TBP Balochi

نبشتانک: سالونک شھداد جان

نبشتہ کار: گزین بلوچ

دی بلوچستان پوسٹ

شھداد تو گپّے زان ئے تئی روگ ءَ رند مۓ میتگ ءِ ھر چُک ءِ دپ ءَ تئی نام انت،
پیسبوک ءُ انسٹاگرام ءَ پہ مڑایے بس تھنا تئی پوٹو انت.
میتگ ءِ بچک ءُ ورنا تئی پوٹو وتی انچو گوش ئے وتی دلبند ءَ جتگ انت
تئی گھار پھر بندگ ءَ اَنت کہ برات سرمچارے بوتگ.
شھدو تو وَ شوت ئے بلے تو نوکیں بنداتے کرت نی ھر بلوچ وانندہ وت ءَ را گیش مھکم کنگ ءَ اِنت،وتی راہ ءُ رھبنداں سرپد بوگ ءَ اِنت ءُ پہ گلامی ءِ ھلاس کنگ ءَ وت ءَ را جوڑ کنگ ءَ اَنتـ شھداد تئی کتگیں کار،تگ تاچ پہ مپت نہ شتگ اَنت ءُ ان شاءاللہ نہ رو اَنت،نی ھر وانندہ زانت ءُ سما ءِ نیمگ ءَ روان اِنت ءُ وتی وتواجھی ءَ سر ءَ کپن بستگ ءُ گلامی ءِ ھلاس کنگ ءَ شھداد جوڑ بوگ ءَ انت۔

شھداد تئی روگءَ تئی سنگتاں ھچ باور نہ بوگ ءَ اِنت،من ترا تحی زند ءَ نزانتگ بلے تئی روگ ءَ پد ترا باز زانگ ءَ آں ۔ہاں درّا من زانتگ.

۱ تاریک رمزان ءِ ھپتمی روچ ات ما دبوج ھلاس کرتگ ات ءُ موبائل زرت کہ سوشل میڈیا ءَ چار آں دانکہ ھالے اتکگ شور پارود ءَ دو سنگت جنگ بوتگ ھمید ءَ من کمے جیڑ ات ھدا رمزان ءِ ماہ ءَ مارانیلیت، ھیر من دیم ءَ چاران ات آں کہ من تئی گیشتیر پوٹو دیست کہ تو کائد آزم مزن شھدربرجاہ ءِ باسکے بوتگ ئے من گیش ھیرانی بوت آں اے چوں اود ءَ جنگ بوتگ دانکہ پوسٹے دیست بی ایل اے ءَکبول کرتگ “اے دوئیں منی سرمچار بوتگ انت ءُ اے زانت ءُ سرپدی ئیں سنگت بوتگ اَنت ءُ چہ یک سالے ءَ گوں بی ایل اے ءَ یکجاہ بیتگ انت ” اے درس ھبر من دیست انت من وتی سنگت ھال کُرت کہ نگیگیں ھالے من ءَ گوں انت ءُ آئی ءَ کند ات کہ ترا یار چی انت انگائی ناوشیں ھال میار من دو روچ پیسر پروم ءِ سنگتانی ھال داتگ ات ءُ آئی ءَ چہ لھتے روچ پیسر ساجد ھسین ءِ اوں ھال رسینتگ ات

ساھتے ءَ پد کہ من چہ لوگ ء در آتک آں رھادگ بوت آں دیم پہ ھما سنگت ءِ نیمگ ءَ اود سر بیت آں دمانےءَ پد من سنگت ھال دات کہ درا جنگ بوتگ ءُ اسلام آباد یونیورسٹی ءَ وانگ ءَ بیتگ، گوں ھمے گپ ءَ آئی ءَ منی موباہل زرت ءُ پوٹو چار اِت اَنت ءُ گْوشت ئِے “او اڑے شھدو ترا انوں روگی نہ اَت ” گومے گپ ءَ من پسو دات تو شھداد زانتگ َ؟
ھو آئی ءَ من ءَ چار ات ءُ کند ات ءُ گشت ھو یار ۔۔۔۔۔۔۔۔
آئی ءَ باز گپ نجت وتی تہ ءَ باز جیڑگ ءَ لگ ات ءَ پاد اتک بس ھمے گپ ئِے جت سنگت من شت آں گڑا۔۔

من شھداد نزانتگ ات بلے درّا درستاں زانتگ ات ءُ من ءَ ھمے گپ سک تورگ ءَ ات کہ درا جنگ بیتگ شھداد ءِ کسہ کک من اشکت گڑا من ءَ شہداد گوں ھیالی نزیکی ودان بوت ءُ من گوں شھداد ءِ ھیالاں گوں وت ءَ را آوار جتگ ءَ درا زندگی ءَ چہ باز زانگ ءِ ءُ سکگ ءِ جھد بندات کُرت، من مدام ھمے لوٹاں ھر بلوچ وانندہ شھداد بہ بیت ءُ ھر بلوچ جوان درّا بہ بیت گڑا بلوچ ء ِگلامی ءِ دم بند بیت ءُ مرگ ئِے دیر نہ کنت.

بلوچاں وتی پگر مھکم کرتگ
تربت ءِ بلوچے بولان ءِ سپاھی بیت
زانتکاریں شھدادے دُرّا بیت
پکر ء ریھان ءُ ھوسلہ اسلم بیت
شھدادے پد ءَ پہ وتن سالونک بیت
یک گلامیں کومے پد ءَ آجو بیت

بولان پھر بندیت پہ کیچ ءِ ھاک ءَ
بچ من وتی سینگ جتءُ رودینت
او تو سالونک وتی سینگ جت ءُ واپینت.

