TBP Balochi

دی بلوچستان پوسٹ

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی بنجل ءَ 4100 روچ سرجم بیتگ – ھزدار ءَ راجدار ءُ چاگردی باسک موسیٰ ھان بلوچ، عبدالوحید بلوچ، نور مھمد بلوچ ءُ دگہ مردماں بنجل ءِ تر ءُ تاب کرتگ ءُ کھولانی گون ءَ پدردی درشان اِتگ –

وی بی ایم پی ءِ رھشون ماما قدیر بلوچ ءَ ھمے وھد ءَ گوشت کہ زورگریں دست زیردستیں راجاں وتی پنجگانی چیر ءَ دارگ ءِ ھاتر ءَ درساں پیسر آئی ءَ مازگی وڑ ءُ پئیماں زیردست کنگ ءِ جھد ءَ کنت بلے وھدےکہ زیردستیں چاگرد ءَ وتی زیردستی ءِ سما کپ ایت ءُ چراھی ءَ رکگ ءِ ھاتر ءَ زانت ءُ زانشت ءَ گوں بندوکی بہ کنت گڑا اود ءَ اے پندل بے سوب بنت ءُ دومی در زوراکی ءِ بے رھمی ءِ کارمردی ءَ کارمرد کنت –

آئی ءَ اے درگت ءَ گوشت کہ اے گپ وشی ءِ کہ بلوچ راج نِی مازگی زیردستی ءَ چہ درکپتگ ءُ ھمے واستا ریاست بلوچ راج ءِ نسل کُشی ءَ وتی گڈی پجار ءُ بالادستی ءِ گڈی در ءَ چارگ ءَ اِنت –

ماما قدیر ءَ گوشت کہ اے درچ ءَ ریاست بلوچانی گداناں، کوچگ ءُ شھراں ھمک روچ پوجی کاروائی ءُ دست ءُ گوشیں بلوچاں نشانگ کنگ ءِ وڑ ءُ پئیم برجاہ داشتگ اَنت وھدےکہ دومی رنگ رستری ءُ ھونریچی وتی پئیم ءَ اَنت، رسترانی پئیم ءَ چِست بہ کنت، بہ جن ءُ دور بہ دے کہ اشانی تہ ءَ ھما بلوچ نشانگ کنگ بیگ ءَ اَنت زانت ءُ ند ءِ واھند اَنت –

ماما قدیر ءَ گوشت کہ اے ھونریچیانی آماچیانی تہ ءَ راجداریں باسک، نودربر، ورناہ، اھوالکار ءُ انسانی ھکانی باسکاں ھوار ھمک اُمر ءِ بلوچ پُسگ آوار جنی ءِ آماچ کنگ ءَ پد لَٹ ءُ کُٹ کرتگیں جون ماں جنگل ءُ گیاباناں گندگ بیگ ءَ اَنت –

نبشتانک: نشہ

نبشتہ کار: زبیر گلام

دی بلوچستان پوسٹ

اے گال وھدے کہ کسّے ءِ گوشاں کپ ایت تہ لھتے جُست الّم آئی ءِ زھن ءِ تہ ءَ ودی بیت۔

1۔ نشہ ءِ سوَب چے اَنت؟
2۔ مردم نشہ پرچا کنت؟
3۔ بھا کنوک سرپد اِنت کہ نشہ تاوانبار اِنت، پد ءَ ھم بھا کنت، چوش پرچا؟

بیا اِت اوّلی جُست ءِ پسّہ ءَ درگیج ایں۔

1۔ نشہ ءِ سوَب چے اَنت؟

چاگرد ءِ تہ ءَ ھرچ ھرابی یے کہ ودی بیت آ دْرستانی یک ناں یک سوَبے الّم بیت۔ چوناھا نشہ ءِ سوَب وَ باز اَنت بلے من اد ءَ بُنیادی سوَبانی سر ءَ گپ جنگ لوٹ آں۔

نشہ ءِ سوَب نا اُمیتی، پریشانی، سرگنوکی (Depression)، دگہ انچیں چیزانی نہ بوّگ کہ چمود ءَ مردم وشّی زُرت بہ کنت پہ درور لیب جاہ۔۔۔ چریشاں ابید دگہ چاگردی جیڑہ ھم سوَب بوت کن اَنت۔

