TBP Balochi

دی بلوچستان پوسٹ

شھید نواب اکبر ھان بگٹی ءِ وارس بلوچستان ءِ آجوئی ءِ واستا الگاریں ورناہ ءُ پیر، کماش اَنت کہ پہ ڈیھ ءَ کپن بند اَنت زوگر ءَ گوں جنگ ءَ اَنت – بیبگر بلوچ

بلوچ ریپبلکن آرمی ءِ جارکش بیبگر بلوچ ءَ بابا ءِ بلوچ نواب اکبر ھان بگٹی ءِ چاردمی سالگشت ءَ آئی ءِ سر ءَ پھر بستگ ءُ گْوشتگ کہ آئی ءِ کماش اُمری راجدپتری جنگ ءَ پنجاپی پنجگ ءُ زورگر ءِ واستا ٹوھیں دیمپانی جوڑ بیتگ اَنت،بلوچستان ءِ سر ءَ پاکستانی زوگری ءَ پد برجاھیں جنگ ءَ نواب اکبر ھان ءِ شھیدی ءَ ھما توان ءُ زورمندی کرتگ کہ اے جنگ ءِ ھلاس کنگ ءَ ریاست ءَ دراھیں پوجی ءُ سیاسی پندلاں بے سوب بیتگ –

آئی ءَ دیمتر ءَ گْوشت کہ شھید نواب اکبر ھان بگٹی ءِ سیاسی ءُ سلاہ بندی وارس ھما ورناہ اَنت کہ ڈیھ ءِ آجوئی ءِ واستا زورگر ءِ بگیری ءَ وتن یا کپن ءِ زانت ءَ بامردی ءَ گوں جنگ ءَ اَنت –

نواب اکبر ھان پاکستان ءِ پوجی اسٹیبلشمنٹ، نوک آبادکاری شوربندی ءُ جھلتری ءِ بگیری ءَ داں گُڈی ساھت ءَ مِک بیتگ، پاکستانی ریاست ءَ نواب اکبر ھان ءِ بھا زورگ ءُ پروش دیگ ءَ وتی سر ءِ موت لڑینتگ اَنت بلے آ داں برزی بالادی ھلاپاں گڈی ساہ ءَ مِک بیتگ ءُ شھیدی پہ وتی نام ءَ کرتگ –

مروچی نواب اکبر ھان بگٹی ءِ شھیدی ءَ چاردہ سال گوستگ بلے ھمک بلوچ ءِ دل ءَ آئی ءِ جنگ ءِ پگر زندگ اِنت، نواب اکبر ھان بگٹی ءَ گلامی ءِ زنجیرانی سِندگ ءُ لگتمالی ءِ پروشگ ءَ سلاہ بندیں جنگ ءِ راہ ءِ شون داتگ ءُ اے منّینتگ کہ زوراکی سر ءَ سر گوز بہ کن اَنت گڑا آئی ءِ دیمپانی ءَ بس تھنا جنگ اِنت –

ھرنائی، ڈھاڈر ءُ قلعہ عبداللہ ءَ ناشُناسیں مردمانی تیرگواری ءِ وئیل ءَ دو مردم بیران بوتگ ءُ یک مردمے ٹپی بوتگ۔

دی بلوچستان پوسٹ

ٹی بی پی پتر ءَ سربوتگیں ھالانی رِد ءَ ہرنائی ءِ دمگ شاہوگیڑی ءَ گوستگیں روچ ءَ سئے شمبے ءِ سُھب ءَ ناشُناسیں سلاہ بندیں مردمانی تیرگواری ءَ یک مردمے بیران بوتگ۔

بیران بوتگیں مردمے پجار محمد رفیق ء درمحمد جاھمنند بسیمہ ءَ چہ بوتگ، دمگی لیویز کارمنداں ھما دمان ءَ وت ءَ وئیل جاہ ءَ سر کُتگ جون دست گپتگ ءُ تیرگواری کنوکانی رندگیری کتگ۔

دومی نیمگ ءَ ڈھاڈر ءَ ناشُناسیں سلاہ بندیں مردمانی تیر گواری ءَ عبدالسلام نامی مردمے زدگ بوتگ ـ
زدگ بوتگیں مردم ھما دمان ءَ ھسپتال ءَ سرکنگ بوتگ۔