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

نبشتانک: منی رھبریں ڈاکٹر مھرنگ بلوچ

نبشتہ کار: آجو کینگی بلوچ

دی بلوچستان پوسٹ

ڈاکٹر مھرنگ بلوچ پہ بلوچ راج ءَ یک رژنائیں کندیلے ءِ درور انت پمیشکا اے کندیل ءِ پھریزگ ھر بلوچ ءِ راجی زمہ واری اِنت پرچی ءَ کہ کندیل ءِ بے پھریزگ بزاں آئی ءِ کُشگ ءُ تباہ کنگ آئی ءِ رژنائی ماں جھان ءَ گار ءُ بیگواہ بیت۔ اگاں رژنائی ئِے گار ءُ بیگواہ بہ بیت گڑا آئی شوھاز کنگ ءَ کرنانی کرن لگ اَنت پمیشکا ما گْوش ایں ڈاکٹر مھرنگ یک سّسایے (پکرے) ءِ نام اِنت، بلوچی راج ءِ گاریں منزل ءِ رھشون اِنت، رژنائیں چراگے بلکیں ڈاکٹر مھرنگ تئی نام ءُ توار اِنت، تئی بلوچ راج ءِ دومی نام اِنت، گیرتی ٹکرے، ڈاکٹر مھرنگ تئی گُلزمین ءِ وشبوھیں پُلے ءِ نام اِنت، بلوچ راج ءِ رژنائی اِنت، ڈاکٹر مھرنگ بلوچ راج ءِ پجّار اِنت۔۔۔۔۔۔

اے بلوچ راج ءِ وشبھتی اِنت کہ ڈاکٹر مھرنگ ءِ وڑیں شیرزالیں بانکے مرچی بلوچ راج ءِ رھشونی ءَ کنگ اِنت پرچی کہ ڈاکٹر مھرنگ ءَ ھر وڑیں سکی ءُ سوری وتی چمّاں دیستگ۔ ڈاکٹر مھرنگ ءِ ھر ھما توار کہ چَہ آئی زبان ءَ درکیت آئی ءَ پہ بلوچ راج ءَ دردے مان اِنت۔ ڈاکٹر مھرنگ وابیں بلوچ راج ءِ آگاھی یے، یک راجی آشوبے گُڑا باید انت اے گلامیں راج ڈاکٹر مھرنگ ءِ وڑیں رژنائیں کندیل ءَ توسگ ءَ میل اَنت۔۔۔۔۔۔۔۔۔۔۔۔۔
پرچی ءَ کہ بلوچ راج ءِ بد بھتی اِنت کہ پاکستان ءِ وڑیں مکّار ءُ رستریں دژمن ءِ بلوچ ءِ بھت ءَ کپتگ اے ھما دژمن اِنت کہ ناں مات زانت نیکہ گْوھار
” بلوچی ءَ بتلے جن آں کہ دژمنے بیت گیرتی ئیں دژمنے بہ بیت گھتر اِنت” بلے بلوچ راج ءِ دژمن ءِ کِرّ ناں گیرتے ھست ءُ نیکہ انسانیتے ھست انت ئِے اے دژمن چَہ دْراھیں شریں چیزاں زَبھر اِنت۔۔۔۔

دگنیا ءِ تہ ءَ اے واھدیں دژمن اِنت کہ ایشی کر ءَ ناں گیرت ھست ءُ نیکہ انسانیتے! بلکیں اے ھما مکّاریں دژمن اِنت کہ ایشی دژمنی ءَ ناں کس ءِ گل بکنت نیکہ ایشی دوستی ءَ کسے گم بکنت پرچی ءَ کہ اے دژمن ءِ کِرّ ءَ انسانیت مان نیست۔۔۔۔۔۔۔۔

وھدے ڈاکٹر مھرنگ کامریڈ شھید ابدالگپار لانگو ءِ لوگ ءَ وتی چماں پچ کنت گُڑا ڈاکٹر مھرنگ ءِ گُوشاں اولی ھمے گُشگ بیت کہ تو بلوچے ئے،تو بلوچے ءِ لوگ ءَ ودی بوتگ ئے تئی بلوچ راج ءِ بھادری ءِ بلاھیں داستانے ھست پمیشکا ڈاکٹر مھرنگ گوں ھمے بلوچ راجی کسھاں گوں رُدان ءُ مزن بیت۔
گُڑا آئی کماشیں پت ءِ ھبر ھمش بیت کہ وت ءَ را پہ بلوچ راج ءَ بلوچے بکن ءُ پہ ھر جیڑہ ءَ وت ءَ را ساڑی بکن پرچی ءَ کہ بلوچ راج ءِ چم ءُ چراگ تئی وڑیں چُک اَنت۔۔۔۔۔۔۔۔۔

وھدے ڈاکٹر مھرنگ ءِ کماش پاکستان ءِ پوج ءِ دست ءَ چست کنگ بیت گُڑا ڈاکٹر مھرنگ ھما روچ ءَ پہ وتی گاریں منزل ءِ شوھازگ ءَ درکپ ایت ۔۔۔۔۔۔۔
چیزے وھد ءَ رند ڈاکٹر مھرنگ ءِ کماش ءِ لاش دور دیگ بیت بلے ڈاکٹر مھرنگ وتی پاداں نہ دار ایت روچ پہ روچ ءَ مھکم تر بیان بیت پرچی کہ آئی کماش ءَ اے سبک ءُ سوج چہ گوانزگ ءَ آئی ءِ گوشاں مان کتگ اَنت کہ تو گلامیں راج ئے، تئی ھر چیز گلام اِنت ڈاکٹر مھرنگ ءَ وتی راج ءِ درد ءُ گلامی ءِ مارشت ودی بوت کہ پَک ءَ من وَ گلامے آں منی دْراھیں راج گلام اِنت منی زبان گلام اِنت منی دست ءِ ند ھم گلام اِنت۔۔۔۔۔۔

