TBP Balochi

دی بلوچستان پوسٹ

گوستگیں بیست ءُ چار ادارانی تہ ءَ روکپتی بلوچستان ءَ کرونا ویروس ءِ دگہ سَے سد ءُ سیزدہ مردمانی نادراھی دیم ءَ اَتکگ اَنت –

سر بیتگیں ھالانی رد ءَ روکپتی بلوچستان ءَ جھانی نادراہ کرونا ویروس ءَ گپتگیں مردمانی کَچ بیست ءُ یک ھزار ءُ نُھ سد ءُ سِی ءُ چار ءَ سر بیتگ اَنت –

اھوالکار ءِ رد ءَ گوستگیں دو روچانی تہ ءَ پانزدہ مردم کرونا نادراھی ءَ بیران بیتگ اَنت کہ اشانی ھواری ءَ روکپتی بلوچستان ءَ بیران بیتگیں مردمانی ھشت سد ءُ نود ءُ شش ءَ سر بیتگ اَنت –

چاگردی مردمانی گوشگ اِنت کہ ایران ءِ سرکار کرونا ءَ گپتگیں مردمانی کَچ ءَ کم پدر کنگ اِنت بلے آئی ءِ کَچ ءُ کساساں نادراھانی کچ گیشتر اَنت –

ھمے وڑ ءَ گوستگیں روچ ءَ ایران ءِ جانسلامتی ءِ گر ءُ دار کنوکیں پتر ءَ بندوکیں ایرج ھریرچی ءَ رسانکدراں گپ کنان ءَ گوشتگ کہ ایران ءِ سرکار کرونا ءَ بیران مردمانی کَچ ءَ کم گوشگ ءَ اِنت کہ اے کَچ ءُ کساساں باز گیشتر اَنت –

ھمے وڑ ءَ کرونا ویروس ءِ ترند بیگ ءِ سوب ءَ روکپتی بلوچستان ءِ مزنیں شھر چھبار، کنارک ءُ دگہ شھر بند کنگ بیتگ اَنت ءُ مردم پھریزگی ءِ کڈن کنگ بیتگ اَنت –

اھوالکار ءِ رد ءَ روکپتی بلوچستان ءَ کرونا ءِ گیش بیگ ءِ پشدر ءَ وانگ جاہ دو ھپتگ ءَ بند کنگ بیتگ اَنت –

دی بلوچستان پوسٹ

سر بیتگیں ھالانی رد ءَ بلوچی زبان ءِ مزن نامیں لچہ کار ءُ آزمانکار مھلب نسیر ءِ زھگ روھیل مروچی ماں سویڈن ءَ کرونا نادراھی ءِ سوب ءَ بیران بیتگ –

گیشیں ھالانی رد ءَ روھیل دَہ روچ ءَ پیسر جھانی نادراہ کرونا ویروس ءِ آماچ بیتگ ءُ سویڈن اپسالہ ءَ نادراہ ءَ تھتیگ بیتگ –

دہ روچ ءِ نادراھی ءَ پد مروچی روھیل ءَ کرونا ءِ گرانیں بار چَنڈ اِتگ ءُ بیران بیتگ –

زانگ بہ بیت مھلب نسیر وت ھم کرونا ءِ نادراھی ءِ آماچ بیتگ ءُ بلے آئی ءِ جاندراھی بیتگ –

بلوچستان ءَ سیادی داروکیں مھلب نسیر گوست ءَ درکپتگ ءُ دیم پہ سویڈن ءَ جھمنندی بیتگ –

مھلب نسیر ءِ زھگ روھیل ءِ بیرانی ءِ سر ءَ چاگردی رسانک جاھاں چاگردی مردم ءُ لبزانکی مردم پدری درشان کنگ ءَ اَنت –

