TBP Balochi

دی بلوچستان پوسٹ

سر بیتگیں ھالانی رد ءَ تربت سنگانی سر ءَ ساچان گرائمر اسکول ءِ پرنسپل شریف ذاکر ءِ لوگ ءِ سر ءَ ناشناساں تیرگواری کرتگ –

چاگردی اھوالکارانی رد ءَ ناشناسیں مردماں شریف ذاکر ءِ لوگ ءِ سر ءَ شپ ءَ تیرگواری کرتگ،تیرگواری ءَ جانی تاوانانی ھال نہ بوتگ –

شریف ذاکر انسانی ھکانی گل بلوچ ہیومین رائٹس آرگنائزیشن ءِ گوستگیں کسان کُمک سرکماش طیبہ بلوچ ءِ ناکو اِنت –

زانگ بہ بیت طیبہ بلوچ ءِ پت ءُ ازمکار ھنیپ چمروک گوستگیں روچاں ناشناسیں مردمانی تیرگواری ءَ چہ بیران بیتگ اَت –

ھمے وڑ ءَ چاگردی رسانکجاہ ٹویئٹر ءَ طیبہ بلوچ ءَ یک شنگ کرتگیں جارے ءَ گوشتگ کہ پت ءِ کوش ءِ ھلاپ ءَ باندا تربت ءَ شھید فدا اھمد ءِ چار راہ ءِ سر ءَ لس مردمانی نیمگ ءَ زھرشانی کنگ بیت –

آئی ءَ وتی جار ءِ تہ ءَ گوشتگ کہ ھمک تک ءَ گوں بندوکیں مردماں گوں دزبندی کن آں کہ اے زھرشانی ءَ بھر بہ زور اَنت –

زانگ بہ بیت بلوچستان ءَ ازمکار ءُ تاکار ءُ جتائیں تکاں بندوکیں مردمانی کُشت ءُ ھون یکشل ءَ برجاہ اَنت، دمگی ءُ چاگردی مردمانی گوشگ اِنت کہ کوشکاری وئیلاں پاکستانی پوج ءُ چیریں ادارھانی نیمگ ءَ جوڑ کرتگیں ڈیتھ اسکواڈ ءِ دست ھوار اِنت –

ھمے وڑ ءَ سیاسی مردمانی گوشگ ھم ھمیش اِنت کہ بلوچستان ءَ انسانی ھکاں گیشتر پوج ءِ داشتگیں ڈیتھ اسکواڈ لگتمال کنگ ءَ اَنت ءُ آیانی گوشگ اِنت پوج ءَ لس مردماناں سلاہ داتگ ءُ اے مردم لس نیزگار، ازمکار، تاکار، زالبول ءُ جتائیں مردماں کُشگ ءَ اَنت –

سیمسری بندگ ءِ سر ءَ ٹٹ جنوکیں زورگریں پوج وتی نشانگ کرتگ – مزار بلوچ

دی بلوچستان پوسٹ

ٹی بی پی پتر ءَ سربوتگیں ھالانی رِد ءَ مروچی بلوچستان ءِ سیمسری دمگ زامران گونجتو ءِ میتگ ءَ ناشناسیں سلاہ بندیں مردماں پاکستانی پوج ءِ سر ءَ مزن ءُ کسانیں سلاھاں گوں اُرش کُتگ – اُرش ءِ آسر ءَ پاکستانی پوج ءَ جانی ءُ مالی تاوان رس اتگ –

اھوالکار ءِ رِد ءَ اے اُرش ھما وھد ءَ کنگ بوتگ کہ پاکستانی پوج ءِ گاڑی سیمسری بندی ءِ سر ءَ ٹٹ جنوکیں کارمندانی پھازگ ءِ ھاتر ءَ تر ءُ گرد کنگ ءَ بوتگ کہ سلاہ بندیں مردماں آئی ءِ سر ءَ اُرش کتگ ءُ تچگ ءُ رؤگ ءَ سوبمند بوتگ انت –

دومی نیمگ ءَ بلوچ سلاہ بندیں گل یونائیٹڈ بلوچ آرمی ءِ جارکش مزار بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمہ واری منّ اِتگ گوشتگ کہ مئے سرمچاراں کیچ ءِ دمگ زامران گونجتو ءَ سیمسری بندی ءِ سر ءَ ٹٹ جنوکیں زورگریں پوج ءِ پھزگی گاڑی ءِ سر ءَ کسان ءُ مزنیں سلاھانی گون ءَ اُرش کُتگ –

جارکش ءَ گوشتگ اے اُرش ءَ زورگریں پوج ءِ گاڑی ءَ سک باز تاوان رس اِتگ ءُ گاڑی ءَ سواریں کارمند مرتگ ءُ زدگ بوتگ انت – وھدیکہ مئے سرمچار درآیگ ءُ رؤگ ءَ سوبمند بوتگ انت وتی اوتاگ ءَ سر بوتگ انت –

جارکش ءَ وتی درشان ءِ تہ ءَ بلوچ راج یک رندے پد ءَ مکن کرتگ گُشتگ کہ آ پاکستانی پوج ءُ زورگریں بند ساچی بنجلاں چہ گستا بہ بنت، سرمچارانی اُرش ءَ ھروڑیں تاوان ءِ زمہ وار پاکستانی زورگریں پوج ءِ نزیکی داروک وت بہ انت –

گڈسر ءَ جارکش مزار بلوچ ءَ گوشتگ کہ بلوچستان ءِ آجوئی تاں مئے اُرش برجاہ مان انت –

نبشتانک: ناکو مراد ساهر ءِ ازم

نبشتہ کار: آرپ وپا بلوچ

دی بلوچستان پوسٹ

چمشانک

جَه‍ جن ات چہ گْرانیں واب ءَ دیدگاناں پچ کن ات
شر وتارا ایدگہ راجاں گوں کَیل ءُ کچ کن ات-
“آجوئی ءِ روچ دراتکگ پر شما داتگ نپاد”
“اَے بلوچاں اتهاد ، پہ وشیں روچاں اتهاد”

