TBP Balochi

دی بلوچستان پوسٹ

بلوچستان ءِ دمگ پنجگور، کیچ ءُ شال ءَ جتا جتائیں دگ وئیلاں چار مردم بیران ءُ یکے زدگ بوتگ-

اھوالکار رِد ءَ پنجگور دمگ سرسانڈ بُرزگ ءَ سی پیک دگ ءِ سر ءَ تیز رؤکیں زامیاد گاڑی ءَ پرپٹ سواریں دو مردم ڈیکر جتگ اَنت ڈیکر جنگ ءِ سوب ءَ دو مردم بیران بوتگ –
بیران بوتگیں مردمانی پجار عید محمد ء سبزل ءُ اکرم ء صدیق ءِ نام ءَ چہ بوتگ اَنت۔ دوئیں مردم راھی نگور ءِ نندوک اَنت۔ وھدیکہ گاڑی ڈرائیور ءَ وتی گاڑی یلا داتگ ءُ تتکگ پولیس ءَ گاڑی دستیگ کُرتگ-

دومی وئیل کیچ ءِ دمگ کلاتک ءَ دیم ءَ اتکگ کہ گاڑی ءِ چپی بوگے سوب ءَ ڈرائیور بیران بوتگ-

بیران بوتگیں گاڑی ڈرائیور ءِ پجار سعید احمد ء عبدالمالک جھمنند میر آباد تمپ ءِ نام  ءَ بوتگ- آئی کھول ءِ مردماں لاش دست گپتگ ءُ پہ کل ءُ کسارت کنگ ءَ تمپ ءَ بُرتگ-

ھمے وڑ شال گرداپ ءَ پیکپ گاڑی ءَ گوں ٹرکے ءَ ڈیک وارتگ- ڈیک ورگے سوب ءَ یک مردمے بیران ءُ یکے زدگ بوتگ – اے وئیل ءَ عرفان ء حاجی بشیر جاھمنند کادر آباد بیران بوتگ وھدیکہ شیر علی ء سیف اللہ زدگ بوتگ-

دی بلوچستان پوسٹ

بلوچستان ءِ دمگ نوشکی ءَ ناشناسیں سلاہ بندیں مردمانی تیرگواری ءَ پاکستانی پوج ءِ دو کارمند ھما دمان ءَ مُرتگ ءُ وھدیکے راھگیرے ٹپی بوتگ –
اھوالکار ءِ رِد ءَ تیرگواری وئیل نوشکی بازار انام بوستان ءَ دگ ءِ سر ءَ بوتگ کہ سلاہ بنداں دو پوجی کارمندانی سر تیرگواری کرتگ ءُ کُشتگ انت – دوئیں کارمندانی پجار اصغر ءُ شاھد ءِ نام ءَ بوتگ انت –

تیرگواری ءِ وئیل ءَ راھگیر مراد شاہ ھم ٹپی بوتگ –
دومی نیمگ ءَ بلوچستان ءِ آجوئیں لوٹوکیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ اے دؤئیں کارمندانی کوش ءِ زمّہ واری منّ اِتگ گوشتگ کہ مئے سرمچاراں نوشکی ءَ گوستگیں روچ ءَ پنچ شمبے ءَ پاکستانی پوج ءِ دو کارمندانی سر ءَ تیرگواری کرتگ ءُ کشتگ انت-

جارکش ءَ وتی درشان ءِ تہ ءَ گوشتگ کہ بلوچ سرمچاراں نوشکی ءِ بازار انام بوستان ءَ دگ ءِ سر ءَ پاکستانی چیریں ادارھانی کارمندانی سر ءَ اُرش کُتگ ، اُرش ءَ پاکستانی چیریں ادارھانی کارمند اصغر ءُ شاھد کُشتگ انت –
جارکش جئیند بلوچ ءَ دیمتر ءَ گوشتگ کہ بلوچ لبریشن آرمی نوشکی ءِ تہ ءَ دژمن ءِ گشگ ءِ پد ءَ بلوچ راج ءُ بلوچ راجی زرمبشت ءِ بگیری ءَ کارکنوکیں لھتے مردماں اے بیھار داتگ اَنت کہ بی ایل اے اے وڑیں درسیں مردمانی سیاہ کاری سرپد بئیں کہ دژمن ءِ گوشگ ءِ پد ءَ نوشکی ءُ چپ ءُ چاگرداں بلوچاں وت ماں وت میڑینگ ءُ نزور کنگے سازش ءَ کنگ انت – اے مردم ھمے دمگانی تہ ءَ بلوچ راج ءَ تنگ کنگ، ملام گرگ، آھانی مال ءُ ملکتانی سر ءَ زوگر کنگ ءُ آجوئی ءِ زرمبشت ءِ بگیری ءَ تچکی ءَ کار کنگ ءَ ھوار انت – اگاں اے راج دژمن وتی کتکاریاں چہ پدکنز نہ بوتاں گڑا دژمن ءِ اے درسیں دمگی کارندہ زوت نشانگ کنگ بنت –

