TBP Balochi

دی بلوچستان پوسٹ

بلوچ لبریشن آرمی ءِ جارکش جیئند بلوچ ءَ بلوچستان ءِ شھر سوراب بیتگیں اُرش ءِ زمہ واری منّ اِتگ ءُ گْوشتگ کہ گوستگیں بیگاہ ءَ بلوچستان ءِ شھر سوراب ءَ پاکستان ءِ نام گپتیں آجوئی ءِ درگت ءَ یک مراگشے ءِ سر ءَ بمب اُرشے کرتگ –

جارکش ءَ گوشت کہ سرمچاراں مراگش ءِ سر ءَ ھما وھد ءَ اُرش کرتگ کہ پاکستانی پوج ءُ آئی ءِ دمگی زرواریں کارندہ یک مراگشے کنگ ءَ بیتگ اَنت –

آئی ءَ گْوشت کہ بے بنیں ریاست ء پاکستان ءِ بُنھشت ءِ ایری ءَ بلوچ ءَ ھوار سرجمیں دمگ ءِ بازیں راجانی آجوئی پَچ گپتگ اَنت – 14اگست ھما سیاھیں روچ اِنت، ھما روچ ءَ اے دمگ ءِ مستریں گلام کنگ ءُ آئی ءِ گام ایر کنگ بیتگ اَنت بلوچ ھما روچ ءَ چہ سیاھیں روچے ءِ دروشم ءَ دارگ ءَ اِنت –

بلوچ، سندھی ءُ پشتون 14 اگست ءَ پرچہ شاتکامی نہ کن اَنت؟ 

ٹی بی پی شونگال

کانود آجوئی ءِ ھِند ءِ رد ءَ بھر بیتگیں دوئیں بھرانی (پاکستان ءُ ھندوستان) ءِ آجوئی ءِ روچ 15 اگست اِنت، نانکہ 14 اگست۔ 1948 ءَپد پاکستان ءَ 15 اگست ءِ جاہ ءَ 14 اگست ءَ آجوئی ءِ روچ ءِ ھساب ءَ دارگ بندات کُتگ۔ کے کے عزیز وڑیں راجدپتر زانتپاکستان ءِ سر ءَ راجدپتر ءِ ژانگول کنگ ءِ سوب ءَ ترندی ءَ گوں ایراد اِش گپتگ ۔ بازیں زانتکار اے گپ ءِ سر ءَ تپاک اَنت کہ یکجتائیں سیاسی پجار ئِے شوھازگ ءِ ھاتر ءَ پاکستان ءَ 15 ءِ جاہ ءَ 14 اگست ءَ آجوئی ءِ روچ ءِ ھساب ءَ دارگ بندات کُتگ۔ 

ھیر، اد ءَ پرارزشتیں جُست ایش اِنت کہ 73 سال گوزگ ءَ پد ھم بلوچ، پشتون، سندھی ءُ گلگت بلتستان ءِ مردم 14 اگست ءَ آجوئیءِ روچ ءَ پرچہ نہ دار اَنت؟ بلکیں باز اے روچ ءَ سیاھیں روچے ءِ ھساب ءَ دارگ ءَ اَنت۔

ھِند ءِ بھر بیگ ءَ پد روکپتی پاکستان، مرچیگیں  کساس ءَ نیم ءَ چہ ھم کمتر دمگانی سر ء بندوک اَت۔ اِشی ءِ تہ ءَ پنجاب (بھالپور ءِاُستان ءَ ابید)، سندھ (خیرپور اُستان ءَ ابید) پیسرگیں سرحد (سیمسری دمگ) انیگیں خیبر پختونخواہ ( دیر، چترال، سوات، پھلر، امب ءُقبائلی (ٹکی) دمگاں ابید) ھوار بیتگ اَت۔ اے وھد ءَ گوریچانی ھنکین” نہ بیتگ اَت، ھنزہ ءُ نگر ءِ اُستان 1975 ءَ بھٹو ءِ حاکمی ءِ وھدء پاکستان ءِ تہ ءَ ھوار کنگ بیتگ اَنت ءُ گوریچانی ھنکین” ءِ نام دیگ۔ بیتگ اَنت، کہ انی گلگت بلتستان ءِ نام ء چہ زانگ بیتاِنت۔ 