بلوچی لبزانک ءِ سَیمی باریگ ءِ مستریں ناماں چہ یکے مراد ساهر زانگ بیت ، آئی ءِ ازمی ساچشت کاری انچش انت همک اهد ءَ راج ءِ درد ءُ اندوهانی جهگیری ءَ کنت ، راج ءِ لگتمالی ، واری ءُ بزگی سکین ءُ تِپاکی یکجاهی آئی ءِ درشانداب ءَ چہ اِے دگراں جتا کن اَنت ، آئی ءَ وتی اهد ءَ ابید آیوکیں اهد ءِ هم نشون داتگ

“سستگ ئے چہ بیلاں بس نہ انت ؟”
“نشتگ ئے چو هشک ءُ هیران بس نہ اِنت”

“جلگهیں بازار ءُ تئی میتگ گلیں
درست بیان انت ویراں ،بس نہ انت”

اے دستونک بلوچ راج ءِ ناتپاکی ءَ پدر کنت پدا گوں وت ءَ جیڑگ ءِ سکین ءَ هم دات ، اندر ءِ مارشتاں آگاه کنت نی بس انت اِے دْرستیں ویرانیانی سوب همیش انت ، ایشی ءِ آکبت تئی دیم ءَ انت
ساهر ءَ جدیدیت ءِ نام ءَ گوں لبزانک ءَ زوراکی نہ کتگ ، آئی ءَ لچہ انچش گشتگ انت کہ آئی ءِ وانوک بہ زانت من ءَ چی جیڑگی انت –
تری رومان ، بہ بیت ، راجی لچّہ بہ بنت آ بے چهر ءُ شبین نہ انت ، چہ بزانت ءَ پر گنج انت ، آئی ءَ مهگونگ هم نازینتگ انت بلے بلوچی رنگ ءُ گوناپ وتی گالاں داتگ انت یک بلوچ لچّہ گش ءِ وتی دوستدار ءَ چوں بیان کنت ساهر ءَ زانتگ ، آئی ءَ نوکی جدیدیت اِے رنگ ءَ درشان کتگ

“آ سورت ماهیکان رنگیں
گوں برواناں کمان رنگیں”

آ سورت ءَ گوں ماهیکان ءَ شبین دیگ انت ، برواناں گوں کمان ءَ
بزانت ، بلوچی سنگینی ، رنگ ءُ گوناپ واناکی ، جیڑگ ، مارشت ، اے درست ساهر ءَ زندگیں لبزانک ءِ جتائیں کماهگ ءِ منارینگ ءَ سوبین انت
ساهر سادگ بیانی ءَ هم شهکاریں ساچشت نویسی ءَ سوهو ءُ سرپد انت

زیک ءَ ساهر کہ تو اد ءَ اتک ئے
مرچی سرگیپتگ ءِ سپر کنگ ءَ

لچّہ نویسی ءِ اے درشانداب ءَ ساهر ءَ پہ وت ءَ همک اهد ءَ وانوک ودی کتگ
گندگ ءَ سادگ انت بلے بزانت ءِ رد ءَ چو زر ءَ گواز کنگ نہ بیت
آئی ءَ بتل ءِ تهر ءَ نمیرانیں ساچشت کاری هم کتگ –

“نہ اِلم شوک ، نہ کوم ءِ دوستی نہ سد ءِ دنیا ءِ “
“چشیں بے جوهر ءُ جان دز ءُ سستیں نوجوان ءَ سوچ”

“درلگوش زانت ءِ جامگ ءَ ساهر
بیا بلوچی ءِ چادر ءَ پوشیں”

“ساهر اے سیٹ ءُ هاکم ءُ مُلّا
مئے شمے هون ءِ چوسّگ ءَ یک اَنت”

“پہ نان ءِ چُنڈے ءَ چورو جنوزام لوگ سد گول اَنت”
“چشیں کوم ءِ لجوزیں ،اے امیر ءُ واجهان ءَ سوچ”

“سدی گوست اَنت نشانے منزل ءِ هم گندگ ءَ نئیت اِنت”
“چشیں گَلگَ ءَ چشیں راه ءَ ءُ چوشیں واجهان ءَ سوچ “

ناکو ءَ مزاحمتی ءُ ترندیں آشوبی لچّہ گیش پربستگ آئی ءَ لبزانک آدینک زانتگ –
ناکو ساحر ءِ چشیں نام کپتگیں لچّہ باز انت ءُ لس فهم اَنت ، ناکو ءِ ازم ءِ مستریں کمال همیش اِنت تچک ءَ وانوک ءَ وتیگ کنت ، آئی ءَ جیڑگ پرماهیت ،یکے ناکو ءَ اے هم زانتگ منی وانوک کَے اَنت
پمیشکہ آئی ءَ گڑ ءُ منجاں وانوک دور نہ داتگ اَنت اِبهامی ودی نہ کتگ لچّہ گشی ءِ سپت ءَ اِبهام لچّہ ءِ زیبائی ءَ معنویت ءَ دور دنت ساهر ءَ ایشی ءِ سرا جوانیں دسترس ءِ بیتگ
ناکو ءَ شبین هم وتی لچهانی ءَ تہ ءَ جوان کار گیپتگ –

“ٹیٹلیں دوست ءِ تنگوئیں گوناپ
مسل ء کُمبانی ترونگلیں نوک آپ”

ناکو دوست ءِ گوناپ ءَ گوں کمبانی نوک آپ ءَ شبین دیگ انت کہ سک نوک انت ءُ لچّہ ءِ نمیرانی ءِ مانزمان اِنت-