گڈسر ءَ جارکش ءَ گوشتگ کہ بلوچ لبریشن آرمی اے کول ءَ کنت کہ بلوچستان ءِ آجوئی ءَ تاں زور گیریں پاکستان ءِ پوج ءُ آئی ءِ دمگی کارندھانی سر ءَ اُرش ءَ برجاہ داریت –

دی بلوچستان پوسٹ

سربوتگیں ھالانی رِد ءَ گوستگیں روچ ءَ ناشناسیں سلاہ بندیں مردماں روکپتی ءُ رودرآتکی بلوچستان ءِ سیمسری دمگ اَبدوئی ءَ پاکستانی پوج ءُ ایف ڈبلیو او ءِ کارمندانی سر ءَ اُرش کتگ – اُرش ءِ آسر ءَ ایف ڈبلیو او ءِ کاردار ءُ آھانی پھازگی پوج ءَ جانی تاوان رس اِتگ ءُ سلاہ بندیں مردم جنگجاہ ءَ دراتکگ ءُ شتگ اَنت –

دومی نیمگ ءَ بلوچستان ءِ آجوئی ءِ منوگریں گل بلوچ لبریشن ٹائیگرز ءِ جارکش میران بلوچ ءَ اے اُرش ءِ زمہ واری منّ اِتگ ءُ گوشتگ کہ مئے سرمچاراں گوستگیں روچ ءَ بلوچستان ءِ دمگ تمپ اَبدوئی ءِ نزیک ءَ زئی بند ءَ سیمسرانی سر ءَ ٹٹ جنوکیں ایف ڈبلیو او ءِ کاردار ءُ آھانی پھازگی پوجی کارمندانی سر ءَ راکٹ ءُ وتکاریں سلاھاں گوں اُرش کتگ –
جارکش ءَ گوشتگ کہ اُرش ءِ آسر ءَ ایف ڈبلیو او ءِ چار کاردار مرُتگ ءُ بازینے زدگ بوتگ –

گڈسر ءَ جارکش ءَ وتی درشان ءِ تہ ءَ گوشتگ کہ گل ءِ اُرش بلوچ ڈیھے آجوئی ءَ تاں برجاہ مان انت –

شیر: ترا شمُشت باں چتور

شائر: هسابجار

دی بلوچستان پوسٹ

اوہے مریمیں نواز گوں زبیدُک ءَ وتی
یا سرفراز ءُ لانگو
یا مری ءُ مینگلانی اختر ءُ گزین ،
هرکجا کہ کار کننت چم منی
داں چاگی انت بُن انت، ءُ ڈاڈر انت ءُ کوہلو منی
کمال ءُ مینا یے دگر گوں نوکیں تام ءُ لزتاں چو زمین ترکیں پشتلینک ءُ هشتری کوکنٹیگ
منی زمین چو سنٹ نہ انت ، پہ پلاریاں دزموش بباں
گیروشگ ءُ وت شموش بباں
منارا هستیں مَہرو ے چو ماه ءِ رنگ ءَ درپش دنت چو هوناں ششتگیں زرے کہ بام ءِ دروشم ءَ بلیت
منارا هستیں مِهلب ءُ یک هورلے کہ درین ءُ آسمی ءِ چهرگ انت
تو ستر هنر بکن !
دست ءُ پاد بجن ءُ چو جامک ءُ مالک ءَ دلُکی بکن
ترارا هرکس سرپدیں کہ هون ءِ بو کن ئے
هون منی مادر ءُ گهار ءُ آریپیں پت ءِ تئی سر انت
منی زمین تو زتگ
ترارا هچ پهل کت نباں
ترارا هچ شمشت من نباں تو ستر وتا کیموپلاج بکن منی گوارچ انگت ءَ سلامت اِنت
منی دام چیر پہ ترا مدام
کجا تچ ئے ؟
داں کدین ءَ چیر بئے ماں دوچی ئیں گُد ءُ منی پاگ ءُ پڑکہاں
تو وتا وت نشان کتگ ماں توتک ءَ ءُ مِیہی ءِ کوه دامن ءَ منی
من ترا شمُشت نباں
من ترا شمشت نباں تو وتا ستر چیر دئے ءُ ٹپاں پاپُلی بکن
الم ءَ ترا گراں ماں رپک ءُ گوچلیانی کُنجے ءَ