نشہ گیشتر ھما مردم کنت کہ آ چہ چاگرد ءِ مردماں یا چہ وت ءَ دور تچگ لوٹ ایت، بزاں انچیں کارے پہ وت کنگ لوٹ ایت کہ گوں آئی کنگ ءَ آئی ءَ تاھیر بہ رس ایت، ھمے کار ءِ کنگ ءَ اگاں آئی ءَ شریں راہ ءُ در نہ رس ایت گڑا آ نشہ کنگ بندات کنت۔

مردم نا اُمیت پرچا بیت؟ مردم پرچا سرگنوکی ءِ آماچ بیت؟

بازیں نوک ورنا بے کار ءُ بے روزگاری ءِ سوَب ءَ نا اُمیت بہ اَنت، آیانی زھن ءِ تہ ءَ زور ودّ ایت۔ آ چہ اے دْرستیں پریشانیاں تچگ لوٹ اَنت، آ پہ وت انچیں راہ ءُ درے شوھازگ ءَ لگ اَنت کہ اود ءَ آ وت ءَ تاھیر دات بہ کن اَنت بلے کسّے اگاں چوشیں راہ ءُ درے درگیتک مہ کنت تہ آئی ءِ گْور ءَ دو راہ پشت کپ ایت، یکے “وتکُشی” ءُ دومی “نشہ”۔

دگہ یک مزنیں سوَبے اے وڑ ءَ اِنت کہ اگاں یک چاگردے ءَ لیب جاہ، پارک یا دگہ انچیں جاہ کہ چمود ءَ مردم وشّی بہ زور ایت بزاں entertain بہ بیت، چوشیں جاھانی نہ بوّگ ءِ سوَب ءَ مردم نشہ ءَ entertainment یے سرپد بیت ءُ ھمیشی ءَ گیشتر ارزِشت (Value) دنت۔

ھمے بُنگپّ ءِ سر ءَ چہ کتابے (Deaths of Despair) ءَ یک پولکاری (Research) یے دیم ء‌َ کار آں۔

“نوکیں پولکاری ءِ پد ءَ امریکہ ءِ تہ ءَ مردم چہ دْرستاں گیش نا اُمیتی ءِ سوَب ءَ مِر ایت ءُ چہ نا اُمیت بوّگ ءِ سوَب ءَ مرگ گوں سے چیزاں بندوک اِنت:

1۔ وتکُشی
2۔ نشہ ءِ باز کارمرزی،
3۔ باز شراب نوشگ ءِ سوَب ءَ جگر ءِ نادْراھی

پولکاری ءِ تہ ءَ دگہ گپے ھم دیم ءَ آتکگ کہ چہ دْرستاں گیش نا اُمیتی ءِ آماچ اسپیت پوست کم وانندگیں امریکائی اَنت ھما کہ چہ اسکول ءَ دیم ونت نہ کن اَنت، ھمے سوَب ءَ تکنیکی ءُ گوں سَنَد ءَ رسوکیں کار آیاں نہ رس ایت یا کہ گوں نوکیں ٹیکنولوجی ءِ آیگ ءَ گْوستگیں بیست سالانی تہ ءَ آ بے روزگار بیتگ اَنت۔
چہ ھمے سوَب ءَ مْیانی اُمر ءِ اسپیت پوستیں امریکائی وتی کَھول (Family) ءِ ھمراھداری ءَ کُرت نہ کن انت ءُ کَھولی راھبند (Domestic System) پْروشت ءُ پْروش ءِ آماچ بوّگ ءِ سوَب ءَ نا اُمیتی ءَ ارزِشت رس ایت، پہ ایشاں امریکن ھیلت سسٹم (Amrican Health System) باز گْران اِنت ءُ کارپوریٹ لابیئنگ (Corporate Lobbying) ءِ سوَب ءَ نا اُمیتیں تَبک ءَ ارزانیں جانسلامتی (Health) ءِ آسراتیاں نہ دنت۔
چہ پیچیدگیں انڈسٹریلائیزیشن ءِ سوَب ءَ کم وانندگیں تَبک چہ گْونڈیں کاراں زِبھر بیتگ۔

بہ گندئے دومی جست ءِ پسّہ ھم اوّلی جُست ءِ پسّہ ءِ تہ ءَ مان اِنت۔

نوں سیمی جست ءِ نیمگ ءَ رو ایں:

