بلوچستان ءَ پاکستانی لشکر ءَ زورانسری بیگواھیانی درچ گیش کتگ، جتا جتائیں دمگاں مردم دزگیر کتگ اَنت ءُ ناشناسیں جاھاں برتگ انت ءُ زورانسری بیگواھیں مردمے ءِ لاش دزکپتگ-
گیشیں اھوالانی ءِ رد ءَ گوستگیں شپ ءَ پاکستانی لشکر ءَ آواران ءِ ھند جھاؤ ٹوبوکڈ ءِ دمگ ءَ آپریشن کنان ءَ لوگانی تہ ءَ مانریتکگ ءُ ٹوبوکڈ جھاؤ ءِ نندوکیں بلوچ ورنا حنیف ء عزیز زورانسری بیگواہ کتگ۔
آواران ءَ سر بیتگیں ھالانی رد ءَ حنیف ءِ لٹ شاپ کنگ بوتگیں لاش کہ چہ لشکر ءِ دست ءَ بیگواہ بوتگ مرچی دزکپتگ۔
دومی نیمگ ءَ 21 مئی ءَ پاکستانی لشکر ءَ کیچ ءِ دمگ تربت ءَ زمباد ءِ ڈرائیور مھیب اللہ ء مھمد علی دزگیر کنگ ءَ پد بیگواہ کتگ۔ مھیب اللہ ءِ سیادی گوں سھر گشکور ءَ گشگ بیتگ، وھدے کہ آئی ءِ کھول ءَ سلامتی ءَ یل دیگ ءِ لوٹ کتگ-
ھمے روچ ءَ پاکستانی لشکر ءَ گوادر ءِ دمگ ڈور ءَ یک لوگے ءِ سر ءَ اُرش کتگ ءُ ھمل ء شوکت زورانسری بیگواہ کتگ ءُ برتگ ءُ کھول ءِ گْوشگ ءِ رد ءَ اُرش ءِ وھد ءَ گران بھائیں سامان ھم لشکر ءَ برتگ انت۔
آواران ءِ دمگ جھاؤ کنگرائی سلطان ء خیر بخش دو روچ انت بیگواہ اِنت۔ ترس اِنت کہ آ پاکستانی لشکر ءَ دزگیر کتگ، ایشی ءَ پد آ دیم ءَ نیتکگ۔
دومی نیمگ ءَ چہ چاگی ءَ نوشکی ءِ نیمگ ءَ روگ ءِ وھد ءَ سئے مردم بیگواہ اَنت کہ آھانی پجار حسین ء عبدالغفور، رمضان ء عبدالغفور ءُ مھمد داؤد ء عبدالحق بیگواہ اَنت۔ ایشانی موبائل پون بند انت ءُ ایشانی ھاندان ایشانی جان سلامتی ءِ واستا سک ءَ پریشان انت۔
کھول ءَ اے ترس درشان کتگ کہ آ پاکستانی لشکر ءِ دست ءَ پہ زور بیگواہ کنگ بوتگ اَنت۔
14 مئی ءَ پیر داد حکیم ءُ صادق وجداد چہ گڈگی کیلکور ءَ کولواہ ءَ روگ ءِ وھد ءَ پاکستانی لشکر ءَ دزگیر ءُ زورانسری بیگواہ کرتگ اَنت۔
چہ کراچی ءَ ھالانی رد ءَ بلوچ دمگاں پاکستانی لشکر وتی چھاپہ ءُ بگیری ءَ برجاہ دارگ ءَ اَنت۔ گوستگیں شپ ءِ دیر ءَ پاکستانی لشکر ءَ ماری پور ءِ سر ءَ اُرش کتگ ءُ چار مردم دزگیر کتگ کہ آھانی تہ ءَ دو برات شیراز ءُ سیلان صابر ءِ چُک انت ءُ بابا فضل ھوار اَنت ءُ پد ءَ بیگواہ کنگ بیتگ اَنت۔
کراچی ءَ دزگیریں دگہ مردمے ءِ پجار انگت ءَ پجار نہ بیتگ انت ۔
زانگ بہ بیت کہ سرجمیں بلوچستان ءَ پاکستانی لشکر ءِ نیمگ ءَ زوراکیں بیگواھی ءِ تہ ءَ تیزی اتکگ۔ ھما جاہ ءَ کہ روچے بازیں مردمانی زوراکی ءَ بیگواہ کنگ ءِ ھال رس ایت ءُ لھتے زورانسری ءَ بیگواہ کنگ ءَ پد دروگیں میڑاں کُشگ ءُ چگل دیگ بوگ ءَ انت-