TBP Balochi

دی بلوچستان پوسٹ

پنچ سالی ئیں فریال شمبے ءِ روچ ءَ ملتان ءَ ساہ داتگ اَنت، فریال گوستگیں روچ ءَ بلوچستان ءِ دمگ کوھلو ءَ سلنڈر تراکے ءَ ترند زدگ بیتگ اَنت، گیس سلنڈر تراکے ءَ بیران بیتگیں کچ شش ءَ سر بیتگ اَنت –

آدینگ ءِ روچ ءَ ملتان ءَ ھسپتال ءَ کوھلو ءَ گیس سلنڈر تراکے ءَ زدگ بیتگیں سَے چُک بیران بیتگ اَنت –

گیس سلنڈر تراک کوھلو ءِ دمگ بوھری ءَ یک آروسی دیوانے ءَ بیتگ کہ چریشی ءَ سِی ءُ یک چُکاں ھوار سِی ءُ سَے مردم زدگ بیتگ اَنت-

چریشی ءَ پیسر باز زدگ بیتگیں دو کسانوکیں جنکواں ھسپتال ءَ ساہ داتگ اَنت – سیزدہ زدگ بیتگیں سوچکانی درمان ءَ نشتر ھسپتال ملتان ءَ برگ بیتگ اَنت –

نشتر ھسپتال ءِ بنشون ءَ دو کسانوکیں جنکانی بیرانی ءِ ھال راست کرتگ اَنت – کوھلو سلنڈر تراک ءَ زدگ بیتگیں آ دگہ مردم نشتر ھسپتال ءَ برن سینٹر ءَ درمان کنگ بیگ ءَ اَنت – تراک ءَ یازدہ سوچکی انگت ءَ ھسپتال ءَ تھتیگ اَنت –

پولیس ءِ آفیسر حق نواز ءَ گوشتگ کہ اے چُک کوھلو ءِ دمگ بوھری ءَ ھالو چپس بھاکنوکے نزیک ءُ گور ءَ اوشتوک بیتگ اَنت کہ گیس سلنڈر ترک اِتگ – آئی ءَ گْوشت کہ زدگ بیتگینانی تہ ءَ چپس بھاکنوک دو ھم ھوار اِنت –

اے دردناکیں وئیل ءَ سرجمیں دمگ پرسیگ کرتگ ءُ آروس ءِ وشی پُل اِتگ اَنت –

نبشتانک: نُھ سال گوں کجام درداں گْوستگ ؟

نبشتہ کار : مھلب دین بلوچ

رجانکار: سرباز وپاؔ

” دین ” بزاں منی پِت دین مھمد بلوچ ، اے ھما لبز اِنت کہ من اولی رند ءَ گْوشگ دربُرت ۔
من ءَ چہ آئی ءِ میراس ءَ ھمے نام ءَ اَبید دگہ ھِچّ نہ رستگ ، من وھدے پہ وتی ابّا جان ءَ جیڑاں گُڑا جیڑگانی تہ ءَ بیگواہ باں ۔ وھدے من ءَ وانگجاہ ءَ رَوگی بوتگ آ ساڑی نہ بوتگ ، وھدے من ءَ چہ آئی ءَ چیز ءِ دربرگی بوتگ ، آ ساڑی نہ بوتگ کہ من چہ آئی ءَ چیزے در بہ براں ، نہ گپّے ءُ نہ ترانگے ءِ دَیگ ءَ ساڑی بوتگ ۔

ھما اِنت کہ من ءَ یات کنت ، من ماما کدیر ءِ ھمراہ ءُ زند گْوازینگ ءَ آں ، انچوش کہ من ماما ءِ گس ءِ زھگے آں۔ ءُ آئی بُنجل ( وائس فار بلوچ مسنگ پرسن کیمپ ) مئے لوگ اِنت ، بلے اِد ءِ نشتگیں مردُم دردناکیں زندگی یے گْوازینگ ءَ اَنت ۔ برے شال ءِ شُدکشیں بُنجل ءَ ، ءُ برے کراچی ءِ شُدکشیں بُنجل ءَ توار چِست کن اَنت ، برے زھرشانی کن اَنت ، برے پریس کانپریس کن اَنت ءُ روانک کش اَنت ۔

منی ابّا جان ڈاکٹر دین مھمد بلوچ ءَ پاکستان ءِ چیریں ادارھانی مردُماں آور جت ءُ گوں وت بُرت ۔ داں لھتیں روچ ءَ ھمے گپ دائم بُوَگ ءَ اَت کہ ڈاکٹر دین مھمد بلوچ ءَ ناشناسیں مردُماں چہ نادْرھجاہ ءَ چِست کُرتگ ءُ گوں وت بُرتگ ۔ بِہ گِندئے اے گپ پہ مردُماں یک کِسّھے اَت ، بلے منی باتن ءَ یک آزگیں ٹپّے اَت ۔ اے ویل پہ مردُماں گپّے اَت ، بلے منی ارواہ ءَ تھارونکی یے ءَ مانشانتگ اَت ۔ منی ابّا ءِ مھر ءُ مُھبت کُل چہ من پچگرگ بوت اَنت ۔ انگہ منی مھرانی لوٹ سرجم نہ اِت اَنت ، زُوراکاں من ءَ چہ منی زندگی ءِ سارتیں ساھِگ ءَ جِتا کُت ۔

من پہ ھمے مھرانی مُراد ءِ گِندگ ءِ واھگ ءَ وتی ابّا جان ءِ اکس زُرت ءُ آئی ءِ پَٹ ءُ لوٹ ءَ در آتک آں ۔ شھر ءُ میتگ ، کوہ ءُ کوچگ ، دمک ءُ دراں ھر کُجا چو گنوکانی وڑ ءَ شوھاز کنگ ءَ اَت اَنت ، اناگت ءَ من گوں کماشے ءَ دُچار کپت آں کہ مردُم آئی ءَ چہ ماما کدیر ءَ زان اَنت ، آئی ءِ کِرّ ءَ یک جنکے اَت آ چو منی وڑ ءَ وتی مردمے ءِ شوھاز ءَ اَت ، آئی ءَ را مردماں پرزانہ مجید ءِ نام ءَ توار کُت ۔ آئی ءِ اے نیمگ ءُ آ نیمگ ءَ آکس ایر اَت ، مرد ءُ زالبول ، کسان ءُ مزن ، پیر ءُ ورنا ھر دابیں آکس ایر اَت ۔

من چہ ماما ءَ جُست کُت اے چونیں مردمانی اکس اَنت اِد ءَ ایر اَنت ؟
ماما ءِ پسّہ ھمے بوت ، اے ھما مردُم اَنت کہ آیاں پاکستان ءِ گلامی ءِ نہ منّگ ءِ ھاتر ءَ توار چِست کُتگ ۔ پاکستان ءَ پہ ایشانی توار ءِ دارگ ءَ اے مردماناں وتی چیریں زندانانی تہ بند کُتگ ۔ اے اکس کہ ترا گون اِنت ، اے چہ ھمے مردماں یکّے ۔

