سورت ھان مری ءِ کتاب: “راجدوستی ءِ پُژدر” ءِ سر ءَ یک چمشانکے
نبشتہ کار: ساجد بلوچ
دی بلوچستان پوسٹ
اے کتاب ءِ نبشتہ کار سورت ھان مری اِنت ءُ اے کتاب 2022 ءَ چہ ”اِلم ءُ ادب پبلِشر اینڈ بک سیلز“ ءَ چاپ کتگ۔ کتاب ”راجدوستی ءِ ُپژدر” سیزدہ ارزشداریں سرھالانی سر ءَ باوست کنت بلے من اد ءَ لھتیں پُر ارزشداریں سرھالانی سر ءَ گپ کناں کہ آ بلوچستان ءِ جھد ءَ گیش مُھکم کنگ ءَ مارا سیاسی آگاھی دے اَنت۔ اگاں کسّے اے کتاب ءَ چِست بکنت ءُ پہ ھب ءُ واھگے بہ وان ایت ئِے گڑا آئی ءَ را باز چیز راجدوستی ءِ بابت ءَ پہ دربرگ ءَ رس ایت۔ آئی ءَ پہ دربرگ ءَ اے سرھالانی سر ءَ زانت ءُ سرپدی رس ایت: راجدوستی، انیگیں راجدوستی، زبان، یوروپین راجدوستی، ءُ گلوبلائیزیشن۔
اے کتاب راجدوستی ءِ بابت ءَ مارا اِلم ءُ زانت دنت ءُ من چہ اے کتاب ءَ ھمے دربُرتگ کہ راجدوستی یک سرجمیں پجّارے ءُ راجدوستی ءِ مارشت یک راجے ءِ تہ ءَ ھما وھد ءَ زندگ ءُ مُھر بیت وھدیکہ آ وتی زبان، دود ءُ ربیدگ، گْوستانک، ءُ لبزانک ءِ دیمروی ءِ ھاتر ءَ جھد بہ کنت۔ مارا بُرز ءِ نبشتہ کُتگیں گالرد ءِ سر ءَ ھما وھد ءَ بیسہ بیت وھدیکہ ما آیانی سر ءَ درور بہ دے ایں۔ درور اے پیم ءَ اِنت کہ 1945 ءَ پد یوروپین راجدوستی ءِ اُنڈال توانگر بوگ ءِ سبب اے بیت کہ آ وتی زبان، گوستانک، دود ءُ ربیدگ، ءُ لبزانک ءِ سر ءَ باز بزاں روچ ءُ شپ کار کن اَنت۔ یک نبشتہ کارے، آئی ءِ نام آبسان بیت، یک نا وانندگے ءَ را جست کنت کہ تئی ھیال ءَ راجدوستی چی یے؟ آئی ءِ پسہ ھمے بیت کہ من یک پرینچے آں۔ ھمے ندکار آئی ءَ را پد ءَ جست گیپت کہ تئی راجی کمنٹمنٹ چی اِنت؟ آ پد ءَ ھمے پسہ ءَ دنت کہ من یک پرینچے آں۔ ھمے جستانی پسہ مارا اے سَھرا کنت کہ یک راجے ءِ نام راجدوستی ءِ مستریں چیدگ اِنت۔ اگاں یکے گُش ایت من یک پرینچے آں ءُ من گش آں من یک بلوچے آں، گڑا اے یک سرجمیں پجّارے سَھرا کنگ ءَ اِنت۔ ایشی ءَ چہ ابید اے کتاب مارا باور کنائین ایت کہ راجدوستی ءِ برورد راجی اِستان national state اِنت۔ اگاں یک راجی اِستانے دیمروی کنگ لوٹ ایت گڑا آئی ءِ تہ ءَ کمیونزم ءُ جھمورت ءِ نزام شر بہ بنت ءُ راجی اِستان ھما وھد ءَ پُرشت ءُ پروش ءِ آماچ بیت وھدیکہ دوئینانی تہ ءَ یکے نزور بہ بیت۔
