TBP Balochi

نبشتانک: گازائیل کشّاں مہ کُش اِت

نبشتہ کار: دھانی

دی بلوچستان پوسٹ

دْروت واجہ
دْرھبات ئے منی چُک ، چے ءَ پریشان ئے؟ ترا چیزے پکار اِنت؟
اناں واجہ!
گڑا؟
ناکو من دیست تو بار جتگ الّم ءَ رو ئے مرز ءَ!
ھو منی چُک، انشا ءَ اللہ من ھمے ارادہ کتگ
ناکو من ءَ گوں وت بہ برگوں پاکستان ءَ!
تو…؟ اناں منی چک تو دنیگا کسان ئے اے راہ پُر ھَتَریں راھے، ترا چُنت سال اِنت؟
واجہ من ءَ سیزدہ سال اِنت ۔
واجہ من زاناں کہ راہ ھرابیں راھے، بلے منی پِت ءُ بْرات ھمے راہ ءَ کار ءَ اَنت دو روچ اِنت شتگ اَنت ءُ دنیگا نیاتکگ اَنت، من ءَ گوں وت بہ بر داں آیاں بہ گْوشاں جلدی بیاینت ۔
۔ منی چُک وت ءَ پریشان مکن تئی پت شان کاینت اے انچیں دوریں راھے دو روچ ناں بربرے دو دو ھپتگ لگ ایت، شر اِنت گْونڈو تئی پِت ءِ نام کے اِنت؟
۔ واجہ منی پت ءِ نام ناسر اِنت، منی مات بے وڑ اِنت منی پت ءَ گوشتگ بوتگ کایاں ترا برا داکٹر ءَ!
چہ اے گپ ءِ اشکنگ ءَ سک دلپدرد بوتاں، جستوں کرت منی چک تئی مات ءَ زاناں چون اِنت؟
منی مات ءَ شومّک ءِ نادراھی اِنت چُنت رند ءَ ابّا ءَ گوں ھمے مرز ءِ کار ءُ بارانی ءِ زرانی سر ءَ نزیکیں داکٹراں برتگ بلے انّوں چیزکے وھد اِنت امّا گنتر اِنت، ابّا ءَ گْوشتگ اَت رو آں مرز ءَ ءُ کایاں ترا بر آں پاکستان ءِ داکٹراں!
۔ منی چک تو اے وھد ءَ باید اِنت وتی مات ءِ گْور ءَ بہ بہ ئے ءُ آئی ءِ ھیالداری ءَ بہ کن ئے، وت ءَ ڈڈ کن پچے تئی ارس رچگ ءَ اَنت؟ ارساں پَھک کن ۔
اناں منی چک من ترا گوں وت بُرت نکناں بلے ترا کول دیاں گوں تئی پت ءَ واتر بیاں، انوں کہ تئی پت ءُ مستریں برات اد ءَ نہ اَنت لوگ ءِ پُشپد تو ئے برو لوگ ءَ ندر آں ۔
گونڈو ءَ پورہ وتی مات بے ھال کرتگ اَت گوں منی اے گپ ءَ تچان تچان ءَ شُت میتگ ءَ!
من دیم پہ مرز ءَ رھادگ بوتاں، سجّھیں راہ ءَ گونڈو ءِ گپانی باروہ ءَ گوں وت ءَ جیڑگ ءَ اِتاں، داں من رس اِتاں بُلّو ءَ
چہ چہ دو سے نپر ءَ جستوں کرت چوشیں مردے شما جاہ کار اِت؟ آیاں گوشت ما چوشیں مردم پجّاہ نیار ایں، وتی باروں دات ءُ زرّوں گپت اَنت ءُ دیم پہ وتی ھلک ءَ رھادگ بوتاں، گوں وتوں گوشت بلکیں اینچوک ءَ ناسر شتگ میتگ ءَ،
راہ ءَ پیداگ اِتاں لھتے مردم ءَ من ءَ اشارہ کرت کہ راہ گجر ءَ بستگ مرو، من گوشت من رو آں پرچا کہ ناں منی گاڑی ءَ بارے پِر اِنت ءُ ناں گِلین!
شتاں دیمتر ءَ منی چم یک مُچّی یے ءَ کپت اَنت، اود ءَ کہ رس اِتاں من دیست کہ یک نیم اُمْریں مردمے گوں یک ورنایے ءَ کپتگ اَنت آیانی اسپیتیں پُچ سُھر اَنت چہ ھون ءَ مردم جستوں کت اَنت کہ چے بوتگ؟ گْوشت اِش سپاہ ءَ راہ بستگ ءُ اے دوئیں ھم جتگ اَنت ئِے،
ایشاں بار گون بیتگ اگاں ناں؟ توارے آتک کہ اناں ۔ انا للہ و انا الیہ راجعون!
چہ یکے ءَ جستوں کرت کہ تو ناسر ءَ زان ئے؟
۔ کجام ناسر ھما کہ سرباز ءِ نندوک اِنت؟
جی ھو ھمینکس زاناں کہ سرباز ءِ مردمے ءُ وتی چُک ھمراہ اِنت ئِے! ھمے ھَتّ ءَ کار ءَ اِنت، گْوشت ئِے اے کہ تیر ئِے لگّ اِتگ گوں وتی چُک ءَ نام ئِے ناسر اِنت، بلکیں تو ھمیشی ءَ گْوش ئے؟
نوں گپ ءَ لگ اِت کہ شریں مردمے اَت گوں ما ھمسپر اَت سک اِشتاپی اَت، اچ یکے ءَ کمو زرّ بدل کت ئِے ءُ گوشتگ اِت ئِے کہ منی چُک نادراہ اَنت ءُ…!
سوار بوتاں گاڑی ءَ گوں وتوں گوشت من وتی زرّاں دیاں ناسر ءِ چک ءَ داں وتی مات ءِ اِلاج ءَ بہ کنت، سجھیں راہ ءَ ھُدا ھُدا اوں کت کہ چہ منی رسَگ ءَ پیسر ایشانی لوگمان ءِ مردم ایشانی مرک ءَ سھیگ مہ بنت شر اِنت،
وھدیکہ رس اِتاں چار آں بازار میتگ شُلوک اِنت، بزاں ناسر ءِ لوگبانک بیران بوتگ اَت، چمّوں تھار بوت اَنت ءُ ارسوں شیوَل،،، چونیں بے وپائیں دنیایے،،،
گْوشتوں ناسر ءِ آ سیزدہ سالگیں چک کج اِنت؟ ۔ ( نام من جست نہ کتگ اَت )
آئی ءَ تاھیر آؤرت نہ کتگ بُرتگ اِش تْرو ءِ لوگ ءَ!
بگند ئے شما ایشی ءَ یک وسّریں کسّھے سرپد بہ بہ اِت، بلے اے مے بزّگیں راج ءِ ھال اِنت کہ ھر روچ گجر ءُ پنجاپ ءِ پوجانی دستاں گوں وڑ وڑیں نیمّونے ءَ کُشگ بوَگ ءَ اَنت!
ابید چہ مرز ءُ گازائیل یا کہ بَڈُّکی کار ءَ کہ اچ پاکستان ءَ زالبولی گُد ءُ پُچ کہ دولت آیاں کاچاک لیک ایت دگہ دَر نیست، بلوچ اچ بے کاری ءَ لاچار اَنت اے راہ ءَ پہ جن ءُ چکّانی لاپ ءِ واستا ءَ اے راہ ءَ گچین کنگ ءَ اَنت-

