TBP Balochi

نبشتانک: اے جَنگے

نبشتہ کار: اے بی ریکانی

دی بلوچستان پوسٹ

اے جَنگے، اے جنگ ءِ تہ ءَ هَزاراں سر روت هَزاراں کیت داں آجُوئی مارا وتی ساه یا سر چارگی نہ اَنت پرچہ کہ ساه ‎ءُ سَر دائم جھان ءَ هست نہ بنت روچے الّم رو اَنت-

گُڑا اگاں تئی ساه ءُ سر رو اَنت تو شَری ءَ زان ئے! وتی ساه ءُ سر ءَ اَنچیں جاهے ندر کن کہ تئی روگ ءَ رند تئی گُلامیں کوم ءَ یک پائدگے بہ بیت۔

هَو باز مردم همے جِیڑ اِیت من وشیں زِندے گوازین آں، کوه ءُ گارانی کپگ ءَ پائده هِچ نیست
اِد ءَ زانگ دنت کہ تئی ایمان پکّا نہ اِنت۔

مُشکل نہ اِنت همراھداری بہ کن هِلاپ مہ بہ اِت سنگتانی، رازاں بہ دار اِت، کسانیں کُمک بکن اِت، اے هم جُھد ءِ یک بهرےاے جَنگے اے جنگ ءِ تہ ءَهزاراں سَر شُتگ، کسان سالیں ورناه یا پیر ءُ جَوان دْرست همے راه ءَ دیوانگ اَنت پہ وتن دیوانگ اَنت وتی زُلمانیں کوم ءِ دیوانگ اَنت –

مَزنبند ، پروم ، کلّگ کور ، شادی کور ، هوشاپ ، باتیل یا دگہ باز جاه ءَ سنگتانی هُون رِتکگ اَنت،
سرجمیں گوادر ءَ شھید همّل جان ءُ آئی ءِ همراھانی هُونانی وشبو پیداک اَنت۔

اے جنگےاے جنگ ءِ تہ ءَ پِیر ءُ ورناه مات ءُ گهار دْرست یک برابر اَنت پِیر مَردیں هیربکش مری ءُ نواب اکبر هان ءِ وڑیں بازیں سر پہ اے راه ءَ ندر بنت ءُ بیتگ اَنت هـم-

نوں آشوب جُمب اِتگ، سَنگتانی همک لوگ ءَ یکیں توار اِنت همُک پیژگاه هُون ءِ بُوہ ءَ کنت تْرشتیں تلار هُون ءِ تُنیگ اَنت، درچک ءُ دار رسیگ اَنت-

اے جنگے اے جنگ ءِ تہ ءَ باریں چینچو گهار جنوزام بیتگ چینچو مات پُرسیگ اِنت، چنچو سنگتاں جام ء شَھادت نوش کُتگ ، چینچو پوجی مُردار بوتگ
اے جَـنگے۔ اے آشوب ءِ بهر اَنت الّـم بنت بلے مارا یا سنگتاں اے چارگی نہ اَنت مارا جُهد دیم ءَ بَرگی اِنت۔

لھتے مردم همے جِیڑ اِیت من سنگتانی همراه بہ باں منی لوگ ماندارگ بیت منی مردم تنگ کنگ بنت اگاں تو یک مهکمیں سنگتے بیگ لوٹ ئے ترا هر وڑیں کربانی دیگ لوٹ اِیت اے جهد ءِ بهر اَنت هر سنگت گوں ما بیتگ اَنت بیگ ءَ اَنت هم مارا اے چارگی نہ اِنت، مارا جُهد منزل ءَ سر کنگی اِنت، مارا وتی باندات درگیجگی اِنت۔

بلوچ ءُ بلوچستان زندگ بات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

پنجگور وشبود ءَ گوستگیں روچ ءَ سلاہ بندیں مردماں یک ورنایے آوار جتگ ءُ گوں وت برتگ –

سر بیتگیں ھالانی رد ءَ گوستگیں روچ ءَ پنجگور ءِ دمگ وشبود ءَ سیاہ کانچیں ویگو گاڑی ءَ سواریں سلاہ بنداں ضمیر ء مھمد نور نامے ورنایے آوار جتگ ءُ گوں وت برتگ –

دمگی مردمانی رد ءَ آوار جنوکانی سیادی ریاست چیردستی ءَ پرکاریں ڈیتھ اسکواڈ ءَ اِنت بلے تنی وھدی آوار جنی ءِ سوب زانگ نہ بیتگ –

زانگ بہ بیت بلوچستان ءِ جتا جتائیں ھند ءُ دمگاں پاکستانی پوج ءَ ڈیتھ سلاہ بند شنگ کرتگ اَنت کہ آئی ءَ ڈیتھ اسکواڈ گوش اَنت ءُ آجوئی لوٹوکانی بھتام اِنت کہ آ پاکستان پوج ءَ سرجم ءَ مھار یلہ کرتگ اَنت بلوچستان ءَ بلوچ آجوئی لوٹوکانی آوار جنگ ءُ کُشگ ءَ ابید وتی ھند ءُ دمگاں چاگردی سلکاریاں ھوار اَنت –

دی بلوچستان پوسٹ

چہ ریڈیو زُرمبش ءِ پیس بک تندجاہ ءَ تمپ نزر آباد ءَ جنگ بیتگیں زالبول آسیہ ءِ زھگ اومرکریم ءَ پریس کانپرنس کرتگ –