ھمے وڈ قلعہ عبداللہ ءِ دمگ یارو ءَ ھم ناشُناسیں سلاہ بندیں مردمانی تیرگواری ءَ یک مردمے بیران بوتگ۔ بیران بوتگیں مردمے پجار محمد ہاشم کاکوزئی ءِ نام ءَ چہ بوتگ۔

ھندی مردمانی رِد ءَ یارو ءَ بوتگیں وئیل پیسری وت ماں وتی دژمنی ءِ سوب بوت کنت بلے ایندگہ وئیلانی درگت ءَ ھچ وڈیں اھوال داں انگت سر نہ بیتگ کہ کجام سوب ءَ جنگ بوتگ انت۔

ٹی بی پی پتر ءَ سربوتگیں ھالانی رِد ءَ بلوچستان ءِ مزن شھر شال ءُ مستونگ ءَ دگے وئیل ءَ چُکے ءَ ھوار شش مردم بیران بوتگ ءُ ھژدہ مردم ٹپی بوتگ ـ

دی بلوچستان پوسٹ

اھوالکار ءِ رِد ءَ بلوچستان ءِ مزن شھر شال ءِ دمگ خیزی چوک ءَ ڈمپر ءَ گوں وین گاڈی ءَ ڈیک وارتگ، ڈیک ورگے آسر ءَ یک کسانیں چُکے بیران بوتگ ءُ زالبول ءَ ھوار دو مردم زدگ بوتگ ـ

ھندی پولیس ءِ رِد ءَ لاش ءُ زدگ بوتگیں مردم ھما دمان ءَ ھسپتال ءَ برگ بوتگ انت اژدری چار ءُ ٹپاس ءَ پد لاش کھول ءِ ھوالگ ءَ کنگ بوتگ ـ

دومی نیمگ ءَ مستونگ ءَ یکیں روچ ءَ شش روڈ ءِ وئیل دیم ءَ اتکگ ـ

اھوالکار ءِ رِد ءَ یکیں روچ ءَ شال داں کراچی ءُ شال دان تفتان ءِ دگے سرا پنچ وئیلاں سئے مردم بیران بوتگ وھدیکے سینزدہ مردم ٹپی بوتگ ـ

ھمے وڈ مستونگ ءَ کڈکوچہ ءِ دمگ بدرنگ ءَ کلات ءَ چہ مستونگ ءَ آؤکیں پٹبال ٹیم ءِ لیبیانی آلٹو گاڈی ءَ گوں ٹرک ءَ ڈیک وارتگ ـ

ڈیک ورگے سوب ءَ سئے پُٹبالر ماجد، عامر، ءُ نور محمد بیران بوتگ انت ءُ وھدیکے دو پٹبالر عبدالمالک ءُ وسیم ٹپی بوتگ انت ـ

لیویز پورس ءَ وت ءَ ھما دمان ءَ وئیل جاہ ءَ سرکُتگ ٹپی ءُ بیران بوتگیں مردم ھسپتال سر کُتگ انت ـ

ٹی بی پی پتر ءَ سربوتگیں ھالانی رِد ءَ بلوچستان ءِ تیاب دپی دمگ گوادر ءَ پاکستانی پوج ءِ گاڈی ءَ نوک آباد ءِ کراس ءَ یک موٹر سیکل سوار ءِ ڈیکر کُتگ ـ موٹر سیکل سوار ھما دمان ءَ بیران بوتگ ـوھدیکے گاڈی ءَ سواریں پوجی کارمند وئیل جاہ ءَ چہ تتکگ۔

بیران بوتگیں مردمے پجار دنیگت ءَ نبوتگ بلے ھمے گُشگ بوھگ انت کہ آ دلوتانی ڈاکٹرے بوتگ۔

یات بداریت یک ھپتگے ءِ میان ءَ سئے جتا جتائیں وئیل دیم ءَ اتکگ کہ پاکستانی پوج ءِ گاڈیانی ڈیک ورگے سوب ءَ بازیں مردمے مرتگ ءُ بازینے ٹپی بوتگ۔