بلوچستان ءِ ھما میار بندی ءَ زیرگ بیتگیں دمگ کہ سرزائر ءَ برتانیہ ءِ حاکمانی چیر دست بیتگ اَت۔ آ مانگیشتگیں وڑے ءَ پنجاب ءِ تھ ءَھوار گیجگ بیتگ اَنت۔ ءُ مارچ 1948 ءَ بلوچستان ( قلات اُستان)  گوں پوجی زوراکیانی کمک ءَ پاکستان ءِ تہ ءَ ھوار کنگ بیتگاَت۔ بلوچستان ءَ چہ برتانیہ حاکمی ءَ چہ 11 اگست 1948 ءَ آجوئی رس اِتگ اَت ءُ داں ھپت ماہ ءَ یک آجوئیں ءُ وت واجھیں ڈیھےءِ ھساب ءَ وتی ھستی ءِ دارگ ءَ سوبین بیتگ اَت۔

پاکستان  ءَ وتی آجوئی ءِ ھشت سالانی تہ ءَ اے درستیں آجوئیں ڈیھ پہ زوریں ھواری ءَ لاچار کُتگ اِت اَنت۔ بلوچستان کہ داںانگت ءَ زمین ءِ ھساب ءَ پاکستان ءِ 43 درسد اِنت، بازیں مردم 14 ءَ اَبید 11 اگست ءَ آجوئی ءِ روچ ءِ ھساب ءَ دار اَنت۔ سندھءَ درستاں پیسر پنجاب ءِ ھمراھداری کُتگ اَت ءُ پاکستان ءِ جوڑ کنگ ءَ کمک کُتگ اَت، بلے درستاں پیسر کارچ ھم سند ءِ مردمانیسریناں جنگ بیت۔ ھواری ءَ چہ پد زیت ھواری کنوکیں سندھی راجدوست جی ایم سید ءَ سندھو دیش ءِ آجوئی ءِ زرمبش بنداتکُت، کہ داں انگت ءَ جُنزگ ءَ اِنت۔ سندھ ءِ راجدپتر ءِ تہ ءَ نی 14 اگست یک سیاھیں روچے ءِ بستار ءَ دارگ بیت اِنت۔  

پشتوناں ھچبر ھم ڈیورنڈ لائین ءِ بھر کنگ نہ من اِتگ، آ چہ مدامی ءَ وت ءَ افغانستان ءِ بھر سرپد بنت، ھِند ءِ بھر ءِ وھد ءَ، ریفرنڈمءَ  پنجاب ءَ گچین کنگ ءَ اَبید باچا خان پئیمیں پشتون راجدوستیں مردماں ریفرنڈم ءِ بائیکاٹ کُتگ اَت پرچہ کہ آ یک انچیں ترتیبے ءَ اڈدیگ بیتگ اَت کہ آیاں تھنا پنجاب ءَ گچین کُت کُتگ اَت، آیاں افغانستان ءَ گچین کنگ اگاں آجو بیگ ءِ راہ دیگ نہ بیتگ اَت۔ 

اے جُست کہ پرچہ پنجاب ءَ اَبید دگہ درستیں راج 14 اگست ءَ یک شاتکامی ءِ جاہ ءَ سیاھیں روچے ءِ ھساب ءَ گیر کار اَنت ءُ داراَنت؟ اِشی ءِ پسہ ءَ بازیں کواس ءُ زانتکار گْوش اَنت کہ اِشی ءِ سوب ایش اِنت کہ پاکستان ءِ بُن ھشت دروگ ءُ ریپینگ ءِ سر ءَ ایرکنگ بیتگ اَنت، پاکستان ءِ تہ ءَ ھواریں گیشتریں دمگ “زور گیپتگیں دمگ” اَنت۔ یکیں شَے کہ ھمائی ءِ سوب ءَ پاکستان داں انگت ءَھست اِنت، آ آئی ءِ تاکتوریں پنجابی پوج اِنت، ھما کہ ڈیھ ءِ راستیں ھاکم اَنت ھم۔ سیاسی کواس اے دیم ءِ گمان ءَ کن اَنت کہ1970 ءَ یک رندے پوج ءِ تاکت کمو نزور بیت گُڑا اے بنگلہ دیش ءِ آجوئی ءِ سوب بیت، نی اے گپ ءِ راستی ءَ ھم کس رد کُتنہ کنت کہ دومی رند ءَ آیانی زوراکی نزور بہ تر اِت ءُ  اے دمگءِ سیمسر  مٹ بہ بنت۔