دی بلوچستان پوسٹ

بلوچستان ءِ بنجاھی شھر شال ءَ ریاستی ادارھانی دست ءَ گار ءُ بیگواہ بوتگیں مردمانی پانکجنیں گل وائس فار بلوچ مسنگ پرسنز ءِ زھرشانی ءَ مروچی چار ھزار ءُ یک سد ءُ چل روچ سرجم بوتگ –
سرگودھا چہ مکہ سوشل ویلفئیر سوسائٹی ءِ صدر حاجی عطا محمد ءَ گون وتی ھمراھاں بنجلے تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اِتگ –

ھمے وھد ءَ وائس فار بلوچ مسنگ پرسنز ءِ وائس چیئرمین ماما قدیر بلوچ ءَ وتی ھیال درشان اِتگ ءُ گوشتگ کہ راجی جد ءُ جھد ءَ پرد وتی شھیدی ءَ یک ادارہ ءِ سرجم کنان ءَ وتی پُشتی دود ءُ راج دوستی ءِ جزبگ ءِ راہ ءَ گشین اِیت-

آئی ءَ گوشتگ کہ ایردستیں بلوچستان مروچی گلامی ءِ ساہ ءَ دمتوس کنگ بیتگ کہ ھمود ءَ کہ یک راج ءِ جنت دروشمیں سرزمین ءِ سر ءَ دوزہ ءِ وڑیں زند گوازینگ ءَ انت ھمود ءَ کہ لھتے مردم زوراکانی ھمراہ بیت ءُ سیر آباد بیت ءُ ھمے مردم زوراک ءِ کاسگ چَٹ جوڑ بنت – ھمود ءَ کہ نشہ باپاری ڈُنگ، کرپٹیں مردم ریاستی ھاکمانی رد ءِ تہ ءَ نشتگ انت –

گڈسر ءَ ماما قدیر بلوچ ءَ گوشتگ کہ پُرایمنیں جد ءُ جھد ءِ تہ ءَ دیمونی پہ زلم زوراکی ءَ رکگ ءِ ھاتر ءَ دیگ بیت اگاں زوراکی مہ بوتیں گڑا انسانی راجدپتر ءَ بازیں وئیل ناماں چہ زبھر بوتگ ات – دنیا ءِ تہ ءَ بلوچ جیڑ ءِ سر ءَ باوستانی تہ ءَ گیشی اتکگ میان اُستمان ءُ ایندگہ دنیا ءِ ادارہ ءُ ڈیھاں بلوچ جد ءُ جھد ءَ دلبڈی رس اِتگ –

بولان ءَ پاکستانی پوج ءِ سر ءَ مروچی دو شمبے ءَ اُرش کرتگ ءُ دو کارندہ کُشتگ اَنت – جیئند بلوچ

دی بلوچستان پوسٹ

بلوچ لبریشن آرمی ءِ جارکش جیئند بلوچ ءَ وتی شنگ کرتگیں درشان ءِ تہ ءَ بولان ءَ پوج ءِ سر ءَ بیتگیں اُرش ءِ زمہ واری منّ اِتگ ءُ گوشتگ کہ سرمچاراں مروچی بولان ءِ دمگ مچ ءَ سی خنی ھند ءَ پاکستانی پوج ءِ کارندہ آئی ای ڈی ءِ گون ءَ نشانگ کرتگ اَنت –

جارکش ءَ گْوشت اُرش ھما وھد ءَ کنگ بیتگ آ وتی پوسٹ ءِ واستا پند ءَ آپ برگ ءَ بیتگ اَنت –

جیئند بلوچ ءَ گْوشت کہ اُرش ءِ آسر ءَ پاکستانی پوج ءِ دو کارندہ جاہ پہ جاہ ءَ مُرتگ اَنت – اے اُرش ءِ زمہ واری ءَ بلوچ لبریشن آرمی منّ اِیت –

دی بلوچستان پوسٹ

سر بیتگیں ھالانی رد ءَ روکپتی بلوچستان ءِ بنجاھی شھر دزاپ “زاھدان ” ءَ دگ ءِ وئیلے ءَ چار مردم زدگ ءُ یکے بیران بیتگ –