چاگردی رسانکدر ءِ ھالانی تہ ءَ مروچی چاگردی رسانکجاہ پیس بک ءَ ریڈیو زُرمبش ءَ بلوچ ایکٹیویسٹ اومر کریم ءَ تران کنان ءَ گْوشتگ کہ منی مات آسیہ ھژدہ اکتوبر دوھزار ءُ بیست ءَ تمپ نزر آباد ءَ دو ٹولیانی جنگ ءُ چوپ ءِ وھد ءَ سِلاہ ءَ شُتگ کہ اود ءَ آیاں منی مات ءِ سر ءَ تیرگواری کُرتگ ءُ کُشتگ –

اومر کریم بلوچ ءِ گوشگ اِنت ما پولیس ءِ گور ءَ وتی مات ءِ کشندھانی نام ءَ ارزی نبشتگ کرتگ بلے تنی وھدی بازیں روچانی گوزگ ءَ پد ھم منی مات ءِ کُشندہ دزگیر کنگ نہ بیتگ اَنت –

آئی ءَ گوشت کہ منی مات ھما وھد ءَ جنگ بیتگ کہ دو ٹولیانی زمینی جیڑھے ءِ سر ءَ جنگ ءُ چوپ ءَ بیتگ اَنت ھمے وھد ءَ بلوچ زالبولے ءِ دروشم ءَ کہ جنگانی میان ءَ ھردوکیں نیمگاں سلاہ ءُ جنگ بندی ءِ واستا دراتکگ ھمے میان ءَ دومی ٹولی ءَ تیرگواری کرتگ ءُ منی مات ھمے تیرانی آماچ بیتگ ءُ بیران بیتگ –

اومر کریم ءِ گوشگ اِنت کہ اے جنگ ءُ چوپ ءَ بیتگیں مردم مئے سیاد ءُ وارس نہ اَنت منی مات ءَ چاگرد ءِ بستارے ءَ انسانی بنیادے ءَ سلاہ کنگ ء جھد کرتگ –

آئی ءَ گوشت کہ بلوچستان ءَ بلوچ زالبولانی کوش ناگتی نہ اَنت بلکیں ھمک وھد ءَ بلوچ زالبول تیرانی آماچ کنگ ءُ کُشگ بیگ ءَ اَنت –

اومرکریم ءَ گْوشت کہ اے تھنا اولی وئیل نہ اِنت ایشی ءَ پیسر بلوچ دودمان ھم لگتمال کنگ ءُ بیتگ اَنت ءُ ملک ناز، کلسوم، شاھینہ شاھین ءُ گوستگیں دو روچاں پیسر کلاتک ءَ ھم یک زالبولے تیرانی آماچ کنگ ءُ کُشگ بیتگ –

آئی ءَ گْوشت کہ اے جاور مئے نزیک ءُ گورانیگ اَنت بلوچستان ءِ آدگہ پھناتاں جاور ھم ھمے وڑ بیت کن اَنت –

آئی ءَ گْوشت کہ اے کوشکاری روچ پہ روچ دراج کش بیان اِنت من کیچ ءَ ھوار دراھیں مردماں گوں دزبندی کن آں اے وئیلانی سر ءَ جوانیں گامگیج بہ زور اَنت ءُ بلوچ چاگرد ءِ کُشت ءُ ھون ءَ ھلاس بہ کن اَنت –

سرکار ھلاپیں گلانی تاکت ءِ درشانی ءُ بیگواھیں مردم

ٹی بی پی شونگال

یک شمبے ءِ روچ ءَ پاکستان ءِ سرکار ھلاپیں ھاسیں گلاں شال ءَ بنجاھی سرکار ءِ بگیری ءَ وتی تاکت ءِ درشانی کُت۔ اے سرکار ھلاپیں یازدہ گلانی ھمسنتیں پاکستان ڈیموکریٹک موومنٹ ءِ سیمی مُچی اَت۔ گوستگیں دو مُچیانی پئیماں شال ءِ مُچی ءَ ھم اے گلانی باسک ءُ دوزواھاں مزنیں کساسے ءَ بھر زرتگ اَت۔

ھیر تاکت ءِ اے درشانی بلوچستان ءَ جتائیں ارژشتے داریت، کہ اود ءَ چہ راجداری ءَ ڈگار پھک ءَ گار بوتگ۔ شال ءَ بیوکیں مُچی ءِ ھاسیں گپ بیگواھیں بلوچانی جیڑہ اَت، کہ آئی ءِ توار درستیں راجداریں رھشونانی ترانانی تہ ءَ گُوشدارگ بوت۔

بی این پی مینگل ءِ سروک اختر مینگل کہ چہ ایشی ءَ پیش ھم زوریں بیگواھیانی جیڑہ ءِ سر ءَ باز گامگیج زورگ ءَ گندگ بیتگ ءُ بیگ ءَ اِنت آئی ءَ وتی تران ءِ تہ ءَ گوشت کہ بیگواھیں مردمانی کھول ءِ مردم یک دھکے ءَ چہ بُرز اِنت کہ وتی دوستگیں مردمانی یل بیگ ءِ وداریگ اَنت۔ پاکستانی پوج ءُ اسٹیبلشمنٹ ءِ سر ءَ ایراد گران ءَ آئی ءَ گْوشت کہ “ مئے زھگ کُشگ بیگ ءَ اَنت، مئے لوگ ھالیک اَنت، زاناں اے ملک پمیشکا اڈ کنگ بیتگ اَت؟”

پاکستان پیپلز پارٹی ءِ چیئرمین بلاول بھٹو زرداری ءَ ھم بیگواھیں مردمانی جیڑہ ءَ چِست کنان ءَ گْوشت کہ “پاکستان داں ھما دیمروی کُتگیں جمھوریتے گُشگ بیت نہ کنت دانکہ بیگواھیں مردمانی جیڑہ گیش ءُ گیوار کنگ نہ بیت۔”

