چہ ھزدار ءَ سرکاری پلامرزی ءِ ٹولی ءِ دست ءَ آوار جنگ بیتگیں جنک اسما ءَ یل بیگ ءَ پد زھرشانی بنجل ءَ مشکل ءُ بِری ءَ وئیل ءِ بارو ءَ درشان کنان ءَ گوشتگ ھما شپ ءِ کساس دو بج ءَ مئے لوگ ءِ سر ءَ اُرش بیتگ- منی کھول لٹ ءُ کٹ کنگ بیتگ ءُ آیاں منی دست بستگ انت – منی دپ بستگ ءُ گٹ ءَ پُچ بستگ من ءَ گاڑی ءَ چگل داتگ – چریشی ءَ پد من بے ھوش بیتگ آں – من ءَ ھوش نہ کنت من کجا برگ بیتگ آں-
آئی ءَ گوشتگ وھدیکہ من ھوش ءَ اتکگاں من ءَ کڈن کنگ بیتگ اے ویڈیو ءَ جوڑ بہ کن – من ءَ گوشگ بیتگ کہ اگاں تو ویڈیو تیار نہ کن ئے گڑا تئی برات ءُ پت ءَ کُش ایں – من لاچار بیتگ آں زورانسری ویڈیو اش جوڑ کتگ- شما درستاں دیستگ – اے منی پیسلہ نہ بیتگ – بلکیں من ءَ کڈنی دیگ بیتگ ءُ ریکارڈ کنگ بیتگ-
آئی ءَ گوشتگ من ءَ گوشگ بیتگ کہ آمیدگس ءَ برو بیان ءَ بہ دے من وتی وشی ءَ شتگ آں ءُ وتی وشی ءَ اے مرد ءِ گون ءَ رشتہ کنگ لوٹ آں – منی بس یکیں واھشت بیتگ کہ سلامتی وتی لوگ ءَ سر بہ باں – اللہ پاک ءَ من ءَ سلامتی ءَ اے زالمانی پنچگاں آزاد کتگ-
گیش بیھار دیگ بیتگ آں کہ اگاں آمیدگس ءَ مئے مرزی ءَ درشان نہ دات تئی برات ءُ پت کشگ بنت اِنت- اے سَے روچاں من درامدیں کھولے ءِ گون ءَ بیتگ آں- من ناں چیزے وارتگ نا کہ یک گلاسے آپ وارتگ – من سرجمیں شپ ءَ ھاگہ بیتگ آں – یک دمانے ءِ وھد ءَ ھم نہ وپتگ آں – اللہ ءِ شکر انت من سلامتی ءَ وتی پت ءُ مات ءِ گور ءَ سر بیتگ اں- من انساپ ءِ تلبگاراں-