TBP Balochi

زانت ءُ زانشت ھما یکیں سِلاہ اِنت کہ گل ءُ راجی زرمبشت ءَ مھکم کنت – ابرم بلوچ

دی بلوچستان پوسٹ

بلوچ نودربرگل آزاد ءِ بنجاھی جارکش ءَ شنگ کرتگیں درشان ءِ تہ ءَ گوشتگ کہ بی ایس او آزاد ءِ بیست ءُ دومی نیاد پتر بنام ءِ آجوئی ءِ اُستاد شھید سباء دشتیاری ءُ درسگاہ ءِ آجوئی بابا ھیر بکش مری ءِ نام ءَ مروچی سیمی روچ ءَ سوبمندی ءَ گوں سرجم بیتگ –

بیست ءُ دومی نیاد پتر ءَ بنجاھی سرکماش ءِ تران، رھبندی گیش ءُ گیوار، کارگشاد ءِ ھال، شرگداری، گل ءِ کارگردگی، دنیا ءُ دمگی راجداری ءِ ھال ءُ اھوال آؤکیں وھد ءِ بنگپ ءِ سر ءَ باوست بیتگ –

بنجاھی نیاد ءَ اولی روچ ءَ بنجاھی سرکماش ءِ تران، گل ءِ رھبندی، کارگشاد ءِ ھالانی سر ءَ باوست کنگ بیتگ ءُ دومی روچ ءَ شرگداری، گل ءِ کار ءُ کرد ءُ جھانی ءُ دمگی راجداری ءِ بنگپانی سر ءَ مراگش کنگ بیتگ –

سیمی روچ ءَ بنجاھی پتر ءِ نیاد ءَ آؤکیں وھد ءِ سر ءَ جوانیں گامگیج ءُ دمگدارانی نیمگ ءَ دیم ءَ آؤرتگیں گپانی سر ءَ باوست کنگ بیتگ، دیم ءَ آؤرتگیں گپانی سر ءَ باوست کنگ ءَ پد گل ءِ گھتری ءُ مھکمی ءِ ھاتر ءَ دو سال ءِ مراگش ءُ شوربندی منّگ بیتگ اَنت –

آؤکین کارانی سر ءَ بیتگیں بنگپ گل ءِ مراگش ءَ ھلاس کنگ ءُ پیسریگیں پتر ءِ پروشگ ءُ نوکیں گچینکاری کنگ بیتگ اَت –
گچینکاری ءَ بنجاھی پتر ءِ باسک عائشہ بلوچ گچینکاری ءِ سروک ءُ ھانی بلوچ ءُ مھلب بلوچ گچینکاری ءِ باسک نامینگ بیت اَنت- گچینکاری ءِ سرجمی ءَ پد گچینکاری ءِ واکداراں گل ءِ اگدوھانی ھاتر ءَ گچین کرتگیں نامانی جار پِرینتگ اَنت – گچین کرتگینانی تہ ءَ ابرم بلوچ ابید ءِ دیم ءَ اوشتوکیں مردم ءَ گل ءِ سرکماش ءُھمے وڑ ءَ مھرزاد بلوچ ھم ابید ءِ دیم ءَ اوشتوکیں مردم ءَ گل ءِ کاگشاد ءِ کسان کمک کارگشاد جوڑینگ بیتگ –

شنگ کرتگیں درشان ءَ گوشگ بیتگ کہ گل ءِ گچینکاری ءِ سرجم بوگ ءَ پد بندیں کوٹی ءَ نیاد ھلاس کنگ بیتگ ءُ سوگندی مراگش برجم دارگ بیتگ کہ آئی ءِ تہ ءَ گچین بیتگیں زمہ وار ءُ باسکاں گوستگیں سرکماش سھراب بلوچ ءَ سوگند گپتگ –

سوگند وری ءِ مراگش ءَ تران کنان ءَ گل ءِ گوستگیں سرکماش سھراب بلوچ ءَ گْوشت کہ گچین بیتگیں بنجاھی پتر ءُ بنجاھی پتر ءِ باسکاں دلبڈی دے آں کہ آ اے جاورانی تہ ءَ گل ءِ مھکم کنگ ءَ سوبمندیں بنجاھی پتر ءِ نیاد اڈ داتگ ءُ بنجاھی پتر ءِ نیاد ءِ مساماں سرجمیں بلوچستان ءَ گل ءِ کلوھانی سر کنگ ءِ اھد کرتگ -آئی ءَ گوشت کہ من اُمیت داراں کہ گچین بوتگیں سنگت وتی زمہ واریاں شریں رنگے ءَ سرپد بنت ءُ گل ءِ لوٹانی ھاتر ےَ جد ءُ جھد ءَ برجم دار اَنت –

گچینکاری ءَ پد گوستگیں پتر ءِ پروشگ ءُ نوکیں پتر ءِ اڈ دیگ ءُ گل ءِ زمہ واری بنجاھی پتر ءِ دست ءَ دیگ بیتگ اَنت –

