مارٹم کنان ءَ گوشتگ اَت کہ ایشانی کِرا وتکُشیں جیکٹ وتی جاہ ءَ، توپنگ ءِ یک تیر یے ھم نہ بیتگ، بلے ھمے درشان ءِ سوب ءَ ناشناسیں مردماں وت ڈاکٹر ءِ جند تیر گواری ءِ آماچ کُت ءُ کُشت ۔
ھیات بلوچ ھم بلکیں کجام سلاہ بندیں گلءِ باسک اگاں آسراتی سر کنوک گُشگ ءُ کسہ ھلاس کنگ بیتگ اَت، اگاں پہ وھد منانک رسانک ءَ سر مہ بیت اِنت۔ راجی ءُ جھانی رسانک ءَ داں سر نہ بیگ ءِ سوب ءَ چُشیں گیشتریں وئیل چیر تر اَنت، اگاں نہ یک ورنایے ءِ بیگواہ بیگ ءُ پد ءَ آئی ءِ جون ءِ دزکپگ چہ جنگی گناہ ءَ کم نہ اِنت۔ وھدیکہ ھچ وڑیں منانک ایف سی ءِ ھلاپ ءَ داں رسانک ءَ سر نہ بیت نہ کنت ، گُڑا آئی جی ایف سی وت پہ دست دارگ ءَ مردمانی لوگءَ سر نہ بیت بلکیں ھمے ایف سی سرجم ءَ چہ سزا ءَ پھک اَنت ءُ ھرچی کہ لوٹ اَنت کن اَنت۔ اِشی ءِ نوکتریں درور ایش اِنت کہ ھمے روچ ءَ ھیات کُشگ بیت، ھمے روچ ءَ بلوچستان ءِ دمگ پنجگور ءِ ھنکین گچگ ءَ ھم یک پوجی بیڑے بندات بیت،اے بیڑ ءِ درگت ءَ ھم مارا رسانک ءَ ھچ گپ کندگ ءَ نئیت، پرچہ کہ داں اود ءَ سر بیگ نا ممکن جوڑ کنگ بیتگ۔ ھندی اھوالانی رد ءَ اے بیڑانی تہ ءَ داں انگت ھمے ایف سی ءَ پنجاہ ءِ کچ ءَ مردین، جنین ءُ گونڈو چِست کُتگ ءُ بُرتگ اَنت، کہ داں انگت ءَ بیگواہ اَنت۔
بلوچستان ءِ ھاکمیں لشکر ءِ وت سری ءِ گپ کنگ بہ بیت گُڑا اے ھما سزا ءَ چہ پھکی ءِ سوب اِنت، کہ چہ دیھکاں آیاں رس اِتگ، ھمیشی ءِ رد ءَ آ بلوچستان ءَ ھرچی بہ کن اَنت، چہ آیاں جُست گروگیں ملکی اگاں درملکی گل کس نیست۔ آ توپنگ بڈ کنوک کہ نودربراں بیگواہ کن اَنت، لٹ ءُ کُٹ کن اَنت، تیر جن اَنت ءُ دگءِ کشءَ دور دے اَنت، آیانی ھاترءَ ھیات بلوچ ءِ گرگ ءُ ھما جاہ ءَ سر زائری ءَ تیر باز دگری داروکیں کار ءِ نہ اِنت۔
ھاکمیں لشکر ھیات بلوچ ءِ کوش ءَ تھنا یک سپاھیگے ءِ ردی اگاں وت سری ءِ نام رنگ دیگ ءِ ھد ءَ گیش جھد کنگ ءَ اَنت، بلے بلوچستان ءِ ھمک مردم نی اے گپ ءَ چہ آشنا اِنت کہ اے یک سپاھیگے ءِ وت سری نہ اِنت بلکیں درستیں سپاھیگانی چہ کانودءَ مستر بیگ ءُ چہ سزا ءَ پھک بیگ ءِ سوب اِنت ءُ اِشی ءِ پُشت ءَ دیھکاں چہ جنزوکیں نوک آبادیاتی پگر کارمرز بیگ ءَ اِنت۔ ھمے گوستانکی راستی ءَ گواچنی دروشم ءَ سرپدی ءِ درشانی تھنا یک سپاھیگے ءِ دزگیری ءَ دلجم انساپ سرپد نہ بیتگ اَنت، بلوچ نودربراں مروچی 22 اگست ءَ سرجمیں ملک ءَ ءُ در ملکءَ نشتگیں سیاسی جھدکاراں ھم زھرشانیانی جار جتگ، کہ آیانی لوٹ بلوچستان ءَ چہ ایف سی ءِ درکنگ اِنت۔ بی این پی مینگل ءِ سروک اختر مینگل ءَ ھم ایف سی ءِ نیمگ ءَ چہ یک سپاھیگے ءِ دیمونی ءِ بُراک کنگ ءِ جاہ ءَ، لوٹ کُتگ کہ اے لیکہ ھلاس کنگ بہ بیت کہ ھاکمیں لشکر چہ سزا ءَ پھک اَنت۔