ڈاکٹر مھرنگ ءِ کماش شھید کنگ بیت آئی ءِ سر ءَ بلاھیں بوجے کپ ایت ءُ لوگ ءِ دراھیں زمہ واری ھمائی کوپگاں بنت۔ ھما مادنیں کِشک کہ ڈاکٹر مھرنگ ءِ کماش ءَ کش اِتگ ھما منزل ءِ گاریں راہ کہ ڈاکٹر مھرنگ ءَ گْوشگ بیتگ کہ تئی منزل ءِ گاریں راہ ایش اِنت۔ ھما اِنت کہ ڈاکٹر مھرنگ ءَ ھمے گاریں راہ ءِ چراگ دست ءَ اِنت کہ یکشل ءَ منزل ءَ شوھاز کنگ اِنت ڈاکٹر مھرنگ پہ بزگی ھمے رُنگ راھاں روان اِنت اے ھما سِلیں راہ اِنت کہ اے راہ ءِ شوھازگ ءَ ھر وڑیں اڑ ءُ جنجال دیم ءَ کاینت۔ اے راہ ءَ ڈنگر ءُ ڈوک مان، اے راہ ءَ لٹ ءُ کُٹ ھم مان، اے راہ ءَ جیل ءُ زندان اوں مان، اے راہ ءَ مرگ ءُ بزگی جنَگ ءُ کُشگ دراہ مان اَنت بلے ڈاکٹر مھرنگ اے دراھیں بزگیاں وتی چماں گندگ اِنت بلے انگت ءَ وتی پاداں دارگ ءَ نہ اِنت پرچی ءَ کہ آئی ءِ گوشاں آئی کماشیں پت ءِ توار پیداک اِنت مھرنگ پاداں مہ دار تئی منزل ھمش اِنت تئی منزل نزیک اِنت ءُ اے منزل ءِ شوھاز کنگ پہ بلوچ راج ءَ نوکیں بانداتے، مھرنگ تو منی چم ءُ چراگ ئے من ءَ تئی سر ءَ ناز اِنت تئی منزل ھمش اِنت روان کن پاداں مہ دار منی چُک مھرنگ جان دمبرگ پہ تو ایب اِنت۔۔۔۔۔۔۔۔

ڈاکٹر مھرنگ ھمے سوڑگ کنت کہ پہ من بلوچ راج ءِ ھکانی واست ءَ من ءَ ھر رنگیں اڑ ءُ جنجال دیم ءَ بیت بلے من ایشانی پرواہ ءَ نہ کن آں پرچی کہ من کامریڈ ابدالگپار ءِ چُک آں چی ءَ کہ ڈاکٹر مھرنگ ءَ وتی کماش ءِ داتگیں پنت ءُ سکین وتی گُشان ءِ لمب ءَ بستگ اَنت۔۔۔۔۔۔۔۔۔۔۔

ڈاکٹر مھرنگ بلوچ راج ءِ بزگی ءُ درتگ پچی ءَ مار ایت گڑا ھر وڈیں سکی سوری برداشت کنت اے جیل ءُ زندان بیھار ءُ پاترپ پہ آئی ءَ ھچ نہ اَنت۔۔۔۔۔۔۔۔

ڈاکٹر مھرنگ ءِ بلاھیں امیتے بیت کہ من ڈاکٹرے جوڑ بِہ بَہ آں وتی بزگ ءُ درتگ پچیں بلوچ راج ءَ چہ سلیں نادْراھی ءُ بزگیاں پھریز آں بلوچ راج ءِ الاج ءَ کن آں بلے بدبھتی ءَ، توری دماگی ءُ مجگی گْوش ئے توری اندامی گْوش ئے بزاں بلوچ راج ھر وڑیں نادْراھیانی آماچ اِنت۔۔۔۔۔۔۔۔۔۔۔۔

ڈاکٹر مھرنگ چار ایت جسمانی الاج پہ دوا ءُ درمان ءَ الاج کنگ بنت بلے مجگی الاج ءَ کجام رنگ ءَ بکن آں مزنیں نادْراھی وَ اے نہ اِنت کہ پہ دوا ءُ درمان ءِ الاج کنگ بیت بلکیں مزنیں نادْراھی اے مجگ ئیگ اِنت ءُ مجگی نادْراھی ءِ الاج ءَ چِہ وڑ ءُ ڈول بکن آں۔۔۔۔۔۔۔۔۔

پمیشکا ڈاکٹر مھرنگ پہ مجگی نادْراھی ءِ الاج ءَ ھر بلوچ ءِ درا ٹُک اِیت ڈاکٹر مھرنگ چار ایت کجام جاہ ءَ بلوچے ھست الم آئی ءَ جیڑہ مجگی نادْراھی اِنت۔۔۔۔۔۔۔۔۔۔۔۔
دْراھیں بلوچ راج مجگی نادْراھی کنگ بوتگ پرچی ءَ کہ کبزہ گیرے کوشش ھمش اِنت کہ مجگی گلام بکنت گلامیں راج ءَ ترس ءُ بیم ءِ آماچ بہ بیت پرچی ءَ کہ اے دژمن بلوچ راج ءِ مکاریں دژمنے اے مکاریں دژمن ءِ کوشش مُدام ھمش اِنت اے راج ءِ تہ ءَ مجگی گلاماں ودی بہ کنت۔۔۔۔۔۔۔۔۔۔
ڈاکٹر مھرنگ ءَ چراگ دست اِنت پہ گاریں منزل ءِ شوھازگ ءَ کہ بلوچ راج ءَ چَہ مجگی نادْراھی ءَ آسودگ بکن آن ءُ وش ءُ وشھالیں زندے بِہ دیان ئِے پرچی کہ اے منی راجی زمہ واری اِنت من وتی کماشیں پت ءِ ھبر ءَ پروشت نہ کن آں اے سکین منی کماش ءَ من ءَ داتگ کہ وتی پاداں مہ دار وتی ھمراھاں راہ ءِ نیم ءَ یلہ مہ کن وتی گاریں منزل ءَ شوھاز بکن الم آجوئی منزل ترا رس ایت ءُ چوناھیگا تئی منزل چُش دور نہ اِنت نبا کن وتی پاداں بہ دار ئے بلکیں منزل ءِ دیم ءَ روان کن۔۔۔۔۔۔۔۔۔۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