زانگ بہ بیت گوستگیں ھپتگ ءَ اُتل ءَ پاکستان کوسٹ گارڈ گاڈی ءِ تیز روگ ءَ سوب ءَ سیکل سوار لگت داتگ تاں چریشی ءَ مات ءُ چکاں ھوار پنچ مردم بیران بوتگ ات ءُ وھدیکے پنچ ٹپی بوتگ اَت۔

ھمے وڈ تربت ءَ ھم پاکستانی ایپ سی ءِ گاڈی ءِ تیز رؤگے سوب ءَ یک موٹر سیکل سوار ءِ لگت داتگ ات کہ چریشی ءَ ورناء سرشار ء عبدالرؤف سک باز زدگ بوتگ اَت۔

کراچی ءَ گوستگیں شپ ءَ چہ ھورانی گوارگ بندات اِنت –

دی بلوچستان پوسٹ

سر بیتگیں ھالانی رد ءَ کراچی ءِ دمگ سرجانی ٹاؤن، نیو کراچی، نارتھ کراچی، یوپی سوسائٹی، ناگن چورنگی، مسلم ٹاؤن، بفر زون، لسبیلہ، گارڈن، گرو مندر، فیڈرل بی ایریا، لیاقت آباد، گلشن اقبال، گلستان جوھر، ملیر، شاہ فیصل کالونی، بالی پٹ، لانڈھی، کورنگی، ڈیفنس، کلفٹن، ایم اے جناح دگ، صدر، آئی آئی چندریگر دگ، بزنس دگ، اورنگی ٹاؤن، سائٹ، بلدیہ ٹاؤن، شیر شاہ، لیاری، لی مارکیٹ، جونا مارکیٹ بولٹن مارکیٹ، کھارادر، میٹھادر، ٹاور، کیماڑی ءَ ھوار بازیں جاھاں ھورانی گوارانی برجاہ اَنت –

مولم شناسانی رد ءَ ترندیں ھورانی گوارگ داں پشمبے ءِ سھب ءَ انگت ءَ گمان کنگ بیگ ءَ اَنت –

شھر ءِ جتائیں جاھاں ھورانی گوارگ ءَ کور ءُ میتگانی تہ ءَ آپ مُچ بیتگ اَنت –

ھالانی تہ ءَ گوشگ بیتگ کہ سرجانی دگ ءَ دلبندے دلبندے آپ دگانی سر ءَ مُچ اَنت –

ھمے وڑ ءَ ملیر ءِ جتائیں کوراں ھم ھار کرتگ ءُ مزنیں توپانی ندارگاں پیشدارگ ءَ اَنت –

چاگردی رسانک جاھاں شنگ بیتگیں ھالانی تہ ءَ گوشگ بیتگ کہ ملیر ءِ کور مول کور، کدیجی کور ءُ جرندو ءَ نوزدہ سد ءُ ھپتاد ءُھپت ءِ توپان ءَ گیشتر آپ گون اِنت کہ آپ ءِ لوھڑ برز ءَ چِست اَنت –

مولم شناساں مردم سرپد کرتگ ءُ گوشتگ اَنت کہ ڈن ءُ دراں در مہ کپ ایت ھورانی توپانی مردمانی سر ءُ جاناں ھم تاوان بیت کنت –

ھمے وڑ ءَ سندھ ءِ دمگ اسلام کورٹ، مٹھی، نگر پارکر، تھر پارکر، امر کوٹ، ھیدر آباد، ٹھٹھہ، بدین، میر پور ھاس، ھیر پور، لاڑکانہ، سکھر، شھید بینظیر آباد، سانگھڑ ءُ دارو ءَ ھم گرند ءُ گریوکیں ھورانی گوارگ ءِ گمان اِنت

دی بلوچستان پوسٹ

ٹی بی پی پتر ءَ سربوتگیں ھالانی رِد ءَ قلعہ عبداللہ دمگ گلستان ءَ سینزدہ سالی ئیں گاریں گونڈوے ءِ لاش دست کپتگ ـ گونڈو پنچ روچ بیت کہ گار بوتگ ـ
 