بھا کنوک سرپد اِنت کہ نشہ تاوانبار اِنت پد ءَ ھم بھا کنت، چوش پرچا؟

زوروک ءِ سوَب من بُرز ءَ درشان کُتگ اَنت کہ آ پرچا نشہ ءِ نیمگ ءَ روت، نی جُست ایش اِنت کہ آ کجام سوَب اَنت، مردم ءَ مجبور کن اَنت ءُ نشہ بھا کنگ یا کہ دگہ ھرابیں کار کنگ ءَ پرما اَنت؟

نشہ بھا کنگ، دُزّی کنگ ءُ دگہ ھرابیں کارانی کنگ ءِ مستریں سوَب بے روزگاری اِنت، اگاں مردمے داں مُدّتے ءَ بے روزگار بہ بیت، پہ روزگار ءَ تچ ءُ تاگ بہ کنت، اگاں آئی ءَ روزگار مہ رس ایت گُڈسر ءَ الّم بیزار بیت، پہ آئی ءَ دْرستیں راہ ءُ در بند بہ اَنت، آ دُزّی کنگ ءَ لگ ایت، ھمے راہ ءَ آ نشہ ءِ کاروبار نیمگ ءَ ھم شُت کنت ءُ دگہ ھرابیں کار ھم کُرت کنت۔

من ھمے سرپد باں کہ اگاں اے وڑیں جیڑہ گیشّینگ مہ بنت تہ مُلک وتی جاہ ءَ یک کسانُکیں چاگردے ھم دیمروی کُرت نہ کنت۔
ما باید ھرچ پِڑ ءَ یکجاہ ءُ ھَمپت بہ بہ این ءُ اے سِسٹم ءِ بگیری (Against) ءَ پاد بیا ایں، وت ماں وتی جنگاں وت ءَ را زوال مہ کن این ءُ وتی دژمن ءَ پجّا بیار ایں۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: اے کسانیں سنگت کے اِنت

نبشتہ کار :کامریڈ سرباز

دی بلوچستان پوسٹ

یکروچے ما گوں سنگتاں رپتیں دیم پہ سپرے ءَ کہ دیم ءِ ساربان ءِ پاسبان ءَ مارا وتی هند ءَ داوت داتگ اَت ما روچ ءَ همود ءَ روگی اِت ایں گڑا ما جنزان بوتیں سهب ءِ یازده ءُ چیز ے اَت من ءُ میرو کندگ مسکرا کناں پرپٹ ءِ سر ءَ ما جنزان اِت ایں کہ استاد ءَ پون کرت گڑا دامگ نزور اَت من پرپٹ سیڈ ءَ اوشتارینت ءُ کوهے ءِ سر ءَ شُتاں کہ گپ کناں گڑا من پون جت –

هاں استاد؟ کمو سپر ءَ بوتگاں پمیشکا دامگ ساپ ساپ نہ اِنت باریں شما هال کن اِت سنگت وش اَنت-

استاد جی کامریڈ ما درست وش جوڑ ایں شما هال کن اِت کجا اِت بیا اِت مرچی نوکیں سنگتے اتکگ دیم ءِ پاسبان ءَ مارا لوٹ اتگے گڑا ما کا ایں شما جنزان بہ بہ ات بلے سمبال کن اِت داں پیشنے نماز ءَ وت ءَ بہ رسین اِت جی بس من کایان استاد دلجم بو انشاءالله –

گڑا من پون کٹ کرت ءُ اتکاں من ءُ میرو اِت ایں میرو ءَ جست کرت یار مرچی کے اِنت نوکیں سنگت باریں استاد ءَ مارا لوٹ اِتگ ؟

من گشت یار من زانت نہ کن آں بوت کنت استاد ءِ دوستیں مردمے بیت الم ، گڑا بیا رویں دیم ءَ بازارے گندگ بوگ ءَ اِنت پرپٹ ءَ تیل مان کنیں گڑا رویں وهد هم کم اِنت –

گڑا ما رپتیں دیم پہ میتگ ءَ دکانے ءَ اتک ایں سگریٹ زرت ءُ تیل مان کرت دکان والا ءَ گشت نان ءِ وهد انت میرو ءَ گشت برات تئی منتوار ما اِنشاء الله دگہ وهدے تئی نان ءَ وریں مرچی مارا روگی اِنت-

