من آں ءُ منی کھول ءَ یکشل ءَ دلسیاہ ءُ بیھار دیگ بیگ ءَ اِنت- سمی دین بلوچ

بلوچ یکجھتی کمیٹی ءِ رھشون سمی دین بلوچ ءَ گْوشتگ کہ پنچ روچ ءَ ساری وھدے من وتی کھول ءِ ھمراھی ءَ وتی بُنکی ھنکین مشکے ءَ شتگ آں، گڑا منی سر بیگ ءَ پاکستانی پوج ءَ مئے میتگ انگیر ءَ کتگ – گوستگیں پنچ روچاں چہ سرجمیں میتگ پوج ءِ انگیر ءَ اِنت – بیست چار کلاکاں دورگند، ڈرون کیمرہ ءُ دگہ چاروگیانی سر ءَ منی رندگیری کتگ – سرجمیں شپ ءَ مئے لوگاں چہ وپسگ وھد ءَ بسترانی سر ءَ لیٹ جتگ- منی سُر ءُ پُر یکیں جاہ ءَ داشتگ انت ءُ منی نام گپتگ ءُ سرجمیں سیاداں جتاجتائیں دروشم ءَ تُرسینگ، بیھار داتگ اَنت-

آئی ءَ گْوشتگ کہ منی میتگ ءِ سرجمیں لوگانی پٹ ءُ پول کتگ، مردینانی اکس گپتگ اَنت ءُ زالبولانی پجّار کارڈ زرتگ اَنت – راہ رؤکیں مردم تُرندیں گرم ءِ سر ءَ داں دیراں اوشتارینتگ اَنت- منی دو سیادیں نودربر آ زورانسری آوار جتگ ءُ بُنجل ءَ برتگ اَنت- اشانی تہ ءَ یکے بیست. چاراں کلاکاں جسمانی لَٹ ءُ کُٹ کنگ ءَ پد یل داتگ وھدے کہ دومی انگت بیگواہ ءَ اِنت-

آئی ءِ گوشگ اِنت کہ منی سیاداں زورانسری آرمی بُنجل ءَ برگ ءُ تامُر نکش کنائینتگ اَنت، آیاں من، بزانکہ سمی دین ءَ یک ناشرکارے گوشگ ءُ دروگ ءُ زوریں منانک درشان پرماتگ اَنت- ھمے وڑ من ءُ منی کھول نشانگ کتگ اَنت- دلسیاہ، تُرسینگ، بیھار ءُ دروگیں تامُراں چہ رد ءُ بد گوشگ، اے ادارھانی تُرس ءُ نزوری ءَ پدر کنت، کہ وتی بے سوبی ءَ چیردیگ واستا دروگیں پروپیگنڈا سھارگ ءَ زیرگ ءَ اِنت-

بی وائی سی رھشون ءَ گْوشتگ کہ ما ھمے مُچی ازیت ءِ گپ کنگ لوٹ اِیت آ زورانسری آوار جنی بہ بیت، یا سیاسی انسانی ھکانی باسک ءِ بیگ ءِ جرم ءَ سیاداں آوار جنگ، دلسیاہ یا بیھار دیگ، اے اولی رند نہ اِنت منی نزیکیں سیاداں تھنا منی نزیکی ءِ دارگ بُنیاد سر ءَ نشانگ کتگ- گوستناک ءَ ھم منی کھول مردم باز ماھاں، بلکیں سالانی سال زورانسری آوار جنی نشانگ کنگ بیتگ- آ انسانیت سوزیں رویشگ ءُ زوراکیانی دیمپانی کنگ کپتگ، تھنا ھمے ھاتر ءَ آ منی نزیکیں سیاد بیتگ اَنت-

آئی ءَ گْوشتگ اے رند ءَ منی سیاداں جُست ءُ پُرس ، زورانسری پٹ ءُ پول، تُرسینگ زورانسری آوار جنی ءِ مول ءُ مراد تھنا من آں جسمانی دروشم ءَ اناں بلکیں چاگردی ھساب ءَ ھم Isolate کنگ اِنت ءُ منی کھول ءَ منی جُھد ءِ مُچی سزا دیگ من آں تُرس آماچ کُت بہ کن اَنت دانکہ وتی راھبنداں، وتی توار ءُ وتی جُھد ءَ دزکش بہ باں-

سمی دین ءَ گْوشتگ کہ من سرپد باں کہ پاکستانی ادارہ ءُ پوج ھمے وڑ من آں ءُ منی سنگتاں بے توار کنگ واستا دروگیِں ایف آئی آر، زوراکی ، کُشت ءُ کوش بیھار، مچی سزا ءُ تُرسینگ وڑیں پندلانی سھارگ ءَ زیرگ ءَ اِنت، آ چوناھا مئے پُرایمنیں جُھد ءِ دیم ءَ ریاستی ادارھانی تُرس ءُ نزوری پدر اِنت- اے سرجمیں پندلاں بے سوب بیتگ، ءُ ما اے زوراکی ءِ دروشم ءَ ھچ وڑ بے توار نہ بہ ایں، نانکہ بلوچستان ء برجاھیں ریاستی زوراکی ءِ ھلاپ ءَ توار چست کنگ ءَ بند کن ایں-

آئی ءَ گْوشتگ کہ مئے جُھد زوراکی ءُ نا انساپی گُڈی نشان ءِ ھلاسی ءَ تاں برجاہ بیت-