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلیدہ ءَ نشہ ءِ باپاری ءِ ھلاپ ءَ زھرشانی

دی بلوچستان پوسٹ

بلیدہ ءَ نشہ ءِ باپاری ءِ ھلاپ ءَ انسداد منشیات کمیٹی ءِ نیمگ ءَ مروچی بلیدہ ءَ زھرشانی کنگ بیتگ –

دمگی مردمانی رد ءَ روانک بلیدہ بٹ ءَ چہ مروچی ساھت نُھ ءَ بندات بیتگ ءُ روانک میتگ ءِ جتائیں دمک ءُ دراں تران بیتگ ءُ بٹ ءِ چاراہ ءِ سر ءَ روانک ءَ یک مُچے ءِ دروشم ءَ جوڑ بیتگ ءُ مُچ بیتگ –

روانک ءَ لس چاگردی، نودربر، کسانیں زھگ کماش ءُ دگہ تکاں بندوکیں مھلوک ءَ بھر زرتگ –

مُچی ءَ انسداد منشیات کمیٹی ءِ باسکاں تران کنان ءَ گوشت کہ دمگ ءِ تہ ءَ مئے کمیٹی ءِ نیمگ ءَ اے اولی روانک اِنت ءُ ما نشہ باپاری کنوکاں گوشگ لوٹ ایں کہ آ وتی سلکاریاں زوت بند بہ کن اَنت اگاں ناں مئے اڑ داتگیں گل وتی گامگیجاں ترندتر کنت ءُ وتی زھرشانیانی درچاں گیش کنت-