ناکو ءِ رد ءُ پیش ردانی گیچن سک زیبا ءُ برات ءُ گهار بیتگ اَنت آئی ءِ اے ازمی کمال ءَ ایدگہ لچّہ گش هم اسرمند بیتگ انت
ناکو گش ایت

تلک بدیں بهت ءِ مہ سرپتیں دریگتیں
آدچار گوں ما مہ کپتیں دریگتیں

پدا بشیر بیدار گش ایت

سر مہ کپتیں تی دیار ءَ دریگتیں
مارا برتیں کور ءِ هار ءَ دریگتیں

ناکو ساهر گش ایت
بنگ نوشاں ،ملار بلکیں باں
چہ گماں رستگار بلکیں باں

پدا مبارک کازی گش ایت

کیپ نوشاں همار باں بلکیں
من گنوکان ءُ سار باں بلکیں

هدامرزیں مهمد بیگ بیگل ناکو ءِ ازم ءِ سرا چش تران کنت

لبزانکی دنیا ءِ منی هما سنگت کہ آ همے جمالیاتی سپت ءِ هدابُند اَنت ،آیانی تہ ءَ مراد ساحر ءِ گلیں نام چہ کلاں بالاتر اِنت
سدیک آزات ناکو ءِ ازم ءِ چش تپاسیت
مراد ساحر ءَ ما بلوچی شائری ءُ لبزانک ءِ سرمچار پمیشکا لیکیں کہ آئی ءِ هم گنگلیں شائراں راج ءِ هما بے تواریں لوٹ نہ اشکتگ اَنت کہ مراد ساهر ءَ اش کتگ انت ءُ تنیگہ هما جاگہ ءَ اوشتاتگ ،،
گلام پاروک ناکو ءِ ازم ءِ سرا تران کناں ءَ گش ایت
مراد ءِ زبان ءِ سیمی سپت ایش اِنت کہ آ مسال ءُ گالوارانی کارمرزی ءَ سک بلد اِنت

“ناکو ءِ زند ءِ اهوال”
ناکو مراد ساحر ءِ نام مراد بکش بیتگ رند ءَ کہ لبزانک ءَ کیئت مراد ساهر بیت ،اے سپر کہ دیمتر ءَ جنزیت آئی ءِ لچّہ گشی راج ءِ دل ءَ جاگہ کنت بلوچ راج آئی ءَ چہ دوستی ءَ ناکو ءِ نام ءَ دنت بزاں ناکو مراد ساهر گش ایت ءُ یات کنت دشت ءِ یکے میتگے نامی شے سیچی انت ناکو همودا ودی بیتگ ،رندتر ءَ ڈکال ءِ سوب ءَ دشت ءَ لڈ ءُ بار کن انت کراچی ءَ جهمنند بنت
ناکو ءِ زند پہ واری بزگی گوستگ آئی ءَ نیزگاری ءِ جهندم ءَ وتی وانگ سرجم کت هم نہ کتگ ناکو ءَ تیوگیں زند ءَ کراچی ءَ ڈرائیوری کتگ زند ءِ روچ تیلانک داتگ انت بلے هما زمانگ ءَ آ گوں آزات جمادینی ءَ گوں ایدگہ لبزانکی جهد کاراں گوں لبزانکی جنز ءَ درستاں چہ گامے دیم ءَ بیتگ
گوش انت ناکو سکیں دیم گوش ءُ بے ریائیں انسانے بیتگ هک ءُ لبزانک ءُ راج ءِ هاترا آئی ءَ مدام سرمچاری کتگ ،آئی ءِ ند پہ زوراکاں یک سرمچار ءِ بیتگ ، ناکو ءِ لچهی دیوان ، (چیهال) ءَ اکیڈمی ادبیات ءِ نیمگ ءَ داد گیپتگ

ناکو ءِ چهاپ ءُ شنگ بیتگیں کتاب
(پاهار)
(چیهال)
( زر ءِ مروارد)
آزمانکانی دیوان
(گرمیں ساهگ)
18ستمبر 1998 ءَ بلوجی لبزانک ءِ اے درپشوکیں استال پہ مرامی اچ ما سسدیت ءُ وتی جاگہ هورک کنت

همک شئرے بندے ساهر بہ دنت گرمی یے دل ءَ را
شمے مجلس ءِ سرپاں من هما شائر ءَ نہ گنداں

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: تبریز جان تو اشتاپ کُت

نبشتہ کار: ظفر رند

دی بلوچستان پوسٹ

چوناھا انسان وتی زند ءَ ھر وھد ءَ اِشتاپ کنت ءُ مدامی جلد بازی انت مئے کِر ءَ ھمے چیز گیش رواج گپتگ کہ ما ھر چیز ءِ پسّہ ءَ جلدی لوٹیں-

اگاں یکے سپر ءَ درکپ اِیت آ راہ چار کلاک ءِ بہ بیت بلے آئی ءِ جُھد ھمے بیت کہ من سے کلاک ءَ سر بہ باں ما اشتاپ کنیں وتی منزل ءِ زوت سر بوگ ءِ جُھد ءَ کنیں-

بلے راستی ھمیش اِنت کہ اے جلد بازی مارا پُشت ءَ دور دنت ءُ منزل ءِ سر بوگ ءَ گیش وھد جَنت. وکتی تور ءَ آئی ءَ پائدگ مارا رَس انت بلے اگاں ما آئی ءِ پُشپد ءَ بچاریں گُڑا ھمے اشتاپی ءَ مارا چہ بازیں چیز ءَ پُشت ءَ پَشت گیج ایت ھمے دروشم ءَ تبریز جان ءَ ھم اشتاپ کُت پہ زوت پہ وتی گڈی منزل ءَ شُت-

