TBP Balochi

اوگستان ءَ گیش کپتگیں جنگ ءُ چوپانی سبب ءَ جاورانی نہ وش بوگ ءِ گمان ءَ امریکی اُرد ءَ تالبان ءِ سر ءَ دزنویسے دیم داتگ –

تالبان ءِ سر ءَ دیم داتگیں دزنویس ءَ اوگستان ءَ ھستیں امریکی اُرد ءِ کمان جارکش کرنل سونی لیگٹ ءَ گْوشتگ کہ ھونریچی ءَ ھردوکیں نیمگاں دزداری ءُ اوپاری اژدری اِنت –

آئی ءَ تالبان ءِ جارکش زَبیہ اُلا مجاھد ءَ تچک ءَ دیم داتگیں دزنویس ءَ نویستگ ءُ گُشتگ کہ اگاں جنگ ءُ چوپاں شِھمی ءَ نہ نیشت ئِے گڑا پسھی بیڑ ترندی بنت –

آئی ءَ گْوشت کہ ھردوکیں نیمگاں گند ءُ نند پتری بہ بیت اوگستان ءَ نندگ ءُ اوگستان ءِ دیمری ءِ بارو ءَ جیڑگی بنگپ بندات کنگی اِنت-

اے دزنویس ھما وھد ءَ نویسگ بیتگ کہ لھتے روچ ءَ پیسر بیست ءُ ھشت اپریل ءَ اوگستان ءَ امریکا ءُ نیٹو لشکر ءِ سروک جنرل اسکاٹ ملر ءَ تالبان ءَ را سرپد کرتگ ءُ گْوشتگ کہ اگاں شِھمی ءَ نہ نیشت ئِے گڑا ھرھمک بیڑی ءِ پسھی ءَ آئی ءَ دیمپانی کنگی اِنت –

بیست ءُ نُھ پروری ءَ امریکا ءُ تالبان ءِ میان ءَ راجدپتری مسام بندی یے بیتگ کہ چریشی ءِ سبب ءَ تالبان ءَ سَدکی کرتگ کہ آ امریکا ءُ درملکی لشکر ءِ سر ءَ بیڑ نہ بارت ءُ بندیانی بارو ءَ مٹ ءَ کابل ءِ پھزدارانی گون ءَ ایمنی ءِ گپ ءُ تران ءَ بندات کن ایں –

ایشی ءِ پشدر ءَ امریکا ءُ درملکی لشکر ءَ چاردہ ماہ ءَ اوگستان ءِ سرڈگار ءِ یل کنگے سدکی کرتگ –

تالبان ءُ امریکا ءِ مسام بیتگ کہ امریکی لشکر تالبان ءِ سر ءَ اُرش نہ کنت بلے اوگستان ءِ لشکر ءِ سر ءَ اُرش بیت گڑا آ تالبان ءِ سر ءَ بیڑی ءِ مُز ءَ داریت –

سونی لیگٹ ءَ گْوشت کہ تالبان ءِ اُرشاں ھشتاد درسد کمی اتکگ ءُ شھری دمگاں اُرشانی سَدکی کرتگ بلے ایشی ءَ ابید اُرشانی تہ ءَ گیشی آیگ گندگ ءَ پیداک اِنت –

تالبان ءِ نیمگ ءَ درملکی لشکر ءِ سر ءَ اُرش بیگ ءَ نہ اِنت بلے مسام ءَ پد آئی ءِ نیمگ ءَ اُرشانی درچ برجاہ اِنت، ءُ آ نِی ھمک روچ پنجا ءُ پنچ اُرش کنگ اِنت

دومی نیمگ ءَ بندیگانی بارو ءَ یک برے پد ءَ دیرگوستی ءِ آماچ اِنت پرچاکہ کابل ءِ پھزداراں تالبان ءِ نامی ئیں بندیگانی یلہ کنگ ءَ بھمیانگی ءِ آماچ اِنت پرچاکہ آیانی منگ اے دوبر جنگ ءِ پِڑ ءَ ایر کپ اَنت –

لیگٹ ءِ دزنویس ءِ پسھی ءَ تالبان ءَ وتساچیں بیھاری درشان ءِ دیگ ءَ امریکا ایر جتگ ءُ گُشتگ کہ ما وتی نیمگ ءَ جنگ ءِ ھلاسی ءَ اوشتوک اِنت ءُ ما وتی نیمگ ءَ مسامبندی ءِ شرپ ءَ کنگ ءَ ایں –