نبشتانک: 14اگست ءُ بلوچستان

نبشتہ کار : شیردل بلوچ

دی بلوچستان پوسٹ

بلوچستان ءِ وارس ” بلوچ راج بلوچستان ءِ جاھمنند ، پشتونون ، ھزاراں ، ماں جھان ءِ دیم ءَ پدر بہ کن اَنت، ما ھما لگت مالیں زمین ءِ ءُ چیریں گلانی دست ءَ بیگواھیں مردمانی ءُ دَور داتگیں کُنٹانی ءُ ماں شال ءُ کراچی ءَ نشتگیں زھرشانی کنوکیں مھلوک ءِ ءُ گریوکیں مات ءُ گُھارانی درد وار اَنت ـ

ھما مردماں شرم کنگ لوٹ ایت چاردہ ساچان ءِ نام ءَ گوں ھریم شاہ ءِ وڑیں بے ھیائیں زالبولے ءَ ھور اَنت اکس کشگ ءَ اَنت شما بُہ مُرتین اِت شَرتر اَت چِہ اے وڑیں بے شرمی ءَ شمئے گیرت کجا شُتگ مات ءُ ماں دگانی سر ءَ گریوگ ءَ اَنت ، ھور بہ اِت گوں بیگواھیں: راشد جان ءِ مات ءُ زاکر مجید ءِ مات ءَ اھسان کمبرانی ءِ مات ءَ
ھور بہ اِت گوں شبیر جان ءِ گُھار سیما بلوچ ،ھزب اللہ ءُ ھسان اللہ کمبرانی ءِ گُھار ھسیبہ کمبرانی ءَ ھور بہ بئیت گوں ڈاکٹر دین مھمد بلوچ ءِ دُتُّک سمی دین ءُ مھلب دین ءَ ءُ ایدگہ سداں مات ءُ گُھاراں، پیراں مردیں“ گوں ماما کدیر بلوچ ءُ نسراللہ بلوچ ءَ چہ گوستگیں دہ سالاں گیـش پہ بیگواھیں بلوچ پُسگانی آجوئی ءِ واستا ماں شدلاپ ءَ بُنجل ءَ نشتگ اَنت ـ
ارسگیں چَمّاں گوں چون شاد مانی ءُ وشی بیت ۔۔ ؟
موتک ءُ بچکند ھوار بوت نہ کنت، دل گریوگ ءَ اِنت پہ ھما جتائیں پرزنداں کہ زوراکاں شھید کرتگ اَنت،

چَمّ رھچار اَنت ھما پرزندانی استان ءِ لشکر ءُ چیریں گل ءِ مرماں چست کرتگ اَنت ماں کھریں ازیت جاھاں بندیگ اَنت ۔

دل تلوسگ ءَ اِنت پہ ھما بے وارساں گیدی ءِ کُنڈاں ٹپ ءُ ٹوریں کُنٹ انچو کل ءُ کسارت کنگ بوتگ اَنت ، بَلے! چاردہ ساچان مارا چہ راجی گلامی ءِ یات ءَ ابید دگہ ھچ دات نہ کنت اگاں جاھے ناں جاھے ءَ استان ءِ لشکر پہ زورانسری مراگش اڑ بہ کنائین سِیت آرا جشن ءِ نام دیگ ءُ دنیا ءِ دیم پیشدارگ پندلے زانگ بیت۔
دروگ ءِ نام ءَ بنھشت اِیر کرتگیں ڈیھ استان ھپتاد ءُ سَے سال ءَ پد انگت وت ءَ را دروگ ءِ پُشت ءَ داشتگ ـ

اے یک ناشریں ڈیھے اے جھان ءِ ایمنی ءِ دژمن زانگ بیت، وتی بستار ئِے گوں ناشرکاریں کارپداں جھان ءِ دیم ءَ داگ دار کتگ ، بلوچ ،سندی، پشتوناں ایدگہ ایردستیں راجانی زمین پہ زور کبزہ کتگ ءُ پنجابستان ءِ نام داتگ ، پد ءَ ھمے راجانی چُکچنیی ءَ کنگ ءَ اِنت
ھو اے گپّ راستے چاردہ ساچان پہ پنجاب ءَ وشیانی روچ اِنت پہ ایدگہ راجاں گلامی ءِ سیاہ روچ زانگ بیت۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

سر بیتگیں ھالانی رد ءَ روکپتی بلوچستان ءِ دمگ چھبار ءَ ایرانی پولیس ءَ یک گاڑی ءِ سر ءَ تیرگواری کرتگ ءُ یک مردمے کُشتگ ءُ دو دزگیر کرتگ اَنت –