بلے مُچی ءِ تہ ءَ درستاں ھبناک تریں شئے پنجاب ءِ درستاں مستریں راجداریں گل مسلم لیگ ن ءِ مستر نواز شریف ءِ ترندیں ایراد اَت۔ آئی ءَ گْوشت “ من بلوچانی جیڑہ ءَ سرپد آں، بیگواھیں مردمانی جیڑہ داں انگت ھست اِنت، من کدی ھم کجام زوراکی ءِ آماچ ءِ گنداں آئی ءِ درد ءَ ماراں”۔

آئی ءِ جنک ءُ پی ایم ایم ایل این کسان کمک سرکماش مریم نواز یک گامے ءَ دیم شتگ ءُ بیگواھیں مردمانی کھولانی گون ءَ تلو ءِ سر ءَ دست ءُ دروھتی بیتگ ءُ ترندیں جزبگے ءَ بیگواھیں بلوچانی جیڑھے چِست کرتگ – آئی ءَ سرکار ءَ گوں دزبندی کرتگ کہ دراھیں بیگواھیں مردم سلامتی ءُ یلہ کنگ بہ بنت – مچی ءَ نندوکیں مردمانی دیم ءَ تران کنان ءَ آئی ءَ گْوشت “منی پت ءِ دزگیری، ءُ منی مات ءِ بیرانی سر ءَ منی چمانی ھرس نہ ریتکگ اَنت بلے ھسبیہ کمبرانی ءِ براتانی کسواں منی چمانی ھرس ریتکگ اَنت- “

اے مُچی ءَ بیگواھیں مردمانی کھولانی تہ ءَ لھتے پُرنودی ءَ گندگ ءَ اتکگ اَنت کہ آیانی بء دلگوشیں جیڑھے سر ءَ چم کپتگ اَنت، وھدیکہ لھتے راجداریں پاٹیانی کول ءُ مسامانی سر ءَ ترسگی گندگ ءَ اتکگ –

بلوچستان ءَ ھمک وھد ءِ سر ءَ پاکستانی پوج ءِ دست ءَ زورانسری بیگواھیانی گپ نوکیں گپے نہ اِنت – زورانسری آوار جنی ءِ اولی گپ سال 2001 ءَ دیم ءَ اتکگ – چریشی ءَ پد ھمک آگوزگیں سال ءَ پد بیگواھیں مردمانی کَچ ترندی ءَ گیش بیان بیتگ – وائس فار بلوچ مسنگ پرسنز ءِ رد ءَ چِل ھزار ءَ گیش بلوچ بیگواہ کنگ بیتگ اَنت، اشانی بارہ ءَ ھچ سرپدی نیست –

گوستگیں دو دھکانی وھد ءَ پاکستان ءَ مسلم لیگ ن ءُ پیپلز پاٹی ءِ ھردوکانی سرکار واکدار بیتگ – ھردوکیں پاٹیاں وتی وھد ءِ سرکار ءَ بیگواھیں مردمانی جیڑھے گیشنگ ءَ سرجم ءَ بے سوبی ءَ گندگ ءَ اَتکگ اَنت – چُشکہ ناشریں زمانگ “بہ جن ءُ دور بہ دے ” ءِ شَوربندیانی بندات پاکستان پیپلز پاٹی ءِ سرکار ءِ وھد ءَ بندات بیتگ – مسلم لیگ ن ءِ سرکار ءِ وھد ءَ ھزاراں بلوچ زورانسری بیگواھی ءِ آماچ کنگ بیتگ اَنت –

شال ءِ مُچی ءَ کنگ بیتگیں ٹاہ ءُ کولاں بیت کنت آؤکیں وھد ءِ واستا اسلام آباد ءِ سرکار ءِ تھت ءِ نندگ ءَ اے پاٹیانی بنگپ ءَ سوبمندی بیت اِنت،بلے بلوچستان ءَ کس اے مسام ءُ کولانی سر ءَ گیش اوست دارگ ءَ نہ اِنت -بلوچستان ءَ ترندی گاماں پوج ءُ چیریں ادارھانی گپ ھَلگ اِنت ءُ اسلام آباد ءَ کجام ھم سرکار ءَ تھت ءِ سر ءَ بہ نادین اَنت، آ اے تاکتانی دیمپانی ءَ ترس آماچ بیت اِنت –

مھسن داوڑ بلوچستان ءَ واتر کنگ اے جاورھالانی راستی ءِ پدراھی اِنت کہ بلوچستان ءَ اے چیریں تاکتانی چِنکس دست زورمند اَنت – بنجاھی پتر ءِ باسک ءُ پشتون تھپز مومنٹ ءِ رھشون مھسن داوڑ ءَ ھم پی ڈی ایم ءِ مُچی ءَ تران کنگی بیتگ، بلے شال ءَ سر بیگ ءَ آ بالی پَٹ ءَ دارگ بیتگ – آ واکداراں دزگیر کرتگ ءُ بلوچستان ءَ واترینتگ ءُ آ دوبر بلوچستان ءِ آیگ ءِ بندش جنگ بیتگ –

وھدیکہ بلوچستان ءَ یک جاڑیگیں بنجاھی پتر ءِ باسکے ءِ گون ءَ سرجمیں رسانکدرانی دیم ءَ اے رویش کنگ بیت گڑا اے گپ ءَ تچک ءَ گْوشت کن ئے کہ ھمک روچ بلوچستان ءَ چی بیت اِنت کہ اود ءَ اے تاکتانی زورامندی ھست اِنت –