اھوالکار ءِ رد ءَ دزاپ ءُ زابُل ءِ میانی دگ ءَ مروچی یک گاڑی ءِ چپ بیتگ ءُ چریشی ءَ یک مردمے بیران ءُ چار زدگ بیتگ اَنت –

وئیل ءَ نادراہ جاہ ءِ کمکی گاڑی وئیل جاہ ءَ شتگ ءُ زدگ بیتگین ءُ بیران بیتگیں مردم چِست کنگ ءُ ھاتم الانبیاء نادراہ جاہ ءَ سر بیتگ اَنت –

زانگ بہ بیت روکپتی بلوچستان ءَ یکشل ءَ دگ ءِ وئیل درپیش بیگ ءَ اَنت کہ آیانی گیشتریں سوب دگانی سر ءَ رؤکیں ترند رؤکیں گاڑیانی گوشگ بیگ اِنت –

دی بلوچستان پوسٹ

راجمان ءِ وانگ ءِ گر ءُ دار کنوکیں وزیر شفقت مھمود ءَ کرونا ویروس ءِ گیشی ءِ سوب ءَ بیست ءُ شش نومبر ءَ داں بیست ءُ چار دسمبر ءَ وانگ جاھانی بند کنگ ءِ جار پِرینتگ –

آئی ءَ دیمترا گْوشت کہ بیست ءُ پنچ دسمبر ءَ داں دَہ جنوری ءَ دراھیں وانگی ادارھاں سردیانی مولم ءَ بند کنگ بنت –

شفقت مھمود ءَ گْوشت کپ بیست ءُ شش نومبر ءَ پد پاکستان ءِ دراھیں وانگی ادارہ آن لائن کلاس گپت کن اَنت ءُ چُکانی دسمبر ءِ بوکیں چکاس دارگ بیتگ اَنت ءُ لوگ ءَ وانگی درچ برجاہ کنگ بنت –

راجمان ءِ وانگی گر ءُ دار کنوکیں وزیر شفقت مھمود ءِ چیردستی ءَ دیوانے برجم کنگ بیتگ، دیوان ءَ کرونا ویروس ءِ سوب ءَ وانگجاھانی بند کنگ ءِ سر ءَ درستیں وزیراں منّ اِتگ ءُ یک ماھے ءَ وانگ جاھانی بند ءِ شور داتگ –

راجمانی وانگی وزیر شفقت مھمود ءَ گْوشت کہ اُستاد ءُ چکانی جانسلامتی اژدری اِنت آئی ءَ گْوشت کہ چُک اے نادراھی ءَ یلہ کنگ نہ بنت بلکیں آیانی دلگوش کنگ اژدری اِنت –

راجمان ءِ شوربندی وزیر اسد عمر ءَ چیردستی ءَ نیشنل کمانڈ اینڈ آپریشن سینٹر ءَ نیاد بیتگ، نیاد ءَ وانگی وزیر شفقت مھمود، جانسلامتی ءِ ٹپاس کار فیصل سلطان ءُ دگہ سروک نیندوک بیتگ اَنت –

نیاد ءَ کرونا ءِ نادراھی ءِ گیشی، وانگی پرکاری ءُ دگہ جیڑھانی سر ءَ دلگوش دیگ بیتگ اَنت ءُ نیشنل کمانڈ اینڈ آپریشن سینٹر (این سی او سی) ءِ رد ءَ پاکستاج ءَ وانگی ادارھانی تہ ءَ گوستگیں یک ھپتگے ءَ کرونا ویروس ءِ نادراھی ءَ ھشتاد ءُ درسد بیتگ –

بولان ءَ پاکستانی پوج ءِ سر ءَ اُرش کُتگ ءُ ریل ءِ پٹی تراک ناکیں شورواں گوں تباہ کتگ – جئیند بلوچ