دی بلوچستان پوسٹ

سربوتگیں ھالانی رِد ءَ گوستگیں شپ ءَ ناشناسیں مردماں بلوچستان ءِ دمگ بلیدہ گلی کوچگ ءَ ھستیں زَری وانگ جاہ “ساچ پبلک اسکول” مانداشتگ –
دمگی مردمانی رِد ءَ ساچ وانگ جاہ ءِ کوٹی نہ بوگ ءِ سوب ءَ زانت ءُ زانشت ءِ پُرکاری ءَ کُڈکانی تہ ءَ برجاہ بوتگ-

بلے گوستگیں شپ ءَ ناشناسیں زانت دژمناں دار ءُ پیش ءَ جوڑ بوتگیں وانگجاہ مانداشتگ ءُ تتکگ انت –

زانگ بہ بیت کہ بلیدہ ءُ زامران بلوچستان ءِ وانگجاہ ءِ نہ بؤکیں دمگانی تہ ءَ ھوار بنت کہ اود ءَ چہ سرکار ءِ نیمگ ءَ زانت ءُ زانشت ءِ ادارھاں ھچ وڑیں کمک دیگ نبیت –

بلے بلیدہ ءُ زامران دمگی مردماں وتی کمک وت وانگجاھانی رژناہ کنگ ءِ گامگیج زرتگ –

یات بہ بیت چد ءُ پیش کیچ ءُ پنجگور ءَ ھم زری وانگجاھانی سوچگے وئیل دیم ءَ اتکگ انت کہ آھانی سوچگ ءِ زمہ واری ناشرکاریں نیکراھی ناشرکارانی سر ءَ لڈگ بوتگ اَنت –

سر بیتگیں ھالانی رد ءَ بلوچستان ءِ جتا جتائیں ھند ءُ دمگاں پاکستانی پوج ءِ لشکر کشی برجاہ اَنت، کلبر، کولواہ ءُ گچک ءَ لشکر کشی ءَ پد مروچی بلیدہ ءُ پنجگور ءِ ھنداں لشکر کشی برجاہ اَنت –

دی بلوچستان پوسٹ

گیشیں ھالانی رد ءَ بلیدہ ءِ جتا جتائیں جاہ جاڑین، کولکان ءَ کَش ءُ گوری دمگاں پاکستانہ پوج پُتریتگ – انگیر کرتگیں دمگ ءَ تنی وھدی جانی ءُ مالی تاوانانی ھال سر نہ بوتگ اَنت –

ھمے وڑ ءَ پنجگور ءِ دمگ گوارگو ءِ جتائیں ھنداں مروچی سھب ءَ پوج ءَ لشکر کشی بندات کرتگ کہ اود ءَ اسپیت پوشیں سلاہ بند ھم پوج ءِ ھمراہ بیگ ءَ گندگ بیتگ اَنت –

دمگی مردمانی رد ءَ لشکر کشی ءَ بمبگواریں بالگرد ھم بھر زورگ ءَ اَنت بلے دمگ ءِ راہ ءُ درانی بندگ ءِ سوب ءَ تاوانانی ھال سر نہ بیتگ اَنت –

سرکاری بنشونانی رد ءَ ھم تنی وھدی اے دمگانی سر ءَ لشکر کشیانی ھال شنگ کنگ نہ بیتگ اَنت –

دی بلوچستان پوسٹ

بلوچ سلاہ بندیں آجوئی لوٹوکیں گل یونائیٹڈ بلوچ آرمی ءِ جارکش مزار بلوچ ءَ رسانکدراں وتی شنگ کرتگیں درشان ءِ تھا گوشتگ کہ مئے سرمچاراں بیست ءُ چار اکتوبر ءَ زامران ءِ دمگ نرم ءَ تر ءُ تاب ءِ میان ءَ ایف سی بُنجل ءِ نزیک ءَ زورگریں پاکستانی پوج ءِ جھلی ادارہ فرنٹئیر کور ورکس ءِ کارمند ءِ دزگیر کرتگ جست پُرس ءِ ھاتر ءَ گوں وت بُرتگ – دشمن پوج ءِ جھلی ادارہ ءِ کارمند بلوچستان ءَ دو بھراں بھر کنوکیں “گولڈ سمڈ لائن” سر ءَ کار کنگے جرم ءَ دزگیر کرتگ –