من ھمے اکساں شرّیں وڑے ءَ چارگ ءَ اَت آنت ءُ منی دل لوٹگ ءَ اَت اے اکساں دائم بچار ، من ءَ اے اکس سک تورینگ ءَ اَت اَنت ۔ من اے اکس زوران ءُ وتی دل ءَ داراں کُت اَنت ۔
بلے اے اکسانی ، ھرکسی کِسّہ جتا اَت ، ھر اکس ءِ سر ءَ جتائیں رمس نبشتہ اَت ، کسے ءِ یک سالے ، کسے ءِ دوسال ، کسے ءِ چار سال ، کسے ءِ ھَشت سال ءُ کسے ءِ دہ سال کْوھن اَت اَنت ۔

من وتی دست ءِ اکس زُرت ءُ گوں ھما اکساں ھوار ایر کُت ، منی اُمر سک کسان اَت ۔ من اے شُدکشّیں زھرشانی بُنجل ءَ نشتگ اَت آں ۔ اُود ءَ ھچ ورگ نیست اَت ، تُنّ ءُ گُژن چہ منی برداش ءَ ڈنّ اَت ۔ من کم کم ءَ ھیل کنان کُت ، اے دگ ءِ سر ءَ نِندگ ءَ گاڑیانی توار مردُم ءَ گیش تورین اِیت ۔

من وھدے بے کرار بوت آں ۔ ھمود ءَ گْوازی کُت ءُ وتی کتاب ونت اَنت ۔ وھدے من ءَ واب ءَ گِپت گُڑا من ھمے اکسانی پُشت ءَ وپت آں ۔ من ءَ یات اِنت کہ من چہ واب ءَ پاد آتک آں ، من ءَ ماما ءَ گُشت ” اھوالکار اتکگ اَنت ، تو واب بوتگ ئے من پمیشکا گُوشتگ اَنت پد ءَ بیا اِت منی مردم انگت ساڑی نہ اَنت ۔ وھدے اھوالکار اتک اَنت ، اجبیں وڑے ءَ گپ اِش کُت ، شُمئے مردُم بس ھمے یکیں زھگ اِنت ۔ مارا سر سری جُست اِش کُرت ءُ پد ءَ شُت اَنت ۔

لھتیں روچ ءَ پد مئے بُنجل ءَ منی گوں منی ھم اُمریں جنکے ءَ دیدار بوت ، من دیست باز وش بوت آں کہ اِد ءَ منی ھم اُمریں دِگہ جنک کیت ۔ آئی ءِ دست ءَ یک اکسے اَت ۔ من ایشی ءِ گندگ ءَ گوں منی ءُ آئی ءِ ھمدردی بوت ۔ من جُست کُت اے تئی دست ءِ اکس ءِ مردُم کے اِنت ؟ ۔
آ گوں دردیگیں چماں ھمے اکس ءِ چارگ ءَ لگت ءُ گُشت ئے ، اے منی ابّا جان ءِ اکس اِنت۔ ایشی نام اِنت اَلی ازگر بنگلزئی ۔ منی ودی بُوَگ ءِ دو ماہ ءَ پد پاکستان ءِ چیریں ادارھانی مردماں آوار جتگ ءُ گوں وت بُرتگ ، نُھ سال سرجم اِنت انگہ ھچ وڑیں ھالے نیست ءُ من مدام ماما ءِ بُنجل ءَ کایاں ۔

من اے گپ اِش کُت اَنت ، منی دل ءِ تہ ءَ یک ھیرانگی یے ودی بوت ءُ من تُرسگ بِنا کُت۔ منی دست ءِ اکس لرزگ ءَ لگت منی چم چہ اَرس ءَ پُر بوت اَنت ۔ دائم منی مجگ ءِ تہ ءَ ھمے گپ ودی بُوَگ ءَ اَت کہ چو مہ بیت کہ منی بابا ھمینچو وھد ءَ بیگواہ بہ بیت ۔ انچو وھد ءَ من وتی بابا ءَ اَبید چوں زندگ بوت کن آں ، چون من وتی زند ءَ دیم ءَ بُرت کن آں ۔ یک اَجبیں جُستے منی مجگ ءِ تہ ءَ بُوَگ ءَ اَت ۔
من سکّیں تُرسناکیں وڑے ءَ جُست کُت ، بلکیں منی جُست بے پائدگیں جُستے اَت ، من چو سرپد نہ اَت آں کہ ایشی دل تہ ءَ بے کساس مزن ءَ ٹپّ اِنت۔ ایشی ءِ دل ءِ اندر ءِ ٹپّ ءَ را کَد نیست ۔ من انچو سرپد نہ اَت آں ، پمیشکا کہ من دراجکشّیں ودار ءَ نہ گْوستگ اِت آں ۔ من ھمے گُشت ” تو انچو دراجکشّیں وھد ءِ ودار ءَ وتی بابا دل ءَ نہ بُرتگ ، چی ءَ کہ ترا وتی بابا ءِ دْروشم یات نہ بیت ؟ ۔

چہ جُست ءِ اِش کنگ ءَ پد جنک کمو ھاموش بوت ءُ چہ ھاموشی ءَ دیر ءَ گوں بیوسی ءُ نااُمیتی ءَ گُشت ئے ، مھلب اے ھما ٹپّ اِنت کہ ھچ دْراہ نہ بیت۔ نہ اے ٹپّ ترا ھچ بے ھال بُوَگ ءَ کل اِیت ۔ آزمان ءَ چارتے ءُ دُوا ءِ کُت ءُ گُشت ئے منی دُوا اِنت کہ انچوکیں دراجکشّیں ءُ دردناکیں ودار من دیستگ دگہ کس اے وڑیں درد مہ گندات ۔ زار زار ءَ گریوگ ءَ لگ اِت ۔ من ءَ سک بژن بوت کہ اے منی گپّ ءَ چہ دل آزاری بوت ۔ من بگل ءَ کُرت ، منی کِرّ بید ء چہ دروگیں تسلّا ءَ دِگہ ھِچّ گپ نیست اَت کہ من آئی ءَ بہ گُش آں ۔

پد ءَ چے بوت ؟

منی ابّا جان یک اکس ءِ پریم ءِ تہ ءَ بند اِنت ءُ منی کِرّ ءَ اِنت ۔ من چو سرپد نہ اَت آں کہ یک روچے منی اباجان ءَ پاکستان ءِ زندان ءَ نُھ سال سرجم بیت۔ من اَبید چہ ودار ءَ دگہ ھچ کُت نہ کن آں ۔ ودار بس ودار یک اکسے ۔
نوں من ءَ وتی ھما دزگْوھار ءِ کُلیں گپّانی مارِشت بوتگ ۔ پہ ودار ءَ نُھ سال گوں کُجام درداں گْوز اِیت ۔