چریشی ءَ پد نوک گچین بیتگیں سرکماش ابرم بلوچ ءَ راجی پتر ءِ نیاد ءَ تران کنان ءَ گْوشتگ کہ من درسیں باسکاں مراد باتی گوش اَں کہ آیاں اے جنجالانی جاوراں راجی پتر ءِ نیاد ءِ برجم دارگ سرجم کرتگ – اے ناوشیں جاوراں راجی پتر ءِ اڈ دیگ باسکانی گل ءِ گون ءَ جھلیں مھر ءُ وتی زانت ءُ زانشتی ءَ بندوکے ءِ منّانک اَنت –

آئی ءَ گْوشت کہ گچین بیتگیں پتر ءُ بنجاھی پتر ءِ باسکاں مراد باتی گوش آں کہ آیاں گل ءِ مھکم کنگ ءُ لوگ لوگ ءَ کلوہ ءِ سر کنگ ءِ ھاتر ءَ جد ءُ جھد کرتگ ءُ جد ءُ جھد کرتگ ءُ من یک سرکماشے ءِ اگدوا اُمیت داراں کہ درسیں باسک ءُ گچین بوتگیں بنجاھی پتر ءِ سنگت گل ءِ زانت ءُ زانشت ءِ سر ءَ بنت ءُ آؤکیں دوسالانی تہ ءَ گل ءِ زانشت ءِ ھمراھی ءَ کوپگ پہ کوپگ بنت ءُ راجی زرمبشت ءِ کلوہ ءَ سرجمیں بلوچستان ءِ گدان گدان ءَ رسین اَنت –

آئی ءَ گوشت کہ مئے بنداتی جھد ھمے بہ بیت کہ گل ءِ باسک راجمانی ءِ زانت ءِ بنھِشت ءَ گل ءَ گوں بندوک بہ بنت پرچاکہ زانشت ھمے یکیں سِلاہ اِنت گل ءَ ءُ راجی زرمبشت ءَ مھکم کنت –

آئی ءَ گْوشت کہ آشوب ءِ سوبمندی ءِ گِر ءُ دار آشوبی گلے ءَ ابید بے سیت اِنت – ابید ءِ آشوبی گلے ءَ آشوب ءِ گندگ وابے ءِ دروشم ءَ اِنت -آشوبی جاورانی تہ ءَ مٹی ھما وھد ءَ بیر کہ نیزوریانی تہ ءَ چمشانک دیگ ءُ گل ءِ تہ ھِی جیڑوانی سر ءَ چار ءُ پجار کنگ اِنت- آئی ءَ گوشت کہ یک آشوبی گلے ءِ تہ ءَ اے توان بہ بیت کہ گل ءِ مراگشاں لس مھلوک ءُ نودربراں سر کُت بہ کنت –

آئی ءَ گوشت کہ مروچی مارا ھما جاور ءُ گپانی سر ءَ دلگوش دیگی اِنت کہ ھما مول ءُ مرادانی ھاتر ءَ گل جوڑ کنگ بیتگ، گل آ مول ءُ مراداں نیزوریانی تہ ءَ چتور ءُ چے پئیم آشوبی رھبندانی تہ ءَ وت ءَ رسینت کنت – گل ھریک نودربرے ءِ واستا جوڑ کنگ بیتگ اے کلوہ ءُ گل ھر ھما نودربر ءَ سرکنگ بہ بیت –

گُڈ سر ءَ بی ایس او آزاد ءِ سرکماش ءَ گْوشت کہ نودربرانی تہ ءَ راجداری ءِ سنچ ءِ مانگیجگ لوٹ ایت کہ پاکستان ءُ چائینہ ءِ شوربندی، بلوچ راجی زرمبشت ءِ ھستیں دیمروی ءُ آشوبی گام ءَ سرجم ءَ منزل ءَ رسینگ ءَ داں ورنائیں نودربراں زانت ءُ زانشت ءَ گوں وت ءَ بندوک کنگ ءُ مول ءُ مرادانی منزل ءِ رسگ ءِ سوبمندی اِنت –

ورنائیں نودربر وتی پِت ءِ پجیگ ءَ بیگواہ کنگ بیتگ، رند ءَ کماش یل کنگ بیتگ۔

دی بلوچستان پوسٹ

بولان میڈیکل کالج ءِ نودربر نبی بخش بلوچ ناشناسیں مردماں چہ پنجگور ءِ دمگ ءَ بیگواہ کُتگ ۔ نودربر کرونا ءِ سوب ءَ وتی موکلانی گوازینگ ءَ پنجگور ءَ اتکگ بیتگ۔

ھالانی ردءَ نبی بخش پنجگور وشبود ءَ جھمنند اِنت کہ چہ پنجگور ءِ ھنکین گرمکان ءَ چہ آئی ءِ پِت ماسٹر عبدالرزاق ءِ ھواری ءَ سلاہ بندیں مردماں بیگواہ کُتگ اَنت، رند ءَ آئی ءِ پِت وئیل کنگ بیتگ وھدیکہ نودربر داں انگت ءَ بیگواہ اِنت۔

دمگی واکدارانی نیمگ ءَ چہ داں انگت اے درگت ءَ ھچ سرپدی دیگ نہ بیتگ۔ زانگ بہ بیت چہ ایشی ءَ پیش ھم بلوچستان ءِ جتائیں دمگاں ھمے پئیمیں وئیلانی تہ ءَ ورناہ زور بیگواہ کنگ بیتگ اَنت کہ ایشانی تہ ءَ پاکستانی لشکر ءُ چیریں گلانی کارمند چہ کھولانی نیمگ ءَ نامینگ بیتگ اَنت وھدیکہ بازیں وئیلانی تہ ءَ ھمے گلانی نام ءَ ایف آئی آر نبشتہ کنگ بیتگ اَنت۔