آیاں گوشت کہ دمگ ءِ انتزامیہ نشہ باپاری کنوکانی ھلاپ ءَ ھچ گامگیج زورگ ءَ نہ اَنت چریشی ءَ چہ دمگ ءَ نوک رُستگیں ورناہ نشہ ءِ آماچ بیان اَنت ءُ آ چہ ھرچ چیز ءَ پُشت ءَ روان اَنت –

مُچی ءَ تران کنوکیں مردماں گْوشت کہ اگاں انتزامیہ ءَ چیرکائی بھا کنوکانی ھلاپ ءَ گامگیج نہ زرتگ گڑا ما انتزامیہ ءِ ھلاپ ءَ ھم ترندیں گامگیج زورگ ءَ چَک ءُ پد نہ بہ ایں-

آیاں گْوشت کہ بلیدہ ءِ دمگاں نشہ بھا کنوکیں مردمانی کُمک ءَ مزنیں مردمانی ءُ سرکار ءِ دسگ ھوار اَنت چریشی ءَ چہ نشہ بھا کنوک شیکر اَنت ءُ دمگ ءَ لس دکانانی پیم ءَ نشہ بھا کنگ ءَ اَنت –

مچی ءَ انسداد منشیات کمیٹی ءِ باسکاں تران کنان ءَ گوشت کہ دہ اگست ءَ بلیدہ میناز ءَ نشہ ءِ ھلاپ ءَ یک مُچی ءِ بیگ ءَ اِنت کہ لس مھلوک ءَ گوں دزبندی اِنت کہ مچی ءَ بھر بہ زور اَنت –

زانگ بہ بیت بلیدہ ءِ جتائیں دمگاں لس مھلوک ءِ نیمگ ءَ چِد ءُ پیسر ھم نشہ ءِ ھلاپ ءَ زھرشانی کنگ بیتگ اَنت بلے تنی وھدی دمگی واکدارانی ھچ گامگیج گندگ ءَ بیگ ءَ نہ اَنت –

روکپتی بلوچستان ءَ یک مردمے بیگواہ

دی بلوچستان پوسٹ

سر بیتگیں ھالانی رد ءَ روکپتی بلوچستان ءَ یک مردمے بیگواہ بیتگ، بیگواہ بیتگیں مردم ءِ پجار حنیف آسکانی ءِ نام ءَ زانگ بیتگ –

دمگی مردمانی رد ءَ حنیف آسکانی دوازدہ روچ ءَ پیش سیمسر ءَ شتگ کہ پد ءَ واتر نہ بیتگ –

آیاں گوشت کہ حنیف آسکانی ءِ کار ءُ کسب تیل ءِ باپاری بیتگ کہ آئی ءَ تیل ءِ باپاری ءَ روکپت ءُ دراتکی بلوچستان ءِ سیمسراں کرتگ –

دمگی مردماں ھمے گوشت کہ حنیف ھم چہ آدگہ مردمانی وڑ ءَ بیگواہ کنگ بیتگ گمان بیت آ سرکار ءِ چیریں ادارھاں برتگ –

حنیف ءِ کھول ءَ گْوشت کہ دوازدہ روچ اِنت مروچی حنیف بیگواہ کنگ بیتگ ءُ نانکہ مارا چوشیں دگہ راستیں ھالے دزکپتگ کہ حنیف کَے ءَ آوار جتگ بلے تنی وھدی ما کسے ءِ شر ءَ شَک کُت نہ کن ایں –

کھول ءَ گْوشت کہ حنیف ءَ وتی لاپ والینگی ءَ سیمسر ءَ کار کرتگ کہ آئی ءَ گاڑی ءِ گون بیتگ ءُ تیل ءِ باپاری ءَ بیتگ ءُ حنیف ءَ دگہ دست ءُ داوا کسے ءَ گوں نہ بیتگ ءُ نانکہ دگہ سیاسی چِست ءُ ایراں آ دزمانجن بیتگ –