اے سالانی شپ ءُ روچ گوں ھمے تُرس ءَ گْوز اِیت ، ھُدا مکنت چو مہ بیت کہ منی ابّا جان ءِ لاش ءِ کپگ ءِ ھال مہ شِنگ اِیت ۔ چوش مہ بیت کہ کسّے من ءَ ھال بہ دنت کہ تئی پت آجو بوتگ ۔ بلے آئی ءَ یک اَنچیں نادْراھی یے گوں کہ داں زندگ اِنت بیوسی ءُ نادْراھی ءِ زند ءِ بہ گْوازین اِیت ، یا آ سر ءَ شر نہ اِنت گنوک اِنت ۔ یا چو تُوتک ءُ بلوچستان ءِ آ دِگہ شھرانی وڑ ءَ کْوھنیں کبر دست کپت اَنت اَبید ء چہ ھڈّاں دِگہ ھچ زانگ نہ بنت ، ھُدا وت اِنت کہ منی بابا اے وڑ مہ بیت ۔

وھدے بلوچستان ءِ کُجام کُنڈ ءَ گار ءُ بیگواھیں بلوچ پُسگے آجو بیت ، گُڑا من الم ءَ جُھد کن آں گوں آئی ءَ منی ھال ءُ اھوال بہ بیت ۔ بوت کنت چہ زندان ءَ منی بابا جان دیستگ ئِے، من ءَ ھالے یا آئی ءِ کلوھے بہ دنت ۔ بلے من ءَ چہ ھرکس ءَ نااُمیتی ءَ اَبید دِگہ ھِچّ نہ رس اِیت ۔

چوناھا ما ھرشپ کہ وپس اِیں ھمے اُمیت کن آں کہ الم ءَ یک سُھبے کیت ءُ ما پاد کا اِیں ۔ ھر تھاریں شپ ءَ را یک سُھبے الم بیت ، اے سالانی تہ ءَ من ءَ ءُ منی لوگ ءِ مردماں ھمے اُمیت بوتگ کہ مئے تھاریں شپ الم ءَ کُٹ اِیت ءُ یک سباھے کیت ۔ بلے ما انگت گوں ھمے تھاریں شپ ءَ زند گْوازینگ ءَ اِیں ، نہ زان آں داں کدی اے تھاروکی ھلاس بیت؟-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: زِدّ ءُ کینگ ءِ آس جمبور اِنت

نبشتہ کار: ھمیدہ بلوچ

دی بلوچستان پوست

ما ھچبر سما نہ کنیں پہ اے زمین ءَ پہ اے چاگِرد ءُ دوداں پہ وتی مات ءُ گُھاراں ءُ پہ اے وتی تُنیگیں زمین ءَ، مئے رھبر ءُ رھشوناں وتی سر ءُ جان ندر کُتگ اَنت گار ءُ بیگواہ بوتگ اَنت زِندانانی آماچ بوتگ اَنت ءُ انگت ھزارانی کچ ءَ زندانی اَنت، مئے مات ءُ گُھار دَگانی سر ءَ گریوگ ءَ مجبور اَنت، ناں واب اِش ھست ءُ ناں کہ تاھیر ءُ نا زندمان ءِ دگہ لوٹ ءُ واھشتے دار اَنت۔ باریں چینچو ماتی تاسُپیں بچانی ژانگلویں جون دشت ءُ گیابان ءِ باھوٹ کنگ بوتگ اَنت۔ چنچو ماتانی کُٹ ھالی کنگ بوتگ، چنچو گْوھارانی سر ءِ ساھِگ کروجگ بوتگ اے ھیال مارا ھچبر نئیت بس ما مُدام وت ماں وت جیگ پہ جیگ اِیں یکے دومی ءِ گْورجیگ ءَ گِرگ ءَ اِیں۔

من وتی شھدربرجاہ ءَ کہ چاراں تاں گِنداں ھمک روچ نودربر نوکیں پندلے سازگ ءَ اَنت یک ءُ دومی ءِ سر ءَ دنتان دْرشگ ءَ اَنت سیاست بھر ءُ بانٹ کنگ بوگ ءَ اِنت بلوچ اکشن کمیٹی دو بھر ءَ جوڑ کنگ بوتگ زِدّ ءُ کینگ ءِ آس جمبور کنگ بوتگ یک ءُ دومی ءِ بد ءُ رد کنگ ءِ دود پد ءَ نوک گندگ ءَ کیت اِنت ماں چاگِردی رسانکدراں روچے نوکیں پندلے گندگ بیت روچے نوکیں گپے بُنگیج بیت من نہ گْوش آں چُشیں جیڑہ نہ بیت گَلانی تہ ءَ بلے اے جیڑھانی توجیلّ گیش ءُ گیوار ھما گَلانی تہ ءَ بیت ناں کہ یکے ءُ دومی ءِ گْورجیگ گِرگ ءَ جیڑہ گیشینگ بنت۔ بلے مئے نازانتی ءِ سبب ءَ ما وت ءَ چہ دژمن ءَ گیش وت تاوان دیگ ءَ ایں ءُ وتی واست ءَ گیشتر جیڑہ پیداک کنگ ءَ اِیں کہ اے جیڑہ دیمتر ءَ مزنیں تاوانے ءِ سوب جوڑ بوت کن اَنت۔

من سرپد باں کہ یک کارے وتی راج ءِ تاوان دیگ ءِ ھاتر ءَ کہ کنگ بہ بیت تاں آ کار ھچ پیم ءَ شَریں ءُ راستیں کار بوت نہ کنت، اگاں مئے منزل یک اِنت تاں اے کاروان ءِ پُرشگ ءَ تاوان اوں مئے وتی بیت۔ بلوچ گْوش اَنت کہ یک چمے درد کنت گُڑا دومی چم ءَ اوں تْور اِیت۔ اگاں تو وتی گَل ءِ گھتری ءِ واست ءَ شرگداری کنگ لوٹ ئے، گُڑا پہ ترا الم اِنت تو ھما گَل ءِ تہ ءَ بہ بو ءُ آئی ءَ گھتر کنگ ءِ کوشست ءَ بہ کن۔ اگاں تو بھر ءُ بانٹ کنگ ءَ چہ ھمے سرپد بہ ئے کہ تو آ گَل ءَ گھتر کنگ ءَ ئے گُڑا اے گپ تچک اِنت، کہ تو پہ کِست ءُ کینگ یا جِندی جیڑہ ءِ بُنیاد ءَ اے کار ءَ کَنگ ءَ ئے۔ منی ھیال ءَ زِدّ ءُ کینگ ءُ ھسد روچ پہ روچ مارا گیشتر گار ءُ برباد کنگ ءَ اَنت ءُ ما وت وتی دژمن ءَ وش کنگ ءَ اِیں۔ مئے دژمن لوٹ اِیت بلوچ وت ماں وت مُدام جیگ ماں جیگ بہ بنت بلے دژمن ءِ کار ءَ مرچی ما وت کنگ ءَ ایں بلے داں چُنت ءَ، مئے مات ءُ گْوھار مئے نازانتی ءَ کُتگیں کارانی سزاوار بہ بنت؟ –