گڑا دکان والا ما موکل دات ءُ رپت ایں دیم پہ بُرز ءَ داں استاد گوں سنگتاں اتک دو سنگت انت استاد ءِ پرپٹ ءَ کسانیں سنگتے نشتگ اَت من اول گشت بوت کنت اُستاد ءِ چک اِنت یا الاکہی مردمے بلے کمو هیران بوتاں گڑا من ایر اتکاں استاد وش اتک کرت گلائیش بوت ایں سنگت درست وش اتک کت اَنت گڑا استاد ءَ اِد ءَ هچ نہ گوشت میرو برداشت کنگ ءَ نہ اَت یکوی منی جان ءَ برے کیکلی کنت کندگ ءَ انت گوش ایت سربو یار اے کسانیں سنگت کے بوت کنت ؟

من سیاه دل اِت آں میرو ءِ جستاں چہ بلے من کند اِت هچ نہ گشت داں استاد ءَ دیم ءِ کاروان ءَ داوت داتگ همود ءَ سر بوت ایں-

آ سنگت ما وش اتک کت اَنت جوڑی ڈَڈّی ءَ پد، گڑا آپ تام بوت همے کسانیں سنگت ءَ استاد یکوی جست ءُ پرس کت برے چیزے ءِ درگت ءَ من هیران اِت آں اے کہ اِنت گڑا میرو برداشت نہ کرت ؟
میرو استاد اے کسانیں سنگت کے اِنت ؟

استاد اے کسان سالیں سنا جان اِنت جوانیں سنگتے مرچی من وتی کر ءَ آؤرتگ کمو سرپدی دیان ئِے من هیران بوتاں اے امر ءَ سنگت ءِ جهد ءَ دیست انچو میرو گلائیش کت سنگت سنا جان یکوی کندگ مزاک کنگ ءَ ات گوں ما انچو لگ ات مرچی استاد سک وشان ات پرچا کہ استاد ءَ چک وتی سک یاد آیگ ءَ اَت کہ شش سال ات استاد ءِ چک بیگواه اَت استاد ءَ یکوی گوشت اے سنا جان منی چک انت انچوش بہ سمج سرباز جان من تئی میار ئِے کناں داں منزل ءَ سر بہ کن ئِے –

من گوشت استاد دلجم بو انشاء الله من ءَ ساه داں مان سنا منی میار انت –

ورگ سنگتاں آورت انت ما درستاں ورگ وارت گپ مجلس بوت داں هدے ما نشتیں گڑا استاد گوش ایت انچو سنگت ءِ یکجاهی شر نہ اِنت کاروان ءَ موکل دے اِت داں شپ ءَ سنا جان ءَ تو منزل ءَ رسین پد ءَ واتر وتی هند ءَ برو
جی شر –

گڑا کمو سردی ءِ موسم اَت گْوریچ کشگ ءَ اَت گوهر اَت سنا سک لاگر ات کمزور ات گوش ایت سنگت من ءَ سرد کنگ ءَ انت من نیام جین ءَ بہ آں میرو پشت ءَ بیت بِلّے من گشت شر انت میرو هاهاها وت من ءَ سیاه دل کتگ انچو پاچگ هاهاها
گڑا ما رپتیں داں منزل ءَ سناءِ دیدار اولی رند ءَ بوت هما روچ ءَ سک مهروانیں سنگتے اَت –

بلے کمیں وهد ءَ رند سناء ءِ نمیرانی ءِ ھال سر بیت، ما پھر بنداں کہ ما ورناھیں سنگت شھید سنا ما دستگ اَت ءُ آئی جھد ءَ گوں ایمانداری ھم دستگ اَت۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

بلوچستان ءِ بنجاھی شھر شال ءَ بیتگیں بمب تراک ءَ ھپت مردم زدگ بیتگ اَنت –

سر بیتگیں ھالانی رد ءَ اسمنگلی دگ ءَ کار بیوکیں پُھل ءِ سر ءَ کار کنوکیں پوریاگر نشانگ کنگ بیتگ اَنت کہ چریشی ءَ پنچ پوریاگراں ھوار ھپت مردم زدگ بیتگ اَنت –

پولیس ءِ رد ءَ پرپٹ سواریں ناشناساں دزبمب اُرشے کرتگ ءُ تتکگ اَنت -وھدےکہ زدگ بیتگیں مردم نادراہ جاہ ءَ برگ بیتگ اَنت –