نبشتانک: ناکو ءِ اناگتیں مَرگ

نبشہ کار: بکتیار رھیم بلوچ

دی بلوچستان پوسٹ

ھدامرزی ءِ ناکو ءِ کسانی ءِ نام بلک ءَ شولو کتگ اَت پرچی ءَ گریبی ءُ واری ءَ ھنچو گُش انت کسانی ءَ ناکو ءَ را گُد پہ گور ءَ کنگ ءَ نہ بوتگ یک جوڑی یے بوتگ بلک ءَ ناکو ءِ گور ءِ گُدان ءَ شُل اِتگ بزاں دوتکگ ءُ گور ءَ داتگ اَنت ناکو شتگ گوں ھلک ءِ ایدگہ زھگاں لیب کتگ زھگاں گوں گر ءُ چیل ءَ گُد درتگ انت ۔ناکو ءِ بس کار ھمیش بوتگ شتگ زھگاں گوں گوازی کتگ ئِے بزان گُدے درتگ انت پمیشکا بلک ءَ گُدان ءَ شُل اِتگ گور ءَ داتگ اَنت پمیشکا ھدامرزی ءِ ناکو پہ شولو ءِ نام ءِ سر ءَ نام گپتگ ۔ناکو وتی پت ءُ ماتانی دوستیں چک بوتگ پیرک ءُ بلکاں یک پاسے ناکو نہ دیستگ گڑا بزاں نہ سھڑ اِتگ انت ۔ناکو جوان بوتگ ناکو دھکان کاری دری ڈیھاں پوریات کتگ چہ ناکو ءِ دھکان کاری ءُ پوریات ءَ پیرک ءُ بلک سیر لاپ بوتگ انت اللہ ءِ شگر ءُ منت اش گپتگ چہ سور ءَ رند ناکو ءِ نام رسول بکش کنگ بوتگ ناکو باز جُوانیں کوم دوستیں مڑاداریں مردے بوتگ مدام گوں ھلک ءِ کَش کِرانی مردماں مدت ءُ کمکے کتگ اَنت ئِے اللہ ءَ انچیں ازتے داتگ ھلک ءِ مردماں وتی لوگ ءِ نارُشت وت نہ وارتگ اَنت کسے نارشتے کتگ بزاں ناکو ءِ مھراں ھمساھگان ءَ ایوک ءَ ورگ ءَ موہ نہ داتگ الم ءَ پہ ناکو ءِ واستا نارُشت اِش آؤرتگ ۔ ناکو وت ھم رھم تبیں مردمے ات آئی ءَ وتی گوک دشتگ بزانکہ شیر ایوک ءَ نہ وارت انت ھلک ءِ مردمانی سر ءَ بھر کت انت ۔ناکو اگاں شھراں پہ پوریات ءِ واستا شتگ پد ءَ اتکگ بزاں پہ ھلک ءِ زھگاں چنا بگڑا باز آرتگ ات۔
ناکو ءِ گس ءَ نیستیں چیز بس چُک ات اللہ ءَ چہ چک ءِ داد ءَ زبھر کتگ ات۔
ناکو ءَ باز اِلاج ءِ کوشست، پیر پکیر،کت اللہ ءِ منشا نہ ات اللہ ءَ چک نہ دات برے برے ناکو ءَ مارا گوشتگ من دگہ سیرے کناں پد ءَ باریں دل ءَ چے آؤرت ئِے؟ سور ھم نہ کت ئِے۔
من مزن بوتاں من ناکو ءِ لوگ ءَ شتاں ناکو بیگاہ ءِ وھد ءَ وپت چہ واب ءَ پاد اتک جان ششت ئِے چاہ وارت ئِے پتائی لیبے کت ئِے پتائی لیب ءَ ناکو سک زبر ات ھلک ءِ مردم پہ لیب ءِ واستا ناکو ءِ لوگ ءَ اتکگ انت ناکو ءَ یک گوکے ھست ات وتی گوک ئِے دُشت ترو ءَ شیر چاہ کرت پد ءَ درائیں سنگتاں کٹلی زرت چاہ وارت نشت گوں سنگتاں لیب کت وھد گزاں بوت ناکو ءَ وتی گوک ءِ گوسک رودینت بھا کرت یک پرپٹے یک گوانکوے گت گوانکو چہ بلوچی شیر گوش داشت ئِے پرپٹ ءَ سوار بوت ریج ءُ بابلی ءِ کوچک ءَ شت سرھ ءُ پالک ئِے آؤرت ھلک ءِ مردمانی سر ءَ بھر کرت انت ئِے ۔ھر کس ءِ چک چو وتی چک ءِ پیم ءَ چار اِت ئِے یک روچے مئے مشیں ھراب بوتگ ات۔ ما چین کپی زرتگ ات مشین ءِ شر کنگ ءَ اتیں ناکو شتگ ات کوچگ ءَ گشت ات پد ءَ لوگ ءَ اتکگ ات چاہ وارت ات مئے کر ءَ اتک مارا گشت ئِے منی جان مروچی وش نہ انت منی کر ءَ پیسگ نیست ات پس ءَ من ءَ گوشت برو جاھے ءَ وام ءُ دز بدل ءِ بگر ناکو ءَ ڈاکٹر ءَ ببر ۔ناکو ءَ گوشت شما دز گٹ ات وتی کار ءَ بہ کن ات ۔من گولی یے گریں وریں ۔
نزاناں ناکو ءِ نادراھی چے یے ات۔
ما وتی لوگانی پشت ءَ نشتگ اتیں مشین ءِ شر کنگ ءَ اتیں من چارت چہ ناکو ءِ لوگ ءِ نیمگ ءَ زار ءُ کوکار ءِ بندات بوت زھگ جنین چُک مرد دراہ واہ ءُ زار ءَ ات انت مہ درا مشین یلہ کرت بہ ناکو ءِ لوگ ءَ شتیں منی پس ءَ ناکو ءِ سر پہ وتی زان ءَ ایر کرتگ ءُ گریوگ ءَ ات منی ترو زی سک گریوگ ءَ اتک ھر کس تست ات ناکو ءِ سرءَ سردیں مشک ءِ آپ ایر ریتکگ ات بلے ناکو ءَ سما نہ کرت مردماں پرپٹ زرت شت انت ڈاکٹر آرت ڈاکٹر ءَ وتی دست بے بگل ءَ ایر کرت گشت ئِے چہ اے دنیا ءَ شتگ ۔ھلک ءِ مردمانی زار پریات انگت گیشتر بوت ۔زانگ نہ بوت ناکو ءِ اناگتیں مرگءِ وجہ چے ات پد ءَ لھتیں مردم ءَ گوشت کوچگ ءَ مارے ءَ وارتگ لھتیں ءَ گوشت کوچہ پیمازانہ زھر جتگ زھرانی کر ءَ شتگ ۔لھتیں گشت دل ءَ دور ءَ وارتگ ات زیادہ تر منی ھیال ءَ ناکو ءِ دل ءَ دور ءَ کرت ناکو ءَ مارا اے بے نپین دنیا ءَ ابیتک کت ۔چہ ناکو ءِ اناگتیں مرگ ءَ مئے ھلک پرسیگ بوت ۔منی دوا ھمیش انت اللہ ناکو ءِ جاہ ءَ جنت بہ کنت ناکو شتگ ما ھم آئی ءِ رند ءَ رویں ھر کس ءِ ابدیں جاگہ ھما انت۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلیدہ ءَ ائید ءِ چارومی روچ ءَ میڑہ