دُگنیا مارا چارگ ءَ اِیں ءُ گندگ ءَ اِیں کہ ما وت ماں وت نہ سِل اِیں، گُڑا آ کُجام اُمیت ءَ پہ مارا، مئے سر ءَ بوؤکیں زلم ءِ ھلاپ ءَ گچے جن اَنت؟ اے کاراں کہ ما کنگ ءَ ایں ایشاں کَس راجکاری سرپد نہ بیت راجکاری ءُ راجدوستی اے نہ اِنت، آ کہ راجکار ءُ راجدوست اَنت گُڑا آ الم ءَ جیڑ اَنت کہ وتی راج ءَ ءُ وتی چاگِرد ءَ کُجام وڑ ءَ دیم ءَ بِہ بر اَنت، پہ وتی گُلزمین ءِ مھلوک ءَ چے پیم شَریں زندے بدئے اَنت۔ راجکار ءُ راجدوست مُدام پاک ءُ پلگار بنت شپ ءُ روچ کن اَنت، بے آرام ءُ بے تاھیر بنت وتی وھد ءَ گوں پندل سازی ءَ نہ گْوازین اَنت۔

سوبمندی بے زھمت کَشگ ءَ نہ بیت زھمت کَشگ لوٹ اِیت کار ءِ سر دارگ لوٹ اِیت اولی بر ءَ بے سوب بوت ئے وتی کار ءَ دومی بر ءَ گیش بہ کن اے رندی شَرتر بکن ئِے دانکہ وت ءَ سوبمند کُت بہ کن ئے راجکاری ءُ راجدوستی ءِ گپ ءَ کن ئے گُڑا ترا نزور ءُ ناسرپد وتی بڈ ءَ بندگ لوٹ اَنت، دست ءَ گِرگ لوٹ اَنت تبک پہ تبک ءَ دیم ءَ برگ لوٹ اَنت ۔

نودربر راج ءُ چاگِردانی چم بنت راجاں دیم ءَ بر اَنت راجانی دست ءَ گِر اَنت ناسرپداں سرپد کن اَنت بلے مئے نودربر وت ماں وت جیگ ماں جیگ اَنت۔
دستبندی کناں کہ نوں بس کن اِت یکجاہ ءُ یکمُشت بہ اِت، کسان کسانیں جیڑھاں زور مزن مہ کن اِت کہ تاوان مئے وتی اِنت۔

“مُدام وش ءُ سلامت بات اِت سکی ءُ سوری مہ گندات اِت”

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

بلوچستان ءِ دمگ کیچ ءَ پاکستانی پوج ءَ گوستگءں روچاں دو مردم دزگیر کرتگ ءُ ناشناسیں جاھاں برتگ اَنت –

سر بیتگیں ھالانی رد ءَ گوستگیں روچاں پاکستانی پوج ءَ کیچ ءِ بنجاھی شھر تربت ءَ اسکانی بازار ءَ بیڑ برتگ ءُ لیاقت ء نور مھمد ءُ لیاقت ء سفر دزگیر کرتگ ءُ ناشناسیں زنداناں برتگ اَنت –

دمگی مردمانی رد ءَ گپتگیں ھردوکیں مردم گوستگیں روچاں بلیدہ ءَ پاکستانی پوج ءِ دست ءَ جنگ بیتگءں اسحاق بلوچ ءِ نزیکیں سیاد اَنت –

زانگ بہ بیت کھول ءِ رد ءَ پاکستانی پوج ءَ اسحاق بلوچ ءِ جسد نانکہ کھول ءَ داتگ بلکیں ناشناسییں جاھے ءَ کَل کرتگ ءُ پد ءَ آئی ءِ کھول دوایے دروھتی ءِ واستا ھم پاکستانی پوج ءَ جتگ اَنت –

دی بلوچستان پوسٹ

ھمک سال ءِ وڑ ءَ اے سال ءَ ھم بلوچستان ءَ ھوار سرجمیں دنیا ءَ نندوکیں بلوچاں سیزدہ نومبر ءِ روچ بلوچستان ءِ شھیدانی روچ داشتگ – اے روچ ءِ درگت ءَ بلوچستان ءَ ھوار یورپ ءُ دگہ ڈیھاں جتائیں یاتگیری کرتگ ءُ ڈیوا روک کرتگ اَنت –

سر بیتگیں ھالانی رد ءَ بلوچستان ءِ بنجاھی شھر شال ءَ بلوچ زالبول ءُ چُکاں بازیں کچے ءَ شھیدانی اکس چِست کرتگ ءُ یک روانکے ءِ دروشم ءَ کَش اِتگ چریشی ءَ پد شال ءِ پریس کلب ءِ دیم ءَ زالبولاں بازیں کَچے ءَ ڈیوا روک کرتگ اَنت –

شھیدانی یات ءِ واستا روانک ءِ وھد ءَ زالبول ءُ چُکاں وتی دستاں سدانی کَچ ءَ شھیدانی اکس چِست کرتگ اَنت –

ھمے وھد ءَ بھر زیروکیں مردماں تران کنان ءَ گْوشتگ کہ ما بلوچ شھیدانی ستاشانی ءَ کن ایں –

آیاں دیمتر ءَ گْوشت کہ “ بلوچ شھید جنگ ءِ رژنائیں چراگ اَنت، شھیدانی مزن نامیں دیمونیاں مروچی بلوچستان ءِ دیمونیانی زانت گیش بیتگ اَنت ”

شال ءَ شھیدانی روچ ءِ درگت ءَ برجم کرتگین پرسی یاتگیری ءُ مچی ءَ وائس فار بلوچ مسنگ پرسنز ءِ ماما قدیر، بانک ھوران بلوچ، پاکستان کمیونسٹ پاٹی ءِ رھشوناں ھوار بلوچ نودربر ءُ شھیدانی کھول ھوار بیتگ اَنت –

ھمے وڑ ءَ بلوچستان ءِ دگہ بھراں ھم شھید یات کنگ بیتگ اَنت ءُ ڈیوا روک کنگ ءُ شھیدانی یاتگیری پرسی پتر ءَ ورگ بھر کرتگ –

وھدیکہ جرمنی ءِ شھر ھنوفر ءَ شھیدانی روچ ءِ درگت ءَ بلوچ نیشنل مومنٹ ءِ نیمگ ءَ ڈیوائی دیوانک برجم دارگ بیتگ –

ھمے وھد ءَ بلوچ نیشنل مومنٹ ءِ باسکاں ھنوفر ءِ دزبندیں جاھاں سدانی کَچ ءَ شھیدانی اکس ایر کرتگ ءُ ڈیوا روک کرتگ اَنت-

ھمے وڑ ءَ جرمنی ءِ بنجاھی شھر برلن ءَ شھیدانی روچ ءِ درگت ءَ ڈیوا روک کنگ بیتگ اَنت ءُ شھیدانی ستاشانی کنگ بیتگ اَنت –

آیاں ھمے وھد ءَ گْوشت “ شھیدانی ریتکگیں ھون مئے رھشون اَنت، ھما راہ ءَ کربان بیتگ اَنت، مرچی ھزاراں بلوچ رھیگ اَنت ”

زرباری کوریا ءَ بلوچ زالبول ءُ چکاں شھیدانی روچ داشتگ کہ چریشی ءَ ڈیوا روک کنگ ءُ شھید یات کنگ بیتگ اَنت –