ھالتکانی نوسکارانی کچ ءُ کساسی ءِ رد ءَ ھمے سال ءِ بیست ءُ نُھ پروری ءَ مسامبندی ءِ سر ءَ دزنویشت ءَ پد داں انیگ ءَ تالبان ءَ چار ءُ پنچ سد ءَ گیش اُرش کرتگ ءُ اشاں چَہ درستاں گیش ھما استان نگیگی ءِ آماچ بیتگ کہ اود ءَ جھانی نادراہ کورونا ویروس ءِ نادراہ گیشتر اَنت

رس اِتگیں ھالانی رِد ءَ بلوچستان ءِ بنجاھی شھر شال ءَ شال ڈبل روڈ ءَ گاڑی ءَ یک مردمے ٹکر جتگ ءُ کُشتگ ءُ جنینے گوں دو زھگ ءَ زدگ بوتگ –

بیران بوتگیں مردمے پجار سلمان ءِ نام ءَ بوتگ وھدیکہ مھمد ارسلان ،ایان ءُ بی بی اربیا زدگ بیتگ اَنت –

پولیس ءَ لاش ءُ زدگ بیتگیں مردم نادراھجاہ ءَ سر کرتگ اَنت-

دومی نیمگ ءَ بلوچستان ءِ دمگ واشک ناگ ءَ زامباد گاڑی یے چپی بیتگ.گاڑی ءَ سواریں یک جنینے بیران ءُ دگہ شش مردم زدگ بوتگ اَنت –

زدگ بوتگیں مردم نزیکیں نادراھجاہ ءَ سرکنگ بیتگ اَنت –

زانگ بہ بیت بلوچستان ءِ جتائیں جاھاں پُرشتگیں دگانی سر ءَ بے کَچے ءَ مردم بیران ءُ لنگڑ بیگ ءَ اَنت بلے سرکار ءُ آئی ءِ واکدارانی گوشاں مورے ھم نہ وارت –

مروچی سھب ءَ بیتگیں جنگ ءُ چوپ ءَ مئے سرمچار سلامتی سوبمندی ءَ دراتکگ اَنت – بیبگر بلوچ

بلوچ ریپبلکن آرمی ءِ جارکش بیبگر بلوچ ءَ شنگ کرتگیں درشانے ءَ گْوشتگ مروچی سھب ءَ پاکستانی لشکر ءَ تمپ ءِ دمگ کلبر ءِ کوھی دمگ ءَ گل ءِ چیریں بنجل انگیر ءَ کرتگ ءُ اُرش کنگے جھد بے سوب کرتگ ءُ سرمچار سلامتی ءَ وتی مھریں بنجل ءَ شتگ اَنت ھمے وھد ءَ لشکر ءِ گون ءَ یک ادارے ءَ داں جنگ بیتگ اے جنگ ءَ لشکر ءِ بازیں کارندہ مرتگ ءُ زدگ بیتگ اَنت –

بیبگر بلوچ ءَ گْوشت کہ پاکستانی لشکر چیرجنگولانی دیم ءَ پُرشتگ ءُ بے سوبی ءِ آماچ اِنت بلے وتی پروشی ءَ لس میتگانی سر ءَ بیڑی کنت ءُ کماش ءُ زالبولاں جنت

آئی ءَ گْوشت کہ زورگریں لشکر ءِ دراھگ ءُ روگ ءَ مئے اُرش برجاہ مان اَنت

بلوچستان ءِ بنجاھی شھر شال ءَ وائس پار بلوچ مسنگ پرسنز شدکُشیں گدان ءَ 3 ھزار 9 سد ءُ چل ءُ ھپت روچ سرجم بیتگ –

پشین ءَ چہ راجدار ءُ چاگردی باسک بسم الّا ھان گوں وتی ھمراھانی ھمراھی ءَ بنجل ءِ تر ءُ تاب ءَ اتکگ ءُ بیگواھیں مردمانی کھولاں گوں دلپدردی درشان اِتگ ئِے –

ھمے درگت ءَ وائس پار بلوچ مسنگ پرسن ءِ وائس چیرمین ماما کدیر بلوچ ءَ اتکگیں مردمانی میان ءَ باوست کنان ءَ گْوشتگ کہ کسے ءَ جست کُرتگ کہ جنگ ءُ ایمنی چی انت؟ گڑا ھمے پسو رس اِتگ کہ ایمنی وھد ءَ کماشانی لاشاں ورنا کوپگ دے اَنت ءُ جنگ ھما زمانگ انت پیر ءُ کماش تمرد ءُ ورنایاں کوپگ دے اَنت ءُ مانشجاہ ءَ سر کن انت.

ماما کدیر بلوچ ءَ دیمتر ءَ گْوشتگ کہ جنگ تباھی ءُ بربادی کاریت مانشجاہ آباد بنت ءُ شھر بازار ویران، جنگ زھگاں چورو کنت ءُ جنیناں جنوزام کنت. جھان ءِ ندکاراں مدامی جنگے بگیری ءَ سوت نبشتگ بلے وھدیکہ ھمے ندکارانی ڈیھ کہ زورگراں گپتگ انسانیتے کُشت ءُ کوش بوتگ گڑا ھمے ندکاراں ند وتی سلاہ جوڑ کُتگ.