نبشتانک: دو پُرشتگیں دانک پہ واجہ ھیر بیار مری ءَ

نبشتہ کار: جنگان دشتی

دی بلوچستان پوسٹ

بیست ءُ نو جون ءَ بریگیڈ ءِ چار یاگی ئیں ورناھاں کراچی اسٹاک ایکسچینج ءِ سر ءَ یک جوانیں پِدائی اُرشے کُت ءُ چار زمین زادگیں ورناھاں جام شھادت نوش کُت۔ پدائیاں پاکستانی لشکر ءِ بیست ءُ سے کارندہ مُردار کُت۔ سنگت سلمان ھمل، سنگت تسلیم ،سنگت سراج، سنگت شھزاد ءَ پاکستان سیرین پروش کُت ۔سنگتانی اے پِدائی ءَ بلوچ سرڈِگارءَ نندوکیں شوانگ ءُ شِپانکاں پدائی سرمچنڈانی تمردی سُھررنگیں دروت گشُتگ۔ دنیا ءِ انِسان دوستیں بنی آدماں پِدائینانی پلہ مرزی ھم کُتگ۔
بلے من اجب ھیراناں کہ یک گلے ءِ راھدبرے آجوئی جُنزے ءِ شپانکی ءَ کنگ ءَ اِنت آ مدام پندل سازیانی  آماچ اِنت ، برے اے گَلّ برے جُنز ءَ رَد گُش اِیت۔نہ زاناں پرچی ءَ ؟۔۔۔۔۔۔اے جنگ آزادیءِ جنگے۔ گُلامی ءِ ھلاس کنگ ءِ جنگے ۔ننگ ءُ ناموس ءِ رکھینگ ءِ جنگے۔ما چی ءَ وت ءَ بھر ءُ بانگ کُتگ؟
یکمُشتی ءُ تپاکی ءِ پرچا گپءَ نہ جنیں؟ یکے دومی ءِ چی ءَ گُٹّ ءِ ھونانیں ؟۔بی ایل اے ھمے پندل سازاں دو بھرءَ کُت۔دُژمنءِ زوراکی روچ پہ روچ ودان انَت۔ھر روچ زوراکیانی نوکیں دِرچے بِندات بیت۔ ھر روچ یک ژانگولیں لاشے دستکپ ایت۔۔ھر روچ یک ماتے ءِ بچ ءِ زندان ءِ تھاریں کھوٹیانی باھوٹ کنگ بیت۔۔ ھر روچ شال ءِ دگانی سر ءَ مات ءُ لاڈیں گُھار بے پردگ کنگ بنت ءُ ارسانی شھکوراں تاچین اَنت۔
اگاں یک شپانکے بہ بیت ءُ گوں گَّلاں ھچ سیادی مدار اِیت ھما بلوچ مرزبوم مادر ءِ وتن ءِ شیدائی بہ بیت پدِائی بہ کنت تئی نِزّ ءَ آ ھم رَد اِنت ۔
پدائی ورناھاں انچیں اُرشے کُتگ دُژمنءِ گوشاں دوت  داتگ۔۔پاکستان ءِ سر وزیر اِمران ھان گُش اِیت اے ارُشءَ ایران، ھندوستان یا اوگانستان ءِ دست مان اِنت کہ بلوچ ءَ چُشیں دماگ گوں نیست۔۔بلوچءِ دماگءَ ترا دیری ھشتاد گپڑءَ کُتگ اَت۔بلوچ جند ءِ برات ءَ تپّر پاد ءَ جتگ۔
اے باز اپسوزے گپے کہ لندنی رھشُون نشتگ ءُ پِدائی ارُشءِ ایرجنیءَ کنگ ءَ انِت۔۔تو اے سوبمندیں اُرشاں رد گُش ئے۔۔۔تئی گَل پرچا سوبمندیں اُرش نہ کنت ؟ ۔تو انگت سرداریءُ واجھیءِ پالومپاں بُلم ئے ، پچ کن بُلماں بیا راجءِ دیم ءَ وت ءَ منین ۔وتی گَلءَ دیم ءَ بیار۔
اِد ءَ شھیدانی زھگ پہ لُنکھے نانءَ گُژنگ اَنت ۔اِد ءَ شھیدانی گِساں ماھانی ماہ آس روک نہ بیت۔
اِد ءَ بلوچ ماتءُ گْوھارانی سراں چو گوْسپندیں دلوتءَ ھلار کنگءَ انَت۔ اِد ءَ شھدگانی سر ءَ مات ءُ گْوھارانی پریات اَرش ءَ سر انت۔آزمان ارساں اُوژناگ اِنِت۔
اِد ءَ مرچی زھگانی وانگ ءُ زانگ ھم پچگرگ بُوَگ ءَ انِت۔راج بے وانگ ءُ زانگ ءَ گُنگدام بنت۔۔۔۔۔۔۔۔۔۔۔۔
اِد ءَ مرچی جُھد شیرزالیں گْوھاراں کوپگاں جتگ۔دُژمنءَ چیلنچ کنگ ءَ انَت تو انگت نِشتگ ءِ گوں لھتے وتگڑیں پندل سازاں سنگتانی کُربانیاں ایر جن ئے کہ من نہ کُشتگ ھلار نہ انِت.
بِل اِت اے زِد ءُ کینگاں ، بل اِت اے پندل سازی ءُ تاہ تاھیاں ، یکمِشتی ءُ تپاکی ءِ شَورے ٹھین  اِت۔مکھیں ھاک ءِ بزگی ءُ لاچاری ءَ بہ مار اِت ۔
امیت کناں واجہ منی اے پُرشتگیں دانکاں دلگوش دنت ءُ راجی جُھد ءِ بابت ءَ چد ءُ گیشتر جیڑیت ، سلامت بات ئے واجہ.

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

کراچی اسٹاک ایکسچینج ءَ ھواریں سرمچار ءِ دو برات دزگیر

دی بلوچستان پوسٹ

دی بلوچستان پوسٹ پتر ھال ءَ سر بیتگیں ھالانی رد ءَ کیچ ءِ دمگ شاپک ءَ پاکستانی پوج ءَ بیست ءُ نہ جون ءَ دو مردم دزگیر کرتگ ءُ ناشناسیں زانداناں برتگ اَنت –

دمگی مردمانی رد ءَ آوار جنگ بیتگیں مردمانی پجار کراچی ءَ اسٹاک ایکسچینج ءَ ھواریں اُرشکار سراج کنگر ءِ برات شکیل ءُ شریپ ءِ ناماں زانگ بیتگ اَنت –

آیانی گوشگ اِنت کہ شکیل ءُ شریپ ھما روچ ءَ آوار جنگ بیتگ اَنت کہ کراچی ءَ اسٹاک ایکسچینج ءِ سر ءَ سلاہ بندیں مردماں اُرش کرتگ ءُ چریشانی تہ ءَ شکیل ءُ شریپ ءِ برات سراج ھوار بیتگ –

