بلوچ یکجھتی کمیٹی ءِ بُنجاھی راھشون سمی دین بلوچ ءَ گْوشتگ کہ بلوچ سیاسی راھشون زاھد بلوچ، کہ مارچ دواھزار ءُ چاردہ ءَ پاکستانی پوج ءَ زورانسری بیگواہ کتگ اَت، تاں مروچی بیگواہ ءَ اِنت، آئی ءِ کھول یکشل ءَ آئی ءِ یل کنائینگ ھاتر ءَ جُھد کنگ ءَ اِنت کہ مروچی زاھد ءِ دومی برات ءُ کھول ءِ لاپ والینوک، شاھجان بلوچ روچ ء رھماں تیرگواری ءِ نشانگ کتگ شھید کتگ-
آئی ءَ گْوشتگ کہ اے دردناکیں وئیل ءَ ناں مزنیں رسانکدراں پیشداشتگ ، ناں کُشکارانی ھلاپ ءَ چُشیں کانودی کاروائی یا پوجی آپریشنے بیتگ، ناں یک وزیرے ءَ دلپدردی درشان ءِ ھاتر ءَ کھول گور ءَ اَنت، ءُ ناں پاکستانی اِھوالکار یا اشرافیہ ءَ اے زُلم ءِ ایر جنگ ءِ ھاتر ءَ مھم برجم داشتگ-
سمی دین ءَ گْوشتگ کہ رمضان ءِ وڑیں بابرکتیں ماھے ءَ ایردستیں بلوچ ءِ ریچوکیں ھون ءِ کسے ءَ پراہ نیست، پرچاکہ بلوچ ءِ ھون ارزان اِنت اے کس ءَ گندگ نئیت، نانکہ کسے ءَ درد ءُ گم ءِ سر ءَ آواز چست بیت- بلوچ ءَ را انسان سرپد نہ بنت، آ توری مات ءِ گُڈی چُک بہ بیت یا کہ لوگ ءِ لاپ والینوک- کودکیں ءُ بے میاریں بلوچانی ھون ءَ گمان اِنت کسے ءِ واستا ھچ بستار نہ دار اِیت، بلے اے برجاھیں پالیسی بلوچانی سیادی ءُ بستار ءَ دگہ راجانی مکابلہ پدر الّم کنگ ءَ اِنت-