دی بلوچستان پوسٹ

سربیتگیں ھالانی رِد ءَ بلوچستان ءِ دمگ بولان ءَ ناشناسیں سلاہ بندیں پاکستانی پوج ءِ سر ءَ اُرش کُتگ ءُ ریل پٹی تراکناکیں شورواں گوں تباہ کنگ ءَ ھوار ریل پٹی ءِ نگھپانی کنوکیں پوجی کارمند ھم تراک ناکیں شوروانی نشانگ کنگ بوتگ اَنت –

گیشیں ھالانی رِد ءَ گوستگیں شپ ءَ بولان ءَ جما شار ءِ نزیک ءَ ناشناسیں سلاہ بندیں مردماں پاکستانی پوج ءِ پانگس ءِ سر ءَ اُرش کتگ اُرش پاکستانی پوج ءَ جانی ءُ مالی تاوان رس اِتگ –

چرے اُرش ءَ پد ریل ءِ پٹی ھم تراک ناکیں شوروانی نشانگ کنگ بوتگ اُرش ءَ ریل ءِ پٹی پُرشتگ –

اھوالکار ءِ رِد ءَ مروچی سھب ءَ ھم پاکستانی پوج ءِ سر ءَ اُرش کنگ بوتگ، پاکستانی پوج ءِ سر ءَ ھما وھد ءَ تراک ناکیں شوروانی نشانگ کنگ بوتگ وھدیکہ آ ریل پٹی چارگ ءِ ھاتر ءَ ترءُ گرد ءَ بوتگ اَنت –

دومی نیمگ ءَ بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ ھرسئیں اُرشانی زمّہ واری منّ اِتگ گوشتگ کہ مئے سرمچاراں گوستگیں شپ ءَ بولان ءِ دمگ مچھ ءَ جما شار ءِ نزیک ءَ برجاھیں پاکستانی پوج ءِ پانگس ءِ سر ءَ اُرش کُتگ، اُرش ءِ آسرا یک پوجی کارمندے ھما دمان ءَ مُرتگ ءُ بازینے زدگ بوتگ ءُ پاکستانی پوج ءِ پانگس ءَ سک باز تاوان رس اِتگ –

جارکش ءَ وتی درشان ءِ تہ ءَ دیمتر ءَ گوشتگ کہ مئے سرمچارانی دومی ٹولہ ءَ بلوچستان ءَ چہ پنجاپ ءَ رؤکیں ریل ءِ پٹی تراک ناکیں شورواں گوں تباہ کتگ ءُ وھدیکہ مروچی سھب ءَ ریل پٹی ءِ چارگ ءِ ھاتر ءَ اتکگیں پوجی کارمند ھم مئے سرمچاراں تراک ناکیں شوروانی نشانگ کرتگ انت، اُرش ءَ چہ دو پوجی کارمند زدگ بوتگ اَنت –

دی بلوچستان پوسٹ

سوریں کوٹور ءَ پاکستانی پوج ءِ پانگس ءُ سنگر ءِ سر ءَ اُرش کُتگ دو کارمند کُشتگ یکے زدگ کُتگ – میجر گْوھرام بلوچ

بلوچ راجی آجوئی لوٹوکیں گل بلوچستان لبریشن فرنٹ ءِ جار کش میجر گْوھرام بلوچ ءَ رسانکدراں وتی شنگ کرتگیں درشان ءِ تہ ءَ مند ءَ پاکستانی پوج ءِ پانگس ءِ سر ءَ بیتگیں اُُرش ءِ زمہ واری منّ اِتگ ءُ گْوشتگ کہ مرچی ادار یازدہ ءَ مند سوریں کوٹور ءَ سرمچاراں پاکستانی پوج ءِ پانگس ءِ سر ءَ گوں دیرجنگیں توپکے ءَ یک کارمندے نشانگ کُرتگ ءُ کُشتگ-

جارکش ءَ دیمتر ءَ گوشتگ کہ ھمے وھد ءَ پانگس ءِ سر ءَ گوں مزنیں سلاھاں اُرش کُرتگ ، اُرش ءِ آسر ءَ پاکستانی پوج ءِ یک کارمندے مُرتگ ءُ یکے زدگ بیتگ –