زانگ بہ بیت بیست ءُ نُہ جون ءَ پاکستان ءِ کار ءُ باری شھر کراچی ءَ اسٹاک ایکسچینج ءِ سر ءَ سلاہ بنداں اُرش کرتگ اَت –

اُرش ءِ زمہ واری بلوچستان ءِ آجوئی لوٹوکیں گل بلوچ لبریشن آرمی ءِ جارکش جیئند بلوچ ءَ منّ اِتگ اَت –

جیئند بلوچ ءَ وتی درشان ءِ تہ ءَ گوشتگ اَت کہ اے اُرش مجید برگیڈ ءِ پدائی سرمچار سلمان ھمل، شھزاد بلوچ، سراج کنگر ءُ تسلیم بلوچ ءَ کتگ –

آئی ءَ گوشت کہ اے اُرش ءِ مول ءُ مراد بلوچ سرڈگار ءَ برجاھیں زوراکیانی پشدر اِنت –

زانگ بہ بیت ھمے وڑ ءَ دشت ءَ ھم تسلیم بلوچ ءِ سَے برات پاکستانی پوج ءَ دزگیر کرتگ ءُ برتگ اَنت –

چِد ءَ پد اُرش ءَ ھواریں سلمان ھمل ءِ کُنٹ ءِ دزگرگ ءَ رؤکیں آئی ءِ مات ءُ گوھار ھم پاکستانی پوج ءَ کراچی ءَ گپتگ اِت اَنت بلے چیزے اداراں پد یلہ کرتگ ءُ آئی ءِ کُنٹ داتگ اَت –

دومی نیمگ ءَ بلوچ لبریشن آرمی ءِ “ونگ ھکل ” ءَ پدائی اُرشکارانی شنگ بیتگیں تامر ءَ اُرش ءَ ھواریں سلمان ھمل ءَ دنیا ءَ کلوہ داتگ ءُ گوشتگ کہ بلوچستان ءِ زوراکیانی سر ءَ دنیا ءِ بے دلگوشی ءِ سوب ءَ بلوچ ورنایاں یک ترندیں گامے چِست کرتگ –

آئی ءَ گْوشت کہ اُرش ءُ بلوچ راجی جھد ءَ سلاہ بندیں مردمانی دست ءُ دپاں بیران بیتگیں مردمانی گیشتر مارا توریت بلے چُشکہ یک جنگے ءِ میان ءَ وتی دپا ءِ کنگ ءَ اے وھیل بنت –

آئی ءَ گوشت کہ اُرش ءَ اگاں انسانی ءِ جان چمے دست ءَ چَہ زوال بیت ایشی ءِ زمہ وار ما نہ اِنت بلکیں ایشی ءِ زمہ وار پاکستان ءُ آئی ءِ زوراکیانی سر ءَ بے دلگوشیں ڈیھ اَنت –

آئی ءَ گوشت کہ اگاں مروچی بلوچستان ءَ برجاھیں زوراکیانی سر ءَ جھان ءَ پاکستان ءِ سر ءَ زور پِر دات اِنت مروچی جاور اے کچ ءَ نہ بیتگ اِت اَنت –

آئی ءَ گوشت کہ مئے لیڈر ءُ رھشون جنرل اسلم ءِ ایر کرتگیں کاروان ءَ مروچی ھزارانی کچ ءَ بلوچ ورنا وتی ساہ ءِ ندر کنگ ءَ جاڑیگ اِنت –

آئی ءَ گوشت کہ داں بلوچ زمین ءِ سر ءَ زوراکی ءُ پاکستان ءِ پوج ھست ءُ جاڑیگ اِنت ایشی ءِ سر ءَ مجید برگیڈ ءِ سرمچار دیمترا گیشتر ءُ ترندیں رنگے ءَ اُرش کن اَنت –

روکپتی بلوچستان ءَ دگ ءِ وھیل ءَ چار مردم بیران سَے زدگ

دی بلوچستان پوسٹ

سر بیتگیں ھالانی رد ءَ روکپتی بلوچستان ءِ دمگ بندر اباس کنوج نودز ءَ دو گاڑیانی ٹکر ورگ ءَ چار مردم بیران بیتگ ءُ سَے زدگ بیتگ اَنت –

ڈاکٹر ابراھیم مھمدی ءَ گوشت کہ وھیل سھب ءِ ساھت نُہ ءُ بیست ءُ دو دمان ءَ بیتگ کہ وھیل ءَ ھما دمان ءَ سواریں گاڑی ءَ چار مردم بیران بیتگ اَنت ءُ دومی گاڑی ءَ سواریں سَے مردم زدگ بیتگ اَنت –

آئی ءَ گْوشت کہ وھیل نودز ءَ پٹرول پمپ ءِ نزیک ءَ بیتگ ءُ وھیل ءَ پد نادراہ کشیں گاڑی توار کنگ بیتگ ءُ چریشی ءَ پد وھیل جاہ ءَ نادراہ کشیں گاڑی سر بیتگ ءُ ٹپ ءُ ٹوریں مردم زوت برتگ ءُ نادراہ جاہ ءَ سر کرتگ اَنت –

ڈاکٹر ابراھیم مھمدی ءَ گوشت کہ وھیل ءَ زدگ بیتگیں مردم ھرسئیں مردمانی درمان امام ھسین نادراہ جاہ ءَ بیگ ءَ اِنت ءُ کُنٹ ھم ھمود ءَ برگ بیتگ اَنت –

آئی ءَ گْوشت کہ وھیل باز پدردیں وھیلے بیتگ کہ دو نیمی گاڑیانی ترند روگ ءِ سوب ءَ بیتگ –

آئی ءَ گْوشت کہ دگ پھازیں مردمانی گوشگ ءَ ابید گاڑیانی ڈرائیور دگ ءَ بے دلگوشی ءَ سپر کن اَنت ءُ وتی جاناں تاوان دیگ ءَ اَنت –

