ھُزدار : سرکاری پلامرزی ٹولی ءَ یک مردمے ءِ آوار جنی ءِ جُھد، تیرگواری ءَ چہ آئی وتی ھمراہ بیران

بلوچستان ءِ دمگ ھُزدار ءِ دمگ ءُ ناچ گوستگیں شپ ءَ سلاہ بندیں ڈیتھ اسکواڈ ءِ باسک یک لوگے سر ءَ بیڑبرتگ-

اِھوالکار رِد ءَ اُرشکارانی مول ءُ مراد لوگ ءَ ساڑی یک ورنایے ءِ آوار جنگ بیتگ، بلے کھول ءِ نیمگ ءَ چہ تُرندیں گھگیری ءِ سبب ءَ آیانی اے جُھد بے سوب بیتگ-

دمگی اِھوالکار گوشگ اِنت کہ وھدے کھول آوار جنی ءِ جُھد بے سوب کنگ واستا گھگیری کتگ گُڑا اُرشکاراں سر ءُ دیم تیرگواری بندات کتگ- اُرشکارانی تیرگواری ءَ چہ وتی ھمراہ جاہ پہ جاھی مرتگ-

وئیل ءَ پد آ دگہ اُرشکاراں وتی ھمراہ لاش یل داتگ ءُ تچگ ءَ سوبمند بیتگ اَنت- تنی وھدے واکدار ءَ اے درگت ءَ ھچ وڑیں درشان دیم ءَ نیاورتگ وھدے کہ لاش ھما جاہ ءَ کپتگ-

زانگ بہ بیت کہ بلوچستان ءَ پاکستانی پوج ءِ سروکی ءَ سلاہ بندیں ٹولی جوڑ کتگ کہ آیاں راجی زبان ءَ ڈیتھ اسکواڈ نام ءَ چہ زانگ بنت-

راجدوستانی گوشگ اِنت اے ٹولی ناں تھنا سیاسی ءُ چاگردی کارکنانی کوش ءُ بیگواہ کنگ ءَ ھوار اِنت بلکیں منیشات، آوار جنگ ءُ زرگرگ، ءُ دگہ جرم ءَ ھم پُرکار اَنت- اے ٹولی ریاستی ادارھانی سرجمی ءَ پلامرزی گون اِنت ءُ واکدار نیمگ ءَ چہ بے لگام کنگ بیتگ اَنت-