نبشتانک: مئے گْوست ءُ انوگیں زندمان
نبشتہ کار: لطیف سخی
بنی آدم وھدے چاگردے ءِ توک ءَ ردوم زور اِیت آئی ءِ واست ءَ بنداتی روچ اینچو گران نہ سوز ءُ بے چاڑ ھچبر بوت نہ کن انت پرچے ءَ کہ چہ درکسانی ءَ آئی ءَ را چاگردی جیڑہ اینچو گیش گندگ ءَ ھچبر نیا انت ۔پرچے ءَ کہ آ یک ننّکیں زھگ ءُ نوک ردوم زورگ ءِ دور ءَ گوزگ ءَ اِنت۔
اینچو آئی ءَ را سما پر نہ بیت کہ چاگرد ءِ چونیں آسراتی آئی ءِ زند ءِ توک ءَ پیداک انت دسترسی چون رس اِیت؟ پد ءَ چاگردی مُچّی، آئی ءِ سرپد بوگ ءَ پد اینچو ارزان گندگ ءَ ھم نیا انت پرچے ءَ کہ گونڈو بنداتی روچاں ھر چیز ءَ پہ وت ھمگرنچ ءُ ھم شرپ سر پد بیت ءُ بد ءُ نیک ءَ ھم نہ زانت۔
اےگپ الم ھست کہ آ وتی توک ءَ زِد ءُ کینگ ودی کنت بلے ھمے زد ءُ کینگاں کجام رنگ ءَ دیم ءَ کار اِیت اے آئی ءِ وتی جند ءِ پجاروکی ءُ بسات اِنت۔ ھمے آدتاں زورگ بندات کنت۔
چوش کہ ودی بوگ ءَ پیسر یک کودکے ءِ توک ءَ اینچو ھرس مان نہ بوتگ بلے وھدے موہ دیگ ءَ پد انچو چیز مان گیش انت۔ گڑا آیانی سر ءَ بزانت المی انت یک چاگردے ءِ تہ ءَ گونڈو ءَ را ھمے چیزانی زد ءِ آرگ ھم چاگردے ءَ را زمہ وار گوشگ بنت۔ اگاں آ نیکیں رنگ ءَ بہ بنت یا بدیں۔ بلے میاریگ چاگرد انت ۔
اگاں اے چیز بازیں نیمگ ءَ مارا جوان گندگ بنت یا کسانیں میتگے بہ بیت یا ٹوھیں، یک دیمروی کنوکیں ملکے بہ بیت یا کہ یک زندگیں راجے بہ بیت، گڑا ھمے چیز یک رد ءُ بدلی ءِ نام ءَ زندگ بنت گُُڑا چاگرد دیمروی کنت ءُ وش نامیں بستارے ءِ نام ءَ دیم ءَ کیت بلے دگنیا ءِ سر ءَ انچیں جاہ ھست کہ اود ءَ بنی آدم وتی جند ءِ ازر ءُ جنجالاں چہ ھم مان گیشگ نہ زان انت۔
گڈا تناوھدی آ وتی جند ءِ لوگ ءَ رد ءُ بدل آؤرت نہ کن انت دومی چاگرد آیانی پلہ مرزی ءَ ھچ بر کرت نہ کن اَنت انچش گْوش اَنت کہ پیسر ءَ تو وت ءَ پہ پجارے جوڑ بہ کن دومی تئی پجّار الّم کنت۔
بنی آدم وتی گوست ءِ زندمانی جیڑھانی سر ءَ چمشانک بہ دنت گڑا آ آیوکیں وھد ءَ آ وتی زندمان ءِ گْوازینگ ءِ دوداں سرپد بیت کہ آیوکیں روچاں چے کنگ لوٹ اِیت۔ بزاں آیوکیں روچانی دیمروی ءِ ھاتر ءَ ترا گوست ءِ سر ءَ چمشانک الّمی اِنت۔
بلے بدبھتی اِنت کہ انگت ما وت ماں وتی اڑ ءُ جنجالاں گوں مان گیش اِت نہ کن اَیں روچ پہ روچ اِے جنجال نوکیں رنگے ءَ دیم ءَ آیان ءُ گیش بوان اَنت۔
گھتری ءِ بابت ءَ ما وتی نند ءُ نیادانی تہ ءَ ھر وھد ءَ باوست کن اِیں بلے اے گھتری ءِ واست ءَ گامگیج نہ زور اِیں ما بس یکے ءُ دومی ءِ ایر جنگ ءَ لانک بند اِیں، شرگداری کن اِیں بلے شرگداری ءِ ارزشت ءِ تک ءُ پھناتاں سرپد نہ اِیں بس شرگداری پہ دومی ءِ ردی ءِ شر کنگ ءَ نہ کن اِیں بلکیں ما دومی ءِ جَھل جنگ ءُ بے سوب کنگ ءِ ھاتر ءَ گامگیج زور اِیں چش کہ کہ اے گامگیج راج ءِ واست ءَ بد بھتی ءُ بے سوبی یے۔
مردم پرستی بلاھیں اِلّتے کہ مردم ءَ شرگداری ءَ مکن کنت۔ دومی مردم کجام ھم ردی ءِ آماچ بہ بیت بلے مردم پرستی دومی ءَ را آئی ءِ ردیانی سر ءَ شرگداری ءَ مکن کنت مردم پرستیں بنی آدم گیشتر نابزانت ءُ ناوانندگیں مردم اَنت کہ ھچ ءَ سرپد نہ اَنت۔