دمگی مردمانی رد ءَ وھیل چھبار ءِ ھند مکران کُچگی ءَ بیتگ کہ اود ءَ ایرانی پولیس ءَ پژو پارس ءِ گاڑی ءِ سر ءَ تیرگواری کرتگ ءُ چریشی ءِ آسر ءَ یک مردمے بیران بیتگ ءُ دو مردم دزگیر کرتگ ءُ برتگ اَنت –

دمگی چاگردکارے ءَ گوشت کہ ایرانی کانود ءَ ھست اِنت کہ شھر ءُ دگہ یا مُچیانی تہ ءَ تیرگواری کنگ مہ بیت بلے بلوچستان ءِ سر ءَ ھرچی کہ آیانی دلگوش اِیت ھما وڑ کن اَنت –

دمگی چاگرد کار ءَ گوشت کہ سرکار ءُ آئی ءِ ادارھانی گور ءَ بلوچانی چُکچینی بیگ ءَ اِنت آئی ءَ گوشت کہ ما لوٹ کن ایں کہ اے وھیلانی درگت ءَ تچکی ءَ پَٹ ءُ پول کنگ بہ بیت –

دی بلوچستان پوسٹ

بیست ءُ چار اداراں بی ایل اے ءَ بلوچستان ءِ پنچ شھراں اُرش کرتگ

بلوچ لبریشن آرمی ءِ جارکش جیئند بلوچ ءَ ناشناسیں جاھے ءَ اھوالکارانی ادارھاں گوں گپ کنان ءَ یک کلوھے ءِ تہ ءَ بلوچستان ءِ جتائیں شھر تربت، نوشکی ءُ مستونگ بیتگیں اُرشانی زمہ واری منّ اِتگ اَنت ءُ گْوشتگ “ بلوچ لبریشن آرمی ءِ سرمچاراں مروچی بلوچستان ءِ شھر تربت ءُ نوشکی ءَ پاکستانی پوج ءِ کاروانانی سر ءَ چیر کرتگیں تراک ءُ مستونگ ءَ دزبمب اُرش ءِ نشانگ کرتگ اَنت – اے ھر سئیں اُرشانی زمہ واریاں بی ایل اے منّ اِت -”

جیئند بلوچ ءَ تربت ءِ اُرش ءِ زمہ واری منّ اِتگ ءُ گْوشتگ کہ “بی ایل اے ءِ سرمچاراں مروچی سھب ءَ تربت ءِ دمگ آپسر ءَ پاکستانی پوج ءِ یک کاروانے ءِ سر ءَ آئی ای ڈی اُرش ءِ ھما وھد ءَ نشانگ کرتگ کہ آ ابدرک بنجل ءِ نیمگ ءَ روگ ءَ بیتگ -”

“آئی ای ڈی اُرش ءَ پوج ءِ گاڑی ءَ تاوان بیتگ، چریشی ءِ آسر ءَ دشمنیں پوج ءِ بازیں کارندھے مرتگ ءُ زدگ بیتگ اَنت – اُرش ءَ پد پروش وارتگیں پوج ءِ کارندھاں نزیکیں دمگانی سر ءَ تیرگواری بندات کرتگ – ھمے وھد ءَ دشمنیں پوج ءَ یک بلوچ ورنایے مھمد ھیات ءُ آئی مات ءُ گوھار ءِ دیم ءَ گپتگ ءُ لَٹ ءُ کُٹ کرتگ ءُ چریشی ءَ پد تیرگواری کرتگ ءُ شھید اِش کرتگ -دشمنیں پاکستانی پوج ءِ ھمک وھدی ءِ وڑ ءَ اِنت کہ وھدیکہ آ بلوچ سرمچارانی دیم ءَ پروش وارت گڑا چراھی ءِ مٹ ءَ لس بلوچ شھریانی کُشت ءُ کوش ءِ دروشم ءَ زوریت –

بی ایل اے ءِ جارکش ءَ بلوچستان ءِ دمگ نوشکی ءَ بیتگیں اُرش ءِ زمہ واری منّ اِتگ ءُ گوشتگ کہ “ مئے سرمچاراں مروچی بلوچستان ءِ شھر نوشکی ءَ یک دگہ اُرشے ءَ پاکستانی پوج ءِ کاروان ھما وھد ءَ نشانگ کرتگ کہ وتی بنجاھی بنجل ءَ دراتکگ ءُ دیم پہ شھر ءِ نیمگ ءَ روگ ءَ بیتگ ”

“آئی ای ڈی ءِ زد ءَ اتکگ ءُ پوج ءِ یک گاڑی ءَ باز تاوان بیتگ، چریشی ءِ آسر ءَ بازیں کارندھے مرتگ ءُ زدگ بیتگ اَنت -”