سر بیتگیں ھالانی رد ءَ کیچ ءِ دمگ بلیدہ ءَ سنج وانگ جاہ ءِ نیمگ ءَ یک مراگشے اڑ دیگ بیتگ کہ آ “سنج میڑہ ءِ نام ءَ ایر کنگ بیتگ –

سنج وانگ جاہ ءِ نیمگ ءَ شنگ بیتگیں درشان ءِ تہ ءَ گْوشگ بیتگ کہ سنج وانگ جاہ ءَ اے مراگش سَے بھرانی تہ ءَ جتائیں رنگے ءَ بندات کرتگ اَنت –

آئی ءَ گوشت کہ اولی بھر لیب ءُ گوازی ءَ چہ بندات بیتگ ءُ آئی ءِ چارچینی ولید ازمائیل ءَ کرتگ کہ لیب ءُ گوازیانی تہ ءَ جی ءُ وررّی ھوار بیتگ اَنت، لیب ءُ گوازی ءِ سروکی حلیم لعل ءَ کرتگ ءُ لیب ءَ بازیں ورنایاں بھر زرتگ ءُ جوانیں رنگے ءَ لیب اِش کرتگ ءُ چاروکانی بالاد وشنود کرتگ اَنت –

چریشی ءَ پد سنج ءِ نودربراں دوچاپی کرتگ ءُ پد ءَ میر ھمل ءَ وتی الھانیں توار ءَ لھتے شَیر دادشاہ سروزی ءُ نوربکش تمبورگی ءِ ساز کرتگیں سازاں گوشتگ اَنت –