اے کتاب مارا سرپد کنگ ءِ جھد ءَ کنت کہ یک راجے ءِ تہ ءَ باز زبانانی موجود بوگ یک جیڑھے نہ اِنت ءُ نیکہ بازیں زبان ءِ بوگ یک راجے ءَ را پُرشت ءُ پُروش ءِ دیمپان کنت۔ اے کتاب اے درور ءَ دنت کہ چو وَ سوئزر لینڈ ءِ تہ ءَ ھم باز زبان بیتگ ءُ انگت تک ھست اَنت بلے آیاں زبان ءِ جتائی ءِ سبب ءَ یکے دومی ءَ وت ءَ جُتا نہ کُتگ۔ بلے بد بھتی ءَ بلوچستان ءِ لس مھلوک اے جیڑہ ءِ آماچ اَنت ءُ باز ھمے گش اَنت ما براھوی زبان ءَ ھبر کنیں ما شرتر ایں، باز گش اَنت ما بلوچی زبان ءَ ھبر کنیں ما چہ براھویاں شرتر ایں، لھتیں گش اَنت ما جدگال ایں مارا ھم ارزشتے ھست، ءُ لھتیں گوش اَنت ما سرائکی بلوچ ایں مئے ھم نام باید اِنت گرگ بہ بیت۔ بلے رینان گش ایت الم نہ اِنت کہ تھنا زبان راج دوستی ءِ مارشت ءَ توانگر بہ کنت۔ آ گوش ایت چوناھا راجدوستی گوں مردمانی ارواہ ءُ جزبات ءَ بندوک اِنت۔ رینان ءِ لیکہ ءَ اگاں ما بچار ایں گڑا مارا ابن ء کُلدوم ءِ اسبیت we-feeling ءِ دیدانک دیم ءَ کیت ءُ مجگ ءَ جاگہ کنت۔ اسبیت ءِ مارشت ابرم ءَ ھر راج ءِ تہ ءَ ھست اِنت۔ ایشی ءِ درور ءَ تو اے پیم ءَ دات کُت کن ئے کہ اگاں یک بلوچے توری آ اوگانستان ءَ بہ بیت یا ایران ءُ یا کہ دگنیا ءِ ھر کُنڈ ءَ بہ بیت آئی ءِ گوم ءَ نا انساپی ءُ زُلم بہ بیت گڑا رودراتکی ءُ یاکہ روکپتی بلوچستان ءِ بلوچانی تہ ءَ اسبیت ءِ مارشت ودی بیت ءُ پد ءَ ھمے بلوچ وتی زِد ءُ کینگ ءَ دژمن ءِ بگیری ءَ سَھرا کن اَنت۔ اگاں من ابن ء کُلدوم ءِ اسبیت ءِ لیکہ ءِ گوناب ءَ گوں herd-psychology ءَ بہ کناں گڑا اے دوئینانی میان ءَ مارا نزّیکی ءُ سیادی گندگ ءَ کیت۔ واجہ سورت ھان مری وتی کتاب ءِ تہ ءَ نبشتہ کنت کہ اگاں یک ڈنّی راجے بئیت ءُ یک نزوریں راجے ءِ سر ءَ اُرش ءُ کبزہ بہ کنت گڑا چہ ابرم ءَ دومی راج ءِ لس مھلوک وتی زاتی جاوراں یکے دومی ءَ گیش ءُ گیوار کنگ ءِ سوڑگ ءَ کن اَنت ءُ دژمن ءِ بگیری ءَ جنگ کن اَنت۔ اے پیمیں یکمُشتی ءِ جزبات ءَ ما انگریزی ءَ herd-psychology گوش ایں۔ اگاں ما رینان ءِ لیکہ ءِ گوناب ءَ گوں ابن ء کُلدوم ءِ اسبیت ءَ بکن ایں گڑا اے دوئینانی میان ءَ مارا نزّیکی گندگ ءَ کیت ءُ ایشانی لیکہ herd-psychology ءِ گوم ءَ ھم باز نزّیکی کیت۔
ایشی ءَ چہ ابید اے کتاب نوکیں راجدوستی modern nationalism ءِ نیزوریانی سر ءَ اوں گپ ءُ تران کنت ءُ آیانی تہ ءَ دو نزوری گِندگ ءَ کیت کہ چینچو مھلوک چہ آجوئی ءِ جھد ءَ دلپروش بنت۔ یک نزوری یے نوکیں ترز ءِ جنگ اِنت ءُ دومی زرداری capitalism اِنت۔ اولی ءِ تہ ءَ ما گندیں کہ انیگیں دور ءَ زورگیریں راجانی کرّ ءَ ایٹم بمب، ڈرون، اِسپاھی وائر spyware، چِپ Chip ءُ دگہ بازیں انیگیں جنگی ترز ءُ اوزار ھست اَنت کہ چہ آیاں لس مھلوک آجوئی ءِ جھد ءِ ھاتر ءَ دلپروش اَنت۔ اسل ءَ مھلوک دلپروش اِنت ءُ آ ھر وھد ءَ گوش اَنت آجوئی گرگ گْران اِنت بلے اے پیم ھم نہ اِنت کہ سرجمیں مردم دلپروش اَنت۔ ایشانی تہ ءَ اگاں ما اِسپائی وائر ءِ گپ ءَ بہ جنیں گڑا ما اسرائیل ءِ درور ءَ دات کُت کنیں۔ اسرائیل ءِ اڈ کُتگیں اسپائی وائر یک انچیں ساپٹ وائرے کہ موبائل ءُ لیپٹاپ ءِ تہ ءَ بَگر تئی موکل permission ءَ پُتر ایت ءُ موبائل ءُ لیپٹاپ ءِ درستیں توار، تامر، ءُ ایس ایم ایساں دومی مردم ءِ کرّ ءَ زوت بارت ءُ سر کنت۔ ھالتاکانی رِد ءَ اسرائیل ءَ اے ساپٹ وائر بازیں ملکاں پہ بھا کنگ ءَ داتگ ءُ آیانی تہ ءَ پاکستان ھم گون اِنت۔ ایشی ءَ چہ ابید زرداری ءَ مردم تبکانی تہ ءَ بھر کُتگ۔ سیر سیرتر بوگ ءَ اِنت ءُ نیزگار نیزگارتر بوگ ءَ اِنت۔ اے گپ ءَ کارل مارس ھم جنت۔ گوشگ ءِ مول ءُ مراد ایش اِنت کہ نیزگار زرداری ءِ نزام ءَ دلپروش کُتگ۔ نیزگار بس دو وھد ءِ نان ءَ گیشتر نہ سوچ ایت ءُ اے پیمیں مردم جھد ءِ آجوئی ءِ جنز ءَ باز دلپروش ءُ گِستا اَنت۔
اے کتاب مارا سرپدی دنت کہ 1945 ءِ دور ءَ راجدوستی ءِ لیکہ سکّ ءَ مُھر اَت ءُ اے دور ءَ یورپ ءِ گیشتریں، کسانیں ءُ مزنیں راج شوشلزم ءُ کمیونزم ءِ منّوک ات اَنت چمیشکا ھمے دوران ءَ بازیں راج آجوئی گیپت۔ بلے 1970 ءُ 1980 ءِ وھد ءَ زورگیریں راج وتی پندلانی سازگ ءَ دست گٹ ات اَنت ءُ زرداری ءِ نوکیں دْروشم دگنیا ءِ بھرے جوڑ کُت۔ زرداری ءِ نوکیں دْروشم ءَ ما گلوبلائیزیشن globalization گوش ایں۔ گڑا زورگیریں راج وتی پندلانی سازگ ءَ سوبمند بوت اَنت پرچاکہ گلوبلائیزیشن سوشلزم ءُ کمیونیزم ءَ پروش دنت ءُ انگت تک دیگ ءَ اِنت ئِے۔
سورت ھان مری ءِ کتاب ءِ رد ءَ گلوبلائیزیشن یونائیڈد نیشن ءِ کمک ءَ گیشتر ایشیا ءُ میڈل ایسٹ ءِ تہ ءَ توانگر اِنت۔ چوناھا دامگ internet گلوبلائیزیشن ءِ یک نوکیں رنگے ایشی ءِ وسیلہ ءَ ملکانی میان ءَ تھنا کراس ٹریڈ انّا بلکیں اے ملکاں یکجاہ ھم کنگ ءَ اِنت ءُ آیانی سیاسی ءُ زرّی سِیتّاں interests روچ پہ روچ گیشتر کنگ ءَ اِنت۔ ملکانی سیاسی ءُ زرّی سیادی گلوبلائیزیشن ءِ سبب ءَ تُرند اَنت چمیشکا ما اے دگنیا ءَ گلوبل ویلیج گوش ایں۔ چوناھا انیگیں ٹیکنولوجی ءَ گلوبلائیزیشن آرتگ ءُ اے گپ و راست اِنت کہ ٹیکنولوجی ءَ دگنیا ءَ باز آسراتی داتگ ءُ ھر ھما آسراتی داتگ کہ آ آسراتی مئے اُمیت ءَ چہ ڈنّ بیتگ اَنت بلے ٹیکنولوجی ءَ را راجی آجوئی ءِ جھد پشت ءَ اوں چگل داتگ۔ اے کتاب ایشی ءِ سببانی بابت ءَ وش چیزان ءَ درشان کنت اگاں ما اے کتاب ءَ بہ وان ایں گڑا ما چہ بازیں راستیاں چہ آگاہ بَہ ایں۔ گلوبلائیزیشن ٹیکنولوجی ءِ یک بھرے ءُ ھمے گلوبلائیزیشن ءَ ما آمریکنائیزیشن ھم سرپد بَہ ایں پرچاکہ آمریکہ ءَ دامگ ءِ وسیلہ ءَ وتی زبان، دود ءُ ربیدگ، تامُر، سوت، لبزانک ءُ ھر ھما چیز کہ یک راجے ءَ را زندگ کنت دیم ءَ آؤرتگ۔ گڑا اے چیز پھمگ لوٹ ایت کہ گلوبلائیزیشن نوآبادکاری ءِ یک اوزارے کہ چینچو نزوریں راجاں ایردست کنت۔