دی بلوچستان پوسٹ

بلوچ راجی آجوئی لوٹوکیں گلانی یکجاھیں گل بلوچ راجی آجوئی سنگر (براس) ءِ جارکش بلوچ ھان ءَ رسانکدراں ءَ وتی شنگ کرتگیں درشان ءِ تہ ءَ گْوشتگ کہ کیچ ءَ گوں دُژمنیں پوج ءِ گون ءَ دو جتائیں جنگاں یکجاھیں گلانی سَے تمردیں سنگتاں شھیدی گچین کُرتگ، ءُ وھدیکہ اے دیم پہ دیمی جنگ ءَ دُژمنیں پوج ءِ بازیں کارمند کُشتگ اَنت –

براس ءِ جارکش ءَ دیمتر ءَ وتی درشان ءِ تہ ءَ گْوشتگ کہ دُژمنیں پوج ءِ گون ءَ اولی جنگ کیچ ءِ کوھی دمگ کلبر ءَ بیست ءُ پنچ اکتوبر ءَ ھما وھد ءَ بوتگ، وھدیکہ دُژمنیں پوج ءَ بازیں کساسے ءَ براس ءِ سرمچارانی انگیر کنگ ءِ جُھد کُرتگ – اے میان ءَ براس ءِ زمین پھازیں سرمچار مبشر ھوت پنام ءِ شاہ دوست ءُ میرجان پنام ءِ آجز ءَ دُژمن ءِ انگیر پروشتگ ءُ بازیں اداراں گوں دُژمن ءَ جنگ داتگ ءُ وتی دُرسیں ھمراھیں سرمچار پہ سلامتی ءَ در کنگ ءَ سوبین بوتگ اَنت ءُ وت داں دیر ءَ جنگ دیگ ءَ پد شھیدی پہ وت ءَ گچین اِش کرتگ –

جارکش ءَ گوشتگ کہ شھید میرجان پنام ءِ آجز یکجاھیں گل بلوچستان لبریشن فرنٹ ءِ باسکے بیتگ – آ چہ سال دوھزار ءُ سینزدہ ءَ بلوچ راجی زْرمبشت ءَ یک گچین ءُ بے درویں کِردے پیلو کنگ ءَ بوتگ- آ تمپ، دشت ءُ مند ءِ مھازانی سر ءَ وتی پرز ءَ پیلو کنگ ءَ بوتگ-
شھید مبشر ھوت پنام ءِ شاہ دوست یکجاھیں گل بلوچ لبریشن آرمی ءِ باسکے بیتگ- آئی ءِ جوانمردی،جرت ءُ زانت ءُ زانشت ءَ وتی درور وت بیتگ- آ گوں سلاہ بندیں جُھد ءَ سال دوھزار ءُ ھبدہ ءَ تربت، زامران، بلیدہ، کلبر ءِ مھاز ءَ وتی پرز ءَ پیلو کنگ ءَ بیتگ۔

جارکش بلوچ ھان ءَ گْوشتگ کہ دُژمنیں پوج ءِ گون ءَ دومی جنگ زیکیں روچ ءَ کولواہ ءِ دمگ آشال ءَ ھما وھد ءَ بیتگ وھدیکہ سرمچار تر ءُ تاب کنگ ءَ بوتگ اَنت- دُژمنیں پوج ءَ سرمچارانی انگیر کنگے جُھد کُرتگ بلے سرمچار مختار جان پنام کنر ءَ جوانمردی ءِ مزنیں دروری برجم کُرتگ ءُ دُژمن ءِ بازیں کارمندے کُشتگ ءُ وتی ھمراھاں چہ انگیر ءَ در کنگ ءَ سوبین بیتگ ءُ بازیں اِداراں گوں دُژمن ءَ دو پہ دو جنگ کُرتگ۔بازیں ساھت ءَ جنگ دیان ءَ پد گُڈی ءَ مختار جان ءَ شھیدی گچین کُرتگ-

شھید مختار جان پنام ءِ کنر یکجاھیں گل بلوچ ریپبلکن آرمی ءِ باسکے بوتگ ءُ آئی ءَ گْوستگیں پنچ سالاں کیچ، کولواہ ءُ آواران ءِ مھازانی سر ءَ وتی پرز پیلو کُرتگ – آ یک ایماندار ءُ جوانمرد ءُ تمردیں راجی سپاھیگے بوتگ- راجی زْرمبشت ءَ آئی ءِ سلاہ بندی جنگ ءِ زند ءُ دیمونی پہ آؤکیں پدریچ ءَ رُژنائیں کشکے-

گڈسر ءَ براس ءِ جارکش بلوچ ھان ءَ گوشتگ کہ دوئیں جنگاں دُژمنیں پوج ءِ درزنے ءَ گیش سپاھی کُشتگ،بلے مدامی وڑ ءَ آ گمنامیں تابوتانی تہ ءَ بند کنگ ءُ راہ دیگ بوتگ انت ءُ گمنامیں مانشاں ایر گیجیگ بوتگ انت – بلے شھید سنگت مختار جان،شھید سنگت مبشر ھوت ءُ شھید سنگت میرجان وتی جوانمردی ءُ جُرت ءُ بے دروریں جُھد ءِ سوب ءَ نہ ایوک ءَ پہ راج ءِ دل ءَ مدام ابدمان اَنت بلکیں گْوستانک ءَ ھم نمیران بوت اَنت-