کسانیں زھگے پجار ظہور احمد ءِ نام ءَ چہ بوتگ کہ گوستگیں روچ ءَ کلی حاجی خدا رحیم ہائی اسکول ءَ دست کپتگ ـ

ھندی پولیس ءِ رد ءَ آھاں کساں سالیں گونڈو ءِ لاش دست گپتگ ءُ ھسپتال ءَ سر کُتگ اودا اژدری چار ءُ ٹپاس ءَ پد لاش کھول ءِ گور ءَ سر کُتگ ـ

زانگ بہ بیت سینزدہ سالی ئیں ظہور احمد بیست اگست ءَ پنچ شمبے روچ ءَ چہ چست کنگ ءُ گار کنگ بوتگ ـ
دنیگت ءَ آئی ءِ چست کنگ ءُ کوش ءِ درگت ءَ ھچ وڑیں ھال نیست کہ چونین مردماں چست کتگ کجام سوب ءَ ـ

نبشتانک: بژن ءُ اپسوز

نبشتہ کار: یاگی بلوچ

دی بلوچستان پوسٹ

بلوچی زبان ءِ مزن نامیں گُشندہ واجہ نور مھمد نورل، آرپ بلوچ، شاہ جان داؤدی ءُ مُمتاز یوسپ، گنی پرواز، انیتا جلیل۔۔۔ مردم سک باز گون بوتگ، من درستیں ناماں گْوشت نہ کناں، بلے پہ بلوچ راج ءَ اے اپسوز ءِ گپے کہ ھیات جان ءِ لاش ایر اِنت ءُ اے ناچ ءَ اَنت

13 اگست ءَ ھیات جان شھید کنگ بیت، ھمے شپ 14 اگست بیت کہ مئے بلوچی زبان ءِ مزن نامیں شائر ءُ گشندہ رو اَنت شھید ھیات جان ءِ لوگ ءِ کش ءَ نند اَنت پروگرام کن اَنت ءُ پاکستان ءَ نازین اَنت، آ دیم ءَ شھید ھیات جان ءِ مکھیں مات ءُ آریپیں پِت لاڑکیں گُھار ءُ بلوچستان ءِ سرجمیں بلوچ نشتگ اَنت ارس ریچگ ءَ اَنت دومی نیمگ ءَ اے واجہ نشتگ اَنت گوں پاکستان ءِ ھمے پوج ءَ کہ ھیات جان اِش شھید کُرتگ، پد ءَ اے گوں ھمے پوج ءَ نشتگ اَنت ناچ ءُ سھبت کنگ ءَ اَنت !! پد ءَ وت ءَ بلوچ کوم ءِ دوزواہ گْوش اَنت، بلوچی زبان ءِ گشندہ ءُ ادیب گْوش اَنت، شمئے زبان دوستی ھمیش اِنت کہ پاکستان ءِ مراگشاں بھر زورگ ءَ اِت۔
یک پروگرامے واجہ آرپ بلوچ ءِ مسکت ءَ بیتگ اَت کہ آرپ شَیرے گْوشگ ءَ بیت واجہ نزیر ناسر پاد کیت لنکُک ءَ چست کنت ءُ آرپ ءَ گُڈّے دنت، گڑا آرپ اے گپ ءَ بد بارت ءُ دست ءَ جنت دلبند ءَ واجہ من ءَ گَڈّی دیگ ءَ اِنت، پد ءَ گْوش اِیت من گْوشاں بلوچی گْوشاں بلوچستان ءِ واستا گْوشاں، من مراں ھمے بلوچستان ءِ واستا مراں، بلوچستان منی ھاک اِنت۔ پد ءَ واجہ نزیر ناسر ءَ گْوش اِیت کہ تو ھمے واستا من ءَ گَڈّی دیگ ءَ ئے کہ من تئی شَیر نہ گْوشتگ ھمے گْوستگیں نوار ءَ۔ بلے واجہ تئی ھمے بلوچی کجا شُت تئی پروگرام ءِ کَش ءَ تئی برات ءِ لاش ایر اِنت تو نشتگ ئے گوں پاکستان ءِ پوج ءَ ناچ کن ئے بلے واجہ ترا میار نیست کہ مرگ ءِ کر ءَ ترا سک تُرس اِیت ءُ پد ءَ دگہ پروگرامے ءَ ھم گْوش اِیت منی ھیال ءَ روکپتی بلوچستان کُنرک ءِ پروگرام ءَ، وت ءُ شاہ جان داؤدی بوتگ اَنت گْوش اِیت کہ ما بلوچیں ما شَیر نہ گْوشیں مارا کُش اِت بیا اِت بہ کُش اِت، ھمے گپ تو مرچی پاکستان ءِ پوج ءِ کر ءَ بہ جتیں سک شوک اَت، بلے واجہ آرپ منی نزّ ءَ تئی بلوچی آپ شُتگ ءُ پد ءَ واجہ نور مھمد نورل واجہ بشیر بیدار ءِ شَیرے گْوشگ ءَ اِنت کہ
بیا بہ رکیں اِت من ءَ زند ءِ چرے جنجال ءَ
شپ گُش ئے روچ نہ بنت توبہ چہ منی ھال ءَ
پد ءَ اے پروگرام ءِ تہ ءَ واجہ نور مھمد نورل گْوش اِیت لھتیں نوکیں گشندہ درآتکگ کہ شریں شریں شِیر اِش بے تام کتگ اَنت بلے تو چے تام مان کنگ ءَ ئے شَیراں، ھمے بلوچی زبان ءِ شَیر کہ شائر ءَ گوں دل ءِ ھون ءَ نبشتہ کتگ اَنت تو روئے پاکستان ءِ پوج ءِ کر ءَ اے شَیر ءَ گْوش ئے شمارا ھمے شائر ءِ ھک گِر اَنت، شمارا بلوچ کوم ءِ کر ءَ یک بلاھیں نامے ھست اَت بلے شما وتی کدر وت نہ زانت، شھید ھیات جان شمئے چُک ءُ نماسگی ءَ روا بیت ھمے چُک ءِ لاش ءِ سر ءَ شما نِشت ءُ پاکستان ءِ واستا جشن آزاتی شاتکامی کت پد ءَ لوگ ءِ کَش ءَ!!
شمارا مراد بات پاکستان، شما ھیات جان ءِ سُھریں ھون لگت مال کُت اَنت ءُ پاکستان کبول کُرت۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