آئی ءَ گوشت کہ مراگش ءَ کسمانک ھم پیشدارگ بیتگ اَنت کہ کسمانک ءِ تہ ءَ بلوچی تامرساچ منیر عطا ءَ وتی ازم سرجمیں دیوان ءَ پیش کرتگ اَنت –

کسمانک ءَ پد تامرساچ ءُ سوجکار کمالان بیبگر ءَ دو گزل وش گٹی ءَ الھان کرتگ ءُ دیوان وتی نیمگ ءَ دلگوش کرتگ –

آئی ءَ گوشت کہ مراگش ءِ دومی بھر شیر ءُ شائری ءِ بیتگ کہ شائری ءِ دیوان ءِ چارچینی عمران نور ءَ کرتگ ءُ بلیدہ ءَ اتکگیں شائراں وتی لیکہ ءُ ھیال درشان کرتگ اَنت –

دیوان ءَ اتکگیں شائرانی تہ ءَ ارس بلیدھی، گْوھرام داد، حمید بلوچ، ناسب دودا، طاھر سبز، حفیظ گُل، عدنان فقیر، ظفر شیرا، نوید ناز، حسین حسرت، عبداللہ شوھاز، الطاف بلوچ ءُ چہ گوادر ءَ اتکگیں سمین زیب ءَ ھم مراگش ءَ بھر زرتگ ءُ وتی ھیال درشان کرتگ ءُ دیوان ءَ چہ داد گپتگ اِش –

آئی ءَ گْوشت کہ سیمی بھر ءَ ساز ءُ زیملی ءَ دیوان پیش کنگ بیتگ آئی ءِ چارچینی آصف پُل ءَ کرتگ، سازندھانی تہ ءَ رفیق، طاھر، بکتیار بلوچ ھوار بیتگ اَنت سازندھی ءِ تھراں بینجو، ڈھولک ءُ کنجری درانگاز کنگ بیتگ اَنت –

آئی ءَ گوشت کہ مراگش ءَ بازیں گشندھے ءَ بھر زُرتگ ءُ وتی ازم ءِ توار ءَ دیوان وشنود کرتگ کہ گشندھانی تہ ءَ پسنی ءَ اتکگیں گشندہ شاکر رحمان بزنجو، چہ تربت ءَ حمید بلوچ، منیر عطا، شاھنواز دوست ءُ وارس بزنجو، بلیدہ ءَ شمیم اکتر، عارف کریم، طاھر بلیدھی ءُ بلوچی زبان ءِ نامداریں گشندہ مسلم ھمل ءَ بھر زرتگ-

آئی ءَ گوشت کہ دیوان ءَ جتائیں ھلک پسنی، بلیدہ، زامران، گوادر ءُ تربت ءَ بازیں کچے ءَ چاروک اتکگ اَنت ءُ دیوان ءَ بھر اش زرتگ –

دیوان ءِ ھلاسی ءَ پد کمالان بیبگر ءِ تامر ملار مزنیں پردھے ءِ پشت ءَ پیشدارگ بیتگ –

زانگ بہ بیت سنج وانگ جاہ ءِ اے اولی میڑہ اِنت کہ ائید ءِ چارومی روچ ءَ بندات کنگ بیتگ، چِد ءُ پیسر سنج وانگ جاہ ءَ کسان کسانیں مراگش کرتگ اَنت، سنج وانگ جاہ بلیدہ میناز اِنت کہ اود ءِ مھلوک ءَ پہ اِلم ءُ زانت ءَ شرے وڑے ءَ آسراتی دیگ ءَ اِنت –

بلوچستان ءَ یکدستیں بلوچ زالبول ءِ کرد جوانیں رنگے ءَ چارگ بیگ ءَ اِنت

سر بیتگیں ھالانی رد ءَ روکپتی ءِ بلوچستان ءِ جھمنندیں بلوچ بُتکاریں زالبول ءِ بُتکشی جوانیں رنگے ءَ ساڑایگ بیگ ءَ اِنت –

بلوچ بُتکشیں زالبول مھرناز بھرامی ءَ بازیں وھداں وتی بُتکشی ءِ ندتاچینتگ کہ آئی ءِ بُتانی جوڑ کنگ مردماں جوانیں نگاھاں چار اِتگ ءُ ساڑاتگ اَنت –