گوستگیں روچاں بیگواھیں نودربر فیروز بلوچ ءُ ماجد بلوچ ءِ کھول ءِ نیمگ ءَ شال پریس کلب ءِ دیمءَ زھرشانی کنگ بیتگ اَت۔فیروز بلوچ 29 مئی 2020 ءَ شال ءَ چہ پنجگور ءَ روگ ءِ وھد ءَ مساپری ءِ نیام ءَ قلات ءِ ھند ءَ سلاھبندیں مردماں بیگواہ کُتگ اَت ھمے وڑ ءَ بلوچستان یونیورسٹی ءَ کمپیوٹر سائنس ءِ نودربر ماجد 31 مئی 2020 ءَ قلات ءَ چہ آئی لوگ ءَ بیگواہ کنگ بیتگ اَت ۔
ماجد ءِ کھول ءِ رد ءَ پوجی ءُ سادگ پُچ پوشیتگیں کارمنداں 31 مئی ءِ شپ ءَ آیانی لوگ ءَ بیڑ بُرتگ ءُ لٹ ءُ کُٹ کنان ءَ ماجد وتی ھمراہ بُرتگ کہ چہ ایشی ءَ پد آئی درگت ءَ ھچ وڑیں اھوال نہ رس اِتگ۔

بلوچ آجوئی لوٹوکیں سلاہ بندیں گل بلوچ لبریشن آرمی ءَ شاھرگ ءَ پاکستانی پوج ءِ سر ءَ بیتگیں اُرش ءِ زمہ واری من اِتگ-

دی بلوچستان پوسٹ

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کُتگیں درشان ءِ تہ ءَ گُوشتگ کہ بی ایل اے سرمچاراں ھرنائی ءِ دمگ شاھرگ ءَ ٹاکری ءِ ھند ءَ زورگریں پاکستانی پوج ءِ یک بنجلے ءِ سر ءَ اُرش کُتگ ءُ نشانگ جوڑ کُتگ۔

جئیند بلوچ ءَ دیمتر ءَ گُشت سرمچاران دژمن ءِ بنجل ءِ سر ءَ گوں مزنیں سلاھاں اُرش کُتگ کہ اِشی ءِ تہ ءَ دژمن ءَ جانی ءُ مالی تاوان رس اِتگ۔

جارکش ءَ گُڈ سر ءَ گُشت کہ اے اُرش ءِ زمہ واری ءَ مئے گل بلوچ لبریشن آرمی من اِیت۔

دی بلوچستان پوسٹ

شال ءَ سی ٹی ڈی ءَ کمبرانی دگ ءَ پٹ ءُ پول کنان ءَ ناشرکاریں گلے ءِ باسکے دزگیر کنگ ءِ ٹاہ داتگ، ناشرکارے گور ءَ سِلہ ءُ دگہ تراکناکیں شوروانی دزکپگ ءِ ٹاہ دیگ بیتگ –

سی ٹی ڈی ءِ بنشون ءِ رد ءَ چیریں ھالے ءِ سر بیگ ءَ کمبرانی دگ ءَ یک جاھے انگیر ءَ کرتگ ءَ ناشرکاریں گلے ءَ بندوکیں مردمے دزگیر کرتگ – جرمکار ءَ بلوچستان ءَ ناشری ءُ کُشت ءُ کوشاں دزمانجنی منّ اِتگ اَنت –

سی ٹی ڈی ءَ اے ٹاہ ھم داتگ کہ جرمکار ءِ گور ءَ سِلاہ ءُ دگہ تراکناکیں شورو دزکپتگ اَنت – بنشون ءَ اے گپ نہ گوشتگ کہ جرمکار ءِ نام کَے اِنت ءُ کجام ناشریں گل ءَ گون بندوک اِنت –

نبشتانک: سرانی بازی
 
نبشتہ کار: مھم جان گُل

دی بلوچستان پوسٹ

من گوں وتی سنگتاں سپرے ءَ دراتکگ اِت آں مئے سپر سے روچ ءُ سے شپ ئیگ اَت ،  ما وتی توشگ ھمے کساس ءَ زرت اَنت پہ وتی سپر ءَ راھادگ بیت ایں سنگتانی مزاک ءُ کندگاں ما نزانت کہ اے روچ چون گواست ءُ شُت شپ ءَ ما مزنیں پندے ءِ بُرگ ءَ چہ پَد گیگیں جاھے ءَ رس اِت ایں گڑا ما سنگتاں شور کرت کہ شپ ءَ ھمد ءَ دار ایں سُھب ءَ روچ ءِ ٹِک دیگ ءَ چِہ پیسر در کپ ایں مارا سک ھم دَم بُرتگ اَت ما ھمد ءَ داشت وپت اِیں ،  روچ ءِ ٹِک دیگ ءَ چِہ پیسر یک سنگتے پاد اتک ءُ مارا کُلیں سنگت پاد کُت ئِے ءُ گوشت ئِے انی تھاروکی اِنت وشتر اِنت سپر برین اِت ما وتی کلیگ ءُ دیگ ءَ ساز ءُ سامان زرت اَنت درکپت ایں۔