جارکش ءَ گوشتگ کہ زورگریں پوج ءِ کارمند کتکار طارق ء اشفاق جاھمنند بہاولپور پنجاپ ءِ کتکاری دیم ءَ ایر کرتگ چار بچار ءَ پد گوستگیں روچ ءَ زامران آرچنان کور ءِ دمگ ءَ آئی ءَ وتی کتکاریانی دپ ءِ وت منّگ ءَ پد مروچی بزاں بیست ھشت اکتوبر ءَ آ مرگ ءِ سزا دئیگ بوتگ –

گڈسر ءَ جارکش مزار بلوچ ءَ گوشتگ کہ ما ھر ھما گام ءِ ھلاپ ءَ گوں ترندی ءَ جنگ کنیں کہ بلوچ راج ءُ بلوچستان ءِ بگیر ءَ انت۔

دی بلوچستان پوسٹ

روکپتی بلوچستان ءِ دمگ ھامون ءَ یک گاڑی ءِ کَلٹی بیتگ، کہ چریشی ءَ پنچ مردم زدگ بیتگ اَنت –

اھوالکار ءِ رد ءَ ھامون ءِ ھند نسر آباد ءُ دزاپ ءِ دگ ءَ رامشار ءِ ھند ءَ یک گاڑی ءِ دگ ءِ وئیل ءِ آماچ بیتگ کہ چریشی ءَ پنچ مردم زدگ بیتگ اَنت –

دمگ ءِ پھزداراں ھال رسگ ءَ پد وت ءَ وئیل ءَ رسنینتگ ءُ زدگ بیتگیں مردم چِست کنگ ءُ نسر آباد ءَ امیر المومنین نادراہ جاہ ءَ سر کنگ بیتگ اَنت –

ھمے وڑ ءَ گوستگیں روچ ءَ ھم یک دگ وئیلے ءَ ھشت مردم زدگ بیتگ اَنت –

چاگرد کاراں گوشت کہ گاڑیانی ڈرائیورانی بے دلگوشی ءُ دراج کشیں دگانی سپر ءَ اے وئیل پیش آیگ ءَ اَنت –

دی بلوچستان پوسٹ

سر بیتگیں ھالانی رد ءَ روکپتی بلوچستان ءُ رودراتکی بلوچستان ءِ سیمسری دمگ تپتان ءَ ناشناسیں مردمانی تیرگواری ءَ یاسین عالی زئی بیران بیتگ –

اھوالکار ءِ رد ءَ یاسین وتی گاڑی ءِ ھمراھی ءَ روگ ءَ بیتگ کہ کلچات ءَ سرجنگل ءَ تپتان ءِ دمگ ءَ ناشناسیں مردماں آئی ءِ سر ءَ تیرگواری کرتگ –

تیرگواری ءِ آسر ءَ آئی ءِ گاڑی چپ بیتگ ءُ یاسین عالی زئی بیران بیتگ –

اھوالکار ءَ گوشت کہ دمگی چاگردی مردمانی گوشگ اِنت کہ روکپتی بلوچستان ءِ بازیں ھند ءُ دمگاں کُشت ءُ ھون گیش بیتگ اَنت –

آیاں گوشت کہ کُشت ءُ ھونانی گیشتریں سوب ایرانی پوج ءِ نیمگ ءَ لس مردماں داتگیں سِلاہ اَنت کہ مردم چریشی ءَ چیریں ادارھانی نام ءَ وت ماں وت ءَ جنگ ءُ کُشت ءُ کوش کنگ ءَ اَنت –

نبشتانک: آزمانک: پدائیں

نبشتہ کار: نیاز ناز بلوچ

سپر سک دراج ات شپ سیاه تھار ات، پد ءَ پند ات ءُ زمستاں ات همک سنگت ءَ وتی کمبل ءِ هوری ءَ تیوگیں ورگی مڈی هم گون ات انت ءُ سپر جنان ات انت گوریچ هم پہ وڑے شیک شیک ءَ کشگ ءَ ات چہ سارتی ءَ تیوگیں سنگتانی هون گش ئے بند ات ءُ دست کلمپوگ جوڑ بوتگ ات انت روان روان ءَ دان شپ وتی گڈی پاس ءَ سر ات دراجیں پند ءُ گرانیں مڈیاں چہ سنگتاں سک دمبرتگ ات گڑا سلا اش کت کہ داریں ءُ دمے بالا کنیں داں سھب بہ بیت-