پولیس ءَ دیمتر ءَ گوشت کہ دمگ ءِ راہ ءُ در بستگ اَنت بلے تنی وھدی دگہ دزگیریانی ھال نہ بیتگ اَنت –

تراک ءَ پد دمگ ءَ ترس ءُ بیم ودی بیتگ اَنت ءُ تنی وھدی ھچ گل ءَ اُرش ءِ زمہ واری نہ منّ اتگ –

دی بلوچستان پوسٹ

بلوچستان ءِ دمگ پنجگور ءَ پاکستانی پوج ءِ آپریشن بندات کرتگ، آپریشن ءِ میان ءَ پاکستانی پوج ءَ سَے مردم آوار جتگ ءُ چیریں جاھاں بُرتگ اَنت –

اھوالکار ءِ رِد ءَ پنجگور دمگ گچک بگر داں جوری ءُ کنڈگ پاکستانی پوج ءِ انگیر ءَ اَنت ءُ اے آپریشن ءَ پاکستانی پوج مزنیں کساسے ءَ بھر زرتگ آپریشن بندات کُرتگ وھدے کہ پاکستانی پوج ءَ بالگردانی کمک ھم گون اَنت –

اے آپریشن ءَ سَے شوانگ ءِ ھم آوار جنی ءِ ھال انت کہ آھانی تہ ءَ دو مردمانی پجار اللہ داد ءُ شاہ مراد ءِ ناماں بوتگ انت وھدےکہ سیمی مردم پجار دنیگت ءَ نہ بوتگ کہ پاکستانی پوج ءَ آوار جتگ ءُ بندیگ کرتگ انت –

زانگ بہ بیت گچک ءُ چپ چاگردی دمگاں چہ ماہ ءِ اگست ءَ پاکستانی پوج ءِ آپریشن برجاہ انت کہ تنی وھدی پنجاہ ءَ گیش مردم آوار جنی ءَ پد بیگواہ کنگ بوتگ کہ آھانی تہ ءَ چُک ءُ جنین ھم ھوار انت کہ آھانی تہ ءَ لھتے مردم یلا کنگ بوتگ ءُ وھدے کہ بازیں گار اَنت-

دی بلوچستان پوسٹ

سر بیتگیں ھالانی رد ءَ روکپتی بلوچستان ءَ ایرانی پوج ءَ تیل باپاری جاھانی سر ءَ بیڑ برتگ ءُ مردم لَٹ ءُ کُٹ کرتگ اَنت –

اھوالکار ءِ رد ءَ دَہ اکتوبر ءِ روچ ءَ ایرانی پوج ءَ بلوچستان ءِ دمگ سوران ءَ تیل باپاری جاھانی سر ءَ بیڑ برتگ ءُ تیل باپاری کنوک لَٹ ءُ کُٹ کرتگ اَنت –

اھوالکار ءِ گوشگ اِنت کہ ایرانی پوج ءَ گوشتگ کہ تیل باپاری مہ کن اِت ءُ اے ڈیھ ءِ کانودانی رد ءَ رد اِنت –

دومی نیمگ ءَ باپاری مردمانی گوشگ اِنت مئے یکیں لاپ والینگ راہ ءُ در تیل باپاری اِنت اشی ءَ ابید مئے گور ءَ کار ءُ روزگار نیست کہ ما وتی زھگانی شد ءَ تیلانک دات کُت بہ کن ایں –

زانگ بہ بیت روکپتی ءُ رودراتکی بلوچستان ءِ سیمسری ھنداں ھردوکیں نیمگاں تیل باپاری کرناں چہ بوگ ءَ اِنت ءُ اے سیمسری ھند ءُ دمگاں بازیں مردمے ایرانی ءُ پاکستانی پوج ءِ تیرانی آماچ بیتگ اَنت –

سر بیتگیں ھالانی رد ءَ روکپتی بلوچستان ءِ بنجاھی شھر دزاپ “زاھدان ” ءَ یک ملایے ایرانی اطلاعات ءَ دزگیر کرتگ ءُ گوں وت برتگ –

دی بلوچستان پوسٹ

دزگیر کنگ بیتگیں ملا ءِ پجار مھمد قاسم قاسمی ءِ نام ءَ زانگ بیتگ –

اھوالکار ءِ رد ءَ مفتی مھمد قاسم قاسمی دَہ اکتوبر ءَ ایرانی اطلاعات ءَ دزگیر کرتگ ءُ گون برتگ –