ماما کدیر بلوچ ءَ گُشتگ کہ اگاں ندکار پہ جنگے ءِ تُرس ءَ زالم ءَ زالم گشگ یل بہ دنت گڑا چاگرد چون بیت، بلوچانی توارے گار کنگے ھاتر ءَ چہ زوراکانی نیمگ ءَ وڑ وڑیں زوراکی کنگ بوگ اِ اَنت.

گڈ سر ءَ ماما کدیر بلوچ ءَ گُشتگ کہ زورگرانی نیمگ ءَ چہ لس مھلوک شھید کنگ، زورانسری آوار جنگ ءُ بیگواہ کنگ، وتی زرزیریں چریکانی دپاراں زھگ ءُ زالبولاں وتی زوراکی نشانگ جوڑ کنگ جھان ءِ انسانی ھکانی بگیری یے. اے درگت ءَ جھانی ادارھانی بے تواری آیانی پیشانیگ ءُ ٹِک ءُ نشان اِنت

بلوچ راجی زْرمبشت (بی این ایم) ءِ بنجاھی جارکش دلمراد ءَ مردمی اگبالانی لگتمالی ءِ رد ءَ اپریل ءِ ماہ ءِ گزارش ماں رسانکدراں شنگ کُرتگ ۔
گزارش ءِ تہ ءَ گْوشگ بیتگ: اپریل ءِ ماہ ءَ زیردستیں بلوچستان ءَ زورگیریں پاکستانی لشکر ءِ زوراکیانی تہ ءَ گیشی گندگ بیتگ۔سرجمیں بلوچستان ءَ پاکستانی لشکر ءَ چہ سد ءَ گیش لشکرکشیاں باز مردم آوار جتگ۔لشکرکشیاں زمینی لشکر ءِ ھواری ءَ بمبگواریں بالگرد ھم کارمرد کنگ بیتگ اَنت۔

اپریل ءِ ماہ ءَ آواران ، کیچ ، پنجگور ، مشکے، جاھو ، مند ، دشت ، بلیدہ ، زامران ، پروم ، کاھان ءُ تلی ءَ ھوار بازیں دمگاں پاکستانی لشکر ءِ رستریں زوراکی برجاہ بیتگ اَنت۔اے لشکر کشیانی تہ ءَ 12 کس پاکستانی لشکر ءُ چریکانی دست ءَ شھید کنگ بیتگ اَنت ۔کیچ مند ءَ وتی راہ ءَ روگ ءَ بیتگیں مردمانی سر ءَ پاکستانی لشکر ءَ تیرگواری کرتگ۔تیرگواری ءَ ورنایے شھید بیتگ،کولواہ ءَ پاکستانی لشکر ءَ دو شپانک تیرجتگ ءُ جون کور ءِ کش ءَ چگل دات اَنت۔ڈیرہ بگٹی ءَ نادراھے چہ واکدارنی نیمگ ءَ راھداری نہ رسگ ءِ پد ءَ شھید بیتگ۔چہ جتائیں جاھاں دست کپتگیں چار مردمی جونانی پجار نہ بیتگ۔

پاکستانی لشکر ءَ لشکر کشی ءِ میان ءَ 50 ءَ گیش گس سوتکگ ءُ بازیں گسانی سامان ءُ مردماں پس ءُ دلوت ھم دز اتگ اَنت۔ھمے ماہ ءَ چہ پاکستانی لشکر ءِ آزارجاھاں 21 مردم یلہ کنگ بیتگ۔یلہ بیتگیں مردمانی تہ ءَ 13 مردم ھمے ماہ ءِ جند ءَ بزاں اپریل2020 ءَ لشکرکشیانی میان ءَ آوار جنگ بیتگ اَنت ءُ لٹ دیگ ءَ پد یلہ کنگ بیتگ اَنت۔وھدے کہ 5 کس 2019 ءُ 3 کس 2018 ءِ بیگواہ چہ لشکر ءِ آزارجاھاں یلہ کنگ بیتگ اَنت۔

ھمے ماہ ءَ چہ کولواہ ءَ پاکستانی لشکر ءَ ماتے گوں زھگاں آوار جتگ ءُ وتی گدان ءَ برتگ اَنت ءُ بازیں روچاں بیگواہ کنگ ءَ پد یلہ داتگ اَنت۔مروچی ھم سرجمیں بلوچستان ءَ بازیں جنین ءُ زھگ پاکستانی لشکر ءِ آزارجاھاں زوراکیانی دیمپان اَنت۔