نزاناں پہ کسان سالیں سنگت ءَ چی نبشتہ بہ کناں ءُ آئی ءِ کجام کِرد ءِ بابت ءَ ھبر بہ کناں ھدا گواہ اِنت اے ساھت ءَ من کہ پہ تبریز ءَ نبشتہ کنگ ءَ آں منی دست لَرزگ ءَ انت ءُ انچو سما بیت کہ من گوں وت ءَ دروگ بندگ ءَ آں ءُ انچو سما بیت تبریز اتکگ منی رند ءَ ءُ من ءَ گوانک جَنّگ ءَ اِنت کہ بیا زپر زوت رویں مرچی کیفے(cafe) ءَ پیالھے چاہ وریں سنگت مئے وداریگ انت. گس ءِ دپ ءَ اوشتاتگاں من ءَ گوانک جَنّگ ءَ اَنت ءُ زور زور ءَ کندگ ءَ انت.
تبریز ءِ مرگ من ءَ انگت باور نہ بیت ھو تبریز تئی ھمے گپ من ءَ گیشتر گیر آیگ ءَ اَنت ءُ تکلیپ دیگ ءَ انت. ترا یاد بیت لھتیں روچ ءَ پیسر چئیرمین ءِ آروس اَت ھِنّی بند ءِ شپ اَت درستیں سنگت ناچ ءُ چاپ کنگ ءَ اَت اَنت بلے اے سھت ءَ سنگتاں سک دم برتگ اَت نشتگ دم کنگ ءَ اَت اَنت تو اَتک ئے گوں من بگل گیر بوت ئے تو گُشت ناچ کُجا بوگ ءَ انت من ءَ ھمود ءَ بر من ناچ کناں مرچی چئیرمین آروس اِنت مرچی کہ ناچ نہ کناں گُڑا کدی کناں. من تو ھوار گوں دگہ لھتیں سنگتاں ناچ کُت پد ءَ درستیں سنگت اتک اَنت ناچ کنگ ءَ لَگ اِت نت تو زور زور ءَ کندگ ءَ لگتءِ ءُ کوکار دیگ ءَ لگت ءِ-

اُپ! اے سھت ءَ اے زند ءِ وشی چوں دمان ءَ بدل بوت اَنت
اڑے تبریز ترا یاد انت چئیرمین نکاہ ءِ شپ اَت مردم درست آل(Hall) ءَ اَتکگ اِت اَنت من گوں لھتیں سنگت ءَ ھوار سالونک ءِ ھمراھی ءَ کمو دیر بوت تو بار بار پون کنگ ءَ اِت ئے ءُ جُست کنگ ءَ اِت ئے کہ سالونک ءَ کدی کارئے وھد کَم اِنت مردم اَتکگ انت. ما اَتکیں سر بوتیں تو راہ ءِ سر ءَ اوشتاتگ اِت ئے مئے ودار ءَ کنگ ءَ اِت ئے ءُ مارا دست گِپت ءُ ھمے ھبر گُشت اڑے شُما دیر کتگ یار نوں وَ وھد ھلاس اِنت یک کلاکے پَشت کَپتگ ھچ چیز نہ بیت من تو گپ کنگ ءَ لَگ اِت اِیںِ ءُ من ترا دست ءَ گپت یکجاہ اسٹیج ءِ سر ءَ شُت ایں-

اڑے ترا اے کسّہ یاد بنت اگاں نہ تو اے یاد ھم گوں وت ءَ بُرت اَنت گوں؟
یار بیا رویں پارک(park) ءَ مرچی چَکّرے جَن ایں لیب ءُ گوازیں کنیں-
تبریز ترا یاد اِنت من تو شپ ءَ در اَتککیں پہ ڈیفنسءِ نیمگ ءَ شُتیں راہ ءَ گار بوتیں ءُ سرجمیں شپ من تو گَشت ایں بلے وتی منزل ءَ سر نہ بوتیں تو سرجمیں راہ ءَ کند اِت ءُ مزاک کُت-

کسان سالیں تبریز جان گوں ترا زند ءِ گوازینتگ کُجام ساھت ءَ نبشتہ بہ کناں گوں ترا گوازینتگیں ھمُک ساھت سک زیبدار بوتگ اَنت-
اے سھت ءَ سنگت یونس داد ءِ ھمے شئیر باز یاد پیداک اِنت آ وتی شئیر ءِ تہ ءَ نبشتہ کنت:

“ھُدا تئی دست نہ لَرزت اَنت اے اَجگیں پُل ءِ سِندگ ءَ”