ما دیم ءَ روان اِت ایں گڑا ھور ءَ مارا گپت سر ءِ چیر دیگ ءَ ھچ نیست اَت ما چم دیر شانک دات اَنت دیست کہ یک بانے زایر اِنت بلے آ بان سک دیر اِنت اے جاہ ءَ  ما اوشتاتگ ایں اِد ءَ چے یک ساھتے راہ بیت گڑا اوشتگ ءَ چے شتر اِنت کہ ما برو ایں بلے مئے منزل دیمی نیمگ ءَ اِنت مارا دیم ءَ روگی اِنت اے بان مئے کشی نیمگ ءَ اِنت اگاں ھور بس بکنت مارا اَلم یک برے پد ءَ وتی اولی جاہ ءَ آیگی اِنت پد ءَ وتی منزل ءَ راھادگ بہ بہ ایں، گڑا من درائینت اے ھور گوں ترْندیں رگاماں گوارگ ءَ اِنت ھور اَلم جلدی بس کنت دیر ءَ نہ دار ایت پد ءَ آ بان ءِ دیم ءَ یک کورے ھم ھست اگاں ما برو ایں پد ءَ آیگ ءِ وھد ءَ ھار بکنت گڑا ما سک پس ایں۔

سنگتاں دیست کہ من چوش گوشگ ءَ آں گڑا لھتیں سنگت ءَ ھچ نچار اِت منی گپ ءِ سر ءَ ھو ھو گوشت اِش کہ من ھمے بیماراں سنگتاں من ھرچی بگوشاں آ منی گپ ءَ ھچ بر نہ بور اَنت ، من چار اِت کہ کُلیں سنگت منی گپ ءَ ھو کنگ ءَ اَنت من پد ءَ گوشت ھو اگاں ما وتی وھد ءِ سر ءَ وتی جاہ ءَ مہ رس ایں گڑا ما گنتر پریشان بہ ایں پرچا کہ مارا توشگ ھم آ کَد ءُ کساس ءَ گون نیست بیت ھم کنت کہ مارا کور دیر ءَ بدار اِیت پد ءَ دو سنگت ءَ درائینت کہ تو راست گوش ئے بلے مارا اِد ءَ دارگی نہ اِنت ھمت کن ایں رو ایں اود ءَ بلکیں آلکی ھست اِنت ما وتی توشگاں وڑ ءِ سر ءَ کارمرز کن ایں  اے ھور بسی ءِ نام ءَ نزانت  بیت کنت مارا ھما دیم ءَ ھم راھے برس ایت اگاں ناں اللہ ھیر کنت۔

من گوشت تی سر پر بیگ ءَ نہ اِنت من گوشگ ءَ آں کہ مارا ھمد ءَ دارگی اِنت گڑا ھمد ءَ دار ایں
منی گپ سنگتاں بَد برت گْوشت اِش کہ ما روگ ءَ ایں کائے گوں بریں۔

گڑا من ءَ پیسلاہ کنگی اَت کہ چون بکناں من آ دویں سنگتاں بداراں اگاں ما ھم برو ایں؟
ما ھمشانی گوما بُرو ایں من سنگتانی دیم ءَ سک پشل باں کہ منی پیسلاہ منی جند ءِ سر ءَ پرش اِیت گڑا ھمے میانی ءَ من درائینت شما اگاں یک گامے دیم ءَ جَت گڑا شما چہ مئے کاروان ءَ پارک اِت، درست ھیران بیت اَنت ءُ آ سنگت ھم اوشتات اَنت گڑا ھمے رؤکیں سنگتاں من ءَ جست کرت کہ تو کے کہ مارا چہ اے کاروان ءَ چی پارک کنگ ءَ ئے من گْوشت من ءَ دہ سر گون شما دو اِت۔

گڑا منی اے گپ منی لھتیں سنگت ءَ ھم وش نہ بیت بلے ھچ نہ گْوشت اِش آ دویں سنگت شُت اَنت ما داں دیر ءَ ھمد ءَ نشت ایں ھُور ءَ بس ھم نہ کرت گڑا ما شپ کپت ایں اے وھد ءَ ھور ءَ بس کرتگ اَت من ھمد ءَ داشت سُھب بیت ما گوں سنگتاں در کپت ایں گڑا اے روچ ھم شُت مئے منزل نزدیک اَت گڑا من گوں کندگ ءَ گْوشت آ سنگت سک بزگ بنت منی گپ نہ گپت اِش کور ءَ گَٹ کرتگ اَنت نی ، کندان مزاک کناں ما روان ات ایں-

مئے گُدّی جاہ ءِ رسگ ءَ چِہ پیسر آ دویں سنگت ھمود ءَ نشتگ اِت اَنت ما کُل ھیران بیت ایں اے چون چہ مارا پیسر رس اِتگ اَنت؟-

