ڈاکٹر ماھرنگ بلوچ ءُ سنگتانی بندیگ کنگ ءِ سرکاری پیسلہ برجاہ

بلوچستان ہائیکورٹ ءَ بلوچ یکجھتی کمیٹی ءِ رھشون ڈاکٹر ماھرنگ بلوچ، بیبو بلوچ، گل زادی بلوچ، شاہ جی، بیبرگ بلوچ ءُ غفار بلوچ ءِ تھری ایم پی او رد ءَ نزر بندی ءِ بگیری ءَ کانودی ارزیانی سرا پیسلہ داتگ ءُ درسیں دزبندی رد کُتگ ءُ سرکار نیمگ ءَ اے رھشونانی دارگ ءِ پیسلہ برجاہ داشتگ –

اے پیسلہ آمیدگس ءِ دو باسکی بینچ چیف جسٹس اعجاز سواتی ءُ جسٹس عامر رانا داتگ کہ اشی ءَ ھپتگے ءَ گیش انت –

امیدگسی پیسلہ ءِ سرا ڈاگٹر ماھرنگ بلوچ ءِ گھار نادیہ بلوچ ءَ گوشتگ کہ مروچی بلوچستان ہائی کورٹ ءِ دو باسکی بینچ ءَ ڈاکٹر ماھرنگ ءُ بی وائی سی ءِ رھشونانی بگیری ءَ دیگ بوتگیں درخواست رد کنگ بوتگ انت – آمیدگس ءِ اے پیسلہ آمیدگسی کرتن ءُ آئی ءِ دیانتداری ءِ سرا بازیں جست ءِ چست بیت –

عمران بلوچ کہ تھری ایم پی او ءِ رِد ءَ بندیگیں بی وائی سی ءِ رھشونانی وکیل ایں آئی ءَ گوشتگ کہ مروچی بیست ءُ دو مئی دوھزار ءُ بیست ءُ پنچ ءَ بلوچستان ہائی کورٹ ءِ بینج نمبر 1 ءَ ڈاکٹر ماھرنگ بلوچ ءُ ایندگہ تھری ایم پی او رِد ءَ بندیگانی سرا پیسلہ داتگ ءُ درسیں درخواست در کُتگ انت –

نامداریں انسانی ھکانی وکیل ایمان مزاری ءَ بلوچستان ہائی کورٹ اے پیسلہ ءِ سرا چمشانک داتگ ءُ گوشتگ کہ پیسری پیسلہ ءِ چارگ ءَ پد ما مار اِتگ کہ اے رندی ھم ھنچوش کنگ بیت ءُ ڈاکٹر ماھرنگ ءُ ایندگہ بندیگ یل کنگ نہ بنت – آمیدگس بائدیں انسانی ھکانی پھریز ءَ بہ کنت وت واکدارانی گوشگ ءِ پدا رھبندانی بگیری دارگ انت –

آئی ءَ.گوشتگ کہ ریاستی ادارہ پرایمنیں گھگیری ءِ ھلاس کنگ ءَ وتی سرجمیں زور ءَ جنگ ءَ انت –

ایمان مزاری ءَ چہ امیدگس ءَ جست کتگ کہ کئے ایں کہ اے گنوکی ءَ.دارگ ءَ انت؟

اھوالکار کیاء بلوچ ءَ چمشانک داتگ ءُ گوشتگ کہ بلوچستان ہائی کورٹ ءں اے پیسلہ ءَ ھمے گپ ءَ پدر کنت کنت امیدگس ایردست ءِ پناہ گاہ نہ انت بلکیں ریاستی زوراکیانی آلہ کار جوڈ بوتگ انت ادا آمیدگس انساپ ناں بس تاکت ءِ ھمراہ دار انت –

وکیلانی رِد ءَ بلوچستان ہائی کورٹ اے پیسلہ ءَ پد کانودی نمائندگانی گور ءَ بس سپریم کورٹ ءَ رؤگ ءِ راہ بچ اِتگ –

زانگ بہ بیت ڈاکٹر ماھرنگ بلوچ گوں سنگتاں 3MPO ءِ رِد ءَ ھما وھد ءَ.دزگیر کتگ انت وھدیکہ شال ءَ ریاستی زوراکیانی بگیری ءَ زھرشانی ءِ رھشونی ءَ کنگ ءَ بوتگ انت –

بلوچستان ہائی کورٹ ءِ پیسلہ ءِ سرا وکیل ءُ.اھوالکاراں گوشتگ کہ آمیدگس ءِ پیسلہ مئے ھما شکاں گیش کنت کہ پاکستان ءَ سیاسی باسک ھاسکربلوچ رھشونانی بگیری ءَ آمیدگسی ترام سرکار ءِ دست چیر انت کہ ملک ءِ تہ ءَ انسانی ھک ءُ کانودی آزاتی ءَ پہ تُرسناک بوت کنت