گُڈسر ءَ بی ایل ایف ءِ جارکش ءَ گْوشتگ کہ مئےاُرش داں بلوچستان ءِ آجوئی ءَ برجاہ مان اَنت-

تیرگواری ءَ یک کسان سالیں زھگے ھم ھوار اِنت –

دی بلوچستان پوسٹ

سر بیتگیں ھالانی رد ءَ روکپتی بلوچستان ءِ دمگ سرباز ءَ ناشناسیں مردمانی تیرگواری ءَ زھگے ءَ ھوار دو مردم زدگ بیتگ اَنت –

اھوالکار ءِ رد ءَ تیرگواری ءِ وئیل گوستگیں مگرب ءَ رند پیش اتکگ ءُ وئیل سرباز ءِ میتگ انزا ءَ بیتگ کہ اود ءَ ناشناسیں مردماں یک گاڑی ءِ سر ءَ نھادی جاہ ءِ نزیک ءَ تیرگواری کرتگ کہ چریشی ءَ چار سالی چُکے ءَ ھوار دو مردم زدگ بیتگ اَنت –

زدگ بیتگیں مردمانی پجار حسین ملک رئیسی ء مھمد نور جھمنند کیشکلگ ءُ عبدلطیف ملازئی جھمنند انزا ءِ ناماں زانگ بیتگ اَنت –

اھوالکار ءِ رد ءَ حسین ملک رئیسی ءِ اُمر چار سال اِنت کہ وتی پِت ءِ ھمراھی ءَ گاڑی ءَ سوار بیتگ ءُ روگ ءَ بیتگ اَنت –

اھوالکار ءِ رد ءَ تیرگواری کنوک گاڑی ءَ سوار بیتگ اَنت ءُ اے مردمانی سر ءَ تیرگواری اش کرتگ ءُ تیر حسین ملک رئیسی ءِ لاپ ءَ پیوست بیتگ اَنت ءُ سَے تیر عبدلطیف ءِ پاداں لگ اِتگ اَنت ءُ چریشی ءَ پد زدگ بیتگیں مردم پھرہ ءِ نادراہ جاہ ءَ برگ بیتگ اَنت –

دی بلوچستان پوسٹ

سر بیتگیں ھالانی رد ءَ مند ءِ دمگ سھرین کوہ ءَ پاکستانی پوج ءِ چوکی سر ءَ ناشناسیں سلاہ بندیں مردماں اُرش کرتگ –

دمگی مردمانی رد ءَ پاکستانی پوج ءِ چوکی ءِ سر ءَ اُرش ساھت یازدہ ءَ بیتگ ءُ اُرش مند سھرین کوہ ءَ ھواریں کوہ کوہ ٹور ءَ پاکستانی پوج ءِ ھستیں چوکی ءِ سر ءَ بیتگ –

دمگی مردمانی رد ءَ ھمے دمگ ءَ گوستگیں روچ ءَ چہ پاکستانی پوج ءِ لشکر کشی برجاہ اِنت ءُ مروچی ھمے ھند ءَ ناشناساں پوج ءِ سر ءَ اُرش کرتگ –

تنی وھدی پوج ءِ نیمگ ءَ نانکہ اُرش ءِ راستی دیم ءَ اتکگ نانکہ گوستگیں روچ ءِ لشکر کشی ءِ ھال دیم ءَ اتکگ –

زانگ بہ بیت بلوچستان ءِ جتائیں جاھاں پاکستانی پوج ءِ سر ءَ اُرش بیگ ءَ اَنت کہ گیشتریں اُرشانی زمہ واریاں بلوچستان ءِ آجوئی ءِ لوٹوکیں سلاہ بندیں گل منّگ ءَ اَنت-

تنی وھدی مروچی بیتگیں اُرش ءِ زمہ واری ھچ گل ءَ پہ وت ءَ نہ زرتگ –