دو روچ پیسر ھال اتک کہ تو ءُ مسیب جان گوں دگہ سنگتے ءِ ھمراھی ءَ ایکسیڈنٹ بوتگ اِت شُما ٹپی اِت بلے منی دل ءَ ھمے ھبر اَتک کہ کمو ٹپی اِت وش بِئیت پریشانی ءِ ھبر نہ اِنت بلے دل ءَ نہ مَنّ اِت من گُشت شُمے ھالءَ گِراں. من پون کُت شمے ھال گِپت داں دُرست سک پریشان اَتاں ءُ ھمے ھال اِش کُت کہ اے سک سیریس (serious) اَنت پہ ایشاں دُوا بکن اِت ڈاکٹراں ھاسیں دِلبڈی نہ داتگ. دل لَرزگ ءَ لَگ ات بار بار پون کُت شمے ھال گِپت سرجمیں شپ ءَ گوں سنگتاں نِشت شُمے کسہ آؤرت اَنت سنگتاں من ءَ باز دلبڈی دات بلے منی دل ءَ مَنّ اِت-
پہ شُمے سلامتی ءَ من تئی ءُ مسیب جان ءِ اَکس وتی اسٹیٹس ءَ جَت چہ سنگتاں دُوا کنّگ ءِ دستبندی کُت-
مرچی سُھب ءَ واب ءَ پاد اَتکاں چاہ دیم ءَ اِیر اَت من مُبائل پچ کُت ءُ تئی ءُ مسیب اَکس پد ءَ اسٹیٹسءَ ایر کُت ءُ دوا لوٹگ ءِ دست بندی کُت داں سنگتانی میسج آیگ بندات بوت ءُ سنگتاں نیک دوا کنّگ ءَ لَگ ات اَنت داں اناگہ ءَ تئی اکس ءِ گروپ ءِ تہ ءَ تئی پِت ءَ دیم دات ءُ تئی مَرگءِ نہ وشیں ھال مارا سر بوت من ءَ باور نہ بوت من پد ءَ جُست کُت کہ اے چونیں ھبرئے بلے تئی پِتءَ گوں دردناکیں لبزاں نبِشتہ کُت کہ
( ھئو اے ھبر راست ئے ما وَس کُت بلے مئے دست نہ رَست ءُ تبریز جان مارا یلءَ دات)
اے میسجءِ گِندگ ءَ پد ءَ دل ءَ آس لَگت ءُ چم نمبین بوت اَنت بلے دل ءَ انگت نہ مَنّ اِت پدا یکبرے من پون کُت ءُ جُست کُت دُرست ہمے گپ ءَ کنگءَ لَگت اَنت، ھمے دمان ءَ گوں ترا زندءِ گوازینتگیں ھمُک ساھت گیر اَتک اَنت ءُ من تئی اَکس ڈیلیٹ کُت ءُ دگہ اَکس ئے پیسبُکءَ پوسٹ کُت ءُ لوٹ اِت کہ اللہ پاک ترا بھشت ءَ جاہ بِدنت-
منا انگت باور نہ بیت تئی مرگ بلے ما بے وس ءُ لاچار ایں.
اڑے تبریز بس گُڈی گپ ءَ ترا گُشاں تو ھودا روئے حاصل ھمودا اِنت تو حاصل ءَ گوں گند ءُ نند کنے گُڈا ہمے کسّہ ءَ اَلم بیار کہ ما ءُ شُما گَلّیءَ لیب کنگءَ اَتیں حاصل ءَ بولنگ کُت یکےءَ بول ءَ دست ءَ لَگت ءُ گھڑی یے پُرشت ءُ ما ءُ شُما زور زور ءَ کند اِت مئے لیب ئے نہ داشت ترا یاد اِنت-

بس دُوا اِنت ھُدا ترا وتی باگیں بھشت ءَ جاہ بِد اَنت-

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

سر بیتگیں ھالانی رد ءَ گوستگیں روچ ءَ دزاپ ءِ دگ ءَ روکیں گاڑی ءِ کلٹی بیتگ ءُ چریشی ءَ چہ ھپت مردم زدگ ءُ یکے بیران بیتگ –

اھوالکار ءِ رد ءَ گوستگیں روچ ءَ نسر آباد ءَ دیم پہ دزاپ “زاھدان ” ءَ روکیں گاڑی کلٹی بیتگ ءُ ھپت مردم زدگ ءُ یک مردمے بیران بیتگ –

رسانکدراں ڈاکٹر فریبرز راشدی ءَ تران کنان ءَ گوشتگ کہ گاڑی ءِ کلٹی بیگ ءِ سوب ءَ ھپت مردم زدگ ءُ یکے بیران بیتگ –

ڈاکٹر فریبرز ءَ گوشتگ کہ دگ ءِ وئیل ءِ آماچ بیتگیں مردم نادراہ جاہ ءَ برگ بیتگ ءُ زدگ بیتگینانی درمانی بیگ اِنت –

ڈاکٹر فریبرز ءَ گوشت کہ گاڑیانی ترند روگ ءُ دگانی سر ءَ نادلگوشی ءَ بازیں وئیل آیگ ءَ اَنت ءُ سرکار باید اے ناوشیں وئیلانی گر ءُ دار ءَ بہ کنت –

دی بلوچستان پوسٹ

سر بیتگیں ھالانی رد ءَ روکپتی بلوچستان ءِ دمگ ایرانشھر ءَ یک مردمے ءِ جون دزکپتگ –

اھوالکار ءِ رد ءَ گوستگیں روچ ءَ ایرانشھر ءِ ھند چمنی پُھل ءِ چیر ءَ یک جونے دزکپتگ –

دزکپتگیں جون ءِ پجار عبدالواحد سبوری ء عبداللہ جھمنند کیشکور سرباز ءِ نام ءَ زانگ بیتگ-

اھوالکار ءِ گوشگ اِنت کہ گوستگیں روچ ءَ عبدالواحد ءِ جون گوں گاڑی ءِ ھمراھی ءَ چمنی پُھل ءِ چیر ءَ دزکپتگ –

تنی وھدی آئی ءِ کوش ءِ سوب زانگ نہ بیتگ ءُ جون پھزداراں چِست کرتگ ءُ نادراہ جاہ ءَ سر کرتگ –

نبشتانک: چیزے دانک پہ بساک ءِ سنگتاں

نبشتہ کار: شبیر شاد

دروت ءُ دراهبات اِت!

سنگتاں منی هیال ءَ اے رنگ ءَ سیاست بیت نہ کنت هر کارکُن وتی سوچ ءُ وتی هیالانی پلہ مرزی ءَ کنگ ءَ اَنت۔