دل مراد ءَ گْوشتگ کہ داں زمہ واریں جھانی واکدار بلوچستان ءَ مردمی اگبالانی سر ءَ گامگیج مہ زیر اَنت،پاکستانی لشکر ءِ زوراکیانی تہ ءَ کمی گندگ ءَ نئیت۔

لشکر ءَ کوھی دمگ ھرچاریں نیمگاں انگیر ءَ کرتگ ءُ بالگردانی کمک ءَ جاہ جاہ ءَ وھد وھدے سر ءَ تیرگواری کنگ ءَ اِیں –

دمگی مردمانی رد ءَ پاکستانی لشکر ءَ جائو ءِ دمگ سورگر ءَ بازیں کچے ءَ زمینی ءُ برزی لشکر کشی ءِ بندات گوستگیں ماہ ءِ شانزدہ رمس ءَ کرتگ ءُ کہ انگت ءَ برجاہ اِنت –

دمگی مردمانی رد ءَ لشکر ءِ پیش گامی اورناچ، بیلہ ءُ نال ءِ نیمگ ءَ بیگ ءَ اَنت، اے وھداں کوھی پَٹی دمگاں بازیں کچے ءَ مردم لشکر ءَ دزگیر کرتگ ءُ گون وت برتگ اَنت –

زانگ بہ بیت بلوچستان ءِ جتا جتائیں جاھاں پاکستانی لشکر ءُ چیریں ادارھانی جوڑ کرتگیں ڈیتھ اسکواڈ ءِ ٹولی ءِ نیمگ ءَ لشکرکشی ءُ بیڑیانہ درچ برجاہ اِنت –

بلوچستان ءِ گیشتریں دمگاں منندی مردمانی نیمگ ءَ اے ھال سربنت کہ لشکر کشی ءِ وھد ءَ پاکستانی لشکر ءُ آئی ءِ داشتگیں کشندہ لوگانی تہ ءَ دُزی ھم کن اَنت –

بلوچ راجدارانی نیمگ ءَ اے لشکر کشی ءُ بیڑیانی ایرجنی ھم بیتگ

وائس پار بلوچ مسنگ پرسنز ءِ گدان ءَ 3ھزار 9 سد ءُ چِل ءُ شش روچ سرجم بیتگ ایچ آر سی پی ءِ باسکاں بیگواھیں مردمانی واستا برجم داشتگیں شت کشیں گدان ءَ تر ءُ تاب کرتگ –

ھمے وھد ءَ وائس پار بلوچ مسنگ پرسنز ءِ وائس چیئرمین ماما کدیر بلوچ ءَ آؤکیں مردمانی گون ءَ گپ کنان ءَ گْوشت کہ پاکستان ھمک روچ بلوچانی سر ءَ آس گواریں کھراں کارمرد کنگ ءَ اِنت، ھزارانی بلوچ بیگواہ ءُ شھید کنگ بیتگ اَنت – بلوچستان ءِ کُنڈ کُنڈ ءَ لشکری لشکر کُشی ءُ مردمانی لوگ ءُ جاگہ سوچگ بیگ ءَ اَنت –

آئی ءَ گْوشت کہ پاکستان ءِ اے آس گواریں گاماں کہ نگاہ کپ اَنت گڑا سما بیت کہ اے کساس کنگ گران نہ اِنت ءُ آؤکیں روچاں اے وڑیں ویلانی تہ ءَ گیش کیت – بلے راجدپتر ءَ اے منّینتگ کہ زیردستانی توار اے وڑ ءَ آسگواری ءَ ایرجیگ کنگ نہ بیت، پُرایمنیں مردم لٹ شاپیانی زور ءَ رسینگ نہ بنت، پاکستانی زُلم ءُ آسگواری ءِ بے ھودیں کردگارانی لٹ شاپیاں بلوچانی توان برز شاریں چونگ ءَ مِک کتگ –

آئی ءَ گْوشت کہ کاسگ چٹیں راجپرستیں ٹولی ھروھد ءَ پاکستان ءِ گاماں گوں ھمگام بیتگ اَنت، پرچاکہ آ وتی جان ءَ بس ھمے وڑی ءَ رکینت کن آں، اے چاگرد دشمن بلکیں نا ایوک ءَ پُرایمنیں جد ءُ جھد ءِ دیم ءَ دارگ ءَ اَنت بلکیں تچک ءَ مردمانی شھید کنگ ءُ آوار جنیاں دزماجن اَنت،

ماما ءَ گْوشت پاکستان کجام ھم میان اُستمانی راھبندانی منوگر نہ اِنت ءُ پاکستان ءَ اے وڑ اُمیت ءُ اوست دارگ وتی جندے پروشگے ءَ گوں بروبری اِنت