جیئند بلوچ ءَ گْوشت کہ مستونگ ءَ چاردہ اگست ءِ درگت ءَ یک اسٹالے ءِ سر ءَ بیتگیں اُرش ءِ زمہ واری ءَ ھم منّاں ءُ آئی ءَ گْوشت “بلوچ سرمچاراں دومی اُرش مستونگ ءِ شھر ءَ چاردہ اگست ءِ درگت ءَ برجم کرتگیں اسٹال ءِ سر ءَ دزبمبے چگل داتگ، چریشی ءَ اسٹال سرجم ءَ تباہ بیتگ -”

“اے اُرش بی ایل اے ءِ چاردہ اگست ءِ درگت ءَ مراگش ءُ اسٹالزانی سر ءَ نہ کُٹوکیں بھر اَنت – اے اُرش گیش ترندی ءَ گوں برجاہ بنت – بلوچ مھلوک کجام ھم رنگ ءَ جانی ءُ مالی تاوانانی رکگ ءِ واستا زوگریں پوج ءِ گوشگ ءَ برجاہ کرتگیں مراگشاں دور بہ بنت -”

زانگ بہ بیت گوستگیں بیست ءُ چار ادارانی تہ ءَ بلوچ لبریشن آرمی ءَ بلوچستان ءِ پنچ مزنیں شھرانی تہ ءَ بیتگیں جتائیں اُرشانی زمہ واری منّ اِتگ اَنت – مروچی سھب ءَ مھلہ بی ایل اے ءِ جارکش جیئند بلوچ ءَ گوستگیں شپ ءَ بلوچستان ءِ بنجاھی شھر شال ءَ چاردہ اگست ءِ درگت ءَ برجاہ کرتگیں اسٹال ءِ بیتگیں اُرش ءِ زمہ واری منّ اِتگ ءُ گوشتگ کہ “ مئے سرمچاراں شال ءِ دمگ بروری دگ ءَ یک دکانے بمب نشانگ کرتگ ءُ پروشتگ، پروشتگیں دکان زورگریں دشمن ءِ راجی شاتمانی چاردہ اگست ءِ درگت ءَ اسٹال ءِ جنگ بیتگ، بی ایل اے اے اُرش ءِ زمہ واری ءَ منّیت ”

چریشی ءَ پیسر گوستگیں روچ ءَ ھم بی ایل اے ءَ بلوچستان ءِ شھر ھب چوکی ءَ اٹک سیمنٹ فیکٹری ءِ یک ورکشاپے ءَ بیتگیں بمب اُرش ءِ زمہ واری من اِتگ اَت – اے درگت ءَ بی ایل اے ءِ جارکش ءِ شنگ کرتگیں بیان ءِ تہ ءَ گْوشتگ اَت ” ما پیسر ءَ جتگیں فیکٹری سرپد کرتگ کہ آ بلوچ ءِ زرکاری ءِ پُلپھانچ ءَ بند بہ کنت، بلے مڈیانی کارمرد کنگ ءَ پاکستان ءِ دور ءُ دریں ھنداں ریاستی پُرکاراں گچین کن اَنت ءُ بلوچستان ءَ کار اَنت وھدیکہ بلوچ مھلوک ءَ ھم پوریاگری ءِ بھر نہ بیت – تراک ءَ زدگ بیتگیں مردم ھم ھنچیں بیتگ اَنت ریاستی پُرکار بیتگ اَنت آ بلوچ مڈیانی چیروکائی دُزگ ءُ برگ ءَ دور ءُ دریں ھنداں آرگ بیتگ اَنت کہ بی ایل اے ءِ بیھار ءَ ابید ھم اے زرکاری ءِ پُلپھانچی ءِ بھر جوڑ بیتگ اَنت -”

زانگ بہ بیت چریشی ءَ پیسر دہ اگست ءَ ھب چوکی ءَ بی ایل اے ءَ چاردہ اگست ءِ درگت ءَ برجاھیں یک اسٹالے ءِ سر ءَ بمب اُرشے کرتگ،چریشی ءِ آسر ءَ کانود منّوکیں ادارھانی سَے کارندہ ءُ اسٹال ءِ واھند زدگ بیتگ اِت اَنت ءُ یازدہ اگست ءَ مستونگ ءَ تیری دگ ءَ پوج ءِ یک گاڑی بی ایل اے ءَ آئی ای ڈی ءِ نشانگ کنگ ءِ زمہ واری منّ اِتگ اَت – ءُ اے ھال شنگ کرتگ اَت اے اُرش ءَ پوج ءِ بازیں کارندھے مرتگ ءُ زدگ بیتگ اَنت –