بلوچ بُتکشیں زالبول مھرناز بھرامی دوئیں پاد ءُ یک دستے ءَ مادر ءِ موجود ءَ لنگ اِنت کہ آئی ءِ سلامتیں دست یکے کہ آ یکیں دست ءِ سر ءَ وتی ازمکاری ءَ کنگ ءَ اِنت –

آئی ءَ وتی بُتکشی ءِ ازم تھران، زاھدان ءُ سراوان ءَ نمائشجاھاں پیش داشتگ ءُ آئی ءَ بلوچ چاگرد ءِ نام جوانیں رنگے ءَ دری راجانی گور ءَ رژناہ کرتگ –

زانگ بہ بیت اے ھنر ھما گد دوچی اِنت کہ ھما الم ءُ ھنر ءَ چہ بانک مھرناز لاچار کرتگ ءُ وتی ازم ماں تاکانی تہ ءَ نکش چِتگ اَنت ءُ وت ءَ دنیا ءِ دیم ءَ شَھکار کرتگ اَنت –

بلوچ دودمان ءَ بلوچ زالبولانی گُد دوچی ھُنر ھم یک ھنچیں ازمے کہ بلوچستان ءِ زالبولانی جان ءُ رگاں ھوار اِنت –

شال ءَ وائس فار بلوچ مسنگ پرسنز ءِ زھرشانی بنجل ءَ مروچی 4029 روچ سرجم بوتگ- بی ایس او ءَ چہ مقصود احمد، مرتضی بلوچ، نوید بلوچ ءُ وحید بلوچ ءَ بنجل ءِ تر ءُ تاب کُرتگ ءُ بیگواھیں مردمانی کھولاں گوں دلپدردی درشان اِتگ-

ھمے درگت ءَ وی بی ایم پی ءِ رھشون ماما قدیر بلوچ ءَ وتی ھیال درشان اِتگ ءُ گُشتگ کہ پاکستانی پوج ءَ مزنیں کچے ءَ بلوچستان ءِ دمگ مستونگ، قلات، آواران ءَ گوں بالی گراب دگہ مزنیں سلاھاں گوں آپریشن برجاہ داشتگ چریشی ءَ ھندی مردمانی رِد ءَ لس مھلوک نشانگ کنگ بوتگ اَنت –

آئی ءَ گُشت کہ آپریشن ءِ میان ءَ دمگی مردمانی لوگ پرشت پروش کنگ بوتگ انت ءَ آھاں سک باز جانی ءُ مالی تاوان بیتگ ءُ آپریشن ءَ درجنے ءَ گیش مردم شھید ءُ ٹپی بوتگ انت وھدیکہ بازیں مردمے آوار جنی ءَ پد بیگواہ کنگ بوتگ اَنت –

ماما قدیر بلوچ ءَ گُشتگ کہ اے بلوچ چاگرد ءِ درسیں بھراں اے پوج ءِ زوراکی ایرجتگ اشی ءَ چہ پدر بیت کہ بلوچ راج ءَ اے پوجیانی کاروائیاں زوراکی ءَ گوں پدر کرتگ انت – اے درچ انیگیں کاروائیاں بنکی پوجی زورانی اے درشان ءِ راستی ءِ دورشم ءَ دیگ ءَ اِنت کہ چریشی ءَ چہ بلوچانی پُرایمنیں جد ءُ جھد ءِ ھلاس کنگ ءَ کجام ھم دستانی زور جنگ بیگ ءَ اِنت –

آئی ءَ گُشتگ کہ بلوچانی سر ءَ بوتگیں ریاستی زلم ءُ زوراکی ءُ انسانی ھکانی لگتمالی بگر اوارجنی، زانگولیں لاشانی شکل ءَ بلوچ ءِ چکچینی ءَ کجام سیمسر کہ سر نہ بوتگ انت یا سرگوز نہ کرتگ انت اِش –

ماما قدیر بلوچ ءَ گُشتگ کہ بلوچ چاگرد ءَ اشی ءِ پشدر ءَ میان اُستمانی براداری ءُ ھک دگنیاوی ادارہ چہ بلوچستان ءَ بؤکیں پوجی زوراکی ریاستی تاکت کارمرز بوھگے سر ءَ چہ زمہ واریں ھکمرانانی بگیری ءَ کاروائی کنگ ءِ لوٹ کتگ-