حب ءَ پاکستانی پوج ءَ یک مردمے آوار جتگ۔

دی بلوچستان پوسٹ

بلوچستان ءِ کاروباری شھر حب چوکی ءَ پاکستانی پوج ءَ یک مردمے زورانسری آوار جتگ ءُ بیگواہ کُتگ۔

ٹی بی پی پتر ءَ سربوتگیں ھالانی رِد ءَ گوستگیں روچ ءَ دوشمبے ءِ بیگاہ ءَ پاکستانی پوج ءَ کیچ ءِ دمگ آسیا آباد ءِ جھمنند ماسٹر داد دوست ء کریم بخش چہ حب چوکی ءِ دمگ بلوچ کالونی ءَ آوار جتگ ءُ ناشُناسیں جاہ ءَ بُرتگ۔

زانگ بہ بیت بلوچستان ءَ مردمانی آوار جنی ءُ بیگواھی گوستگیں دو دھکاں چہ برجاہ انت جتا جتائیں دمگاں چہ مردم آوار جنگ ءُ سالاں سال بند کنگ بوتگ انت،ـ آوار جنیانی بگیری ءَ وائس فار بلوچ مسنگ پرسنز ءَ ھوار دگے انسانی ھکانی گل ءُ ادارہ بازیں وھدی ءَ چہ زھر شانی کنگ انت۔

دشت، پنجگور ءُ جاؤ ءَ پاکستانی پوج ءِ بیڑ برجاہ سِی مردم بیگواہ

دی بلوچستان پوسٹ

سر بیتگیں ھالانی رد ءَ کیچ ءِ دمگ دشت ءِ ھنکین مزن بند ءِ کوھی دمگاں پاکستانی پوج ءَ بیڑ برتگ ءُ پَٹ ءُ پول بندات کرتگ –

