نبشتانک: جسٹس، جسٹس، جسٹ!
نبشتہ کار: زبادی بلوچ
دی بلوچستان پوسٹ
اِے جمبوریں آچ داں ھما وھد ءَ سرد نہ بیت وھدیکہ نودربر وتی ازمی ساچشت ءَ سرپد مہ بنت۔ بد بھتی اِنت کہ بلوچ مرچی انگت سرپد نہ اِنت کہ آئی ءِ دشمن کے اَنت۔ بلوچ ءِ مستریں دشمن بلوچ راج ءِ ھما نودربر تبکہ اِنت کہ ھر روچیگیں زلم ءَ وتی چماں گوں گند ایت بلے اُپے اوں نہ کنت – پد ءَ نِند ایت مطالعہ پاکستان، سی ایس ایس ءُ پی سی ایس ءِ وڑیں پوسٹانی واستا روچاں شپ کنت۔ بژن بیت ھما وھد ءَ وھدے ھمے نودربر کہ پریس کلبانی دیم ءَ ءُ سوشل میڈیا ءَ جسٹس ، جسٹس (ھمے انساپ دو) ءِ اوگام ( نعرہ) جن اَنت۔
مَرچی ھرچ بلوچ ءِ گِس ءَ آچ روک اِنت بلے انگت ءَ نشتگ انت ھمے آچ ءَ گیشتر جمبور کنگ ءَ اِنت۔ وھدیکہ انگریز ھکومت انڈیا ءِ تہ ءَ زلم ءُ جبر ، ناانساپی ءَ گیش کنت گُڑا گاندھی کُل انڈیا ءِ مردماں گُش اِیت کہ انگریزی چیزاں چہ وت ءَ بائیکاٹ بکن اِت۔ بلے بلوچ نودربر چی کنگ ءَ اَنت یک نیمگے انساپ لوٹ اَنت پد ءَ دومی نیمگ ءَ وت انساپ ءِ پاداں گُڈّگ ءَ اَنت۔
اے نعرہ وی وانٹ جسٹس بلوچ ءَ مرچی بیست سال بیت جَنَگ ءَ اِنت ۔زانت کہ اد ءَ انساپ نرس ایت۔ پرچا کہ وت ھمے ناانساپی ءِ دامن ءَ بندوک اِنت۔ وت وتی برات ءِ کُشنده اِنت۔ آئی ءِ جند ءِ دست وتی برات ءِ هوناں گوں ھونیگ اَنت۔ اپسوز ھما وھد ءَ بیت وھدیکہ چہ انساپ ءِ اَدالت ءَ چی پارگ بیت گُڑا پٹان ءِ ھوٹل ءَ نِند ایت ءُ جیڑ ایت چوں من ءَ کمشنرے بوگی اِنت، چوں من ءَ کرپشن کنگی اِنت، چوں وتی بینک بلینس باز کنگی اَنت، چوں وتی آدگہ بلوچ براتانی ھون چوسگی اَنت۔
سد اپسوز بیت ھما وھد ءَ وھدیکہ بلوچ نودربر کاینت ءُ اَکس کشی کن اَنت-پد ءَ پیس بُک ءُ وٹسپ ءَ گوں وتی اکساں جنوک کن اَنت-اے درستیں اَمل نپسیاتی جیڑه اَنت-تَب زانتی زبان ءَ ایشی ءَ سوشل کنفارمیکٹی گُش اَنت ( کہ کُل مھلوک ھمے کار ءَ کنگ ءَ اَنت-گُڑا من ھم کناں گوں)- ءُ اَنوں کُل نودربر ھمے وڑبکنگ ءَ اَنت، گیشترین (اکثریت) کوکار کنت من کوکار کناں، دُرستیں بے توار بنت، من ھاموش باں۔
مرچی بلوچستان ءِ کُل جاگہ ءَ نودربر جَنَگ ءُ کُشگ بوگ ءَ اَنت ھرچ مات ءِ دل ءِ تہ ءَ آس روک اِنت ھزارانی کساس ءَ بچ زنداناں بندیگ اَنت۔ من ھمے جسٹس والایاں گوں دستبندی کَناں کہ اے زلم ءُ زوراکی ءِ آچ ءِ توسگ چو ارزان نہ اِنت وھدے کہ تو پہ درستاں تپاک مہ کن ئے ءُ وتی سیاست ءِ سنگار کنگ ءَ یل مکن ئے-داں تو پنچ سد سال ءَ انچش کوکار بکن ءُ جسٹس جسٹس بکن-اد ءَ ترا انساپ نرس ایت۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