گڑا سلام ءُ دروت ءَ چہ پَد من ءَ ھمے سنگت ءَ گْوشت تو مارا چہ وتی کاروان ءَ چہ پارک کرتگ بلے مئے کاروان انگت راھی اِنت سر ءِ بازی ءَ وتی تھکت مزان تھکت ھما وھد ءَ ترا گون بیت تو سرانی کَدر ءَ بزان ئے دومی سنگت ءَ دَرائینت ما کہ وھدے بان ءِ نیمگ ءَ روگ ءَ اِت ایں آنگُر ھور نیست اَت ھمے کور ءِ کر ءَ کہ شمارا ترسگ ءَ اَت ھمے کور ءَ مارا آؤرت وتی منزل ءَ سر کرت اے ھمے کور اِنت کہ مئے منزل اِنت انی ما نیشتگ اِیں۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: چہ ھیال ءَ در نیائے تو ھاسلو

نبشتہ کار: ظفر رند

دی بلوچستان پوسٹ

ھما اِنت کہ تو چہ اد ءَ رپتگ ئے دل دمانے ھم چہ تو بے ھال نہ بیت اے دل مدام گوں تئی ھیال ءَ بندوک اِنت ھمک ساھت ءُ دمان ءَ تو گیر کائے گپ گپ ءَ تئی نام دپ ءَ کیت انچو سما بیت تو گوں من ھمگام ئے من ءُ تو دست ما دست این ءُ رؤگ ءَ ایں دیم پہ وتی منزل ءَ !
گوں تو زندے گوازینتگیں ھمک ساھت سک باز گیر کاینت ءُ دُرستیں ساھت انچو یات گار اَنت کہ ھر بابت ءَ نبشتہ بکناں منی ھیال ءَ کَم اِنت .
تو انچو تھنا چہ ادا رپت ئے کہ ھچ کس ءَ تئی رؤگ باور نہ بیت . ھر کس ھمے ودار ءَ انت کہ تو بلکیں پد ءَ واتر کائے بلے نا تو واتر کائے نہ تئی کلوہ ءُ ھالے کیت
تئی جتاھی ءَھمینچو وھد گوزگ ءَ اِنت دل ءِ درد گیش بوان اِنت بے تو اے زندگی سک اِبیتک اِنت انچو سماء بیت ھر نیمگ ءَ تھاری ءَ مانشانتگ
مروچی روچ پہ من گُش ئے کیامت اِنت اے ھما شومیں بیگاہ انت کہ تو چہ اے دنیا ءَ رپت ئے ءُ وتی گُڈی جاہ ءَ شُت ئے.
انگت من ءَ باور نہ بیت تئی شھادت. ھاسلو مرچی دل سک بے تاھیر انت چم ارسیگ انت دست لرزگ ءَ انت نزاناں پہ تو چی نبشتہ بکناں.
انوں من ھما جاہ نشتگ آں کہ گوں تو زند ءِ گُڈی وھد ءَ بگل گیر بوت آں.
ھو اڑے ھاسل کمو انگت بہ کند پہ تئی کندگ ءَ سک زہیر کنت مرچی پد ءَ سیاھیں پُچاں گور ءَ کن چادر ءَ بَڈ ءَ کن بیا رویں ڈن ءَ چَکّر ایں جَن ایں گوں سنگتاں دیوان کنیں