دمگی مردمانی رد ءَ مروچی سیمی روچ اِنت کہ مزن بند ءِ کوھی دمگاں پاکستانی پوج ءِ بیڑ برجاہ اَنت ءُ مروچی ھم پوج ءَ برزی کمک ءَ بالگرد گون بیتگ اَنت ءُ کوھی دمگاں مانریتکگ ءُ بازیں جاھاں کوہ ءِ تہ ءَ دوت گندگ بیتگ اَنت –

آیاں گوشت کہ پوج ءَ گورگی ءِ راہ ءَ گوستگ ءُ سارتاپ سرپٹ ءَ وتی نوکیں چوکی جوڑ کرتگ ءُ نشتگ اَنت سرجمیں راہ ءُ دربند کنگ بیتگ اَنت –

دمگی مردمانی رد ءَ بانسر، چرپان کور کترینز ءِ کوہ ءُ سرجمیں دمگاں پوجی لشکر کشی برجاہ بیتگ اَنت اود ءَ بازیں جاھاں پوج ءَ درچک ءُ دار ھم مانداشتگ اَنت –

ھمے وڑ ءَ دشت ءَ ھواریں دمگ تلی دار، کروچی موکندر، زیارتی ءُ نیمگور کور ءَ پاکستانی پوج ءَ وتی نوکیں چوکی جتگ اَنت ءُ نشتگ –

بلوچستان ءِ جتائیں جاھاں پوجی زوراکی ھمک روچ برجاہ اَنت ءُ ھمے وڑ ءَ پنجگور ءُ جاؤ ءَ پاکستانی پوج ءَ بیڑ برتگ ءُ بازیں کچے ءَ مردم آوار جتگ ءُ بیگواہ کرتگ اَنت –

پنجگور ءَ آوار جنگ بیتگیں مردمانی تہ ءَ لھتے ءِ پجار حبیب، کھور، میر جان، نواب، کریم بکش، رُستم، آصف، دلدار، خالد، مزار، مھمد سالہ ءِ ناماں زانگ بیتگ اَنت –

ھمے وڑ ءَ آدینگ ءِ روچ ءَ جاؤ ءُ اورناچ ءِ کوھی دمگاں پاکستانی پوج ءَ بیڑ برتگ ءُ چمنگی، راھین، گری، گزی راھین ءَ بازیں جاھاں بمبگواریں بالگرداں جاہ جاہ ءَ تیرگواری ھم کرتگ –

چہ جاؤ پاکستانی پوج ءِ دست ءَ آوار جنگ بیتگیں مردمانی پجار مجید ء مھمد، صدیق چنال، دارو، رحیم بکش ء دولت ءُ جاؤ کوھڑو ءَ استاد ھامد ء جوگی ھم آوار جتگ ءُ برتگ اَنت –

ھالانی تہ ءَ گوشگ بیتگ کہ گچک ءِ کوھی چمگاں پوج ءَ زھر مانریتکگ ءُ چریشی ءِ آسر ءَ چہ چارسد پس، گوگ، ھشتر مرتگ اَنت –

بلوچستان ءِ سیاسی ءُ چاگردی مردمانی گوشگ اِنت کہ پاکستانی پوج آپریشنانی وھد ءَ لس مردماں آوار جنت ءُ بیگواہ کنت پدی ءَ لھتے مردم سالانی سال بندیگ بنت ءُ گنوگ بنت ءُ چریشانی تہ ءَ لھتے ءِ لاش ھم دز کپ اَنت –

زانگ بہ بیت بلوچستان ءِ بنجاھی شھر شال ءَ گوستانک ءَ بازیں لاش ابید ءِ پجار ءَ کَل ءُ کسارات کنگ بیتگ اَنت ایدھی ءِ رد ءَ لاشانی پجار نہ بیگ ءِ سوب ءَ لاش ھنچُش کل کنگ بیتگ اَنت کہ آیانی تہ ءَ ھنچیں لاش ھوار بیتگ اَنت آیانی دیم ءِ چھرگ ھم پجارگ نہ بیتگ اَنت –