دی بلوچستان پوسٹ

ھوشاپ ءَ سی پیک پھازگ ءِ ھاتر ءَ برجاھیں بنجل ءِ سر ءَ اُرش کتگ – بی آر اے

بلوچستان ءِ دمگ کیچ ھوشاب ءَ ناشُناسیں سلاہ بندیں مردماں پاکستانی پوج ءِ بنجل ءِ سر ءَ اُرش کتگ –
اُرش ھوشاپ ءِ دمگ دمب ءَ سی پیک دگ ءِ پھازگی پوجی بنجلے ءِ سر ءَ کنگ بوتگ- اُرش ءِ آسر ءَ پاکستانی پوج ءَ جانی ءُ مالی تاوان رس اِتگ –

دومی نیمگ ءَ بلوچ سلاہ بندیں گل بلوچ ریپبلکن آرمی ءِ جارکش بیبگر بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمہ واری منّ اِتگ گوشتگ کہ مئے سرمچاراں گوستگیں شپ ءَ ھوشاپ دمب ءَ بلوچ کُشیں سی پیک پھازگ ءِ ھاتر ءَ جوڑ کتگیں پوج ءِ بُنجل گوں نوکتریں سلاھاں نشانگ کتگ ءُ پوج ءِ دو کارمند کُشتگ –

جارکش بیبگر بلوچ ءَ گوشتگ کہ پروش وارتگیں پوج راجی سرمچاراں چہ پروش ورگ ءَ پد لَس مھلوک ءَ وتی زوراکیانی نشانگ کنت کہ آئی ءِ پروش ورگے نشانی اِنت –

گڈسر ءَ جارکش ءَ گوشتگ کہ داں بلوچستان ءِ آجوئی ءَ مئے اُرش برجاہ مان انت –

دی بلوچستان پوسٹ

سر بیتگیں ھالانی رد ءَ گوستگیں روچ ءَ تمپ ءَ پاکستانی پوج ءَ دو مردمانی جون دمگ ءِ پولیس ءِ گور ءَ رسینتگ اَنت –

دمگ ءِ پولیس ءِ گوشگ اِنت گوستگیں روچ ءَ میر آباد ءِ ھند ءَ پوج ءِ گون ءَ جنگ ءُ چوپ ءَ جنگ بیتگیں مردمانی دو جون آؤرتگ ءُ تمپ ءَ سر کرتگ اَنت –

دمگی مردمانی رد ءَ ھردوکیں جون گوستگیں روچ ءَ تمپ ءِ مانشجاہ ءَ پاکستانی پوج ءُ پولیس ءَ کَل ءُ کسارات کرتگ اَنت –

دمگی مردمانی گوشگ اِنت کہ دمگ ءِ مردم پولیس ءِ گور ءَ شتگ اَنت جونانی پجار کنگ ءَ پولیس ءُ پاکستانی پوج ءَ مکن کرتگ اَنت –

دمگ ءِ مردمانی گوشگ اِنت کہ پولیس ءَ گوشتگ کہ اے جوناں ما وت کَل ءُ کسارت کن ایں –

دمگی مردمانی رد ءَ آؤرتگیں جونانی پجار عاجز ءُ شاہ دوست ءِ نام ءَ زانگ بیتگ اَنت –

جونانی پیش ندارگ ءُ پوج ءِ نیمگ ءَ کَل ءُ کسارت کنگ ءِ بگیری ءَ جنگ بیتگیں مردمانی کھول تمپ ءَ پولیس ءِ کارگس ءِ دیم ءَ زھرشانی کنگ ءَ اَنت –

کھولانی گوشگ اِنت کہ مئے کُشتگیں مردمانی جون مارا دیگ بہ بنت ءُ ما وت اش کَل ءُ کسارت کن ایں –

کھولانی گوشگ اِنت کہ مئے مردمانی سر ءَ زھرناکیں سلاہ کارمرد کنگ بیتگ ءُ مئے مردمانی چھرگ ءِ پوست ھم دور کنگ بیتگ اَنت –

زانگ بہ بیت گوستگیں روچاں تمپ ءَ ھمے وڑ ءَ عرپان ءُ برمش نامیں دو سلاہ بندیں مردمانی جون ھمے وڑ ءَ پاکستانی پوج ءَ کَل ءُ کسارات کرتگ اَنت –

نبشتانک: بلوچی لبزانک ءُ کلاسیکل شائری

نبشتہ کار: قدیر ساگر

دی بلوچستان پوسٹ

انچو کہ بلوچءِ راجدپتر مارا گیشتر شئیری دروشمءَ دست کپتگءُ ھمے وڑا بلوچی لبزانکءِ بن ھشت اھدی شائری زانگ بیت۔
اھدی شائری ءَ بلوچی لبزانکءَ انچیں گنجے داتگ کہ پہ پدریچاں یک رستگیں کشکے یا چیدگے کہ آ پہ ارزانی وتی منزلءَ شوھازت کت کن انت۔

بلوچی کلاسیکل شائریءَ مارا مھرءُ مھبت، میارجلی، بیرگیری،زبانءُ کولءِ پاسداری، وپاداری ءُ وتن دوستیءِ نشان گندگ بنت۔

پہ میارانی پہازگءَ دوداءِ مات دوداءَ تژن گشیت

آ مرد کہ میاراں جلاں
نیمروچاں نہ وپساں کلاں
دوستءُ شرسریں گرانملاں
میری منہاں سارتیناں
دوستاں گوں زباد مالیناں

یا
پہ بیرگیریءَ ملا قاسم جاھے گشیت

مئے پتءُ براتءُ تئی پتءُ ناکو کشتگ َانت
دیر نہ َانت ھونیگ تئی وسءِ جاہءَ نشتگ َانت