چہ تو پَد اے میتگ ءَ ھچ نہ بیت نوید
چہ تو پَد اے میتگ ءَ رستر وَر اَنت رواَنت

اکتوبر ءِ ماہ پہ من چو کیامت ءَ اِنت اے ماہ ءَ درد گیشتر بنت اے ماہ ءَ انچیں من ءَ درد ءُ رنج داتگ کہ من وس کُتگ آ گوں من بے ھال کنگ نہ بنت.
مروچی روچ ھاسل ءِ چارمی سالروچ اِنت بزاں ھاسل مرچی ءَ چہ چار سال پیسر ھمے روچ ءَ چہ من سِست ءُ جُتا بوت ءُ وتی گُڈی جاہ ءَ شُت.
مروچی ءَ چہ چار سال پیسر اے ساھت ءَ من ءُ ھاسل یکجاہ نشتگ ءُ دیوان کنگ ءَ اَتاں اے ساھت ءَ ھاسلو سک کندگ ءَ ات وتی زند ءِ کِسّہ ءَ آرگ ءَ اَت ءُ بار بار ھمے گُشت ئِے کہ یار باید اِنت انسان انچیں کار بکنت کہ مرگ ءَ چہ پد ھم زندگ بہ بیت ھاسلو وتی کسہ آرگ ءَ اَت ءُ وھد گوزان اَت اے ساھت ءَ مگرب ءِ بانگ بوت ھاسل ءَ من ءَ توار جَت کہ بیا رویں ڈن ءَ دومی لوگ ءَ ءُ پد ءَ جلدی واتر کائیں ما ھر دو راہ گپت این ءُ گِس ءِ دَپ ءَ سر بوگ ءَ پیسر مات ءَ گُشت کمو سبر کن اِت بِلّے نماز ھلاس بیت برو اِت ما کمو اُشتات ایں بانگ ھلاس بوت ما چہ گس ءَ دَر اتک ءُ راہ کپتیں اے روچ ءَ ھاسل سک بچکندگ ءَ اَت ءُ مسکرا کنگ ءَ اَت کمو دیم ءَ ما شُتیں داں ھاسل ءَ پون اتک ءُ گوں پون ءَ گپ ءَ لَگّ اِت ءُ دومی نیمگ ءَ شُت من توار کُت بیا رویں جلدی گُڑا من ءَ گُشت ئِے تو برو پد ءَ جلدی بیا من تئی ودار ءَ ھمد ءَ کناں مرچی من نہ مَنّت ءُ ما ھمد ء َمسکرا ءُ کندگ ءَ لَگّت این ءُ من ءَ تیلانک دیان ئِے کُت ءُ دیم دات گُشت ئِے منی پونے اتک ءَ مرچی تو برو بلے جلدی بیا ھیر من آئی ءَ چہ مجبور بوتاں ءُ شُتاں لوگ ءِ دپ ءَ اُوشتات ءُ سلام دات ءُ پد ءَ من گُشت من روگ ءَ آں من وس کُت لوگ ءِ مردماں کہ بہ نند آپے بُور بلے دلءَ نہ من اِت من گُشت ھاسل ڈن ءَ منی ودار ءَ اِنت جلدی رواں. من در کپت آں چہ گس ءَ داں ھاسل ءَ ھمد ءَ نزدیک ءَ دیوار ءِ پُشت ءَ اُوشتاگ ءُ من ءَ زور ءَ آوازے دات ئِے ءُ پد ءَ منی سر ءَ کَندگ لگ اِت کہ ترا شر تُرس اینت . مرچی ھمے ساھت گوں ھاسل ءَ زندے گُڈی ساھت اَت ءُ گُڈی کندگ ءُ مسکرا اَت.
ما راہ کپتیں ھاسلو چہ من دیمتر ءَ اَت داں کمو ساھت گوست داں تیراں آواز کُت منی ھمے ساھت ءَ چم پہ ھاسل ءَ کپتاں من دیست ھاسلو گوں وتی اُشتاتگیں بالاد ءَ زمین ءِ باھوٹ بوت من زور زور گوانک جَت ھاسلو…….. بلے من ءَ پسہ ئِے نہ دات داں دیر ءَ تیراں آواز کُت ھمے ساھت ءَ لوگ ءِ مردم اتک اَنت ءُھاسلو بڈ ءَ کُت ءُ لوگ ءَ آؤرت داں ھاسلو ءَ سَرءَ تیر لگ اِت . اے ساھت ءَ گُش ئے آسمان منی سرءَ کپت منی چم تھار بوت اَنت ءُ ھر نیمگ ءَ گریوگ ءُ زاری اَت من ھاسل ءِ سر کُٹ ءَ کُت داں ھاسل کندگ ءَ اَت من ءَ گوں دل ءُ سِتک ءُ یکین اَت کہ ھاسلو چہ من جُتا نہ بیت اے بچکند چوں ارزان ءَ نہ پُرشیت من ھاسل ءِ دست دست ءَ کُت ءُ ھاسل منی دست زور دات بلے دپ ءِ پُر کندگ ءَ ات. ھمے دمان ءَ مردم ءَ ھاسلو زُرت پہ کیچ ءَ پہ نادراہ جاہ ءَ بُرت پہ دوا ءُ درمان کنگ ءَ بلے ھاسل ءَ گیش ھمراہ داری نہ کُت راہ ءَ مارا تھنا یل کُت ءُ پہ بچکندگے وتی گڈی منزل ءَ شُت.
ھاسل من ءَ اے گپ انگت باور نہ کنت کہ تو مارا یل کُتگ ھر نیمگ ءَ تئی بچکندگانی آواز اِنت ھر نیمگ ءَ تئی گپ ءُ ھبرانی آواز اِنت ھر ساھت ءَ گش ئے تو گوں من ھمراہ ئےھاسلو پہ تئی بچکندگ ءَ دل سک تلوس ایت بیا واتر کن کہ بے تو اے میتگ تئی سنگت درچک ءُ دار دْرست پُرسیگ اَنت بیا واتر کن بیا واتر کن

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

پنجگور ءِ بنجاھی بازار چتکان ءَ پاکستانی پوج ءَ یک بلوچ نودربرے زورانسری آوار جتگ ءُ بیگواہ کرتگ –

گیشیں ھالانی رِد ءَ مروچی مگرب ءِ وھد ءَ پاکستانی پوج ءَ پنجگور ءِ دمگ چتکان ءَ بلوچ نودربر ثناء اللہ ء دوست محمد جاھمنند بلیدہ زورانسری آوار جتگ ءُ ناشناسیں جاھے ءَ بُرتگ –

زانگ بہ بیت بلوچستان ءِ جتا جتائیں دمگاں زورانسری آوار جنیانی رِد یکشل ءَ برجاہ انت ـ زورانسری اوار جنیانی بگیری ءَ وائس فار بلوچ مسنگ پرسنز گوستگیں یک دھکے ءَ بیگواھیں مردمانی یل کنائینگے ھاتر ءَ زھرشانی کنگ انت ـ بلے دنیگت ءَ تاں زورانسری آوار جنیانی تہ ءَ کمی نہ اتکگ –

دی بلوچستان پوسٹ

افغان ءِ مزن شھر کابل ءِ شھدربرجاہ ءَ ایرانی کتاب پدراھی جاہ ءِ سر ءَ ناشناسیں مردماں اُرش کتگ اُرش ءِ آسر ءَ بیست مردم بیران بوتگ اَنت –

