بلوچستان ءِ دمگ نوشکی ءِ ھند چہ گلنگور ءَ چار مردمانی لاش دزکپتگ انت۔
لیویز ءِ رد ءَ ناشناسیں مردماں تیر گواری کتگ ءُ اے مردم کشتگ انت۔ لاش پہ پوسٹ مارٹم ءِ ھاتر ءَ ٹیچنگ ھسپتال نوشکی ءَ دیم دیگ بوتگ اَنت۔
دزکپتگیں لاشانی پجار ھسپتال ءَ پنجاب ءِ نندوک کتگ انت ۔ ایشانی تہ ءَ دو پاکپتن ءِ مردم انت کہ ایشانی تہ ءَ دو مردمانی نام معین ء غلام مصطفیٰ ءُ حزیفہ ء مھمد لطیف ھوار انت۔ دگہ دوئیں مردمانی پجار عمران علی ء مقصود ءُ عرفان علی ء مقصود احمد ءِ ناماں بوتگ اَنت کہ آ دوئیں رحیم یار خان ءِ مردم اَنت۔
لیویز ءِ کارندھانی رد ءَ اے وئیل ءِ پٹ ءُ پول بندات کنگ بوتگ بلے اے وئیل ءِ مول ءُ مراد انگت ءَ زانگ نہ بوتگ اَنت۔