زانگ بہ بیت چریشی ءَ پیسر ھمے سال ءِ بیست ءُ ھشت جون ءَ بی ایل اے ءِ مجید بریگیڈ ءَ پاکستان اسٹاک ایکسچینج کراچی ءَ نشانگ کرتگ اَت – بی ایل اے مجید بریگیڈ ءَ چریشی ءَ پیسر دالبندین ءَ چینی انجنیئر، کراچی ءَ چینی کونسل ھانہ، گوادر ءَ پرل کانٹینٹل ھوٹل ءَ پدائی اُرش کرتگ اَنت –

کیچ ءُ مستونگ ءَ بمب تراک

دی بلوچستان پوسٹ

سر بیتگیں ھالانی رد ءَ کیچ ءِ دمگ آپسر ءَ یک دکانے ءَ بمب تراکے بیتگ –

تراک ءِ آسر ءَ یک مردمے بیران بیتگ ءُ لھتے مردمانی زدگ بوھگ ءِ ھال اِنت –

دمگی مردمانی رد ءَ تراک آپسر دگ ءَ گوزگیں پوجی کاروان ءِ سر ءَ ناشناسیں مردماں بمب تراکے کرتگ –

ھمے وڑ ءَ مستونگ ءِ بازار ءَ بمب تراکے کنگ بیتگ –

گیشیں ھالانی رد ءَ مستونگ ءِ بازار ءَ یک بیرک بھا کنوکیں ٹیلے ءِ سر ءَ کنگ بیتگ-

تراک ءَ یک زالبولے ءَ ھوار پنچ مردم زدگ بیتگ اَنت –

زانگ بہ بیت بلوچستان ءِ آجوئی لوٹوکیں سلاہ بندیں گل بلوچ لبریشن آرمی ءَ گوستگیں روچ ءَ شال ءَ چاردہ اگست ءِ درگت ءَ چن ءُ لانچ کنوکیں یک اسٹالے ءِ سر ءَ بمب اُرش کرتگ اَت –

چِد ءُ پیش بی ایل اے ءَ ھب ءَ ھم چاردہ اگست ءِ درگت ءَ اسٹالے ءِ سر ءَ بمب تراک کرتگ اَت –

بی ایل اے ءِ جارکش جیئند بلوچ ءِ گوشگ اِنت کہ چاردہ اگست ءِ درگت ءَ برجم داشتگیں مراگش ءُ پوجی کارواناں مھلوک گِستہ بہ بنت –

مستونگ ءُ کیچ ءَ بیتگیں بمب تراک تنی وھدی ھچ گل ءَ نہ من اِتگ اَنت –

بلوچستان ءِ دمگ بسیمہ ءَ زمین چَنڈ بیتگ۔

دی بلوچستان پوسٹ

سر بیتگیں ھالانی رد ءَ بسیمہ ءَ زمین چَنڈ بیتگ، مردمانی لوگاں تاوان بیتگ –

گیشین ھالانی رد ءَ بسیمہ ءِ دمگ ساجد ءَ بیتگیں زمین چَنڈ ءَ مردمانی لوگاں تاوان بیتگ ءُ ھِشتی ءِ لوگ کپتگ اَنت دگہ جانی تاوانانی ھال نہ بیتگ –

دمگی پھزدارانی رد ءَ زمین چَنڈ ءَ دمگ ءَ ترس ءُ بیم ودی بیتگ ءُ مھلوک ءَ پاک کلمہ ءِ وانگ بندات کرتگ –

زمین چَنڈ شناسانی رد ءَ زمین چَنڈ چار ٹِک ھپت بیتگ ءُ دَہ میل زمین ءَ چیر بیتگ –

شال ءَ گوستگیں روچ ءَ چاردہ اگست ءِ واستا برجم داشتگیں یک اسٹالے ءِ سر ءَ بوتگیں اُرش ءِ زمہ واری بی ایل اے ءَ منّ اِتگ ـ

دی بلوچستان پوسٹ

بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کُرتگیں درشانے ءِ تھا گُوشتگ کہ مئے سرمچاراں شال ءِ دمگ بروری دگ ءِ سر ءَ یک دکانے بمبے ءِ نشانگ جوڑ کُتگ ـ اے دکان ءَ زورگریں دژمن وتی راجی روچ چاردہ اگست ءِ درگت ءَ اسٹال جنگ ءَ بوتگ ـ