کابل شھدربرجاہ ءِ نزیک ءَ ھما وھد ءَ تیرگواری بندات کنگ بوتگ وھدیکہ افغان ءُ ایرانی واکدار شھدربرجاہ ءِ تہ ءَ یک کتاب ءِ پدرائی ءَ کنگ ءَ بوتگ انت –

اُرش ءَ پد شھدربرجاہ ءِ تہ یِے درسیں مردم پہ وش ءُ سلامتی اود ءَ چہ درکنگ بوتگ انت –

اے درگت ءَ ملکی وزارت جاندراھی ءِ کسان کمک جارکش معصومہ جعفری ءَ اھوالکاراں گوں تران کنان ءَ گوشتگ کہ اے اُرش ءَ کم چہ کم ھشت مردم زدگ ھم بوتگ –
اشانی تہ ءَ نودربر ءُ زانشجاہ ءِ استاد ھم ھوار انت – پہ جاندراھی ءِ ھاتر ءَ نزیکیں نادراہ جاہ ءَ برگ بوتگ انت –

رسانکدری ادارہ اے ایف پی ءِ گوشگ انت کہ افغان طالباناں اے اُرش ءَ پد گوشتگ کہ اھانی اے اُرش ءَ ھچ وڑیں دست نیست – بلے گوست ءَ افغانستان ءَ بازیں شھرانی تھا مزنیں وانگجاھی اداراھانی سر ءَ دائش ھوار ایندگہ ناشرکاریں گلاں اُرش کتگ –

دومی نیمگ ءَ افغانستان ءَ مسافر گاڑی ءِ تراک ناکیں شوروانی زد ءَ اتکگ ءُ ھشت مردم بیران بوتگ اَنت –

اے تراک افغانستان ءِ زرباری اُستان ھلمند ءِ مزن شھر لشکر گاہ ءِ دمگ بولان ءَ بوتگ –

اھوالکار ءِ رد ءَ بولان ءَ مسافر گاڑی ءِ طالبانانی چیر کرتگیں تراک ناکیں شوروانی زد ءَ اتکگ ءُ تراک ءِ آسر ءَ گاڑی پُرشتگءُ یکیں کھول ءِ ھشت مردم بیران بوتگ اَنت –

دی بلوچستان پوسٹ

روکپتی بلوچستان ءَ جھانی ناداھی کرونا وائرس ءِ کچ گیش بیان اِنت، نوکیں مردمانی نادراھی ءِ گورجنگ ءَ کرونا وائرس ءَ گپتگیں مردمانی کَچ گیش بیتگ اَنت –

اھوالکار ءِ رد ءَ بیست ءُ چار ادارانی تہ ءَ یک سد ءُ ھپتاد ءُ پنچ کرونا نادراھی ءِ آماچ بیتگ اَنت کہ چریشانی تہ ءَ دَہ مردم بیران بیتگ اَنت –

اھوالکار ءِ رد ءَ نوکیں نادراھانی پدراھی ءَ پد روکپتی بلوچستان ءَ ھبدہ ھزار ءُ دو سد ءُ بیست ءُ دو مردمانی کَچ ءَ سر بیتگ اَنت –

کرونا وائرس ءَ بیران بیتگیں مردمانی کَچ ھپت سد ءُ چِل ءُ یک ءَ سر بیتگ اَنت –

چاگردی مردمانی گوشگ اِنت کہ سرکار نادراھانی ھیال ءَ کنگ ءَ نہ اِنت پرے ھاتر ءَ دمگ ءَ کرونا وائرس گیش ودان اِنت ءُ مردمانی ساہ ءَ گران اِنت –

نبشتانک: نمدی ءِ پہ وتی ماتی ءَ

نبشتہ کار: زمین زھگ

دی بلوچستان پوسٹ

ماتی!
ماتی دوشی من سک دیراں ودار کُت، بلے ودار ناسرجم بیتاں۔۔۔ شپ گوست ءُ بام ءَ ٹِک دات روچ زمین ءِ دلبند ءَ آستو آستو کپان اَت منی ودار مناں بے تاھیر کنگ ءَ اَت بلے منی ھیال گوں منی موبائل ءَ اَت –

ماتی! اے ھما روچ اِنت کہ من گِس یلہ دات۔۔۔ اے ھما روچ اِنت کہ تو ھمک سال ھمے روچ ءَ اے گپ لازم جتگ کہ بیا کہ نی تر ءَ دگہ سال ءِ سرجم بوت – ماتی انچوش کہ تو ھمک روچ ءَ گوں زھیر ءُ اُپاراں گوازین ئے شپ ءَ گوں یاتاں۔۔۔ انچوش مناں ھم ترا پہ سک زھیر کنت –

او ھمے ساھتاں ءَ سویس نبشتکار کارڈینال مرمیلوڈ ( cardinal Mermillod)ءِ گشتن مناں مدام گیر پیداک اِنت کہ ” مات ھما چیز انت کہ ھرکسی جاہ ءَ گیپت کنت بلے دگے چُشیں کس نیست کہ مات ءِ جاہ ءَ بہ گیپت ” منا باز رند ءَ تئی چارگے تلب بیتگ، وتی دردیگیں ساھتاں منی دیم ءَ بس تئی اکس زاھر بیتگ او پدا تئی زھیر، تئی مھرانی ھاتر ءَ من سک باز تلوس اتگاں—بلے۔۔۔ پد ءَ وتی پیسلہ ءُ جنگ۔