پرچا کہ گلانی کار وتی رنگ ءُ داب ءَ بنت یکینَن گل ءِ تہ ءَهر کارے بیت کارکن ءِ بروسہ زورگ بنت بلے هما کارکن کہ آئی ءِ تہ ءَ راستی ءِ اَمل ءُ سیاسی سنچ بہ بیت، اگاں پیسلہ تچک ءُ راستی مہ بنت گڈا کارکنانی تہ ءَ یکینَن بدگُمانی ءُ شک ءُ شبہ ودی بیت۔ همے چیز مارا وتی گْوستگیں اسٹوڈنٹ گلانی تہ ءَ گندگ بیتگ کہ مزنیں پیسلہ مردمی یا کہ زانتکاری ءِ بنیاد ءَ بیتگ اَنت همے ھاتر ءَ گل ءِ تہ ءَ پروش کپتگ۔ اگاں پیسلہ هوریں وڑ ءَ کارگِسانی سَوَب ءَ کنگ بہ بنت۔ تہ ءَ پْرشت ءُ پْروش ءُ نااُمیتی کم بیت، گلانی چونیں کارے بہ بیت مزن کسان بیت نہ کنت بلے هر کار ءَ یک داگے الم پر بیت اگاں دیر بیت یاکہ زوت بلے روچے الم اسر کپ اِیت گل ءِ دامن ءَ۔ سیاسی کارانی وهد ءُ پاس ءَ نزوری ءُ کوتاهیانی سبب ءَ، سیاسی کارکن، زانتکار، چاگردی مردم ءُ اے دگہ سنگتاں شرگداری برداشت کنگی اِنت گوں آزاتی ءُ جْوانی ءَ پسو دیگ بنت۔ همے میان ءَ کجام ھم کارکن ءَ سرزوری کت یا گیر ء سیاسی کار کت گڑا گل ءِ تہ ءَ اے رنگیں کارکن جاه کت نہ کنت کہ آئی ءِ پروش دیگ ءِ پشت ءَ کپتگ یا آئی ءِ تہ ءَ دوتل ءُ دوپُوستی کار ھست یا چہ سیاسی سنچ ءَ زبھر اِنت۔ گلانی تہ ءَ سک کم مردم سرپد بیت کہ گل ءِ بستار پہ راجی دیمروی ءَ چنچو ارزشت ءُ بستار کرز اِیت، بازیں کارکن اے سیاسی کار ءِ بندات ءَ تاں گڑسر ءَ پِگری ھوالہ گون بوت سگ ءُ اوپار کت تو من سرپد باں آیوکیں وهد ءَ گل ءِ پِگری رھشونی همے مردماں دیگ بیت پرچا کہ ایشاں پہ گل ءَ باز پند جتگ۔ همک زند ءِ نوبتاں گوں دچار کپتگ اَنت –

سیاسی رھشونی ءِ مھکمی ءَ گل مھکم بنت وهدے کہ گل مھکم بوت اَنت کارکن هم گوں دلیری ءَ دیمتر ءَ جنزان بنت، گپ مرچی بساک ءِ سر ءَ کیت۔ 2009 ءَ بگر داں روچ ء مرچی یک شریں وڑے ءَ بلوچ نودربرانی رهشونی ءَ کنگ ءَ اِنت۔ چیزے وهد ءَ گل ءِ رھشونی ڈاکٹر ابابگر ءُ پد ءَ اے ڈُبّہ سرکماش رشید بلوچ ءَ وتی کوپگاں زرتگ۔

سنگتاں باز پند بُرّ اِتگ باز بزگی دیستگ بلے آیانی مھر بیتگ اَنت پہ وتی نودربرانی واست ءَ کہ آیانی رهشونی ءَ ما مہ کنیں دگہ مردم نیست دست اِش بہ گپت۔ انی ھستیں ڈاکٹر نواب بلوچ ءَ اے بار کوپگ ءَ دیگ بیتگ۔ شما منی هیال ءَ سک باز جوانیں وڑے ءَ کار کتگ سنگتاں۔ ما هم باز وهد ءَ همے گل ءِ همراه بیتگ ایں ءُ انگت همے پکر ءِ منوگر اِنت۔ پرچا کہ ما باز سرپدی هیل کتگ یکینن مارا دوست بیت ءُ دوست بوگ ءِ سبب هم اِیش اِنت ما پِگر ءِ منوگر اِنت ناں کہ شکسیت۔

بیساک مدام نودربرانی کجام ھم اڑ ءُ جنجال بیتگ اَنت بیساک ءَ مدام گیش ءُ گیوار کتگ اَنت، مرچی کہ یک ءُ دو سنگت ءِ مھتل کنگ بیتگ الّم بساک ءِ ھستیں شورگس ءِ پیسلہ بیتگ۔ همے مھتلی ءِ وهد جنزان اَت دگہ لھتیں سنگتاں وت سر ءَ وت سوشل میڈیا ءَ یک رزوائی ءِ جار چست کت وڑ وڑیں گپ ءُ بھتام جنگ بوت چد ءُ پد رند ءَ اے دوئیں سنگت در کنگ بیت اَنت۔ ایشانی سبب چے بیتگ کارکن دلجم اَنت۔ گُڑا منی هیال ءَ سوشل میڈیا جیڑہ ءِ توجیلّ نہ اِنت۔ گلانی تہ ءَ مجیڑہ بنت کمزوری بیت۔ بلے پد ءَ هم مردم کارگِس ءِ توک ءَ نند اَنت وت ماں وت اڑ ءُ جنجال ءَ پیسلہ کن اَنت-

پہ وت سریں سوشل میڈیا ءِ هبر ءَ منی هیال ءَ دوری ءُ دلتنگی بیت دگہ ھچ۔ باید اِنت اے رنگیں وانوک ءُ ذمہ داریں سنگت گیر سیاسی کار مکن اَنت چش مہ بیت همے کارانی سبب ءَ ما وت ءَ کمزور بہ کنیں یا کہ وتی کتگیں کارانی سبب ءَ باندا روچ وت ءَ وت ملامت بہ کنیں!
سلامت بات اِت۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ زند واریں دگ

ٹی بی پی شونگال

یک اَبید سرکاری گل ءِ شمار ءُ کساسانی رد ءَ بلوچستان ءَ تھنا اگست 2020 ءِ ماہ ءَ 944 دگ ءِ وئیل دیم ءَ اتکگ اَنت۔ اِشی بزانت ایش اِنت کہ بلوچستان ءَ ھمک روچ 30 دگی وئیل بنت۔ اے بیتگیں وئیلانی تہ ءَ 143 مردم بیران وھدیکہ 1480 سک ٹپی بیتگ اَنت۔