بلوچ آجوئی دوستیں رھشون ءُ بلوچستان لبریشن فرنٹ ءِ سروک ڈاکٹر اللہ نظر بلوچ ءَ چاگردی رسانکدر ءِ تندجاہ ٹوئیٹر ءَ وتی یک ٹوئیٹے ءِ تہ ءَ گوشتگ کہ ھانی ءُ شازیہ چانڈیو ءَ بیھار دیگ ءُ آیانی زوریں دزگیری ءِ ھاتر ءَ پاکستانی پوج ءِ کرد ءَ ایر جناں آ وتی مھروانیں مردمانی یل کنائینگ ءِ ھاتر ءَ جھد کنگ ءَ اِنت۔

ڈاکٹر اللہ نظر بلوچ ءَ گیشتر گوشتگ کہ اے پاکستانی زوراکیانی پدراھیں دروشم اَنت دزگپتگیں بلوچ ءُ سندیانی ھلاپ ءَ کہ آیاں دانکہ پُر ایمنیں زھرشانی کنگ ءِ ھم ھک نیست ۔

شازیہ چانڈیو ءُ ھانی گل ءِ لوگاں برگ، بیھار دیگ ءُ بیگواہ کنگ ءِ کرد بی این ایم ءِ سرکماش خلیل بلوچ ءَ ھم ایر جتگ ءُ وتی ٹوئٹر درشان ءِ تہ ءَ گوشتگ کہ ھانی گل ءُ شازیہ چانڈیو پاکستانی کوریں ءُ کریں راھبندانی ھلاپ ءَ دگانی سر ءَ زھرشانی کنگ ءَ اَنت، پہ وتی بیگواھیں مھروانانی یل کنگ ءِ ھاتر ءَ ۔

خلیل بلوچ ءَ دیمترا گوشت کہ پاکستانی اُستان ءِ بے سوبیں جھد پہ آیاں زور بیگواہ کنگ ءَ یک پدریں زوراکی یے بلوچ ءُ سندی بیگواھیں بلوچانی کھولانی ھلاپ ءَ-

یات بہ بیت زیکیں روچ ءَ بیگواھیں نسیم بلوچ ءِ دشتار ھانی گُل ءُ بیگواھیں عاقب چانڈیو ءِ گھار شازیہ چانڈیو ءِ لوگاں پاکستانی پوج ءَ بیڑ بُرتگ بلے دوئیں آ وھد ءَ کراچی پریس کلب ءِ دیم ءَ راجن پور ءَ دروگیں انکاونٹر جنگ بیتگیں پیسر ءَ چہ دزگیر بیتگیں پنچ بلوچ ورنایانی کوش ءِ ھلاپ ءَ زھرشانی ءَ دزگٹ بیتگ اَنت۔

ھانی گُل ءِ رد ءَ آئی ءَ بیگواہ کنگ ءِ ھاتر ءَ آ راہ ءَ ھم دارگ بیتگ بلے لس مردمانی نیام ءَ کپگ ءِ سوب ءَ ناشناسیں مردماں ھانی گل بیگواہ کُت نہ کُتگ۔ ھانی گُل چہ ایشی ءَ پیسر ھم گوں وتی دشتار ءَ ھوار بیگواہ کنگ بیتگ اَت، سئے ماہ ءِ بیگواھی ءَ پد یل کنگ بیتگ اَت یل بیگ ءَ پد ھانی گل بلوچ ءَ تامربنداں وائس فار بلوچ مسنگ پرسنز ءِ بنجل ءَ یک تامر بندے ءَ گْوشتگ اَت من ءُ منی دشتار پاکستان ءِ چیریں ادارھانی کارمنداں مارا برتگ ءُ من ءَ جتا کرتگ ءُ منی دشتار ھم جتا کوٹی ءَ برگ بیتگ اود ءَ من بے کساس ءَ لَٹ دیگ بیتگ اَنت کہ تو بہ منّ تئی سیادی گوں بلوچستان ءِ آجوئی لوٹوکیں سلاہ بندیں گلان اِنت –

ھانی بلوچ سَے ماھی زنداناں پد یلہ کنگ بیتگ اَت بلے آئی ءِ دشتار نسیم بلوچ انگت ءَ بیگواہ اِنت –

ھانی گُل بلوچ ءَ وتی دشتار نسیم بلوچ ءِ یل کنائینگ ءَ بلوچستان ءَ ھوار کراچی ءَ ھم زھرشانی کرتگ ءُ انگت ءَ کراچی ءَ بیگواھیں مردمانی زھرشانی بھر زورگ ءَ اِنت –