سارتی ءَ چہ وپسگ نہ بوت ریک هم انچو سارت ات کہ تو گش ئے چو مسلے برپ ءَ ات کس واب کپگ ءَ نہ ات بس شگل ات کندگ ات ءُ ٹھک دیوکائی ات،
همد ءَ سنگتے ءَ درائینت اڑے تماشا کت هماهاں کہ انو ماں گسانی توک ءَ گرمیں کمبلانی تلا انت ءُ وش واب انت مارا سارتی ءَ وتی پنجگاں گوں انچو پریتکگ کہ جان ھشک انت،
کش ءِ نشتگیں سنگت ءَ گون بچکندے ءَ درائینت تو سنگ ءِ مرمر لوٹ ئے ءُ سنگ ءِ مرمر ترا ماں گرمیں کمبلانی تھا نہ رس ایت پد ءَ دراھیں سنگتاں ٹھک دات-

بام ءَ داتگ ات نوں روچ ءِ کسان کسانیں شھم چہ کوهانی سر ءَ درائی کنگ ءَ ات انت چاه تیار ات کلیں سنگتاں چاه وارت ءُ چیزے سنگت گوں نان ءِ پچگ ءَ گلائیش بوت، یکے گوں ڈڈ سریں لوبیا ءِ گرادگ ءَ دلگوش ات ءُ لھتیں اے دیم ءُ آ دیم ءَ تُر وران ات آئی ءَ کسانوکیں سھتے بوت کہ واب کپتگ دان گوانکو ءَ توار کت-

هلو منی چک تو جوڑ ءُ وش ئے؟ وتی هکاں من ءَ شری سر ءَ پھل کن، باریں هال کن شما پس کشتگ اگاں نا؟آئی ءِ مات ءَ تیوگیں جست ءُ گپ یکیں گین ءَ گوں کت انت،ما شکریں اما، اما مرچی ائید-

ھو اما، ما پس کشتگ گوں پوست جنگ ءَ گلائیش ایں، بس انچو پارک بہ ایں گڑا وتی نوکیں گُد ءُ چمپلان پِر کنیں ءُ ائید ءِ اکساں گران ءُ پہ ترا روان هم دیاں-

شریں منی بچ من پہ ترا تباھگ ایر کناں پد ءَ الم بیا دست اش گر بلکیں منی دل ءَ شرتر ایر بہ کنز انت-

شریں اما!

نان ورگ ءَ پد آ پد ءَ دیم پہ وتی سپر ءَ رھادگ گپت انت…… روان بوت انت دیم پہ وتی منزل ءِ نیمگ ءَ-

آئی ءِ مات ءَ آئی ءِ تباهگانی بهر اسپیتین پلاسٹکے ءَ کتگ ات انت ءُ کل ءِ دیم ءَ دراتکگ ات انت ءُ وداریگ ات کہ کد منی مھرانی چراگ کیت ءُ بارت اش-

بلے پنچ ماه گوستگ ات کہ آ انگت وتی تباهگانی رند ءَ نیاتکگ ات تباهگ انگت ءَ کل ءِ دیم ءَ اسپیتیں پلاسٹک ءِ توک ءَ ات انت ءُ کل ءِ تیر ءَ گون درتکگ ات انت-

مرچی روچ ءِ ٹک ءَ گوں تیوگیں میتگ ءَ گڑ ءُ منج ات هرکسی وٹسپانی پروپائل مٹ بوان ات انت همک گس ءَ ءُ همک مرد ءِ دپ ءَ بس همے یکیں گپ ات مرچی همل ءِ جیئند ءِ کسہ دوبر نوک بوت-

آئی ءِ مات انگت ماں کل ءَ نشتگ ات ءُ وتی بچ ءِ وداریگ ات، آ پاد اتک ٹی وی ءِ بٹن ءِ جت تاں بلاھیں ھیسکارگے جت ئِے ءُ بے هوش بوت-

آ اسپیتیں پلاسٹک انگت کل ءِ دیم ءَ درتکگ ات گوات کشگ ءَ ات ءُ آ چیک ورگ ءَ ات-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