بلوچستان ءِ دگانی سر ءَ تھنا اگست ءِ ماہ ءَ ناں تھنا مرگانی لیب برجاہ بیتگ بلکیں جولائی ءِ ماہ ءَ ھم 1099 وئیل نبشتہ کنگ بیتگ اَنت، کہ ایشانی تہ ءَ 123 زند زوال وھدیکہ 1462 مردم ٹپی بیتگ۔ ھمے پئیم ءَ شمار ءُ کساس جون ءِ ماہ ءَ ھم گندگ بیت کن اَنت، وھدیکہ 949 دگانی وئیلاں 109 مردم بیران وھدیکہ 1433 ٹپی بیتگ ۔

کجام ھم مھتریں چاگردی ءَ اے کساس ءُ شمار پہ ترندیں پھازوکیں گام دیم ءَ آرگ ءِ ھاتر ءَ بس بنت بلے بلوچستان ءَ راستی اِشی ءِ چپ اِنت، پرچہ کہ داں انگت ءَ دگانی جاور گھتر کنگ ءِ ھاتر ءَ ءُ وئیلانی دارگ ءِ ھاتر ءَ کجام ھم جوانیں گام چِست کنگ نہ بیتگ اَنت۔

بلوچستان ءِ بازیں دھک کوھنیں پرشتگیں دگ، وئیلانی درستاں مستریں سوب اَنت۔ اے دگانی تہ ءَ ھراب تریں 813 کلومیٹر دراجیں این _ 25 مزن دگ اِنت، کہ اِشی ءَ آر سی ڈی مزن دگ ھم گُشگ بیت۔
اے دگ سی سال پیسر کسانیں ٹریفکانی ھاتر ءَ جوڑ کنگ بیتگ اَت، بلے سے دھکانی گوزگ ءَ پد مروچی اے مزن دگ مزنیں ٹریفکانی گوزگے راہ اِنت، کہ ایشی ءِ تہ ءَ گوستگیں دو سالانی تہ ءَ چین پاکستانی اقتصادی گوزراہ ءِ کارانی سوب ءَ بے کساس بے کساس گیشی بیتگ۔ اے نی بلوچستان ءِ درستاں دزگٹ ءُ ھترناکیں دگ جوڑ بیتگ۔ بلے انگت ءَ ھم اے دگ تھنا دو نیمگی اِنت ابید ایشی ءَ کہ ھمروچ چہ اد ءَ ھزار مساپر بریں بس، مال بروکیں اولاک ءُ وتی کارمرز کنوکیں اولاکانی ھاتر ءَ کارمرز کنگ بیت۔

جون ءَ چہ اگست 2020 ءِ وئیلانی کساس ءُ شمارانی سر ءَ جیڑگ ءَ پد اے زانگ بیت کہ گیشتریں وئیل کچ ءَ گیش پُر کُتگیں مال بروکیں اولاکانی سوب ءَ پیش کاینت، چہ ایشانی تہ ءَ گیشتر دگانی سر ءَ جنزینگ ءِ ھاتر ءَ بروبر ھم نہ اَنت۔ دگہ یک مستریں سوبے مساپر بسانی مال برگ ءِ ھاتر ءَ کارمرز بیگ ءَ اَنت، مزنیں کساس ءَ آئیلانی بیرل اے مساپر بسانی بُرز ءَ لڈگ بنت، چہ اِشی ءِ سوب ءَ بازیں آس گرگ ءِ وئیل دیم ءَ اتکگ اَنت بلے انگت اے اولاکانی گِر ءُ دار کنگ ءِ ھاتر ءَ واکدارانی نیمگ ءَ چہ ھچ ھم کنگ نہ بیگ اِنت۔

چُشیں ھترناکیں دگ ءُ ھمروچیگیں وئیلاں پد ھم اے دگانی سر ءَ جان سلامتی ءِ کجام ھم آسراتی نیست ءُ وئیلانی تہ ءَ ٹپی بیوکاں گیشتریں مردم وت چہ وتی کمک ءَ بازیں کلومیٹر دیر بستگیں نادراھجاہ ءَ برگ ءِ جھد ءَ کن اَنت، چہ اِشی ءَ سوب ءَ بازیں ٹپی رَکّ اِیت نہ کن اَنت۔

بلوچستان ءِ انیگیں سرکار ءَ 2019 ءَ جار جتگ اَت کہ بنداتی کمک دیگ ءِ ھاتر ءَ بلوچستان ءِ دگانی سر ءَ بازیں جانسلامتی بنجاہ اڈ کنگ بنت۔ بلے دان انگت ءَ اے کارانی سر ءَ گام زیرگ نہ بیتگ ءُ ھمک ماہ مزنیں کساسے ءَ زندانی زوال بیگ یک شلی ءَ برجاہ اَنت۔

اد ءَ تھنا پرگینگی سرکار ءِ بے کردی ءِ درشانی کنگ ءَ نہ اَنت بلکیں بنجاھی سرکار ءَ ھم این _ 25 مزن دگ ءَ گیشتر پراہ کنگ ءُ چار راہ کنگ ءِ پوڑی داشتگ اَنت۔

ستمبر ءِ ماہ ءَ بلوچستان سرکار ءَ یک آر ایف پی ( ریکویسٹ فار پروپوزل) ءِ جار شنگ کُتگ اَت بلے دومی نیمگ ءَ بلوچستان سرکار ءِ نیمگ ءَ اے گمان ھم دیگ بیت کہ چہ بنجاھی سرکار ءِ نیمگ ءَ پوڑی اوشت آماچ اَنت۔

بلوچستان ءَ انسانی زند ءِ ارزشت ھلاس کنگ بیتگ، بلوچستان ءِ درستیں چاگردی پھنات تاوان ءُ انسانی زند ءِ ناکدری ءِ نیمگ ءَ شار دیگ ءَ اَنت۔ دگانی وئیل مردمانی درد ءُ دورانی تہ ءَ گیشی کنگ ءِ یک دگہ دروشمے جوڑ بیتگ اَنت۔