ما اگاں گوست ءَ چمشانکے بہ دے اِیں کہ گوست ءَ چے بوتگ ءُ انوگیں وھد ءِ لوٹ چے انت گڑا ما وتی ھستیں جیڑھاں گوں ارزانی ءَ گیش ءُ گیوار کرت کن اِیں۔ گوست ءِ ھما کار کہ آ ڈالچار کنگ بوتگ اَنت آیانی ڈالچاری ءَ مارا چے نکس ءُ تاوان داتگ یا چے نپ ءُ پائدگ اگاں اِے کل کیل کنگ ءُ چارگ بہ بنت گُڑا جیڑھانی گیش ءُ گیوار کنگ ارزان بیت۔
انوگیں وھد ءِ مئے مستریں نزوری ایش اِنت کہ ما ھما کاراں دوبر کنگ ءَ اِیں کہ آ کاراں گوست ءَ بلاھیں نکس ءُ تاوان داتگ ما انگت چہ گوست ءَ ھچ در نہ برتگ زانتکار گوش اَنت کہ اگاں تو وتی گوست ءَ مہ چار ئے گُڑا تئی مرچی ءُ باندات ءِ پیسلہ جوانیں اندازھے بوت نہ کن اَنت۔
بلے مئے مزنیں بدبھتی ایش اِنت کہ گوست ءِ بابت ءَ سرپدی دیگ بوگ ءَ نہ اِنت کہ گوست ءَ چے ردی بوتگ اَنت کہ آیانی سوَب ءَ ما نکس وارتگ گوست ءِ بابت ءُ لبزانکی پڑ ءَ ھچ کار کنگ نہ بوتگ نا وانگی دیوان کنگ بوتگ گوست ءِ سر ءَ وھدے کہ یک راجے ءِ راجدپتر جوانیں رنگے ءَ نبشتہ کنگ ءُ گیشّینگ بہ بیت گُڑا آ وتی پجار ءَ زانت۔ وتی نکس ءُ نپ ءَ زانت۔ وتی دوست ءُ دژمن ءَ سرپد بیت۔ بلے اِے وھد ءَ تاں نا لبزانک ءِ پڑ ءَ گامگیج زورگ بوتگ ءُ نا کہ راجدپتر ءِ سر ءَ کار کنگ بوتگ۔
کل جیڑہ مئے وتی جیڑہ اَنت۔ دود ءُ ربیدگی، چاگردی، رسم ءُ رواجی، بلے مستریں نزوری مئے بے تھملی اِنت کہ ما کسّے ءَ را برداشت کرت نہ کن اِیں۔ زانتکار گْوش اَنت کہ اگاں تو چاگردے ءِ تہ ءَ مٹ ءُ بدلی آرگ لوٹ ئے گُڑا تو پیسر ءَ وتی تہ ءَ بدلی بیار۔
گْوست ءَ ما بِہ چار اِیں مئے شائراں ، نبشتہ کاراں، لچہ کاراں، انچش گپ دل ءَ داشتگ اَنت کہ آیاں ترپش ءُ سوچاکیں شگان ءُ تنز وتی شیر، لچہ ءُ آ دگہ نبشتانکانی ءَ تہ نبشتہ کرتگ اَنت ءُ یکے دومی ءَ تنز ءُ بھتام جتگ۔ اِ وھد ءِ جاوراں مارا یکے دومی ءِ سر ءَ شگان ءُ بیت کنگی نہ اِنت بلکیں ما وتی مزنیں جیڑھانی سر ءَ زور ءَ بہ دے اِیں۔ ما وتی لبزانک ءُ زبان ءِ سر ءَ کار بہ کن اِیں۔ چش کہ واجہ غلام حسین شوھاز، سید ظہور شاہ ھاشمی، واجہ صبا دشتیاری ءُ آدگہ زانتکار ءُ کواساں جھد کرتگ۔
اگاں ما لوٹ اِیں کہ دگنیا ءَ مارا یک راجے ءِ بستار ءَ بزانت گڑا مارا وتی لبزانک، راجدپتر ءُ زبان زانتی ءِ سر ءَ جوانیں دابے ءَ کار کنگی اِنت۔ وتی تھی جیڑہ گیش ءُ گیوار کنگی اَنت۔ یکے ءُ دومی ءِ تہ ءَ برداشت ءِ ھاٹیگ پیداک کنگی اِنت۔ گْوست ءَ بہ گر تاں روچ ء مروچی مئے راج جنگ ءُ چوپ ءُ جنجالانی دیمپان اِنت۔ ما وتی دیمروی ءِ ھاتر ءَ نوکتریں رپکاں کارمرز بہ کن اِیں ءُ سائنسی مواد ءُ الم زانتاں چہ نپ چست بہ کن اِیں ءُ آیانی ھواری ءَ وتی کاراں دیم ءَ جنزینان بہ کن اِیں۔ مئے چاگرد ءِ مستریں سلکاری نشا اِنت کہ نشا ءَ نوجوان وتی ھرجان جتگ اَنت۔ زانتکار گوش اَنت کہ کجام راج ءَ تو ھلاس کنگ لوٹ ئے گُڑا آئی ءِ تہ ءَ نشا ءِ سلکاری ءَ شِنگ بہ کن۔ آ وت ھلاس بیت ءُ آئی ءِ تہ ءَ نشا ءِ سلکاری ءَ شِنگ بہ کن۔ آ وت ھلاس بیت ءُ آئی ءِ تاگت ھلاس بیت۔ ما اگاں لوٹ اِیں کہ یک سرجمیں ربیتے مٹ بہ کن اِیں گُڑا پیسر ءَ مارا وتی جند ءِ تہ ءَ مٹ ءُ بدلی آرگی اِنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