بالاچ بیرگیر کہ بلوچءِ اولی گوریلہ زانگ بیت سئیل کن ات کہ چی گشیت

کس گبرے پہ گاریءَ نئیلیت
من وتی آریپ ایں پتءِ بیرءَ چون ِکل آں گوں دژمنیں مرداں

پہ لگوریں مردماں ملا قاسمءِ پنت دلگوش کرزانت

امر ایش ات کہ پروردگار ءَ کارے کتیں
چوٹوءُ ریشی چہ ھمک نامردءَ زتیں
ُشھرت شرمسار ءَ چرءَ دیوانءَ شتیں
پشپدءَ روچے مردماں عبرت کتیں

یا ھما مردم کہ چہ وتی ھاک چہ بہ سدیت

آ کجام برات کہ دیرانت چہ براتانی رمءَ
مسلء کشتیءَ گرکیں ماں نیلبومیں زرءَ
پادے ُکنڈاں چو بوجیگءِ لوھیں ننگرءَ
چو ھما دار کہ ریش کنت پشتءَ چو ھرءَ
ھر گورا یکے نندیت ئے پالامءِ سرءَ
وڈمءُ آبروئی نہ بیت شاھانی درءَ

پا پہ دوستدارءَ مست گشیت

سمو ژہ زینءِ پیپلاں یکے
سمو شہ درشکانی براں یکے
سمو یک شیشہ یے شرابانی
سمو یک سروانے تلارانی
سمو یک ُسھر پلے انارانی
سمو یک ڈیوایے تہارانی
یا جڑی بوٹی یے رگامانی

پازل گامے دیماترا کنزیتءُ گشیت

دلبر چاردہی ماہءِ کپ
زھریں ءُ نہ جنت گوں من گپ
ھر وھد داب کنت نودی شل
گندیم گونگیں گرکی تل
استین ءِ پیاپیں ترونگل
آسیگوں مکن دردانگ
پھکیں اشرپیءِ چانگ
بالادءَ کتگ دیوانگ

یا پہ زورآوراں وتی پشپداں کلوہ کنت

انچیں باریگے کئیت منی ھوشءَ
زھم جنیں مردان گرنت گوشءَ
چابکءُ شھمات ایش برنت ھوشءَ
کیدءُ شببند بنت بے وتی کوشءَ
سر مزن پھریں جھل بنت میشءَ

یا پہ بندیگانی پد جنگءَ کمبرءِ مات دراہینیت

میر کمبرءُ سبزیں سگار
زھمءَ جنءُ نامءَ درآر
نام مسترانی نوک بیت
کبر پیرکءِ امبوہ بیت
اگاں تو گندلی تو کے مرئے
منی دردءُ جفا ہچ نہ بنت

کمبرءِ مات گشی اگاں تئی بندیگاں مھراب بہ بارت گڑا بزاں من

زھریں کرگ آپ داتگاں
بے موسمءَ پاد اتکگاں
چہ ھمسروآں گوستگاں
سالءِ سرءَ بر بیتگاں
بر مشکءُ موراں ورتگاں

یا پہ وتنءَ عبداللہ قھار

کوھنگءِ اے کو ہیں کلات
کسی پتءِ میراس نہ انت
ما گوں سگاراں گپتگاں

اےاھدی شائری سان انت کہ چرے سانءَ سیدھاشمی، عطاشاد، عنقا، کریم دشتی، مراد ساحر، ظفر علی ظفر چرے سانءَ اسرمند اتنتءُ آیانی ساچشت داں ابد نمیران انت۔
ھستیں اھدءَ مبارک قاضی، منیر مومن، منظور بسمل، نثاریوسف، علی جان داد، اسحاق خاموش،میر عمر میر،عارف عزیز، ارشاد پرواز، امیر دوست، خالق ارمانءُ دگہ لھتے نبشتہ کار ام وتی اھدی شائریءِ بوہءَ نہ سستگ انت کہ ھمے سبب انت اشانی ساچشتاں بلوچی لبزانک آتار کتگ۔
گپ اگاں نثر کئیت ردانک بن روتگ وڑے نا وڑےءَ اوں اھدی شائریءَ پیوست انت۔

پدا ما مرچیگیں جدیدیتءِ نامءَ بازیں زبان گاجیلیں نبشتہ کارانی ساچشتاں چمشانکے بدی ایں تہ گندیں چو گولو کبگءِ دابءَ اچ وتءَ گسر کپتگ انتءُ وتءَ کندگی ایش کتگ ۔
برے دل سرخی یے جنکےءِ کباٹءِ تھاانت برے سریگءَ سرا کن مھپرانی رندگءِ رندا انچو مان اڑاتگ انت کہ وانوکءَ وتی گیشینگءِمیارءَ لڈگءَ انت ۔
اے ناسرپد همینچو نہ زان انت کہ جدیدیت ھیالءِ نوک کنگءِ نام انت نئیکہ لبزءِ۔
بیا کلاسیکل شائریءَ جدیدیت سئیل کن۔

شے مرید گشی

ھانی چہ ماہءَ شرترانت
ماہءَ گبارے ماں دپءَ

یا مست توکلیءَ سئیل کن ات

ملگی ڈیل گوں ریشمی جراں
دروشمءَ دنت چو تانہی نوداں
چمی شرانت گوں تنگوہیں دیما
بمبوئیں جاد گوں بارگیں سرین ءَ
ترْند اَنت چو آمڑ داتگیں تیگ ءَ