نبشتانک: زوراکی ءِ اهد

نبشتہ کار. ماهل برمش بلوچ

دی بلوچستان پوسٹ

هاوند ءَ کہ اے دگنیا ءِ تہ ءَ بنی آدم جوڑ کُتگ گڑا آئی ءَ را یک آجوئیں زندے داتگ ءُ آئی ءَ اے هک دیگ بوتگ کہ وتی زند ءَ پہ ایمنی بگوازین اِیت ءُ ایدگے بنی آدماں اوں زندمانی کنگ ءَ بِل اِیت-
بلے بلوچ ءِ زندمان ءَ ناں ایمنی ھست ناں بلوچ ءَ آئی هک ءُ اُکبال دیگ بیتگ اَنت بلوچ راج ءِ زند ءِ دُرائیں وشی زوراکاں پُل اِتگ اَنت-

مرچی بلوچ ءِ همک گِس پُرسیگ اِنت همُک گِس ءَ بچے شهید کنگ بوتگ یا بیگواه کنگ بوتگ-
همک مات ءِ جگر اے زوراکاں آبلہ کتگ اَنت همک پیریں پِت ءِ چمانی روک اے زوراکاں زِتگ اَنت-
برے برے گُمان بیت بلوچ بوگ گش ئے یک گناھے جوڑ بوتگ-
چنچو بزگ ءُ بیوس اِنت بلوچ وتی زندگی ءَ همک روچ بدیں هال گوں بلوچ ءِ زند ءَ بندوک اَنت روچے یکے بیگواه کنگ بیت روچے یکے بے دردی شهید کنگ ءُ دور دیگ بیت-

تنگوهیں بچاں مات ءُ پتانی دیم ءَ بے دردی شهید کن اَنت دور دینت دل ترک اِیت چُشیں ندارگانی گندگ ءَ چمانی ارس نوں گُش ئے هُشک اَنت چون بگریوْاں انچو زوراکی کہ بلوچ راج ءِ سر ءَ بوگ ءَ اِنت بہ گندے دگنیا ءِ هچ کُنڈ ءَ نہ بیت بلے بلوچ ءِ درد ءَ کے مار اِیت کے اے ماتانی دل ءِ هال ءَ زانت کے اے بیگواھیں براتانی دوری ءِ درد ءَ گهارانی ارسانی هار ءَ مار اِیت؟
بلے پد ءَ وتی دل ءَ سهڑین اَنت وت ءَ تسلہ دینت کہ مہ جیڑ ۔
اے زوراکی ءِ اهد داں کد مان اِیت داں کد بدواه بلوچ ءِ سر ءَ انچو زُلم کنت الم یک وشیں نوبت ءُ باریگے پہ بلوچاں کیت الم اے تھار ءُ لنُجیں شَپ آسر بیت ءُ وشیں سباھے درپش دنت-
بلوچ راج ءِ وشیانی روچ الم کاینت من سَدکاں بلوچ انچو کہ الله ءَ یک آجوئیں زندے داتگ چو ایدگے راجانی وڑ ءَ گُڑا بلوچ الم وتی گُلزمین ءِ سر ءَ وش ءُ ایمنی زند گوازین اِیت-

چیا کہ نوں بلوچ زانت کہ بدواه ءِ دیم ءَ اوشتگی اِنت اے زوراکیانی دیم دارگی اِنت نوں بلوچ اے زلم ءُ زوراکیانی دیم ءَ پاد کیت نوں بلوچ اوپار ءُ برداشت نہ کنت نوں بس اِنت زوراکیں لگور ءِ چماں گوں ندارگ چارگ نوں بس اِنت نندگ ءُ ارس گوارگ زهگ ، زالبول ، پیر کماش ءُ ورنا کُل نوکیں توجیلے ساز اَنت نوں بلوچ وتی بدواه ءِ زوراکیانی اهد ءَ بدل کنت من جزماں دل ءَ اے زوراکیانی اهد داں دیراں نہ مان اِیت-
بلوچ ءِ وشیانی روچ الم کاینت-

بلوچ راج شادمان بات
بلوچستان سرسبز بات-

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