انچوش گوش اَنت چہ سرد جنگ cold war ءَ پد وِسٹ، یوروپ، ءُ ایشیا ءِ تہ ءَ گلوبلائیزیشن شینگ اِتگ ءُ راج، راجدوستی ءُ راجی جزبگ پروش داتگ۔ پد ءَ زورگیریں راج یک مزنیں گیٹے پچ کن اَنت آ گیٹ ءِ نام world trade organization بیت ءُ ایشی ءِ وسیلہ ءَ آیاں گیشتر ایردستیں راج لگت مال کُتگ ات اَنت ءُ انگت تک کنگ ءَ اَنت اش۔
سورت ھان مری ءِ کتاب مارا اے چیز ءِ بابت ءَ سرپدی دنت کہ چہ 9/11 ءَ پد امریکہ ءُ آ دگہ زورگیراں وتی چمّ بلوچستان ءِ سر ءَ سک داتگ اَنت۔ چہ اے وئیل ءَ پد مئے ریجن بلوچستان ءِ تہ ءَ گلوبلائیزیشن ءُ بازیں زرّی ادارگ multi-national companies کار ءُ بار ءِ پائدگ ءِ ھاتر ءَ راجدوستی ءُ راجی اِستان ءِ لیکہ ءَ زوال کن اَنت۔ آ مرچی سوبمند اَنت ءُ ما چہ راستی ءَ پراموش ایں۔
چہ اے کتاب ءَ من اے دربرتگ کہ یک راجے ھما وھد ءَ زندگ بوت کنت وھدیکہ ھمے راج ءِ لس مھلوک وتی زبان، دود ءُ ربیدگ، گوستانک، شائِری ءُ لبزانک ءَ بستار دنت۔ اگاں یورپ ءِ تہ ءِ راجاں اے سرجمیں کار مہ کُتین اَنت گڑا یورپ ءِ تہ ءِ راجاں آجوئی بھ نہ گیپتگ ات۔ نوکیں راجدوستی ءِ نزوری ھما وھد ءَ ھتم بنت وھدیکہ لس مھلوک ءِ تہ ءَ آگاھی بئیت۔ اگاں آیانی تہ ءَ اینچو بودِشت ھست کہ دگنیا ءِ تہ ءَ ھچ نوکیں جنگ ءِ ترز آیانی آجوئی ءِ جھد ءَ داشت کُت نہ کن اَنت، گڑا آیانی پجّار رکینگ بیت ءُ آ آیوکیں وھداں یک زندگیں راجے ءِ ھدابند بوت کن اَنت۔ ایشی ءَ چہ ابید گلوبلائیزیشن ءَ انیگیں وھد ءَ مارا آسراتی ءُ سیت داتگ پرچاکہ ما چہ رسانکدر ءَ وتی کاراں کُت کنگ ءَ ایں بلے گیشریں سیت زورگیریں راج ءَ داتگ ءُ دیگ ءَ اِنت ئِے ھم۔ مارا اے چیز پوہ بوگی اِنت کہ گلوبلائیزیشن یک اوزارے امریکہ، بریٹش، چائینا، پاکستان، ءُ یونائیڈڈ نیشن ایشیا ءُ میڈل ایسٹ ءَ لُٹ ءُ پل ءِ ھاتر ءَ کارمرز کنگ ءَ اَنت ئِے۔ گلوبلائیزیشن آیانی پروپیگنڈا ءَ روچ پہ روچ توانگر کنگ ءَ اِنت تاکہ نیزوریں راجانی لُٹ ءُ پل ءَ بہ کن اَنت۔ گڈی ءَ من شمارا اے پنت ءُ سوجاں دیاں کہ زوت سورت ھان مری ءِ کتاب ءَ بہ وان اِت تاکہ شما چہ بازیں چیریں راستیاں سرپد بہ بہ اِت ءُ شما دژمن ءِ اڈ کُتگیں پندلاں ھم سرپد بہ بئیت کہ چینچو سد سال ءَ بُرز بریٹش ءَ اے جھد کُتگ کہ بلوچستان ءِ گھگیری ءِ لیکہ ءَ بہ دار ایت ءُ انّی ھپتاد سال ءَ بُرز اِنت کہ پاکستان ھمے پیم کنگ ءَ اِنت۔۔۔ مدام بلوچ بات اِت وتی زبان ءَ ھبر کنان بات ات۔ سبز بات بلوچستان۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-