ڈاکٹر مھرنگ بلوچ ءِ کھول ءَ مرچی پاکستانی لشکر ءِ جارکش ڈی جی آئی ایس پی آر ءِ نیمگ ءَ پریس بریپنگ ءَ جتگیں بُھتاماں گوں تْرندی ءَ رد کتگ ءُ اے بُھتام ”بے بن، دروگ ءُ سیاسی بیر ءِ بنیادے ءَ“ لیک اِتگ اَنت۔
مھرنگ بلوچ ءِ کھول ءَ شنگ کتگیں بیانے ءِ تہ ءَ گْوشتگ کہ ڈی جی آئی ایس پی آر ءَ یک رندے پد ءَ ڈاکٹر مھرنگ بلوچ ءُ آئی ءِ پرامنیں جھد بلوچ یکجھتی کمیٹی ءِ سر ءَ زوراکی ءِ تہ ءَ ھوار بوگ ءِ بُھتام جتگ وھدے کہ ریاست ءِ گور ءَ سرجمیں نوکیں ٹیکنالوجی ءِ ھست بوگ ءِ اَبید ، انٹیلی جنس نیٹ ورک ءُ سرویلنس ءِ وسیلہ ءِ ھست بوگ ءَ اَبید ، اے بُھتام جتگ۔
کھول ءَ اے جُست چست کُت کہ ماہ رنگ بلوچ اگاں بے شک کجام ھم زوراکیں کارے ءَ گون اِنت گڑا پرچا ریاست سبوت پیش نہ کنت ؟رسانکدر ءِ دزمھار کنگ ءِ بدل ءَ پرچا پاک ءُ پلگاریں کانونی گامگیج نہ زور اِیت؟
بیان ءِ تہ ءَ گیش گُشگ بوت کہ ڈاکٹر ماہ رنگ اے وھد ءَ 3MPO ءِ رد ءَ دزگیر اِنت کہ نوآبادیاتی دور ءِ کانود اِنت کہ سپریم کورٹ ءُ جتا جتائیں ھائی کورٹاں باز رند ءَ ریاستی بد کرد ءِ لائک لیک اِتگ۔
چہ ڈی جی آئی ایس پی آر ءِ نیمگ ءَ مارچ ءَ زوراکی ءِ وئیل ءَ پد ماہرنگ بلوچ ءِ پریس کانپرنس ءِ بیان ءِ رد کنگ ءِ بھتام ھم جتگ اَت۔
کھول ءِ گشگ ءِ رد ءَ اے وئیل ءِ ذمہ واری یک سلاہ بندیں گلے ءَ زرتگ ءُ 12 جنگولانی نام ءُ پجار شنگ کنگ بوتگ ءُ 23 لاش نادراھجاہ ءَ آرگ بوتگ کہ بازیں لاش شپ ءِ تھاری ءَ کاسم کبرستان ءَ بے پجار ءَ کلّ کنگ بوتگ اَنت۔
آئی ءَ گْوشتگ ڈاکٹر مھرنگ بلوچ ءَ کدی ھم جنگولانی لاشانی لوٹ کنگ نہ بیتگ، بلکیں بے پجّاری ءَ کل کنگ بیتگیں مردمانی کبرانی پجار کنگ ءُ ڈی این اے ٹیسٹ کنگ ءِ لوٹ کرتگ۔ اے وڑیں جاور بلوچستان ءَ پہ زور بیگواھی ءُ در کانونی کوش ءِ ندارگ چارگ بہ بنت۔
کھول ءَ اے ھم گْوشتگ کہ آ ڈی جی آئی ایس پی آر ءِ بُھتامانی ھلاپ ءَ کانونی کارروائی ءِ سر ءَ ھیال ءُ لیکہ کنگ ءَ اَنت۔
بیان ءِ گڈسر ءَ ماہ رنگ بلوچ ءِ کھول ءَ گشتگ کہ مارا چہ رسانکدر ءَ زبھر کنگ بوگ ءَ انت، انساپ، ءُ پاک ءُ پلگاریں آمیدگسی اَمل ءَ چہ زبھر کنگ بوگ ءَ انت۔ اے یک سرجمیں ریاستی زوراوری یے کہ ما ایشی ءَ را جھان ءِ پڑ ءَ پدر کنیں۔