جارکش ءَ گوشتگ کہ بلوچ لبریشن آرمی گوں تچکیں گپاں اے مکن کُرتگ کہ زورگپتیں ریاست پاکستان بلوچ پجار، بلوچ راجدپتر، ءُ آزاتی ءِ تھریک ءِ بنداتی لوٹاں ءَ گار کنگے ھاتر ءَ وتی نام گپتیں آجوئی ءِ روچ ءِ شاتمانی ءَ بلوچ راج ءِ سر ءَ بزور تاگت، دھمکی ءُ لالچ ءِ زور ءَ مشگ لوٹ اِیت ـ البت بلوچستان ءِ تھا بی ایل اے چاردہ اگست ءِ درگت ءَ ھچ وڑیں مراگش ءُ نام گپتیں اسٹالانی چن ءُ لانچی اجازت نہ دنت ـ ءُ آھانی سر ءَ اُرش کنگ بیت ھمے تچکی ءَ مردماں اے وڑیں مراگشی اسٹالاں چہ دور بوھگ ءُ آیانی مھپوز کنگ ءُ دور دارگے بیھار دیگ بوتگ ـ

جئیند بلوچ ءَ گوشتگ کہ بی ایل اے ءَ اے مکن کنگ ءَ ابید ریاستی گوشگ ءِ سر ءَ اے وڑیں اسٹال برجاہ دارگ بوتگ ءُ لھتے مردم آھاں چہ دوری دارگ ءَ نہ انت ـالبت ءَ اے اسٹالز ءُ مراگشانی سر ءَ اُرشانی میان ءَ نشانگ بوھگ ءَ وتی زمہ وار وت انت ـ

جارکش ءِ رِد ءَ بی ایل اے چاردہ اگست ءِ اسٹالز ءِ سر ءَ شال ءَ تراک ءُ آئی ءَ چہ پیش ھب ءِ تراک ءَ چارگیں وڑے ءَ زور کم کنگ بوتگ تانکہ جانی تاوان مہ بیت ـ

یک رندے دوبر بیھار دیاں دیمترا بؤکیں تراکی زور گیش کنگ بیت البت بلوچ راج اے وڑیں جاھاں چہ دور بہ بنت ـ

دی بلوچستان پوسٹ

ٹی بی پی ءَ سربوتگیں ھالانی رِد ءَ کراچی ءَ پاکستانی پوج ءَ گوستگیں بیگاہ ءَ فقیر کالونی ءَ بیڑ برتگ ھزدار گریشہ ءُ دو دمگی مردماں ھوار چار مردم آوار جتگ ءُ گوں وت برتگ-

پاکستانی پوج ءِ دست ءَ آوار جنگ بوتگیں پکیر کالونی ءِ جھمنند گزی ءِ بیبگر ءُ نظام ء اللہ بخش ءُ ھزدار گریشہ ءِ جھمنند کریم بخش ء اللہ بخش ءُ موسیٰ ء اللہ بکش نام ءَ چہ بوتگ انت ـ دوئیں براتاں ھوار چاریں مردم پاکستانی پوج ءَ ناشُناسیں جاھاں بُرتگ انت ـ آوار جنی ءَ پد اھانی ھچ وڑیں ھال نیست ـ

ھمے گُشگ بوھگ ءَ انت کہ کریم بخش ءُ موسی پکیر کالونی ءَ گزی ءُ نظام ءِ مھمان بوتگ اَنت کہ چہ ھزدار ءَ اتکگ بوتگ انت ـ

آھانی کھول ءَ آوار جنی گپ راست کُتگ ءُ گُشتگ کہ پوجی پوشاکیں مردماں آھانی مردم آوار جتگ ءُ بُرتگ انت بلے آ گُشگ بوھگ ءَ نہ انت کجام سوب ءَ کجام کتکاریانی سوب ءَ برگ بوتگ انت ـ

نبشتانک: راجی گدارے ءِ تران

نبشتہ کار: شبین بلوچ

دی بلوچستان پوسٹ

دْروت ءُ درھبات

ءُ یکے دومی ءِ پجار ءَ پد آئی ءَ وتی سرجمیں ردکاریانی لڑ منی دیم ءَ ایر کت ءُ گشت ئِے من بلوچ راج ءِ مزنیں مجرمے آں تھنا من ناں بلکیں چشیں دگہ باز بلوچ ھست کہ آ ھمے جُرم ءَ گوں ھوار انت-