اھوالکار ءِ رد ءَ ایرانی اطلاعات ءَ بنداتی ءَ مفتی مھمد قاسم قاسمی جست ءُ پرس ءِ واستا برتگ بلے تنی وھدی آئی ءِ ھال نیست –

مفتی مھمد قاسم قاسمی دزاپ ءَ دارالافتای دارالعلوم ءِ سروک اِنت –

اھوالکار ءِ رد ءَ ایرانی اطلاعات ءِ گوشگ اِنت کہ مفتی مھمد قاسم قاسمی ءَ روکپتی بلوچستان ءَ ایرانی لشکر ءِ دست ءَ آوار جنگ ءُ زندانی بندگ ءِ ھلاپ ءَ توار چِست کرتگ پرے ھاتر ءَ آ دزگیر کنگ بیتگ –

اھوالکار ءِ رد ءَ مولانا کوھی ءِ دزگیری ءُ زندانی بندگ ءِ ھلاپ ءَ نیکراھی مردمانی زھر ءِ درشان برجاہ اَنت ءُ آیاں یکشل ءَ گوشگ ءَ اَنت کہ مولانا کوھی ءِ سر ءَ زوریں زندان بندگ بیتگ اَنت –

بلوچستان ءِ دمگ کیچ ءِ بنجاھی شھر تربت ءَ حنیف چمروک ءِ کوش ءِ ھلاپ ءَ شھید فدا چار راہ ءَ زھرشانی کنوکانی بازیں کچے مُچ بیتگ ءُ زھرشانی اِش کرتگ۔

دی بلوچستان پوسٹ

حنیف چمروک یک دمگی ازمکار ءُ نامی ئیں انسانی ھکانی باسک طیبہ بلوچ ءِ پِت اِنت۔

دمگی مردمانی رد ءَ طیبہ ءِ پُرکاریانی سوب ءَ آئی ءِ پِت بازیں وھداں بیھار دیگ بیتگ۔

مروچی بیتگیں زھرشانی ءَ زھرشانی کنوکانی دست ءَ نبشتگیں پلے کارڈ بیتگ کہ آیانی سر ءَ حنیف چمروک ءِ کوش ءَ ھواریں کوشکارانی دزگیری ءِ نبشتگ بیتگ اَنت۔

زھرشانی ءَ سیول سوسائٹی تربت ھنکین ءِ کنونیئر گلزار دوست، بی ایس او، ءُ پی ایج پی عوامی ءِ رھشوناں دزبندی کرتگ ءُ گوشتگ کہ پولیس یک ھپتگے ءِ تہ ءَ حنیف چمروک ءِ کشندھاں دزگیر بہ کنت۔

آیاں دیمتر ءَ گوشتگ کہ اگاں کشندہ دزگیر نہ بیت اَنت گڑا زھرشانی درچ دراج کش کنگ بنت۔

زھرشانی کنوکاں گوشت کہ پھزدار بے وس بیتگ اَنت مردم توپک ءِ چیر ءَ ترس ءُ لرز وتی زندگی ءَ گوازینگ ءَ اَنت۔

زھرشانی ءَ ھواریں جتائیں تکاں بندوکیں مردماں حنیف چمروک ءِ کوش ءِ ھلاپ ءَ زھر درشان اِتگ ءُ گوشتگ کہ ریاستی ادارھانی نیمگ ءَ اے وڑیں ترس ودینگ بیگ ءَ اَنت دانکہ مردم بے تواری ءَ بہ ننداَنت۔

آیاں گوشت کہ نِی مردمانی زانت گیش بیتگ اَنت ءُ زانگ ءَ اَنت کَے بلوچانی دلبند ءَ تیراں جنگ ءَ اَنت۔

زانگ بہ بیت بلوچستان ءِ دمگ کیچ ءِ بنجاھی شھر تربت ڈنک ءِ وئیل ءَ پد اے وڑیں وئیل بیگ ءَ اَنت ءُ وھدےکہ دمگی مردمانی رد ءَ اے وڑیں وئیلاں سرکاری ادارھانی چیردستی ءَ جوڑ کرتگیں سلاہ بندیں مردماں کنگ ءَ اَنت۔