اشاں ھوار ھوار شھیدانی روچ ءِ درگت ءَ بلوچ چاگردی رسانک کار کنوکانی نیمگ ءَ ٹویٹر کمپین دارگ بیتگ کہ چریشی ءَ پاکستان ءَ درستان ءَ برز ترر بیتگ ءُ اے کمپین ءَ پٹان، سندھی ءُ مھاجرانی سیاسی باسکاں بھر زرتگ ءُ بلوچ شھیدانی ستاشانی کرتگ –
زانگ بہ بیت ھمک سال ءَ سیزدہ نومبر ءِ روچ ءَ بلوچستان ءَ ھوار سرجمیں دنیا ءَ نندوکیں بلوچ شھیدانی روچ بلوچستان ءَ دار اَنت- ھمے روچ ءِ دارگ ءِ جار بلوچ آجوئی دوستیں رھشوناں سال دوھزار ءُ دَہ ءَ کرتگ کہ سرجمیں راج ءِ گچینی ءِ روچ ءَ پد ھمک تک ءَ بندوکیں مردمانی نیمگ ءَ دارگ بیگ اِنت – کہ اشی ءِ گچینی ءِ روچ ھمے واستا کمگ بیتگ سیزدہ نومبر ھژدہ سد ءُ سِی ءُ نُھ ءَ انگریز ءِ بگیری ءَ جنگ کنان ءَ بلوچ ڈیھ ءِ ھاکم ھان مھراب ھان وتی ھمراھانی ھمراھی ءَ شھید بیتگ – راجدوستانی گوشگ اِنت کہ زورگری ءِ ھلاپ ءَ چِست بیتگیں برانزانی تہ ءَ اے اولی برانز اِنت –

بلوچ لبریشن آرمی بلوچ سرڈگار ءِ سر ءَ کربان بوتگیں زانتگیں ءُ نہ زانتگیں شھیداں سھر چکیں دروت ندر کن ایں – جئیند بلوچ

دی بلوچستان پوسٹ

بلوچ آجوئی لوٹوکیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ شال ءَ پولیس گاڑی ءِ سر ءَ بوتگیں اُرش ءِ زمّہ واری منّ اِتگ ءُ گوشتگ کہ مئے سرمچاراں شال ءِ دمگ اسپنی دگ ءِ سر ءَ پولیس ءِ یک گاڑی ءِ دستی بمب چگل داتگ – سرمچارانی اے اُرش ءَ پولیس ءِ کم چہ کم سَے کارندہ ٹپی بوتگ –

جئیند بلوچ ءَ دیمتر ءَ گوشتگ کہ بی ایل اے ءَ چد ءُ پیسر باز برا پولیس ءُ لیویز کہ آھانی تہ ءَ گیشتر بلوچ انت آ مکن کرتگ انت کہ آ زورگپتیں پاکستان ءُ آئی ءِ پوج ءِ گوشگ ءِ پد ءَ بلوچ آجوئی ءِ زرمبشت ءِ دیم ءَ اڑاند مہ بہ اَنت – بلے اشانی تہ ءَ لھتے سیاھیں گوگ ھست انت کہ آ زورگپتانی اشارہ ئِے سر ءَ سرمچارانی چاریگری، بیگناھیں بلوچانی سر ءَ بیڑ جنگ ءُ آھانی دزگیر کنگ ءَ ھوار انت – اے اُرش پہ اے ادارھانی واستا یک وارننگے بلے اگاں راج دژمنی ءَ چہ پدکنز نہ بوتاں گڑا آھانی سر ءَ ترندیں اُرش کنگ بیت اِنت –
جارکش ءَ گوشتگ کہ مروچی سینزدہ نومبر شھیدانی روچ ءِ درگت ءَ بلوچ لبریشن آرمی راج ءَ اے کلوہ ءَ دیگ لوٹ ایت کہ گوستگیں دو دھکاں بلوچ راجی آجوئی جنگ ھما پیچ ءُ تاباں گوں برجاہ انت ، اے بلوچ شھیدانی داتگیں بباھانی منت انت –
بلوچ ڈیھ ءِ شھید گندگ ءَ بلوچستان ءِ جتائیں دمگ، ٹک، وانگی جیڑگ، مالی جاورھال یا گلاں گوں ھمگرنچی ءَ گندگ ءَ کائینت بلے آ درسانی دیمونی مول وتی مادریں وتن بلوچستان چہ ایردستی ءَ رکینگ ءُ آئی ءِ آجو ءُ وت واجھیں بلوچانی نوکیں پدریچ ءِ ھاتر ءَ یک وشیں باندات ئِے – اے روچ ھما درسیں بلوچ شھیداں وتی ھیالانی تہ ءَ زندگ دارگ پدریچ ءِ مانزمانی اِنت ءُ نمیرانی ءِ روچ انت – اے روچ اے گپ ءِ ھم یاتگیری روچ انت کہ زورگریں دژمن بلوچ ءَ ابید سوب ءَ ابید ءِ گلانی بندوکی ءَ ، رنگ ٹک، جان، ھمک اُمری ءِ مردم ءَ کُشگ اِنت، ھما کہ کُشگ انت آ مئے تہ ءَ ھمسنت نداریت، ھما کہ مرگ انت آھان ھم وتی میان ردوم زرتگیں جتائی ھلاس کنگی انت ءُ پہ مادریں ڈیھ ءِ رکینگ ءِ ھاتر ءَ یک جاہ بوھگ لوٹ اِیت –
جارکش جئیند بلوچ ءَ گوشتگ کہ بلوچ لبریشن آرمی بلوچ سرڈگار ءِ سر ءَ کربان بوتگیں درسیں زانتگیں ءُ نہ زانتگیں شھیداں سھر چکیں دروت ندر کنت ءُ اے کول ءَ کنت کہ بی ایل اے آ شھیدانی دیمونیاں ھچبر ھاکانی تہ ءَ ھوار بیگ ءَ نیل ایت – آزادیں راج ءُ ملک ءِ جوڑ کنگ ءَ آھانی واباں الم سرجم کنائین ایت – آجوئی ءِ اے جنگ بید ءِ جیڑہ ءَ بید اُشتگ ءَ گڈی آشوب ءَ تاں برجاہ مان ایت –

گڈسر ءَ بی ایل اے جارکش جئیند بلوچ ءَ چہ راج ءَ لوٹ کُتگ کہ آ بلوچستان ءَ ھوار سرجمیں دگنیاء ھر ھما جاہ ءَ کہ نندوک انت وتی شھیدانی یات کنگ ءَ او سھرچکیں دروت ندر کنگ ءِ ھاتر ءَ مراگش اڈ بہ دے اَنت، مردماں سرپدی بہ دے انت، اکس بھر بہ کن انت چراگ روک بہ کن انت ءُ آھانی شھیدی ءِ رژنائیں پگر ءَ ھر نیمگ ءَ تالان بہ کن انت –

دی بلوچستان پوسٹ

پاکستان ءِ سروزیر عمران خان آدینگ ءِ روچ ءَ تربت ءِ تر ءُ تاب کرتگ، تربت یونیورسٹی ءَ آئی ءَ آواران ءُ ھوشاپ ءَ ایم ایٹ ءُ بسیمہ ھزدار ءَ این 30 دگانی بنگیج کنگ ءِ ھمراھی ءَ یونیورسٹی فیز ٹو ءُ ٹیچنگ ھسپتال تربت ءَ ھواریں دو سد تھتاں ھواریں نادراہ جاہ ءِ بنگیج کرتگ اَنت –

