انچوش گْوش اَنت کہ اَئید وشیانی روچ اِنت اَئید ءَ دُرست گل ءُ شادان بنت دل پہ دل بنت وتی گَم ءُ پریشانیاں بے ھیال کن اَنت اے ساھت ءَ وتی سیاد، وارس، سنگت ءُ همساھگ دُرست کا اَنت وتی پیشگیں دل چلی ءُ جنگ ءُ چُوپ دل گِرانی هرچی بیتگ پیش ءَ دُرستاں چہ وت ءَ آزات کن اَنت نوکیں بانداتی ءِ وادہ کن اَنت زند ءَ نوک گوازینگ ءَ جُنزان کن اَنت-
بلے مئے اَئید اے وڑ نہ اَت- من اَئید ءَ چہ لھتیں روچ پیشتریں گپے کناں من وتی لھتیں سنگتانی دیوانے ءَ نشتگ اتاں گڑا اَئید ءِ روچ هم نزیک اَت سنگت اَئید ءِ بابت ءَ گپ جنگ ءِ ات اَنت بلے، اَئید ءَ سک ایر جنگ ءَ ات اَنت گوش ئے اَئید کیت سنگتانی آزگیں ٹپ پد ءَ نوک بنت یک سنگتے ءَ گُشت اَئید مئے واستا وَ نہ اِنت، اَئید مئے واستا بھ نیاتکگ ما زور اَئید کنیں اَئید ھما کومانی واستا اِنت کہ آ وت شادانیں وشهالیں آزاتیں کوم اَنت اَئید پہ ھماھان انت، مئے اَئید بس یک روچے کیت بلے اے اَئید مئے نہ اِنت، زی مئے کُٹ ءَ سنگت شهید بیتگ اَنت هزاراں ماتانی سالونکیں بَچ پہ مئے آهوکیں باندات ءِ هاتر ءَ وتی سر کُربان کتگ اِش اے مات چون اَئید کن اَنت؟ زیکیں گپ ءَ بل مرچی مئے مات ءُ گوهار وتی سالوکانی شوهاز ءَ روڈ ماں روڈ دَمگ ماں دَمگ اَنت اَئید ءِ روچاں هم وتی گس ءَ نہ اَنت یکے ءَ وتی پِت ءِ اکس گون اِنت چکری یکے ءَ وتی برات ءِ یکے ءَ ناکو ءُ ناکوزتکانی یکے ءَ جود ءِ، گڑا مارا بلوچ کوم ءَ زیب دنت کہ ما اَئید بکنیں؟
منی اَئید ءِ واستا سنگتے ءَ گُد راه داتگ اَت من گشت کہ دوچگ ءَ دیان اِش اَئید ءَ گور ءَ کنان اِش بلے من دوچگ ءَ پد ءَ نہ دات اَنت دومی روچ ءَ من ءُ سنگتے جاگاھے ءَ روگ ءَ اتیں گڑا سنگت ءَ من ءَ جست کت کہ هال کن باریں تو گد اَئید واستا زُرتگ؟ من گشت اناں من گد نہ زُرتگ اَئید ءِ واستا سنگت ءَ دَرائینت پرچا؟ من گشت من اَئید نہ کناں اَئید مئے واستا نیاتکگ اے اَئید مئے نہ اِنت مئے اَئید کیت گڑا من گد زیراں اَئید کناں ، سنگت ءَ مُلور مُلوریں آوازے ءَ گوں گشت راست گوش ئے تو مئے اَئید کیت گڑا ما دُرست اَئید کنیں مئے اَئید دنیگا نیاتکگ ، من سک گَل بیتاں کہ من وتی گد دوچائینگ ءَ نہ دات اَنت…
اَئید ءِ اولی روچ اَت کہ سرجمیں بازار ءَ اَئید کتگ اَت دُرست گَل ءُ شادان ات اَنت، من شتاں مات ءِ گور ءَ من ءَ ھچ مُوہ ئِے نہ دات زُرت ئِے بگل ءَ کت ئِے گریوگءَ لگ اِت ساری ءَ لوگ ءَ نشتگ اَت گریوگ ءَ اَت منی کستریں گوهار هم مات ءِ کش ءَ نشتگ اَت گریوگ ءَ اَت ءُ مات ءَ تسلہ دیگ ءَ اَت من مات ءِ ارس دیست اَنت من هم گریت بلے دل کمو ڈڈ کت کہ مات ءَ تسلہ بدیاں مات منی گپانی گوشدارگ ءِ وڑ ءَ نہ اَت گشت ئِے اَئید پہ ایمنیں راجاں وش اَنت کہ وتی چُک ءُ جودانی برات ءُ گوهارانی کس ءُ کومانی ھواری ءَ گوازین انت مئے اَئید هم گار اَنت گوش ئِے ، انی تئی مستریں برات ھمد ءَ بیتین انت منی دیم ءَ اَئید ءِ وشیں روچاں ما بگل ماں بگل بیتین اِنت ، من گپی نہ بیتاں بلے من پد ءَ گَل بیتاں کہ من گد دوچائینگ ءَ نہ دات اَنت۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