چینچو زگرانت ءُ چینچو وتی زمینءِ وشبوءَ ھمگرنچ انت۔

گڈسرا ھمے گشاں کلاسیکل شائری ھستیںءُ آؤکیں اھدءِ وانوکءُ نبشتہ کاراں سکینءُ دیمرویءِ چیدگ انت ۔
بلوچی لبزانکءَ پہ اھدی شائری ارواہءِ بستارءَ داریت کہ ماں بلوچی لبزانک ءَ ھچ دروشمءَ ڈالچار کنگ نہ بیت ۔

بلوچی میزراں بات

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

ماجد بلوچ ءُ فیروز بلوچ ءِ یلہ کنگ ءِ واستا بیست ءُ نُھ اکتوبر ءَ شال ءِ پریس کلب ءِ دیم ءَ زھرشانی کنگ بیت اِنت – کھول

ماجد بلوچ ءُ فیروز بلوچ ءِ کھول ءِ شنگ کرتگیں درشان ءِ تہ ءَ گْوشگ بیتگ کہ بیست ءُ نُھ مئی دوھزار ءُ نوزدہ ءَ فیروز بلوچ وتی بُنکی ھنکین ءَ اَئید ءِ مُکلاں آیگ ءَ بیتگ کہ کلات ءِ ھند ءَ آئی ءِ ناکوزتک جمیل بلوچ ءِ ھمراھی ءَ آوار جنگ بیتگ -آئی ءِ ناکوزتک جمیل بلوچ یک سالے ءَ پد یلہ کنگ بیتگ بلے فیروز بلوچ انگت ءَ بیگواہ اِنت – فیروز بلوچ بیوٹمز ءَ گریجویشن کنگ ءَ پد بلوچستان شھدبرجاہ ءَ بلوچی ڈیپارٹمنٹ ءِ نودربرے بیتگ –

آیاں گْوشت کہ ماجد بلوچ وتی لوگ ءَ کلات ءَ سِی ءُ یک مئی ءَ لوگ ءِ مردمانی دیم ءَ آوات جنگ بیتگ مک بلوچستان شھدربرجاہ ءِ کمپیوٹرسائنس ءِ نودربرے بیتگ –

کھولاں گْوشت کہ بلوچستان ءَ بیگواھیں مردمانی جاورھال سکی ءَ ناوش بیان اِنت -بیگواھیں مردمانی جیڑہ ھنچیں جیڑھے کہ اشی ءِ واستا تنی وھدی کَسے ءَ الکاپیں گامگیجے چِست نہ کرتگ – لھتے مردمانی نیمگ ءَ بس دپ وشی ءَ بیگواھیں مردمانی واستا پدری کنگ بیتگ بلے تنی وھدی اے جیڑھے گشینگ ءَ ھچ وڑیں گامگیج زورگ گندگ ءَ نیاتکگ –

کھول ءَ گوشت کہ بلوچستان ءَ بازیں کَچے ءَ بیگواھیں مردمانی زانگول کرتگیں جون جنگل ءُ گیاباناں دزکپتگ اَنت اے درگت ءَ مئے دل ھم وتی دوستیگیں مردمانی واستا جنت –

کھول ءَ گْوشت کہ ماجد بلوچ ءُ فیروز بلوچ انگت ءَ بیگواہ کنگ ءِ سر ءَ بیست ءُ نُھ اکتوبر ءَ شال ءِ پریس کلب ءِ دیم ءَ زھرشانی کنگ بیت اِنر – انسانی ھکانی گل ءُ دومی تکاں بندوکیں مردماِ گوں دزبندی اِنت مئے زھرشانی ءَ بھر بہ زور اَنت ءُ فیروز بلوچ ءُ ماجد بلوچ ءِ یلہ کنائینگ ءَ وتی کرد ءَ پیلو بہ کن اَنت ءُ مئے توار جوڑ بہ بنت –

گڈسر ءَ سرکاری ادارھاں گوں دزبندی کن آں بیگواھیں مردمانی جیڑہ ءَ الکاپی ءَ دلگوش گور بہ کنت ءُ گشینگ ءِ واستا جوانیں گامے ءَ دیم ءَ بئیت –

شال ءَ حاجی آزاد خان مری ءُ آئی ءِ ھمراھانی کوش ءِ زمّہ واری ءَ منّیں- بی ایل اے

دی بلوچستان پوسٹ

بلوچستان ءِ مزن شھر شال ءَ مروچی یک شمبے ءِ روچ ءَ ھزار گنجی ءِ دمگ ءَ گاڑی ءِ سر ءَ بمب تراک ءِ کنگ بوتگ – تراک ءِ آسر ءَ سَے مردم حاجی آزاد خان ء مھراب خان، خیراللہ ء جمال خان ءُ شاھنواز ء امیر بکش بیران بوتگ انت ءُ وھدیکہ حاجی شاہ ء امام شاہ ءُ عبدالحمید ء محمد ظاھر زدگ بوتگ انت –

دومی نیمگ ءَ بلوچ آجوئی لوٹوکیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تھا اے بمب تراک ءِ زمہ واری منّ اِتگ ءُ گوشتگ کہ بلوچ لبریشن آرمی ءِ سرمچاراں مروچی یکشمبے ءِ روچ ءَ شال ءِ دمگ ھزار گنجی ءَ سبزی منڈی ءَ ریاستی چیریں ادارھانی کارندہ حاجی آزاد خان مری گوں ھمراھاں “وی بی آئی ای ڈی ” تراک ناکیں شوروانی نشانگ جوڑ کرتگ ـ چریشی ءَ آ گوں وتی ھمراھاں مرتگ –