دی بلوچستان پوسٹ پتر ھال ءَ سر بیتگیں ھالانی رد ءَ تربت یونیورسٹی ءَ ھم آیاں چہ بلوچستان سرکار ءِ وزیر ءِ نیمگ ءَ لوٹ اِتگیں لھتے مزنیں مردمانی گند ءُ نند بیتگ –

چہ ابید اشاں عمران خان ءِ تر ءُ تاب ءَ تربت ءَ نگاھداری ءِ ترند کنگ بیتگ اَنت – بالی پَٹ دگ ءَ چہ ڈی بلوچ ءُ ایم ایٹ تربت یونیورسٹی ءَ جوسک چار راہ ءَ داں دگ بند کنگ بیتگ ءُ ھمک آؤک ءُ رؤکیں مردم پابندی جنگ بیتگ اَنت ءُ دگ ءِ کَش ءُ کِراں ھستیں دُکان ءُ مزنیں نھادی جاہ زورانسری بند کنگ بیتگ اَنت –

پاکستانی سروزیر ءِ نگاھداری چار ءُ گزاری ءَ تربت ءِ دراھیں سرکاری ءُ زری وانگ جاہ ءُ نادراہ جاہ دمگدار ءِ نیمگ ءَ بند کنگ بیتگ اَنت، اشاں ابید شھر ءَ ابید ءِ جار ءَ ترندی آؤرتگ ءُ ھروڑیں کار ءُ باری بنجل، دکان، نھادی جاہ ءُ پٹرول پمپ زورانسری بند کنگ بیتگ اَنت وھدیکہ اژدری کارانی سِلسلگ ءَ سپر کنگ ءَ شھری الکاپی ءَ پَٹگ ءُ تکانسری ءِ آماچ کرتگ اَنت –

انجمن تاجرانی رد ءَ سر وزیر ءِ آیگ ءِ وھد ءَ شھر ءِ دکان زورانسری بند کتگ ءُ ترندی ءِ جاور ودینتگ اَنت –

آل پارٹیز کیچ ءِ نیمگ ءَ پریس ریلیز شنگ کرتگ ءُ گوشتگ کہ سروزیر ءِ تر ءُ تاب ءِ وھد ءَ گیشیں سپاھیگ ءِ آرگ ءُ ترندی ءِ دیان ءَ شھری لوگانی تہ ءَ زورانسری کنگ، دراھیں وانگ جاھانی بند کنگ ءُ شھر ءَ زورانسری دربندیں ھرتال کنگ ءِ ایرجن ایں –

زانگ بہ بیت عمران خان ءِ آیگ ءَ یک روچے ءَ پیسر شھر ءَ ابید ءِ جار ءَ ترندی کنان ءَ پھزداری ترندی ءِ جاور ودینگ بیتگ اَنت ءُ شھریانی آیگ ءُ واتری ءَ پھزداری لشکریانی نیمگ ءَ دارگ ءُ تکانسریانی دیمپانی بیتگ اَنت –

دمگدار ءِ نیمگ ءَ شھر ءِ وانگی ادارھانی بندش جنگ ءِ ھمراھی ءَ انجمن تاجرانی دراھیں کار ءُ بار بند کنگ ءِ ترندیں بیھار دیگ بیتگ اَنت وھدیکہ آدینگ ءِ روچ ءَ وھدیکہ سروزیر تربت ءَ شتگ گڑا ھم پھزداری ءِ نگھداری ترند کنگ بیتگ اَنت ءُ دگ لس روگ آیگ بند کنگ بیتگ اَنت کہ چریشی ءِ سوب ءَ تربت ءَ آؤکیں جتائیں ھندانی مساپر ءُ دمگی مردم بے تاھیر ءُ مشکلانی دیمپانی کنگ اش کپتگ –

دی بلوچستان پوسٹ

سر بیتگیں ھالانی رد ءَ روکپتی بلوچستان ءِ دمگ ھاش ءَ دگ ءِ وئیلے ءَ یک مردمے بیران بیتگ –

اھوالکار ءِ رد ءَ ھاش ءِ ھند جوزگ ءَ یک گاڑی ءِ دگ ءِ وئیل ءِ آماچ بیتگ کہ چریشی ءَ علی ایرندگانی ء انور ایرندگانی بیران بیتگ –

بیران مردم ءِ جون پھزداراں چِست کرتگ ءُ نادراہ جاہ ءَ رسینتگ –

زانگ بہ بیت روکپتی بلوچستان ءَ ھمک روچ دگ ءِ وئیلانی ھال پیداک اَنت کہ دمگدار ءِ گوشگ اِنت کہ گیشتریں وئیلانی سوب دگ ءَ ترند رؤکیں گاڑیانی سوب ءَ بیگ ءَ اَنت –

نبشتانک: سیزدہ نومبر شھیدانی پکر ءِ بوسہ

نبشتہ کار:زمین زادَگّ

دی بلوچستان پوسٹ

ڈالباریں سِنگ ئِے ساھگے گیندگ ءَ چہ پد اے سرجمیں پند ءَ تی یاتاں گوں جیڑان اِتاں اُودے رسگ ءَ گوں جگر پیسر تی یاتاں من ءَ گلائیش کُت –

اے ھمے ساھگ ءَ کہ ایشی ءَ وتی باتن ءِ تہ ءَ تی ندارگ جاگہ داتگ ءَ اَت ءُ ھمے پیم ءَ تی ھما روچگیں چگرگ ءَ جنئگ ءَ اَت-

ءُ تئی ھما رنگ ءَ ءُ گپاں درانگازگ ءَ اَت تئی ھما پیسریگیں پیم ءَ چادر ءِ چنڈگ ءُ چیر گیجگ ءُ وپسگ –

مرچی پد ءَ ھمے دیوان ءَ من ءَ تئی ھیال ءَ آورتگ ءُ نادینت، من ءَ ھمد ءِ ھما روچ گیر آیگ ءَ اِنت کہ تو ھمے روچ ءَ من ءَ ھال دات ءُ گشت یار مرچی تو زان ئے چی روچے؟ من تاریک ءُ روچے چارگ ءِ واستا دنیگا گھڑی نہ چاریتگ اَت تو پیسر ءَ گُشت مرچی پُل شھیدانی راھشونیں پکر ءِ روچ اِنت-

پد ءَ تو سجوئیں شھیداناں سلام ءُ سوگند کُت اَنت، ءُ گُشت کہ داں ساہ مان اِیت من ھمے شھیدانی رندپداں روان باں –

نِی منی پاد ھچبر اُوشتاں نہ کہ لرزاں تی ھر گپ ءَ مرچی ھمبل گُش ءِ پد ءَ ھمے ڈالبار پسو دیگ ءَ اَت من ےَ شر یات اِنت تو سَے ءُ چار کلاک ءَ بے برمش بیت ئِے ءُ تو وتی چم بند کُت اَنت ,ءُ مرچی پد ءَ ھمے روچ ءَ ، ءُ ھمے وھد ءَ بلے ڈالبار ابیتک ءُ ملوری ءَ وتی ساھگ ءَ دُزان اَت –

