بلوچ یکجھتی کمیٹی ءِ بندیگیں سروک بیبو بلوچ ءَ چہ زندان ءَ دیم داتگیں یک نبشتھی کلوھے ءِ تہ ءَ گْوشتگ کہ من اگاں زندان ءَ آں بلے منی ارواہ آجو اِنت، ءُ زُلم ءُ زوراکی ءِ ھلاپ ءَ جھد چہ پیسر ءَ گیشتر مُھکم تر بیتگ۔
آئی ءَ گْوشت کہ سنگھم ھما چیز ءِ سر ءَ اوشتاتگ کہ آئی ءَ را سیاہ تریں شپ گْوشگ بیت۔ بلے راج ءَ اُمیت یلہ نہ داتگ ءُ وشھالیں سُھب ءِ باور ھست اِنت۔
آئی ءَ گْوشتگ کہ دو ماہ بیتگ کہ من ءَ بس پہ ”ھک“ ءِ گپ جنگ ءُ راستی ءِ دیم ءَ اوشتگ ءَ زندان ءَ بند آں. زالماں منی پیریں پت ھم گوں سانکلاں بندیگ کتگ، بس ھمے ھاتر ءَ کہ آ منی گوم ءَ اوشتاتگ ءُ ھر جاور ءَ من ءَ دلبڈی داتگ۔ منی مات تھنا اِنت شپ ءُ روچ منی گم ءُ پگر ءَ اِنت۔ منی دل ٹُکّر ٹُکّر بیت کہ منی سیاسی جُنز ءَ آیاں انچو درد داتگ۔
بیبو بلوچ ءَ نبشتہ کتگ: “من چہ وتی مات ءُ پت ءِ سبب ءَ بوتگیں دردانی سر ءَ دل ءِ جھلانکی ءَ پھلی لوٹاں بلے من وتی سر ءَ ھچبر جھل نہ کناں۔” اے جزم ءُ آجوئی منی مات ءُ پت ءِ رودینگ ءِ آسر اِنت۔ زندان ءِ دیوال منی جزم ءَ نزور کُت نہ کن اَنت۔ ھر روچ ءِ گوزگ ءَ گوں منی دل ءِ تہ ءَ گھگیری ءِ آچ گیش ءُ گیوار بیت۔ اے زلم ءُ زوراکی داں چنچو بہ بیت من زلم ءُ زوراکیانی ھلاپ ءَ وتی توار ءَ چِست کنان ءُ دیم ءَ روان کناں۔ زندان ءَ آں بلے منی ارواہ آجو اِنت۔ ءُ اے زوراکیں راھبند ءِ ھلاپ ءَ جنگ ءِ آچ چہ پیسر ءَ گیشتر رُژناہ تر اِنت۔
وتی کلوہ ءِ گڈسر ءَ بیبو بلوچ ءَ گشتگ کہ “منی مات ءِ ھاتر ءَ؛ تئی دوا ءُ دلیری من ءَ تاگت دنت۔ منی پت ءِ ھاتر ءَ؛ تئی دلیری منی واست ءَ رژن ءِ چراگ انت۔ ءُ ھما درستیں دلیریں مردماں کہ مئے ھمراھی ءَ اوشتاتگ انت۔ ما یکیں توار ایں، ما زُلم ءِ دیم ءَ وتی سر ءَ جھل نہ کنیں۔ ما مھکم ءُ اوشتاتگیں، ءُ ما سوبمند بَہ اِیں۔”