آزاد لچّہ

ندر پہ یاگی ایں شھید سلمان ھمّل ءُ آئی سنگتانی نام ءَ

شائر: عبدالواجد بلوچ

دی بلوچستان پوسٹ

واھشانی من زھراں وراں گِھتر انت
بے وسی
بے کَسی
بے سما چہ جھان
بزگی
گُژنگی
تُنّگی
ھر گورا
ھر دمان
آکبت چون بیت؟
زند ءُ مرگ ءِ
ھمسپر
اے وڑا گون بیت
آسرے رون بیت
تراول ءُ پاد شپاد
درتہ پُچی نسیب
ما کہ بندیگ اتیں
سانکلاں مھکمیں
یا کہ ڈنّ ءَ پہ ترّ ءُ گرد ءَ اتیں
زند مانا ھما پیشگیں نوبتاں
مئے گلامی ءِ بس ھمے ساھتاں
وھد ءِ زور آوراں لوپ کتگ
کَرنی ءِ تَوک
انچو گُٹ ءَ مئے
انگت دلپروش نیاں
پہ امیت زندگاں
وشیں بانداتی ءِ
آجوئیں روچی ءِ
ھئو ودار انت منا
داں جھاں است بیت
زندمان است بیت

نبشتانک: بلوچ نودربرانی جنجالیں زندمان

نبشتہ کار : لطیف سخی

دی بلوچستان پوسٹ

پروردگار ءَ بلوچ راج یک انچیں سرڈگارے ئِے واھند کرتگ کہ آ چہ ابرمی مال ءُ مڈّیاں چکار اِنت ۔ اگاں مئے راج وت اِے مڈّیاں کارمرز بہ کنت ءُ دگنیا ءِ دگہ مھلوک ءَ ھم بہ دنت انگت ءَ اے مڈّیانی تہ ءَ کمی نہ بیت۔ پمیشکا بازیں زور آوریں اِستان لوٹ اَنت کہ ما اِے سرڈگار ءِ مڈّیانی سر ءَ کبزہ بہ کن اَنت ءُ پہ وت اِش بہ بر اَنت۔
اِے پرگنجیں مڈیانی بوّگ ءَ ابید ھم مئے مھلوک ڈالچار کنگ بُوّگ ءَ اَنت ءُ مئے مھلوک ءَ را بنشتی اُگبال رسگ ءَ نہ اَنت۔ ءُ روچ پہ روچ مئے مھلوک نوکیں اڈ ءُ جنجالانی تہ ءَ ایر بُڈّگ ءَ اَنت۔ بلے اِے جاورھالانی تہ ءَ انگت مئے مھلوک وت مہ وت جِیگ ماں جیگ اَنت ءُ تپاکی نیست۔
دومی نیمگ ءَ مئے ورنائیں مھلوک نشاہ ءُ دگہ بازیں سلکاریانی آماچ اَنت بلے ایشانی گِر ءُ بند کنگ وتی جاہ ءَ انگت اِے سلکاری دیم ءَ برگ بوگ ءَ اَنت۔
مئے وانگی کتاب جاہ نوکیں دور ءِ ٹیکنالوجی ءُ آسراتیاں چہ یکسر ءَ زبھر اَنت ءُ نہ کہ مئے مھلوک ءَ را آدگہ آسراتی دیگ بوّگ ءَ اَنت۔ بس وھدے گچینکاری کہ بیت گُڑا ووٹ ءِ پِنڈگ ءَ بازیں نامینتگیں وزیر ءُ گزیر کاینت ءُ وڑ وڑیں دروگ ءُ ھنر ساز اَنت ءُ چہ مھلوک ءَ ووٹ گِر اَنت پد ءَ کسّے آیاناں پہ چم نہ گِندیت کجا شت اَنت۔
بلوچ راج ءِ نودربر بازیں اڈ ءُ جنجالانی دیمپان اَنت۔ زر ءُ مالی جاور بہ بنت، وانگی کتاب جاھانی وتسری بہ بنت ھر پڈ ءَنودربر ڈالچار کنگ بوّگ ءَ اَنت۔ بازیں گْونڈویے زرّی ءُ مالی ءُ نیستگاری ءَ چہ الم ءُ زانت ءِ دربرگ ءَ زِبَھر اَنت ءُ آ چہ کسانی ءَ پوریاگِری ءُ مزّوری ءَ وتی زند ءَ گْوازینگ ءَ اَنت۔ باز کم وش بھت ھست کہ آیانی مات ءُ گْوھار کِراھی ئیں گُد دوچی کن اَنت وتی گْونڈواں شھدربرجاہ ءَ وانگ ءَ دیم دینت۔ سرکار ءِ نیمگ ءَ تنگ دست ءُ بزّگیں نودربرانی واست ءَ اسکالرشپے ھم نہ رسّ اِیت دانکہ آ پہ وت ند ءُ وانگی یے بہ گِر اَنت ءُ آیانی کوپگ ءِ بار کمو سُبَک بہ بیت۔ اگاں کمو پیش اسکالرشپے کیت گُڑا آ ایوک ءَ پہ میر ءُ متبرانی زھگانی واستا اَنت گریب ءُ بزّگ اے اسکالرشپ ءِ زرّاں پہ چم نہ گند اَنت۔
اے گپّ ءَ چہ ابید وانگی کتاب جاھانی تہ ءَ اڈ ءُ جنجال انچش گیش ءَ چہ گیش انت کہ بلوچ نودربر کتاب ءُ ند ءِ بدل ءَ روڈ ءُ دگّانی سر ءَ زھرشانی کنگ ءَ لاچار اَنت۔ ھمے کمو ءُ پیش کہ نودربر باریں چے پیم ءَ شھدربرجاھاں اتکگ ءُ وت ءَ پہ وانگ ءَ سر اِش کُرتگ بلے آ اد ءَ ھم چہ وانگ ءُ الم ءِ دربرگ ءَ زبھر اَنت۔