بس تی کندگ ءُ شیرکنیں گپ پشکپتگ اِت اَنت ءُ تی کندگ ءُ سوگند ءُ ھبر ھمے ڈالبار ءَ ساھگ ءِ اَنگت ءَ وتی اَمانت کُتگ اَنت من مرچی ھمے جاہ ءَ اوشتاتگاں ءُ تی ناز بوئیں ترانگ ھمے جاہ ءَ درپشگ ءَ اَنت ءُ پد ءَ تئی سوگند جاہ ءَ اوشتات ءُ چُش گُشت کُلیں شھیدانی سوگندیں ، داں کَلیں شھیدانی زرد ءَ بوسہ مہ دے آں داں تئی گون ءَ ءُ کلیں شھیدانی گون ءَ کندگ ءُ گپ ءُ دیوان نہ باں داں ھما روچ ءَ پاد نہ اوشت اَنت ناکہ لرزاں, دانکہ بام ٹک نکنت ھما وھد ءَ داں پہ سھتے ءَ ھم من ایمن ءُ بے ھیال نہ باں چمانی بند کنگ ءِ وھد ءَ من ءَ تئی یات کاینت یار اے ترس ءَ کہ چمانی پچ کنگ ءَ گوں دیدگ ارسیگ مہ بنت ءُ تو پد ءَ زان ئے کہ اے پہ شھیدانی زیبائی ءَ اَبیتکی ءُ مُلوری ءِ بیت کنت یار تئی زیبائی ھر باندات ءِ دل ءَ درست زان اَنت کہ پُل کِشگیں گوں ھمے جیڑگاں ءُ ندارگانی موجاں اِت اَنت کہ سنگتی ءَ پشت ءَ چہ من ءَ توار کت ءُ گشت یار بیا روئیں کہ گرم کپ ایں من کتار بَستاں سلاہ ءُ کَلّیگ ءُ چادر بڈا کت اَنت – پاد اتکاں چہ ڈالبار ءِ چیر ءَ ءُ راھ گپتیں –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: یورپ ءِ آیگ ءُ پریشانیانی امبار

نبشتہ کار: عبدالواجد بلوچ

دی بلوچستان پوسٹ

یک انچیں ھیالے وھدے وتن ترا یلہ کنگی اِنت، درانڈیھ بوگ چہ شومک ءِ چہ نادْراھی ءَ گیشتر دردناک انت ۔۔۔ایوکی تھنائی بلاھیں دردے۔۔۔ما درانڈیھ چی ءَ بوتگیں؟؟؟ پگری ءُ زگریں سیاسی سنگتانی درانڈیھی ءِ ھمرائی ءَ اے درچ ءَ یک بلاھیں کچّی ءَ بازیں بلوچے یورپ ءَ اتکگ ءُ سر بیتگ ۔۔۔2015 وھدے اے ملک ءِ توک ءَ شام بزاں کہ سوریا ءِ جیڑہ ءُ جنجال کہ بندات اَنت گڑا یورپی رھشونہ ءَ بلکان ریاستاں ھوار ھوار کلّیں اے مرز پچ کت انت یونان ءَ بگر داں جرمنی، سویڈن، اٹلی، آسٹریا ءَ کلیں سیمسر پچ بیت انت ءُ ھر جاگہ Refugees welcome ءِ نُئرہ ءَ ھوار تو بازیں رزا کار ھم دیست کہ رکّینوک وش اتک کنگ ءَ انت. اے رُمب ءُ ریچ ءَ من ءَ ھوار دگہ بازیں سنگتاں وت ءَ را آؤرت ءُ یورپ ءِ وش ءُ وشھالیں دیار ءَ سر کرت۔۔۔یک سیاسی زگریں سنگتے کہ دنیا ءِ کلیں پیچ ءُ تاب ءُ زیبداری یا کہ سادگی بہ بنت سرپد بیت بلے اے رمب ءَ انچائیں سنگت ھم ھست اَت کہ آیانی دل ءَ یورپ انچو وشھال اِنت کہ گُش ئے یورپ ءِ روڑ ءُ دگّانی سر ءَ زرّ ءُ کلدار رُد اِیت ۔۔۔وھدے گوزگ ءُ کیسانی مچ کنگ اے ھما کار ات اَنت کہ اد ءَ یورپ ءِ وتی جوڑ کتگیں کانود کہ سالانی سال یورپیاں ھوار ھر نوکیں آیوکیں مردمانی سر ءَ اپلائی بنت آ کانود “امیگریشن “ءِ کانود انت کہ ترا یک بلاھیں پروسسے ءَ گوزگ لوٹ اِیت—!

رکّینوکانی اے دراجیں درچ کہ برجاہ ات ایشی ءِ تہ ءَ دنیا ءِ ھر پیمیں مردم ھوار ات اَنت ءُ ایشانی توک ءَ یکے بلوچے اَت ءُ پہ ھمے نیت ءَ کہ اے ملک ءِ توک ءَ ایران ءُ پاکستان ءِ دست ءَ لگتمالیں ھما راج اِنت کہ وتی آجوئی ءِ واست ءَ گوں اے دوئیں ریاستاں جنگ ءَ انت، بلوچ ءِ نسل کشی سیاسی رنگ ءَ بہ بیت یا کہ مزھبی دوئیں دْروشماں بلوچ لٹ ورگ ءَ اِنت۔۔۔گار ءُ بیگوائی ءِ نہ کٹّوکیں سبب ھساب ءَ نہ انت۔۔۔بلوچ وھدے یورپی دنیا ءَ گوں اے نوکیں شیپچ ءِ ھمرائی ءَ سیاسی رکّینگ ءِ ھاتر ءَ یورپ ءِ جتا جتائیں ملکاں کیس ءَ دنت گڑا بندات ءَ بلوچ ھمے سرپد بنت کہ مئے جیڑہ ءَ دنیا سرپد اِنت ءُ پیشیگیں بلوچ لیڈرشپ ءَ پہ بلوچ ءُ بلوچستان ءَ جوانیں وڑے جھگیری کتگ بلے لٹ ھما وھد ءَ بلوچ سیاسی کاردارانی سر ءَ لگّ اِت کہ نا یورپ ءِ لس مردم ءُ نَے کہ یورپی امیگریشن بلوچ ءِ جیڑہ ءَ سرپد بیت جھگیری ناکامی ءِ اولی بندات ھمد ءَ چہ زاھری دنت-

بلوچ لیڈرشپ ءِ جھگیری ءِ ناکامی ءِ مستریں سوب انت کہ یورپ ءِ تہ ءَ گْوستگیں دہ سالانی میان ءَ ھر بلوچ سیاسی کاردارے وتی کیسانی رکّینگ ءَ تیوکی ءِ دْروشم ءَ کنگ انت ھمے سوب اِنت کہ گیشتریں بلوچانی کیس رد کنگ بنت، باید وَ ھمیش ات کہ بلوچے پناھندگی ءِ جیڑہ یکجاھی بوتیں ءُ یکجاھی ءِ رنگ ءَ ھر بلوچے ءِ کیس گوش دارگ بوتیں — اے سوب چی اَنت کہ گوستگیں 10 سالاں ھم اے جیڑہ ءِ نیمگ ءَ دلگوش گور کنگ نہ بوتگ؟-