ھو من ناں!بلکیں گیشتریں بلوچ راج شمئے کرد ءُ کارانی بارو ءَ سرپدی دار اَنت۔
 بلے بگش تئی ھال کنگ ءُ اے گپانی ایر کنگ ءِ مکسد چی انت ءُ تو من ءَ چے پیگام دیگ لوٹ ئے من دراّئینت؟
ناں من ءَ دگہ ھچ مکسد نیست من ءَ چنچو وھد انت کہ من لوٹ اِتگ گوں شما کسے ءَ ھال بِکناں وتی ردیاں شمئے دیم ءَ ایر بکناں شمارا سرپد بکناں کہ من ءَ ابید باز انچیں منی وڑیں  مکبریا لگوراست کہ آچہ وتی کرد ءُ کاراں پشومان انت وتی ردیانی شودگ ءِ ھاتر ءَ دژمن ءِ سرپانی تھ ءَ ھست بنت پہ بلوچ ءِ آؤوکیں زندمان ءِ دیمروی ءِ ھاتر ءَ بلوچ زمین ءِ سوداگرانی ءُ آئی ٹھینتگیں لشکرءَ پہ ھچ بوت کناں
  پرچاکہ مارا الکاپی ءَ سما بوتگ پنجاپی ءَ گوں وتی مکراں چنچو بلوچ مانگیشنتگ ءُ درایگ ءِ ھچ راہ ءُ در نیست  من زاناں من اے گپاں کہ گشگ ءَ آں تو منی گپانی سر ءَ باور ندار ئے پرچا کہ مئے کرد ءُ کارپد انچش بوتگ انت بے گناھیں مردمانی گرِگ ءُ بند کنائینگ شھید کنگ لوگانی سوچگ کاروباری مھلوک ءَ زرگرگ، مات ءُ گُھارانی بے پردگی گونڈیں ورناھاں بلیک مئیل کنگ آیاں لاچار کنگ وتی وتی مکسد ءِ کار ءِ کشگ  مئے وڑیں بدکردانی کار انت بلے من ترا اے گپ ءَ باور کنائیناں کہ من چد ءُ پد ھمے لشکر ءِ تھ ءَ بان ءُ شمارا سرجمیں ھالاں دیاں کناں.بلے یک دزبندی یے گون تو کناں منی نام ءَ زاھر مکن منی اے گشتگیں گپانی سر ءَ پگر بکن ات ءُ مارا اے موہ ءَ بدے ات باید وَ ھمیش انت اے ھوالہ ءَ بلوچ راجی لشکر دژمن ءِ سرپانی تھ ءَ مردم ھوار بکنت تانکہ دژمن ءِ زلم ءُ زوراکی بلوچ سرڈگار ءِ سر ءَ ھلاس بہ بنت
ءُ دگہ دزبندی یے گون تو ھم کناں منی اے گشتگیں گپاں نبشتھی دروشم ءَ دیم ءَ بیار تانکہ ھما بلوچ کہ دژمن ءِ سرپاں ھوار انت یاکہ ھوار بوگ ءِ ارادہ اِش داشتگ آ سرپد بہ بنت کہ اگاں شما وت ءَ بلوچ گشیں گڑا بلوچ ءِ بدواہ مہ بئیں بلوچ زمین ءِ سر ءَ نندوکیں ھر بلوچ مئے شمئے گیرت بہ بنت پنجابی ءِ دیم ءَ دست بندگ اوشتگ جی جی کنگ دگہ چنچو ردیں کارانی کنگ ءَ پہ ما وتی چنچو بے گنائیں ورنا،ڈاکٹر، ماسٹر ، شائر، کماش، مات ءُ گھار شھید کنائینتگ یا چہ وتی بنُکی میتگاں چے لاچار کتگ انت کہ بہ لڈّ انت چنچو  ماں زنداناں بند کنائینتگ  اے پگر مارا شمارا ھچبر نہ بوتگ کہ اے منی ھمساھگ انت منی ناکو زھگ انت یاکہ منی وارس انت یاکہ ھم زبانے نوں بایدیں ما ءُ شما کل بلوچ وتی راجی آجوئی ءِ گِرگ ءِ واستا دژمن ءِ ھمراھدار مہ بئیں چہ اے ردیں کاراں وت ءَ گستا بدار ایں
ءُ یکرندے پد ءَ من گوں بلوچ راج ءَ وتی ردیانی پھلی ءَ لوٹان ءُ من ءَ امید انت کہ بلوچ راج اے موہ ءَ من ءَ دنت تانکہ من وتی پولنگاں بشوداں-

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