وھدے چم پچ ءُ سرپدیں وانندھے کہ وتی راجی اُگبالانی بابت ءَ گپ ءُ توارے چِست کنت گُڑا ووٹ پنڈ ءُ میر ءُ متبر آئی ءَ را گنوک ءُ ابدال گش اَنت ءُآئی ءِ ھاموش کنگ ءِ ھاتر ءَ وڑ وڑیں ھنر ساز اَنت۔ بلے بژنیگیں گپ ایش انت کہ مروچی ھما کہ وت چہ پارلیمانی مھلوک ءَ چہ جتا ءُ سرپدیں مھلوکے سرپد بنت بلے آ ھم مروچاں وتی زات ءَ چہ در نیا اَنت ھر یکّے وت ءَ برز لیکیت ءُ دومی ءَ جھل جنگ ءُ بے توار کنگ ءِ جھد ءَ کنت۔ ھمے گیر سیاسی ءُ نپ ءُ پائیدگ دوستیں مردمانی سوَب ءَ بازیں نودربر مایوس بوگ ءُ بے توار بوّگ ءَ اَنت چُشکہ اِے یک بلاھیں تاوانے اگاں مردم بہ جْیڑیت۔

اِےکُلّیں جْیڑہ وتسر ءَ گِش ءُ گیوار نہ بنت ایشانی گِْش ءُ گیوار کنگ ءِ واستا کلّیں نودربراناں یکمشت بوگی اِنت۔ ھما مردم کہ آ مارا یکمشتی ءَ نیل اِیت ءُ مئے میان ءَ دوری ءُ گستائی ودی کنت گُڑا ما الّم چُشیں مردماناں وتی میان ءَ جاگہ مہ دنت۔ پرچا کہ تپاکی ءِ پروشوک ءُ مزن شان ءُ بادشاھی لوٹوکیں مردم اَنت۔ مروچی ھمیشانی سوَب اِنت کہ روچ پہ روچ مئے اڈ ءُ جنجال گیش ءَ چہ گیش بُوّان اَنت۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

نبشتانک: آزمانک , دل ءَ مہ کن

نبشتہ کار: راجدار کَلّگی

” سلام ۔”
” وعلیکم سلام ۔”
” چون ئے ساہ ؟ “
” من وش آں ، تو چون ئے ؟ “
” من ھم وش آں ۔”
” ھُدا ترا وش بہ کنت ۔”
” گوں ترا ھوار ۔”
” آمین ۔”
” دزگٹ ئے ؟ “
” اناں ، چے ءَ زاناں ؟ “
” بس اَنچو جُست کُت ۔”
” ھو ۔”
” جی ھو ۔”
” شر ! “
” زندگی چون گوزگ ءَ اِنت ؟ “
” اَنچو کہ ساری ءَ ! “
” دروگ بندگ ءَ ئے ۔”
” گون تو دروگ بستگ ؟ “
” بلکیں ! “
” ترا زاناں منی کجام گپ باور بوتگ ؟ “
” تَوازہ کرت ساہ ! “
” چُشیں توازہ مہ کن ۔”
” پرچا ؟ “
” وت ۔”
” گپے ھست ۔”
” چونیں گپے ؟ “
” اگاں گپے مہ بوتیں تو نہ گُشتگ اَت توازہ مہ کن ! “
” وتی اِلاج ءَ بہ کن ۔”
پرچا زاناں من چوناں وتی اِلاج ءَ بہ کن آں ؟ “
” ترا وھم ءِ بیماری ءَ گپتگ ! “
” گڑا وتی دستاں ھِنی کن ۔”
” نہ لوٹ اِیت ۔”
” بلکیں ترا واب ءَ گپتگ ؟ “
” اِناں ۔”
” بلکیں گپ ءِ موڑ ءَ نہ ئے ؟ ۔”
” ھمے چی اِنت گپ ءَ آں ۔”
” شر اِنت منی جند ءَ مہ جن ! “
” بزگ ! “
” تو بزگ کتگ ۔”
” من چی ءَ ؟ “
” تو دروگ بست ۔”
” چونیں دروگ ؟ “
” تو گُشت من ءَ دوست بئے ۔”
” گڑا ؟ “
” گڑا تو من ءَ یل کُت ۔”
” منی چے میار ؟ “
” تو رازی اَت ئے سور ءَ ۔”
” واللہ زورینے اَت ۔”
” دروگ مہ بند ۔”
” کسم اِنت بس ! “
” اگاں زورینے گڑا یلہ ئِے کن ! “
” نہ بیت ۔”
” پرچا ؟ ۔”
” گپ ءَ یل کن ! ۔”
” متلبی ۔”
” لاچاری ءَ سرپد بو ۔”
” نہ باں ۔”
” ترا منی سر ءِ کسم اِنت ۔”
” مراد بات ترا ، من ھچ نہ گُش آں ۔”
” ھرچی گُش ئے بہ گُش ۔”
” ھچ پشت نہ کپتگ ۔”
” دل ءَ کُرت ؟ ۔”
” اِناں ۔”
” بلکیں زھر کُرت ۔”
” اناں ۔”
” گڑا ؟ “
” ھچ ! “
” بہ وسپ ! “
” واب نئیت ۔”
” گنوک ! “
” پہ تو گنوک آں ۔”
” وتی دماگی ٹِسٹاں بہ کن ۔”
” اگاں ٹسٹانی تہ ءَ تئی نام در آتک ؟ “
” زاناں من وائرسے آں ؟ “
” ھو ! “
” چونیں ؟ “
” گنوکی ءِ ! “
” بُدّو ! “
” بدل بوان ئے ! “
” ترا وھم اِنت ۔”
” ساری ءَ چو نہ اَت ئے ! “
” گڑا چوں اَت آں ؟ “
” ساری ءَ تو من ءَ وار نہ داتگ پہ گپ ءَ ! “
” دْرستیں وھد ءَ مردم یک وڑ نہ بیت ۔”
” گڑا پھل کن من نہ زانتگ ۔”
” نوں بزاں ۔”
“شر ۔”
” شر اِنت گڑا من نِٹ ءَ بند کنگ ءَ آں ۔”
” تور اِت ئے ؟ “
” اِناں ۔”
” گڑا نِٹ ءَ پرچا بند کن ئے ؟ “
” وسپیں ۔”
” بلکیں ھبر ئِے دات ھھھ ۔”
” اِناں ! آئی ءِ نام ءَ مہ گِر ۔”
” پرچا ؟ “
” وت ۔”
” بلکیں ترا چہ من دوستر اِنت ؟ ۔”
” من ترا گُشت وتی اِلاج ءَ بہ کن ۔”
” گپ ءَ تاب مہ دے منی جُست ءِ پسو ءَ بہ دے ۔”
” کجام جُست ءِ ؟ “
” من ترا دوستر آں یا آ ؟ “
” تو سور بہ کن وت زان ئے ! “
” گوں کے ؟ “
” من چے زان آں ؟ “
” زاناں بے ھیال ئے ؟ “
” اِناں ! بلے من ءَ شموش ۔”
” اِنچو ارزان نہ اِنت ۔”
” ارزان بیت دل ءَ شود ۔”
” دل زاناں گُدے ؟ ۔”
” من دگہ ھچ نہ زان آں ! “
” گڑا کول ءُ کرار ؟ ۔”
” من ءَ واب ءَ گپتگ ۔”
” شر اِنت بہ وسپ ۔”
” دل ءَ مہ کن ۔”
” تو وتی منزل ءَ رس ات ئے نوں من دل ءَ کن آں یا نہ کن آں چے پائدگ ؟ “
” شر اِنت دگہ روچے اے بارو ءَ گپ کناں اَنی موبائل ءِ لیٹ آئی ءِ چمانی تہ ءَ سک اِنت ۔”
۔۔۔۔۔۔۔۔۔
ھلاس