مستریں گپ ایش انت کہ وھدے مئے سنگتانی کیس گوں تیزی ءَ رد کنگ بنت گڑا آ بے سوبی چی انت کہ سنگت انگت اے جاہ ءَ سر نہ بوتگ انت کہ وتی کیساں جوان بہ کن اَنت آیا اے سنگتانی وتی جند ءِ نزوری انت یاسیاسی پارٹیانی وتی کارداراں سیاسی رنگ ءَ موبلائز نہ کنگ ءِ سوب؟؟؟ الم جیڑگ لوٹ اِیت-

من پہ بستار یک درانڈیھیں سیاسی کاردار لوٹاں وتی گپّاں دومی سنگتاں بہ گشاں ،چش کہ منی جند ءَ جرمنی تہ ءَ سیاسی پناہ زرتگ ءُ گوستگیں پنچ سال انت کہ من جرمنی ءَ وتی اکٹیوٹیز ءُ سیاسی ھوالہ ءَ وتی کاراں کنگ ءَ آں گوستگیں پنچ سال ءَ جرمنی ءَ بسّ یک بلوچے ڈیپورٹ کتگ آ ھم ھما سنگت ءِ وتی نادلگوشی ءُ نابودی ءِ سوب ءَ ۔۔۔۔بلے ایشی ءَ ابید بازیں سنگتانی کیسز ریجیکٹ بوگ ءَ انت ۔

لھتے سوب انت کہ آھانی نشان کنگ المی انت کہ “یکے وَ ایش انت کہ وھدے یورپ ءَ ھر سنگتے وتی کیساں تھنائی ءِ رنگ ءَ رکّینگ ءَ انت آ ھم سیاسی پارٹیانی باسکی ءَ ھوار ھوار کہ آھاں پارٹی لیٹر گون انت گڑا چی ءَ اے پیم سنگت refuse کنگ بنت؟ اول ایش انت کہ سیاسی پارٹی ابید ء وتی باسکانی کیسانی سر ءَ کار بہ کن انت آیانی گیشتریں دلگوش بس زھرشانی ءُ سیمنارز مراگشاں گْوز انت یورپ ءِ تہ ءَ گیشتریں کچّ ھما بلوچ سیاسی کاردار انت کہ آیاں بلوچستان ءَ چشیں ھاسیں سیاسی کار نہ کرتگ بلے پد ءَ ھم کہ وھدے آ یورپ ءَ آتکگ اَنت آیانی سیاسی تربیت سیاسی پارٹیانی اولی کار انت کہ آیاں بلوچستان ءِ ھستیں جاور ءُ سیاسی ھوالہ ءَ سرجمیں رنگ ءَ موبلائز بکن انت، دومی اے کہ بلوچ سیاسی پارٹیاں یک ھواریں پلیٹ پارمے لوٹ اِیت کہ آ بلوچ ءِ کیس ءَ یورپ ءِ جتا جتائیں امیگریشن ھکّاماں رنگ ءَ پیش بہ کنت۔۔۔!

اگاں ایشی ءَ ابید چشیں چیزے دیما نہ ستک گڑا المی انت کہ اسر بیوکیں سیاسی کارکن چہ وت شریں وڑے وتی کیس ءِ سر ءَ ڈاکیومنٹیشن بہ کن اَنت ھر پیمیں منانک ءُ گْواہ کہ آیانی کر ءَ در کیت ھما جیڑھانی سرجمیں دسترس ءَ ھوار شریں وڑے وت ءَ را آمیدگِس ءَ پیش بہ کن اَنت…….. یورپ ءِ آمیدگِس ءُ پاکستان ءُ ایران ءِ آمیدگساں زمین ءُ آسمان پرک اِنت ترسگ ءُ بیم ءِ آماچ بوگی نہ اِنت— جرمنی ءَ وھدے امیگریشن ادارہ “بمپ”سنگتانی کیساں رپیوز کنت گڑا کیس جرمن ءِ آمیدگِساں روت یک آمیدگِس دو پد ءَ سیمی آمیدگِس ءَ کیس کہ سر بیت گڑا آئی ءِ واستا جوانی ءَ تیاری کنگ کپ اِیت ۔یک سیاسی کاردارے وھدے سیاسی کیس دنت گڑا المی بیت آ کاردار وت ءَ را ھر کار ءَ سیاسی ھوالہ ءَ تیات بکنت-

وھدے مردم درستیں جاھاں کہ رد کنگ بیت گڑا آ اسر بیتگیں سنگت یورپ ءِ دومی ملک ءَ ھما بَے ءَ بہ روت کہ اد ءِ Rejection جتگیں درستیں دستاویزات آئی ءَ گون بہ بنت تا کہ دوبار ءَ ڈبلن کانود تھت ءَ آ واتر ھما ملک ءَ راہ دیگ مہ بیت. اگاں میان ءَ پد ءَ ھم آئی ءَ را دیگ بیت گڑا باز وھداں آئی ءِ کیس پد ءَ زورگ بیت پیسلہ دیگ بیت .سنگتانی یک مزنیں نزوری یے ایش انت کہ وتی کیساں بُنگیجی روچاں اِزّت نہ دے انت باید ھما روچ ءَ کہ تو اسائلم اپلائی کن ئے ھما روچ ءَ چہ وتی تیاری ءَ بُنگیج بکن— Sequences weis گوں شریں وڑے وتی کساں ترتیب دیگ ھر سیاسی کاردار ءِ ڈُبّہ اِنت ۔

یک مزنیں ردی یے کہ یورپ ءِ تہ ءَ باز نوکیں سیاسی سنگت ترس ءِ آماچ اَنت آ وت ءَ را اد ءَ شریں وڑے سیاسی انداز پھال کنگ ءِ کوشش ءَ نہ کنت یورپ ءِ توک ءِ کیسانی سرجمیں رپیوز بیگ ءَ رند پد ءَ یک چانسے بیت کنت کہ کیس دوبار ءَ از سر نو BAMF امیگریشن کارگِس ءَ روت دوبار ءَ آ کیس چارگ بیت اے سبب ءَ گْوستگیں ھرچے activities ءِ کہ بیت آ چارگ نہ بنت نوکیں سیاسی کار زھرشانی، نبشتانک ءُ اکٹیویٹیز چارگ بنت ءُ پیسلہ دیگ بیت اے سلسلہ ءَ گڑا المی بیت کہ ھر سیاسی کارکن وت ءَ را شریں وڑے چہ اوّلی روچ ءَ بہ گر تا آھر وت ءَ را اکٹیو بہ کنت-
بلے پد ءَ ھم اے المی انت کہ سیاسی پارٹی باید بلوچ سیاسی سنگتانی کیسانی ھوالہ ءَ یک یکجاھیں چیزے دیم ءَ بیار انت وگر نہ پریشانی ءُ جیڑہ روچ پہ روچ گیشتر بنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