بلوچ نودربرانی ترسینگ، پروپائلنگ ءُ چہ ھاسٹلاں کشگ ءِ سر ءَ بلوچ اسٹوڈنٹس کونسل پنجاپ ءِ پدردی ءِ درشان انت-
بلوچ اسٹوڈنٹس کونسل پنجاب ءِ نیمگ ءَ شنگ بوتگیں یک بیانے ءِ تہ ءَ پنجاب یونیورسٹی لاھور ءَ بلوچ نودربراں ہاسٹلاں چہ آزار ءُ پروفائلنگ ءُ زوراکی ءَ چہ درکنگ ءِ سر ءَ سکیں دلپدردی درشان کتگ۔
جارکش ءَ گْوشتگ: اے کار ریاستی وانگ ءُ زانگ ءِ بگیر داری ءُ بلوچ نودربراں چہ کتاباں دیر دارگ ءِ پندلانی بھر اَنت۔
بیان ءِ تہ ءَ گْوشگ بیتگ کہ بلوچستان ءَ سالانی سال اِنت کہ نودربرانی سر ءَ کارروائی ءُ زوراکی ءَ گار ءُ بیگواہ کنگ ءَ اَنت نوں پنجاب ءِ یونیورسٹیانی تہ ءَ ھم اے ڈول بوگ ءَ انت۔ وھدے کہ بلوچ نودربر چہ جاورانی زور ءَ درکپ انت ءُ پہ شرتریں وانگ ءُ زانگ ءِ ھاترا پنجاب ءِ نیمگ ءَ رھادگ بنت گڑا ادا ھم آھانی ھلاپ ءَ بدسلوکی یک ھمک روچی کارے جوڑ بیتگ-
جارکش ءِ رد ءَ پنجاب یونیورسٹی ءِ وتگڑین ڈسپلنری کمیٹی ءِ آڑ ءَ رازداریں ادارگاناں آجوئی داتگ۔ اے ادارھانی کارندہ برے نودربرانی راہ ءَ بند کن انت ءُ برے کلاس ءُ ڈپارٹمنٹ ءَ رو انت ءُ آھاں سیاسی کاراں چہ دست کش بوگ ءِ پاتراپ کن انت۔ نوں یونیورسٹی ءِ چاگرد یک تعلیمی ادارھے بدل ءَ پوجی چاونی ءِ ندارگ پیش دارگ ءَ انت۔
دیمترا گْوشگ بیتگ کہ بلوچ نودربر لاچار کنگ بیگ ءَ اَنت کہ یونیورسٹی انتظامیہ ءِ توسیپ ءَ ویڈیو جوڑ بہ کن اَنت ءُ چہ ھاسٹلاں درکنگ بیگ ءَ اَنت کہ ترس ءُ بیم ءِ چاگرد جوڑ کنگ بہ بنت دانکہ آ وتی وانگ ءَ یل بہ کن اَنت۔
آئی ءَ گْوشتگ: یونیورسٹی ءَ ساڑی ئیں بلوچ نودربرانی ھیال ءُ تنزیمانی بابت ءَ بے سیادی داروکیں مردمانی نیمگ ءَ چہ جست ءُ پرس ھم یک جیڑگے ءِ رواجے جوڑ بوتگ ۔
بیان ءِ تہ ءَ بلوچ زالبولیں نودربرانی جاور چَہ گیش پریشان کنوک بیان کنگ بوتگ اَنت ءُ گْوشگ بیتگ کہ زبان ءُ پوشاک ءِ بنیاد ءَ آ نشانگ جوڑ کنگ بیگ ءَ اَنت ۔ اگاں چندے بلوچ جنیں نودربر یکجاہ گندگ بہ بنت گُڑا آھاں بیھار نمدی دیگ بیت انت۔
جارکش ءَ چہ درستیں نودربر گل، سول سوسائٹی، ءُ انسانی ھکانی ادارگاں دزبندی کتگ کہ اے سنگین ءُ پشومانیں جاورھالانی ھلاپ ءَ وتی توار ءَ چست بہ کن اَنت، پرچا کہ بلوچ نودربراں چہ وانگ ءُ زانگ ءَ زبھر کنگ یک نا منّگ بوتگیں کارے کہ ایشی ءِ سک باز مذمت کنگ بہ بیت انت۔