جارکش جئیند بلوچ ءَ دیمتر ءَ گوشتگ کہ حاجی آزاد خان مری پاکستانی پوج ءُ چیریں ادارھانی ھاسیں کارندھے بوتگ کہ دژمن ءِ گُشگ ءِ پد ءَ بلوچ سرمچارانی کھولانی تنگ کنگ، جھدکارانی دشمن ءِ دیم ءَ سلاھانی دور دیگ ءَ لاچار کنگ، بزگیں بلوچانی جاہ ءُ دوارانی سر ءَ زورگری کنگ ءُ بلوچ سرمچارانی بگیری ءَ ڈیتھ اسکواڈ ءِ جوڑ کنگ ءِ وڑیں راجی دلاری ءِ کُشت گیری ءِ ھکدار بوتگ – آئی ءِ گوستگیں کتکاریانی تہ ءَ نیوکاھان ءِ بزگیں مری بلوچانی زمینانی سر ءَ زورگر کنگ ھم ھوار انت –

جارکش ءَ گوشتگ کہ بلوچ لبریشن آرمی ءَ پیش ءَ جار پرینتگ کہ ھر ھما مردم بلوچ زرمبشت ءِ بگیری ءَ دژمن ءِ گون ءَ ھوار بیت گڑا بیمناکیں سزائِے دیمپانے ءِ ھاتر ءَ ساڑی بہ بیت – ءُ درسیں بلوچ اے وڑیں راج دشمناں چہ وت ءَ پھازگ ءُ دور بوگ ءِ ھاتر ءَ مکن کنگ بوتگ انت – اے وڑیں مردمانی سر ءَ ھر کجا ھر وڑیں ساھت ءَ اُرش کنگ بیت – اے وڑیں اُرشانی میان ءَ کسے گوں اشاں نزیکی داریت لس مردمے آھانی گور ءَ روت گڑا وتی تاوان ءِ زمہ وار وت انت –

جارکش جئیند بلوچ ءَ دیمتر ءَ گوشتگ کہ ھمے درگت ءَ بلوچ لبریشن آرمی ایشی ءَ المی ءِ لیکیت کہ مروچی شال ءَ بوتگیں پی ڈی ایم ءِ مُچے ءِ درگت ءَ وتی بنگپ ءَ دیم ءَ بیاریت – آئی ءَ گوشتگ کہ پی ڈی ایم ھمے زورگریں ریاست ءِ دومی دیم انت، کہ آئی ءِ دست ھم چہ بلوچ ءِ ھوناں ھونین انت ـ پی ڈی ایم ءَ ھواریں درستیں وفاقی گل گوست ءَ بلوچ ءِ چکچینی ءَ ھمے وڑ ھوار بوتگ انت کہ مروچی تھریک انساپ ءِ سرکار انت – مروچی مسلم لیگ ن مریم نواز ءَ ھما وڑ ءَ بلوچانی دیم ءَ وت ءَ ساپ ءُ پلگارگی جوڑ کنگ ءُ دیم ءَ آرگ انت، آئی ءِ پت ءَ دومی دور ءِ سرکار ءِ تہ ءَ چاگی ءِ تہ ءَ زھرناکیں بمب ءِ چکاس کرتگ ءُ بلوچ سرڈگار ءِ دلبند تراکینتگ اَنت – ءُ سیمی دور ءِ سرکار ءَ ھمائی ءِ منّگ ءَ ھزاراں بیگواھیں مردم شھید کنگ بوتگ انت ءُ پیپلز پارٹی ءِ گوستگیں دور ءِ سرکار ءَ بلوچستان ءِ تہ ءَ یکجاھیں مانشانی در آیگ بندات بوت – بہ جن بہ کوش چگل دئے پالیسی بندات کنگ بوت ءُ ڈیتھ اسکواڈ جوڑ کنگ بوت بلوچ چاگرد ءِ سر ءَ ڈُول کنگ بوت انت – بلوچ سرڈگار ءِ سر ءَ ایشانی مول ءَ مراد بلوچانی گون ءَ ھمدردی نہ انت بلکیں وتی پنڈوکی واکداری انت – پاکستان ءِ تہ ءَ ھر کسے ءِ کہ واک اتکگ آئی ءَ چہ روچ مرچی بلوچستان ءِ تہ ءَ ھچ وڑیں دیگری نہ اتکگ – بلوچستان یک ایردستیں سرڈگار ءِ، کہ اے درسیں سیاسی گلانی پلامرزی ءَ چہ تچکی ءَ پوج ءِ ایردست ءُ آئی ءِ واک انت – بلوچانی ھر اے وڑیں سیاسی یکجاھی ءُ اے وڑیں زرمبشت تہ ءَ بدلی آرگ ءِ امیت دارگ وت ءَ اھمکیانی تہ ءَ یلہ کنگ ءَ انت – اسلام آباد ءِ تہ ءَ توپک ھر کسے ءِ دست ءَ بہ بیت بلوچ ھمے وڑ نشانگ جوڑ بیت ءُ کشگ بیت – بلوچ راج چہ کشندہ ءِ در چنگ ءَ شرتریں اے کشت ءُ کوشاں چہ ءَ رکگ ءُ آجوئی ءِ نیمگ ءَ وتی دلگوش ءَ توان ءَ بہ دنت –

جارکش جئیند بلوچ ءَ گڈسر ءَ وتی درشان ءِ تہ ءَ گوشتگ کہ بلوچ لبریشن آرمی یکرندے پد ءَ درسیں ریاستی کارندھاں مکن کنت ھر کسے بلوچ راجی آجوئی ءِ زرمبشت ءِ بگیری ءَ دژمنیں پوج ءَ گون انت آ وتی راج دشمنی ءَ چہ دور بداریت اگاں ناں اے وڑیں درسیں مردمانی دروشم چو حاجی آزاد خان ءِ وڑ ءَ بیت –