بارکھان وئیل، چات ءِ تہ ءَ دزکپتگیں بچکانی لاش گراناز چُکانیگ اَنت

بلوچستان ءِ دمگ بارکھان ءَ صوبائی وزیر سردار عبدالرحمان کھیتران ءِ جوڑ کتگیں بندیگجاہ ءَ ببد بوتگیں کھول ءِ جیڑہ ءَ چات ءَ دزکپتگیں بچکانی لاش ڈی این اے ءِ رپورٹ اَتکگ اَنت-

لاھور لیبارٹری ءَ چہ اَتکگیں رپورٹانی رِد ءَ دوئیں بچک گراناز ءِ چُک اَنت وھدے کہ گراناز ءَ یک لاشے ءِ پجّار ءِ سر ءَ انکار کتگ کہ اشانی تہ ءَ یک لاشے منی چُک ءِ نہ اِنت-

زانگ بہ بیت ھمے سال 20 فروری ءَ بلوچستان ءِ دمگ بارکھان ءَ یک چاتے ءَ یک زالبولے ءَ ھوار دو ورناھانی لاش دزکپتگ اَنت چریشی ءَ پد اے گمان کنگ بیتگ کہ اے خان محمد مری ءِ لوگ بانُک گراناز بی بی ءُ آئی ءِ دوئیں چُکانی لاش اَنت-

بی بی گراناز ءِ لوگ واجہ خان محمد مری ءَ بھتام جتگ کہ آئی ءِ لوگ بانُک ءُ ھپت چُک بلوچستان ءِ ھال اھوالی وزیر سردار عبدالرحمان کھیتران ءِ جوڑ کتگیں بندیگجاہ ءَ بند اَنت-

بلے لیویز فورس آ کوھلو ءِ دمگ ءَ بیڑبرتگ ءُ بی بی گراناز ءُ آئی جنک ءُ چار بچکاں ھوار یل کنائینتگ اَنت-

وھدے کہ چات ءَ دزکپتگیں زالبول لاش ءِ پجّار انگت نہ بیتگ-