بولان ءُ تگران ءَ بمب تراکاں پاکستانی پوج ءِ 14 کارندھانی کوش ءِ زمہ واریاں من ایں – بی ایل اے

بلوچ لبریشن آرمی ءِ جارکش جیئند بلوچ ءَ رسانکدراں شنگ کتگیں درشان ءَ گوشتگ مئے سرمچاراں بولان ءُ کیچ ءَ دو جتا جتائیں اُرشاں پاکستانی پوج ءِ چاردہ کارندہ کشتگ انت-

جارکش ءَ گوشتگ بی ایل اے ءِ اسپیشل ٹیکٹیکل آپریشنز اسکواڈ ( ایس ٹی او ایس) ءَ مروچی بولان ءِ دمگ مَچ ءَ شورکنڈ ءِ ھند ءَ زورگریں پاکستانی پوج ءِ کاروان ءَ ھواریں یک گاڑی یے ریموٹ کنٹرول آئی ای ڈی ءِ نشانگ کتگ – تراک ءِ آسر ءَ کمانڈر طارق عمران ءُ سوبیدار عمر فاروق ءَ ھوار 12 کارندہ کشتگ انت ءُ تراک ءَ دشمنیں پوج ءِ گاڑی سرجم ءَ تباہ بیتگ-

آئی ءَ گوشتگ بلوچ لبریشن آرمی ءِ سرمچاراں یک دگہ کاروائی یے گوستگیں روچ ءَ کیچ ءِ دمگ کلگ تگران ءَ دو بج ءُ چِل منٹ ءَ بمب ڈسپوزل اسکواڈ ءِ کارندہ ھما وھد ءَ نشانگ کتگ انت کہ آ کلیئرنس ءَ دزبند بیتگ انت- تراک ءَ دشمنیں پوج ءِ دو کارندہ مرتگ انت-

جارکش ءَ گیش گوشتگ بلوچ لبریشن آرمی ءَ ڈنی کاردار گوشوکیں پاکستانی پوج وت چینی زرکار ءُ پاپا جونز ءِ چڑوکیں کریھداریں سلاہ بندین ٹولی یے- ھما پوج ءِ پوشاک ءِ چھرگ برے بندرگاھانی چوکیداری، برے رھداریانی نگھبانی، برے وام زیروکانی وش کنوک بیت انت ھما پوج مٹ بیتگیں واجکارانی مرزی ءَ وت ءَ بہ دار ایت آ ھچ بر راجی نہ انت زرکاری پوجے بیت انت اے کریھداریں پوج ءِ سر ءَ بلوچ سرڈگاریں ھکیگیں وارس سرمچار اُرشاں ترندی ءَ گوں برجاہ دار انت-

دومی نیمگ ءَ پاکستانی پوج ءِ جارکش آئی ایس پی آر ءَ اے ھال راست کتگ پوج ءِ سر ءَ اُرش بیتگ-

آئی ءَ گوشتگ اے اُرش ءَ چِل ءُ دو سالی ئیں سوپیدار عمر فاروق، کرک ءِ جھمنندیں بیست ءُ ھشت سالی ئیں نائیک آصف خان، بیست ءُ دو سالی ئیں سپاھی مھمد عاصم، اورکزئی ءِ بیست ءُ ھشت سالی ئیں نائیک مشکور علی، لکی مروت ءِ جھمنندیں بیست ءُ شش سالی ئیں سپاھی طارق نواز، باگ ءِ جھمنندیں بیست ءُ ھشت سالی ئیں سپاھی واحد احمد فیض، کوھاٹ ءِ جھمنندیں بیست ءُ ھشت سالی ئیں سپاھی مھمد کاشف کشگ بیتگ انت-