جنگ پہ باندات ءَ، جنگ گوں وت ءَ، جنگ زمینی ھداھانی تپاوت ءَ ھتم کنگ ءَ، جنگ پہ آزاتیں استان ءَ ۔۔۔ جنگ پہ وتی ھک ءِ ادا کنگ ءَ۔

ماتی بلوچ کواس کازی داد ریھان ءِ گوادر مُچی ءَ گوشتگیں گپ مناں سک دوست بیت – واجہ گوشیت کہ مناں ھم جنگ دوست نبیت بلے جنگ ءَ ابید بیا مناں دگے راھے بہ ڈس کہ ھما منی ایمنی ءِ راہ بہ بیت، ھما منی شھیدانی پیش داشتگیں راہ بہ بیت –

او ماتی! مناں ھم، من زاناں تو باز جیڑیتگ کہ من چتو اے پیسلہ زرتگ ءُ اے وتی نازرکیں کوپگاں اے جنگ جاہ داتگ کہ من ھما زھگ بوتگاں کہ مگرب ءَ پد گِس ءَ چہ در نہ کپتگاں مرچی چار سال انت کہ گِس ءِ جند نہ دیستگ –

ماتی یک سپاھیگ ءِ وتی مات ءِ نبشتہ کُتگیں کاگدے پسو ءَ ھمے گوشیت کہ مناں اگاں دو اُوپشن دئیگ بہ بیت چُٹی لوٹے یا جنگ جاہ ءَ رؤگ لوٹے؟ گڈا من جنگے ھاتر ءَ جاڑیگ باں، پمیشکہ کہ اے جنگ ءَ من پہ شما کنگ ءَ آں، اے ہرگز لازم نہ انت کہ منی پیسلہ چہ ھمے زانگ بہ بیت مناں پہ شما زھیر نہ کنت –

لبز گران ءُ سنگین اَنت، مُتاثر کننت، کار کنگے توکل ءَ دیاں اے مُرتگیں ارواہ ءَ، دَمبرتگیں پاداں جندے ساہ ءَ ھاٹیگ بکش انت – او ماتی مرچی مئے کرا ھما درور ھست اِنت۔۔ بیت کنت زیکیں جنگولانی کرا اے داستان ءُ اے درور نہ بوتگ اَنت – مرچی یک مات ءِ کہ بیرک ءَ وتی زھگے بڈا دئیگ ءَ اِنت ءُ پدائی کنگ ءَ پہ آئی ءِ مستریں توکل جوڈ بوھگ ءَ انت۔۔۔ یک پت ءِ کہ آئی دیم ءَ وتی جندے زھگے ناں بلکیں بلوچستان ءِ ھمک بزگیں مردمانی اکس گندگ ءَ پیداک اِنت –

ماتی اگاں کسے زانت ھما کشک ءَ آ راھی اِنت آ کشک آئی ءَ چہ پد ویران نہ بیت یا ھما توپک کہ آئی ءَ وتی کوپگاں دراتکگ پہ مکسدے ءَ ھما توپک آئی ءَ چہ پد ایر نہ بیت یا آ زانت کہ مناں بیر گروک ءِ ھستیں گڈا آ مرگے ھَمباز کنگ ءَ چک ءُ پد نہ بیت –

ماتی چوش ھم نہ انت کہ من تئی مھر ءَ نہ زاناں، تئی مھرانی کدر ءَ نہ زاناں۔۔۔۔، تئی جیڑگ پہ من چی اَنت سرپد نھاں چوش ھم نھیں۔۔- تئی مھر، تئی گوشتگیں سپت مناں زمین ءَ گوں بندوک کن انت ءُ زمین جنگے ءَ کپتگ۔۔۔ زمین ءَ ھون پکار اِنت –

ماتی من پہ تو ھچ نہ کُتگ، ءُ مناں ستک اِنت من ترا ھچ دات نہ کناں۔۔۔ بلے من دل ءَ جزماں پہ شما لگوری ءِ بدیں نامے ایر نہ کناں ءُ ناکے تو مناں شات بئے کہ کسے تر ءَ لگورئے ءِ مات بہ گُشیت –

اگاں ماتی اشی ءَ پد ھم تو گوشگ لوٹے واتر کن من واتر ھم بوتاں من تئی پیشی زھگ بوت نہ کناں ھچ ڈول ءَ، چیا کہ مروچاں منی مارشت، منی ارمان منی واھگ کُل گوں جنگ ءُ اے کشک ءَ بندوک اَنت کہ من راھی آں – چیاکہ اے جنگ منی جنگ اِنت، منی ھستی ءِ رکھینگ ءِ جنگ اِنت، منی آھوکیں پدریچ ءِ بقائے جنگ انت –

ماتی گڈی رند ءَ گوشگ لوٹاں اگاں پہ من دوا لوٹے، اے مہ لوٹ کہ من سلامت باتاں۔۔۔ اے ھم کہ من واتر بہ کناتاں۔۔۔۔، اگاں دوا لوٹے مئے سوبمندی ءِ دوا بہ کن کہ۔من گوں ھمراھاں مُدام سوب مند باتاں-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