نوں وھد اتکگ اے جیڑہ ارزشتی پئیم ءَ گیشینگ بہ بیت ءُ دراج وھدی راہ ءِ کَشگ بہ بیت۔

دی بلوچستان پوسٹ

جاؤ ءُ ھب ءَ دگ ءِ وئیلاں دو مردم بیران ءُ دو ٹپی بوتگ اَنت –

ٹی بی پی پتر ءَ سربوتگیں ھالانی رِد ءَ بلوچستان ءِ دمگ جاؤ ءَ دگ ءِ وئیل ءَ شاھمیر چنال نامی ئیں مردمے بیران بوتگ ءُ یک مردمے زدگ بوتگ –

دومی نیمگ ءَ بلوچستان ءِ کار ءُ باری شھر ھب پیر ٹیارہ شھدگ ءِ سر ءَ ٹریلر ءَ پرپٹ ءَ سوارے ٹکر جتگ –
ٹکر ورگ ءِ سوب ءَ یک مردمے بیران ءُ یکے ٹپی بوتگ –
دوئیں وئیلاں بیران ءُ ٹپی بوتگیں مردم ھسپتال ءَ سر کنگ بوتگ اَنت ءُ اژدری چار ءُ ٹپاس ءَ پد جون کھول ءِ گور ءَ سر کنگ بوتگ انت –

نبشتانک: وانگجاہ

نبشتہ کار: باسِت اکبال بلوچ

دی بلوچستان پوسٹ

ُمن یک روچے وانگجاہ ءَ روگ ءَ اِت آں گڑا من یک سنگتے راہ ءَ دیست کہ اے ھم پہ وانگ ءَ وانگجاہ ءَ روگ ءَ اَت وھدیکہ ما دوئیں وانگجاہ ءَ شُت ایں گُڑا کَمو دیر ءَ رَند پہ انگلیش ءِ درونتانی وانینگ ءَ استاد ساھب آتک پد ءَ آ انگلش ءِ درونتانی وانینگ ءَ لَگ اِت۔

گڑا چہ ھَمد ءَ من کمو جیڑ اِت کہ بلکیں مئے بلوچی زبان ءَ ھم درونت ھست!
البت چو انگریزی ءِ وڑ ءَ من ءَ وَ بلوچی وانگ ءِ ھُب ءُ واھگ ھم ھست اَت –

گڑا مئے اُستاد ءَ مارا انگریزی وانینت ءُ شُت پد ءَ کمو دیر ءَ رند من لوگ ءَ آتک آن ءُ من چَہ دگَہ مردماں ھمے بلوچی درونتانی بارو ءَ جُست گیپت گڑا من ءَ یکے ءَ گُشت کہ دنیا ءِ دگریں زبانی ڈول ءَ بلوچی زبان ءَ ھم درونت ھست ءُ بلوچی نبیسگ ءَ راہ ءُ رھبند ھم ھست۔

چریشی ءَ منی دل ءَ لوٹ اِت کہ من بلوچی بِہ وان آں ءُ من اے بابت ءَ جست ءُ پرس ھم کتگ کہ بلوچی کَے وانین ایت ءُ کُج ءَ وانینَگ بیت؟ پرچا کہ مئے راجی زبان ماں وانگجاھاں وانینگ نہ بیگ ءَ اَت ءُ بلکیں انگت ءَ ھم وانینگ نہ بَیگ ءَ اِنت۔

گڑا من ءَ یکے ءَ گُشتگ “تو وَ سرپد ئے کہ بلوچی زبان ماں وانگجاہ وانینگ نہ بیگ ءَ اِنت البت من ترا یک وٹسپی دیوانے ءَ ھوار کنائین آں اود ءَ بلوچ راجی زبان وانین بُوگ ءَ اِنت-

گڑا من اے ھبر ءَ وش اِت آں ءُ پد ءَ من ءَ ھوار کنائین اِنت ئِے من کہ دیوان ءَ ھوار بوت آں گڑا آ دیوان تہ ءَ بلوچی درونت شپ داں روچ وانینگ بیت اَنت من ءَ درونتانی وانگ سک وش بوت اَنت چی ءَ کہ آ باز آسان اِت اَنت گڑا انچو من دو ءُ سے دیوان ءَ ھوار بوت آں آیانی اُستاد ھم باز شریں اُستاد اَنت، آیانی باز باز منتوار آں چَہ ھمایانی سَوب ءَ من بلوچی وانگ ءُ نبیسگ دربرتگ ءُ انگت ھم دربرگ ءَ آں ، آ استادانی نام چو اے وڑ ءَ اَنت “واجہ ایم شکاری،واجہ ابدالستار بگٹی، ابدالگپور گردھانی، واجہ مھمد پھراھی ،واجہ میرجان میر، سابر آسکانی ءُ واجہ سئید ساھل”۔

ما باید اِنت وتی بلوچی زبان ءَ بِہ وان ایں اے وَ راست اِنت کہ مارا مئے راجی زبان وانگجاھاں وانینگ نہ بَیگ ءَ اِنت بلے اُدستاداں وٹسپی دیوان جوڑ کُتگ ءُ ما باید ما آیانی تہ ءَ ھوار بِہ بَہ ایں انچوشکہ آ پہ مئے وانینگ ءَ مُدام ساڑی اَنت مارا وتی زبان وت دیمروی دیگی اِنت چیاکہ دگہ راج مئے زبان ءَ دیمروی نہ دے اَنت ما باید ما وتی راجی زبان ءَ وت بہ وان این ءُ دگراں بِہ وانین ایں بلکیں ھمے داب ءَ وتی جھد ءَ ھم برجم بِہ دار ایں۔

بلوچی زبان شالا میزران ءُ ھست بات۔ شالا انچوش بات۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