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

دی بلوچستان پوسٹ اھوال پتر ءَ سربیتگیں ھالانی رد ءَ تربت ءَ ماھیگانی نھادی ءَ ناشناسیں مردمانی تیرگواری ءَ لیویزے کارمندے بیران بیتگ۔ھمے وڑ ءَ چہ کیچ ءَ سربیتگیں ھالانی رد ءَ مروچی بیگاہ ءَ کیچ ءَ چہ ھوشاپ ءِ جاہ منندیں ورنایے بیگواہ بوتگ-

اھوالکارانی رد ءَ بیران بیتگیں لیویز کارمند ءِ پجار تارک اسھاک ءِ نام ءَ زانگ بیتگ –

ھندی مردمانی رد ءَ کوش ءِ سوب داں انگت ءَ زانگ نہ بیتگ ءُ کوش کار ھم دزگیر کنگ نہ بیتگ اَنت-

دمگی مردمانی گوشگ اِنت کہ تارک اسھاک تربت ءَ لیویز ھیڈکوارٹر ءِ انچارج بیتگ –

دومی نیمگ ءَ مروچی بیگاہ ءَ ندیم ء مرادبکش جھمنند کیچ دمگ ءِ ھوشاپ ھنکین، تربت ءَ چہ دراَتکگ دیم پہ ھوشاپ ءَ رؤگ ءَ بوتگ کہ تربت ءِ دمگ آپسر ءِ نیمگ ءَ آسکانی ءِ ھند ءَ چہ گار ءُ بیگواہ اِنت-

اھوالکار ءِ رِد ءَ ندیم ھوشاپ ءِ جھمنند اِنت ءُ سَے چار روچ بیت کہ پہ وتی اِلاج ءِ ھاترا تربت ءَ شُتگ ءُ اِلاج ءَ چہ پد مروچی ھوشاپ ءَ رؤگ ءَ بوتگ کہ بیگواہ اِنت-

اے بیگواھی ءِ درگت ءَ دنیگت دلجمیں اھوال آیگی اَنت، اھوالکاراں ٹی بی پی ءَ گوشتگ گمان ھمیش اِنت کہ اے بیگواھی ءَ اِستانی چیردستی ءَ کارکنوکیں ڈیتھ اسکواڈانی کارمند ھوار بہ بنت پرچہ کہ اے دمگانی تھ ءَ ایشانی ھمے وڑیں سلکاری چہ کسءَ چیر نہ اَنت۔

دی بلوچستان ھال پتر ءَ سر بیتگیں ھالانی رد ءَ پاکستانی پوج ءُ چیریں گلاں چہ کراچی ءِ دمگ لی مارکیٹ ءُ چہ ھب چوکی ءَ دو بلوچ دزگیری ءَ پد بیگواہ کُتگ اَنت ءُ ناشناسیں جاھاں بُرتگ اَنت۔

اھوالکارانی ردءَ کراچی ءِ دمگ لی مارکیٹ ءَ چہ اِستانی لشکر ءِ کارمنداں فرید ء گلام مھمد چہ آئی ءِ کار جاہ ءَ چہ دزگیری ءَ پد بیگواہ کُتگ ءُ ناشناسیں جاھاں بُرتگ۔

ھمے وڑ ءَ چہ ھب ءَ سر بیتگیں ھالانی رد ءَ ھیدر ء گلام مھمد کہ ھب ءَ وتی کار ءِ سر ءَ بیتگ دزگیری ءَ پد بیگواہ کنگ بیتگ اَنت۔

اھوالکارانی گوشگ اِنت کہ اے دزگیری چہ کراچی اسٹاک ایکسچینج ءِ سر ءَ بی ایل اے اُرش ءِ پد ءَ پد بندات بیتگ اَنت۔ ءُ داں انگت کراچی ءُ کش ءُ کرءِ دمگاں چہ مزنیں کساسے ءَ مردم دزگیری ءَ پد بیگواہ کنگ بیتگ اَنت۔

ھمے وڑ ءَ زیک کراچی اسٹاک ایکسچینج ءِ سر ءَ اُرش ءَ ھواریں سلمان ھمل ءِ مات ءُ گوھار چِست کنگ بیتگ اِت اَنت بلے مروچی یل کنگ بیتگ اَنت ءُ سلمان ھمل ءِ کُنٹ آیاں دیگ بیتگ۔

بازیں ھندی اھوالکار ھمے ھم گمان کنگ ءَ اَنت پاکستانی پوج ءُ چیریں گل کراچی اسٹاک ایکسچینج ءِ سر ءَ اُرش ءَ پد یک رندیں پد ءَ ترندیں آپریشن ءِ کنگ ءِ درگت ءَ جیڑگ ءَ اَنت ءُ بیت کنت آیانی نشانگ گیشتر بلوچ سیاسی ءُ چاگردی جھدکار ھم بہ بنت۔