بلوچستان ءِ دمگ تربت ءَ ناشناسیں مردماں پاکستانی لشکر ءِ کاروان نشانگ جوڑ کتگ۔
دمگی مردمانی رد ءَ مرچی سھب دمگ ءَ مزنیں تراک ءُ تیرگواریانی توار اشکنگ بیتگ انت۔
تربت پولیس ءَ اے وئیل ءِ ھال راسر کتگ ءُ گشتگ کہ اے ارش ءَ یک کارندھے بیران بوتگ ءُ دو کارندھاں ھوار چار مردم ٹپیگ بوتگ انت۔
بیران بوتگیں کارندہ ءِ پجار رمضان ءِ نام ءَ بوتگ ءُ ٹپیگیں مردمانی تہ ءَ نائیک شمس الدین ءُ لانس نائیک امان اللہ ھوار اَنت۔
دگہ مردمانی گشگ اِنت کہ بیران ءُ ٹپیگیں کارندھانی کچ چہ ایشی ءَ گیشتر اِنت۔
دمگی مردماں دی بلوچستان پوسٹ ءَ گوں تران کنان ءَ گْوشتگ کہ پشمبے ءِ سھب ءَ تربت ءِ دمگ اپسر پسانی پیڑی ءَ کم چہ کم شش تراک ءُ مزنیں تیرگواری ءِ توار اشکنگ بیتگ انت۔
زانگ بہ بیت کہ نام گپتگیں دمگ ءَ بلوچ آجوئی لوٹوکیں سلاھ بندیں گل پرکار اَنت، بلے انگت ءَ کس ءَ اے اُرش ءِ زمہ واری نہ منّ اِتگ۔